ರಾಧಿಕಾಳ ದಿಲ್ ವಾಲಾ…..
`ದಿಲ್ ವಾಲಾ’ ಚಿತ್ರದ ಬಿಡುಗಡೆಗಾಗಿ ಕಾತುರದಿಂದ ಕಾಯುತ್ತಿರುವ ರಾಧಿಕಾ ಪಂಡಿತ್‌ ಕನ್ನಡದ ಟಾಪ್‌ ಹೀರೋಯಿನ್‌. ರಮ್ಯಾ ರಾಜಕೀಯ ಸೇರಿದಾಗಿನಿಂದ ರಾಧಿಕಾಳ ಪಾಲಿಗೆ ಎಲ್ಲ ಚಿತ್ರಗಳು ದಕ್ಕುತ್ತಿವೆ. ಹೊಸಬರ ಜೊತೆಗೆ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿರುವ ರಾಧಿಕಾ ಏನು ಹೇಳ್ತಾಳೆ ಗೊತ್ತಾ? ಹೊಸ ಹೀರೋ ಜೊತೆ ನಟಿಸಿದ `ಅದ್ಧೂರಿ’ ಚಿತ್ರ ಗೆದ್ದಿದೆ. `ದಿಲ್ ವಾಲಾ’ ಕೂಡಾ ಖಂಡಿತಾ ಗೆಲ್ಲುತ್ತೆ ಎನ್ನುವ ವಿಶ್ವಾಸವಿತ್ತು, ಹೊಸಬರ ಜೊತೆ ನಟಿಸುವಾಗ ನನ್ನ ಜವಾಬ್ದಾರಿ ಜಾಸ್ತಿ. ಹೀಗಂತ ನನಗೇನು ಕಷ್ಟ ಅನಿಸೋದಿಲ್ಲ ಒಂಥರಾ ಖುಷಿ ಆಗುತ್ತೆ. ಸಿನಿಮಾ ಹೊಸಬರದಿರಲಿ, ಹಳಬರದಿರಲಿ ನಾನು ಇವರಿಬ್ಬರಿಂದಲೂ ಪ್ರತಿಸಲ ಏನಾದರೂ ಹೊಸದನ್ನು ಕಲಿಯುತ್ತೇನೆ. `ದಿಲ್ ವಾಲಾ’ ಸಿನಿಮಾದ ಯಶಸ್ಸಿಗಾಗಿ ನಾನು ದೇವರಲ್ಲಿ ಬೇಡಿಕೊಂಡಿದ್ದೇನೆ ಎಂದು ರಾಧಿಕಾ ತನ್ನ ಉತ್ಸಾಹವನ್ನು ಹಂಚಿಕೊಳ್ಳುತ್ತಾಳೆ.
ರಾಣಿ ಕನಸು
ಬದುಕಿದರೆ ರಾಣಿ ತರಹ ಬದುಕಬೇಕು ಎಂದು ಬಹಳ ವರ್ಷಗಳಿಂದ ಆಸೆಪಡುತ್ತಿದ್ದ ರಾಧಿಕಾ ಅರಮನೆಯಂಥ ಬಂಗಲೆ, ಶ್ರೀಮಂತ ರಾಜಕುಮಾರ, ಆಳು ಕಾಳು, ಬೇಕಾದ್ದನ್ನೆಲ್ಲ ಪಡೆಯುವ ಯೋಗ ಎನ್ನುವಂಥ ಫೇರಿಟೇಲ್ ಕಥೆಗಳನ್ನು ಹೇಳುತ್ತಲೇ ಇದ್ದಳು. ಇದೆಲ್ಲ ನಿಜವೇ….? ಸಾಧಾರಣ ಹುಡುಗಿಯೊಬ್ಬಳ ಬದುಕಿನಲ್ಲಿ ಇಂಥ ತಿರುವು ಬರಲು ಸಾಧ್ಯವೇ? ರಾಧಿಕಾ ಬದುಕಿನಲ್ಲಿ ಇವೆಲ್ಲ ನಿಜವಾಗಿದೆ. ತಾನು ಆಸೆಪಟ್ಟಿದ್ದನ್ನೆಲ್ಲ ಪಡೆದಿದ್ದಾಳೆ. ಸಿನಿಮಾರಂಗಕ್ಕೆ ಸೇರಿಕೊಂಡಾಗಲೂ ಸಹ ಸಾಕಷ್ಟು ಕನಸು ಕಾಣುತ್ತಿದ್ದಳಂತೆ. ತನಗಿಷ್ಟವಾದ ಉಡುಗೆ ತೊಡುಗೆ, ಪಾತ್ರ ಇವೆಲ್ಲ ಈಗ ನನಸಾಗಿದೆ. `ಸ್ವೀಟಿ’ ಚಿತ್ರದಲ್ಲಿ ತನಗಿಷ್ಟವಾದ ಕಾಸ್ಟ್ಯೂಮ್ಸ್ ಮತ್ತು ತಾನು ಇಷ್ಟಪಡುತ್ತಿದ್ದಂಥ ಪಾತ್ರದಲ್ಲೇ ಕಾಣಿಸಿಕೊಂಡಿದ್ದಾಳೆ. ಈ ಸ್ವೀಟಿ ನಿಜಕ್ಕೂ ಸ್ವೀಟಾಗಿಯೇ ತನ್ನ ಬದುಕಿನಲ್ಲಿ ಸಿಹಿ ತುಂಬುತ್ತಿದ್ದಾಳೆ.
ಉಪ್ಪಿ -2
ಉಪೇಂದ್ರ ಯಾವಾಗಲೂ ಸ್ಪೆಷಲ್. ಅವರು ಮಾಡುವುದೆಲ್ಲ ಸ್ಪೆಷಲ್ಲಾಗೇ ಇರುತ್ತೆ. ಈ ಬಾರಿ ಅವರು `ಉಪ್ಪಿ-2′ ಚಿತ್ರವನ್ನು ಕೈಗೆತ್ತಿಕೊಂಡಿದ್ದಾರೆ. ಉಪೇಂದ್ರ ಭಾಗ-2 ಅಂತನಾದ್ರೂ ತಿಳಿದುಕೊಳ್ಳಬಹುದು. ಈ ಚಿತ್ರ ಅವರ ಹುಟ್ಟುಹಬ್ಬದ ದಿನದಂದೇ ಸೆಟ್ಟೇರಿದ್ದು ವಿಶೇಷ. ಬಹಳ ವರ್ಷಗಳ ನಂತರ ಉಪೇಂದ್ರ ಗುರುಕಿರಣ್‌ ಕಾಂಬಿನೇಶನ್‌ ನಲ್ಲಿ ಬರುತ್ತಿರುವ ಚಿತ್ರವಿದು. ಈ ಚಿತ್ರವನ್ನು ಉಪ್ಪಿ ಪತ್ನಿ ಪ್ರಿಯಾಂಕಾ ಮತ್ತು ಮನೋಹರ್‌ (ನಿರ್ಮಾಪಕರು) ಸೇರಿ ನಿರ್ಮಿಸುತ್ತಿದ್ದಾರೆ. ಪ್ರಿಯಾಂಕಾ ಬಹಳ ಆಸಕ್ತಿ ವಹಿಸಿ `ಉಪ್ಪಿ-2′ ಚಿತ್ರದ ಮುಹೂರ್ತ ಬಹಳ ವಿಭಿನ್ನವಾಗಿ, ಅದ್ಧೂರಿಯಾಗಿ ಮೂಡಿಬರಬೇಕೆಂದು ಖುದ್ದಾಗಿ ಕುಳಿತು ಪ್ಲಾನ್ ಮಾಡಿದ್ದರು. ಕಂಠೀರವ ಸ್ಟುಡಿಯೋದಲ್ಲಿ ಸಾಂಪ್ರದಾಯಿಕವಾಗಿ ಮುಹೂರ್ತಕ್ಕೆ ಚಾಲನೆ ಸಿಕ್ಕರೆ, ಸಂಜೆ ಬಹಳ ಗ್ರಾಂಡಾಗಿ ಅರಮನೆ ಅವರಣದಲ್ಲಿ ಸಂಗೀತಸಂಜೆಯೊಂದಿಗೆ ತಾರಾ ಸಮೂಹದ ನಡುವೆ ಹುಟ್ಟುಹಬ್ಬದ ಆಚರಣೆ. ಉಪ್ಪಿ, ಪ್ರಿಯಾಂಕಾ, ಶಿವಣ್ಣ ಮತ್ತು ರವಿಚಂದ್ರನ್‌ ಎಲ್ಲರೂ ವೇದಿಕೆ ಮೇಲೆ ಕುಳಿತಿದ್ದು ವಿಶೇಷವಾಗಿತ್ತು.
ಅಗ್ರಜನ…. ಹಿರಿಮೆ
ಜಗ್ಗೇಶ್‌ ನಟಿಸುತ್ತಿರುವ `ನೀರ್‌ ದೋಸೆ’ ಪ್ರೇಕ್ಷಕರ ಪ್ಲೇಟಿಗೆ ಬರುವುದಕ್ಕೆ ಮೊದಲು ಅವರ ಇನ್ನಷ್ಟು ಹೊಸ ಚಿತ್ರಗಳು ಶುರುವಾಗುತ್ತಿವೆ, ತೆರೆಗೆ ಬರುತ್ತಿವೆ. `ಕೂಲ್ ಗಣೇಶ’ ತೆರೆಗೆ ಬರಬೇಕಿದೆ. `ಅಗ್ರಜ’ ಸಿನಿಮಾ ಕೂಡ ಸುದ್ದಿಯಲ್ಲಿದೆ. ಈ ಚಿತ್ರದ ಕುರಿತು ಜಗ್ಗೇಶ್‌ ಹೇಳುವುದು ಹೀಗೆ. `ಅಗ್ರಜ’ ಅದ್ಧೂರಿ ಸಿನಿಮಾ. ನನ್ನ ಎಲ್ಲ ಚಿತ್ರಗಳಿಗಿಂತ ಕೊಂಚ ವಿಭಿನ್ನವಾದ ಸಿನಿಮಾ. ನನ್ನ ಪಾತ್ರ ಡಿಫರೆಂಟಾಗಿದೆ ಎನ್ನುತ್ತಾರೆ. ಈ ಚಿತ್ರದ ವಿಶೇಷ ಪಾತ್ರದಲ್ಲಿ ಛಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಅಭಿನಯಿಸಿರುವುದು ಮತ್ತೊಂದು ಪ್ಲಸ್‌ ಪಾಯಿಂಟ್‌. ನಿರ್ಮಾಣ ಹಂತದಲ್ಲಿರುವಾಗಲೇ ಸಿನಿಮಾದ ಟಿ.ವಿ. ಹಕ್ಕು ಮೂರು ಕೋಟಿ ರೂಪಾಯಿಗೆ ಮಾರಾಟವಾಗಿರುವುದು `ಅಗ್ರಜ’ ಚಿತ್ರದ ಹಿರಿಮೆಗೆ ಸಾಕ್ಷಿಯಾಗಿದೆ. ಜಗ್ಗೇಶ್‌ ತಮ್ಮ ಇಮೇಜಿನ ಚಿಂತೆ ಇಲ್ಲದೇ ನಟಿಸಿದ್ದಾರಂತೆ. ಮುಂಬೈ ಬೆಡಗಿ ಕಾಮನಾ ಜೇಠ್ಮಲಾನಿ ಸೇರಿದಂತೆ ಮೂವರು ನಾಯಕಿಯರು ಈ ಚಿತ್ರದಲ್ಲಿದ್ದಾರೆ.
ಭಜರಂಗಿ ಹರ್ಷ
ಶಿವರಾಜ್‌ ಕುಮಾರ್‌ ಅಭಿನಯದ `ಭಜರಂಗಿ’ ಚಿತ್ರತಂಡ ಇತ್ತೀಚೆಗೆ ತ್ರಿವೇಣಿ ಚಿತ್ರಮಂದಿರದಲ್ಲಿ ಟ್ರೇಲರ್‌ ನ್ನು ಅದ್ಧೂರಿಯಾಗಿ ಬಿಡುಗಡೆ ಮಾಡಿತ್ತು. ಚಿತ್ರದ ಟ್ರೇಲರ್‌ ನ್ನು ಸಿನಿಮಾ ಮಂದಿರದಲ್ಲಿ ಬಿಡುಗಡೆ ಮಾಡೋದು ಇತ್ತೀಚಿನ ಟ್ರೆಂಡ್‌ ಆಗಿದೆ. ಆದರೆ `ಭಜರಂಗಿ’ ಚಿತ್ರದ ನಿರ್ದೇಶಕ ಹರ್ಷ ಮಾಡಿರುವ ಟ್ರೇಲರ್‌ ನ್ನು ನೋಡಿ ಬಹಳ ಜನರು ಇದು ತುಂಬಾ ವಿಭಿನ್ನವಾಗಿ ವಿಶೇಷವಾಗಿದೆ, ಥಿಯೇಟರ್‌ ನಲ್ಲಿ ಬಿಡುಗಡೆ ಮಾಡಿ ಚೆನ್ನಾಗಿರುತ್ತೆ ಎಂದು ಸಲಹೆ ಕೊಟ್ಟಿದ್ದರಂತೆ. ಹಾಗಾಗಿ ಹರ್ಷ `ಭಜರಂಗಿ’ ಟ್ರೇಲರ್‌ ನ್ನು ಚಿತ್ರಮಂದಿರದಲ್ಲಿ ಬಿಡುಗಡೆ ಮಾಡಿದ್ದಾರೆ. ನೋಡಿದವರೆಲ್ಲರೂ ಇದು ಸ್ಪೆಷಲ್ ಟ್ರೇಲರ್‌ ಎಂದಿದ್ದು ವಿಶೇಷ. ಈಗ ಇದೇ ಟ್ರೇಲರ್‌ ನ್ನು ಯೂಟ್ಯೂಬ್‌ ನಲ್ಲೂ ಬಿಡುಗಡೆ ಮಾಡಿದ್ದು ಅಲ್ಲಿಯೂ ಸಹ `ಭಜರಂಗಿ’ ಸೂಪರ್‌ ರೆಸ್ಪಾನ್ಸ್ ಪಡೆದುಕೊಂಡಿದೆ. ಶಿವಣ್ಣ ಬಹಳ ವಿಭಿನ್ನವಾದ ಗೆಟಪ್‌ ನಲ್ಲಿ ಕಾಣಿಸಿಕೊಂಡಿರುವ ಈ ಚಿತ್ರ ಸದ್ಯದಲ್ಲೇ ಬಿಡುಗಡೆಯಾಗಲಿದೆ.
ದಿಲ್ ದಾರ್‌ ವಿಜಿ
ನಮ್ಮ ದುನಿಯಾ ವಿಜಯ್‌ ಮಾತನಾಡುವುದಿಲ್ಲ, ಮಾಡಿ ತೋರಿಸುತ್ತಾರೆ ಎಂಬುದಕ್ಕೆ ಇತ್ತೀಚೆಗೆ ಅವರು ಚಿತ್ರವೊಂದರಲ್ಲಿ ನಟಿಸಲು ತೆಗೆದುಕೊಂಡ ಸಂಭಾವನೆ ಸುದ್ದಿಯಾಯ್ತು. ಎಷ್ಟು ಗೊತ್ತಾ? ಕೇವಲ 1 ರೂಪಾಯಿ! `ರಿಂಗ್‌ ರೋಡ್‌ ಶುಭಾ’ ಎಂಬುದು ಎಲ್ಲ ಹುಡುಗಿಯರೇ ಸೇರಿ ಮಾಡುತ್ತಿರುವ ಚಿತ್ರ. ಈ ಚಿತ್ರದಲ್ಲಿನ ಒಂದು ವಿಶೇಷ ಪಾತ್ರಕ್ಕಾಗಿ ವಿಜಯ್‌ ಅವರನ್ನು ಕೇಳಿದರೆ ಹೇಗಿರುತ್ತೆ ಅಂತ ನಿರ್ದೇಶಕಿ ಪ್ರಿಯಾ ಬೆಳ್ಳಿಯಪ್ಪ ವಿಜಿ ಅವರ ಹತ್ತಿರ ಮಾತನಾಡಿದಾಗ, ನಿಮ್ಮ ಸಂಭಾವನೆ ಕೊಡುವಷ್ಟು ಅದ್ಧೂರಿ ಚಿತ್ರ ನಮ್ಮದಲ್ಲ. ಎಲ್ಲ ಹುಡುಗಿಯರೇ ಸೇರಿ ಮಾಡ್ತಾ ಇದ್ದೀವಿ. ಸ್ವಲ್ಪ ಕಡಿಮೆ ಮಾಡಿಕೊಂಡರೆ ಕೊಡಬಹುದು ಎಂದು ಆಕೆ ಕೇಳಿದಾಗ, ವಿಜಯ್‌ ಎಷ್ಟು ಕೊಡ್ತೀರಾ? ಒಂದು ರೂಪಾಯಿ ಕೊಡಿ ಸಾಕು, ಅಂದರಂತೆ. ಎಲ್ಲರಿಗೂ ಆಶ್ಚರ್ಯವಾಯ್ತು! ಹೌದು, ವಿಜಯ್‌ 1 ರೂ. ಸಂಭಾವನೆ ಪಡೆದು ಈ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಹೆಣ್ಣುಮಕ್ಕಳೆಲ್ಲ ಸೇರಿಕೊಂಡು ಒಳ್ಳೆ ಪ್ರಾಜೆಕ್ಟ್ ಮಾಡ್ತಿದ್ದಾರೆ ಅವರನ್ನು ಪ್ರೋತ್ಸಾಹಿಸಬೇಕಲ್ವ…… ಅದಕ್ಕಾಗಿ ನಾನು ಸಂಭಾವನೆ ಪಡೆಯದೇ ನಟಿಸುತ್ತಿದ್ದೇನೆ, ಎಂದು ಹೇಳುತ್ತಾರೆ.
ಕರಿಯಾ ಕಣ್‌ ಬಿಟ್ಟ
ನಿರ್ದೇಶಕಿ ಕವಿತಾ ಲಂಕೇಶ್ `ಕ್ರೇಜಿ ಲೋಕ’ ಸೃಷ್ಟಿಸಿ ಬಹಳ ದಿನಗಳ ನಂತರ ಮತ್ತೆ ಚಿತ್ರ ನಿರ್ದೇಶನಕ್ಕೆ ಕೈಹಾಕಿದ್ದಾರೆ. ಈ ಬಾರಿ ಸ್ಟಾರ್‌ ಗಳಿಲ್ಲದೇ ಚಿತ್ರ ಮಾಡ್ತಿದ್ದಾರೆ. ಸ್ಟಾರ್‌ ಇದ್ದರೂ ಒಳ್ಳೆಯದೇ, ಚಿತ್ರಕ್ಕೆ ಬೋನಸ್‌ ಎನ್ನುವ ಕವಿತಾ ಲಂಕೇಶ್ ನಿರ್ದೇಶಿಸುತ್ತಿರುವ ಹೊಸ ಚಿತ್ರದ ಹೆಸರು `ಕರಿಯಾ ಕಣ್‌ ಬಿಟ್ಟ.’ ಬರಹಗಾರ ಸುಬ್ಬು ಹೊಲೆಯಾರ್‌ ಅವರು ಬರೆದ ಈ ಕಥೆಗೆ ಸಾಹಿತಿ ಬಿ. ಚಂದ್ರೇಗೌಡರ ಸಂಭಾಷಣೆ ಇದೆ, ಆಡಿಟರ್‌ ಶ್ರೀನಿವಾಸ್‌ ನಿರ್ಮಿಸುತ್ತಿದ್ದಾರೆ. `ಕರಿಯಾ ಕಣ್‌ ಬಿಟ್ಟ’ ಮಕ್ಕಳ ಚಿತ್ರವೇ? ಎಂಬ ಪ್ರಶ್ನೆಗೆ ಕವಿತಾ ಹೇಳಿದ್ದು, ತಮ್ಮ ಚಿತ್ರವನ್ನು ಯಾವುದೇ ವರ್ಗಕ್ಕೆ ಸೇರಿಸುವುದಿಲ್ಲ. ಮೊದಲಿನಿಂದಲೂ ಅಷ್ಟೆ, ಒಳ್ಳೆಯ ಸಿನಿಮಾ ಮಾಡಬೇಕು ಎನ್ನುವ ಯೋಚನೆಯಲ್ಲಿ ನಿರ್ದೇಶನ ಮಾಡುತ್ತೇನೆಯೇ ಹೊರತು ಕಲಾತ್ಮಕ, ಕಮರ್ಷಿಯಲ್ ಎಂದು ವಿಭಾಗ ಮಾಡಲ್ಲ. `ಕರಿಯಾ ಕಣ್‌ ಬಿಟ್ಟ’ ಮಕ್ಕಳ ಚಿತ್ರವಾದರೂ ಸರ್ಕಾರ ಕೊಡುವ ಸೌಲಭ್ಯಗಳಿಗಾಗಿ ಕಾಯುವುದಿಲ್ಲ ಎಂದು ಕವಿತಾ ಸ್ಪಷ್ಟಪಡಿಸುತ್ತಾರೆ.
ಡಿಫರೆಂಟಾಗಿ ಪುನೀತ್
ಅಣ್ಣಾ ಬಾಂಡ್‌, ಜಾಕಿ ಮುಂತಾದ ಮಸಾಲ ಚಿತ್ರಗಳ ನಡುವೆ ಪುನೀತ್ ಹೊಸ ಬಗೆ ಸಿನಿಮಾಗಳ ಕಡೆಗೆ ಒಲವು ತೋರುತ್ತಿದ್ದಾರೆ. ಮೈತ್ರಿ, ನಿನ್ನಿಂದಲೇ….ಚಿತ್ರಗಳ ಟೈಟಲ್ ನಷ್ಟೇ ವಿಭಿನ್ನತೆ ಅವರ ಪಾತ್ರದಲ್ಲೂ ಕಾಣಬಹುದಾಗಿದೆ. `ಮೈತ್ರಿ’ ಚಿತ್ರದಲ್ಲಿ ಮೋಹನ್‌ ಲಾಲ್ ಕೂಡಾ ನಟಿಸುತ್ತಿರುವುದು ವಿಶೇಷ. ಪುನೀತ್ ಆ್ಯಕ್ಷನ್‌ ದೃಶ್ಯಗಳಲ್ಲಿ ಕಾಣಿಸುವುದಿಲ್ಲ, ಡ್ಯುಯೆಟ್ ಹಾಡುದಿಲ್ಲವಂತೆ. `ಮೈತ್ರಿ’ ಒಂದು ಪ್ರಾಯೋಗಿಕ ಚಿತ್ರವಂತೆ. `ಮೈತ್ರಿ’ ನಿಜಕ್ಕೂ ಪುನೀತ್ ರ ವೃತ್ತಿ ಜೀವನದಲ್ಲಿ ಒಂದು ಮಹತ್ವದ ಚಿತ್ರ ಕೂಡ ಹೌದು. `ಮೈತ್ರಿ’ ಜೊತೆಯಲ್ಲೇ `ನಿನ್ನಿಂದಲೇ….’ ಕೂಡ ಆರಂಭಗೊಂಡಿದೆ. ಅವರ ಹುಟ್ಟುಹಬ್ಬದ ದಿನದಂದೇ ಚಿತ್ರ ಶುರುವಾಗಿದೆ. ಇತ್ತೀಚೆಗೆ ಈ ಚಿತ್ರದ ಮುಹೂರ್ತಕ್ಕೆ ಅಮ್ಮ ಪಾರ್ವತಮ್ಮ ಮತ್ತು ಅಣ್ಣ ರಾಘವೇದ್ರ ರಾಜ್ ಕುಮಾರ್‌ ಆಗಮಿಸಿ ಚಿತ್ರತಂಡಕ್ಕೆ ಶುಭ ಕೋರಿದ್ದಾರೆ.
