ಆತ್ಮಶುದ್ಧಿಯ ಮಹಾಪರ್ವ: ಉತ್ತಮ ಬ್ರಹ್ಮಚರ್ಯದ ಸಾರ
ಜೈನ ಧರ್ಮದ ಪವಿತ್ರವಾದ ದಶಲಕ್ಷಣ ಪರ್ವದ ಕೊನೆಯ ಹಾಗೂ ಅತ್ಯಂತ ಮಹತ್ವದ ದಿನದಂದು ಆಚರಿಸಲ್ಪಡುವ ಧರ್ಮವೇ ‘ಉತ್ತಮ ಬ್ರಹ್ಮಚರ್ಯ’
ಬ್ರಹ್ಮಚರ್ಯ ಎಂದರೆ ಕೇವಲ ಬಾಹ್ಯವಾದ ಸಂಯಮ ಅಥವಾ ಇಂದ್ರಿಯ ನಿಗ್ರಹ ಮಾತ್ರವಲ್ಲ, ಅದಕ್ಕಿಂತ ಆಳವಾದ ಆಧ್ಯಾತ್ಮಿಕ ಮತ್ತು ತಾತ್ವಿಕ ಅರ್ಥವನ್ನು ಇದು ಹೊಂದಿದೆ. ‘ಬ್ರಹ್ಮ’ ಎಂದರೆ ಶುದ್ಧ, ಜ್ಞಾನ ಸ್ವರೂಪಿ, ಅನಂತ ಮತ್ತು ಅಕ್ಷಯವಾದ ‘ಆತ್ಮ’. ‘ಚರ್ಯ’ ಎಂದರೆ ಆ ಮಾರ್ಗದಲ್ಲಿ ನಡೆಯುವುದು ಅಥವಾ ಅದರಲ್ಲಿ ಲೀನವಾಗುವುದು.
ಬ್ರಹ್ಮಚರ್ಯದ ಎರಡು ಆಯಾಮಗಳು
ಜೈನ ಧರ್ಮದಲ್ಲಿ ಇದನ್ನು ಎರಡು ದೃಷ್ಟಿಕೋನಗಳಲ್ಲಿ ವಿವರಿಸಲಾಗುತ್ತದೆ.
ನಿಶ್ಚಯ ನಯ : “ನಾನು ಈ ದೇಹವಲ್ಲ, ಬದಲಾಗಿ ಒಳಗೆ ಇರುವ ಶುದ್ಧ ಆತ್ಮ” ಅಂತ ಗಟ್ಟಿಯಾಗಿ ನಂಬಿ, ಹೊರಗಿನ ಪ್ರಪಂಚದ ಮೋಹ-ಮಾಯೆಗಳನ್ನು ಬಿಟ್ಟು, ತನ್ನ ಸ್ವಂತ ಆತ್ಮದ ನೆಮ್ಮದಿಯಲ್ಲಿ ತಾನೇ ಖುಷಿಯಾಗಿರೋದೇ ನಿಶ್ಚಯ ನಯ.
ವ್ಯವಹಾರ ನಯ : ನಾವು ಸಮಾಜದಲ್ಲಿ, ಸಂಸಾರದಲ್ಲಿ ಮತ್ತು ಭೌತಿಕ ಜಗತ್ತಿನಲ್ಲಿ ಬದುಕುವಾಗ ಅನುಸರಿಸಬೇಕಾದ ನೈತಿಕ ಮತ್ತು ದೈಹಿಕ ಸಂಯಮವೇ ವ್ಯವಹಾರ ನಯ.
ಉತ್ತಮ ಬ್ರಹ್ಮಚರ್ಯದ ಪ್ರಮುಖ ಲಕ್ಷಣಗಳು
ಇಂದ್ರಿಯ ನಿಗ್ರಹ: ಕಣ್ಣು, ಕಿವಿ, ಮೂಗು, ನಾಲಿಗೆ ಮತ್ತು ಸ್ಪರ್ಶ ಎಂಬ ಐದು ಇಂದ್ರಿಯಗಳ ಚಂಚಲತೆಯನ್ನು ನಿಯಂತ್ರಿಸುವುದು.
ಆಚಾರ-ವಿಚಾರಗಳಲ್ಲಿ ಶುದ್ಧತೆ: ಮಿತವಾದ ಹಾಗೂ ಸಾತ್ವಿಕ ಆಹಾರ ಸೇವನೆ, ಸರಳ ಜೀವನಶೈಲಿ ಮತ್ತು ಸದಾ ಸತ್ಚಿಂತನೆಯಲ್ಲಿ ತೊಡಗಿಕೊಳ್ಳುವುದು.
ಅಂತಃಕರಣದ ಪಾವಿತ್ರ್ಯತೆ: ಮನಸ್ಸು, ಮಾತು ಮತ್ತು ಕೃತಿಯಲ್ಲಿ (ತ್ರಿಕರಣಪೂರ್ವಕವಾಗಿ) ಬ್ರಹ್ಮಚರ್ಯದ ಪಾಲನೆ ಮಾಡುವುದು.
ಮಹತ್ವ ಮತ್ತು ಪ್ರಯೋಜನ
ಮೋಕ್ಷ ಮಾರ್ಗದ ಸಾಧನ: ಭಗವಾನ್ ಮಹಾವೀರರ ವಾಣಿಯ ಪ್ರಕಾರ, ಬ್ರಹ್ಮಚರ್ಯ ಧರ್ಮವನ್ನು ಕಟ್ಟುನಿಟ್ಟಾಗಿ ಪಾಲಿಸುವುದರಿಂದ ಉಳಿದ ಎಲ್ಲಾ ಧರ್ಮಗುಣಗಳು (ಕ್ಷಮೆ, ಸಂಯಮ, ತಪ ಇತ್ಯಾದಿ) ತಾನಾಗಿಯೇ ಸಿದ್ಧಿಸುತ್ತವೆ.
ಶಕ್ತಿ ಸಂಚಯ ಮತ್ತು ತೇಜಸ್ಸು: ಇದು ದೇಹಕ್ಕೆ ರೋಗನಿರೋಧಕ ಶಕ್ತಿ, ಆರೋಗ್ಯ, ದೈಹಿಕ ತೇಜಸ್ಸು ಹಾಗೂ ಮನಸ್ಸಿಗೆ ಉನ್ನತ ಮಟ್ಟದ ಏಕಾಗ್ರತೆ ಮತ್ತು ಸ್ಮರಣಶಕ್ತಿಯನ್ನು ನೀಡುತ್ತದೆ.
ಶಾಂತಿ ಮತ್ತು ನೆಮ್ಮದಿ: ಲೌಕಿಕ ಆಕರ್ಷಣೆಗಳ ಜಂಜಾಟದಿಂದ ಮುಕ್ತಿ ಪಡೆದು, ಶಾಶ್ವತವಾದ ಆಂತರಿಕ ಆನಂದವನ್ನು ಅನುಭವಿಸಲು ಇದು ದಾರಿಯಾಗುತ್ತದೆ.
ಉತ್ತಮ ಬ್ರಹ್ಮಚರ್ಯದ ದಿನದಂದು ವ್ಯಕ್ತಿಯು ತನ್ನ ಅಂತರಂಗವನ್ನು ಶುದ್ಧೀಕರಿಸಿ, ಕೋಪ-ಲೋಭ -ಮೋಹಗಳನ್ನು ತ್ಯಜಿಸಿ ಪರಸ್ಪರ ‘ಕ್ಷಮಾವಾಣಿ’ಯನ್ನು ಕೋರುವುದರ ಮೂಲಕ ಈ ಮಹಾಪರ್ವವನ್ನು ಮಂಗಳಕರವಾಗಿ ಸಂಪೂರ್ಣಗೊಳಿಸಲಾಗುತ್ತದೆ.
- ಬ್ರಹ್ಮಚರ್ಯವು ಕೇವಲ ಒಂದು ವ್ರತ ಮಾತ್ರವಲ್ಲ, ಅದೊಂದು ಜೀವನಶೈಲಿ. ಇದು ಕೇವಲ ಕೆಲವು ದಿನಗಳ ಆಚರಣೆಯಲ್ಲ, ಬದುಕಿನ ಪ್ರತಿಕ್ಷಣದಲ್ಲೂ ಸತ್ಚಿಂತನೆ ಮತ್ತು ಸದಾಚಾರವನ್ನು ಅಳವಡಿಸಿಕೊಳ್ಳುವ ನಿರಂತರ ಸಾಧನೆ.
- ಬಾಹ್ಯ ಪ್ರಪಂಚದ ಟೀಕೆ-ಪ್ರಶಂಸೆಗಳಿಗೆ ಅಂಜದೆ, ತನ್ನ ಆತ್ಮಶಕ್ತಿಯ ಮೇಲೆ ಸಂಪೂರ್ಣ ನಂಬಿಕೆ ಇಟ್ಟು ಮುನ್ನಡೆಯುವ ದೃಢವಾದ ಸ್ಥೈರ್ಯವನ್ನು ಇದು ನೀಡುತ್ತದೆ.
ಪ್ರಸ್ತುತಿ: ಅಶೋಕ ಚಿಕ್ಕಪರಪ್ಪಾ
ಪತ್ರಕರ್ತ – ಅನುವಾದಕ
