ಜೀವನದ ಪ್ರತಿ ಹಂತದಲ್ಲೂ ಸ್ನೇಹಿತರು ಬೇಕೇಬೇಕು. ಬಾಲ್ಯದಲ್ಲಿ ನಮ್ಮೊಂದಿಗೆ ಶಾಲೆಗೆ ಬರುತ್ತಿದ್ದ ಸ್ನೇಹಿತರೇ ಇರಬಹುದು ಅಥವಾ ಉದ್ಯೋಗ ನಿಮಿತ್ತ ಪರಿಚಯವಾದ ನೆರೆಮನೆಯ ವ್ಯಕ್ತಿಯೇ ಆಗಿರಬಹುದು. ಹದಿವಯಸ್ಸಿನಲ್ಲಿ ಅಥವಾ ಯೌವನಾವಸ್ಥೆಯಲ್ಲಿ ಪರಿಚಯಾದ ವ್ಯಕ್ತಿ ಇರಬಹುದು. ಆದರೆ ಒಬ್ಬ ಹುಡುಗ ಅಥವಾ ಹುಡುಗಿ ವೈವಾಹಿಕ ಬಂಧನದಲ್ಲಿ ಬಂಧಿಸಲ್ಪಟ್ಟರೆ ಸ್ನೇಹದ ಮಾನದಂಡವೇ ಬದಲಾಗುತ್ತದೆ.
ಹೆಚ್ಚಿನ ಪ್ರಕರಣಗಳಲ್ಲಿ ಹುಡುಗಿಯರಿಗೆ ಮದುವೆಯ ಬಳಿಕ ತಮ್ಮ ಗೆಳತಿಯರೊಂದಿಗಿನ ಸಂಪರ್ಕ ತಪ್ಪಿ ಹೋಗುತ್ತದೆ. ತಮ್ಮ ಗಂಡನ ಸ್ನೇಹಿತರ ಪತ್ನಿಯರ ಜೊತೆಗೆ ಸ್ನೇಹದ ನಂಟು ಬೆಳೆಯುತ್ತದೆ. ಕೆಲವು ಹುಡುಗಿಯರು ಅಪವಾದವೆಂಬಂತೆ ಮದುವೆಯಾದ ಬಳಿಕ ಗೆಳತಿಯರೊಂದಿಗೆ ಸಂಪರ್ಕ ಇಟ್ಟುಕೊಂಡಿರುತ್ತಾರೆ. ಮದುವೆಯಾದ ಬಳಿಕ ಆಗಾಗ ಪರಸ್ಪರರ ಮನೆಗೆ ಹೋಗಿ ಭೇಟಿ ಮಾಡುವುದು ನಡೆದೇ ಇರುತ್ತದೆ. ನಿಮ್ಮ ಗೆಳತಿಯ ಗಂಡನ ಜೊತೆ ನಿಮ್ಮ ಪತಿಯ ಸ್ನೇಹ ಆಗುತ್ತದೆ.
ಆರಂಭದಲ್ಲಿ ಇಬ್ಬರೂ ಗೆಳತಿಯರಿಗೆ ತಮ್ಮ ಪತಿಯಂದಿರ ಸ್ನೇಹ ಬಹಳ ಖುಷಿ ಕೊಡುತ್ತದೆ. ಈ ಸ್ನೇಹ ಬಹಳ ಕಾಲ ಉಳಿಯುವಂಥದ್ದು ಎಂದು ಇಬ್ಬರು ಸ್ನೇಹಿತೆಯರೂ ಭಾವಿಸುತ್ತಾರೆ. ಆರಂಭದಲ್ಲಿ ಬಹಳ ಖುಷಿ ನೀಡುವ ಸ್ನೇಹ ಆಮೇಲೆ ಹೇಗೆ ಅವರಿಗೆ ಮುಳುವಾಗುತ್ತದೆ ಎಂಬುದನ್ನು ತಿಳಿದುಕೊಳ್ಳುವುದು ಅಗತ್ಯ.
ನನ್ನವನಾಗಿ ಉಳಿಯಲಿಲ್ಲ ನನ್ನ ಗಂಡ : ಗೆಳತಿಯ ಗಂಡನ ಜೊತೆ ನಿಮ್ಮ ಗಂಡನ ಸ್ನೇಹ ಯಾವಾಗಲಾದರೊಮ್ಮೆ ಜೊತೆ ಜೊತೆಗೆ ಕುಳಿತು ಟೀ/ಕಾಫಿ ಸೇವನೆ, ಊಟ ಮಾಡುವುದು, ವರ್ಷಕ್ಕೆ ಒಮ್ಮೆ ಅಥವಾ ಎರಡು ಸಲ ಔಟಿಂಗ್‌ ಹೋದರೆ ಏನೂ ತೊಂದರೆ ಇಲ್ಲ. ಆದರೆ ಈ ಸ್ನೇಹ 24/7 ಆಗಿಬಿಟ್ಟರೆ ಅಂದರೆ ನಿಮ್ಮ ಪತಿ ನಿಮ್ಮ ಕಣ್ಣು ತಪ್ಪಿಸಿ ನಿಮ್ಮ ಗೆಳತಿಯ ಪತಿಯ ಜೊತೆಯೇ ಹೆಚ್ಚು ಸಂಪರ್ಕದಲ್ಲಿ ಇರತೊಡಗಿದರೆ ನನ್ನ ಪತಿ ನನ್ನವನಾಗಿ ಉಳಿಯುತ್ತಿಲ್ಲ ಎಂದು ನೀವು ದೂರಬೇಕಾಗಿ ಬರಬಹುದು.
ಬೆಳಗ್ಗೆ ವಾಟ್ಸ್ ಆ್ಯಪ್‌ನಲ್ಲಿ ಗುಡ್‌ ಮಾರ್ನಿಂಗ್‌ನಿಂದ ಹಿಡಿದು ದಿನವಿಡೀ ಪರಸ್ಪರರು ಕಳಿಸುವ ಜೋಕ್ಸ್ ಶೇರ್‌ ಮಾಡುವುದು, ಆಫೀಸ್‌ನಿಂದ ಜೊತೆ ಜೊತೆಗೇ ವಾಪಸ್‌ ಬರುವುದು, ನಂತರ ಇಬ್ಬರೂ ಸೇರಿ ಸುತ್ತಾಡಲು ಹೋಗುವುದು, ತಿಂಡಿ ತಿನ್ನುವುದು ಹೀಗೆಲ್ಲ ಮಾಡಿದರೆ ನೀವು ತಲೆ ಚಚ್ಚಿಕೊಳ್ಳುವುದು, ಆ ದಿನವನ್ನು ಹಳಿಯುವುದನ್ನು ಬಿಟ್ಟು ಮತ್ತೇನೂ ಮಾಡಲು ಆಗದು. ನಾನು ಯಾಕಾದರೂ ಪತಿಗೆ ಇವರ ಪರಿಚಯ ಮಾಡಿಸಿದೆ ಎಂದು ಕಣ್ಣೀರು ಹಾಕಬೇಕಾಗುತ್ತದೆ.
ಗೆಳತಿಯ ಪತಿ ಸವತಿಯಂತೆ : ಮೊದಲ ಉದಾಹರಣೆ, ನೀವು ಗಂಡನ ಜೊತೆ ಸಂಜೆ ರೊಮ್ಯಾಂಟಿಕ್‌ ಸಿನಿಮಾ ನೋಡುವ ಯೋಜನೆ ಹಾಕಿಕೊಂಡಿರುವಿರಿ. ಆದರೆ ಗಂಡ ಗೆಳತಿಯ ಗಂಡನ ಜೊತೆ ಹಾರರ್‌ಸಿನಿಮಾ ನೋಡಲು ಹೋದ.
ಎರಡನೇ ಉದಾರಣೆ : ನಿಮ್ಮ ಮದುವೆಯ ವಾರ್ಷಿಕೋತ್ಸವದ ದಿನ. ನೀವು ಗಂಡನಿಂದ ಸರ್‌ಪ್ರೈಸ್‌ ಗಿಫ್ಟ್ ಹಾಗೂ ಕ್ಯಾಂಡಲ್ ಡಿನ್ನರ್‌ನ ಅಪೇಕ್ಷೆ ಮಾಡಿರುವಿರಿ. ಆದರೆ ಗಂಡ ಬಂದಿದ್ದೇ ಲೇಟು, ಅದರ ಮೇಲಾಗಿ ಗಂಡ ತಂದಿರುವ ಗಿಫ್ಟ್ ಗೆಳತಿಗೆ ಇಷ್ಟವಾಗುವಂಥದು. ಜೊತೆಗೆ ಗೆಳತಿಯ ಗಂಡ ಕೂಡ ಬಂದಿದ್ದಾನೆ. ಅದೆಲ್ಲ ನೋಡಿ ನಿಮಗೆ ಸವತಿ ಬಂದಂತೆ ಅನಿಸುತ್ತದೆ.
ಮೂರನೇ ಉದಾಹರಣೆ : ಗೆಳತಿಯ ಬಾಯಿಂದ ನಿಮ್ಮ ಬೆಡ್‌ ರೂಮ್ ವಿಷಯಗಳು ತಿಳಿದುಬರುತ್ತವೆ. ನಿಮಗೆ ಹಾಗೂ ನಿಮ್ಮ ಪತಿಗೆ ಮಾತ್ರ ಗೊತ್ತಿರುವ ವಿಷಯಗಳು ಗೆಳತಿಯ ಗಂಡನ ತನಕ ಹೇಗೆ ತಲುಪಿದವು? ನಿಮ್ಮ ಗಂಡನಿಂದ ಗೆಳತಿಯ ಗಂಡನ ತನಕ, ಆತ ಆ ವಿಷಯವನ್ನು ಹೆಂಡತಿಯ ಮುಂದೆ ಹೇಳಿರಬಹುದು. ನಿಮ್ಮ ಖಾಸಗಿ ಕ್ಷಣಗಳ ಬಗ್ಗೆ ಗೆಳತಿಯ ಬಾಯಿಂದ ಕೇಳಿ ನೀವು ಚಕಿತರಾಗದ ಹೊರತು ಬೇರೆ ದಾರಿಯೇ ಇರುವುದಿಲ್ಲ.
ಆರ್ಥಿಕ ವ್ಯವಹಾರಗಳಲ್ಲಿ ಹಸ್ತಕ್ಷೇಪ : ಗೆಳತಿಯ ಪತಿಯ ಜೊತೆಗಿನ ನಿಮ್ಮ ಪತಿಯ ಗೆಳೆತನ ನಿಮ್ಮ ಪರ್ಸನಲ್ ಟೈಮನ್ನಂತೂ ಕಬಳಿಸಿಯೇ ಬಿಟ್ಟಿದೆ, ಆದರೆ ಆತ ನಿಮ್ಮ ಹಣಕಾಸಿನ ಸಂಗತಿಗಳಲ್ಲಿ ಮೂಗು ತೂರಿಸಲಾರಂಭಿಸಿದರೆ ಆಗ ನಿಮ್ಮ ಸ್ಥಿತಿ ಏನಾಗಬಹುದು?
ಗೆಳತಿಯ ಗಂಡನ ಜೊತೆ ಸ್ನೇಹ ಮಾಡುವುದಕ್ಕಿಂತ ಮುಂಚೆ ನಿಮ್ಮ ಪತಿ ಆರ್ಥಿಕ ವಿಷಯಗಳಿಗೆ ಸಂಬಂಧಪಟ್ಟಂತೆ ನಿಮ್ಮಿಂದ ಸಲಹೆ ಸೂಚನೆ ಪಡೆದುಕೊಳ್ಳುತ್ತಿದ್ದರು. ಯಾವ ಪಾಲಿಸಿ ತೆಗೆದುಕೊಳ್ಳಬೇಕು? ಎಷ್ಟು ಹಣ, ಎಲ್ಲಿ ಹೂಡಿಕೆ ಮಾಡಬೇಕು ಎಂದು ಕೇಳುತ್ತಿದ್ದರು. ಗೆಳತಿಯ ಪತಿಯ ಜೊತೆಗೆ ಸ್ನೇಹ ಆದಾಗಿನಿಂದ ಪತಿ ನಿಮ್ಮ ಸಲಹೆ ಕೇಳುವುದನ್ನು ನಿಲ್ಲಿಸಿಬಿಟ್ಟಿದ್ದಾರೆ.
ಇಂತಹ ಸ್ಥಿತಿಯಲ್ಲಿ ಗೆಳತಿಯ ಪತಿಯನ್ನು ನೋಡಿ ನಿಮಗೆ ಇರುಸುಮುರುಸಾಗುವುದು ಸಹಜವೇ ಹೌದು. ಏಕೆಂದರೆ ಆರ್ಥಿಕ ವ್ಯಹಾರಗಳ ಮೇಲೆಯೇ ಕುಟುಂಬದ ಭವಿಷ್ಯ ನಿಂತಿದೆ. ತನ್ನ ಸಲಹೆ ಕೇಳುವುದನ್ನು ಬಿಟ್ಟು ಬೇರೆಯವರ ಸಲಹೆ ಕೇಳುವುದು ಯಾವ ಹೆಂಡತಿಗೆ ತಾನೇ ಇಷ್ಟವಾಗುತ್ತದೆ?
ಕೈತಪ್ಪಿ ಹೋಗದಿರಲಿ ಪತಿ : ನೀವು ನಿಮ್ಮ ಪತಿಗೆ ಗೆಳತಿಯ ಗಂಡನನ್ನು ಪರಿಚಯ ಮಾಡಿಸಿದ ಉದ್ದೇಶ ನಿಮ್ಮಿಬ್ಬರ ಗೆಳತಿಯರ ಸ್ನೇಹ ಚಿರವಾಗಿರಬೇಕು ಎಂದಾಗಿತ್ತು. ಆದರೆ ಭವಿಷ್ಯದಲ್ಲಿ ಇದರಿಂದ ಭಾರಿ ಬೆಲೆ ತೆರಬೇಕಾಗುತ್ತದೆ ಎಂಬ ಕಿಂಚಿತ್ತು ಕಲ್ಪನೆಯೂ ನಿಮಗಿರುವುದಿಲ್ಲ. ನಿಮ್ಮ ಗಂಡ ಅತ್ಯಂತ ಮುಗ್ಧ, ದುಶ್ಚಟ ಇಲ್ಲದ, ಅಹಂ ತೋರಿಸದ ವ್ಯಕ್ತಿಯಾಗಿದ್ದಿರಬಹುದು. ನಿಮ್ಮ ಗೆಳತಿಯ ಗಂಡ ಶೋಕಿ ವ್ಯಕ್ತಿಯಾಗಿರಬಹುದು, ಹತ್ತು ಹಲವು ಚಟಗಳನ್ನು ರೂಢಿಸಿಕೊಂಡಿರಬಹುದು. ಗೆಳತಿಯ ಗಂಡನ ಸಹವಾಸದಿಂದ ನಿಮ್ಮ ಪತಿ ಕೂಡ ಚಟಕ್ಕೆ ದಾಸನಾಗಬಹುದು. ಹಾಗಾಗಿ ನಿಮ್ಮ ಗಂಡ ನಿಮ್ಮ ಕೈ ತಪ್ಪಿ ಹೋಗದಂತೆ ಎಚ್ಚರವಹಿಸಿ.
ಗೆಳತಿಯರ ಸ್ನೇಹದಲ್ಲಿ ಬಿರುಕು : ಗೆಳತಿಯ ಗಂಡನ ಗೆಳೆತನದಿಂದಾಗಿ ಗೆಳತಿಯರಾದ ನಿಮ್ಮ ಸ್ನೇಹದಲ್ಲಿ ಬಿರುಕನ್ನುಂಟು ಮಾಡಬಹುದು. ನಿಮ್ಮ ಗಂಡ ದಾರಿತಪ್ಪಲು ಗೆಳತಿಯ ಗಂಡನೇ ಕಾರಣ ಎಂದು ನಿಮಗನ್ನಿಸಬಹುದು. ಅತ್ತ ಗೆಳತಿ ಕೂಡ ತನ್ನ ಗಂಡ ಚಟಗಳಿಗೆ ದಾಸನಾಗಲು, ಸಕಾಲಕ್ಕೆ ಮನೆಗೆ ಬಾರದಿರಲು ನಿಮ್ಮ ಪತಿ ಕಾರಣ ಎಂದು ಯೋಚಿಸುತ್ತಿರಬಹುದು. ನಿಮ್ಮಿಬ್ಬರ ನಡುವಿನ ಆರೋಪ ಪ್ರತ್ಯಾರೋಪಗಳಿಂದ ನಿಮ್ಮ ಸ್ನೇಹದಲ್ಲಿ ಬಿರುಕು ಉಂಟಾಗಬಹುದು.
ಹೊಣೆಗಾರಿಕೆ ಒಲ್ಲದ ಪತಿ : ಒಮ್ಮೊಮ್ಮೆ ಹೀಗೂ ಆಗಬಹುದು, ನಿಮ್ಮ ಪತಿಗೆ ಗೆಳತಿಯ ಗಂಡನ ಮೇಲೆ ಅತಿಯಾಗಿ ನಂಬಿಕೆ ಇದ್ದರೆ, ತನ್ನ ಅನುಪಸ್ಥಿತಿಯಲ್ಲಿ ಅವನಿಗೆ ಎಲ್ಲ ಜವಾಬ್ದಾರಿಗಳನ್ನು ವಹಿಸಿಕೊಡಬಹುದು. ಅಂದರೆ 3-4 ದಿನಗಳ ಕಾಲ ಪ್ರವಾಸಕ್ಕೆ ಹೋಗುವ ಮುಂಚೆ ನಿಮ್ಮ ಗೆಳತಿಯ ಗಂಡನಿಗೆ ಅನೇಕ ಕೆಲಸಗಳನ್ನು ಒಪ್ಪಿಸಿಹೋಗುತ್ತಾರೆ.
ತಮ್ಮ ಮನೆಯ ಜವಾಬ್ದಾರಿಯನ್ನು ಗಂಡ ಬೇರೊಬ್ಬರಿಗೆ ವಹಿಸಿ ಹೋಗುವುದನ್ನು ಹೆಂಡತಿಯಾದವಳು ಸಹಿಸಿಕೊಳ್ಳಲಾರಳು. ಏಕೆಂದರೆ ಮನೆಯ ಜವಾಬ್ದಾರಿ ಗಂಡನದ್ದೇ ಆಗಿದೆ. ಅವನ ಅನುಪಸ್ಥಿತಿಯಲ್ಲಿ ನೀವೇ ಮನೆ ಜವಾಬ್ದಾರಿ ನಿಭಾಯಿಸಬೇಕೆಂದು ನೀವು ಇಷ್ಟಪಡುವಿರಿ.
– ಸ್ನೇಹಲತಾ
