ಸಾಮಾನ್ಯವಾಗಿ ಮದುವೆಯ ನಂತರ, ಹುಡುಗಿಗೆ ನಿನ್ನ ಕೆಲಸ ಬಿಟ್ಟುಬಿಡು, ಅಪ್ಪಟ ಗೃಹಿಣಿಯಾಗಿ ನಿನ್ನ ಅತ್ತೆಮನೆಯಲ್ಲಿ ಆದರ್ಶ ಸೊಸೆಯಾಗಿರು ಎಂದೇ ಹೇಳಲಾಗುತ್ತದೆ. ಹಾಗೆಂದರೆ ಅವಳು ತನ್ನೆಲ್ಲ ಆಸೆ, ಆಕಾಂಕ್ಷೆ, ಕನಸುಗಳನ್ನೂ ತ್ಯಾಗ ಮಾಡಬೇಕೇ.....?
ಮದುವೆಯ ನಂತರ ಪ್ರತಿ ಹುಡುಗಿಗೂ ಹೇಳುವ ಮಾತು ಎಂದರೆ, ಅವಳು ತಕ್ಷಣ ತನ್ನ ಕೆಲಸ ಬಿಟ್ಟು ಬಿಡಬೇಕು. ಮನೆಯಲ್ಲಿದ್ದುಕೊಂಡು ಗಂಡ, ಮನೆ, ಮಕ್ಕಳು ಎಂದು ಅಪ್ಪಟ ಗೃಹಿಣಿಯಾಗಿರುವ ಹೆಣ್ಣನ್ನೇ ಈ ಸಮಾಜ ಆದರ್ಶ ಸೊಸೆ ಎಂದು ನಂಬುತ್ತದೆ. ಖಂಡಿತಾ ಇದು ಸರಿಯಲ್ಲ! ಅಸಲಿಗೆ ಈ ಸಮಾಜ ಹೆಣ್ಣನ್ನು ಸದಾ 4 ಗೋಡೆಗಳ ಮಧ್ಯೆ ಬಂಧಿಸಿಡಬೇಕು ಎಂಬ ಷಡ್ಯಂತ್ರ ರಚಿಸಿ, ಹೀಗೆ ಮಾಡಿಟ್ಟಿದೆ. ಹೀಗಾಗಿ ಯಾವ ಸ್ವಾಭಿಮಾನಿ ಹೆಣ್ಣೇ ಆದರೂ, ತಾನು ಮಾಡುತ್ತಿರುವ ನೌಕರಿ ಬಿಟ್ಟು, 4 ಗೋಡೆಗಳ ಮಧ್ಯೆ ಮಾಡಿದ್ದನ್ನೇ ಮಾಡುತ್ತಾ ಕೂರುವ ಬದಲು, ಪ್ರಗತಿಪರ ಧೋರಣೆಯಿಂದ ಸ್ವತಂತ್ರ ವಿಚಾರವಾದಿಯಾಗಿ ಮುನ್ನೇರುವುದೇ ಸರಿ.
ನಮ್ಮ ಸಮಾಜ ಮದುವೆ ನಂತರ ಹೆಣ್ಣನ್ನು ಸದಾ ಮನೆಗೆಲಸಗಳಿಗಷ್ಟೇ ಸೀಮಿತ ಎಂದು ಕಟ್ಟಿ ಹಾಕಲು ಯತ್ನಿಸುತ್ತದೆ. ನಮ್ಮ ಧಾರ್ಮಿಕ ಪರಂಪರೆ, ಸಂಸ್ಕೃತಿಯ ಹಣೆಪಟ್ಟಿಯೂ ಇದನ್ನೇ ಧ್ವನಿಸುತ್ತದೆ. ಹೆಣ್ಣು ಹೊರಗೆ ಹೋಗಿ ತನ್ನ ಹಕ್ಕುಗಳ ಬಗ್ಗೆ ಎಲ್ಲಾ ವಿವರ ತಿಳಿದುಕೊಂಡುಬಿಟ್ಟರೆ ಎಂದು ಸಮಾಜಕ್ಕೆ ಭಯ! ಅನಾದಿ ಕಾಲದಿಂದಲೂ ನಡೆದು ಬರುತ್ತಿರುವ ಈ ಅನೂಚಾನ ಪದ್ಧತಿಗಳನ್ನು ಧಿಕ್ಕರಿಸಿದರೆ ಎಂದರೆ ಅದಕ್ಕೆ ಅಳುಕು. ಒಂದಲ್ಲ ಒಂದು ವಿಧದಲ್ಲಿ ಈ ಬಹುಮುಖೀ ಸಮಾಜ ಹೆಣ್ಣನ್ನು ಶೋಷಿಸುತ್ತಲೇ ಬಂದಿದೆ. ಹೀಗಾಗಿ ಇಂದಿನ ಕ್ರಾಂತಿಕಾರಿ ಆಧುನಿಕ ಹೆಣ್ಣು ಇಂಥ ಶೋಷಣೆಗಳ ವಿರುದ್ಧ ಸಿಡಿದೆದ್ದು ನಿಲ್ಲಬೇಕು.
ಈ ನಿಟ್ಟಿನಲ್ಲಿ ಮೊದಲ ಶೋಷಣೆ ಎಂದರೆ ಮದುವೆಯ ನಂತರ ಹೆಣ್ಣನ್ನು ಕೆಲಸಕ್ಕೆ ಹೋಗದಂತೆ ಕಟ್ಟಿಹಾಕುವುದು. ವಿವಾಹಿತ ಹೆಣ್ಣು ಸದಾ ತನ್ನ ಭವಿಷ್ಯದ ಬಗ್ಗೆ ಯೋಚಿಸಬೇಕು. ನೌಕರಿ ಎಂಬುದು ಈ ತುಟ್ಟಿಯ ಕಾಲದಲ್ಲಿ ಎಷ್ಟು ಮುಖ್ಯ ಎಂಬುದನ್ನು ಅವಳು ಸದಾ ಗುರುತಿಸಬೇಕು. ಇದು ಮನೆಯಿಂದ ಹೊರಗೆ ಹೋಗಿ, ಹೊರ ಪ್ರಪಂಚವನ್ನು ಅರಿಯಲು ಅವಳಿಗೆ ಒಂದು ಸದವಕಾಶ ಮಾತ್ರವಲ್ಲದೆ, ಅದು ಅವಳನ್ನು ಹೆಚ್ಚು ಸ್ವಾವಲಂಬಿಯನ್ನಾಗಿಯೂ ರೂಪಿಸುತ್ತದೆ. ಇಲ್ಲಿ ಅವಳು ತನ್ನ ಯೋಗ್ಯತೆಯ ಬಗ್ಗೆ ತಿಳಿದಿರಬೇಕು. ಇಷ್ಟು ವರ್ಷಗಳ ಕಾಲ ತಾನು ತವರಿನಲ್ಲಿ ಕಲಿತ ಓದು, ಏತಕ್ಕೂ ಪ್ರಯೋಜನಕ್ಕೆ ಬಾರದಂತೆ ಹೋಗಲು ಅವಳು ಬಿಡಬಾರದು. ಅದರ ಸದುಪಯೋಗವಾಗಿ ಅವಳು ಹಣ ಗಳಿಸುವಂತಾಗಬೇಕು, ಅವಳಿಂದ ಸಮಾಜಕ್ಕೂ ಏನಾದರೂ ಉಪಕಾರ ಆಗಬೇಕು.
ಮೂಲ ಕಾರಣವೇನು?
ಈ ಸಮಾಜ ಮೊದಲಿನಿಂದಲೂ ಹೆಣ್ಣು ಮನೆಗಷ್ಟೇ ಸೀಮಿತಳಾಗಿರಲಿ ಎಂದು ಬಯಸುತ್ತದೆ. ಹೀಗಾಗಿಯೇ ಅಡುಗೆಮನೆಗಳು ಬಲು ಇಕ್ಕಟ್ಟಾಗಿರುವಂತೆ ರೂಪಿಸಿ, ಅಲ್ಲಿ ಒಬ್ಬೊಬ್ಬ ಹೆಂಗಸರು ಇತರ ಸಾಮಗ್ರಿ ಹರಡಿಕೊಂಡು, ಸದಾ ಅಲ್ಲೇ ಕೆಲಸ ಮಾಡುತ್ತಾ ಕೂರುವಂತೆ ಮಾಡಿಟ್ಟಿದೆ. ಇಂದಿನ ಆಧುನಿಕ ವಿದ್ಯಾವಂತೆಯರು ಸಮಾಜದ ಈ ಅನಧಿಕೃತ ಕಾನೂನನ್ನು ಮುರಿದು ಮುನ್ನಗ್ಗಬೇಕು. ಕೇವಲ ಅಡುಗೆಮನೆ ಅಷ್ಟೇ ಅವಳ ಪ್ರಪಂಚವಲ್ಲ ಎಂಬುದನ್ನು ಸಮಾಜ ಗುರುತಿಸುವಂತಾಗಬೇಕು. ಹೀಗಾಗಿಯೇ ಓಪನ್ ಕಿಚನ್ ಕಾನ್ಸೆಪ್ಸ್ ದಿನೇ ದಿನೇ ಹೆಚ್ಚು ಜನಪ್ರಿಯ ಆಗುತ್ತಿದೆ. ಇಲ್ಲಿ ಇಬ್ಬರು ಮಾತ್ರವಲ್ಲದೆ, ಹಲವರು ಕೆಲಸ ಮಾಡಲು ಅನುಕೂಲ ಆಗುವಂತೆ ಸುಧಾರಣೆ ಆಗಬೇಕಿದೆ.
