ಬೆಂಗಳೂರಿನಿಂದಾಚೆ ಹೊರವಲಯದಲ್ಲೊಂದು ಪಂಚತಾರಾ ಹೋಟೆಲ್, ತಾರೆಯರ ಗ್ಲಾಮರ್‌ ಗೆಂದೇ ಮಾಡಿರುವಂಥ ಸುಸಜ್ಜಿತ ಹೋಟೆಲ್. ಪತ್ರಕರ್ತರಿಗಾಗಿ ಅಲ್ಲೊಂದು ಗ್ರ್ಯಾಂಡ್‌ ಎಂಟ್ರಿ ಕಾದಿತ್ತು. ಅಂದು `ಸ್ವೀಟಿ' ಚಿತ್ರದ ಆಡಿಯೋ ಬಿಡುಗಡೆ ಸಮಾರಂಭ, ಸ್ಟಾರ್‌ ನೈಟ್‌ ಎಂದೇ ಹೇಳಬಹುದಿತ್ತು. ಪಿಂಕ್‌ ಮತ್ತು ಬಿಳಿ ಬಣ್ಣದ ಹಾರ್ಟ್‌ ಶೇಪಿನ ಬಲೂನ್‌ ಗಳಿಂದ ತುಂಬಿದ್ದ ವೇದಿಕೆ, ಬ್ಯಾಕ್‌ ಡ್ರಾಪಲ್ಲಿ ತೆರೆ ಮೇಲೆ ಮೂಡಿಬರುತ್ತಿದ್ದ `ಸ್ವೀಟಿ' ಚಿತ್ರದ ಫೋಟೋಗಳು, ಕಲರ್‌ ಫುಲ್ ಲೈಟ್‌ ಗಳು. `ಸ್ವೀಟಿ' ಚಿತ್ರದ ನಿರ್ದೇಶಕಿ ವಿಜಯಲಕ್ಷ್ಮಿಸಿಂಗ್‌ ಎಂದಿನಂತೆ ಮಿನುಗುತ್ತ ಮಿಂಚಿನಂತೆ ಓಡಾಡುತ್ತಿದ್ದರು.
ಚಿತ್ರರಂಗದ ಹಿರಿಯರು, ಫಿಲಂ ಚೇಂಬರ್‌ ಅಧ್ಯಕ್ಷ ವಿಜಯ್‌ ಕುಮಾರ್, ವಿತರಕ ಗಂಗಾರಾಜ್‌, ಹಿರಿಯ ನಿರ್ದೇಶಕರಾದ ಸಾಯಿಪ್ರಕಾಶ್‌, ಸಮಾರಂಭಕ್ಕೆ ಆಗಮಿಸಿ `ಸ್ವೀಟಿ'ಗೆ ಶುಭಕೋರಲು ಬಂದಿದ್ದರು. ಕಾರ್ಯಕ್ರಮದ ನಿರೂಪಕಿ ನಿಲ್ಲದ ಮಳೆಯಂತೆ ಹೊಗಳಿಕೆಯ ಮಾತುಗಳನ್ನು ಸಂದಾಯ ಮಾಡುತ್ತಲೇ ಇದ್ದಳು. ಸ್ವೀಟ್‌ ಸ್ವಲ್ಪ ಓವರ್‌ ಡೋಸ್‌ ಆದಂತೆಯೇ ಇತ್ತು.
ಸಮಾರಂಭದ ಪ್ರಮುಖ ಆಕರ್ಷಣೆ `ಸ್ವೀಟಿ' ಉರ್ಫ್‌ ರಾಧಿಕಾ ಕುಮಾರಸ್ವಾಮಿ ಎಲ್ಲಿದ್ದಾಳೆ? ಯಾವಾಗ ಬರುತ್ತಾಳೆ? ಹೇಗೆ ಶೃಂಗರಿಸಿಕೊಂಡಿರುತ್ತಾಳೆ ಎನ್ನುವ ಕುತೂಹಲ ಎಲ್ಲರನ್ನೂ ಕಾಡುತ್ತಲೇ ಇತ್ತು. ಆಡಿಯೋ ಬಿಡುಗಡೆ ಸಮಾರಂಭವಾಗಿದ್ದರಿಂದ ಸಂಗೀತ ಸಂಯೋಜಕ ಅರ್ಜುನ್‌ ಜನ್ಯ ಅವರೇ ಹೀರೋ. ಹಾಡುಗಳಿಗೆ ಸಾಹಿತ್ಯ ಒದಗಿಸಿದವರೇ ಹೀರೋಯಿನ್‌ಎನ್ನಬಹುದಿತ್ತು.
ಸಿನಿಮಾ ಸಂಗೀತ ಮತ್ತು ಹಾಡುಗಳ ಬಗ್ಗೆ ಮಾತುಗಳು ವೀಡಿಯೋ ರೂಪದಲ್ಲಿ ಹರಿದುಬಂದಿತು. ಎಲ್ಲವನ್ನೂ ಮೊದಲೇ ರೆಡಿ ಮಾಡಿಟ್ಟುಕೊಂಡಿದ್ದರಿಂದ ಕಾರ್ಯಕ್ರಮ ಅಂದುಕೊಂಡಂತೆ ಸಾಗುತ್ತಿತ್ತು.
ರಾಧಿಕಾಳಿಗೆ ಸಿನಿಮಾದಲ್ಲಿ ಮತ್ತೆ ನಟಿಸಬೇಕೆಂಬ ಆಸೆ ಹುಟ್ಟಿದಾಗ ಅದನ್ನಾಕೆ ಬಹಳ ಗ್ರ್ಯಾಂಡ್‌ ಆಗಿಯೇ ಎಂಟ್ರಿ ಕೊಡಬೇಕೆಂದು ಆಸೆಪಟ್ಟಿದ್ದಳು. `ಸ್ವೀಟಿ' ಸಿನಿಮಾಗೆ ತಕ್ಕಂತೆ ಸ್ವೀಟಾಗಿಯೇ ಫೋಟೋಗಳಲ್ಲಿ ಕಾಣಿಸುತ್ತಿದ್ದ ರಾಧಿಕಾಳ ಆಗಮನದ ನಿರೀಕ್ಷೆಯಲ್ಲಿದ್ದ ಎಲ್ಲರಿಗೂ ಸರ್‌ಪ್ರೈಸ್‌ ಕಾದಿತ್ತು. ಎಲ್ಲ ಲೈಟ್‌ ಗಳು ಆಫ್‌ ಆದವು. ಒಂದೇ ಒಂದು ಸ್ಪಾಟ್‌ ಲೈಟ್‌ ರಾಧಿಕಾಳ ಮೇಲೆ ಬಿದ್ದಿತು. ರಾಜಕುಮಾರಿಯಂತೆ ನಡೆದು ಬಂದು ವೇದಿಕೆ ಏರಿದಾಗ ಮುಖದಲ್ಲಿ ಸಂತೋಷ ಕುಣಿದಾಡುತ್ತಿತ್ತು. ಇಂಥವೊಂದು ಗ್ರ್ಯಾಂಡ್‌ ಎಂಟ್ರಿಯನ್ನು ಇಲ್ಲಿಯವರೆಗೂ ತನ್ನ ಯಾವುದೇ ಚಿತ್ರದ ಸಮಾರಂಭಗಳಲ್ಲಿ ಕೊಟ್ಟಿರಲಿಲ್ಲ. ತಾನೊಬ್ಬ ರಾಜಕುಮಾರಿ ಆಗಬೇಕೆಂದು ಅವಳು ಕಂಡಿದ್ದ ಕನಸು ಅಂದು ನನಸಾದಂತಿತ್ತು.
ರಾಧಿಕಾ ತುಂಬಾನೆ ಎಗ್ಸೈಟ್‌ ಆಗಿದ್ದಳು, ``ನಾನು ಮತ್ತೆ ಸಿನಿಮಾದಲ್ಲಿ ನಟಿಸಲೇಬೇಕೆಂದರೆ ಅದೊಂದು ಒಳ್ಳೆ ಚಿತ್ರವಾಗಿರಬೇಕು. ಅಂಥವೊಂದು ಸಬ್ಜೆಕ್ಟ್ ಹುಡುಕಾಟದಲ್ಲಿದ್ದಾಗ, ವಿಜಯಲಕ್ಷ್ಮಿ ಮೇಡಂ ಒಂದು ಕಥೆ ಹೇಳಿದರು. ಆ ಚಿತ್ರವನ್ನು ಅವರು ತಾವೇ ನಿರ್ಮಿಸಿ ನಿರ್ದೇಶಿಸಬೇಕೆಂದು ಕೊಂಡಿದ್ದರು. ನನಗೆ ತುಂಬಾ ಹಿಡಿಸಿದ ಸಬ್ಜೆಕ್ಟ್ ಅದಾಗಿತ್ತು.
``ನನ್ನ ಬ್ಯಾನರಿನಲ್ಲಿ ಇಂಥವೊಂದು ಚಿತ್ರವಾಗಬೇಕು, ನಾನು ಅದರಲ್ಲಿ ನಟಿಸಬೇಕು. ಕಥೆಯನ್ನು ನೀವೇ ಮಾಡಿದ್ದೀರಾ ನೀವೇ ನಿರ್ದೇಶಿಸಿ, ನಾನು ನಿರ್ಮಿಸುತ್ತೇನೆ ಅಂತ ಹೇಳಿದೆ. ನಮ್ಮ ಯಜಮಾನರು ಸಹ ಕಥೆ ಕೇಳಿದರು. ಅವರಿಗೂ ತುಂಬಾ ಇಷ್ಟವಾಯ್ತು.
``ಚಿತ್ರಕ್ಕೆ ಟೈಟಲ್ ಇನ್ನೂ ಇಟ್ಟಿರಲಿಲ್ಲ. ಆದಿತ್ಯ ಅವರು `ಸ್ವೀಟಿ' ಅಂತ ಹೆಸರಿಟ್ಟರೆ ಚೆನ್ನಾಗಿರುತ್ತೆ ಅಂತ ವಿಜಯಲಕ್ಷ್ಮಿ ಮೇಡಂ ಬಳಿ ಹೇಳಿದರಂತೆ. ನನಗೆ ಫೋನ್‌ ಮಾಡಿ ತಿಳಿಸಿದಾಗ ನನಗಂತೂ ತುಂಬಾನೆ ಇಷ್ಟವಾಯ್ತು. `ಸ್ವೀಟಿ' ನನ್ನ ಜೋಡಿ.... ಈ ಹಾಡು ಕೂಡಾ ತುಂಬಾನೆ ಫೇಮಸ್‌ ಆಗಿತ್ತು,'' ಎಂದು ಮಾತನಾಡುತ್ತಾ, ರಾಧಿಕಾ, ``ಮೇಡಂ, ನೀವು ನನ್ನ ಪಕ್ಕದಲ್ಲೇ ಇರಬೇಕು,'' ಎಂದು ನಿರ್ದೇಶಕಿ ವಿಜಯಲಕ್ಷ್ಮಿ ಸಿಂಗ್‌ ರನ್ನು ವೇದಿಕೆಗೆ ಆಹ್ವಾನಿಸಿದಳು. ಇಬ್ಬರು ಹೆಣ್ಣುಮಕ್ಕಳು, ಒಬ್ಬ ನಾಯಕಿ ಮತ್ತೊಬ್ಬಾಕೆ ನಿರ್ದೇಶಕಿ. ನೋಡುವುದಕ್ಕೂ ಚಂದವಾಗಿ ಕಾಣುತ್ತಿತ್ತು. ಹೆಣ್ಣುಮಕ್ಕಳು ಯಾವುದೇ ಕೆಲಸ ಮಾಡಲಿ ಅಚ್ಚುಕಟ್ಟಾಗಿ ಮಾಡುತ್ತಾರೆ ಎಂಬುದಕ್ಕೆ ಅಂದಿನ ಸಮಾರಂಭ ಸಾಕ್ಷಿಯಾಗಿತ್ತು.
