ಮಾಸಿಕ ಸ್ರಾವದ ಬಗ್ಗೆ ಇಂದಿಗೂ ಜನರಲ್ಲಿ ಮೂಢನಂಬಿಕೆ ಇದೆ. ಆ ದಿನಗಳಲ್ಲಿ ಮಹಿಳೆಯರನ್ನು ಅಪವಿತ್ರರು ಎಂದು ತಿಳಿಯಲಾಗುತ್ತದೆ. ಆದರೆ ಅದರ ಬಗೆಗಿನ ವೈಜ್ಞಾನಿಕ ನೋಟ ಬೇರೇನೋ ಹೇಳುತ್ತದೆ…..!
ಒಂದು ಎಲೆಕ್ಟ್ರಿಕ್‌ ಅಪ್ಲೆಯನ್ಸ್ ಕಂಪನಿಯ ಜಾಹೀರಾತಿನಲ್ಲಿ ಮಹಿಳೆಯರನ್ನು ಗೌರವಿಸುವ ಸಂದೇಶ ಕೊಡುತ್ತಲೇ `ಇಂದಿನ ಮಹಿಳೆ ಎಲ್ಲರಿಗೂ ಹೊರೆ’ ಎಂಬ ವಾಕ್ಯವನ್ನೂ ಕೇಳಲಾಗುತ್ತದೆ. ಅವರಿಗೆ ಅರ್ಧ ಸ್ವಾತಂತ್ರ್ಯ ಕೊಡಲಾಗುತ್ತಿದೆ. ಆದರೆ ಎಲ್ಲ ಕಡೆ ಮಹಿಳಾ ಸಬಲೀಕರಣದ ಮಾತುಗಳು ಕೇಳಿಬರುತ್ತಿವೆ.
ಆಶ್ಚರ್ಯವೆಂದರೆ ಅದೇ ಸಮಾಜದಲ್ಲಿ ಹುಡುಗಿಯರು ಮತ್ತು ಮಹಿಳೆಯರು ಪೀರಿಯಡ್ಸ್ ಅಂದರೆ ಮಾಸಿಕ ಸ್ರಾವದ ಸಮಯದಲ್ಲಿ ದೈಹಿಕ ನೋವನ್ನು ಅನುಭವಿಸುತ್ತಾ ಅಪವಿತ್ರರಾದೆವೆಂಬ ಮಾನಸಿಕ ನೋವನ್ನೂ ಸಹಿಸಬೇಕಾಗುತ್ತದೆ. ಅದರ ಬಗ್ಗೆ ಮಾತಾಡುವುದು ಮತ್ತು ವಿಚಾರ ವಿಮರ್ಶೆ ಮಾಡುವುದನ್ನು ನಿರ್ಲಜ್ಜತನವೆಂದು ತಿಳಿಯಲಾಗುತ್ತದೆ. ಏಕೆಂದರೆ ಜನರಿಗೆ ಇಂದಿಗೂ ಈ ಜೈವಿಕ ಪ್ರಕ್ರಿಯೆಯ ವೈಜ್ಞಾನಿಕ ಮಜಲುಗಳ ಬಗ್ಗೆ ಮಾಹಿತಿ ಇಲ್ಲ. ಹೀಗಾಗಿ ಹುಡುಗಿಯರು ಹಾಗೂ ಮಹಿಳೆಯರನ್ನು ಈ ದಿನಗಳಲ್ಲಿ ಅಪವಿತ್ರರೆಂದು ತಿಳಿಯಲಾಗುತ್ತದೆ. ಅವರನ್ನು ಅಸ್ಪೃಶ್ಯರಂತೆ ತಿಳಿಯಲಾಗುತ್ತದೆ. ಅವರನ್ನು ಧಾರ್ಮಿಕ ಉತ್ಸವಗಳಲ್ಲಿ, ಹಬ್ಬಗಳಲ್ಲಿ ಪಾಲ್ಗೊಳ್ಳದಂತೆ ನಿಷೇಧಿಸಲಾಗುತ್ತದೆ. ಪತಿಯಿಂದ ದೂರ ಬೇರೆ ಹಾಸಿಗೆಯಲ್ಲಿ ಮಲಗಬೇಕಾಗುತ್ತದೆ.
ಮೆನ್‌ಸ್ಟ್ರುಯೇಷನ್‌ ಅಥವಾ ಮಾಸಿಕ ಸ್ರಾವಕ್ಕೆ ಸಂಬಂಧಿಸಿದ ಈ ಮೂಢನಂಬಿಕೆಗಳು ಬಹಳ ವರ್ಷಗಳಿಂದ ನಡೆದುಬಂದಿವೆ. ಎಲ್ಲ ತಾಯಂದಿರು ತಮ್ಮ ಹೆಣ್ಣುಮಕ್ಕಳಿಗೆ ಇದನ್ನು ಕಲಿಸುತ್ತಾರೆ. ಅದರಿಂದ ಅಭಿೃದ್ಧಿಯ ಹಾದಿಯಲ್ಲಿ ಅವರ ಆತ್ಮವಿಶ್ವಾಸಕ್ಕೆ ಆಳವಾದ ಪೆಟ್ಟು ಬೀಳುತ್ತದೆ ಹಾಗೂ ಅವರ ವ್ಯಕ್ತಿತ್ವದ ವಿಕಾಸ ನಿಂತುಹೋಗುತ್ತದೆ.
ಬದಲಾವಣೆಯ ಗಾಳಿ
ಭಾರತದಲ್ಲಿ ಚರ್ಚೆಗೆ ವರ್ಜ್ಯವೆಂದು ತಿಳಿಯಲಾಗುವ ಮೆನ್‌ಸ್ಟ್ರುಯೇಷನ್‌ನ್ನು ಚರ್ಚೆಯ ವಿಷಯವನ್ನಾಗಿ ಮಾಡಿ ಅದರ ಬಗ್ಗೆ ಮುಕ್ತವಾಗಿ ಮಾತನಾಡಲು ಝಾರ್ಖಂಡ್‌ನ ಗಢಾ ಗ್ರಾಮದ ಅದಿತಿ ಗುಪ್ತ ಶುರು ಮಾಡಿದ್ದಾರೆ. ವೃತ್ತಿಯಲ್ಲಿ ಎಂಜಿನಿಯರ್‌, ನ್ಯಾಷನಲ್ ಇನ್‌ಸ್ಟಿಟ್ಯೂಟ್‌ ಆಫ್‌ ಡಿಸೈನ್‌ (ಎನ್‌.ಐ.ಡಿ) ಅಹಮದಾಬಾದ್‌ನಿಂದ ಪೋಸ್ಟ್ ಗ್ರ್ಯಾಜುಯೇಟ್‌ ಪದವಿ ಪಡೆದಿರುವ ಅದಿತಿ ಹೀಗೆ ಹೇಳುತ್ತಾರೆ, ಚಿಕ್ಕಂದಿನಲ್ಲಿ ಟಿವಿಯಲ್ಲಿ ಸ್ಯಾನಿಟರಿ ನ್ಯಾಪ್‌ಕಿನ್‌ ಬಗ್ಗೆ ಜಾಹೀರಾತು ಬಂದಾಗ ನಾನು ಅದರ ಬಗ್ಗೆ ತಿಳಿದುಕೊಳ್ಳಲು ಇಚ್ಛಿಸುತ್ತಿದ್ದೆ. ಆದರೆ ನನ್ನಮ್ಮ ಆ ಚಾನೆಲ್ ನ್ನು ಬದಲಾಯಿಸುತ್ತಿದ್ದರು. ನಾನು ಅದರ ಬಗ್ಗೆ ಸ್ಪಷ್ಟವಾಗಿ ತಿಳಿದುಕೊಳ್ಳಬೇಕೆಂದಿದ್ದೆ. ಆದರೆ ಅವರು ನೀನು ದೊಡ್ಡವಳಾದ ಮೇಲೆ ಎಲ್ಲ ತಿಳಿಯುತ್ತದೆ ಎನ್ನುತ್ತಿದ್ದರು. 12 ವರ್ಷದವಳಾಗಿದ್ದಾಗ ನನ್ನ ಪೀರಿಯಡ್ಸ್ ಶುರುವಾದಾಗ ಅಮ್ಮ ನನಗೆ ಹಳೆಯ ಬಟ್ಟೆ ಕೊಟ್ಟರು. ಅವರೂ ಅದನ್ನೇ ಉಪಯೋಗಿಸುತ್ತಿದ್ದರು ಆ ಸಮಯದಲ್ಲಿ ನನಗೆ ಹೊಟ್ಟೆಯಲ್ಲಿ ನೋವಾಗುತ್ತಿತ್ತು. ನನ್ನ ಇಡೀ ದಿನ ಹಾಳಾಗುತ್ತಿತ್ತು. ನನ್ನ ಬಟ್ಟೆಯನ್ನು ಸ್ವಚ್ಛಗೊಳಿಸುವಾಗ ತೊಂದರೆ ಇನ್ನೂ ಹೆಚ್ಚಾಗುತ್ತಿತ್ತು. ಪೀರಿಯಡ್ಸ್ ಮುಗಿದ ನಂತರ ಬೆಡ್‌ಶೀಟ್‌ಗಳನ್ನೂ ಒಗೆಯಬೇಕಾಗುತ್ತಿತ್ತು. ಮಾಸಿಕ ಸ್ರಾವಕ್ಕೆ ಸಂಬಂಧಿಸಿದ ಮೂಢನಂಬಿಕೆಗಳಿಂದಾಗಿ ಅಂಗಡಿಗೆ ಹೋಗಿ ಸ್ಯಾನಿಟರ್‌ ನ್ಯಾಪ್‌ಕಿನ್‌ ಖರೀದಿಸುವುದು ನಾಚಿಕೆಯ ವಿಷಯವಾಗಿತ್ತು. ಆದರೂ ಆ ಸಮಯದಲ್ಲಿ ನನ್ನ ಕುಟುಂಬ ನನಗೆ ಸಂಪೂರ್ಣ ಬೆಂಬಲ ನೀಡಿತು.
9ನೇ ತರಗತಿಯಲ್ಲಿ ಈ ವಿಷಯದ ಬಗ್ಗೆ ಪಾಠ ಮಾಡುವಾಗ ನಮ್ಮ ಪುರುಷ ಅಧ್ಯಾಪಕರು ನಮಗೆ ಆ ಚಾಪ್ಟರ್‌ನ್ನು ಮನೆಯಲ್ಲಿ ಓದಿಕೊಳ್ಳಲು ಹೇಳಿದರು. ಒಳ್ಳೆಯ ಶಿಕ್ಷಣದ ಅಭಾವದಲ್ಲಿ ನಾನು ಬೇರೆ ಊರಿನ ಶಾಲೆಗೆ ಸೇರಿಕೊಂಡಾಗ ಅಲ್ಲಿನ ಹಾಸ್ಟೆಲ್ ನಲ್ಲಿ 10 ಹುಡುಗಿಯರಿಗೆ ಒಂದೇ ಬಾಥ್‌ರೂಮ್ ಇತ್ತು. ಅಲ್ಲಿ ಬಟ್ಟೆಯ ಪ್ಯಾಡ್‌ನ್ನು ಸ್ವಚ್ಛಗೊಳಿಸುವುದು ಸಾಧ್ಯವಿರಲಿಲ್ಲ.
ಆ ಸಮಯದಲ್ಲಿ ನನ್ನ ರೂಮ್ ಮೇಟ್‌ ಸ್ಯಾನಿಟರಿ ನ್ಯಾಪ್‌ಕಿನ್‌ ಉಪಯೋಗಿಸುವುದನ್ನು ಕಂಡೆ. ನಾನೂ ಅದನ್ನು ಉಪಯೋಗಿಸಲು ಯೋಚಿಸಿದೆ. ಅಂಗಡಿಯಿಂದ ನ್ಯಾಪ್‌ಕಿನ್‌ ಖರೀದಿಸಲು ಹೋದಾಗ ಅಂಗಡಿಯವ ಪ್ಯಾಡ್‌ನ್ನು ಪೇಪರ್‌ನಲ್ಲಿ ಸುತ್ತಿ ಕರಿಯ ಪ್ಲಾಸ್ಟಿಕ್‌ ಕವರ್‌ನಲ್ಲಿ ಹಾಕಿ ಕೊಟ್ಟ. ಅಂದಿನಿಂದ ನಾನು ಅನೇಕ ನ್ಯಾಪ್‌ಕಿನ್‌ಗಳನ್ನು ಪ್ರಯತ್ನಿಸಿದ್ದೇನೆ ಮತ್ತು ಅವುಗಳ ಹೀರಿಕೊಳ್ಳುವ ಸಾಮರ್ಥ್ಯ ಪರೀಕ್ಷಿಸಿದ್ದೇನೆ.
ಅದಿತಿ, “ಎನ್‌ಐಡಿಯಲ್ಲಿ ತುಹೀನ್‌ರ ಸಂಪರ್ಕದಲ್ಲಿ ಬಂದೆ. ತುಹೀನ್‌ ನನ್ನ ಸಹಪಾಠಿಯಲ್ಲದೆ, ನನ್ನ ಒಳ್ಳೆಯ ಗೆಳೆಯ ಕೂಡ. ತುಹೀನ್‌ ಈ ವಿಷಯದ ಬಗ್ಗೆ ಇಂಟರ್‌ನೆಟ್‌ನಿಂದ ಮಾಹಿತಿ ಪಡೆದು ನನಗೆ ಹೇಳುತ್ತಿದ್ದರು. 2009ರಲ್ಲಿ ಒಂದು ಪ್ರಾಜೆಕ್ಟ್ ನ ಸಂದರ್ಭದಲ್ಲಿ ನಾನು ಮತ್ತು ತುಹೀನ್‌ ಮೆನ್‌ಸ್ಟ್ರುಯೇಷನ್‌ ಬಗ್ಗೆ ರಿಸರ್ಚ್‌ ಮಾಡಲು ನಿರ್ಧರಿಸಿದೆವು. ಅದರ ಬಗ್ಗೆ ಹಲವಾರು ಹುಡುಗಿಯರು, ಅವರ ತಾಯಿ ತಂದೆ, ಶಿಕ್ಷಕರು ಮತ್ತು ಗೈನಕಾಲಜಿಸ್ಟ್ ಗಳೊಂದಿಗೆ ಮಾತಾಡಿದೆವು. 18-20 ವರ್ಷಗಳ ಹಿಂದೆ ಇದ್ದ ಪರಿಸ್ಥಿತಿಗಳು ಈಗಲೂ ಇವೆ ಎಂದು ತಿಳಿಯಿತು. ಆಗ ಇದು ಮೆನ್‌ಸ್ಟ್ರುಪೀಡಿಯಾದ ಪ್ರಾಜೆಕ್ಟ್ಗೆ ಆಧಾರವಾಯಿತು,” ಎನ್ನುತ್ತಾರೆ.
ಮೆನ್‌ಸ್ಟ್ರುಪೀಡಿಯಾ ಎಂದರೇನು?
ಮೆನ್‌ಸ್ಟ್ರುಪೀಡಿಯಾ ಹೆಲ್ದಿ ಪೀರಿಯಡ್ಸ್ ನ ಒಂದು ಫನ್‌ಗೈಡ್‌ ಆಗಿದೆ. ಗೂಗಲ್ ನಲ್ಲಿ ಮೆನ್‌ಸ್ಟ್ರುಪೀಡಿಯಾ ಅಂತ ಟೈಪ್‌ ಮಾಡಿದ ಕೂಡಲೇ ಮೆನ್‌ಸ್ಟ್ರುಪೀಡಿಯೇಷನ್‌ ಅಂದರೆ ಮಾಸಿಕ ಸ್ರಾವಕ್ಕೆ ಸಂಬಂಧಿಸಿದ ಮಾಹಿತಿಗಳ ಒಂದು ಉದ್ದದ ಪಟ್ಟಿ ನಿಮ್ಮೆದುರು ಬರುತ್ತದೆ. ಈ ವೆಬ್‌ಸೈಟ್‌ನ್ನು ಆರಂಭಿಸಿದ ಶ್ರೇಯಸ್ಸು ಅದಿತಿ ಗುಪ್ತ ಮತ್ತು ತುಹೀನ್‌ ಪಾಲ್ ಗೆ ಸೇರುತ್ತದೆ. ನವೆಂಬರ್‌ 2012ರಲ್ಲಿ ಲಾಂಚ್‌ ಆದ ಈ ವೆಬ್‌ಸೈಟ್‌ನ ಉದ್ದೇಶ ಪೀರಿಯಡ್ಸ್ ಬಗ್ಗೆ ಜನರನ್ನು ಜಾಗೃತಗೊಳಿಸುವುದಾಗಿದೆ. ಅದಕ್ಕೆ ಸಂಬಂಧಿಸಿದ ಮೂಢನಂಬಿಕೆಗಳನ್ನು ದೂರ ಮಾಡುವುದರ ಜೊತೆ ಜೊತೆಗೆ ಆ ಸಂದರ್ಭದಲ್ಲಿ ಸ್ವಚ್ಛತೆಯ ಬಗ್ಗೆ ಸಂಪೂರ್ಣ ಮಾಹಿತಿ ಕೊಡುವುದಾಗಿದೆ. ಆ ಸಮಯದಲ್ಲಿ ಹುಡುಗಿಯರು ಮತ್ತು ಮಹಿಳೆಯರು ಆ್ಯಕ್ಟಿವ್ ಮತ್ತು ಹೆಲ್ದಿ ಆಗಿರಬೇಕು, ಅವರನ್ನು ಅಸ್ಪೃಶ್ಯರಂತೆ ನೋಡಬಾರದು ಎಂದು ತಿಳಿಸಲಾಗಿದೆ. ಈ ವೆಬ್‌ಸೈಟ್‌ನಲ್ಲಿ ಮಾಸಿಕ ಸ್ರಾವಕ್ಕೆ ಸಂಬಂಧಿಸಿದ ಸಾಮಾಜಿಕ ಮತ್ತು ವೈಜ್ಞಾನಿಕ ಮಗ್ಗಲುಗಳ ಮಾಹಿತಿಗಳಿವೆ, ಓದುಗರು ಆಗಾಗ್ಗೆ ಕೇಳುವ ಪ್ರಶ್ನೆಗಳಿಗೆ ಉತ್ತರಗಳಿವೆ. ಒಂದು ಬ್ಲಾಗ್‌ನಲ್ಲಿ ಓದುಗರು ತಮ್ಮ ಅನುಭವಗಳನ್ನು ಹಂಚಿಕೊಳ್ಳುತ್ತಾರೆ.
ವೆಬ್‌ಸೈಟ್‌ನ ಎಲ್ಲ ಮಾಹಿತಿಗಳನ್ನು ವಿಶ್ವದ ಪ್ರಸಿದ್ಧ ಹೆಲ್ತ್ ಮೆಡಿಕಲ್ ಸಂಸ್ಥೆಗಳ ಮೂಲಕ ಪಡೆಯಲಾಗಿವೆ. ಲಂಡನ್‌ನ ಗೈನಕಾಲಜಿಸ್ಟ್ ಡಾ. ಮಹಾದೇವ್‌ ಭಿಡೆ ಈ ವೆಬ್‌ಸೈಟ್‌ನ ಮೆಡಿಕಲ್ ಸಲಹೆಗಾರರಾಗಿದ್ದಾರೆ. ಅವರು ವೆಬ್‌ಸೈಟ್‌ನ ಕಂಟೆಂಟ್‌ ನೋಡುವ ಜೊತೆ ಜೊತೆಗೆ ಅದರ ಪ್ರಶ್ನೋತ್ತರ ವಿಭಾಗವನ್ನೂ ಗಮನಿಸುತ್ತಾರೆ. ಬ್ಲಾಗ್‌ನ ಎಡಿಟರ್‌ ದಿವ್ಯಾ ರೋಸ್‌ಲೀನ್‌. ಅದಿತಿ ಈ ವೆಬ್‌ಸೈಟ್‌ನ ಸಹಸಂಸ್ಥಾಪಕಿ ಮತ್ತು ಮಾರ್ಕೆಟಿಂಗ್‌ ಸ್ಟ್ರ್ಯಾಟೆಜಿಸ್ಟ್ ಆಗಿದ್ದು, ತುಹೀನ್‌ ಕಥೆಗಾರರು ಮತ್ತು ಇಲಸ್ಚ್ರೇಟರ್‌ ಆಗಿದ್ದಾರೆ.
ಕಾಮಿಕ್ಸ್ ಬುಕ್‌ ಟೇಲ್ಸ್ ಆಫ್‌ ಚೇಂಜ್‌
ಬಣ್ಣದ ಚಿತ್ರಗಳು ಮತ್ತು ಸರಳವಾದ ಹಿಂದಿ ಮತ್ತು ಇಂಗ್ಲಿಷ್‌ ಭಾಷೆಗಳಲ್ಲಿ ತಯಾರಿಸಿದ ಕಾಮಿಕ್ಸ್ ಬುಕ್‌ ಟೇಲ್ಸ್ ಆಫ್‌ ಚೇಂಜ್‌ನ ಉದ್ದೇಶ ಹುಡುಗಿಯರಿಗೆ ಈ ಮಾಧ್ಯಮದ ಮೂಲಕ ಪೀರಿಯಡ್ಸ್ ಬಗ್ಗೆ ಮಾಹಿತಿ ಕೊಡುವುದಾಗಿದೆ. ಹಿಂದಿ ಮತ್ತು ಇಂಗ್ಲಿಷ್‌ನಲ್ಲಿ ಈ ಕಾಮಿಕ್ಸ್ ಬುಕ್‌ ಲಾಂಚ್‌ ಆದ ನಂತರ ಅದಿತಿ ಗುಪ್ತ, ತುಹೀನ್‌ ಪಾಲ್ ಮತ್ತು ರಜತ್‌ ಮಿತ್ತಲ್ (ವೆಬ್‌ಸೈಟ್‌ನ ಟೆಕ್ನಿಕಲ್ ಸಲಹೆಗಾರರರು) ಈ ಕಾಮಿಕ್ಸ್ ನ್ನು ಇತರ ಭಾರತೀಯ ಭಾಷೆಗಳಲ್ಲೂ ಲಾಂಚ್‌ ಮಾಡುವ ಯೋಜನೆ ಹಾಕಿಕೊಂಡಿದ್ದಾರೆ. ಈ ಕಾಮಿಕ್ಸ್ ನಲ್ಲಿ ಪೂಜಾ, ಅಂಜಲಿ ಮತ್ತು ಜಿಯಾ ಎಂಬ 3 ಪಾತ್ರಗಳಿಗೆ ಪೀರಿಯಡ್ಸ್ ಬಗ್ಗೆ ಮಾಹಿತಿ ಕೊಡುವ ಕೆಲಸವನ್ನು ದೀದಿ ಎಂಬ ಪಾತ್ರಕ್ಕೆ ಒಪ್ಪಿಸಲಾಗಿದೆ. ಆ ಪಾತ್ರ ಮೆಡಿಕಲ್ ಸ್ಟೂಡೆಂಟ್‌ನದು.
ಈ ಲಾಜಿಕ್‌ನ್ನು ಜನರಿಗೆ ತಲುಪಿಸಲು ನಾವು ಶಾಲೆಗಳು, ಎನ್‌ಜಿಓಗಳು ಮತ್ತು ಸ್ಯಾನಿಟರಿ ನ್ಯಾಪ್‌ಕಿನ್‌ ತಯಾರಿಸುವ ಕಂಪನಿಗಳ ಸಹಕಾರ ಪಡೆಯುತ್ತೇವೆ. ಮಾತುಕಥೆಯ ಮೂಲಕ ಹೇಳಲು ಸಾಧ್ಯವಾಗದಿದ್ದಾಗ ಈ ಕಾಮಿಕ್ಸ್ ಬುಕ್‌ ಯಶಸ್ವಿಯಾಗುತ್ತದೆ ಮತ್ತು ಮಾಹಿತಿಯ ಮಾಧ್ಯಮವಾಗುತ್ತದೆ. ಈ ಕಾಮಿಕ್ಸ್ ಕಠಿಣ ಸಂದರ್ಭಗಳನ್ನು ಎದುರಿಸುವ ಹುಡುಗಿಯರಿಗೆ ಬೇಸಿಕ್‌ ಮಾಹಿತಿ ನೀಡುತ್ತದೆ.
ಈ ಕಾಮಿಕ್ಸ್ ಬುಕ್‌ ಹಿಂದಿ ಮತ್ತು ಇಂಗ್ಲಿಷ್‌ನಲ್ಲಿ ತಯಾರಾಗುತ್ತಿದ್ದು, ಮುಂದಿನ 5 ವರ್ಷಗಳಲ್ಲಿ ಅದಿತಿ ಇದನ್ನು 15 ಭಾರತೀಯ ಭಾಷೆಗಳಲ್ಲಿ ಅನುವಾದ ಮಾಡುವ ಯೋಜನೆ ಹಾಕಿಕೊಂಡಿದ್ದಾರೆ. ಇದಲ್ಲದೆ, 15 ಪೇಜ್‌ಗಳ ಒಂದು ಕಾಮಿಕ್ಸ್ ಕೂಡ ಇದೆ. ಅದರಲ್ಲಿ ಮೆನ್‌ಸ್ಟ್ರುಯೇಷನ್‌ಗೆ ಸಂಬಂಧಿಸಿದ ಮೂಲ ಮಾಹಿತಿಗಳನ್ನು ಸರಳ ಭಾಷೆಯಲ್ಲಿ ಕೊಡಲಾಗುತ್ತದೆ.
ಬದಲಾದ ಆಲೋಚನೆ
ಮೆನ್‌ಸ್ಟ್ರುಯೇಷನ್‌ನ್ನು ಬೇಡದ ವಿಷಯವನ್ನಾಗಿ ಮಾಡುವಲ್ಲಿ ನಮ್ಮ ಸಮಾಜದ ಮಹಿಳೆಯರೇ ಕಾರಣರಾಗಿದ್ದಾರೆ. ತಾಯಂದಿರು ತಮ್ಮ ಹೆಣ್ಣುಮಕ್ಕಳಿಗೆ ಆರಂಭದಿಂದಲೇ ನಾಚಿಕೆಯೇ ನಿನ್ನ ಆಭರಣ, ಹೀಗೆ ಕುಳಿತುಕೋ, ಹಾಗೆ ಕೂರಬೇಡ, ಇವರೊಂದಿಗೆ ಮಾತಾಡು, ಅವರೊಂದಿಗೆ ಮಾತಾಡಬೇಡ, ತಲೆಯ ಮೇಲೆ ಸೆರಗನ್ನು ಹೊದ್ದುಕೋ, ನಿನ್ನ ಶರೀರದ ಬಗ್ಗೆ ಯಾರೊಂದಿಗೂ ಮಾತಾಡಬೇಡ, ಎಂದೆಲ್ಲಾ ಕಲಿಸುತ್ತಾರೆ.
ಅಂದಹಾಗೆ ಈ ಆಲೋಚನೆಯನ್ನು ನಾವು ಬದಲಿಸಬೇಕು. ಇದೊಂದು ಬಯಲಾಜಿಕ್‌ ಪ್ರೋಸೆಸ್‌. ಇದನ್ನು ಅಸಹ್ಯ ಎಂದು ತಿಳಿಯುವುದು ತಪ್ಪು. ಯಾವುದೇ ಹುಡುಗಿ ಮದುವೆಯ ನಂತರ ಈ ಪ್ರೋಸೆಸ್‌ ನಡೆಯುವುದರಿಂದಲೇ ತಾಯಿಯಾಗುತ್ತಾಳೆ. ಹಾಗಾದರೆ ಈ ಪ್ರಕ್ರಿಯೆ ಹೇಗೆ ಹೊಲಸಾಗುತ್ತದೆ?
ಈ ವೆಬ್‌ಸೈಟ್‌ ಮತ್ತು ಕಾಮಿಕ್ಸ್ ಬುಕ್‌ನ ಟಾರ್ಗೆಟ್‌ ಯುವತಿಯರು ಮತ್ತು ಮಹಿಳೆಯರು. ಆದರೆ ನಾವು ಪುರುಷರು ಹಾಗೂ ಹುಡುಗರಿಗೂ ನಮ್ಮ ವಿಷಯ ಹೇಳಲು ಇಚ್ಛಿಸುತ್ತೇವೆ. ಮಹಿಳೆಯರ ಈ ಬಯಲಾಜಿಕಲ್ ಪ್ರೋಸೆಸ್‌ ಬಗ್ಗೆ ಅವರಿಗೆ ಮಾಹಿತಿ ತಿಳಿದಾಗ ಮುಂದೆ ತಮ್ಮ ಬದುಕಿನಲ್ಲಿ ಬರುವ ಹುಡುಗಿಯರು ಮತ್ತು ಮಹಿಳೆಯರ ಸಮಸ್ಯೆಗಳನ್ನು ತಿಳಿಯಬಹುದು ಮತ್ತು ಅವರಿಗೆ ಸಹಕಾರ ನೀಡಬಹುದು.
ಮೆನ್‌ಸ್ಟ್ರುಯೇಷನ್‌ ಬಗ್ಗೆ ಮುಕ್ತವಾಗಿ ಮಾತಾಡದಿರುವುದರಿಂದ, ನಿಮ್ಮ ಸಮಸ್ಯೆಗಳನ್ನು ಹಂಚಿಕೊಳ್ಳದಿರುವುದರಿಂದ ಹೆಚ್ಚಿನ ಮಹಿಳೆಯರು ಪೀರಿಯಡ್ಸ್ ಸಂದರ್ಭದಲ್ಲಿ ಅನಾರೋಗ್ಯಕರ ಪರಿಸ್ಥಿತಿಯಲ್ಲಿ ಇರುತ್ತಾರೆ. ಅವರು ಆಧುನಿಕ ಉತ್ಪನ್ನಗಳನ್ನು ಉಪಯೋಗಿಸುವುದಿಲ್ಲ. ಅದರಿಂದಾಗಿ ಅವರು ವಜೈನಲ್ ಇನ್‌ಫೆಕ್ಷನ್‌ ಮತ್ತು ಇತರ ಅನೇಕ ಆರೋಗ್ಯ ಸಂಬಂಧದ ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ. ನಿಮಗೆ ಆಶ್ಚರ್ಯವಾಗಬಹುದು. ಪೀರಿಯಡ್ಸ್ ನ್ನು ಸಂಕೋಚದಿಂದ, ನಾಚಿಕೆಯಿಂದ ಕಾಣುವುದರಿಂದ ಕೇವಲ ಶೇ.12ರಷ್ಟು ಭಾರತೀಯ ಮಹಿಳೆಯರು ಸ್ಯಾನಿಟರಿ ನ್ಯಾಪ್‌ಕಿನ್‌ ಉಪಯೋಗಿಸುತ್ತಿದ್ದಾರೆ, ಎಂದು ಅದಿತಿ ಹೇಳುತ್ತಾರೆ. ಇಂದಿನ ಯುವಪೀಳಿಗೆ ಬದಲಾವಣೆಯ ಪರವಾಗಿದ್ದಾರೆ ಮತ್ತು ಸಮಾಜ ಬದಲಾವಣೆಯನ್ನು ಇಚ್ಛಿಸುತ್ತದೆ. ನಮ್ಮ ಈ ಮಿಷನ್‌ನಲ್ಲಿ ನಮ್ಮೊಂದಿಗಿರುತ್ತದೆ ಮತ್ತು ಸಮಾಜದಲ್ಲಿ ಈ ದಿಸೆಯಲ್ಲಿ ಸಕಾರಾತ್ಮಕ ಬದಲಾವಣೆ ಬರುತ್ತದೆ ಎಂಬ ಭರವಸೆ ಅದಿತಿಗೆ ಇದೆ.
– ಲಲಿತಾ ಗೋಪಾಲ್‌
– ಮಾಸಿಕ ಸ್ರಾವ ಒಂದು ಬಯಲಾಜಿಕಲ್ ಪ್ರೋಸೆಸ್‌ ಎಂಬ ಮಾಹಿತಿಯನ್ನು ನಾವು ಸಮಾಜದಲ್ಲಿ ಹರಡಬೇಕು. ಅದನ್ನು ಹೊಲಸು ಎಂದು ತಿಳಿಯುವುದು ತಪ್ಪು. ಒಬ್ಬ ವಿವಾಹಿತೆ ಈ ಪ್ರೋಸೆಸ್‌ ಆಧಾರದಲ್ಲೇ ತಾಯಿಯಾಗುತ್ತಾಳೆ. ಹಾಗಾದರೆ ಈ ಪ್ರಕ್ರಿಯೆ ಹೇಗೆ ಹೊಲಸಾಗುತ್ತದೆ?
