ನೀವು ಕೈದಿಯೂ ಅಲ್ಲ ಅತ್ತೆ ಮನೆ ಜೈಲೂ ಅಲ್ಲ

ನೀವು ವಿವಾಹಿತರಿರಬಹುದು ಅಥವಾ ವಿವಾಹ ನಿಶ್ಚಿತರಾದವರು, ನಿಮಗೆ ಅತ್ತೆ ಮನೆಯ ಬಗ್ಗೆ ಅಷ್ಟಿಷ್ಟು ಭಯ ಇದ್ದೇ ಇರುತ್ತದೆ. ಎಷ್ಟೋ ಸಲ ಈ ಭಯ ಚಿಂತೆಯ ರೂಪ ಪಡೆದುಕೊಳ್ಳುತ್ತದೆ. ಆದರೆ ಸಮಸ್ಯೆ ಶುರುವಾಗುವುದು ಹುಡುಗಿಯ ಮನಸ್ಸಿನಲ್ಲಿ ಅತ್ತೆಯ ಮನೆಯವರ ಬಗ್ಗೆ ನಕಾರಾತ್ಮಕ ರೂಪ ಪಡೆದುಕೊಂಡ ಬಳಿಕ. ಇಂತಹ ಸ್ಥಿತಿಯಲ್ಲಿ ಆಕೆ ಯಾವುದೇ ಆಧಾರವಿಲ್ಲದೆ ಅತ್ತೆ ಮನೆಯ ಲೋಪದೋಷಗಳನ್ನು ಹುಡುಕತೊಡಗುತ್ತಾಳೆ.

ಮ್ಯಾರೇಜ್‌ ಕೌನ್ಸಿಲರ್‌ ಅನುರಾಧಾ ಹೀಗೆ ಹೇಳುತ್ತಾರೆ, “ಹುಡುಗಿಯರ ಮನಸ್ಸಿನಲ್ಲಿ ಅತ್ತೆ ಮನೆಯ ಕುರಿತು ಭಯ ಇರುವುದು ಸ್ವಾಭಾವಿಕ ಸಂಗತಿ. ಆದರೆ ಒಮ್ಮೊಮ್ಮೆ ಆ ಭಯ ಎಷ್ಟೊಂದು ವಿಕೃತ ರೂಪ ಪಡೆದುಕೊಳ್ಳುತ್ತದೆಂದರೆ, ಹುಡುಗಿ ತನ್ನನ್ನು ತಾನು ಅತ್ಯಂತ ಹೀನಾಯ ಸ್ಥಿತಿಯಲ್ಲಿರುವ ಬಗ್ಗೆ ಯೋಚಿಸಿ ಅತ್ತೆ ಮನೆಯವರು ತನಗೆ ಏನೇನು ಕಷ್ಟ ಕೊಡಬಹುದು, ಏನಾಗಬಹುದು ಎಂದು ಕಲ್ಪಿಸಿಕೊಂಡು ಚಿಂತಿಸುತ್ತಾಳೆ. ಹೆಚ್ಚಿನ ಹುಡುಗಿಯರು ನಕಾರಾತ್ಮಕವಾಗಿಯೇ ಯೋಚಿಸುತ್ತಾರೆ. ಇದಕ್ಕೆ ಈ ಕಾರಣಗಳಿರಬಹುದು. ಮೊದಲನೆಯದು, ಹುಡುಗಿ ಅತ್ತೆ ಮನೆಯವರ ಬಗ್ಗೆ ಸಂಪೂರ್ಣವಾಗಿ ಚೆನ್ನಾಗಿ ತಿಳಿದುಕೊಂಡಿರಬೇಕು. ಎರಡನೆಯದು, ಆಕೆ ತನ್ನ ಅತ್ತೆ ಮನೆಯವರ ಬಗ್ಗೆ ಏನೇನೂ ಗೊತ್ತಿರುವುದಿಲ್ಲ.”

ಎರಡೂ ಸ್ಥಿತಿಗಳಲ್ಲಿ ಬೇರೆ ಬೇರೆ ಬಗೆಯ ಚಿಂತೆಗಳು ಆಕೆಯನ್ನು ಸುತ್ತುವರೆಯಬಹುದು. ಅಂತಹುದೇ ಕೆಲವು ಚಿಂತೆಗಳನ್ನು ನಿವಾರಿಸುವ ವಿಧಾನಗಳನ್ನು ಇಲ್ಲಿ ಕೊಡಲಾಗಿದೆ.

ವ್ಯಕ್ತಪಡಿಸಲಾಗದ ಭಯ

ಅತ್ತೆ ಮನೆ ಅಂದರೆ ಅದು ಹೊಸ ಸ್ಥಳ, ಹೊಸ ಜನರು ಭೇಟಿಯಾಗುವ ಜಾಗ, ಹೀಗಾಗಿ ಆಕೆಗೆ ಗೊತ್ತಿಲ್ಲದಿರುವ ಒಂದು ಭಯ ಇರುತ್ತದೆ. ಆ ಮನೆಯ ಯಾವುದೇ ಒಬ್ಬ ಸದಸ್ಯರ ಮುಂದೆ ತನ್ನ ಮನದ ಬಯಕೆ, ತೊಂದರೆ ಮತ್ತು ಭಾವನೆಗಳನ್ನು ವ್ಯಕ್ತಪಡಿಸಲು ಸಂಕೋಚ ಉಂಟಾಗುತ್ತದೆ. ಉದಾರಹಣೆಗಾಗಿ ನವ ವಧುವನ್ನು ಮನೆ ತುಂಬಿಸಿಕೊಳ್ಳುವ ಶಾಸ್ತ್ರ. ಇಂದರಿಂದ ಅನೇಕ ಲಾಭಗಳು ಇವೆ, ಕೆಲವೊಂದು ತೊಂದರೆಗಳೂ ಇವೆ. ಅದರಿಂದಾಗುವ ಲಾಭವೇನೆಂದರೆ, ಮನೆಯ ಹೊಸ ಸದಸ್ಯಳಾದ ಆಕೆ ಮನೆಯ ಎಲ್ಲ ಸಂಬಂಧಿಕರ ಜೊತೆ ಮಾತನಾಡುವ ಹಾಗೂ ಅವರ ಊರುಗಳಿಗೆಲ್ಲ ಹೋಗುವ ಅವಕಾಶ ಲಭಿಸುತ್ತದೆ. ಇದರಿಂದಾಗುವ ಒಂದು ತೊಂದರೆಯೆಂದರೆ, ಸಿಕ್ಕಾಪಟ್ಟೆ ದಣಿದು ಹೋದ ನವ ವಧು ಜನಸಮೂಹದ ನಡುವೆ ಅಸಹಜತೆಯ ಅನುಭೂತಿ ಮಾಡಿಕೊಳ್ಳಬಹುದು. ಇಂತಹ ಸ್ಥಿತಿಯಲ್ಲಿ ಅವಳು ತನ್ನ ಮನಸ್ಸಿನ ನೋವನ್ನು ಯಾರಿಗೆ ಹೇಳಿಕೊಳ್ಳಬೇಕು?

ಇಂತಹ ಶಾಸ್ತ್ರದ ಹೊರತಾಗಿ ಇನ್ನೂ ಅನೇಕ ವಿಧಿವಿಧಾನಗಳಿದ್ದು, ಅಂತಹ ಸಂದರ್ಭದಲ್ಲಿ ಅತ್ತೆ ಮನೆಯವರ ಎದುರು ತನ್ನ ಭಾವನೆಗಳನ್ನು ಹಂಚಿಕೊಳ್ಳಲು ಆಗುವುದಿಲ್ಲ. ಅವರು ಕೇಳಿದ ಪ್ರಶ್ನೆಗಳಿಗೆ `ಹೌದು’ ಅಥವಾ `ಇಲ್ಲ’ ಎಂದಷ್ಟೇ ಉತ್ತರ ಹೇಳುತ್ತಾಳೆ.

ಡಾ. ಸಂಧ್ಯಾ ಈ ಕುರಿತಂತೆ ಹೀಗೆ ಹೇಳುತ್ತಾರೆ, “ಮದುವೆಯ ಆರಂಭದ ದಿನಗಳಲ್ಲಿ ಪ್ರತಿಯೊಬ್ಬ ಯುವತಿ ಈ ಎಲ್ಲ ತೊಂದರೆಗಳನ್ನು ಎದುರಿಸಬೇಕಾಗಿ ಬರುತ್ತದೆ. ಆದರೆ ಇದು ಖಾಯಂ ಸಮಸ್ಯೆಯಲ್ಲ. ಮೊದಲನೆಯದು, ತನ್ನ ಮನಸ್ಸಿನ ಮಾತನ್ನು ಹೇಳಿಕೊಳ್ಳುವುದು ತಪ್ಪೇನೂ ಅಲ್ಲ. ಅದನ್ನು ಹೇಳಬೇಕಾದ ರೀತಿಯಲ್ಲಿ ಹೇಳಿದರೆ, ಯಾರೇ ಆಗಲಿ ಅದನ್ನು ಕೇಳಿಸಿಕೊಳ್ಳುತ್ತಾರೆ. ಆ ಬಳಿಕ ಅತ್ತೆ ಮನೆಯಲ್ಲಿ ಕ್ರಮೇಣ ತನ್ನ ಅಭಿಪ್ರಾಯಗಳನ್ನು ವ್ಯಕ್ತಪಡಿಸುತ್ತ ಹೋಗುವುದು ಸಹಜವಾಗುತ್ತದೆ. ತನ್ನ ಮಾತನ್ನು ಯಾರೂ ಒಪ್ಪಲಿಕ್ಕಿಲ್ಲ ಎಂದು ಅಂದುಕೊಳ್ಳುವುದು ತಪ್ಪು.”

ಸ್ವಾತಂತ್ರ್ಯ ಕಳೆದುಕೊಳ್ಳುವ ಭಯ

ಮದುವೆಗೆ ಮುಂಚೆ ಪ್ರತಿಯೊಬ್ಬ ಹುಡುಗಿ ತವರುಮನೆಯಲ್ಲಿದ್ದಾಗ ದೊರೆಯುತ್ತಿದ್ದ ಸ್ವಾತಂತ್ರ್ಯ ಗಂಡನ ಮನೆಯಲ್ಲಿ ದೊರೆಯಬಹುದಾ ಎಂದು ವಿಚಾರ ಮಾಡುತ್ತಾಳೆ. ಡಾ. ನೀಲಾ ಈ ಕುರಿತಂತೆ ಹೀಗೆ ಹೇಳುತ್ತಾರೆ, “ಮದುವೆ ಹೊಸ ಸಂಬಂಧಗಳ ಬಂಧನ. ಅದು ನಿಮ್ಮನ್ನು ಅಂಕುಶದಲ್ಲಿಡುವ ಹೊಸ ಅಸ್ತ್ರವಲ್ಲ. ಹೊಸ ಸಂಬಂಧಗಳಿಗೆ ಹೊಸ ಬೇಡಿಕೆ ಇರುತ್ತದೆ. ಅವನ್ನು ಈಡೇರಿಸುವುದು ಕೂಡ ಅಷ್ಟೇ ಅತ್ಯವಶ್ಯಕ. ಏಕೆಂದರೆ ಹೊಸ ಸಂಬಂಧಗಳ ಎಳೆ ಪರಸ್ಪರರನ್ನು ಅರಿತುಕೊಳ್ಳುವುದರಿಂದ ಮತ್ತು ಪರಸ್ಪರರ ಅಭಿಲಾಷೆಗಳನ್ನು ಈಡೇರಿಸುವುದರಿಂದ ಗಟ್ಟಿಗೊಳ್ಳುತ್ತದೆ. ಈ ಜವಾಬ್ದಾರಿ ಕೇವಲ ಹುಡುಗಿ ಕಡೆಯದು ಮಾತ್ರವಲ್ಲ, ಅತ್ತೆ ಮನೆಯವರದ್ದು ಕೂಡ ಆಗಿರುತ್ತದೆ. ಅವರು ನವ ವಧುವಿನ ಆಸಕ್ತಿ, ಅನಾಸಕ್ತಿಯ ಬಗ್ಗೆ ಗಮನಹರಿಸುತ್ತಾರೆ. ಹೀಗಾಗಿ ನಿಮ್ಮನ್ನು ನೀವು ಬಂಧಿ ಎಂದು ಭಾವಿಸಬೇಡಿ.”

ಎಷ್ಟೋ ಸಲ ಹುಡುಗಿಯರಿಗೆ ಅತ್ತೆ ಮನೆಯಲ್ಲಿ ತನಗೆ ಇಷ್ಟವಾಗುವ ಬಟ್ಟೆಗಳನ್ನು ತೊಡಲು ಆಗುತ್ತದೋ, ಇಲ್ಲವೋ, ತನಗೆ ಇಷ್ಟವಾಗುವ ತಿಂಡಿ ತಿನ್ನಲು, ಇಷ್ಟವಾಗುವ ಜಾಗಕ್ಕೆ ಹೋಗಲು ಅವಕಾಶ ಸಿಗುತ್ತದೋ ಇಲ್ಲವೋ ಎಂಬ ಭಯ ಕಾಡುತ್ತಿರುತ್ತದೆ. ಎಲ್ಲದರ ಮೇಲೂ ನಿರ್ಬಂಧ ಹೇರಬಹುದು ಎಂದು ಅವಳಿಗೆ ಅನಿಸುತ್ತಿರುತ್ತದೆ. ಏನನ್ನಾದರೂ ಮಾಡುವ ಮುಂಚೆ ಅತ್ತೆ ಮಾವನ ಅನುಮತಿ ಪಡೆಯಬೇಕಾಗುತ್ತದೆ. ಹೌದು, ಅನುಮತಿ ಪಡೆದುಕೊಂಡರೆ ತಪ್ಪೇನು? ತವರುಮನೆಯಲ್ಲಿ ಅಪ್ಪ ಅಮ್ಮನ ಅನುಮತಿ ಪಡೆದುಕೊಳ್ಳುತ್ತಿರಲಿಲ್ಲವೇ?

ಯಾವುದೇ ಒಂದು ಕೆಲಸ ಕಡಿಮೆ ಮಹತ್ವ, ಹೆಚ್ಚು ಮಹತ್ವ ಎಂದು ಇಬ್ಭಾಗಿಸಿ ನೋಡಲಾಗುತ್ತದೆ. ಈ ಕುರಿತಂತೆ ಅತ್ತೆ ಮಾವ ಸರಿಯಾದುದನ್ನೇ ಹೇಳುತ್ತಾರೆ. ಅದು ಸೊಸೆಯ ಹಿತದೃಷ್ಟಿಯಿಂದ ಒಳ್ಳೆಯದೇ ಬಿಡಿ. ಯಾವುದೇ ಕೆಲಸ ಮಾಡುವ ಮುಂಚೆ ಅವರ ಅಭಿಪ್ರಾಯ ಕೇಳಿದರೆ ಅವರಿಗೆ ಮಹತ್ವ ಕೊಟ್ಟಂತೆಯೂ ಆಗುತ್ತದೆ. ಪ್ರತಿಯೊಂದು ಮನೆಗೆ ತನ್ನದೇ ಆದ ನಿಯಮಗಳಿರುತ್ತವೆ. ಅವನ್ನು ನಿರ್ಬಂಧವೆಂದು ಕರೆಯುವುದು ತಪ್ಪಾಗುತ್ತದೆ. ನಿಯಮಗಳನ್ನು ಪಾಲನೆ ಮಾಡುವುದರಿಂದ ಜೀವನಶೈಲಿ ಶಿಸ್ತಿಗೆ ಒಳಪಡುತ್ತವೆ. ಈ ನಿಯಮಗಳು ಮನೆಯ ಪ್ರತಿಯೊಬ್ಬ ಸದಸ್ಯರಿಗೂ ಅನ್ವಯಿಸುತ್ತವೆ. ಅವು ನಿಮಗಷ್ಟೇ ಅನ್ವಯಿಸುತ್ತದೆ ಎಂದು ಭಾವಿಸಬೇಡಿ. ಅದೇ ರೀತಿ ಅತ್ತೆ ಮನೆಯನ್ನು ಜೈಲು ಎಂದು ಭಾವಿಸಿ, ಯಾವಾಗಲೂ ಬಂಧಮುಕ್ತಳಾಗುವ ಬಗ್ಗೆ ಯೋಚಿಸಬೇಡಿ. ಏಕೆಂದರೆ ಈ ನಿಮ್ಮ ಯೋಚನೆ ಅತ್ತೆ ಮನೆಯಲ್ಲಿ ನಿಮ್ಮದೇ ಆದ ಸ್ಥಾನ ಭದ್ರಪಡಿಸಿಕೊಳ್ಳಲು ಅವಕಾಶ ಕಲ್ಪಿಸುವುದಿಲ್ಲ.

ಕುಟುಂಬದವರ ಹಸ್ತಕ್ಷೇಪದ ಚಿಂತೆ

`4 ಪಾತ್ರೆಗಳು ಪರಸ್ಪರ ತಗುಲಿದರೆ ಸದ್ದಾಗುತ್ತದೆ’ ಎಂಬ ಗಾದೆ ಮಾತು ಕುಟುಂಬ ಜೀವನಕ್ಕೂ ಸರಿಯಾಗಿ ಅನ್ವಯಿಸುತ್ತದೆ. ಕುಟುಂಬ ಎನ್ನುವುದು ಕೇವಲ ಒಬ್ಬ ವ್ಯಕ್ತಿಯಿಂದ ರಚನೆಯಾಗುವುದಿಲ್ಲ, ಹಲವು ಜನರು ಸೇರಿದಾಗ ಒಂದು ಕುಟುಂಬವಾಗುತ್ತದೆ. ಅಲ್ಲಿ ಪರಸ್ಪರ ಸಲಹೆಯಿಂದಲೇ ಎಲ್ಲ ಕೆಲಸಗಳು ಆಗುತ್ತವೆ. ಅದನ್ನು ಹಸ್ತಕ್ಷೇಪ ಎಂದು ತಿಳಿಯುವ ತಪ್ಪು ಮಾಡಬೇಡಿ. ಮನೆಯ ಸದಸ್ಯರು ನಿಮ್ಮ ತೀರ್ಮಾನವನ್ನು ಒಪ್ಪದೇ ಇರಬಹುದು. ಆದರೆ ಅದರಲ್ಲಿ ಕುಟುಂಬದ ಹಿತ ಅಡಗಿರುತ್ತದೆ ಎಂಬುದನ್ನು ನೆನಪಲ್ಲಿಟ್ಟುಕೊಳ್ಳಿ. ಅದನ್ನು ಕುಟುಂಬದವರ ಹಸ್ತಕ್ಷೇಪ ಎಂದು ತಿಳಿಯಬಾರದು. ಹುಡುಗಿ ತವರು ಮನೆಯಲ್ಲಿದ್ದಾಗ ಅಪ್ಪ ಅಮ್ಮ ಏನಾದರೂ ಟೀಕೆ ಟಿಪ್ಪಣಿ ಮಾಡಿದರೆ ಅದು ಅವರಿಗೆ ಹಸ್ತಕ್ಷೇಪ ಎನಿಸುವುದಿಲ್ಲ. ಏಕೆಂದರೆ ಅವರೊಂದಿಗೆ ಭಾವನಾತ್ಮಕ ಸಂಬಂಧವಿರುತ್ತದೆ. ಅತ್ತೆ ಮನೆಯಲ್ಲಿ ಭಾವನಾತ್ಮಕ ಸಂಬಂಧ ಬೆಳೆಯಲು ಒಂದಿಷ್ಟು ಸಮಯ ತಗಲುತ್ತದೆ.

ಆದರೆ ಎಷ್ಟೋ ಸಲ ಅತ್ತೆ ಮನೆಯಲ್ಲಿ ಕೆಲವರು ನವ ವಧುವಿನ ಮೇಲೆ ತಮ್ಮ ಹಿಡಿತ ಸಾಧಿಸಲು ಆಕೆಯ ಪ್ರತಿಯೊಂದು ಕೆಲಸದಲ್ಲೂ ಹಸ್ತಕ್ಷೇಪ ಮಾಡಲು ಪ್ರಯತ್ನಿಸುತ್ತಾರೆ. ಅಂತಹವರಿಂದ ಆರಂಭದಿಂದಲೇ ಅಂತರ ಕಾಯ್ದುಕೊಂಡು ಹೋಗುವುದು ಸೂಕ್ತ. ಅತ್ತೆ ಮತ್ತು ಮಾವಂದಿರ ವಿಷಯ ಬಂದರೆ, ಅವರ ಮತ್ತು ನಿಮ್ಮ ನಡುವೆ ಒಂದು ನಿರ್ದಿಷ್ಟ ರೇಖೆ ಎಳೆದುಕೊಳ್ಳುವುದು ಸೂಕ್ತ. ಅವರ ಯಾವ ಮಾತುಗಳನ್ನು ಸುಲಭವಾಗಿ ಪಾಲಿಸಲು, ನಡೆಸಿಕೊಡಲು ಸಾಧ್ಯವಿದೆಯೋ ಅವನ್ನು ಅವಶ್ಯ ಮಾಡಿ. ಆದರೆ ಯಾವ ಮಾತನ್ನು, ಯಾವ ಕೆಲಸವನ್ನು ಮಾಡಲು ಸಾಧ್ಯವಿಲ್ಲವೋ ಆ ಬಗ್ಗೆ ನೀವು ನಯವಾಗಿಯೇ, ಗೌರಪೂರ್ವಕವಾಗಿ ತಿರಸ್ಕರಿಸಿ. ಇದು ನಿಮ್ಮ ಸ್ಪಷ್ಟತೆಯನ್ನು ತೋರಿಸಿಕೊಡುತ್ತದೆ.

ಜವಾಬ್ದಾರಿಗಳ ಹೊರೆ

ಹೊಸ ಸಂಬಂಧಗಳ ಜೊತೆ ಹೊಸ ಜವಾಬ್ದಾರಿಗಳನ್ನೂ ನಿಭಾಯಿಸಬೇಕಾಗಿ ಬರುತ್ತದೆ ಎಂಬ ಮಾತನ್ನು ಮನಸಾರೆ ಸ್ವೀಕರಿಸಿ. ಆದರೆ ಕೆಲವು ಸಂಬಂಧಗಳನ್ನು ಹೃದಯಪೂರ್ವಕವಾಗಿ ಸ್ವೀಕರಿಸಲು ಸ್ವಲ್ಪ ಕಷ್ಟ ಎನಿಸುತ್ತದೆ. ಇಂತಹದರಲ್ಲಿ ಆ ಸಂಬಂಧಗಳಿಗೆ ಸಂಬಂಧ ಪಟ್ಟಂತೆ ಕೆಲವು ಜವಾಬ್ದಾರಿಗಳನ್ನು ನಿಭಾಯಿಸುವುದು ಹೊರೆ ಎನಿಸಬಹುದು. ಅದರಲ್ಲೂ ವಿಶೇಷವಾಗಿ ನಾದಿನಿ ಮತ್ತು ಓರಗಿತ್ತಿಯರ ಸಂಬಂಧದ ಕುರಿತಾದ ಕೆಲವು ಕಥೆಗಳನ್ನು ಹುಡುಗಿಯರು ಮೊದಲೇ ಅರಿತುಕೊಂಡಿರುತ್ತಾರೆ. ಟಿ.ವಿ. ಧಾರಾವಾಹಿಗಳು ಅತ್ತೆ ಸೊಸೆಯರ ಜಗಳವನ್ನು ತೋರಿಸಿ ಅವರಿಬ್ಬರು ವೈರಿಗಳೆಂಬಂತೆ ಬಿಂಬಿಸುತ್ತವೆ. ಅತ್ತೆ ಮತ್ತು ಓರಗಿತ್ತಿಯರನ್ನು ಧಾರಾವಾಹಿಗಳು ಖಳನಾಯಕಿಯರಂತೆ ತೋರಿಸುತ್ತವೆ.

ಆದರೆ ವಾಸ್ತವದಲ್ಲಿ ಈ ಸಂಬಂಧಗಳನ್ನು ನಿಭಾಯಿಸುವುದು ಅಷ್ಟೇನೂ ಕಷ್ಟಕರ ಅಲ್ಲ. ತಮ್ಮ ಪತಿಗೆ ಸಂಬಂಧಪಟ್ಟ ಯಾವ ಜವಾಬ್ದಾರಿಗಳನ್ನು ನಿಭಾಯಿಸಲು ಆಕೆಗೆ ಆಸಕ್ತಿ ಇರುತ್ತದೋ, ಆ ಉತ್ಸಾಹ ಬೇರೆ ಯಾರ ಬಗೆಗೂ ಇರುವುದಿಲ್ಲ. ಆದರೆ ನಕಾರಾತ್ಮಕ ಯೋಚನೆ ಒಳ್ಳೆಯವರನ್ನೂ ಕೂಡ ಕೆಟ್ಟವರನ್ನಾಗಿ ಮಾಡಿಬಿಡುತ್ತದೆ. ನಾದಿನಿ, ಓರಗಿತ್ತಿ ಮತ್ತು ಅತ್ತೆ ಇವರೆಲ್ಲ ನಿಮಗೆ ಗಂಡನ ಮನೆಯಲ್ಲಿ ಅತ್ಯಂತ ಉಪಯುಕ್ತ ಎಂಬಂತೆ ಸಾಬೀತಾಗುತ್ತಾರೆ. ಈ ಸಂಬಂಧಗಳು ಒಂದಿಷ್ಟು ಕ್ಲಿಷ್ಟಕರ ಎನಿಸಬಹುದು. ಆದರೆ ಇವರ ಅನುಪಸ್ಥಿತಿಯಲ್ಲಿ ಗೃಹಸ್ಥ ಜೀವನ ಸಪ್ಪೆ ಎನಿಸುತ್ತದೆ.

ಜೀನಶೈಲಿ ಬದಲಾಗುವ ಭೀತಿ

ಜೀವನದ ಪ್ರತಿಯೊಂದು ಹೆಜ್ಜೆಯಲ್ಲೂ ಹೊಸ ಬದಲಾವಣೆಯನ್ನು ಎದುರಿಸಬೇಕಾಗಿ ಬರುತ್ತದೆ. ಮದುವೆಯ ಬಳಿಕ ಪುರುಷ ಹಾಗೂ ಮಹಿಳೆಯರ ಜೀವನದಲ್ಲಿ ಬಹಳಷ್ಟು ಬದಲಾವಣೆಗಳು ಆಗುತ್ತವೆ. ಆದರೆ ಹುಡುಗಿಯರಿಗೆ ಮದುವೆಗೂ ಮುಂಚೆಯೇ ಅದರ ಬಗ್ಗೆ ಹೆಚ್ಚಿನ ಭಯ ಕಾಡುತ್ತಿರುತ್ತದೆ. ಎಲ್ಲಕ್ಕೂ ಮುಖ್ಯ ಕಾರಣ ತವರುಮನೆ ತೊರೆದು ಗಂಡನ ಮನೆಗೆ ಹೋಗುವುದೇ ಆಗಿರುತ್ತದೆ. ಎಲ್ಲರ ಮನೆಯ ನೀತಿ ನಿಯಮಗಳು ಬೇರೆ ಬೇರೆ ಆಗಿರುತ್ತವೆ. ಜೀವನ ವಿಧಾನಗಳು ವಿಭಿನ್ನವಾಗಿರುತ್ತವೆ. ಈ ಎಲ್ಲದರ ನಡುವೆ ತಮ್ಮನ್ನು ತಾವು ಹೊಂದಿಸಿಕೊಳ್ಳುವುದು ಪ್ರತಿಯೊಬ್ಬ ಹುಡುಗಿಗೂ ಸ್ಪಲ್ಪ ಕಷ್ಟಕರವಾಗುತ್ತದೆ, ಆದರೆ ಅಸಾಧ್ಯವೇನಲ್ಲ.

ಬೇರೆ ವಾತಾವರಣದಿಂದ ಮನೆಗೆ ಬಂದ ಹೊಸ ಸೊಸೆಯ ಜೊತೆಗೆ ಹೊಂದಿಕೊಳ್ಳುವುದು ಅತ್ತೆ ಮನೆಯವರಿಗೂ ಕೂಡ ಸುಲಭವೇನಲ್ಲ. ತಮ್ಮ ಮನೆಯ ವಾತಾವರಣಕ್ಕೆ ಸೊಸೆಯನ್ನು ಒಗ್ಗಿಸುವುದು ಅತ್ತೆ ಮನೆಗೂ ಸವಾಲಿನ ಕೆಲಸವೇ ಆಗಿರುತ್ತದೆ. ಆದರೆ ಎರಡೂ ಕಡೆಯವರು ಪರಸ್ಪರ ಹೊಂದಾಣಿಕೆಯಿಂದ ಕಾರ್ಯಪ್ರವೃತ್ತರಾದರೆ ಈ ಬದಲಾವಣೆ ಹಿತಕರ ಎನಿಸುತ್ತದೆ.

ಅದೇ ರೀತಿ ತವರು ಮನೆ ಹಾಗೂ ಅತ್ತೆ ಮನೆಗೆ ಸಂಬಂಧಪಟ್ಟಂತೆ ಹಲವಾರು ವಿಷಯಗಳ ಬಗ್ಗೆ ಮದುವೆಗೂ ಮುನ್ನವೇ ಹುಡುಗಿಯರು ನಕಾರಾತ್ಮಕವಾಗಿ ಯೋಚಿಸುವಂತಹ ಅನಿವಾರ್ಯತೆ ಉಂಟಾಗುತ್ತದೆ. ಆದರೆ ಈ ಯೋಚನೆಯ ಜೊತೆಗೆ ಹೊಸ ಸಂಬಂಧಗಳ ಆರಂಭ ಯಾವಾಗಲೂ ಕೆಟ್ಟ ಪರಿಣಾಮವೇ ಗೋಚರಿಸುತ್ತದೆ. ಹೀಗಾಗಿ ಸಕಾರಾತ್ಮಕವಾಗಿ ಯೋಚಿಸಿ. ಇದರಿಂದ ತದ್ವಿರುದ್ಧ ಸ್ಥಿತಿಯಲ್ಲಿ ಪರಿಸ್ಥಿತಿಯನ್ನು ನಿರ್ವಹಿಸುವ ದಾರಿ ದೊರಕುತ್ತದೆ ಹಾಗೂ ಅತ್ತೆ ಮನೆಯ ಪ್ರತಿಯೊಬ್ಬ ಸದಸ್ಯರ ಜೊತೆಗೆ ಹೊಂದಿಕೊಳ್ಳಲು ಸುಲಭವಾಗುತ್ತದೆ.

– ಸರಳಾ ಭಟ್‌