ನನ್ನ ನಿನ್ನ ಪ್ರೇಮಗೀತೆ… ನಾ ನಿನ್ನ ಮರೆಯಲಾರೆ… ನೀನೇ ನನ್ನ ಜೀವ… ನೀನಿರದೆ ನಾನಿಲ್ಲ… ಹೀಗೆ ಅನೇಕ ಪ್ರೇಮಗೀತೆಗಳು ಪ್ರೀತಿಸುವವರ ಹೃದಯದಲ್ಲಿ ಪ್ರೀತಿಯ ಹೂವು ಅರಳಿಸುವ ಕೆಲಸ ಮಾಡುತ್ತವೆ.
ಫೆಬ್ರವರಿ ತಿಂಗಳು ಬರುತ್ತಿದ್ದಂತೆ ಪ್ರೀತಿಯ ಸಂಗಾತಿಗೆ ಒಂದು ಒಳ್ಳೆಯ ಉಡುಗೊರೆ ಕೊಡಬೇಕು. ಅದರ ಮೇಲೆ ಒಳ್ಳೊಳ್ಳೆಯ ಪ್ರೀತಿಯ ಸಾಲುಗಳನ್ನು ದಾಖಲಿಸಬೇಕೆಂದು ಕಾತುರದಿಂದ ಕಾಯುತ್ತಿರುತ್ತಾರೆ. ಏಕೆಂದರೆ ಅವರಿಗೆ ಆ ದಿನ ಖುಷಿ ಉತ್ಸಾಹ, ನಿರೀಕ್ಷೆಗಳನ್ನು ಹುಟ್ಟು ಹಾಕಿರುತ್ತದೆ. ನೀವು ಸ್ವಲ್ಪ ರೋಮಾಂಚಿತರಾಗಿ ಹಾಗೂ ವ್ಯಾಲೆಂಟೈನ್‌ ಡೇ ಅಂದರೇನು? ಅದು ಭಾರತಕ್ಕೆ ಹೇಗೆ ಪಾದಾರ್ಪಣೆ ಮಾಡಿ ಯುವಕ- ಯುವತಿಯರ ಹೃದಯವನ್ನು ತಟ್ಟಿತು ಎಂಬುದನ್ನು ತಿಳಿದುಕೊಳ್ಳಿ. ಈ ಪ್ರೀತಿಯ ಹಬ್ಬವನ್ನು ಆಚರಿಸುವ ರೀತಿನೀತಿಗಳು ರೋಚಕವಾಗಿವೆ. ಇತಿಹಾಸದ ಪುಟಗಳನ್ನು ತಿರುವಿ ನೋಡಿದಾಗ ಇದು ವ್ಯಕ್ತಿಯೊಬ್ಬನ ಬಲಿದಾನದ ಕಥೆ ಎಂಬಂತೆ ಕಂಡುಬರುತ್ತದೆ. ಇಟಲಿಯ ವ್ಯಾಲೆಂಟೈನ್‌ ಎಂಬುವವನು ಪ್ರೀತಿಸಿದ. ಅವನು ಪ್ರೀತಿಸಿದವಳನ್ನು ಪಡೆಯಲು ಅಪಾರ ಪ್ರಯತ್ನ ಮಾಡಿದ. ಆದರೆ ಆಗ ರಾಜ್ಯಭಾರ ನಡೆಸುತ್ತಿದ್ದವನು ಕ್ಲೇಡಿಯಂ. ಅವನು ಅತ್ಯಂತ ಕ್ರೂರಿ ಹಾಗೂ ಯಾವುದಕ್ಕೂ ಜಗ್ಗದ ಸ್ವಭಾವದವನಾಗಿದ್ದ. ಅವನ ಕಾಲದಲ್ಲಿ ಸೈನಿಕರಿಗೆ ಇದ್ದ ಕಠೋರ ನಿಯಮವೆಂದರೆ, ಯಾರೊಬ್ಬರೂ ತಮ್ಮ ಪ್ರೇಯಸಿಯರನ್ನು ಭೇಟಿಯಾಗಿ ಮಾತನಾಡುವಂತಿರಲಿಲ್ಲ. ಮದುವೆ ಕೂಡ ಮಾಡಿಕೊಳ್ಳುವಂತೆ ಒತ್ತಡ ತರುವ ಹಾಗಿರಲಿಲ್ಲ. ಆದರೆ ವ್ಯಾಲೆಂಟೈನ್‌ ರಾಜನ ಇಚ್ಛೆಗೆ ವಿರುದ್ಧವಾಗಿ ಪ್ರೇಮಿಗಳನ್ನು ಕದ್ದುಮುಚ್ಚಿ ಮದುವೆಯಾಗಲು ಪ್ರೇರೇಪಿಸಿದ. ಪ್ರೇಮಿಗಳನ್ನು ಪರಸ್ಪರ ಒಗ್ಗೂಡಿಸಿದ ಖ್ಯಾತಿ ಅವನಿಗೆ ಸಲ್ಲುತ್ತದೆ. ಕ್ಲೇಡಿಯಂನಿಗೆ ಇದನ್ನು ಸಹಿಸಿಕೊಳ್ಳಲಾಗಲಿಲ್ಲ. ಹೀಗಾಗಿ ಅವನು ವ್ಯಾಲೆಂಟೈನ್‌ಗೆ ಗಲ್ಲು ಶಿಕ್ಷೆ ವಿಧಿಸಿದ. ಇದು ಫೆಬ್ರವರಿ 14, 269ರ ವಿಷಯ.
ವ್ಯಾಲೆಂಟೈನ್‌ಗೂ ಒಬ್ಬ ಗೆಳತಿ ಇದ್ದಳು. ಆಕೆ ಜೈಲರ್‌ನ ಮಗಳು. ತನಗೆ ಗಲ್ಲುಶಿಕ್ಷೆ ವಿಧಿಸುವ ಮುನ್ನ ಅವನು ಆಕೆಗೆ ಒಂದು ಪತ್ರ ಬರೆದಿದ್ದ. ಆ ಬಳಿಕ ಪ್ರತಿವರ್ಷ ಫೆಬ್ರವರಿ 14 ರಂದು ವ್ಯಾಲೆಂಟೈನ್‌ ದಿನ ಆಚರಣೆ ಆರಂಭವಾಯಿತು. ಅದಕ್ಕಾಗಿ `ವ್ಯಾಲೆಂಟೈನ್‌ ಡೇ’ ಎಂಬ ನಾಮಕರಣ ಆಯಿತು.
ಆರಂಭದಲ್ಲಿ ಜನರು ಪ್ರೀತಿ ತುಂಬಿದ ಪತ್ರ ಕೊಡುತ್ತಿದ್ದರು. ಬಳಿಕ ಪತ್ರದ ಜೊತೆ ಉಡುಗೊರೆ ಕೊಡಲು ಆರಂಭಿಸಿದರು. ಈಗಂತೂ ಮಾರುಕಟ್ಟೆ ತುಂಬಾ ನೂರಾರು ಉಡುಗೊರೆಗಳು ದೊರೆಯುತ್ತವೆ. ಈ ಸಂದರ್ಭಕ್ಕೆ ಯಾವ ಯಾವ ಉಡುಗೊರೆಗಳು ಸೂಕ್ತ ಎನ್ನುವುದನ್ನು ತಿಳಿದುಕೊಳ್ಳಬೇಕು.
ಗುಲಾಬಿ : ಪ್ರೀತಿಯನ್ನು ವ್ಯಕ್ತಪಡಿಸಲು ಗುಲಾಬಿ ಅತ್ಯಂತ ಸೂಕ್ತ ವಿಧಾನವಾಗಿದೆ. ಆದರೆ ಒಂದು ಸಂಗತಿ ನೆನಪಿನಲ್ಲಿರಲಿ. ಪ್ರೇಮಿ ಅಥವಾ ಪ್ರೇಯಸಿಗೆ ಕೊಡುವ ಗುಲಾಬಿ ಹೂವುಗಳ ಸಂಖ್ಯೆ ಕೂಡ ಬಹಳಷ್ಟು ವಿಷಯಗಳನ್ನು ತಿಳಿಸುತ್ತದೆ.
ಪ್ರೀತಿಯನ್ನು ವ್ಯಕ್ತಪಡಿಸಲು ಗುಲಾಬಿ ಹೂವೇ ಸಾಕು. ಕೃತಜ್ಞತೆ ವ್ಯಕ್ತಪಡಿಸಲು ಕೂಡ ಒಂದೇ ಗುಲಾಬಿ ಹೂವು ಕೊಟ್ಟರೂ ಸಾಕು. ಅಭಿನಂದನೆಗೆ 25 ಗುಲಾಬಿ ಹೂವುಗಳನ್ನೊಳಗೊಂಡ ಗುಚ್ಛ, ಯಾವುದೇ ಷರತ್ತುರಹಿತ ಪ್ರೀತಿಗೆ 50 ಗುಲಾಬಿ ಹೂಗಳಿರುವ ಗುಚ್ಛ ಕೊಡಬೇಕು. ಇದರಲ್ಲಿರುವ ಷರತ್ತು ಏನೆಂದರೆ, ಲವರ್ಸ್‌ ನಾಟ್‌ನಲ್ಲಿ ಕಟ್ಟಿ ಕೊಡಿ.
ಹೃದಯ : ವ್ಯಾಲೆಂಟೈನ್‌ ದಿನದಂದು ಮಾರುಕಟ್ಟೆಯಲ್ಲಿ ಕೆಂಪು ವರ್ಣದ, ಹೃದಯದ ಆಕಾರದಲ್ಲಿ ರೂಪಿಸಿದ ಕಾರ್ಡ್‌ಗಳು ಹಾಗೂ ಬೇರೆ ಗಿಫ್ಟ್ ಗಳು ಯಥೇಚ್ಛವಾಗಿ ದೊರೆಯುತ್ತವೆ.
ಮೊದಲು ಕಾಮದೇವನ ಬಾಣದಿಂದ ಹೊರಟ ಹೃದಯದ ಉಡುಗೊರೆ ಪ್ರೀತಿಯ ಅಭಿವ್ಯಕ್ತಿಯನ್ನು ಮತ್ತಷ್ಟು ಪ್ರಭಾವಶಾಲಿಯಾಗಿಸುತ್ತಿತ್ತು. ಪ್ರೀತಿಸುವವರಿಗಾಗಿ ವ್ಯಾಲೆಂಟೈನ್‌ ದಿನದಂದು ಹೃದಯದ ಶೇಪ್‌ನಲ್ಲಿರುವ ಕಾರ್ಡ್ಸ್, ಶೋಪೀಸ್‌ ಟೆಡ್ಡಿಬೇರ್‌, ಪೌಚ್‌, ಇಯರ್‌ರಿಂಗ್ಸ್, ಜ್ಯೂವೆಲರಿ ಬಾಕ್ಸ್, ಸೆರಾಮಿಕ್‌ ಕಾಫಿಮಗ್‌, ಕುಶನ್‌ ಕವರ್‌, ಪಿಲ್ಲೋ ಕವರ್‌ ಹಾಗೂ ಶೋಪೀಸ್‌ಗಳು ಲಭಿಸುತ್ತವೆ.
ಪಾರಿವಾಳದ ಜೋಡಿ : `ನೀನಿಲ್ಲದೆ ನಾನು ಜೀವಿಸಲಾರೆನು,’ `ನೀನು ನನ್ನನ್ನು ಅಗಲಿ ಹೋಗುವುದಕ್ಕಿಂತ ಮುಂಚೆ ನನಗೆ ಸಾವು ಬರಲಿ,’ ಎಂದು ಪ್ರೇಮಿಗಳು ಸಾಮಾನ್ಯವಾಗಿ ಹೇಳುತ್ತಿರುತ್ತಾರೆ. ಬಹಳಷ್ಟು ಜನರು ಈ ಮಾತನ್ನು ಒಪ್ಪಲಾರರೇನೊ. ಒಂದು ಜೋಡಿ ಪಾರಿವಾಳದಲ್ಲಿ ಯಾವುದಾದರೊಂದರ ಸಾವು ಸಂಭವಿಸಿದರೆ, ಬದುಕಿರುವ ಮತ್ತೊಂದು ಪಾರಿವಾಳ ಮತ್ತೆ ಜೋಡಿಯಾಗಲು ಪ್ರಯತ್ನಿಸುದಿಲ್ಲ. ಪ್ರೀತಿ ಒಂದು ಸಮರ್ಪಣೆ. ಪ್ರೀತಿ ಹಾಗೂ ಅದರ ಬಗೆಗಿನ ಸಂಪೂರ್ಣ ಆಸಕ್ತಿಯನ್ನು ಬಿಂಬಿಸಲು ಶಾಪಿಂಗ್‌ ಮಾಲ್ಗಳು ಹಾಗೂ ಗಿಫ್ಟ್ ಶಾಪ್ಸ್ ನಲ್ಲಿ ಇಂತಹ ಪಾರಿವಾಳಗಳ ಜೋಡಿಯ ಬಗೆಬಗೆಯ ಭಂಗಿಯ ಗಿಫ್ಟ್ ಐಟಮ್ ಗಳು ನೋಡಲು ದೊರೆಯುತ್ತವೆ.
ಮೇ ಫ್ಲವರ್ ಲೀಫ್‌ : ಕೆನಡಾದ ರಾಷ್ಟ್ರೀಯ ವೃಕ್ಷ ಮೇ ಫ್ಲವರ್ ಟ್ರೀಯ ಎಲೆಗಳು ಜಪಾನಿ ಹಾಗೂ ಚೀನೀ ಸಂಸ್ಕೃತಿಯ ಪ್ರೀತಿಯನ್ನು ಬಿಂಬಿಸುತ್ತವೆ. ಈ ಎಲೆಗಳಲ್ಲಿ ಸಿಹಿ ಬೆರೆತಿರುತ್ತದೆ. ಹೀಗಾಗಿ ಇದಕ್ಕೆ ಈ ಮಾನ್ಯತೆ. ಅಮೆರಿಕದ ಹಲವು ಪ್ರೇಮಿಗಳು ನಿಜವಾದ ಪ್ರೀತಿ ಪಡೆಯಲು ತಮ್ಮ ಬೆಡ್‌ನ ಕೆಳಭಾಗದಲ್ಲಿ ಮೇ ಫ್ಲವರ್ ಲೀಫ್‌ ಇರುವ ಕಾರ್ಡ್‌ಗಳನ್ನು ಇಟ್ಟುಕೊಳ್ಳುತ್ತಾರೆ. ಅದರ ಮೇಲೆ ರೊಮ್ಯಾಂಟಿಕ್‌ ಸಾಲುಗಳು, ಬಾಣದ ಗುರುತು ಕಂಡುಬರುತ್ತವೆ.
ಟ್ಯೂಲಿಪ್‌ ಹೂವುಗಳು : ಮದುವೆಯ 11ನೇ ವಾರ್ಷಿಕೋತ್ಸವದ ಚಿಹ್ನೆ ಎಂಬಂತೆ ಟ್ಯೂಲಿಪ್‌ ಹೂವುಗಳನ್ನು ಪರಿಗಣಿಸಲಾಗುತ್ತದೆ. ಟ್ಯೂಲಿಪ್‌ ಹೂವುಗಳ ನಟ್ಟನಡುವೆ ಕಪ್ಪು ನುಣ್ಣನೆಯ ಭಾಗವನ್ನು ಪ್ರೇಮಿಯ ಹೃದಯ ಎಂದು ಭಾವಿಸಲಾಗುತ್ತದೆ. ಪ್ರೇಮಿಗಳ ಮೆಚ್ಚಿನ ಮೊದಲ ಹೂವು ಎಂದು ಕರೆಯಲಾಗುವ ಟ್ಯೂಲಿಪ್‌ ಹೂವು ಹೆಸರಾಂತ ಪ್ರೇಮಿಗಳಾದ ಶೀರಿ/ಫರ್ಹಾದ್‌ರ ಪ್ರೀತಿಯ ಪುಷ್ಪ ಎಂದು ಹೇಳಲಾಗುತ್ತದೆ. ಫರ್ಹಾದ್‌ ಟರ್ಕಿ ದೇಶದವ. ಅವನು ಶೀರಿಯನ್ನು ಮನಸಾರೆ ಪ್ರೀತಿಸುತ್ತಿದ್ದ. ಶೀರಿ ಈ ಲೋಕದಿಂದಲೇ ಹೊರಟು ಹೋಗಿದ್ದಾಳೆಂದು ತಿಳಿದಾಗ ಫರ್ಹಾದ್‌ ಹುಚ್ಚನಂತಾದ. ಬೆಟ್ಟವೊಂದರ ತುದಿಯ ತನಕ ತಲುಪಿ ಅಲ್ಲಿಂದ ಕೆಳಗೆ ಜಿಗಿದ. ಅವನು ಜಿಗಿದಾಗ ರಕ್ತದ ಹನಿಗಳು ಗುಡ್ಡದ ಕೆಳಗೆ ಎಲ್ಲೆಲ್ಲಿ ಚಿಮ್ಮಿತೊ ಅಲ್ಲಲ್ಲಿ ಟ್ಯೂಲಿಪ್‌ ಹೂವು ಅರಳಿತು ಎಂದು ಹೇಳಲಾಗುತ್ತದೆ. ಆಗಿನಿಂದ ಇದು ಪ್ರೀತಿಯ ಪ್ರತೀಕವಾಯಿತು. ವ್ಯಾಲೆಂಟೈನ್‌ ದಿನದಂದು ಪ್ರೇಮಿಗಳು ಟ್ಯೂಲಿಪ್‌ ಹೂವನ್ನು ಉಡುಗೊರೆಯಾಗಿ ಕೊಡುತ್ತಾರೆ.
ವಜ್ರ : ಪ್ರೀತಿಯನ್ನು ವ್ಯಕ್ತಪಡಿಸಲು ಡೈಮಂಡ್‌ಗಿಂತ ಅತ್ಯುತ್ತಮ ಉಡುಗೊರೆ ಮತ್ತೇನಿರಲು ಸಾಧ್ಯ? ಇದು ಶಿಲಾಬರಹದಂತೆ ವಿಶಿಷ್ಟವಾಗಿ ಗೋಚರಿಸುತ್ತದೆ. ಗ್ರೀಕ್‌ ನಾಗರಿಕತೆಯಲ್ಲಿ ದೇವತೆಗಳ ಕಣ್ಣಿಂದ ಉದುರಿದ ಕಣ್ಣೀರಿನ ಹನಿ. ಇದನ್ನು ಆಕಾಶದಿಂದ ಉದುರಿದ ನಕ್ಷತ್ರ ಎಂದೂ ಹೇಳಲಾಗುತ್ತದೆ.
ಮಾರುಕಟ್ಟೆಗೆ ಈ ಎಲ್ಲ ಸಂಗತಿಗಳನ್ನು ನಗದೀಕರಿಸಿಕೊಳ್ಳಲು ಹೆಚ್ಚು ಸಮಯ ತಗುಲುವುದಿಲ್ಲ. ವ್ಯಾಲೆಂಟೈನ್‌ ದಿನದಂದು ಚಿನ್ನಾಭರಣ ಅಂಗಡಿಗಳಲ್ಲಿ ಇದನ್ನು ಖರೀದಿಸಲು ಒಂದು ರೀತಿಯ ಸ್ಪರ್ಧೆಯೇ ಏರ್ಪಟ್ಟಿರುತ್ತದೆ. ಇದನ್ನು ಧರಿಸುವವರ ಸ್ವಭಾವದಲ್ಲಿ ನಿಶ್ಚಲತೆ ಹಾಗೂ ಸಮತೋಲನ ಬರುತ್ತದೆ ಎಂದೂ ಹೇಳಲಾಗುತ್ತದೆ. ಪ್ರೇಯಸಿಯನ್ನು ಪ್ರಭಾವಿತಗೊಳಿಸಲು ಸರಿಯಾದ ದಿನ ವ್ಯಾಲೆಂಟೈನ್‌ ದಿನ ಎಂದೂ ಹೇಳಲಾಗುತ್ತದೆ.
ಹೃದಯರೂಪಿ ಉಡುಗೊರೆ : ಪ್ರೀತಿಯನ್ನು ವ್ಯಕ್ತಪಡಿಸುವ ಒಂದು ಒಳ್ಳೆಯ ವಿಧಾನವೆಂದರೆ ಹೃದಯದ ಚಿಹ್ನೆ ಇರುವ ಯಾವುದಾದರೊಂದು ಒಳ್ಳೆಯ ಉಡುಗೊರೆ ಖರೀದಿಸುವುದು, ಹೃದಯದೊಂದಿಗೆ ಹೃದಯ ಬೆರೆತಿರುವ ರೇಷ್ಮೆ ಅಥವಾ ವೆಲ್ವೆಟ್‌ನ ಚಿಕ್ಕ ಚಿಕ್ಕ ಗಿಫ್ಟ್ ಬಾಕ್ಸ್ ಗಳು ದೊರೆಯುತ್ತವೆ. ನಿಮ್ಮದೇ ಆದ ಕಲ್ಪನೆಯ ಉಡುಗೊರೆಯನ್ನು ನೀವೇ ಸಿದ್ಧಪಡಿಸಬಹುದು.
– ಎಸ್‌. ಮೃದುಲಾ
