ಎಂಡೊಮೆಟ್ರೋಸಿಸ್‌ ಗರ್ಭಾಶಯಕ್ಕೆ ಸಂಬಂಧಪಟ್ಟ ಒಂದು ಸಮಸ್ಯೆ. ಈ ಸಮಸ್ಯೆ ಮಹಿಳೆಯರ ಸಂತಾನೋತ್ಪತ್ತಿ ಸಾಮರ್ಥ್ಯದ ಮೇಲೆ ಅತಿ ಹೆಚ್ಚು ಪ್ರಭಾವ ಬೀರುತ್ತದೆ. ಏಕೆಂದರೆ ಗರ್ಭ ಧರಿಸಲು ಹಾಗೂ ಮಗುವಿಗೆ ಜನ್ಮ ನೀಡುವುದಕ್ಕೆ ಗರ್ಭಕೋಶ ಪ್ರಮುಖ ಪಾತ್ರ ವಹಿಸುತ್ತದೆ. ಹಲವು ಮಹಿಳೆಯರಲ್ಲಿ ಈ ಸಮಸ್ಯೆ ಗಂಭೀರವಾಗಿದ್ದರೆ, ಅದು ಬೇರೆ ಅಂಗಗಳ ಮೇಲೂ ತನ್ನ ದುಷ್ಪ್ರಭಾವ ಬೀರುತ್ತದೆ.
ಆಧುನಿಕ ಔಷಧಿ ಹಾಗೂ ಚಿಕಿತ್ಸಾ ಪದ್ಥತಿಗಳು ನೋವು ಹಾಗೂ ಬಂಜೆತನದಿಂದ ಮುಕ್ತಿ ದೊರಕಿಸಿಕೊಡುತ್ತವೆ. ಎಂಡೊಮೆಟ್ರೋಸಿಸ್‌ನ ಅರ್ಥ ಅದಕ್ಕೆ ತುತ್ತಾದ ಮಹಿಳೆಯರು ಗರ್ಭ ಧರಿಸುವುದೇ ಇಲ್ಲ ಎಂದಲ್ಲ, ಆ ಸಮಸ್ಯೆ ಇರುವ ಕಾರಣದಿಂದ ಗರ್ಭ ಧರಿಸುವಲ್ಲಿ ತೊಂದರೆಯಾಗುತ್ತದೆ.
ಏನಿದು ಎಂಡೊಮೆಟ್ರೋಸಿಸ್‌?
ಎಂಡೊಮೆಟ್ರೋಸಿಸ್‌ ಗರ್ಭಕೋಶದ ಆಂತರಿಕ ಪದರದ ಮೇಲೆ ಜೀವಕೋಶಗಳು ಅಸಾಮಾನ್ಯ ರೀತಿಯಲ್ಲಿ ಬೆಳೆಯುತ್ತವೆ. ಈ ಜೀವಕೋಶಗಳು ಗರ್ಭಕೋಶದ ಹೊರಭಾಗಕ್ಕೂ ತಮ್ಮ ಬೆಳವಣಿಗೆ ಪ್ರಕ್ರಿಯೆ ಮುಂದುವರಿಸಿದಾಗ ಈ ಸಮಸ್ಯೆ ಮತ್ತಷ್ಟು ಬಿಗಡಾಯಿಸುತ್ತದೆ. ಈ ಪ್ರಕ್ರಿಯೆಯನ್ನು `ಎಂಡೊಮೆಟ್ರೋಸಿಸ್‌’ ಎಂದು ಹೇಳಲಾಗುತ್ತದೆ.
ಈ ಇಂಪ್ಲಾಂಟ್ಸ್ ಸಾಮಾನ್ಯವಾಗಿ ಅಂಡಕೋಶ, ಫೆಲೋಪಿಯನ್‌ ಟ್ಯೂಬ್‌, ಗರ್ಭಕೋಶದ ಹೊರ ಪದರದ ಮೇಲೆ ಅಥವಾ ಕರುಳು ಇಲ್ಲಿ ಪೆಲ್ವಿಕ್‌ ಕುಹರದ ಪದರದ ಮೇಲೆ ಕಂಡುಬರುತ್ತವೆ. ಅವು ವೆಜೈನಾ, ಸರ್ವಿಕ್ಸ್ ಮತ್ತು ಬ್ಲ್ಯಾಡರ್‌ ಮೇಲೂ ಕಂಡುಬರಬಹುದು. ಬಹಳಷ್ಟು ಕಡಿಮೆ ಪ್ರಕರಣಗಳಲ್ಲಿ ಎಂಡೊಮೆಟ್ರೋಸಿಸ್‌ ಪೆಲ್ವಿಕ್ಸ್ ನ ಹೊರಗೆ ಲಿವರ್‌ ಮೇಲೆ ಅಥವಾ ಶ್ವಾಸಕೋಶ ಇಲ್ಲಿ ಮೆದುಳಿನ ಆಸುಪಾಸು ಸಹ ಕಂಡುಬರಬಹುದು.
ಎಂಡೊಮೆಟ್ರೋಸಿಸ್‌ಗೆ ಏನು ಕಾರಣ?
ಎಂಡೊಮೆಟ್ರೋಸಿಸ್‌ ಮಹಿಳೆಯರಿಗೆ ಸಂತಾನೋತ್ಪತ್ತಿಯ ಅವಧಿಯಲ್ಲಿ ತೊಂದರೆಯನ್ನುಂಟು ಮಾಡುತ್ತದೆ. ಇದರ ಹೆಚ್ಚಿನ ಪ್ರಕರಣಗಳು 25-35 ವರ್ಷದ ಮಹಿಳೆಯರಲ್ಲಿ ಕಂಡುಬರುತ್ತವೆ. ಆದರೆ ಎಷ್ಟೋ ಸಲ 10-11 ವರ್ಷದ ಹುಡುಗಿಯರಲ್ಲೂ ಈ ಸಮಸ್ಯೆ ಉಂಟಾಗಬಹುದು. ಮುಟ್ಟಂತ್ಯಗೊಂಡ ಮಹಿಳೆಯರಲ್ಲಿ ಇದರ ಸಮಸ್ಯೆ ಬಹಳ ಕಡಿಮೆ.
ವಿಶ್ವದಲ್ಲಿ ಅನೇಕ ಕೋಟಿ ಮಹಿಳೆಯರು ಈ ಸಮಸ್ಯೆಗೆ ತುತ್ತಾಗಿದ್ದಾರೆ. ಯಾವ ಮಹಿಳೆಯರು ಗಂಭೀರ ಪೆಲ್ವಿಕ್‌ ಪೇನ್‌ನಿಂದ ಬಳಲುತ್ತಿರುತ್ತಾರೊ, ಅವರಲ್ಲಿ ಶೇ.80ರಷ್ಟು ಜನರು ಎಂಡೊಮೆಟ್ರೋಸಿಸ್‌ ರೋಗಗ್ರಸ್ತರಾಗಿರುತ್ತಾರೆ.
ಇದರ ವಾಸ್ತವ ಕಾರಣ ತಿಳಿದುಬಂದಿಲ್ಲ. ಹಲವು ಅಧ್ಯಯನಗಳಿಂದ ತಿಳಿದು ಬಂದ ಸಂಗತಿಯೆಂದರೆ, ಯಾವ ಮಹಿಳೆಯರ ಬಾಡಿ ಮಾಸ್‌ ಇಂಡೆಕ್ಸ್ (ಬಿಎಂಐ) ಕಡಿಮೆ ಇರುತ್ತೋ ಅಂತಹ ಮಹಿಳೆಯರಲ್ಲಿ ಎಂಡೊಮೆಟ್ರೋಸಿಸ್‌ ಸಮಸ್ಯೆ ಅಧಿಕವಾಗಿರುತ್ತದೆ. 35ರ ಬಳಿಕ ತಾಯಿಯಾಗುವವರಲ್ಲಿ ಅಥವಾ ಎಂದೂ ತಾಯಿಯಾಗದ ಮಹಿಳೆಯರಲ್ಲೂ ಕೂಡ ಈ ಸಮಸ್ಯೆ ಕಾಣಿಸಬಹುದು. ಇದರ ಹೊರತಾಗಿ ಋತುಚಕ್ರ ಬಹುಬೇಗ ಶುರುವಾಗಿ ಮುಟ್ಟು ತಡವಾಗಿ ನಿಲ್ಲುತ್ತೊ ಅಂಥವರಲ್ಲೂ ಇದರ ಅಪಾಯ ಹೆಚ್ಚಿನ ಪ್ರಮಾಣದಲ್ಲಿರುತ್ತದೆ. ಆನುವಂಶೀಯತೆ ಕೂಡ ಇದರಲ್ಲಿ ಪ್ರಮುಖ ಪಾತ್ರವಹಿಸುತ್ತದೆ.
ಲಕ್ಷಣಗಳು
ಹೆಚ್ಚಿನ ಮಹಿಳೆಯರಲ್ಲಿ ಎಂಡೊಮೆಟ್ರೋಸಿಸ್‌ನ ಲಕ್ಷಣಗಳು ಗೋಚರಿಸುವುದೇ ಇಲ್ಲ. ಆದರೆ ಯಾವ ಲಕ್ಷಣಗಳು ಗೋಚರಿಸುತ್ತವೋ ಅದರಲ್ಲಿ ಪ್ರಮುಖವಾದವುಗಳೆಂದರೆ ಋತುಸ್ರಾದ ಸಂದರ್ಭದಲ್ಲಿ ಅತಿಯಾದ ನೋವು, ಋತುಚಕ್ರ ಅಥವಾ ಅಂಡ ಬಿಡುಗಡೆಯ ಸಮಯದಲ್ಲಿ ಪೆಲ್ವಿಕ್‌ ಪೇನ್ ಎಂಡೊಮೆಟ್ರೋಸಿಸ್‌ನ ಒಂದು ಲಕ್ಷಣವಾಗಿದೆ. ಆದರೆ ಇದು ಸಾಮಾನ್ಯ ಮಹಿಳೆಯರಲ್ಲೂ ಆಗಬಹುದು. ಈ ನೋವಿನ ತೀವ್ರತೆ ಪ್ರತಿ ತಿಂಗಳೂ ಬದಲಾಗಬಹುದು. ಬೇರೆ ಬೇರೆ ಮಹಿಳೆಯರಲ್ಲಿ ಬೇರೆ ಬೇರೆ ರೀತಿ ಗೋಚರಿಸಬಹುದು.
ಪೆಲ್ವಿಕ್‌ ಕ್ಷೇತ್ರದಲ್ಲಿ ಅಥವಾ ಹೊಟ್ಟೆಯ ಹಿಂಭಾಗದಲ್ಲಿ ನೋವುಂಟಾಗುವುದು ಮತ್ತು ಈ ನೋವು ಹಲವು ದಿನಗಳ ಕಾಲ ಇರಬಹುದಾಗಿದೆ. ಇದರಿಂದ ಸೊಂಟ ಹಾಗೂ ಹೊಟ್ಟೆಯಲ್ಲಿ ಕೂಡ ನೋವು ಕಾಣಿಸಬಹುದು. ಇದು ಋತುಚಕ್ರ ಶುರುವಾಗುವ ಮೊದಲು ಆರಂಭವಾಗಿ ಹಲವು ದಿನಗಳ ಕಾಲ ಮುಂದುವರಿಯಬಹುದು. ಮಲ, ಮೂತ್ರ ವಿಸರ್ಜನೆ ಮಾಡುವಾಗ ನೋವುಂಟಾಗಬಹುದು. ಈ ಸಮಸ್ಯೆ ಹೆಚ್ಚಾಗಿ ಗೋಚರಿಸುವುದು ಮುಟ್ಟಿನ ಸಮಯದಲ್ಲಿ ಋತುಸ್ರಾವದ ಸಂದರ್ಭದಲ್ಲಿ ಅತಿಯಾಗಿ ರಕ್ತಸ್ರಾವ ಉಂಟಾಗುವಿಕೆ, ಒಮ್ಮೊಮ್ಮೆ ಋತುಚಕ್ರದ ನಡುವೆಯೇ ರಕ್ತಸ್ರಾವ ಉಂಟಾಗುವುದು, ಸಮಾಗಮದ ಸಮಯದಲ್ಲಿ ಮತ್ತು ಆ ಬಳಿಕ ನೋವು, ಡಯೇರಿಯಾ, ಮಲಬದ್ಧತೆ ಮತ್ತು ಅತಿಯಾದ ದಣಿವು ಉಂಟಾಗುವಿಕೆ ಎದೆಯಲ್ಲಿ ನೋವು ಅಥವಾ ಕೆಮ್ಮಿದಾಗ ರಕ್ತ ಬರುವಿಕೆ ಎಂಡೊಮೆಟ್ರೋಸಿಸ್‌ ಶ್ವಾಸಕೋಶದಲ್ಲಿರುವುದರ ಸಂಕೇತ. ತಲೆನೋವು ಮತ್ತು ತಲೆಸುತ್ತು ಬರುವುದು ಎಂಡೊಮೆಟ್ರೋಸಿಸ್‌ ಮೆದುಳಿನಲ್ಲಿರುವುದರ ಸಂಕೇತ.
ರಿಸ್ಕ್ ಫ್ಯಾಕ್ಟರ್‌
ಹಲವು ಕಾರಣಗಳು ಎಂಡೊಮೆಟ್ರೋಸಿಸ್‌ ಸಾಧ್ಯತೆಯನ್ನು ಹೆಚ್ಚಿಸುತ್ತವೆ.
ಮಗು ಆಗದೆ ಇರುವುದು.
ಒಬ್ಬರು ಅಥವಾ ಹೆಚ್ಚಿನ ನಿಕಟ ಸಂಬಂಧಿಗಳಿಗೆ (ಅಮ್ಮ, ಚಿಕ್ಕಮ್ಮ, ಸೋದರಿ) ಎಂಡೊಮೆಟ್ರೋಸಿಸ್‌ ಸಮಸ್ಯೆ ಇರುವಿಕೆ.
ಬೇರೆ ಕೆಲವು ವೈದ್ಯಕೀಯ ಕಾರಣಗಳಿಂದ ದೇಹದಲ್ಲಿ ಮೆನ್‌ಸ್ಟ್ರುಯಲ್ ಪೇನ್ ಸಾಮಾನ್ಯ ಮಾರ್ಗ ತೊಂದರೆಗೊಳಗಾಗುತ್ತದೆ.
ಮೂತ್ರದ ಅಸಾಮಾನ್ಯತೆ. ಇದು ಇನ್‌ಫರ್ಟಿಲಿಟಿಗೂ ಮೂಲ ಯಾವ ಮಹಿಳೆಯರಿಗೆ ಎಂಡೊಮೆಟ್ರೋಸಿಸ್‌ ಸಮಸ್ಯೆ ಇರುತ್ತದೊ, ಅವರಲ್ಲಿ ಶೇ.35 ರಿಂದ 50ರಷ್ಟು ಮಹಿಳೆಯರಲ್ಲಿ ಗರ್ಭ ಧರಿಸುವುದರಲ್ಲಿ ಸಮಸ್ಯೆ ಉಂಟಾಗುತ್ತದೆ. ಈ ಕಾರಣದಿಂದ ಅವರ ಫೆಲೋಪಿಯನ್‌ ನಾಳಗಳು ಮುಚ್ಚಿಕೊಳ್ಳುತ್ತವೆ. ಅದರಿಂದಾಗಿ ಅಂಡಾಣು ಮತ್ತು ವೀರ್ಯಾಣುಗಳ ಮಿಲನ ಸಾಧ್ಯವಾಗುವುದಿಲ್ಲ. ಕೆಲವೊಮ್ಮೆ ಅಂಡಾಣು ಮತ್ತು ವೀರ್ಯಾಣುವಿಗೂ ಹಾನಿಯನ್ನುಂಟು ಮಾಡುತ್ತದೆ. ಇದರಿಂದಾಗಿ ಗರ್ಭಧಾರಣೆ ಸಾಧ್ಯವಾಗುವುದಿಲ್ಲ. ಯಾವ ಮಹಿಳೆಯರಲ್ಲಿ ಈ ಸಮಸ್ಯೆ ಗಂಭೀರ ಅಲ್ಲವೋ, ಅಂಥವರಿಗೆ ಗರ್ಭಧಾರಣೆ ಸಮಸ್ಯೆ ಆಗುವುದಿಲ್ಲ.
ವೈದ್ಯರು ನೀಡುವ ಸಲಹೆ ಎಂದರೆ, ಯಾವ ಮಹಿಳೆಯರಿಗೆ ಈ ಸಮಸ್ಯೆ ಇರುತ್ತದೊ ಅವರು ಗರ್ಭ ಧರಿಸಲು ತಡ ಮಾಡಬಾರದು. ಏಕೆಂದರೆ ಕಾಲಕ್ರಮೇಣ ಸಮಸ್ಯೆ ತೀವ್ರತೆ ಪಡೆದುಕೊಳ್ಳುತ್ತ ಹೋಗುತ್ತದೆ.
ಕೆಲವು ಮಹಿಳೆಯರಿಗೆ ಬಂಜೆತನದ ಚಿಕಿತ್ಸೆ ಪಡೆಯಲು ವೈದ್ಯರ ಬಳಿ ಬಂದಾಗಲೇ ಎಂಡೊಮೆಟ್ರೋಸಿಸ್‌ ಇರುವುದು ತಿಳಿಯುತ್ತದೆ. ಲಭ್ಯ ಅಂಕಿ ಅಂಶಗಳ ಪ್ರಕಾರ, ಶೇ.25 ರಿಂದ ಶೇ.50ರಷ್ಟು ನಿಸ್ಸಂತಾನ ಮಹಿಳೆಯರು ಎಂಡೊಮೆಟ್ರೋಸಿಸ್‌ಗೆ ತುತ್ತಾಗಿರುತ್ತಾರೆ. ಅದೇ ರೀತಿ ಶೇ.30 ರಿಂದ 50ರಷ್ಟು ಮಹಿಳೆಯರು ಎಂಡೊಮೆಟ್ರೋಸಿಸ್‌ ಕಾರಣದಿಂದ ಬಂಜೆತನದ ಸಮಸ್ಯೆಗೆ ತುತ್ತಾಗುತ್ತಾರೆ. ಸಾಮಾನ್ಯವಾಗಿ ಸಂತಾನಹೀನ ದಂಪತಿಗಳಲ್ಲಿ ಶೇ.10ರಷ್ಟಕ್ಕೆ ಎಂಡೊಮೆಟ್ರೋಸಿಸ್‌ ಕಾರಣವಾಗಿರುತ್ತದೆ.
ಬಂಜೆತನದ ಪರೀಕ್ಷೆ ಮಾಡಲು ನಡೆಸಲಾಗುವ ಲ್ಯಾಪ್ರೋಸ್ಕೋಪಿಕ್‌ ಪರೀಕ್ಷೆಯ ಸಂದರ್ಭದಲ್ಲಿ ಎಂಡೊಮೆಟ್ರಿಯಲ್ ಇಂಪ್ಲಾಂಟ್‌ಪತ್ತೆಯಾಗುತ್ತದೆ. ಯಾವುದೇ ನೋವು ಇರದ ಮಹಿಳೆಯರಲ್ಲೂ ಇದರ ಅಸ್ತಿತ್ವ ಅರಿವಿಗೆ ಬರಬಹುದು. ಎಂಡೊಮೆಟ್ರೋಸಿಸ್‌ನಿಂದಾಗಿ ಸಂತಾನೋತ್ಪತ್ತಿ ಸಾಮರ್ಥ್ಯದ ಮೇಲೆ ಏಕೆ ದುಷ್ಪ್ರಭಾವ ಉಂಟಾಗುತ್ತದೆ ಎನ್ನುವುದರ ಬಗ್ಗೆ ಇದುವರೆಗೂ ನಿಖರವಾಗಿ ಕಾರಣ ತಿಳಿದುಬಂದಿಲ್ಲ. ಆದರೆ ಬಹುಶಃ ದೇಹರಚನೆ ಮತ್ತು ಹಾರ್ಮೋನುಗಳ ಪ್ರಭಾವದಿಂದ ಈ ಸಮಸ್ಯೆಯುಂಟಾಗುತ್ತದೆ. ಬಹುಶಃ ಹಾರ್ಮೋನು ಮತ್ತು ಬೇರೆ ಬೇರೆ ಪದಾರ್ಥಗಳ ಕಾರಣಗಳಿಂದಾಗಿ ಅಂಡಾಣು ಬಿಡುಗಡೆ, ಅಂಡಾಣು ಮತ್ತು ವೀರ್ಯಾಣು ಮಿಲನ ಮತ್ತು ಗರ್ಭಕೋಶದಲ್ಲಿ ಭ್ರೂಣ ಪ್ರತಿಷ್ಠಾಪನೆಯ ಮೇಲೆ ನಕಾರಾತ್ಮಕ ಪ್ರಭಾವ ಬೀರುತ್ತದೆ. ಎಂಡೊಮೆಟ್ರೋಸಿಸ್‌ ಮತ್ತು ಕ್ಯಾನ್ಸರ್‌
ಕೆಲವು ಅಧ್ಯಯನಗಳ ಪ್ರಕಾರ, ಯಾವ ಮಹಿಳೆಯರಲ್ಲಿ ಎಂಡೊಮೆಟ್ರೋಸಿಸ್‌ ಇರುತ್ತದೋ ಅಂಥವರಿಗೆ ಅಂಡಕೋಶದ ಕ್ಯಾನ್ಸರ್‌ ಆಗುವ ಸಾಧ್ಯತೆ ಹೆಚ್ಚುತ್ತದೆ. ಬಂಜೆತನದ ಸಮಸ್ಯೆ ಎದುರಿಸುವವರಲ್ಲಿ ಇದರ ಉಪಟಳ ಜಾಸ್ತಿ.ಈವರೆಗೂ ಎಂಡೊಮೆಟ್ರೋಸಿಸ್‌ ಮತ್ತು ಓವೇರಿಯನ್‌ ಎಪಿಥೇಲಿಯಂ ಕ್ಯಾನ್ಸರ್‌ನ ಸಂಬಂಧದ ಬಗ್ಗೆ ಸ್ಪಷ್ಟ ಕಾರಣ ಪತ್ತೆಯಾಗಿಲ್ಲ. ಕೆಲವು ಅಧ್ಯಯನಗಳಿಂದ ಎಂಡೊಮೆಟ್ರೋಸಿಸ್‌ ಇಂಪ್ಲಾಂಟ್‌ ಈ ಕ್ಯಾನ್ಸರ್‌ನಲ್ಲಿ ಬದಲಾಗುತ್ತದೆ ಎಂದು ತಿಳಿದು ಬಂದಿದೆ. ಎಂಡೊಮೆಟ್ರೋಸಿಸ್‌ ಆನುವಂಶಿಕ ಹಾಗೂ ಪರಿಸರದ ಕಾರಣಗಳಿಗೆ ಸಂಬಂಧಪಟ್ಟಿದೆ ಎಂಬುದು ಕೂಡ ತಿಳಿದುಬರುತ್ತದೆ. ಇವು ಮಹಿಳೆಯರಲ್ಲಿ ಅಂಡಕೋಶದ ಕ್ಯಾನ್ಸರ್‌ನ ಸಾಧ್ಯತೆಯನ್ನು ಹೆಚ್ಚಿಸುತ್ತವೆ.
ಡಯಾಗ್ನೋಸಿಸ್‌ ಎಂಡೊಮೆಟ್ರೋಸಿಸ್‌ನ್ನು ಕಂಡುಹಿಡಿಯಲು ಈ ಕೆಳಕಂಡ ಟೆಸ್ಟ್ ಮಾಡಲಾಗುತ್ತದೆ.
ಪೆಲ್ವಿಕ್‌ ಪರೀಕ್ಷೆ : ವೈದ್ಯರು ಪೆಲ್ವಿಕ್‌ ಭಾಗದ ಪರೀಕ್ಷೆಯನ್ನು ಕೆಲವು ಉಪಕರಣಗಳ ಮುಖಾಂತರ ಕೈಗೊಂಡು ಇಲ್ಲಿ ಯಾವುದೇ ಅಸಾಮಾನ್ಯ ಬೆಳವಣಿಗೆ ಇರಬಹುದೇ ಎಂಬುದನ್ನು ಕಂಡುಕೊಳ್ಳುತ್ತಾರೆ.
ಅಲ್ಚ್ರಾಸೌಂಡ್‌ : ಇದರಿಂದ ಎಂಡೊಮೆಟ್ರೋಸಿಸ್‌ ಆಗಿರುವುದು ಪತ್ತೆಯಾಗುವುದಿಲ್ಲ. ಆದರೆ ಅದಕ್ಕೆ ಸಂಬಂಧಪಟ್ಟ ಸಿಸ್ಟ್ ನ್ನು ಗುರುತಿಸಬಹುದಾಗಿದೆ.
ಲ್ಯಾಪ್ರೊಸ್ಕೋಪಿ : ಎಂಡೊಮೆಟ್ರೋಸಿಸ್‌ ಇರುವುದನ್ನು ಖಾತ್ರಿ ಪಡಿಸಿಕೊಳ್ಳಲು ಲ್ಯಾಪ್ರೋಸ್ಕೋಪಿಕ್‌ ಸಹಾಯದಿಂದ ಊತಕಗಳ ಸ್ಯಾಂಪಲ್ ಪಡೆಯಲಾಗುತ್ತದೆ. ಅದನ್ನು `ಬಯಾಪ್ಸಿ’ ಎಂದು ಹೇಳಲಾಗುತ್ತದೆ. ಎಂಡೊಮೆಟ್ರೋಸಿಸ್‌ ಯಾವ ಭಾಗದಲ್ಲಿದೆ ಎನ್ನುವುದು ಈ ಬಯಾಪ್ಸಿಯಿಂದ ಗೊತ್ತಾಗುತ್ತದೆ.
ಚಿಕಿತ್ಸೆ ಋತುಚಕ್ರದ ಅವಧಿಯಲ್ಲಿ ಆಗುವ ರಕ್ತಸ್ರಾವ ಮತ್ತು ಸಮಾಗಮದ ಸಮಯದಲ್ಲಿ ಆಗುವ ನೋವನ್ನು ಗಂಭೀರವಾಗಿ ಪರಿಗಣಿಸಿ ಸ್ಥಿತಿ ಮತ್ತಷ್ಟು ಗಂಭೀರವಾಗುವ ಮೊದಲು ಬಂಜೆತನ ನಿವಾರಣಾ ತಜ್ಞರನ್ನು ಭೇಟಿಯಾಗಿ, ಇದರ ಚಿಕಿತ್ಸೆಗಾಗಿ ಔಷಧಿ ಹಾಗೂ ಸರ್ಜರಿಯ ಸಹಾಯ ಪಡೆಯಬಹುದಾಗಿದೆ. ಹಾರ್ಮೋನ್‌ ಥೆರಪಿಯನ್ನು ಇದರ ಚಿಕಿತ್ಸೆಯಲ್ಲಿ ಬಳಸಲಾಗುತ್ತದೆ. ಏಕೆಂದರೆ ಋತುಚಕ್ರದ ಸಂದರ್ಭದಲ್ಲಿ ಆಗುವ ಹಾರ್ಮೋನ್‌ ಬದಲಾವಣೆಯ ಕಾರಣದಿಂದಲೂ ಈ ಸಮಸ್ಯೆ ಉಂಟಾಗಬಹುದು. ಹಾರ್ಮೋನ್‌ ಥೆರಪಿ
ಎಂಡೊಮೆಟ್ರೋಸಿಸ್‌ ಬೆಳವಣಿಗೆಯ ಪ್ರಕ್ರಿಯೆಯನ್ನು ನಿಧಾನಗೊಳಿಸುತ್ತದೆ ಹಾಗೂ ಊತಕಗಳ ಹೊಸ ಇಂಪ್ಲಾಂಟ್‌ನ್ನು ತಡೆಯುತ್ತದೆ.
ಎಂಡೊಮೆಟ್ರೋಸಿಸ್‌ ಕಾರಣದಿಂದ ಆಗುವ ನೋವಿನ ಸಮಸ್ಯೆಗೆ ವೈದ್ಯರು ಶಸ್ತ್ರಚಿಕಿತ್ಸೆಯೇ ಅತ್ಯುತ್ತಮ ಎಂದು ಭಾವಿಸುತ್ತಾರೆ. ಬಂಜೆತನದ ಚಿಕಿತ್ಸೆಗಾಗಿ ಐವಿಎಫ್‌ ತಂತ್ರಜ್ಞಾನ ಅನುಸರಿಸಲು ಸಲಹೆ ನೀಡಲಾಗುತ್ತದೆ. ಏಕೆಂದರೆ ಹೆಚ್ಚು ತೊಂದರೆ ಆಗುವ ಮೊದಲೇ ಸಂತಾನ ಭಾಗ್ಯ ಆಗಿದ್ದರೆ ಒಳ್ಳೆಯದು.
– ಡಾ. ಇಂದಿರಾ ಮೂರ್ತಿ
