ಸ್ಪೆಷಲ್ ಖಾರದ ಕರಿಗಡುಬು
ಸಾಮಗ್ರಿ : 200 ಗ್ರಾಂ ಮೈದಾ, 50 ಗ್ರಾಂ ರವೆ, 250 ಗ್ರಾಂ ಖಾರದ ಮಿಕ್ಸ್ ಚರ್‌, ರುಚಿಗೆ ತಕ್ಕಷ್ಟು ಉಪ್ಪು, ಇಂಗು, ಓಮ, ಕರಿಯಲು ಎಣ್ಣೆ, ಅರ್ಧ ಸೌಟು ತುಪ್ಪ.
ವಿಧಾನ : ಜರಡಿಯಾಡಿದ ಮೈದಾಗೆ ತುಸು ಉಪ್ಪು, ನೀರಲ್ಲಿ ಕರಗಿಸಿದ ಇಂಗು, ಓಮ, ರವೆ ಸೇರಿಸಿ ಸ್ವಲ್ಪವೇ ನೀರು ಬೆರೆಸುತ್ತಾ ಮೃದುವಾದ ಪೂರಿ ಹಿಟ್ಟಿನ ಹದಕ್ಕೆ ಕಲಸಿಡಿ. ಇದಕ್ಕೆ ತುಪ್ಪ ಬೆರೆಸಿ ಚೆನ್ನಾಗಿ ನಾದಿಕೊಂಡು 2-3 ಗಂಟೆ ಕಾಲ ನೆನೆಯಲು ಬಿಡಿ. ನಂತರ ಮತ್ತೊಮ್ಮೆ ತುಪ್ಪ ಬೆರೆಸಿ ನಾದಿಕೊಂಡು, ಸಣ್ಣ ಉಂಡೆಗಳಾಗಿಸಿ, ಪುಟ್ಟ ಪೂರಿಗಳಾಗಿ ಲಟ್ಟಿಸಿ. ಇದನ್ನು ಕಡುಬಿನ ಅಚ್ಚಿನಲ್ಲಿರಿಸಿ, ಇದಕ್ಕೆ 3-4 ಚಮಚ ಖಾರದ ಮಿಕ್ಸ್ ಚರ್‌ ತುಂಬಿಸಿ, ಅಂಚು ಬಿಟ್ಟುಕೊಳ್ಳದಂತೆ ಒದ್ದೆ ಕೈಯಿಂದ ಅಂಟಿಸಿಬಿಡಿ. ಈ ರೀತಿ ಎಲ್ಲವನ್ನೂ ಸಿದ್ಧಪಡಿಸಿಕೊಂಡು, ಕಾದ ಎಣ್ಣೆಯಲ್ಲಿ ಹೊಂಬಣ್ಣ ಬರುವಂತೆ ಗರಿಗರಿಯಾಗಿ ಕರಿದು, ಬಿಸಿ ಬಿಸಿ ಕಾಫಿ-ಟೀ ಜೊತೆ ಸವಿಯಲು ಕೊಡಿ.
ತ್ರಿವರ್ಣದ ಕಟ್‌ ಲೆಟ್ಸ್
ಸಾಮಗ್ರಿ : ಬೇಯಿಸಿ ಮಸೆದ ಹಸಿ ಬಟಾಣಿ, ನೀಟಾಗಿ ತುರಿದ 1 ಕಪ್‌ ಪನೀರ್‌, 4 ಚಮಚ ಕಾರ್ನ್‌ ಫ್ಲೋರ್‌, ರುಚಿಗೆ ತಕ್ಕಷ್ಟು ಉಪ್ಪು, ಇಂಗು, ಹಸಿಮೆಣಸಿನ ಪೇಸ್ಟ್, ಶುಂಠಿ ಪೇಸ್ಟ್, ಗರಂಮಸಾಲ, ಅರಿಶಿನ, ಜೀರಿಗೆ, ಕರಿಯಲು ಎಣ್ಣೆ.
ವಿಧಾನ : ಪನೀರ್‌ ಗೆ ಚಿಟಕಿ ಅರಿಶಿನ, ಉಪ್ಪು ಸೇರಿಸಿ ಮಿಶ್ರಣ ಕಲಸಿ, 4 ಉಂಡೆ ಮಾಡಿಡಿ. ಬಾಣಲೆಯಲ್ಲಿ ತುಸು ಎಣ್ಣೆ ಬಿಸಿ ಮಾಡಿ. ಇದಕ್ಕೆ ಜೀರಿಗೆ, ಇಂಗಿನ ಒಗ್ಗರಣೆ ಕೊಟ್ಟು, ಮಂದ ಉರಿಯಲ್ಲಿ 2 ಬಗೆಯ ಪೇಸ್ಟ್ ಹಾಕಿ ಕೆದಕಬೇಕು. ನಂತರ ಉಳಿದೆಲ್ಲ ಮಸಾಲೆ ಹಾಕಿ, ಬಟಾಣಿ ಮಿಶ್ರಣ ಸೇರಿಸಿ ಕೈಯಾಡಿಸಿ. ಇದನ್ನು ಕೆಳಗಿಳಿಸಿ ಆರಿದ ನಂತರ 4 ಉಂಡೆಗಳಾಗಿಸಿ. ಆಮೇಲೆ ಮಸೆದ ಆಲೂಗೆ ಕಾರ್ನ್‌ ಫ್ಲೋರ್‌, ತುಸು ಉಪ್ಪು ಹಾಕಿ 4 ಉಂಡೆ ಮಾಡಿಡಿ. ಇದೀಗ ಬಟಾಣಿಯ ಉಂಡೆಯನ್ನು ಎಣ್ಣೆ ಸವರಿದ ಮಣೆ ಮೇಲೆ ಲಘುವಾಗಿ ಲಟ್ಟಿಸಿ. ಇದರ ಮಧ್ಯೆ 1 ಪನೀರ್‌ ಉಂಡೆ ಇರಿಸಿ ನೀಟಾಗಿ ಕ್ಲೋಸ್‌ ಮಾಡಿ, ಮತ್ತೆ ಲಟ್ಟಿಸಿ ಚೌಕಾಕಾರ ನೀಡಿ ಕಟ್‌ ಲೆಟ್‌ ಆಗಿಸಿ. ಇದೇ ತರಹ ಆಲೂ ಮಿಶ್ರಣ ಲಟ್ಟಿಸಿ ಅದರಲ್ಲಿ ಇದನ್ನು ಇರಿಸಿ ಕ್ಲೋಸ್‌ ಮಾಡಿ ಮತ್ತೆ ಕಟ್‌ ಲೆಟ್‌ ಲಟ್ಟಿಸಿ. ಈ ರೀತಿ ಎಲ್ಲಾ ಕಟ್‌ ಲೆಟ್ಸ್ ಸಿದ್ಧಪಡಿಸಿಕೊಳ್ಳಿ. ನಂತರ ಇವನ್ನು ಕಾದ ಎಣ್ಣೆಯಲ್ಲಿ ಹೊಂಬಣ್ಣ ಬರುವಂತೆ ಕರಿದು ತೆಗೆಯಿರಿ. ಚಿತ್ರದಲ್ಲಿರುವಂತೆ ಇದನ್ನು 4 ಭಾಗವಾಗಿ ಕತ್ತರಿಸಿದರೆ, ಈ ರೀತಿ ತ್ರಿವರ್ಣ ಕಟ್‌ ಲೆಟ್ಸ್ ರೆಡಿ ಆಗುತ್ತದೆ!
ವೆಜಿಟೆಬಲ್ ಪಡ್ಡು
ಸಾಮಗ್ರಿ : 1 ಕಪ್‌ ಸಣ್ಣ ರವೆ, 1 ಕಪ್‌ ಮೊಸರು, ಹೆಚ್ಚಿದ 2-3 ಈರುಳ್ಳಿ, ಟೊಮೇಟೊ, ಕೊ.ಸೊಪ್ಪು, ಹಸಿ ಮೆಣಸು, ರುಚಿಗೆ ತಕ್ಕಷ್ಟು ಉಪ್ಪು, ಫ್ರೂಟ್‌ ಸಾಲ್ಟ್.
ವಿಧಾನ : ಫ್ರೂಟ್‌ ಸಾಲ್ಟ್ ಹೊರತುಪಡಿಸಿ ಮೇಲಿನ ಎಲ್ಲಾ ಸಾಮಗ್ರಿ ಸೇರಿಸಿಕೊಂಡು ಮಿಶ್ರಣ ಕಲಸಿಡಿ. ಅಗತ್ಯ ಎನಿಸಿದರೆ ತುಸು ನೀರು ಬೆರೆಸಿ ಇಡ್ಲಿ ಹಿಟ್ಟಿನ ಹದಕ್ಕೆ ಬೆರೆಸಿಕೊಳ್ಳಿ. ಕೊನೆಯಲ್ಲಿ ಫ್ರೂಟ್‌ ಸಾಲ್ಟ್ ಹಾಕಿ ಕಲಸಬೇಕು. ಪಡ್ಡು ಬಾಣಲೆಯಲ್ಲಿ ಎಲ್ಲಾ ಕುಳಿಗಳಿಗೂ ಎಣ್ಣೆ ಸವರಿ, ಅದರ ಅರ್ಧರ್ಧ ಭಾಗ ತುಂಬುವಂತೆ ಈ ಮಿಶ್ರಣ ಹಾಕಿ, ಒಲೆ ಮೇಲಿಟ್ಟು ಬೇಯಿಸಿ. ಒಂದು ಬದಿ ಬೆಂದಾಗ, ತಿರುವಿಹಾಕಿ ಮತ್ತೊಂದು ಬದಿ ಬೇಯಿಸಿ. ಬಿಸಿ ಇರುವಾಗಲೇ ಇದರ ಮೇಲೆ ತುಪ್ಪ ಹಾಕಿ, ಪುದೀನಾ ಚಟ್ನಿ ಜೊತೆ ಸವಿಯಲು ಕೊಡಿ.
ಪೀನಟ್‌ ಪಕೋಡ
ಸಾಮಗ್ರಿ : 1 ಕಪ್‌ ಕಡಲೆಬೀಜ, ಅರ್ಧ ಕಪ್‌ ಕಡಲೆಹಿಟ್ಟು, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಅರಿಶಿನ, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಹಸಿ ಮೆಣಸಿನ ಪೇಸ್ಟ್, ಧನಿಯಾ ಪುಡಿ, ಅಮ್ಚೂರ್‌ ಪುಡಿ, ಕರಿಯಲು ಎಣ್ಣೆ.
ವಿಧಾನ : ಕಡಲೆಬೀಜ, ಎಣ್ಣೆ ಹೊರತುಪಡಿಸಿ ಮೇಲಿನ ಎಲ್ಲಾ ಸಾಮಗ್ರಿ ಬೆರೆಸಿ ಪಕೋಡ ಮಿಶ್ರಣದಂತೆ ತುಸು ನೀರು ಹಾಕಿ ಕಲಸಿಡಿ. ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ ಒಂದೊಂದೇ ಕಡಲೆ ಬೀಜವನ್ನು ಇದಕ್ಕೆ ಹಾಕಿ, ಆಲೂ ಬೋಂಡ ಮಾಡುವಂತೆ, ತುಸು ಮಿಶ್ರಣ ಹಿಡಿದು ಕರಿಯಿರಿ. ನಂತರ ಪುದೀನಾ ಚಟ್ನಿ ಜೊತೆ ಬಿಸಿಯಾಗಿ ಸವಿಯಲು ಕೊಡಿ.
ಪನೀರ್‌ ಟಿಕ್ಕಾ ಮಸಾಲ
ಸಾಮಗ್ರಿ : 2 ಕಪ್‌ ಪನೀರ್‌ ನ್ನು ಕ್ಯೂಬ್ಸ್ ಆಗಿ ಕತ್ತರಿಸಿಡಿ, ಅರ್ಧ ಕಪ್‌ ಹೋಳಾಗುವಂತೆ ಕೆಂಪು, ಹಸಿರು ಕ್ಯಾಪ್ಸಿಕಂ ಹೆಚ್ಚಿಡಿ. 1-2 ಈರುಳ್ಳಿ, ತೇವಾಂಶ ಹಿಂಗಿಸಿದ ಗಟ್ಟಿ ಮೊಸರು 1 ಕಪ್‌, ರುಚಿಗೆ ತಕ್ಕಷ್ಟು ಉಪ್ಪು, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಧನಿಯಾಪುಡಿ, ಗರಂಮಸಾಲ, ಚಾಟ್‌ ಮಸಾಲ, ನಿಂಬೆರಸ, ತುಸು ಎಣ್ಣೆ, ಹೆಚ್ಚಿದ ಕೊ.ಸೊಪ್ಪು.
ವಿಧಾನ : ಒಂದು ಬೇಸನ್ನಿಗೆ ಮೊಸರು ಹಾಕಿ ಬೀಟ್‌ ಮಾಡಿ. ಇದಕ್ಕೆ ಉಪ್ಪು, ಅರಿಶಿನ, ಎಲ್ಲಾ ಮಸಾಲೆ ಹಾಕಿ ಬೆರೆಸಿಕೊಳ್ಳಿ. ನಂತರ ಇದಕ್ಕೆ ಪನೀರ್‌, ಹೆಚ್ಚಿದ ಈರುಳ್ಳಿ, 2 ಬಗೆಯ ಕ್ಯಾಪ್ಸಿಕಂ ಸೇರಿಸಿ. ನಂತರ ಈ ಮಿಶ್ರಣವನ್ನು 4-5 ಗಂಟೆ ಕಾಲ ಫ್ರಿಜ್‌ ನಲ್ಲಿ ಇರಿಸಿ ಸೆಟ್‌ ಆಗಲು ಬಿಡಿ. ನಂತರ ಬಾಣಲೆಯಲ್ಲಿ ತುಸು ಎಣ್ಣೆ ಬಿಸಿ ಮಾಡಿ, ಈ ಮಿಶ್ರಣ ಹಾಕಿ, ಮಂದ ಉರಿಯಲ್ಲಿ ಬಾಡಿಸಬೇಕು. ಇದನ್ನು ಕೆಳಗಿಳಿಸಿ, ನಿಂಬೆ ಹಣ್ಣು ಹಿಂಡಿಕೊಂಡು, ಕೊ.ಸೊಪ್ಪು ಉದುರಿಸಿ, ಸ್ಟಾರ್ಟರ್‌ ಆಗಿ ಊಟಕ್ಕೆ ಮೊದಲು ಸವಿಯಲು ಕೊಡಿ.
ಬೇಕ್ಡ್ ಟೋಫು ಪೋಟಲಿ
ಸಾಮಗ್ರಿ : ಅರ್ಧ ಕಪ್‌ ಟೋಫು ಮ್ಯಾಶ್‌ ಮಾಡಿಡಿ (ರೆಡಿಮೇಡ್‌ ಲಭ್ಯ), 1 ಕಪ್‌ಮೈದಾ, 2-2 ಚಮಚ ಹುರಿದು ತರಿಯಾಗಿಸಿದ ಕಡಲೆಬೀಜ, ಹುರಿಗಡಲೆ, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಹಸಿ ಮೆಣಸಿನ ಪೇಸ್ಟ್, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಗರಂಮಸಾಲ, ಚಾಟ್‌ ಮಸಾಲ, ಧನಿಯಾ ಪುಡಿ, ಹೆಚ್ಚಿದ ಕೊ.ಸೊಪ್ಪು, ಪುದೀನಾ, ಕರಿಯಲು ಎಣ್ಣೆ, ಬೆಣ್ಣೆ.
ವಿಧಾನ : ಮೈದಾಗೆ ಚಿಟಕಿ ಉಪ್ಪು, ತುಸು ಬಿಸಿ ನೀರು ಬೆರೆಸಿ, ಮೃದುವಾದ ಪೂರಿ ಹಿಟ್ಟಿನ ಹದಕ್ಕೆ ಕಲಸಿಡಿ. ಇದಕ್ಕೆ ತುಸು ಬೆಣ್ಣೆ ಬೆರೆಸಿ ಚೆನ್ನಾಗಿ ನಾದಿಕೊಂಡು 2 ಗಂಟೆ ಕಾಲ ನೆನೆಯಲು ಬಿಡಿ. ಬಾಣಲೆಯಲ್ಲಿ ತುಸು ಎಣ್ಣೆ ಬಿಸಿ ಮಾಡಿ. ಇದಕ್ಕೆ ಜೀರಿಗೆ, ಇಂಗಿನ ಒಗ್ಗರಣೆ ಕೊಟ್ಟು, 3 ಬಗೆಯ ಪೇಸ್ಟ್ ಹಾಕಿ ಮಂದ ಉರಿಯಲ್ಲಿ ಬಾಡಿಸಿ. ನಂತರ ಮಸೆದ ಟೋಫು, ಬಾಕಿ ಎಲ್ಲಾ ಮಸಾಲೆ ಹಾಕಿ ಚೆನ್ನಾಗಿ ಬಾಡಿಸಿ. 2 ನಿಮಿಷ ಬಿಟ್ಟು ಮಿಶ್ರಣ ಕೆಳಗಿಳಿಸಿ ಚೆನ್ನಾಗಿ ಆರಲು ಬಿಡಿ. ನಂತರ ನೆನೆದ ಮೈದಾ ಮಿಶ್ರಣಕ್ಕೆ ಇನ್ನಷ್ಟು ಬೆಣ್ಣೆ ಬೆರೆಸಿ ನಾದಿಕೊಳ್ಳಿ. ಇದರಿಂದ ಸಣ್ಣ ಸಣ್ಣ ಉಂಡೆ ಮಾಡಿಕೊಂಡು ಪುಟ್ಟ ಪೂರಿಗಳಾಗಿ ಲಟ್ಟಿಸಿ. ಇದರ ಮಧ್ಯೆ 1-2 ಚಮಚ ಟೋಫು ಮಿಶ್ರಣ ಇರಿಸಿ, ಎಲ್ಲಾ ಕಡೆಯಿಂದ ಕಣಕ ಕವರ್‌ ಮಾಡಿ, ಚಿತ್ರದಲ್ಲಿರುವಂತೆ ಒಂದು ಸಂಚಿಯ (ಪೋಟಲಿ) ಆಕಾರ ನೀಡಿ, ಮೇಲ್ಭಾಗ ಬಿಟ್ಟುಕೊಳ್ಳದಂತೆ ಒದ್ದೆ ಕೈಯಿಂದ ಒತ್ತಿಕೊಳ್ಳಿ. ಇದರ ಮೇಲೆ ಚೆನ್ನಾಗಿ ಬೆಣ್ಣೆ ಸವರಿಡಿ. ಇದನ್ನು ಮೊದಲೇ ಪ್ರೀಹೀಟ್‌ ಮಾಡಿದ ಓವನ್ನಿನಲ್ಲಿರಿಸಿ, 200 ಡಿಗ್ರಿ ಶಾಖದಲ್ಲಿ 18-20 ನಿಮಿಷ ಬೇಕ್‌ ಮಾಡಿ. ಡೋರ್‌ ತೆಗೆದು ನೋಡಿ, ಹೊರಭಾಗ ಚೆನ್ನಾಗಿ ಹೊಂಬಣ್ಣ ಪಡೆಯದಿದ್ದರೆ, ಮತ್ತೆ 4-5 ನಿಮಿಷ ಬೇಕಿಂಗ್‌ ಮುಂದುವರಿಸಿ. ಓವನ್‌ ಇಲ್ಲದವರು ಕಾದ ಎಣ್ಣೆಯಲ್ಲಿ ಕರಿದು ತೆಗೆಯಿರಿ. ನಂತರ ಬಿಸಿ ಇರುವಾಗಲೇ ಇದನ್ನು ಟೊಮೇಟೊ ಸಾಸ್‌/ಕೆಚಪ್‌ ಜೊತೆ ಸವಿಯಲು ಕೊಡಿ.
ಆನಿಯನ್‌ ಪ್ಯಾನ್‌ ಕೇಕ್‌
ಸಾಮಗ್ರಿ : 1 ದೊಡ್ಡ ಕಪ್‌ ಸಣ್ಣ ರವೆ, ಅರ್ಧ ಕಪ್‌ ಹುಳಿ ಮೊಸರು, ಒಂದಿಷ್ಟು ಹೆಚ್ಚಿದ ಈರುಳ್ಳಿ, ಸಣ್ಣಗೆ ಹೆಚ್ಚಿದ ಹಣ್ಣು ಹಸಿ ಮೆಣಸು, ರುಚಿಗೆ ತಕ್ಕಷ್ಟು ಉಪ್ಪು, ಫ್ರೂಟ್‌ ಸಾಲ್ಟ್, ದೋಸೆಗೆ ಬೇಕಾದಷ್ಟು ರೀಫೈಂಡ್‌ ಎಣ್ಣೆ.
ವಿಧಾನ : ಲಘುವಾಗಿ ಹುರಿದ ರವೆಗೆ ಉಪ್ಪು, ಹೆಚ್ಚಿದ ಹಸಿ ಮೆಣಸು, ಈರುಳ್ಳಿ, ಮೊಸರು ಇತ್ಯಾದಿ ಸೇರಿಸಿ ಗಂಟಾಗದಂತೆ ಚೆನ್ನಾಗಿ ಗೊಟಾಯಿಸಿ. ಕೊನೆಯಲ್ಲಿ ಫ್ರೂಟ್‌ ಸಾಲ್ಟ್ ಹಾಕಿ ಮತ್ತೊಮ್ಮೆ ಗೊಟಾಯಿಸಿ. ತವಾಗೆ ಎಣ್ಣೆ ಬಿಟ್ಟು, ಅದರಲ್ಲಿ 1 ದೊಡ್ಡ ಸೌಟು ಹಿಟ್ಟು ಹರಡಿ, ಸುತ್ತಲೂ ಎಣ್ಣೆ ಬಿಟ್ಟು, ಮುಚ್ಚಳ ಮುಚ್ಚಿರಿಸಿ ಬೇಯಿಸಿ. ನಂತರ ತಿರುವಿ ಹಾಕಿ ಮತ್ತೊಂದು ಬದಿ ಬೇಯಿಸಿ. ಈ ರೀತಿ ಎಲ್ಲವನ್ನೂ ಸಿದ್ಧಪಡಿಸಿಕೊಂಡು ಪುದೀನಾ ಚಟ್ನಿ, ಹಸಿ ಈರುಳ್ಳಿಯ ಬಿಲ್ಲೆ ಜೊತೆ ಬಿಸಿಯಾಗಿ ಸವಿಯಲು ಕೊಡಿ.
