ಪೂಜಾಳ ಪಂಚ್‌
ಮಿಸ್‌ ಇಂಡಿಯಾ ಆದ ನಂತರ ಬಾಲಿವುಡ್‌ಗೆ ಎಂಟ್ರಿ ಪಡೆದ ಪೂಜಾ ಚೋಪ್ರಾಗೆ ಅಪಘಾತವಾದ್ದರಿಂದ, ಅವಳ 2 ಚಿತ್ರಗಳ ಶೂಟಿಂಗ್‌ ಮುಂದೆ ಹೋಯ್ತು. ಈ ಆ್ಯಕ್ಸಿಡೆಂಟ್‌ನಲ್ಲಿ ನನ್ನ ಕಾಲು ಉಳಿದದ್ದೇ ಪುಣ್ಯ ಎನ್ನುತ್ತಾಳೆ. ಸರ್ಜರಿ ನಂತರ ನಾನೀಗ ಹಿಂದಿನಂತೆಯೇ ಓಡಾಡುತ್ತಿದ್ದೇನೆ. ನಾನು ಇಷ್ಟರಲ್ಲೇ ವಿಪುಲ್ ಶಾಹ್‌ರ `ಕಮಾಂಡೋ-2′ ಮತ್ತು `ರೂಪ್‌ ನಗರ್‌ ಕೇ ಚೀತ’ ಚಿತ್ರಗಳಲ್ಲಿ ನಟಿಸಲಿದ್ದೇನೆ,’ ಎನ್ನುತ್ತಾಳೆ. 2008ರಲ್ಲಿ `ಫ್ಯಾಷನ್‌’ ಚಿತ್ರದಿಂದ ಎಂಟ್ರಿ ಪಡೆದ ಪೂಜಾ 4 ವರ್ಷಗಳ ಗ್ಯಾಪ್‌ ನಂತರ ಭಾರಿ ಚಿತ್ರ `ಕಮಾಂಡೋ’ದಲ್ಲಿ ಎಂಥ ಮೋಡಿ ಮಾಡಲಿದ್ದಾಳೋ ಕಾದು ನೋಡೋಣ.
ಲೀರಾಳ ಹಿಂದಿ ಪ್ರೀತಿ
ಆಸ್ಟ್ರೇಲಿಯಾ ಮೂಲದ ಲೀರಾ ಹೇಡೆನ್‌ ಇತ್ತೀಚೆಗೆ ಅಕ್ಷಯ್‌ ಕುಮಾರನೊಂದಿಗೆ 1982ರ ಹಿಟ್‌ `ಶೌಕೀನ್‌’ ಚಿತ್ರದ ರಿಮೇಕ್‌ನಲ್ಲಿದ್ದಾಳೆ. ಲೀರಾಳ ಹಿಂದಿ ಸಹಜವಾಗಿರಲಿಕ್ಕಿಲ್ಲ ಎಂಬುದು ಗೊತ್ತಿರೋ ವಿಷಯ. ಅವಳೀಗ ಕಷ್ಟಪಟ್ಟು ಹಿಂದಿ ಕಲಿತು ಈ ಚಿತ್ರಕ್ಕಾಗಿ ತಾನೇ ಡಬ್‌ ಮಾಡುತ್ತಾಳಂತೆ. ಹಿಂದೆ ರತಿ ಅಗ್ನಿಹೋತ್ರಿ ನಿರ್ಹಿಸಿದ್ದ ಪಾತ್ರವನ್ನು ಈಗ ಈಕೆ ಮಾಡುತ್ತಿದ್ದಾಳೆ. ಅನುಪಮ್ ಖೇರ್‌, ಪರೇಶ್‌ ರಾವ್‌, ಅನ್ನುವ ಕಪೂರ್‌ರಂಥ ಮಹಾರಥಿಗಳ ದಂಡೇ ಇಲ್ಲಿದೆ.
ಶ್ರೇಯಾಳ ಭಾನಗಡಿ
ಉತ್ತರಾಖಂಡದ ಈ ಹುಡುಗಿ 2001ರಲ್ಲಿ ಬಾಲಿವುಡ್‌ಗೆ ಎಂಟ್ರಿ ಪಡೆದಳು. 2003ರ `ತುಝೆ ಮೇರಿ ಕಸಂ’ನಿಂದ ಒಳ್ಳೆಯ ಬ್ರೇಕ್‌ ಪಡೆದಳು. ಇತ್ತೀಚೆಗಂತೂ ಎಲ್ಲೆಲ್ಲೂ ಶ್ರೇಯಾಳ ಡೇಟಿಂಗ್‌ನದೇ ಸುದ್ದಿ. ನಂಬಲರ್ಹ ಮೂಲಗಳ ಪ್ರಕಾರ, ಈಗ ಈಕೆ ಅಕ್ಷಯ್‌ ಖನ್ನಾ ಜೊತೆ ಡೇಟಿಂಗ್ ನಡೆಸಿದ್ದಾಳಂತೆ. ಅಂದಹಾಗೆ ಈ ಜೋಡಿ ಈಗ ಖಾಲಿ ಕುಳಿತಿದ್ದಾರೆ. ಅಕ್ಷಯ್‌ನ `ಗಲೀಗಲೀ ಚೋರ್‌ ಹೈ’ ಫ್ಲಾಪ್‌ ಆದನಂತರ ಸುಮ್ಮನಿದ್ದಾನೆ. ಈಕೆ `ಜಿಲಾ ಗಾಝಿಯಾಬಾದ್‌’ ನಂತರ `ವಾಲ್ಮೀಕಿ ಕೀ ಬಂದೂಕ್‌’ನಲ್ಲಿ ಕಾಣಿಸಿದ್ದಳು. ಈಗಂತೂ ಇಬ್ಬರಿಗೂ ಪುರಸತ್ತೋ ಪುರಸತ್ತು!
ಇವಳಿನ್ನೂ ಎಲ್ಲರ ಪಾಲಿನ ಪುಟ್ಟಿ
ಅನಿಲ್ ಕಪೂರ್‌ ಮಗಳು ಸೋನಂ ಕಪೂರ್‌ಳ ಮಾತನ್ನು ಬಾಲಿವುಡ್‌ನಲ್ಲಿ ಯಾರೂ ಸೀರಿಯಸ್‌ ಆಗಿ ತೆಗೆದುಕೊಳ್ಳದೇ ಅದಿನ್ನೂ ಪಾಪಚ್ಚಿ ಎಂಬಂತೆ ನೋಡುತ್ತಾರಂತೆ. ಬಹುಶಃ ತನ್ನ ಡ್ರೆಸ್‌ ಸೆನ್ಸ್ ಮತ್ತು ಸ್ವಭಾವವೇ ಇದಕ್ಕೆ ಕಾರಣ ಎನ್ನುತಾಳೆ. ಎಂದೂ ಸೀರಿಯಸ್‌ ಮೂಡಿನಲ್ಲಿರದೆ ಮನಸ್ಸಿಗೆ ತೋಚಿದ್ದನ್ನೇ ಮಾತನಾಡಿ ಬಿಡುತ್ತೇನೆ. ಮನಸ್ಸಿನಲ್ಲಿ ಒಂದು ಮಾತಿನಲ್ಲಿ ಒಂದು ಎಂದು ನನಗೆ ನಡೆದುಕೊಳ್ಳಲು ಬರುವುದಿಲ್ಲ. ಚಿತ್ರರಂಗದಲ್ಲಿ ಇದು ಸರ್ವೇ ಸಾಮಾನ್ಯ ಇರಬಹುದು, ಆದರೆ ನನಗದು ಸಾಧ್ಯವಿಲ್ಲ. ನನ್ನ ಪ್ರತಿಭೆಗೆ ತಕ್ಕಂತೆ ಇಂಡಸ್ಟ್ರಿ ನನ್ನನ್ನು ಗುರುತಿಸಿಲ್ಲ ಎಂದೇ ನನ್ನ ಎಲ್ಲಾ ನಿರ್ದೇಶಕರೂ ಹೇಳುತ್ತಾರೆ, ಆದರೆ ಅದಕ್ಕೆ ಏನು ಮಾಡಬೇಕೋ ನನಗಂತೂ ತಿಳಿಯುದಿಲ್ಲ, ಎನ್ನುತ್ತಾಳೆ ಪುಟ್ಟಿ… ಅಲ್ಲಲ್ಲ ಸೋನಂ.
ರಾಣಿ ಆಗಲಿದ್ದಾಳೆ ಸೂಪರ್ ಮಾಮ್
ಕರೀನಾ ಕಪೂರ್‌ ಸದ್ಯಕ್ಕಂತೂ ಮಗು ಹೆತ್ತು ಅದರ ಡೈಪರ್‌ ಬದಲಿಸುವ ಜಂಜಾಟಕ್ಕೆ ಬೀಳುವವಳಲ್ಲವಂತೆ. ಆದರೆ ಆಕೆಗೆ ಬೇರೆಯವರ ಮಕ್ಕಳನ್ನು ಬೇಗ ಕಾಣುವ ಆಸೆ. ಹಾಗಾಗಿಯೇ ರಾಣಿ ಮುಖರ್ಜಿ ಚೋಪ್ರಾಗೆ ಈಕೆ, ರಾಣಿ ಖಂಡಿತಾ ಒಬ್ಬ ಸೂಪರ್ ಮಾವ್‌ ಆಗಲಿದ್ದಾಳೆ ಎನ್ನುತ್ತಾಳೆ. ಇತ್ತೀಚೆಗೆ ಒಂದು ಈವೆಂಟ್‌ನಲ್ಲಿ ಗೆಳತಿಯರ ಬಗ್ಗೆ ಮಾತನಾಡುವಾಗ ಕರೀನಾ ರಾಣಿ ಬಗ್ಗೆ ಹೇಳುತ್ತಾ, ಮೇಲಿನ ಮಾತು ಹೇಳಿದಳು, ಏಕೆಂದರೆ ಇಬ್ಬರೂ ಅಷ್ಟು ಆಪ್ತರು.
ಚಾಹೇ ಕೋಯಿ ಮುಝೆ ಜಂಗ್ಲಿ ಕಹೆ…..
ಸದಾ ಉತ್ಸಾಹದ ಚಿಲುಮೆಯ ಕಾರಂಜಿ ಚಿಮ್ಮಿಸುತ್ತಿದ್ದ ನಟ ಶಮ್ಮೀ ಕಪೂರ್‌ ಹುಟ್ಟಿದ್ದು ಅಕ್ಟೋಬರ್‌, ಮುಂಬೈನಲ್ಲಿ. ತಂದೆ ಪೃಥ್ವಿರಾಜ್‌ ಕಪೂರ್‌ (ಸಾಕ್ಷಾತ್ಕಾರ) ಹಿಂದಿ ಚಿತ್ರೋದ್ಯಮದ ಮಹಾನ್‌ ನಟ. ಮೂವರು ಸಹೋದರರಲ್ಲಿ ನಡುವಿನವರಾದ ಈತ ಸಿನಿ ವಾತಾವರಣದಲ್ಲೇ ಬೆಳೆದವರು. 1953ರಲ್ಲಿ ಇವರ ಮೊದಲ ಚಿತ್ರ `ಜೀವನ್‌ ಜ್ಯೋತಿ’ ತೆರೆ ಕಂಡಿತು, ಕಡೆಯ ದಿನಗಳವರೆಗೂ ಸಿನಿಮಾಗೇ ಅಂಟಿದ್ದರು. ಸದಾ ರೊಮ್ಯಾಂಟಿಕ್‌ ಹೀರೋ ಆಗಿದ್ದ ಶಮ್ಮಿ, ತಮ್ಮ ಸ್ವಂತ ಜೀವನದಲ್ಲೂ ಹಾಗೇ ಇದ್ದರು. ಮಹಾ ತುಂಟ ನಟಿ ಎನಿಸಿದ್ದ ಮುಮ್ತಾಜ್‌ರಲ್ಲಿದ್ದಾಗ, ಈತ ಪ್ರಪೋಸ್ ಮಾಡಿದ್ದರು. ಮುಮ್ತಾಜ್‌ಗೆ ಇಷ್ಟವಿದ್ದರೂ, ಆಕೆ ಫಿಲ್ಮಿ ಕೆರಿಯರ್‌ ಬಿಡಬೇಕೆಂದು ಶಮ್ಮಿ ಆಗ್ರಹಿಸಿದ್ದರು. ಹಾಗಾಗಿ ಅವರ ಮದುವೆ ನಡೆಯಲಿಲ್ಲ. `ಬ್ರಹ್ಮಚಾರಿ’ ಚಿತ್ರದಿಂದ ಶುರುವಾದ ಇವರ ಪ್ರೇಮ, ಮುಮ್ತಾಜ್‌ ಸಿನಿರಂಗ ಬಿಡುವುದಿಲ್ಲ ಎಂದಾಗ ಅಲ್ಲಿಗೆ ನಿಂತುಹೋಯ್ತು. ಮುಂದೆ ಆತ 1955ರಲ್ಲಿ ಗೀತಾಬಾಲಿಯವರನ್ನು ಮದುವೆಯಾದರು.
1957ರಲ್ಲಿ ನಾಸೀರ್‌ ಹುಸೇನ್‌ರ `ತುಂಸಾ ನಹೀ ದೇಖಾ’ ಚಿತ್ರದ ಯಶಸ್ಸು ಇವರನ್ನು ಸ್ಟಾರ್‌ ಆಗಿಸಿತು. 60ರ ದಶಕದಲ್ಲಿ ಇವರ ಚಿತ್ರಗಳು ಸೂಪರ್ ಹಿಟ್‌ ಎನಿಸಿದವು. ಹೊಸ ನಾಯಕಿಯ ಎಂಟ್ರಿ ಆಗಬೇಕಾದಾಗೆಲ್ಲ ಅವರು ಶಮ್ಮಿ ಚಿತ್ರದ ನಾಯಕಿಯರೇ ಆಗಿರುತ್ತಿದ್ದರು. ಇವರಲ್ಲಿ ಸಾಯಿರಾಬಾನು (1961, ಜಂಗ್ಲಿ), ಆಶಾ ಪರೇಖ್‌ (1963, ದಿಲ್ ದೇಕೆ ದೇಖೋ), ಸಾಧನಾ (1964, ರಾಜ್‌ ಕುಮಾರ್‌), ಶರ್ಮಿಳಾ ಟ್ಯಾಗೋರ್‌ (1965, ಕಾಶ್ಮೀರ್‌ ಕೀ ಕಲೀ) ಪ್ರಮುಖರು.
ಇಂದು ಇಡೀ ವಿಶ್ವ ಇಂಟರ್‌ನೆಟ್‌ನ ಆರಾಧನೆಯಲ್ಲಿದೆ. ಇದು ಭಾರತಕ್ಕೆ ಕಾಲಿಟ್ಟ ಮೊದಲ ದಿನಗಳಲ್ಲೇ ಶಮ್ಮಿ ಅದರ ಪ್ರಬಲ ಫಾಲೋಯರ್‌ ಎನಿಸಿದ್ದರು. ತಮ್ಮ ಯಾಹೂ ಅಭಿನಯದಿಂದ ಪ್ರೇಕ್ಷಕರಿಗೆ ಮೋಡಿ ಮಾಡಿದ್ದ ಶಮ್ಮಿ ಪ್ರೌಢ ಪಾತ್ರಗಳಲ್ಲೂ ಮಿಂಚಿ ಆಗಸ್ಟ್ 2011ರಲ್ಲಿ ಜೀವನಕ್ಕೆ ವಿದಾಯ ಹೇಳಿದರು.
ಫರ್ಝಿಯಲ್ಲಿ ಕೃತಿ
`ಹಿರೋಪಂತಿ’ ಖ್ಯಾತಿಯ ನಾಯಕಿ ಕೃತಿ ಸೇನ್‌ ಈಗ ಶಾಹಿದ್‌ ಕಪೂರ್‌ ಜೊತೆ `ಫರ್ಝಿ’ಯಲ್ಲಿ ನಟಿಸುತ್ತಿದ್ದಾಳೆ. ರಾಜ್‌ನೀ ದಿಮೋರ್‌ ಮತ್ತು ಕೃಷ್ಣ ಡೀಕೆ ಇದೀಗ `ಹ್ಯಾಪಿ ಎಂಡಿಂಗ್‌’ ನಿರ್ಮಾಣದಲ್ಲಿ ಬಿಝಿ. ಅದಾದ ನಂತರ `ಫರ್ಝಿ’ ಶುರುವಾಗುತ್ತದೆ. ಶಾಹಿದ್‌ಗೆ ಇದರಲ್ಲಿ ನೆಗೆಟಿವೆ ಶೇಡ್ಸ್, ಟೆಕ್ನಿಕ್‌ ಕ್ರೂಕ್‌ ಅಂತೆ. ಕೃತಿ ಅವನ ಸಹಾಯಕಿ. ಈ ಚಿತ್ರದಲ್ಲಿ ತನಗೆ ಪಾತ್ರ ಸಿಕ್ಕಿದ್ದಕ್ಕೆ ಕೃತಿ ಬಹಳ ಖುಷಿಯಾಗಿದ್ದಾಳೆ.
ಆದಿತ್ಯನ ಲಖ್ನವೀ ಲವ್
ನಟ ಆದಿತ್ಯ ರಾಯ್‌ ಕಪೂರ್‌ `ದಾತೆ ಇಶ್ಕ್’ ಚಿತ್ರದಲ್ಲಿ ನಟಿಸಿದ ನಂತರ ಲಖ್ನೌ ಕುರಿತು ಅತ್ಯಧಿಕ ಅಭಿಮಾನಿಯಾಗಿದ್ದಾನೆ. ಇದಂತೂ ಮೊದಲ ವಾರದಲ್ಲೇ 14 ಕೋಟಿಗೂ ಅಧಿಕ ದುಡಿದ ಚಿತ್ರವೆನಿಸಿತು. ಇದರ ಶೂಟಿಂಗ್‌ ಲಖ್ನೌನ ಸಣ್ಣ ಊರುಗಳಲ್ಲೇ ಅಧಿಕವಾಗಿ ನಡೆದಿತ್ತು. ನವಾಬರ ಈ ನಗರ ಆದಿತ್ಯನಿಗೀಗ ಅಚ್ಚುಮೆಚ್ಚು. ಇದು ಐತಿಹಾಸಿಕ ಪ್ರಸಿದ್ಧ ಕ್ಷೇತ್ರವಾಗಿರುವುದರ ಜೊತೆ ಅಲ್ಲಿನ ಸ್ವಾದಿಷ್ಟ ವ್ಯಂಜನಗಳಿಗೂ ಅತಿ ಜನಪ್ರಿಯ, ಮುಖ್ಯವಾಗಿ ಲಖ್ನವೀ ನವಾಬೀ ಬಿರಿಯಾನಿ. ವಿಡಂಬನೆ ಎಂದರೆ ಆದಿತ್ಯ ಚಿತ್ರದಲ್ಲಿ ಅಪ್ಪಟ ಬಾಣಸಿಗ. ನಿಜ ಜೀವನದಲ್ಲಿ ಅಡುಗೆಮನೆಗೆ ಕಾಲಿಟ್ಟವನೇ ಅಲ್ಲ! ಈ ಚಿತ್ರಕ್ಕಾಗಿ ರುಮಾಲಿ ರೋಟಿ ತಯಾರಿಸಲು ಬಹಳ ಕಷ್ಟಪಟ್ಟು ಕಲಿತನಂತೆ. ನಾಯಕಿ ಪರಿಣಿತಿ ಅಂತೂ ಅಲ್ಲಿನ ಅಪ್ಪಟ ಉರ್ದು ಉಚ್ಚಾರಣೆಗಾಗಿ ಬಹಳ ಶ್ರಮಪಟ್ಟಳಂತೆ, ಆಕೆಯದು ಹೈದರಾಬಾದಿ ಹುಡುಗಿ ಪಾತ್ರ.
ಕಿಸ್ಸರ್‌ ಬಾಯ್‌ನ ನಾಯಕಿ ಆಮ್ಯಾ
ಬಬ್ಲಿ ಗರ್ಲ್ ಆಮ್ಯಾ ದಸ್ತೂರ್‌ ಇದೀಗ ಕಿಸ್ಸರ್‌ ಕಿಂಗ್‌ ಇಮ್ರಾನ್‌ ಹಶ್ಮಿ ಜೊತೆ ರೊಮಾನ್ಸ್ ನಡೆಸಲಿದ್ದಾಳೆ. ವಿಕ್ರಂ ಭಟ್‌ರ `ಮಿ. ಎಕ್ಸ್’ ಚಿತ್ರದಲ್ಲಿ ಆಮ್ಯಾ ಇಮ್ರಾನ್‌ ಒಟ್ಟಾಗಿ ನಟಿಸುತ್ತಿದ್ದಾರೆ. ಇದು ಹಾಲಿವುಡ್‌ನ `ಹಾಲೋ ಮ್ಯಾನ್‌’ ಚಿತ್ರದ ರೀಮೇಕಂತೆ. ಇಲ್ಲಿ ಇಮ್ರಾನ್‌ಗೆ ಎಂದಿಗಿಂತ ತುಸು ಡಿಫರೆಂಟ್‌ ಪಾತ್ರ. ಇವರಿಬ್ಬರ ಲವ್ ಸ್ಟೋರಿಯೂ ಸಾಮಾನ್ಯವಲ್ಲವಂತೆ. ಥ್ರಿಲ್ಲರ್‌, ಸಸ್ಪೆನ್ಸ್ ಜೊತೆ ರೊಮಾನ್ಸ್ ಇರುತ್ತದೆ. ಆಮ್ಯಾ ಸದ್ಯಕ್ಕೆ ತಮಿಳಿನಲ್ಲಿ ಧನುಷ್‌ ಜೊತೆ `ಅನೇಗನ್‌’ ಚಿತ್ರದಲ್ಲಿ ಬಿಝಿಯೋ ಬಿಝಿ.
ಅಪ್ಪನ ಚಿತ್ರಕ್ಕೇ ಡೋಂಟ್‌ ಕೇರ್‌!
ಕಮಲಹಾಸನ್‌ ತಮ್ಮ ಮುಂದಿನ `ವಿಶ್ವರೂಪಂ-2′ ಚಿತ್ರಕ್ಕಾಗಿ ಮಗಳು ಶೃತಿಯನ್ನು ಒಂದು ಐಟಂ ನಂಬರ್‌ ಮಾಡುವಂತೆ ಕೇಳಿದಾಗ, ಅಪ್ಪ ಆದರೇನು? ಡೋಂಟ್‌ ಕೇರ್‌ ಎಂಬಂತೆ ಶೃತಿ ಸಾರಾಸಗಟಾಗಿ ಅದನ್ನು ತಿರಸ್ಕರಿಸಿದ್ದಾಳೆ. ಏಕೆಂದರೆ ಆಕೆ ಈಗ ತೇರ್‌, ಯಾತ್ರಾ, ವೆಲ್ ಕಂ ಬ್ಯಾಕ್‌, ರಾಕಿ ಹ್ಯಾಂಡ್‌ ಸಂ, ಗಬ್ಬರ್‌ ಮುತಾದ ಸಾಲು ಸಾಲು ಚಿತ್ರಗಳಲ್ಲಿ ಸತತ ನಾಯಕಿಯೇ ಆಗಿದ್ದಾಳೆ. ಹಾಗಿರುವಾಗ ಐಟಂ ಗರ್ಲ್ ಹಣೆಪಟ್ಟಿ ಅಂಟಿಸಿಕೊಳ್ಳಲು ಶೃತಿ ಬಿಲ್‌ಕುಲ್ ಒಪ್ಪಲಿಲ್ಲವಂತೆ. ಬೇರೆ ನಾಯಕಿಯರಾಗಿದ್ದರೆ ಕುಣಿಯುತ್ತಾ ಒಪ್ಪುತ್ತಿದ್ದರೇನೋ? ಶೃತಿ ತಾನು ಆಯ್ಕೆಯಲ್ಲಿ ತಂದೆಗೆ ತಕ್ಕ ಮಗಳು ಎಂದು ನಿರೂಪಿಸಿದ್ದಾಳೆ.
ಬಾಲಿವುಡ್‌ ಸ್ಟಾರ್‌ ದೀಪಾವಳಿ
ಬಾಲಿವುಡ್‌ ಸ್ಟಾರ್‌ಗಳು ದೀಪಾವಳಿ ಹೇಗೆ ಆಚರಿಸಬಹುದು ಅಂದುಕೊಳ್ಳುತ್ತೀರಾ? ಸಾಮಾನ್ಯರಂತೆಯೇ ಅವರೂ ಈ ಹಬ್ಬವನ್ನು ಬಹು ವಿಜೃಂಭಣೆಯಿಂದ ಆಚರಿಸುತ್ತಾರೆ. ಎಲ್ಲರೂ ಭೇದಭಾವ ಮರೆತು ಪರಸ್ಪರ ಶುಭ ಕೋರಿ, ಸಿಹಿ ಹಂಚಿ, ಪಟಾಕಿ ಸಿಡಿಸುತ್ತಾರೆ. ಅದೇ ತರಹ ಸಿನಿ ತಾರೆಯರು ಸಹ ತಮ್ಮ ಭಾವನೆಗಳನ್ನು ಹಂಚಿಕೊಳ್ಳಲು ಇಷ್ಟಪಡುತ್ತಾರೆ. ಬನ್ನಿ, ಅವರ ಮಾತುಗಳಲ್ಲೇ ದೀಪಾವಳಿ ಸಂಭ್ರಮಾಚರಣೆಯ ಬಗ್ಗೆ ತಿಳಿದುಕೊಳ್ಳೋಣ.
ಪ್ರಿಯಾಂಕಾ ಚೋಪ್ರಾ : ಪ್ರಿಯಾಂಕಾ ಈ ಬಾರಿ ದೀಪಾವಳಿಯನ್ನು ವಿಶೇಷವಾಗಿ ಆಚರಿಸುತ್ತಿದ್ದಾಳೆ. ಆಕೆಯ `ಮೇರಿ ಕೋಂ’ ಚಿತ್ರ ಹೆಚ್ಚು ಮನ್ನಣೆ ಗಳಿಸುತ್ತಿದೆ. ನನಗೆ ಗ್ರ್ಯಾಂಡ್‌ ದೀಪಾವಳಿ ಇಷ್ಟ. ಅಂದ್ರೆ ಬಹಳಷ್ಟು ಪಟಾಕಿ, ಬೇಕಾದಷ್ಟು ಸ್ವೀಟ್ಸ್, ಕಲರ್‌ ಫುಲ್ ಡ್ರೆಸೆಸ್‌, ಜ್ಯೂವೆಲರಿ, ಕಾಸ್ಟ್ಯೂಂ ಎಲ್ಲಾ ಇದ್ದಾಗಲೇ ಮಜಾ ಎನಿಸುವುದು. ನಿಮ್ಮ ನೆಚ್ಚಿನ ಪ್ರೀತಿಪಾತ್ರರ ಜೊತೆ ಬೆರೆತು ಆಚರಿಸಿದಾಗ ಮಾತ್ರ ಅದು ದೀಪಾವಳಿ!
ಬಿಪಾಶಾ ಬಸು : ಹರ್ಮನ್‌ ಬೀಜಾ ಜೊತೆ ಗುಟ್ಟಾಗಿ ಎಂಗೇಜ್‌ ಮೆಂಟ್‌ ಮುಗಿಸಿಕೊಂಡ ಈ ಬಂಗಾಳಿ ಬೆಡಗಿ, ದೀಪಾವಳಿ ದಿನ ರಂಗೋಲಿ, ಗೃಹಾಲಂಕಾರಗಳಿಗೆ ಹೆಚ್ಚಿನ ಮಹತ್ವ ಕೊಡುತ್ತಾಳೆ. ಪಟಾಕಿ ಎಂದರೆ ನನಗೆ ಅಲರ್ಜಿ, ಅಬ್ಬರದ ಸದ್ದು ನನಗಾಗದು. ಬೆಂಗಾಲಿ ಸ್ವೀಟ್ಸ್ ನನ್ನ ಪ್ರಾಣ!
ಸೋನಂ ಕಪೂರ್‌: ಈಕೆಯ `ಖೂಬ್‌ ಸೂರತ್‌’ ಚಿತ್ರ ಎಲ್ಲಾ ವಯೋಮಾನದ ಪ್ರೇಕ್ಷಕರನ್ನೂ ಆಕರ್ಷಿಸುತ್ತಿದೆ. ದೀಪಾವಳಿ ದಿನಗಳಲ್ಲಿ ಈಕೆ ಬಿಂದಾಸ್‌ ಆಗಿರಬಯಸುತ್ತಾಳೆ. ಬಣ್ಣ ಬಣ್ಣದ ರಂಗೋಲಿ, ರಂಗುರಂಗಿನ ಹಣತೆ ಹಚ್ಚುವುದು ಆಕೆಗೆ ಇಷ್ಟ. ಒಡಹುಟ್ಟಿದವರೆಲ್ಲ ಒಟ್ಟಾಗಿ ಕಲೆತು ಹಬ್ಬ ಆಚರಿಸುತ್ತಾರೆ. ಪಟಾಕಿ ಸೌಂಡ್‌ ಆಗದ್ದಿದರೂ ಹೂಕುಂಡ ಇತ್ಯಾದಿ ಇಷ್ಟವಂತೆ.
ದೀಪಿಕಾ ಪಡುಕೋಣೆ : ದೀಪಿಕಾಳಿಗೆ ಮೋಜು ಮಸ್ತಿ ಎಂದರೆ ತುಂಬಾನೇ ಇಷ್ಟ. ತಾಯಿ ತಂದೆಯರ ಜೊತೆ ಈ ಹಬ್ಬದ ಸಡಗರ ಹೆಚ್ಚುತ್ತದೆ ಎನ್ನುತ್ತಾಳೆ. ತವರೂರಾದ ಬೆಂಗಳೂರಿಗೆ ಬಂದು, ಸ್ನೇಹಿತೆಯರ ಜೊತೆಗೂಡಿ ಬೊಂಬಾಟ್‌ ಮಾಡುತ್ತಾಳಂತೆ.
ಸನಿಯ ಡಬಲ್ ಡೋರ್
ಬಾಲಿವುಡ್‌ನ ಈ ಬಿಂದಾಸ್‌ ಬಾಲೆ, ಸದ್ಯದಲ್ಲೇ ತನ್ನ ಅಭಿಮಾನಿಗಳಿಗಾಗಿ ಡಬಲ್ ಡೋರ್ ಮಜಾ ನೀಡಲಿದ್ದಾಳೆ. ಸನಿ ಲಿಯೋನ್‌ ಇತ್ತೀಚೆಗಷ್ಟೇ `ಮಸ್ತಿ ಜಾದೆ’ ಎಂಬ ಸೆಕ್ಸ್ ಕಾಮಿಡಿ ಚಿತ್ರದಲ್ಲಿ ದ್ವಿಪಾತ್ರ ವಹಿಸಿದ್ದಾಳೆ. ಅಕ್ಕ ತಂಗಿಯರ ಎರಡೂ ಪಾತ್ರಗಳಲ್ಲಿ ಈಕೆ ಡಿಫರೆಂಟಾಗಿ ಮಿಂಚಿದ್ದಾಳೆ. ಅಕ್ಕಾ ಹೋಮ್ಲಿ ಗರ್ಲ್ ಆದರೆ ತಂಗಿ ಬೋಲ್ಡ್ ಸೆಕ್ಸಿ! ಈ ಚಿತ್ರದ ಕುರಿತು ಬಹಳ ಎಗ್ಸೈಟ್‌ ಆಗಿರುವ ಸನಿ, ತನ್ನ ಅಭಿಮಾನಿಗಳಿಗೆ ಖಂಡಿತಾ ನಿರಾಸೆಯಾಗದು ಎನ್ನುತ್ತಾಳೆ. ಹ್ಯಾಂಡ್‌ ಸಮ್ ಹಾಟ್‌ ನಾಯಕ ವೀರ್‌ ದಾಸ್‌ ಇವಳ ಹೀರೋ.
ಸೋಲೇ ಗೆಲುವಿನ ಸೋಪಾನ
ಬಾದ್‌ಶಾಹ್‌ ಖಾನ್‌ ಮತ್ತು ಫರಾಹ್‌ ಖಾನ್‌ ಈ ಬಾರಿ ದೀಪಾವಳಿಯಂದು ಎಲ್ಲರಿಗೂ `ಹ್ಯಾಪಿ ನ್ಯೂ ಇಯರ್‌’ ಹೇಳಿದರು! ಇತ್ತೀಚೆಗಷ್ಟೇ ಬಿಡುಗಡೆಯಾದ ಈ ಚಿತ್ರ ಬಾಕ್ಸ್ ಆಫೀಸ್‌ ಚಿಂದಿ ಉಡಾಯಿಸಲಿದೆ. ಹಿಂದಿನ `ಚೆನ್ನೈ ಎಕ್ಸ್ ಪ್ರೆಸ್‌’ ಚಿತ್ರದ ಹಾಗೆಯೇ ದೀಪಿಕಾ ಈ ಬಾರಿಯೂ ಶಾರೂಖ್‌ ಜೊತೆ ರೊಮಾನ್ಸ್ ನಡೆಸಿದ್ದಾಳೆ, ಆದರೆ ಹೆಚ್ಚಿಲ್ಲ. ಈಕೆ ಜೊತೆ ಬೋಮನ್‌ಇರಾನಿ, ಜಾಕಿ ಶ್ರಾಫ್‌, ಅಭಿಷೇಕ್‌ ಬಚ್ಚನ್‌ ಅಲ್ಲದೆ ನಾಸಿರುದ್ದೀನ್‌ ಶಾಹ್‌ರ ಮಗ ವಿಲಾನ್‌ ಶಾಹ್‌ ಕೂಡ ಇದ್ದಾನೆ. ಚಿತ್ರದ ಬಗ್ಗೆ ಹೇಳುತ್ತಾ ಶಾರೂಖ್‌, ಈ ಬಾರಿ ನಾವು ಲೂಸರ್ಸ್‌ ಕುರಿತು ಕಥೆ ಹೇಳಿದ್ದೇವೆ. ಲೂಸರ್ಸ್‌ ವೈಭವದ ಕುರಿತು ಬೆಳ್ಳಿ ತೆರೆ ಮೇಲೆ ಮೊದಲ ಬಾರಿ ಹೇಳಲಾಗುತ್ತಿದೆ. ಸ್ಪರ್ಧೆಯಲ್ಲಿ ಸೋತು ಸುಸ್ತಾಗಿ ನಿರಾಶೆಗೊಂಡಿದ್ದರೂ ಸ್ಪೋರ್ಟಿವ್ ಸ್ಪಿರಿಟ್‌ಬಿಟ್ಟುಕೊಡಬಾರದೆಂಬುದೇ ಇಲ್ಲಿನ ಥೀಂ. ನಾನು ಸ್ವಯಂ ಒಬ್ಬ ದೊಡ್ಡ ಗುಡ್‌ ಲೂಸರ್‌, ಗುಡ್‌ ಏಕೆ ಹೇಳಿದೆ ಅಂದ್ರೆ ಸೋಲೇ ಗೆಲುವಿನ ಮೆಟ್ಟಿಲು ಎಂದು ನಾನು ನಂಬುತ್ತೇನೆ.
ಬಾಲಿವುಡ್‌ ಭಾರತಿಯ ಕ್ಲಾಸ್‌
ಹಿಂದಿಯ ಕಾಮಿಡಿ ಸರ್ಕಸ್‌ ಹಾಗೂ ಝಲಕ್‌ ದಿಖ್‌ ಲಾಜಾ ಶೋಗಳಿಂದ, ಮನೆ ಮಾತಾಗಿರುವ ಭಾರತಿ ಸಿಂಗ್‌ ಈಗ ಕನ್ನಡದ `ರಂಗನ್‌ ಸ್ಟೈಲ್‌’ ಚಿತ್ರದಲ್ಲಿ ನಟಿಸುತ್ತಿರುವುದು ವಿಶೇಷ ಸುದ್ದಿ. ಈಗ ಈಕೆ ಕಿರುತೆರೆಯಲ್ಲಿ ಎಲ್ಲರ ಕ್ಲಾಸ್‌ ತೆಗೆದುಕೊಳ್ಳಲಿದ್ದಾಳೆ. ಈಕೆ `ಕಾಮಿಡಿ ಕ್ಲಾಸ್‌’ ಎಂಬ ಹೊಸ ಶೋನಲ್ಲಿ ಮತ್ತೆ ನಗಿಸಲು ಬರ್ತಿದ್ದಾಳೆ. ಈ ಶೋದ ಪ್ರೋಮೋಸ್‌ ಸಹ ರಿಲೀಸ್‌ ಆಗಿದೆ, ಈಗಾಗಲೇ ಕಾರ್ಯಕ್ರಮ ಶುರುವಾಗಿದೆ. ಕ್ಲಾಸ್‌ ಟೀಚರ್‌ ಆಗಿರುವ ಭಾರತಿ, `ನಾನು ನಿಮ್ಮೆಲ್ಲರ ಹೊಸ ಮೇಡಂ. ನಾನು ಭರತನಾಟ್ಯದ ಬದಲು ಭಾರತಿನಾಟ್ಯಂ ಕಲಿಸುತ್ತೇನೆ!’ ಎನ್ನುತ್ತಾಳೆ. ಕಾಮಿಡಿ ಆಧಾರಿತ ಈ ಡ್ಯಾನ್ಸ್ ಶೋ ಕುರಿತಾಗಿ ಕಲರ್ಸ್ ಚ್ಯಾನೆಲ್ ಜೊತೆ ನಿರ್ಮಾಪಕರು ಟೈಮಿಂಗ್‌ ಕುರಿತು ಸ್ಟ್ರಿಕ್ಟ್ ಆಗಿ ಮಾತನಾಡಿದಾಗ, ಅದು ಹೊಂದಾಣಿಕೆ ಆಗಲಿಲ್ಲ. ಹೀಗಾಗಿ ಅದೀಗ ಲೈಫ್‌ ಓಕೆ ಚ್ಯಾನೆಲ್ ಪಾಲಾಯಿತು.
ರಿಯಲ್ ಲೈಫ್‌ ಫೈಟಿಂಗ್‌
ಟಿವಿ ನಟಿ ದೃಷ್ಟಿಧಾಮಿ ಹಾಗೂ ನಟ ವಿವಿಯನ್‌ ಡೀಸೇನಾ ಇಬ್ಬರು `ಮದುಭಾಲಾ’ ಧಾರಾವಾಹಿಯಲ್ಲಿ ಪತಿಪತ್ನಿ ಆಗಿದ್ದರೂ ಏಕೋ ಅವರ ನಡುವೆ ಹೊಂದಾಣಿಕೆ ಆಗಲೇ ಇಲ್ಲ. ಇಬ್ಬರ ನಡುವೆ ಮಾತುಕಥೆಯೇ ಇಲ್ಲವಂತೆ! ಇಬ್ಬರೂ ಒಂದು ಪಾರ್ಟಿಯಲ್ಲಿ ಎದುರಾದಾಗ ಜಗಳಕ್ಕೆ ಇಳಿದುಬಿಟ್ಟರು. ಆದದ್ದಿಷ್ಟೆ, `ಮಧುಬಾಲಾ’ ಧಾರಾವಾಹಿಯ ಫೇರ್‌ವೆಲ್ ಪಾರ್ಟಿ ಇತ್ತು. ಇವರಿಬ್ಬರೂ ಬಂದಿದ್ದರು, ಎದುರಾದಾಗ ಪರಸ್ಪರ ದೋಷಾರೋಪಣೆ ಶುರುಮಾಡುತ್ತಾ ಮಾತು ಜಗಳಕ್ಕೆ ತಿರುಗಿತು. ಅಂತೂ ಅಲ್ಲಿದ್ದವರೆಲ್ಲ ಸೇರಿ ಇವರ ಜಗಳ ಬಿಡಿಸಿದವರಂತೆ.
ನಟನೆ ನನ್ನ ಹವ್ಯಾಸ `ಕೇವಲ ಹಣ ಮಾಡುವುದಷ್ಟೇ ನನ್ನ ಗುರಿಯಲ್ಲ. ನಟನೆ ನನ್ನ ಹವ್ಯಾಸ’ ಎನ್ನುತ್ತಾಳೆ `ಬಾಲಿಕಾ ವಧು’ ಖ್ಯಾತಿಯ ಅವಿಕಾ ಗೌಡ್‌. ತನ್ನ 11ನೇ ವಯಸ್ಸಿನಲ್ಲೇ ಟಿವಿಯಲ್ಲಿ ಖ್ಯಾತಳಾದ ಈ ಹುಡುಗಿ, ಎಲ್ಲರಿಗೂ ಈ ಇಂಡಸ್ಟ್ರಿಯಲ್ಲಿ ಬೆಳೆಯುವ ಹಂಬಲ. ನಾನು ನಟನೆಯನ್ನು ಹವ್ಯಾಸವಾಗಿ ತೆಗೆದುಕೊಂಡಿದ್ದರಿಂದ, ಬಾಲ್ಯದಿಂದಲೇ ಇಲ್ಲಿದ್ದೇನೆ. ಹಣವೇ ಮುಖ್ಯವಾಗದ್ದಿದ್ದರೆ, ನನಗೆ ಈ ಕೆಲಸದಲ್ಲಿ ತೃಪ್ತಿ ಸಿಗುತ್ತಿರಲಿಲ್ಲ, ಎನ್ನುತ್ತಾಳೆ. ಬಾಲನಟಿಯಾಗಿ ಬಂದವಳು ಇದೀಗ `ಸಸುರಾಲ್‌ಸಿಮರ್‌ ಕಾ’ ಧಾರಾವಾಹಿಯ ನಾಯಕಿಯಾಗಿ, ತೆಲುಗು ಚಿತ್ರ `ಉಯ್ಯಾಲ ಜಂಪಾಲ’ ಮೂಲಕ ದಕ್ಷಿಣಕ್ಕೂ ಲಗ್ಗೆ ಇಟ್ಟಿದ್ದಾಳೆ.
ವೈವಾಹಿಕ ಜೀವನದ ಮಜಾ`ಸಸುರಾಲ್ ಗೇಂದಾ ಪ್‌’ ಸೀರಿಯಲ್‌ನಿಂದ ಎಲ್ಲರ ಮನೆಮಾತಾಗಿದ್ದ ಜನಪ್ರಿಯ ನಾಯಕ ಜಯ್ ಸೋನಿ, ತಾನು ಪ್ರೀತಿಸುತ್ತಿದ್ದ ಪೂಜಾಳನ್ನೇ ಮದುವೆಯಾಗಿ ಇದೀಗ ಸುಖೀ ಗೃಹಸ್ಥ ಎನಿಸಿದ್ದಾನೆ. ಒಂದು ಬ್ರೇಕ್‌ಗಾಗಿ ಕೆಲವು ದಿನ ಧಾರಾವಾಹಿ ತಂಟೆಗೆ ಹೋಗುವುದಿಲ್ಲವಂತೆ. ನನಗೆ ಹೊಸ ಧಾರಾವಾಹಿಗಳ ಆಫರ್ಸ್‌ ಬರುತ್ತಲೇ ಇವೆ, ಆದರೆ ನಾನೇ ಅದನ್ನು ಒಪ್ಪುತ್ತಿಲ್ಲ. ಈ ಬಾರಿ ತುಸು ಸ್ಪೆಷಲ್ ಆಗಿರುವಂಥ ಹೊಸತನ್ನು ಮಾಡುತ್ತೇನೆ. ಇತ್ತೀಚಿನ `ಸಂಸ್ಕಾರ್‌’ ಧಾರಾವಾಹಿಯಲ್ಲಿ ಈತ ಜನಪ್ರಿಯನಾಗಿದ್ದ. ಇದೀಗ ಹೊಸ ಗೇಮ್ ಶೋ `ದಿಲ್ ಹೈ ಛೋಟಾ ಸಾ…..’ಗೆ ಆ್ಯಂಕರ್‌ಆಗಿದ್ದಾನೆ.
ಮುದ್ದಾಡಲು ಮರಳಿ ಯತ್ನ ಮಾಡು
ಎಂಟಿವಿಯ ಜನಪ್ರಿಯ `ಸೂಪರ್ ನ್ಯಾಚುರಲ್ ಫನಾಹ್‌ ಇಂಪಾಸಿಬಲ್’ ಶೋನ ಶೂಟಿಂಗಾಗಿ ನಟ ಕರಣ್‌ ಕುಂದ್ರನಿಗೆ, ನಟಿ ಚೇತನಾ ಪಾಂಡೆ ಜೊತೆ ಹಲವು ಇಂಟಿಮೇಟ್‌ ದೃಶ್ಯಗಳಲ್ಲಿ ಕಾಣಸಿಕೊಳ್ಳಬೇಕಾದಾಗ ಬಹಳ ಮುಜುಗರ ಆಯ್ತಂತೆ. ಒಂದು ಚುಂಬನದ ದೃಶ್ಯದಲ್ಲಿ ಎಷ್ಟು ನರ್ಸ್‌ ಆದನೆಂದರೆ, 15 ರೀಟೇಕ್‌ ಆದನಂತರವೇ ಅದು ಓಕೆ ಆದದ್ದಂತೆ. ಮಜಾ ಅಂದ್ರೆ ಈ ಶೋನಲ್ಲಿ ಕರಣ್‌ಗೆ ದೆವ್ವದ ಪಾತ್ರ!
