ಮಾಸ್ಟರ್‌ಶೆಫ್‌ ಕೀರ್ತಿ ಭೌತಿಕಾ
ಕೇಕ್‌ ತಯಾರಿಸುವುದರಿಂದ ಶುರುವಾದ ಕೀರ್ತಿಯ ಕುಕಿಂಗ್‌ ಕಲೆ ನಿರಂತರವಾಗಿ ಹರಿದುಬಂದು, ಆಕೆಗೆ ಮಾಸ್ಟರ್‌ಶೆಫ್‌ ಪಟ್ಟ ಕೊಡಿಸಿದೆ. ಬನ್ನಿ, ಆಕೆ ಹೇಗೆ ಯಶಸ್ಸಿನ ಸೋಪಾನಗಳನ್ನೇರಿ ಶಿಖರ ತಲುಪಿದರೆಂದು ತಿಳಿಯೋಣ….!
`ಮಾಸ್ಟರ್‌ಶೆಫ್‌ ಸೀಸನ್‌-5’ರ ವಿಜೇತರೆನಿಸಿದ ಕೀರ್ತಿ ಭೌತಿಕಾ, ಕೋಲ್ಕತಾದ ಬಿರ್ಲಾ ಕಾಲೇಜಿನ ನ್ಯೂಟ್ರಿಶನ್‌ ಪದವೀಧರೆ. ಅಲ್ಲಿನ ಸಾಫ್ಟ್ ಲೇಕ್‌ ಎಂಬಲ್ಲಿ ಕೀರ್ತಿ ಒಂದು ಯಶಸ್ವೀ ಬೇಕರಿ ನಡೆಸುತ್ತಿದ್ದಾರೆ. ಇದನ್ನು ಬೇಕರಿ ಬದಲು ಕೇಕರಿ ಅನ್ನಿ ಅಂತಾರೆ ಕೀರ್ತಿ. ತಮ್ಮ ಶುಗರ್‌ ಪ್ಲಮ್ ಕೇಕರಿಯಿಂದ ಈ ಬೇಕರಿ ಆರಂಭಿಸಿದ ಕೀರ್ತಿ, `ಕೇಕರಿ’ ಹೆಸರಿನಿಂದಲೇ ಅಪಾರ ಕೀರ್ತಿ ಗಳಿಸಿದ್ದಾರೆ. ಕಾಲೇಜಿನಲ್ಲಿ ಪದವಿ ಶಿಕ್ಷಣದ ಜೊತೆ ಜೊತೆಯಲ್ಲೇ ಕೀರ್ತಿ ಬೇಕರಿ ಶಾಪ್‌ನ್ನು ಚೆನ್ನಾಗಿ ನಡೆಸಿದರು. ಕಳೆದ ಹಲವಾರು ವರ್ಷಗಳಿಂದ ಕೀರ್ತಿಯ ವರ್ಕ್‌ ಶೆಡ್ಯೂಲ್‌ ಬಲು ವ್ಯವಸ್ಥಿತವೆಂದೇ ಹೇಳಬೇಕು. ಟೈಂ ಮ್ಯಾನೇಜ್‌ಮೆಂಟ್‌ನಿಂದ ಹಿಡಿದು ಬೇಕರಿ ಮ್ಯಾನೇಜ್‌ಮೆಂಟ್‌ವರೆಗೂ ಎಲ್ಲಾ ಕೆಲಸಗಳನ್ನೂ ಈಕೆ ಬಲು ಶ್ರದ್ಧೆಯಿಂದ ಗಮನಿಸಿಕೊಳ್ಳುತ್ತಾರೆ. ಈ ಕಾರಣದಿಂದಲೇ ಈಕೆಯ ಕೆಲಸ ಬೆಳಗ್ಗೆ 5 ರಿಂದ ಆರಂಭಗೊಂಡು, ರಾತ್ರಿ ಊಟ ಮುಗಿಸಿ ಮಲಗಲು ಹೊರಟಾಗ 1 ಗಂಟೆ ಆಗಿರುತ್ತದೆ.
ಕೀರ್ತಿ ತಮ್ಮ ಫೈನಲ್ ಡಿಶ್‌ನಿಂದ ಮಾಸ್ಟರ್‌ಶೆಫ್‌ನ ಜಡ್ಜ್ ಗಳಾದ ವಿಕಾಸ್‌ ಖನ್ನಾ, ಕುಣಾಲ್‌ ಕಪೂರ್‌, ಜೋರಾಬರ್‌ ಕಾವ್ಯಾರನ್ನು ಮೆಚ್ಚಿಸುವಲ್ಲಿ ಯಶಸ್ವಿಯಾದರು. ಕೀರ್ತಿ ಜೊತೆಗಿನ ಮಾತುಕಥೆಯ ಮುಖ್ಯಾಂಶಗಳು :
ಕುಕಿಂಗ್‌ ಕ್ಷೇತ್ರದಲ್ಲಿ ಮಾಸ್ಟರಿ ಸಾಧಿಸಬೇಕು. ಅದರಲ್ಲಿ ಭವಿಷ್ಯ ಕಾಣಬೇಕೆಂದು ಯಾವಾಗ ನಿರ್ಧರಿಸಿದಿರಿ?
ನಾನು 11ನೇ ತರಗತಿಯಲ್ಲಿ ಕಲಿಯುವಾಗಿನಿಂದಲೇ ನನಗೆ ಬೇಕಿಂಗ್‌ನಲ್ಲಿ ಅಪಾರ ಆಸಕ್ತಿ. ಕ್ಲಾಸ್‌ನಲ್ಲಿ ನಮಗೆ ಬೇಸಿಕ್‌ ಬೇಕಿಂಗ್‌ ಬಗ್ಗೆ ತಿಳಿಸಿದರು. ಮೊದಲ ಸಲ ಮಾಡಿದಾಗ ಕೇಕ್‌ ಖಂಡಿತಾ ಚೆನ್ನಾಗಿ ಬರಲಿಲ್ಲ. ಆಗಿನಿಂದ ನನ್ನ ಪ್ರಯತ್ನ ಮುಂದುವವರಿಯುತ್ತಲೇ ಇದೆ. ಹೇಗಾದರೂ ಇದನ್ನು ಕರಗತ ಮಾಡಿಕೊಳ್ಳಬೇಕೆಂಬುದೇ ನನ್ನ ಹಠ. ಹೀಗಾಗಿ ನಾನು ಟಿ.ವಿ., ಇಂಟರ್‌ನೆಟ್‌ಗಳಿಂದಲೂ ಕೇಕ್‌ ತಯಾರಿಕೆಯ ವಿವಿಧ ವಿಧಾನಗಳ ಕುರಿತು ತಿಳಿದುಕೊಂಡೆ. ನಾನು ಈ ಮಾಧ್ಯಮಗಳಿಂದ ಬಹಳಷ್ಟು ಕಲಿತುಕೊಂಡೆ. ಅಂತೂ ಕೊನೆಗೆ ಯಶಸ್ಸು ದೊರಕಿತು. ಉತ್ತಮ ಕೇಕ್‌ ಮಾಡುವುದನ್ನು ಬ್ಲ್ಯಾಕ್‌ ಫಾರೆಸ್ಟ್ ಕೇಕ್‌ ಮತ್ತು ಚಾಕಲೇಟ್‌ ಟ್ರಫ್‌ ಕೇಕ್‌ನಿಂದ ಆರಂಭಿಸಿದೆ. ಇದಾದ ಮೇಲೆ ನಾನು ನನ್ನ ಫ್ಯಾಮಿಲಿ, ಫ್ರೆಂಡ್ಸ್ ಗಾಗಿ ಆಗಾಗ ತರತರಹದ ಕೇಕ್‌ ತಯಾರಿಸತೊಡಗಿದೆ. ಅಲ್ಲಿಂದ ನನಗೆ ಹಿಂದಿರುಗಿ ನೋಡುವ ಪ್ರಮೇಯವೇ ಬರಲಿಲ್ಲ. ಅಷ್ಟು ಹೊತ್ತಿಗೆ ನನಗೆ ಭವಿಷ್ಯದಲ್ಲಿ ಏನು ಮಾಡಬೇಕು ಎಂಬ ಸುಳಿವು ಸಿಕ್ಕಿತ್ತು! ಕುಕಿಂಗ್‌ನಲ್ಲಿ ನನಗೆ ಇಷ್ಟೊಂದು ಸಂತೋಷ ಸಿಗುತ್ತಿರುವಾಗ ಇದನ್ನೇ ನನ್ನ ಪ್ರೊಫೆಶನ್ ಆಗಿ ಏಕೆ ಮಾಡಿಕೊಳ್ಳಬಾರದು ಎನಿಸಿತು.
ಮಾಸ್ಟರ್‌ಶೆಫ್‌ ಜರ್ನಿ ಬಗ್ಗೆ ತಿಳಿಸಿ. ಯಾವಾಗ ನಿಮಗೆ ಬಹಳ ಹೆಮ್ಮೆ ಎನಿಸಿತು?
ಈ ಜರ್ನಿ ನಿಜಕ್ಕೂ ವಂಡರ್‌ಫುಲ್! ಪ್ರತಿ ಚಾಲೆಂಜ್‌ನಲ್ಲೂ ನಾನು ಹೊಸ ಹೊಸತನ್ನು ಕಲಿಯುತ್ತಿದ್ದೆ. ಈ ಶೋನ ಹಿರಿಮೆ ಎಂದರೆ ನಮ್ಮಂಥ ಸ್ಪರ್ಧಿಗಳು ಇಲ್ಲಿ ಪ್ರತಿದಿನ ಹೊಸ ಹೊಸ ವಿಷಯ ಕಲಿಯಬಹುದು. ಅಷ್ಟು ಮಾತ್ರವಲ್ಲ, ಬಹಳಷ್ಟು ಜನರ ಜೊತೆ ಬೆರೆತು ಚರ್ಚಿಸಿದೆ. ಅವರೆಲ್ಲ ವಿಶ್ವದ ವಿವಿಧ ಪ್ರಾಂತ್ಯಗಳಿಂದ ಬಂದವರು. ಶೋ ಕಾರಣ ವಿಶ್ವದ ನಾನಾ ಭಾಗಗಳನ್ನು ನೋಡುವಂತಾಯಿತು. ಈ ಶೋನಲ್ಲಿ ಭಾಗವಹಿಸಿದ ನಾವೆಲ್ಲರೂ ಒಂದು ದೊಡ್ಡ ಕುಟುಂಬದ ಸದಸ್ಯರಂತೆ ಭಾವಿಸುತ್ತಿದ್ದೆ. ನನ್ನ ಕುಟುಂಬದಿಂದ ದೂರವಾಗಿ ಬಹಳಷ್ಟು ದಿನ ಹೊರಗಿರಬೇಕಾದುದು ಇದೇ ಮೊದಲ ಸಲ, ಅದೂ ಹಲವಾರು ತಿಂಗಳುಗಳು! ನನಗೆ ಬಹಳಷ್ಟು ಮಂದಿ ಹೊಸ ಹೊಸ ಫ್ರೆಂಡ್ಸ್ ಸಿಕ್ಕಿದರು.
ಹೆಮ್ಮೆ ಪಡಬೇಕಾದ ಸಂಗತಿ ಎಂದರೆ ಅದು 2 ಸಲ ಬಂದಿತು. ಅಂಥ ಕ್ಷಣಗಳನ್ನು ನಾನೆಂದೂ ಮರೆಯಲಾರೆ! ಮಾಸ್ಟರ್‌ಶೆಫ್‌ನಲ್ಲಿ ನನಗೆ ನನ್ನ ಹೆಸರಿನ ಏಪ್ರನ್‌ ಸಿಕ್ಕಾಗ ಮತ್ತು ಫೈನಲ್ ಎಪಿಸೋಡ್‌ನಲ್ಲಿ ನನ್ನ ತಾಯಿ ತಂದೆ ನನ್ನನ್ನು ಭೇಟಿಯಾಗಲು ಶೋಗೆ ಬಂದಿದ್ದರು…. ಅದೂ ನಾನು ವಿಜೇತಳೆಂದು ಪಟ್ಟ ದೊರಕಿದಾಗ!
ಈ ಇಡೀ ಜರ್ನಿಯಲ್ಲಿ ನಿಮ್ಮನ್ನು ಚಿಂತೆಗೆ ಗುರಿಮಾಡಿದ ಪ್ರಸಂಗಗಳು ಇದ್ದವೇ?
ಆರಂಭದಲ್ಲಿ ನಾನು ನಾನ್‌ವೆಜ್‌ ಡಿಶ್‌ ತಯಾರಿಸಬೇಕಾದಾಗ ಬಹಳ ಇರಸುಮುರಿಸಿಗೆ ಸಿಲುಕಿದೆ. ಮಾಸ್ಟರ್‌ಶೆಫ್‌ ಸೀಸನ್‌-4 ಪ್ಯೂರ್‌ ವೆಜ್ ಅಂತ ಗೊತ್ತಿದ್ದರೂ ಅದರಲ್ಲಿ ಭಾಗವಹಿಸುವ ಧೈರ್ಯ ಆಗ ನನಗಿರಲಿಲ್ಲ. ಆದರೆ ಸೀಸನ್‌-5 `ಸಾಮಾನ್ಯ’ ಎಂದಿತ್ತು. ಅಂದರೆ ಇದರಲ್ಲಿ ನಾನ್‌ವೆಜ್‌ ಸಹ ಶಾಮೀಲಾಗಿತ್ತು. ಹೀಗಾಗಿ ಈ ಶೋನಲ್ಲಿ ನನಗೆ ಹಲವಾರು ಸಲ ನಾನ್‌ವೆಜ್‌ ಡಿಶ್‌ ತಯಾರಿಸಬೇಕಾಯಿತು.
ಮೊದಮೊದಲು ನನ್ನ ಈ ಶೋ ನೋಡುತ್ತಿದ್ದ ಅಪ್ಪಾಜಿಗೆ ಬಹಳ ಸಿಟ್ಟು ಬಂದಿತ್ತು. ನಾನು ನಾನ್‌ವೆಜ್‌ ತಯಾರಿಸುವುದು ನಮ್ಮ ಸಂಪ್ರದಾಯಸ್ಥ ಕುಟುಂಬಕ್ಕೆ ಖಂಡಿತಾ ಒಪ್ಪಿಗೆ ಇರಲಿಲ್ಲ. ನಮ್ಮ ಬಂಧುಬಳಗದವರು ಏನೆಲ್ಲ ಆಡಿಕೊಳ್ಳಬಹುದೆಂದು ಅವರು ಆತಂಕಗೊಂಡಿದ್ದರು. ಮುಂದೆ ಹೇಗೋ ಏನೋ ಎಂದು ಪೇಚಾಡಿದರು. ಆದರೆ ನಾನು ನನ್ನದೇ ವಿಧಾನದಲ್ಲಿ ಅವರನ್ನು ಒಪ್ಪಿಸಿದೆ.
ಮಾಸ್ಟರ್‌ಶೆಫ್‌ನಲ್ಲಿ ನಿಮಗೆ ವಿಜಯ ಗಳಿಸಿಕೊಟ್ಟ ಡಿಶ್‌ ಯಾವುದು?
ಆ ಡಿಶ್‌ ಅಂದ್ರೆ….. ಅರ್ಲ್ ಗ್ರೇ ಟೀ ಅಂಡ್‌ ಫಿಗ್‌ ಟಾರ್ಟ್‌ ವಿತ್‌ ಹನೀ ಸಿಟ್ರಸ್‌ ಕ್ರೀಂ ಫಿಲಿಂಗ್ಸ್.
ಮಾಸ್ಟರ್‌ಶೆಫ್‌ನ ವಿಜೇತರೆನಿಸಿದ ನಂತರ ನಿಮ್ಮ ಜೀವನದಲ್ಲಿ ಎಂಥ ಬದಲಾವಣೆಗಳಾದವು?
ಇದರಲ್ಲಿ ವಿಜೇತಳಾದ ಮೇಲೆ ನನ್ನ ಜೀವನದಲ್ಲಿ ಅನೇಕ ಬದಲಾವಣೆಗಳಾದವು. ಹಿಂದೆಲ್ಲ ನಾನು ಕೇವಲ ಹೋಂಕುಕ್‌ ಆಗಿದ್ದೆ, ಈಗ ಸ್ಟಾರ್‌ ಹೋಟೆಲ್‌ನಲ್ಲಿ ಪ್ರೊಫೆಶನ್ ಎಂಟ್ರಿ ಪಡೆಯುವ ಮಾಸ್ಟರ್‌ಶೆಫ್‌ ಎನಿಸಿದ್ದೇನೆ. ಹೀಗಾಗಿ ನಾನು ನನ್ನ ಹೆಚ್ಚಿರುವ ಜವಾಬ್ದಾರಿಗಳನ್ನು ಚೆನ್ನಾಗಿ ಅರಿತಿದ್ದೇನೆ. ನನ್ನ ಪ್ರಕಾರ, ಒಂದು ತಿನಿಸಿಗೆ ಕೇವಲ ರುಚಿ ಇದ್ದುಬಿಟ್ಟರೆ ಸಾಲದು, ಅದು ಆರೋಗ್ಯಕರವಾಗಿ ಇರಬೇಕಾದುದೂ ಅಷ್ಟೇ ಮುಖ್ಯ. ಹೀಗಾಗಿ ನಾನು ತಯಾರಿಸುವ ತಿನಿಸುಗಳಲ್ಲಿ ಕೇವಲ ಪೌಷ್ಟಿಕ ಆಹಾರ ಸಾಮಗ್ರಿಗಳನ್ನೇ ಬಳಸುತ್ತೇನೆ. ಅಂದರೆ, ಫೈಬರ್‌ ಇರುತ್ತದೆ. ಆದ್ದರಿಂದ ಅದಕ್ಕೇ ಆದ್ಯತೆ. ಕನಿಷ್ಠ ಪ್ರಮಾಣದ ಸಕ್ಕರೆ, ಅದರ ಬದಲಿಗೆ ಜೇನುತುಪ್ಪ ಬಳಸುತ್ತೇನೆ.
ನಿಮ್ಮ ಮುಂದಿನ ಯೋಜನೆಗಳೇನು?
2 ವರ್ಷಗಳ ಹಿಂದೆ ನಾನು ಶುಗರ್‌ಪ್ಲಮ್ ಕೇಕರಿ ತೆರೆದಿದ್ದೆ. ಈಗ ನಾನು ಫುಡ್‌ ಸ್ಟುಡಿಯೋದಲ್ಲಿ ಕೆಲಸ ಮಾಡಬಯಸುತ್ತೇನೆ. ಈ ಸ್ಟುಡಿಯೋದಿಂದ ನಾನು ಬೇಕಿಂಗ್‌ ಕ್ಲಾಸ್‌ ತೆಗೆದುಕೊಳ್ಳುತ್ತೇನೆ. ಇಲ್ಲಿ ನಾನೂ ಸಹ ಹೊಸ ಹೊಸ ವಿಷಯ ಕಲಿಯುವೆ. ಮಾಸ್ಟರ್‌ಶೆಫ್‌ ಮೂಲಕ ನಾನು ತಿಳಿದದ್ದು ಎಂದರೆ, ಪ್ರತಿಯೊಬ್ಬ ವ್ಯಕ್ತಿಯೂ ಬೇರೆಯವರಿಗೆ ಏನಾದರೂ ಕಲಿಸಲು ಸಾಧ್ಯ. ಸ್ಟುಡಿಯೋದಲ್ಲಿ ಎಷ್ಟು ಜನ ಸಿಗುತ್ತಾರೋ ಅವರೆಲ್ಲರಿಗೂ ಕಲಿಸುತ್ತೇನೆ, ಅವರಿಂದಲೂ ನಾನು ಕಲಿಯುತ್ತೇನೆ.
– ಎಸ್‌. ಸಾಧನಾ
