ಅಚ್ಚುಕಟ್ಟಿಗೆ ಮತ್ತೊಂದು ಹೆಸರು ನಮ್ಮಮ್ಮ ಎಂದರೆ ತಪ್ಪಾಗಲಾರದು. ಇವರು ಪುಟ್ಟ ಮನೆಯಲ್ಲೇ ಎಲ್ಲವನ್ನೂ ಒಪ್ಪವಾಗಿಟ್ಟುಕೊಳ್ಳುತ್ತಿದ್ದರು. ನಮ್ಮ ಹೊಸ ಬಟ್ಟೆಗಳನ್ನೆಲ್ಲಾ ಅದರಲ್ಲೂ ಜರಿ ಲಂಗ ಮತ್ತು ರೇಷಿಮೆ ಸೀರೆಗಳನ್ನು ಬಿಳಿಯ ಮಕಮಲ್ ಪಂಚೆಯಲ್ಲಿ ಮಡಿಚಿ, ಅದನ್ನು ಓರಣವಾಗಿ ಗೋದ್ರೆಜ್‌ ಬೀರುವಿನಲ್ಲಿಡುತ್ತಿದ್ದಳು. ಹೊಸ ಬಟ್ಟೆಗಳನ್ನಿಡುನ ಪರಿ ಇದಾದರೆ ಪ್ರತಿದಿನ ತೊಡುವ ಬಟ್ಟೆಗಳನ್ನು ಮರದ ಬೀರುವಿನಲ್ಲಿ ನೀಟಾಗಿ ಮಡಿಚಿ ಜೋಡಿಸಿಡುತ್ತಿದ್ದರು. ಒಟ್ಟಿನಲ್ಲಿ ನಾವಿದ್ದ ಮನೆ ಪುಟ್ಟದಾದರೂ ಒಪ್ಪ ಓರಣಕ್ಕೇನೂ ಕಡಿಮೆ ಇರಲಿಲ್ಲ. ಇವೆಲ್ಲಾ ಮನೆಯಲ್ಲಿ ಪದಾರ್ಥಗಳನ್ನಿಡಲು ಯಾವುದೇ ಹೆಚ್ಚಿನ ಬೀರುಗಳಲ್ಲದಿರುವ ಕಾಲದ ಕಥೆ.
ಆದರೆ ಕಾಲ ಬದಲಾಗಿದೆ. ಮನೆ ಕಟ್ಟುವಾಗಲೇ ಪದಾರ್ಥಗಳನ್ನಿಡಲು, ಬಟ್ಟೆಗಳನ್ನಿಡಲು ಪಾದರಕ್ಷೆಯಿಂದ ಹಿಡಿದು ಫೈಲುಗಳು. ಪುಸ್ತಕಗಳು ಎಲ್ಲಕ್ಕೂ ಸ್ಥಳವನ್ನು ಮೊದಲೇ ಯೋಚಿಸಲಾಗಿರುತ್ತದೆ. ನಿವೇದಿತಾಳ ಮನೆ ಒಪ್ಪ ಓರಣಕ್ಕೆ ಒಳ್ಳೆಯ ಉದಾಹರಣೆ. ಮನೆಯ ಸಾಮಾನುಗಳನ್ನಿಡಲು ಸರಿಯಾದ ಸ್ಥಳವಿದ್ದಾಗ ಮನೆಯ ಸೌಂದರ್ಯಕ್ಕೆ ಕುಂದು ಬರುವುದಿಲ್ಲ. ಒಳಾಂಗಣ ವಿನ್ಯಾಸಕಾರರು ಎಲ್ಲಕ್ಕೂ ಅನುವು ಮಾಡಿರುತ್ತಾರೆ. ಪ್ರತಿಯೊಂದು ಕೋಣೆಗೂ ಅಗತ್ಯವಿರುವಷ್ಟು ಸ್ಟೋರೇಜ್‌ ಸ್ಥಳವನ್ನು ಮೀಸಲಿರಿಸಲಾಗಿರುತ್ತದೆ.
ಹಿಂದೆ ಒಂದು ಕೋಣೆಯ ಮಧ್ಯದಲ್ಲಿ ಮಂಚವನ್ನಿರಿಸಿದರೆ ಅದರ ಒಂದು ಪಕ್ಕಕ್ಕೆ ಗೋಡೆಗೆ ಆನಿಸಿದಂತೆ ವಾರ್ಡ್‌ರೋಬ್ಸ್ ನ್ನು ಮಾಡಿಸಲಾಗುತ್ತಿತ್ತು. ಅದರಲ್ಲೂ ವಿಭಾಗಗಳು ಹೆಂಗಸರಿಗಾದರೆ, ಅವರ ಆಭರಣಗಳನ್ನಿಡಲು ಪ್ರತ್ಯೇಕ ವಿಭಾಗಗಳು ಈ ರೀತಿ ರೂಪಿಸಾಲಾಗುತ್ತಿತ್ತು. ಇವುಗಳ ಪಕ್ಕಕ್ಕೆ ಶೃಂಗಾರ ಪ್ರಸಾಧನಗಳನ್ನಿಡಲು ಒಂದು ಡ್ರಾಯರ್‌ ಮತ್ತು ಅದರ ಮೇಲ್ಭಾಗಕ್ಕೆ ಒಂದು ಕನ್ನಡಿಯನ್ನು ಇರಿಸಿ. ಸಿಂಗರಿಸಿಕೊಳ್ಳುವಾಗ ಕುಳಿತುಕೊಳ್ಳಲು ಒಂದು ಪುಟ್ಟ ಸ್ಟೂಲ್ ಇರಿಸಿದ್ದರೆ, ಸಿಂಗರಿಸಿಕೊಳ್ಳುವುದಕ್ಕೆ ಅವರು ಕುಳಿತುಕೊಳ್ಳಲು ಅನುಕೂಲವಾಗಿರುತ್ತಿತ್ತು. ಅರ್ಥಾತ್‌ ಪ್ರತಿಯೊಂದು ಕೋಣೆಯಲ್ಲೂ ವಾರ್ಡ್‌ರೋಬ್‌ ಮತ್ತು ಒಂದು ಡ್ರೆಸ್ಸಿಂಗ್‌ ಟೇಬಲ್ ಇರುತ್ತಿತ್ತು. ಹೀಗಾಗಿ ಯಾವುದೇ ವಸ್ತುಗಳು ಹೊರಗೆ ಚೆಲ್ಲಾಪಿಲ್ಲಿಯಾಗಿದ್ದು ಕೋಣೆಯ ಅಂದಕ್ಕೆ ಕುಂದು ಬರುತ್ತಿರಲಿಲ್ಲ.
ಈ ಆಧುನಿಕ ಕಾಲದಲ್ಲಿ ನಿವೇಶನ ವಿಶಾಲವಾಗಿದ್ದರೆ ಅದು ನಿಮಗೆ ಜಾಕ್‌ ಪಾಟ್‌ ಇದ್ದಂತೆ. ಇಲ್ಲಾದರೂ ಇರುವ ನಿವೇಶನಕ್ಕೆ ಅನುಗುಣವಾಗಿಯೇ ಎಲ್ಲವನ್ನೂ ರೂಪಿಸಲಾಗುತ್ತದೆ. ನಿಮ್ಮ ಮಲಗುವ ಕೋಣೆ ಅರ್ಥಾತ್‌ ಬೆಡ್‌ರೂಮಿನ ಮಧ್ಯಭಾಗದಲ್ಲಿ ಮಂಚವನ್ನಿರಿಸಿ ಮಿಕ್ಕೆಲ್ಲೆಡೆಯೂ ನಿಮಿಗಿಷ್ಟ ಬಂದಂತೆ ಅಲಂಕರಿಸಬಹುದು. ಆಕರ್ಷಕ ರೀತಿಯಲ್ಲಿ ನಿಮ್ಮ ಮಕ್ಕಳ ವಿಭಿನ್ನ ಫೋಟೋಗಳನ್ನು ತೂಗುಹಾಕಬಹುದು. ಕೋಣೆಯ ಒಂದು ಮೂಲೆಗೆ ಒಂದು ಹೂವಿನಕುಂಡ ಇಲ್ಲವಾದಲ್ಲಿ ಅಲಂಕಾರಿಕ ಒಣ ಹೂಗಳ ದೊಡ್ಡ ವಾಸ್‌. ಅದರ ಪಕ್ಕ ಒಂದು ಸುಂದರ ಬೆತ್ತದ ಪೆಟ್ಟಿಗೆ ಅಥವಾ ಬುಟ್ಟಿ. ಅದು ನೋಡಲಷ್ಟೇ ಅಲ್ಲ ಅದರಲ್ಲಿ ಒಗೆದ, ಇಸ್ತ್ರಿಗೆ ಹೋಗುವ ಬಟ್ಟೆಗಳನ್ನಿರಿಸಲಾಗುತ್ತದೆ. ಕೋಣೆಯ ಒಂದು ಭಾಗಕ್ಕೆ ಲಾಕ್‌ ಇನ್‌ ವಾರ್ಡ್‌ರೋಬ್‌. ಅಂದರೆ ಕೋಣೆಯ ಮಧ್ಯದ ಗೋಡೆಗೆ ದೊಡ್ಡ ಹೊಳೆಯು ಕನ್ನಡಿ. ಅದರ ಅಕ್ಕಪಕ್ಕ ಗೋಡೆಗಳಲ್ಲಿ ನಿಮ್ಮ ವಸ್ತ್ರಗಳನ್ನಿರಿಸಲು, ಶೂಗಳನ್ನಿಡಲು ಸ್ಥಳವನ್ನು ರೂಪಿಸಲಾಗುತ್ತದೆ. ಇದು ನಿಮ್ಮ ಅಟ್ಯಾಟ್ಡ್ ಬಾತ್‌ ರೂಮ್ ಪಕ್ಕದಲ್ಲೇ ಇರುವುದರಿಂದ ನೀವು ಸ್ನಾನ ಮಾಡಿಕೊಂಡು ಬಂದು ನಿಮ್ಮನ್ನು ಪೂರ್ಣವಾಗಿ ಅಲಂಕರಿಸಿಕೊಂಡೇ ಕೋಣೆಗೆ ಬರಬಹುದು.
ವಾರ್ಡ್‌ರೋಬ್‌ಗಳನ್ನು ಮಾಡಿಸುವಾಗ ಬಳಸುವ ವಸ್ತುಗಳು ನಿಮ್ಮ ಅಭಿರುಚಿಗೆ ಅನುಗುಣವಾಗಿರಲಿ. ಕೋಣೆ ಚಿಕ್ಕದಾಗಿದ್ದರೆ ವಾರ್ಡ್‌ರೋಬ್‌ನ ಬಾಗಿಲುಗಳನ್ನು ಜಾರಿಸುವಂತೆ ಸ್ಲೈಡಿಂಗ್‌ ಮಾಡಬಹುದು. ಆಗ ವಾರ್ಡ್‌ರೋಬ್‌ನ ಬಾಗಿಲು ತೆರೆದುಕೊಂಡಿದ್ದಾಗಲೂ ಪಕ್ಕದಲ್ಲಿ ಓಡಿಯಾಡಲು ಅನುಕೂಲವಾಗಿರುತ್ತದೆ. ವಾರ್ಡ್‌ರೋಬ್‌ನ ಬಾಗಿಲುಗಳಿಗೆ ಕನ್ನಡಿಯನ್ನು ಹಾಕಿದಾಗ ಸ್ಥಳ ದ್ವಿಗುಣವಾದಂತೆ ಕಾಣುತ್ತದೆ. ಆಗ ನಿಮ್ಮ ಕೋಣೆ ವಿಶಾಲವಾಗಿದೆ ಎಂದೆನಿಸುತ್ತದೆ.
ಉದಾಹರಣೆ 1
ವಾರ್ಡ್‌ರೋಬ್‌ನ ಒಳಗೆ ನಮ್ಮ ಅನುಕೂಲಕ್ಕೆ ತಕ್ಕಂತೆ ವಿಭಾಗಗಳನ್ನು ಮಾಡಿಸಿಕೊಳ್ಳಬಹುದು. ಆಗ ಉದ್ದನೆಯ ಮತ್ತು ಗಿಡ್ಡಾದ ಬಟ್ಟೆಗಳನ್ನು ತೂಗುಹಾಕಲು, ಒಳ ಉಡುಪುಗಳನ್ನು ತೆಗೆದುಕೊಳ್ಳುವಾಗ ಫಜೀತಿಯಾಗದಂತೆ ವಿಭಾಗಗಳು ಅಥವಾ ಅಂದವಾದ ಬ್ಯಾಸ್ಕೆಟ್ಟುಗಳನ್ನೂ ಬೀರುವಿನ ಒಳಗೆ ಇರಿಸಬಹುದು. ವಾರ್ಡ್‌ರೋಬ್‌ ಒಳಗೆ ವಸ್ತ್ರ ಮತ್ತು ಇತರ ಪದಾರ್ಥಗಳನ್ನು ಜೋಡಿಸಿಟ್ಟುಕೊಳ್ಳುವುದು ಒಂದು ಕಲೆಯೂ ಹೌದು. ವಿಭಾಗಗಳಲ್ಲಿ ಸರಿಯಾಗಿ ಜೋಡಿಸಿಟ್ಟುಕೊಂಡಲ್ಲಿ ನಿಮಗೆ ಬೇಕಾದ ವಸ್ತು ಅವಸರದಲ್ಲೂ ದೊಕುತ್ತವೆ. ಇಲ್ಲವಾದಲ್ಲಿ ಎಲ್ಲವನ್ನೂ ಕಿತ್ತುಹಾಕಿ ಮತ್ತೆ ಜೋಡಿಸಿಕೊಳ್ಳಬೇಕಾಗುತ್ತದೆ.
ಉದಾಹರಣೆ 2
ಡ್ರೆಸ್ಸಿಂಗ್‌ ಟೇಬಲ್‌ನ ಕೆಳಗಿನ ಡ್ರಾಯರ್‌ಗಳಲ್ಲೂ ಸಹ ವಿಭಾಗಗಳಿದ್ದಾಗ ಅಲ್ಲಿಯೂ ಸೂಕ್ತವಾಗಿ ಬೇಕಾದವುಗಳನ್ನು ಕೈಗೆಟುಕುವಂತೆ ಜೋಡಿಸಿದಾಗ ಅನುಕೂಲವಾಗಿರುತ್ತದೆ.
ಉದಾಹರಣೆ 3
ಲಾಕ್‌ ಇನ್‌ ವಾರ್ಡ್‌ರೋಬ್‌ನಲ್ಲಿ ವಿಭಾಗಗಳನ್ನು ಮತ್ತೂ ಚೆನ್ನಾಗಿ ರೂಪಿಸಬಹುದು. ಲಾಕ್‌ ಇನ್‌ ವಾರ್ಡ್‌ರೋಬ್‌ನ ಮಧ್ಯಕ್ಕೆ ದೊಡ್ಡದೊಂದು ಕನ್ನಡಿಯನ್ನು ಇರಿಸಿ, ಅಕ್ಕಪಕ್ಕದಲ್ಲಿ ಒಂದು ಕಡೆ ಗಂಡಸರ ಬಟ್ಟೆಗಳನ್ನರಿಸಬಹುದು. ಅಲ್ಲಿಡುವ ಬಟ್ಟೆಗಳಿಗೆ ಅನುಗುಣವಾಗಿ ಹ್ಯಾಂಗರ್‌ ರಾಡ್‌ನ್ನು ಹಾಕಿಸಬಹುದು. ಬನಿಯನ್‌, ಒಳಉಡುಪು, ಕರ್ಚೀಫ್, ಟೈಗಳನ್ನೂ ಸಹ ನಿಮಗೆ ಬೇಕಾದಂತೆ ಜೋಡಿಸಬಹುದು. ಎಲ್ಲ ಅವುಗಳ ನಿರೂಪಿತ ಸ್ಥಳಗಳಲ್ಲಿದ್ದಾಗ ತೊಡಕಾಗುವುದಿಲ್ಲ.
ಉದಾಹರಣೆ 4
ಅಂತೆಯೇ ಹೆಣ್ಣುಮಕ್ಕಳ ಉಡುಪುಗಳನ್ನೂ ಸಹ ಅದೇ ರೀತಿ ವಿಭಾಗಗಳಿಗೆ ಅನುಗುಣವಾಗಿ ಉದ್ದನೆಯದು, ಅದಕ್ಕಿಂತ ಚಿಕ್ಕದು ನಂತರ ಮತ್ತೂ ಚಿಕ್ಕದು ಈ ರೀತಿ ಜೋಡಿಸಬಹುದು. ಜೊತೆಗೆ ಹೆಣ್ಣುಮಕ್ಕಳ ವ್ಯಾನಿಟಿ ಬ್ಯಾಗ್‌ಗಳು ಅರ್ಥಾತ್‌ ಜಂಭದ ಚೀಲಗಳನ್ನು, ವಿಧ ವಿಧವಾದ ಬಣ್ಣ ಬಣ್ಣದ ಪಾದರಕ್ಷೆಗಳು ಮತ್ತು ಆಭರಣಗಳು ಈ ರೀತಿ ತಮ್ಮ ಅನುಕೂಲಕ್ಕೆ ತಕ್ಕನಾಗಿ ಎಲ್ಲವನ್ನೂ ಜೋಡಿಸಬಹುದು. ಅದರಲ್ಲೂ ಹೆಣ್ಣುಮಕ್ಕಳ ಬೇಕುಗಳು ಸ್ವಲ್ಪ ಜಾಸ್ತೀನೇ! ಅದಕ್ಕೆ ಅನುಗುಣವಾಗಿ ರೂಪಿಸುವಿಕೆಯೂ ಇರುತ್ತದೆ. ಅಂತೂ ಮನೆಯ ಯಜಮಾನಿಯ ಸಾಮಾನುಗಳು ಚಂದದ ರೀತಿಯಲ್ಲಿ ತಮ್ಮ ಸ್ಥಳವನ್ನು ಆಕ್ರಮಿಸಿಕೊಳ್ಳುತ್ತವೆ.
ಎಲ್ಲ ಪದಾರ್ಥಗಳಿಗೂ ನಿರ್ದಿಷ್ಟವಾದ ಸ್ಥಳಗಳಿದ್ದಾಗ ಕೋಣೆಯಾಗಲೀ, ಮನೆಯಾಗಲೀ ಸುಂದರವಾಗಿ ಆಕರ್ಷಕವಾಗಿ ಕಾಣುತ್ತದೆ. ಆದರೆ ಎಷ್ಟೇ ವಾರ್ಡ್‌ರೋಬ್‌ಗಳಿದ್ದರೂ ಅವುಗಳನ್ನು ಸರಿಯಾದ ರೀತಿಯಲ್ಲಿ ಉಪಯೋಗಿಸುವ, ಜೋಡಿಸುವ ಕಾಂತಿಕೆ ಇರಬೇಕು. ಅಂತೂ ಒಪ್ಪಓರಣ ಆ ದೇವರು ಹೆಣ್ಣುಮಕ್ಕಳಿಗಿತ್ತ ವರ ಹೌದು. ಒಟ್ಟಿನಲ್ಲಿ ನಿಮ್ಮ ಮನೆ ಚಂದವಾಗಿ ಓರಣವಾಗಿದೆ ಎಂದರೆ ಅದರ ಶ್ರೇಯಸ್ಸು ಮನೆಯ ಯಜಮಾನಿಗೇ ಸಲ್ಲುತ್ತದೆ.
– ಮಂಜುಳಾ ರಾಜ್‌
