ಜಮುನಾ ತನ್ನ ವೈವಾಹಿಕ ಸಂಬಂಧ ಉಳಿಸಿಕೊಳ್ಳಲು ಇತ್ತೀಚೆಗೆ ಕೌನ್ಸೆಲರ್‌ಗಳನ್ನು ಭೇಟಿ ಆಗಲು ಸಾಕಷ್ಟು ಸಮಯ ಕಳೆಯುತ್ತಿದ್ದಾಳೆ. ಇದರ ಹಿಂದೆ ಸಾಧಾರಣ ಆದರೆ ಜಟಿಲ ಕಾರಣವೊಂದಿದೆ. ಜಮುನಾ ಹಾಗೂ ಆಕೆಯ ಪತಿ ಮನೋಹರ್ ನಡುವಿನ ಸೆಕ್ಸ್ ಲೈಫ್‌ನಲ್ಲಿ ಅನೇಕ ಅಡೆತಡೆಗಳಿದ್ದವು. ಇಚ್ಛೆ ಅನಿಚ್ಛೆ ಪ್ರಕಟಪಡಿಸುವಲ್ಲಿನ ವೈಫಲ್ಯದಿಂದ ಶುರುವಾದ ತೊಂದರೆ ನಿರಾಶೆ ಮತ್ತು ಕೊರಗುವಿಕೆಯಲ್ಲಿ ಬದಲಾಗಿದ್ದವು.
ಅವರ ನಡುವೆ ಅಂಥದ್ದೇನಾಯಿತು? ಸೆಕ್ಸ್ ನಂತಹ ಮನರಂಜನಾತ್ಮಕ ಸಂಗತಿ ಅವರಿಗೆ ಉಸಿರುಗಟ್ಟುವಂತಹ ಸ್ಥಿತಿಯನ್ನೇಕೆ ತಂದಿತು? ಸೆಕ್ಸ್ ಎನ್ನುವುದು ಗಂಡ ಹೆಂಡತಿಯ ಸಂಬಂಧಕ್ಕೆ ಮತ್ತಷ್ಟು ನಿಕಟತೆ ತರುತ್ತದೆ. ಅದರಲ್ಲಿ ಸುರಕ್ಷತೆಯ ಅನುಭೂತಿ, ಸೂಕ್ಷ್ಮ ಅನುಭೂತಿಗಳು, ಪರಸ್ಪರ ಹೊಂದಾಣಿಕೆ, ಪ್ರೇಮದ ಗಾಢತೆ ಇವೆಲ್ಲ ಇರಬೇಕು. ಅದು ನಿರಂತರ ಸಮಾಗಮದ ಖುಷಿಗೆ ಮತ್ತು ಲವಲವಿಕೆಯ ಜೀವನಕ್ಕೆ ಅತ್ಯವಶ್ಯ. ಒಳ್ಳೆಯ ಸೆಕ್ಸ್ ಜೀವನಕ್ಕೆ ಮತ್ತು ಗಾಢ ಸಂಬಂಧದ ಅನುಭೂತಿಗಾಗಿ ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ಕೂಡ ಒಪ್ಪಿಕೊಳ್ಳಬೇಕಾಗುತ್ತದೆ.
ಇಬ್ಬರೂ ರೊಟೀನ್‌ ರೀತಿಯಲ್ಲಿ ಸೆಕ್ಸ್ ನ್ನು ನಿಭಾಯಿಸುತ್ತ ಹೋದರೆ, ಅದು ಕೇವಲ ಸೆಕ್ಸ್ ಲೈಫ್‌ನ್ನಷ್ಟೇ ಬೇಸರದಾಯಕಗೊಳಿಸುವುದಿಲ್ಲ, ಸಂಬಂಧ ಹಾಳುಗೆಡಹಲು ಕೂಡ ಕಾರಣವಾಗಬಹುದು. ನಗರವೇ ಆಗಿರಬಹುದು, ಹಳ್ಳಿಯೇ ಇರಬಹುದು. ಭಾರತೀಯ ಮತ್ತು ಇಸ್ಲಾಮಿಕ್‌ ಸಮಾಜದಲ್ಲಿ ಸ್ತ್ರೀಯರಿಗೆ ಸೆಕ್ಸ್ ಬಗ್ಗೆ ಚರ್ಚೆ ಮಾಡುವುದಾಗಲಿ, ಅದರ ಬಗ್ಗೆ ಅಭಿಪ್ರಾಯ ಸೂಚಿಸುವುದನ್ನು ಕೀಳು ಮಾನಸಿಕತೆ ಎಂದು ಬಿಂಬಿಸಲಾಗುತ್ತದೆ. ಸ್ತ್ರೀಯರು ತಮ್ಮ ಸಂಗಾತಿಯ ಜೊತೆಗೆ ಸೆಕ್ಸ್ ಬಗ್ಗೆ ತಮ್ಮ ಇಚ್ಛೆಗಳನ್ನು ಮುಕ್ತವಾಗಿ ಹೇಳಲು ಇಚ್ಛೆಪಡುವುದನ್ನು ಸುಸಂಸ್ಕೃತ ಎಂದು ಹೇಳಲಾಗುವುದಿಲ್ಲ. ಮಹಾನಗರದ ಬಿಂದಾಸ್‌ ಹುಡುಗಿಯರನ್ನು ಹೊರತುಪಡಿಸಿ ಉಳಿದವರೆಲ್ಲರೂ ಸೆಕ್ಸ್ ನ್ನು ಪತಿ ಸೇವೆಯ ಒಂದು ಪ್ರಮುಖ ಭಾಗ ಎಂದು ಹೇಳುತ್ತಾರೆ. ತಮ್ಮ ಇಚ್ಛೆ ಅನಿಚ್ಛೆಗಳನ್ನು ಗಂಡನಿಗೆ ಹೇಳುವುದನ್ನು ಅಗತ್ಯ ಎಂದು ಭಾವಿಸುವುದಿಲ್ಲ.
ಭೇದಭಾವ ಏಕೆ?
ಈ ಬಗ್ಗೆ ಸ್ವಲ್ಪ ಆಳವಾಗಿ ಯೋಚಿಸುವುದಾದರೆ, ಸೆಕ್ಸ್ ನ ಅಭಿಲಾಷೆ ಮತ್ತು ಸಾಮರ್ಥ್ಯವನ್ನು ಮಾನವ ಜೀವನದ ಪ್ರಧಾನ ಸಂಗತಿಯೆಂದು ತಿಳಿಯಲಾಗುತ್ತದೆ. ಸೆಕ್ಸ್ ಲೈಫ್‌ನ್ನು ನಿಯಂತ್ರಿತಗೊಳಿಸುವಲ್ಲಿ ಜೀವವೈಜ್ಞಾನಿಕ, ನೈತಿಕ, ಸಾಂಸ್ಕೃತಿಕ, ಕಾನೂನಾತ್ಮಕ, ಧಾರ್ಮಿಕ ಹಾಗೂ ವಿಭಿನ್ನ ದೃಷ್ಟಿಕೋನಗಳು ಕಾರಣವಾಗಿರುತ್ತವೆ. ಅಂದರೆ ಸೆಕ್ಸ್ ಲೈಫ್‌ ಮತ್ತು ಅದರ ಅಭಿವ್ಯಕ್ತಿಯ ಮೇಲೆ ಈ ಎಲ್ಲ ಸಂಗತಿಗಳ ಪ್ರಭಾವವಿರುತ್ತದೆ.
ವಿಶ್ವ ಆರೋಗ್ಯ ಸಂಸ್ಥೆ ವ್ಯಕ್ತಿಯೊಬ್ಬನ ಸೆಕ್ಸ್ ಜೀವನದ ಮಹತ್ವದ ಬಗ್ಗೆ ಒತ್ತು ಕೊಡುತ್ತ ಅದರ ಬಗ್ಗೆ ಸಕಾರಾತ್ಮಕ ಮತ್ತು ಆದರದ ದೃಷ್ಟಿಕೋನ ಅನುಸರಿಸುವ ಬಗ್ಗೆ ಹೇಳಿಕೊಂಡಿದೆ. ಸಂಗಾತಿಯ ಜೊತೆಗೆ ಸೆಕ್ಸ್ ಸಂಬಂಧ ಯಾವುದೇ ಭೇದಭಾವರಹಿತ, ಹಿಂಸೆರಹಿತ, ದೈಹಿಕ, ಮಾನಸಿಕ ಶೋಷಣೆಯಿಂದ ಕೂಡಿರಬಾರದು. ಭಾವನಾತ್ಮಕ ಸಮತೋಲನದಿಂದ ಕೂಡಿರಬೇಕು ಎಂದು ವಿಶ್ವ ಆರೋಗ್ಯ ಸಂಸ್ಥೆ ಹೇಳಿದೆ. ನಮ್ಮ ದೇಶದಲ್ಲಿ ಮಹಿಳೆಯರ ಸೆಕ್ಸ್ ಗೆ ಸಂಬಂಧಪಟ್ಟಂತೆ ಬಲಾತ್ಕಾರ, ಮಾನಸಿಕ ಶೋಷಣೆ, ಕೌಟುಂಬಿಕ ದೌರ್ಜನ್ಯಗಳು ನಿರಂತರವಾಗಿ ನಡೆಯುತ್ತಿವೆ. ಸೆಕ್ಸ್ ಗೆ ಸಂಬಂಧಪಟ್ಟ ಹಕ್ಕು ಮತ್ತು ಸೆಕ್ಸ್ ಬಗ್ಗೆ ಮಹಿಳೆಯ ಮುಕ್ತ ಅಭಿಪ್ರಾಯ ಸ್ವೀಕಾರ್ಯವೇ? ಎನ್ನುವ ಪ್ರಶ್ನೆ ಕೂಡ ಇಲ್ಲಿ ಉದ್ಭವಿಸುತ್ತದೆ. ಒಂದು ವೇಳೆ ಜಾಗೃತಿ ಉಂಟಾದಲ್ಲಿ ಮತ್ತು ಸ್ತ್ರೀಯರು ಕೂಡ ಈ ನಿಟ್ಟಿನಲ್ಲಿ ತಮ್ಮ ಭಾವನೆಗಳಿಗೆ ಪರಿಪೂರ್ಣ ಮಹತ್ವ ಕೊಟ್ಟರೆ ಹಾಗೂ ಸಂಗಾತಿ ಎಂಬಂತೆ ಮುಕ್ತ ಮಾತುಕತೆ ನಡೆಸಿದರೆ ಅದರಿಂದಾಗುವ ಅನುಕೂಲಗಳು ಹಲವು.
ಪರಸ್ಪರರಲ್ಲಿ ಸ್ನೇಹ ಸಂಬಂಧ : ಒಂದು ವೇಳೆ ಗಂಡಹೆಂಡತಿಯ ನಡುವೆ ಸ್ನೇಹಭಾವನೆ ವಿಕಸಿತವಾದಲ್ಲಿ ಅವರ ನಡುವೆ ಭೇದಭಾವ, ಹಿರಿಯ ಕಿರಿಯ ಎಂಬ ಅಹಂಕಾರದ ಭೇದಭಾವ ತಂತಾನೇ ಹೊರಟುಹೋಗುತ್ತದೆ. ಇಬ್ಬರೂ ಪರಸ್ಪರ ಸೆಕ್ಸ್ ಇಚ್ಛೆಗಳ ಬಗ್ಗೆ ಹೇಳಿಕೊಂಡರೆ ಅಂಥ ಸಮಾಗಮ ಖುಷಿದಾಯಕವಾಗುತ್ತದೆ.
ವ್ಯಕ್ತಿತ್ವ ವಿಕಾಸ : ಒಂದು ವೇಳೇ ಸ್ತ್ರೀ ಸೆಕ್ಸ್ ನ ಬಾಬತ್ತಿನಲ್ಲಿ ಕೇವಲ ಸಮರ್ಪಿತಳಾಗಿರದೆ ತನ್ನ ಇಚ್ಛೆ ಅನಿಚ್ಛೆಗಳನ್ನು ಹೇಳಿಕೊಂಡರೆ, ಆಕೆ ಪುರುಷ ಸಂಗಾತಿಯ ಮನಸ್ಸಿನಲ್ಲಿ ಆಸಕ್ತಿ ಹುಟ್ಟಿಸಬಹುದು. ಅದು ವ್ಯಕ್ತಿತ್ವ ವಿಕಾಸದಲ್ಲಿ ಸಹಾಯಕವಾಗುತ್ತದೆ.
ಆತ್ಮವಿಶ್ವಾಸದಲ್ಲಿ ಹೆಚ್ಚಳ : ಕೇವಲ ಪುರುಷನ ಇಚ್ಛೆಯಂತೆ ಸಾಗುವುದು ಸೆಕ್ಸ್ ಜೀವನದಲ್ಲಿ ಯಾಂತ್ರಿಕ ಪ್ರಭಾವ ಬೀರುತ್ತದೆ. ಆದರೆ ಸ್ತ್ರೀ ಕೂಡ ಈ ನಿಟ್ಟಿನಲ್ಲಿ ಪ್ರಮುಖ ಪಾತ್ರ ವಹಿಸಿದರೆ ಜೀವನದಲ್ಲಿ ಉತ್ಸಾಹ, ಹೊಸ ಸ್ಛೂರ್ತಿ ತುಂಬಬಹುದಾಗಿದೆ.
ಅಂದಹಾಗೆ, ಸದ್ಯದ ಸನ್ನಿವೇಶದಲ್ಲಿ ಭಾರತೀಯ ನಾಗರಿಕರು ಮೂಢನಂಬಿಕೆಗಳಿಂದ, ಕೆಟ್ಟ ಪದ್ಧತಿಗಳಿಂದ ಹೊರಬರಲು ಬಹಳ ಸಮಯ ತಗುಲುತ್ತದೆ. ಆದರೆ ಆ ಕಾರಣಗಳ ಬಗ್ಗೆ ಹೇಳಬೇಕೆಂದರೆ, ಹಿಂದುಳಿದ ಮಾನಸಿಕತೆಯನ್ನು ಸ್ವಲ್ಪ ಮಟ್ಟಿಗೆ ಕಡಿಮೆಗೊಳಿಸುವ ಪ್ರಯತ್ನ ಮಾಡಬಹುದಾಗಿದೆ. ಕೌಟುಂಬಿಕ ವಾತಾವರಣದಲ್ಲಿ ಹುಡುಗಿಯರಿಗೆ ಸೆಕ್ಸ್ ಕೆಟ್ಟದ್ದು, ಅದರಿಂದ ದೂರ ಇರಬೇಕು ಎಂದು ಹೆದರಿಸಲಾಗುತ್ತದೆ. ಸೆಕ್ಸ್ ಜೊತೆಗೆ ನಮ್ಮ ಚಾರಿತ್ರ್ಯ ಜೋಡಿಸಿ ನೋಡಲಾಗುತ್ತದೆ. ಸೆಕ್ಸ್ ಇಚ್ಛೆ ಹತ್ತಿಕ್ಕಿ ಅಥವಾ ಅದರ ಬಗ್ಗೆ ತಮ್ಮ ಅಭಿಪ್ರಾಯ ಹೇಳದೆಯೇ ಇರುವುದು ಸಚ್ಚಾರಿತ್ರ್ಯ ಎಂದು ಹೇಳಲಾಗುತ್ತದೆ.
ಚಾರಿತ್ರ್ಯವನ್ನು ಕುಟುಂಬದ ಗೌರವದ ಜೊತೆಗೂ ಜೋಡಿಸಿ ನೋಡಲಾಗುತ್ತದೆ. ಸ್ತ್ರೀಯರು ಕುಟುಂಬದ ಗೌರವ ಎಂದು ತಿಳಿಯಲಾಗುತ್ತದೆ. ಅಂದರೆ ಸೆಕ್ಸ್ ಬಗ್ಗೆ ಮುಕ್ತ ಅಭಿಪ್ರಾಯ ವ್ಯಕ್ತಪಡಿಸುವುದು ಚಾರಿತ್ರ್ಯಹೀನತೆಯ ಸಂಕೇತ, ಅದರಿಂದ ಕುಟುಂಬದ ಗೌರವ ಮಣ್ಣು ಪಾಲಾಗುತ್ತದೆ ಎಂದೂ ತಿಳಿದುಕೊಳ್ಳಲಾಗುತ್ತದೆ.
ಮದುವೆಯ ಬಳಿಕ ಇವೇ ಸಂಸ್ಕಾರಗಳು ಮಹಿಳೆಯೊಬ್ಬಳಲ್ಲಿ ಜಮೆಗೊಂಡಿರುತ್ತವೆ. ಈ ಕಾರಣದಿಂದ ಆಕೆ ಸೆಕ್ಸ್ ಕುರಿತಂತೆ ಗಂಡನ ಮುಂದೆ ತನ್ನ ಯಾವುದೇ ಅಭಿಪ್ರಾಯ ವ್ಯಕ್ತಪಡಿಸಲು ಸಂಕೋಚಪಡುತ್ತಾಳೆ.
ಈ ಕುರಿತಂತೆ ಬೇರೆ ಪುರುಷರ ಯೋಚನೆ ಕೂಡ ಪರಂಪರಾವಾದಿ ಸಾಮಂತವಾದಿ ಪದ್ಧತಿಯಿಂದ ಪ್ರಭಾವಿತವಾಗಿರುವುದು ಕಂಡುಬರುತ್ತದೆ. ಅವನಿಗೆ ತನ್ನ ಪತ್ನಿ ಸೆಕ್ಸ್ ಕುರಿತಂತೆ ಮುಕ್ತವಾಗಿ ಮಾತನಾಡುವುದು ಹಾಗೂ ತನ್ನ ಇಚ್ಛೆ ವ್ಯಕ್ತಪಡಿಸುವುದು ಸ್ತ್ರೀ ಸಂಸ್ಕಾರದ ವಿರುದ್ಧ ಎನಿಸುತ್ತದೆ. ಈ ಯೋಚನೆಯೊಂದಿಗೆ ಪುರುಷರು ಎಷ್ಟೋ ಸಲ ಮಹಿಳೆಯರನ್ನು ವ್ಯಂಗ್ಯ ಮಾಡುವುದು ಉಂಟು, ಇಲ್ಲಿ ಅವರ ಭಾವನೆಗಳನ್ನು ಗೌರವಿಸುವುದಿಲ್ಲ. ಇಂತಹ ಸ್ಥಿತಿಯಲ್ಲಿ ಮಹಿಳೆಗೂ ಕೂಡ ತನ್ನ ಭಾವನೆಗಳನ್ನು ಹೊರಹೊಮ್ಮಿಸಲಾಗದೆ ಒಳಗೊಳಗೇ ಹತ್ತಿಕ್ಕಿಕೊಳ್ಳಬೇಕಾಗುತ್ತದೆ. ಆ ಬಳಿಕ ಇದೇ ಪುರುಷ ಸಮಾಗಮದ ಸಮಯದಲ್ಲಿ ಸ್ತ್ರೀ ಸತ್ತವಳ ಹಾಗೆ ಬಿದ್ದುಕೊಂಡಿರುತ್ತಾಳೆ ಎಂದು ಆರೋಪಿಸುತ್ತಾನೆ. ಅದು ಸಂಬಂಧದಲ್ಲಿ ಭ್ರಮೆಯ ಭಾವನೆಯನ್ನುಂಟು ಮಾಡುತ್ತದೆ.
ಸ್ತ್ರೀ ಈ ಎಲ್ಲ ಅಡೆತಡೆಗಳನ್ನು ದಾಟಿ ಆಕೆ ನಿಜವಾದ ಆನಂದ ಪಡೆದರೆ ಅದು ಅವಳಲ್ಲಿ ಧನ್ಯತಾ ಭಾವ ಮೂಡಿಸುತ್ತದೆ.
– ದೀಪಾ ರಾವ್
