ಸ್ಪೈಸಿ ಕಾರ್ನ್ ಡಿಲೈಟ್‌
ಸಾಮಗ್ರಿ : 1 ಕಪ್‌ ಬೆಂದ ತಾಜಾ ಕಾರ್ನ್, 2 ಕಪ್‌ ಮಿಕ್ಸ್ಡ್ ಸಲಾಡ್‌, 1 ಕಪ್‌ ಚಿಪ್ಸ್, 2-3 ಚಮಚ ಟೊಮೇಟೊ ಸಾಸ್‌, ಟಾಪಿಂಗ್‌ಗಾಗಿ ಒಂದಿಷ್ಟು ತುರಿದ ಚೀಸ್‌, ರುಚಿಗೆ ತಕ್ಕಷ್ಟು ಉಪ್ಪು, ಚಾಟ್‌ ಮಸಾಲ, ನಿಂಬೆರಸ.
ವಿಧಾನ : ಒಂದು ಅಗಲ ಬಟ್ಟಲಲ್ಲಿ ಎಲ್ಲಾ ಸಾಮಗ್ರಿ (ಚಿಪ್ಸ್ ಬಿಟ್ಟು)ಗಳನ್ನೂ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಸರ್ವಿಂಗ್‌ ಬೌಲ್ ಗೆ ಈ ಮಿಶ್ರಣ ಹರಡಿ ಮೇಲೆ ನಿಂಬೆಹಣ್ಣು ಹಿಂಡಿಕೊಂಡು, ಚಿಪ್ಸ್ ಉದುರಿಸಿ, ತುರಿದ ಚೀಸ್‌ ಹರಡಿ ಚಿತ್ರದಲ್ಲಿರುವಂತೆ ಅಲಂಕರಿಸಿ ಸರ್ವ್ ಮಾಡಿ.
ಕಾರ್ನ್ ಕಟ್‌ಲೆಟ್‌
ಸಾಮಗ್ರಿ : 1 ಕಪ್‌ ಬೆಂದ ತಾಜಾ ಕಾರ್ನ್, ಅರ್ಧರ್ಧ ಕಪ್‌ ಬೇಯಿಸಿ ಮಸೆದ ಆಲೂ, ಅಕ್ಕಿಹಿಟ್ಟು, ಬ್ರೆಡ್‌ ಕ್ರಂಬ್ಸ್, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಗರಂಮಸಾಲ, ಬೆಳ್ಳುಳ್ಳಿ ಶುಂಠಿ ಪೇಸ್ಟ್, ಅಮ್ಚೂರ್‌ ಪುಡಿ, ಕರಿಯಲು ಎಣ್ಣೆ.
ವಿಧಾನ : ಬೆಂದ ಕಾಳನ್ನು ಮಿಕ್ಸಿಯಲ್ಲಿ ತರಿತರಿಯಾಗಿ ತಿರುವಿಕೊಳ್ಳಿ. ಇದಕ್ಕೆ ಎಲ್ಲಾ ಸಾಮಗ್ರಿ ಬೆರೆಸಿಕೊಂಡು, ಸಣ್ಣ ಉಂಡೆಗಳಾಗಿಸಿ, ವಡೆ ತರಹ ತಟ್ಟಿಕೊಂಡು, ಬ್ರೆಡ್‌ ಕ್ರಂಬ್ಸ್ ನಲ್ಲಿ ಹೊರಳಿಸಿ ಕಾದ ಎಣ್ಣೆಯಲ್ಲಿ (ಮಂದ ಉರಿ ಇರಲಿ) ಹೊಂಬಣ್ಣ ಬರುವಂತೆ ಕರಿಯಿರಿ. ಚಿತ್ರದಲ್ಲಿರುವಂತೆ ಅಲಂಕರಿಸಿ ಸವಿಯಲು ಕೊಡಿ.
ಇನ್‌ಸ್ಟೆಂಟ್‌ ಕಾರ್ನ್ ಕಾಯಿನ್‌
ಸಾಮಗ್ರಿ : ಅರ್ಧ ಕಪ್‌ ಬೆಂದ ತಾಜಾ ಕಾರ್ನ್, ಅರ್ಧರ್ಧ ಕಪ್‌ ಹಾಲು-ಬೆಣ್ಣೆ, ಹೆಚ್ಚಿದ ಈರುಳ್ಳಿ, ಮೈದಾ, 1 ಚಮಚ ಸಕ್ಕರೆ, 10-12 ಸಾಲ್ಟ್ ಬಿಸ್ಕೆಟ್ಸ್, 2 ಹಸಿ ಮೆಣಸು, ಅಲಂಕರಿಸಲು ಹೆಚ್ಚಿದ ಕ್ಯಾಪ್ಸಿಕಂ, ಟೊಮೇಟೊ ತುಸು, ಉಪ್ಪುಮೆಣಸು.
ವಿಧಾನ : ಒಂದು ನಾನ್‌ಸ್ಟಿಕ್‌ ಪ್ಯಾನಿನಲ್ಲಿ ಬೆಣ್ಣೆ ಬಿಸಿ ಮಾಡಿ ಈರುಳ್ಳಿ ಹಾಕಿ ಬಾಡಿಸಿ. ಹಸಿ ಮೆಣಸು, ಮೈದಾ ಹಾಕಿ ಕೆದಕಬೇಕು. ನಿಧಾನವಾಗಿ ಎಡಗೈಯಿಂದ ಹಾಲು ಬೆರೆಸುತ್ತಾ, ಗಂಟಾಗದಂತೆ ಬಾಡಿಸಿ. ಇದಕ್ಕೆ ಉಪ್ಪು, ಮೆಣಸು, ಕಾರ್ನ್ ಬೆರೆಸಿ ಗಟ್ಟಿ ಮಿಶ್ರಣವಾಗಿಸಿ ಕೆಳಗಿಳಿಸಿ. ಚಿತ್ರದಲ್ಲಿರುವಂತೆ ನೀಟಾದ ತಟ್ಟೆಯಲ್ಲಿ ಬಿಸ್ಕೆಟ್ಸ್ ಜೋಡಿಸಿ, ಅದರ ಮೇಲೆ ಕಾರ್ನ್ ಮಿಶ್ರಣ, ಟೊಮೇಟೊ, ಕ್ಯಾಪ್ಸಿಕಂ ತುಂಡುಗಳಿಂದ ಅಲಂಕರಿಸಿ, ಕಾಫಿ-ಟೀ ಜೊತೆ ಸರ್ವ್ ಮಾಡಿ.
ಚೀಝೀ ಕಾರ್ನ್ ಪಾಸ್ತಾ
ಸಾಮಗ್ರಿ : 1-1 ಕಪ್‌ ಬೆಂದ ಕಾರ್ನ್, ಪಾಸ್ತಾ, 2-3 ಚೀಸ್‌ ಕ್ಯೂಬ್ಸ್, ಅರ್ಧ ಕಪ್‌ ಮೈದಾ, 1 ಕಪ್‌ ಹಾಲು, 3-4 ಚಮಚ ಬೆಂದ ಬಟಾಣಿ, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ಓರಿಗೆನೊ.
ವಿಧಾನ : ಒಂದು ಸಣ್ಣ ಬಾಣಲೆಯಲ್ಲಿ ಬೆಣ್ಣೆ ಕರಗಿಸಿ ಮೈದಾ ಹಾಕಿ ಕೆದಕಬೇಕು. ಇದಕ್ಕೆ ನಿಧಾನವಾಗಿ ಹಾಲು ಬೆರೆಸುತ್ತಾ ಕೈಯಾಡಿಸಿ, ಗಂಟು ಆಗಬಾರದು. ಈ ಮಿಶ್ರಣ ಗಾಢಗೊಳ್ಳುತ್ತಿದ್ದಂತೆ, ಪಾಸ್ತಾ, ಕಾರ್ನ್ ಸೇರಿಸಿ. ಆಮೇಲೆ ತುರಿದ ಚೀಸ್‌ ಸೇರಿಸಿ ಕೆದಕಬೇಕು. ಮಂದ ಉರಿ ಇರಲಿ. ಎಲ್ಲ ಬೆರೆತು ಗ್ರೇವಿಯಂತೆ ಗಟ್ಟಿಯಾದಾಗ, ಸರ್ವಿಂಗ್‌ ಡಿಶ್ಶಿಗೆ ಬಗ್ಗಿಸಿ. ಇದರ ಮೇಲೆ ಉಪ್ಪು, ಮೆಣಸು, ಓರಿಗೆನೋ ಉದುರಿಸಿ ಸವಿಯಲು ಕೊಡಿ.
ಕಾರ್ನ್ ಖೀರು
ಸಾಮಗ್ರಿ : ಅರ್ಧರ್ಧ ಕಪ್‌ ಬೇಯಿಸಿ ತರಿತರಿಯಾಗಿ ರುಬ್ಬಿದ ಕಾರ್ನ್. ಸಕ್ಕರೆ, ತುಪ್ಪದಲ್ಲಿ ಹುರಿದ ಗೋಡಂಬಿ, ದ್ರಾಕ್ಷಿ, ಬಾದಾಮಿ, ಪಿಸ್ತಾ (ಒಟ್ಟಾರೆ ಅರ್ಧ ಕಪ್‌), ಅರ್ಧ ಲೀ. ಫುಲ್ ಕ್ರೀಂ ಹಾಲು, 4 ಚಮಚ ಅಕ್ಕಿಹಿಟ್ಟು, ಹಾಲಲ್ಲಿ ನೆನೆಸಿದ 10-12 ಎಸಳು ಕೇಸರಿ, ಅರ್ಧ ಸಣ್ಣ ಚಮಚ ಏಲಕ್ಕಿಪುಡಿ.
ವಿಧಾನ : ಹಾಲನ್ನು ಚೆನ್ನಾಗಿ ಕಾಯಿಸಿ. ಇದು ಚೆನ್ನಾಗಿ ಕುದ್ದು ಅರ್ಧದಷ್ಟು ಹಿಂಗಿದಾಗ, ಇದಕ್ಕೆ ರುಬ್ಬಿದ ಕಾರ್ನ್ ಬೆರೆಸಿ ಮತ್ತಷ್ಟು ಕುದಿಸಿರಿ. ಇದರಿಂದಲೇ ತುಸು ಹಾಲು ತೆಗೆದುಕೊಂಡು ಅದಕ್ಕೆ ಅಕ್ಕಿಹಿಟ್ಟು ಹಾಕಿ ಕದಡಿಕೊಂಡು ಕಾರ್ನ್ ಮಿಶ್ರಣಕ್ಕೆ ಬೆರೆಸಿರಿ. ಆಮೇಲೆ ಸಕ್ಕರೆ, ಏಲಕ್ಕಿ, ಗೋಡಂಬಿ ದ್ರಾಕ್ಷಿ ಇತ್ಯಾದಿಗಳನ್ನೂ ಸೇರಿಸಿ. ಚೆನ್ನಾಗಿ ಆರಿದ ನಂತರ, 1 ತಾಸು ಫ್ರಿಜ್‌ನಲ್ಲಿರಿಸಿ ನಂತರ ಸವಿಯಲು ಕೊಡಿ.
ಕಾರ್ನ್ ಹಾಟ್‌ಡಾಗ್‌
ಸಾಮಗ್ರಿ : 3-4 ಹಾಟ್‌ಡಾಗ್‌ ಬನ್ಸ್ (ಚಿತ್ರದಲ್ಲಿನ ಹಾಗೆ ಉದ್ದಕ್ಕೆ ಕತ್ತರಿಸಿಡಿ), 1 ಕಪ್‌ ಬೇಯಿಸಿ ತರಿಯಾಗಿ ತಿರುವಿದ ಕಾರ್ನ್, 1 ಕಪ್‌ ಹೆಚ್ಚಿದ ಪಾಲಕ್‌ ಸೊಪ್ಪು, 1 ಚಮಚ ಹೆಚ್ಚಿದ ಶುಂಠಿ, ಹಸಿ ಮೆಣಸು, 2 ಚಮಚ ಬೆಣ್ಣೆ, 1 ಈರುಳ್ಳಿ, ಅರ್ಧ ಸೌಟು ಗಟ್ಟಿ ಕೆನೆ ಮೊಸರು (ತೆಳುಬಟ್ಟೆಯಲ್ಲಿ ಮೊಸರು ಕಟ್ಟಿ ಅದರ ತೇವಾಂಶ ಸೋರಿಹೋಗುವಂತೆ ಮಾಡಿ), 2-3 ಚಮಚ ಎಗ್‌ ಲೆಸ್‌ ಮೆಯೋನೀಸ್‌, ಹೆಚ್ಚಿದ 1 ಕ್ಯಾಪ್ಸಿಕಂ, ಅರ್ಧ ಕಪ್‌ ತುರಿದ ಚೀಸ್‌, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು.
ವಿಧಾನ : ಬಾಣಲೆಯಲ್ಲಿ ಬೆಣ್ಣೆ ಕರಗಿಸಿ, ಅದಕ್ಕೆ ಈರುಳ್ಳಿ ಹಾಕಿ ಬಾಡಿಸಿ. ನಂತರ ಹೆಚ್ಚಿದ ಶುಂಠಿ, ಹಸಿಮೆಣಸು, ಪಾಲಕ್‌ ಹಾಕಿ ಬೇಗ ಬೇಗ ಕೈಯಾಡಿಸಿ. ಆಮೇಲೆ ಮೆಯೋನೀಸ್‌, ಗಟ್ಟಿ ಮೊಸರು ಬಾಕಿ ಎಲ್ಲಾ ಸಾಮಗ್ರಿ ಹಾಕಿ ಚೆನ್ನಾಗಿ ಕೆದಕಿ ಕೆಳಗಿಳಿಸಿ. ಇದನ್ನು ಉದ್ದಕ್ಕೆ ಹೆಚ್ಚಿದ ಬನ್‌ಗೆ ಚಿತ್ರದಲ್ಲಿರುವಂತೆ ತುಂಬಿಸಿ, ಮೇಲೆ ಚೀಸ್‌ ಉದುರಿಸಿ. ಇದನ್ನು ಬಿಸಿ ಮಾಡಿದ ಓವನ್ನಿನಲ್ಲಿ 200 ಡಿಗ್ರಿ ಶಾಖದಲ್ಲಿ 3 ನಿಮಿಷ ಬೇಕ್‌ ಮಾಡಿ, ನಂತರ ಸವಿಯಲು ಕೊಡಿ.
ಕಾರ್ನ್ ಸ್ಪೆಷಲ್ ಪಲ್ಯ
ಸಾಮಗ್ರಿ : ಅರ್ಧ ಕಂತೆ ಪಾಲಕ್‌ ಸೊಪ್ಪು, ಅರ್ಧರ್ಧ ಕಪ್‌ ನೆನೆಸಿ ಬೇಯಿಸಿದ ಕಡಲೆ ಕಾಳು, ಕಾರ್ನ್, 2 ಈರುಳ್ಳಿ, 2 ಹಸಿಮೆಣಸು, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ಹುರಿದು ಪುಡಿ ಮಾಡಿದ ಜೀರಿಗೆ, ಸೋಂಪು, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಒಗ್ಗರಣೆಗೆ ಅರ್ಧ ಕಪ್‌ ಬೆಂದ ಕಾರ್ನ್, 2-3 ಚಮಚ ನೈಲಾನ್‌ ಎಳ್ಳು, 2-3 ಚಮಚ ರೀಫೈಂಡ್‌ ಎಣ್ಣೆ, ಒಂದಿಷ್ಟು ಚಾಟ್‌ಮಸಾಲ.
ವಿಧಾನ : ಬೆಂದ ಕಾಳು, ಕಾರ್ನ್, ಈರುಳ್ಳಿ, ಬೆಳ್ಳುಳ್ಳಿ, ಶುಂಠಿ ಪೇಸ್ಟ್, ಹಸಿಮೆಣಸು ಸೇರಿಸಿ ತರಿತರಿಯಾಗಿ ರುಬ್ಬಿಕೊಳ್ಳಿ. ಬಾಣಲೆಯಲ್ಲಿ 2-3 ಚಮಚ ಎಣ್ಣೆ ಬಿಸಿ ಮಾಡಿ. ಇದಕ್ಕೆ ಒಗ್ಗರಣೆ ಕೊಟ್ಟು ನೈಲಾನ್‌ ಎಳ್ಳು, ಜೀರಿಗೆ, ಸೋಂಪು ಹಾಕಿ ಚಟಪಟಾಯಿಸಿ. ಹೆಚ್ಚಿದ ಈರುಳ್ಳಿ, ಸೊಪ್ಪು ಬಾಕಿ ಬಾಡಿಸಿ. ಆಮೇಲೆ ಬೆಂದ ಕಾರ್ನ್ ಹಾಕಿ ಕೆದಕಿ, ರುಬ್ಬಿದ ಮಿಶ್ರಣ ಸೇರಿಸಿ, ಮಂದ ಉರಿಯಲ್ಲಿ ಸತತ ಕೈಯಾಡಿಸಿ. ಕೊನೆಯಲ್ಲಿ ಉಪ್ಪು, ಮೆಣಸು, ಚಾಟ್‌ಮಸಾಲ ಹಾಕಿ ಎಲ್ಲ ಚೆನ್ನಾಗಿ ಬೆರೆತುಕೊಳ್ಳುವಂತೆ ಮಾಡಿ ಕೆಳಗಿಳಿಸಿ. ಬಿಸಿ ಇರುವಾಗಲೇ ಇದನ್ನು ಬಿಸಿ ಅನ್ನ, ಚಪಾತಿ ಜೊತೆ ಸೇವಿಸಬೇಕು.
ಕಾರ್ನ್ ಪನೀರ್‌ ರೋಲ್
ಮೂಲ ಸಾಮಗ್ರಿ : 1 ಕಪ್‌ ಬೆಂದ ಕಾರ್ನ್, ಅರ್ಧ ಕಪ್‌ ಪನೀರ್‌ ಕ್ಯೂಬ್ಸ್, ಹೆಚ್ಚಿದ 1 ಈರುಳ್ಳಿ, 1 ಸಣ್ಣ ಚಮಚ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಟೊಮೇಟೊ ಕೆಚಪ್‌, ಗರಂಮಸಾಲ, ಧನಿಯಾಪುಡಿ, ಮೆಣಸು, 4-5 ಚಮಚ ಎಣ್ಣೆ, ಒಂದಿಷ್ಟು ಹೆಚ್ಚಿದ ಕೊ.ಸೊಪ್ಪು.
ಚಪಾತಿಗಾಗಿ ಸಾಮಗ್ರಿ : 1 ಕಪ್‌ ಮೈದಾ, ಹೆಚ್ಚಿದ 1 ಸಣ್ಣ ಈರುಳ್ಳಿ, 4 ಚಮಚ ರೀಫೈಂಡ್‌ ಆಯಿಲ್, ತುಸು ಉಪ್ಪು.
ವಿಧಾನ : ಮೊದಲು ಮೈದಾ ಹಿಟ್ಟಿಗೆ ತುಸು ಉಪ್ಪು ಸೇರಿಸಿ, ನೀರು ಚಿಮುಕಿಸಿ ಮೃದುವಾದ ಹಿಟ್ಟು ಕಲಸಿ, ಎಣ್ಣೆ ಬೆರೆಸಿ ಚೆನ್ನಾಗಿ ನಾದಿ ನೆನೆಯಲು ಬಿಡಿ. ಅದೇ ಸಮಯದಲ್ಲಿ ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ ಹೆಚ್ಚಿದ ಈರುಳ್ಳಿ ಹಾಕಿ ಬಾಡಿಸಿ. ಆಮೇಲೆ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಹಾಕಿ ಕೆದಕಬೇಕು. ಆಮೇಲೆ ಎಲ್ಲಾ ಬಗೆಯ ಮಸಾಲೆ, ಉಪ್ಪು ಹಾಕಿ ಬಾಡಿಸಿ. ಪನೀರ್‌, ಬೆಂದ ಕಾರ್ನ್, ಟೊಮೇಟೊ ಕೆಚಪ್‌ ಸೇರಿಸಿ ಕೈಯಾಡಿಸಿ. ಮಂದ ಉರಿಯಲ್ಲಿ ಕೆದಕುತ್ತಾ ಮಿಶ್ರಣ ಜುಣಕದಂತೆ ತುಸು ಗಟ್ಟಿಯಾಗುವಂತೆ ಮಾಡಿ. ಇದರ ಮೇಲೆ ಕೊ.ಸೊಪ್ಪು ಉದುರಿಸಿ ಕೆಳಗಿಳಿಸಿ ಆರಲು ಬಿಡಿ. ನೆನೆದ ಹಿಟ್ಟಿನಿಂದ ಸಣ್ಣ ಉಂಡೆ ಮಾಡಿ ದಪ್ಪ ಚಪಾತಿ ಲಟ್ಟಿಸಿ. ಇದರ ಮೇಲೆ ತುಸು ಎಣ್ಣೆ ಸವರಿ, ತುಸು ಕಾರ್ನ್ ಮಿಶ್ರಣ, ಅದರ ಮೇಲೆ ಹೆಚ್ಚಿದ ಈರುಳ್ಳಿ ಉದುರಿಸಿ. ಈ ಚಪಾತಿಯನ್ನು ರೋಲ್ ಮಾಡಿ, ಅಂಚು ಬಿಡದಂತೆ ಒದ್ದೆ ಕೈಯಿಂದ ಒತ್ತಿ ಅಂಟಿಸಿಬಿಡಿ. ತವಾ ಬಿಸಿಯಾದಾಗ ಎಣ್ಣೆ ಹಾಕಿ, ಇದನ್ನು ಉದ್ದಕ್ಕೆ ಇರಿಸಿ, ಎಲ್ಲಾ ಬದಿ ತಿರುವಿ ಹಾಕುತ್ತಾ ಹದನಾಗಿ ಬೇಯಿಸಿ. ಕೆಳಗಿಳಿಸಿ ಚಿತ್ರದಲ್ಲಿರುವಂತೆ ತುಂಡರಿಸಿ, ಟೊಮೇಟೊ ಸಾಸ್‌, ಪುದೀನಾ ಚಟ್ನಿ ಜೊತೆ ಸವಿಯಲು ಕೊಡಿ.
ಕಾರ್ನ್ ದಾಲ್‌ ಬಾಲ್ಸ್
ಸಾಮಗ್ರಿ : ಅರ್ಧರ್ಧ ಕಪ್‌ ಬೆಂದ ಕಾರ್ನ್, ನೆನೆಸಿದ ಹೆಸರುಕಾಳು, ಮೈದಾ, ಬ್ರೆಡ್‌ ಕ್ರಂಬ್ಸ್, 2 ಹಸಿ ಮೆಣಸು, 1 ತುಂಡು ಶುಂಠಿ, 1 ಬಾಳೇಕಾಯಿ, ಒಂದಿಷ್ಟು ಹೆಚ್ಚಿದ ಕೊ.ಸೊಪ್ಪು, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ಇಂಗು, ಕರಿಯಲು ಎಣ್ಣೆ.
ವಿಧಾನ : ಹೆಸರುಕಾಳನ್ನು 1 ಸೀಟಿ ಬರುವಂತೆ ಲಘುವಾಗಿ ಬೇಯಿಸಿ. ಆರಿದ ಮೇಲೆ ಇದಕ್ಕೆ ಬೆಂದ ಕಾರ್ನ್, ಹಸಿ ಮೆಣಸು, ಶುಂಠಿ, ಉಪ್ಪು, ಕಾಳುಮೆಣಸು ಎಲ್ಲಾ ಸೇರಿಸಿ ತರಿತರಿಯಾಗಿ ತಿರುವಿಕೊಳ್ಳಿ. ಬಾಳೇಕಾಯಿ ಬೇಯಿಸಿ, ಸಿಪ್ಪೆ ಹೆರೆದು, ಮ್ಯಾಶ್‌ ಮಾಡಿ ಈ ಮಿಶ್ರಣಕ್ಕೆ ಸೇರಿಸಿ. ಇದನ್ನು ವಡೆಗಳಂತೆ ತುಸು ಗುಂಡಗೆ ತಟ್ಟಿ, ಮೈದಾ ಮಿಶ್ರಣದಲ್ಲಿ ಅದ್ದಬೇಕು. (ಅದಕ್ಕೆ ಮೈದಾ, ಉಪ್ಪು, ಮೆಣಸು, ನೀರು ಬೆರೆಸಿ ಬೋಂಡ ಹಿಟ್ಟಿನಂತೆ ಮಾಡಿ.) ನಂತರ ಅದನ್ನು ಬ್ರೆಡ್‌ ಕ್ರಂಬ್ಸ್ ನಲ್ಲಿ ಹೊರಳಿಸಿ, ಕಾದ ಎಣ್ಣೆಯಲ್ಲಿ ಹೊಂಬಣ್ಣಕ್ಕೆ ಕರಿದು, ಚಿತ್ರದಲ್ಲಿರುವಂತೆ ಚೆರ್ರಿ ಹಣ್ಣಿಗೆ ಟೂಥ್‌ಪಿಕ್‌ ಸಿಗಿಸಿ, ಸವಿಯಲು ಕೊಡಿ.
ಕಾರ್ನ್ ಮಸಾಲಾ ಪಾಪಡ್‌
ಸಾಮಗ್ರಿ : 1 ಕಪ್‌ ಬೆಂದ ಕಾರ್ನ್, 3-4 ಹಪ್ಪಳ, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ಚಾಟ್‌ಮಸಾಲ, ಬೆಣ್ಣೆ, ನಿಂಬೆರಸ, ಹುಳಿಸಿಹಿ ಸೀಡ್ಲೆಸ್‌ ದಾಳಿಂಬೆ ಹರಳು, ತುಸು ಕೊ.ಸೊಪ್ಪು.
ವಿಧಾನ : ಬೆಂದ ಕಾರ್ನ್‌ಗೆ ಉಪ್ಪು, ಮೆಣಸು, ಚಾಟ್‌ ಮಸಾಲ, ದಾಳಿಂಬೆ ಹರಳು, ನಿಂಬೆರಸ ಎಲ್ಲಾ ಬೆರೆಸಿ ಮಿಶ್ರಣ ಮಾಡಿ. ಹಪ್ಪಳವನ್ನು ಅರ್ಧ ಭಾಗ ಮುರಿದು ಬೆಣ್ಣೆ ಸವರಿ, ಒಲೆಯ ಮೇಲೆ ಸುಟ್ಟು, ಜೋಪಾನವಾಗಿ ತಕ್ಷಣ ಕೋನ್‌ ಆಕಾರದಲ್ಲಿ ಮಡಿಚಿ ಅದಕ್ಕೆ ಈ ಮಿಶ್ರಣ ತುಂಬಿಸಿ, ಮೇಲೆ ಕೊ.ಸೊಪ್ಪು ಉದುರಿಸಿ ಸವಿಯಲು ಕೊಡಿ
TAGS :
