ನ್ಯೂಡ್‌ ಮೇಕಪ್‌ ಲುಕ್ಸ್ ಪಡೆಯಲು ನೀವು ಹೆಚ್ಚು ಶ್ರಮಪಡಬೇಕಿಲ್ಲ. ಕನಿಷ್ಠ ಮೇಕಪ್‌ ಪ್ರಾಡಕ್ಟ್ ಗಳನ್ನು ಬಳಸಿ ಮೇಕಪ್‌ನ ಲೈಟ್‌ಶೇಡ್ಸ್ ನಿಂದ ಅತ್ಯಂತ ಕಡಿಮೆ ಸಮಯದಲ್ಲಿ ನೀವು ನ್ಯೂಡ್‌ ಮೇಕಪ್‌ ಲುಕ್ಸ್ ಪಡೆಯಬಹುದು. ಇದು ಕ್ಲಾಸೀ ಮತ್ತು ಸೊಫಿಸ್ಟಿಕೇಟೆಡ್‌ ಆಗಿ ಕಾಣಿಸುತ್ತದೆ. ವಿಶೇಷ ಸಂದರ್ಭಗಳಿಗಲ್ಲದೆ ಇದನ್ನು ಅಫಿಶಿಯಲ್ ಮೀಟಿಂಗ್ಸ್ ಮತ್ತು ದಿನನಿತ್ಯದ ವ್ಯವಹಾರದ ಸಂದರ್ಭಗಳಲ್ಲೂ ಮಾಡಿಕೊಳ್ಳಬಹುದು. ನ್ಯೂಡ್‌ ಮೇಕಪ್‌ ಲುಕ್ಸ್ ಕೆಲವು ವಿಶೇಷ ಟ್ರಿಕ್ಸ್ ಬಗ್ಗೆ ತಿಳಿದುಕೊಳ್ಳೋಣ :
ಸ್ಕಿನ್‌ ಕೇರ್‌ ರೊಟೀನ್‌
ನ್ಯೂಡ್‌ ಮೇಕಪ್‌ ಲುಕ್‌ಗಾಗಿ ಮೇಕಪ್‌ನ ಡಾರ್ಕ್‌ ಶೇಡ್ಸ್ ಬಳಸಲಾಗುವುದಿಲ್ಲ. ಹೀಗಾಗಿ ಮುಖದ ಸಹಜ ರೂಪ ಎದ್ದು ತೋರುತ್ತದೆ. ಆದ್ದರಿಂದ ಚರ್ಮ ಆಂತರ್ಯದಲ್ಲಿ ಆರೋಗ್ಯಕರ ಮತ್ತು ಬಾಹ್ಯದಲ್ಲಿ ಕೋಮಲ ಮತ್ತು ಕಲೆರಹಿತವಾಗಿಯೂ ಇರುವುದು ಅಗತ್ಯ. ಇದಕ್ಕಾಗಿ ನೀವು ನಿಯಮಿತವಾಗಿ ಕ್ಲೆನ್ಸಿಂಗ್‌, ಟೋನಿಂಗ್‌, ಮಾಯಿಶ್ಚರೈಸಿಂಗ್‌ ಮತ್ತು ಸ್ಕ್ರಬಿಂಗ್ ಮಾಡಬೇಕು. ಇದರಿಂದ ಚರ್ಮ ಆರೋಗ್ಯಕರವಾಗಿದ್ದು ನ್ಯೂಡ್‌ ಮೇಕಪ್‌ ಲುಕ್‌ ಚೆನ್ನಾಗಿ ಕಾಣುತ್ತದೆ.
ಟಿಂಟ್‌ ಮಾಯಿಶ್ಚರೈಸರ್‌
ಮೊದಲು ಫೇಸ್‌ವಾಶ್‌ನಿಂದ ಮುಖ ತೊಳೆದು ಒರೆಸಿಕೊಳ್ಳಿ. ನಂತರ ಲೈಟ್‌ ಅಥವಾ ಟಿಂಟ್‌ ಮಾಯಿಶ್ಚರೈಸರ್‌ನ್ನು ಪೂರ್ತಿ ಮುಖಕ್ಕೆ ಹಚ್ಚಿ ಹಗುರವಾಗಿ ಕೈನಿಂದ ಮಾಯಿಶ್ಚರೈಸ್‌ ಮಾಡಿ. ಈಗ ಕಣ್ಣಿನ ಹತ್ತಿರ ಐ ಕ್ರೀಮ್ ಹಚ್ಚಿ. ಇದು ಸೆಟ್‌ ಆಗಲು ಸ್ವಲ್ಪ ಹೊತ್ತು ಬಿಡಿ.
ಲೈಟ್‌ ಫೌಂಡೇಶನ್‌
ಈಗ ಲೈಟ್‌ ಫೌಂಡೇಶನ್‌ ತೆಗೆದುಕೊಳ್ಳಿ. ಇದು ನ್ಯಾಚುರಲ್ ಲುಕ್‌ ನೀಡುತ್ತದೆ. ಬ್ರಶ್‌ನ ಸಹಾಯದಿಂದ ಇದನ್ನು ಪೂರ್ತಿ ಮುಖಕ್ಕೆ ಹತ್ತಿ ಮೇಕಪ್‌ ಬೇಸ್‌ ಸಿದ್ಧಪಡಿಸಿಕೊಳ್ಳಿ. ಒಂದು ಕೋಟ್‌ ಫೌಂಡೇಶನ್‌ನಿಂದಲೇ ಮುಖ ಪೂರ್ತಿ ಕವರ್‌ ಆಗುವಂತೆ ನೋಡಿಕೊಳ್ಳಿ. ಎರಡು ಕೋಟ್‌ ಫೌಂಡೇಶನ್‌ನಿಂದ ಮೇಕಪ್‌ ಹೆವಿ ಆಗಿ ಕಾಣುತ್ತದೆ ಮತ್ತು ಮೇಕಪ್‌ನ ಲೈಟ್‌ ಶೇಡ್‌ ಮಂಕಾಗಿ ತೋರುತ್ತದೆ.
ಟ್ರಾನ್ಸ್ ಲೂಸೆಂಟ್‌ ಪೌಡರ್‌
ನಿಮ್ಮ ಮೇಕಪ್‌ ಹೆಚ್ಚು ಕಾಲ ಉಳಿಯಬೇಕೆಂದು ಬಯಸುವಿರಾದರೆ, ಮಾಯಿಶ್ಚರೈಸರ್‌ ಮತ್ತು ಫೌಂಡೇಶನ್‌ನ ನಂತರ ಮುಖ ಮತ್ತು ಕುತ್ತಿಗೆಗೆ ಸ್ಪಾಂಜ್‌ನ ಸಹಾಯದಿಂದ ಹಗುರವಾಗಿ ಟ್ರಾನ್ಸ್ ಲೂಸೆಂಟ್‌ ಪೌಡರ್‌ ಹಚ್ಚಿ. ಇದರಿಂದ ಬೇಸ್‌ ಮೇಕಪ್‌ಗೆ ಸ್ಮೂತ್‌ ಟಚ್‌ ದೊರೆತು ಮೇಕಪ್‌ ನ್ಯಾಚುರಲ್ ಆಗಿ ಕಾಣುತ್ತದೆ. ಪೌಡರ್‌ ಹಚ್ಚಿರುವುದು ಹೆಚ್ಚಾದರೆ, ಅದನ್ನು ಕಡಿಮೆ ಮಾಡಲು ಇನ್ನೊಮ್ಮೆ ಮಾಯಿಶ್ಚರೈಸರ್‌ ಹಚ್ಚಿ.
ಬ್ರಾಂಝರ್‌ ಸ್ಪ್ರೇ ಬೇಸ್‌
ಮೇಕಪ್‌ಗೆ ಫೈನಲ್ ಟಚ್‌ ನೀಡಲು ಬ್ರಾಂಝರ್‌ ಸ್ಪ್ರೇ ಬಳಸಲು ಮರೆಯಬೇಡಿ. ನ್ಯಾಚುರಲ್ ಲುಕ್‌ಗಾಗಿ ಪೀಚ್‌, ಲೈಟ್‌ ಪಿಂಕ್ ಅಥವಾ ರೋಸಿ ಪಿಂಕ್ ಶೇಡ್‌ನ ಬ್ರಾಂಝರ್‌ ಬಳಸಿ. ಇದನ್ನು ಹಣೆ, ಮೂಗು, ಚೀಕ್‌, ಚಿನ್‌ ಮತ್ತು ಕುತ್ತಿಗೆಯ ಮೇಲೆ ಸ್ಪ್ರೇ ಮಾಡಿ, ಬ್ರಶ್‌ನ ಸಹಾಯದಿಂದ ಚೆನ್ನಾಗಿ ಹರಡುವಂತೆ ನೋಡಿಕೊಳ್ಳಿ. ಇದರಿಂದ ಚರ್ಮದಲ್ಲಿ ನ್ಯಾಚುರಲ್ ಗ್ಲೋ ಇರುತ್ತದೆ ಮತ್ತು ಮೇಕಪ್‌ ಹೆಚ್ಚು ಕಾಲ ಉಳಿಯುತ್ತದೆ.
ಲೈಟ್‌ ಐ ಶ್ಯಾಡೊ
ಬೇಸ್‌ ಮೇಕಪ್‌ ಚೆನ್ನಾಗಿ ಸೆಟ್‌ ಆದ ಮೇಲೆ ಐ ಶ್ಯಾಡೋನಿಂದ ಐ ಮೇಕಪ್‌ ಪ್ರಾರಂಭಿಸಿ. ಇದಕ್ಕಾಗಿ ಐ ಶ್ಯಾಡೋದ ನ್ಯೂಡ್‌ ಶೇಡ್‌ಗಳಾದ ಗ್ರೇ, ಪೀಚ್‌, ಐವರಿ, ಶಾಂಪೇನ್‌, ಬೇಬಿ ಪಿಂಕ್, ಬೇಜ್‌, ಕಾಪರ್‌ ಮುಂತಾದವನ್ನು ಆರಿಸಿಕೊಳ್ಳಿ. ಐ ಶ್ಯಾಡೋವನ್ನು ಕಣ್ಣೆವೆಯ ಮೇಲೆ ಚೆನ್ನಾಗಿ ಹಚ್ಚಿ.
ಥಿನ್‌ ಐ ಲೈನರ್‌
ಕಲರ್‌ ಫುಲ್ ಐ ಲೈನರ್‌ ಬದಲು ಬ್ರೌನ್‌ ಶೇಡ್‌ನ ಐ ಲೈನರ್‌ ಆರಿಸಿಕೊಳ್ಳಿ. ತೆಳುವಾದ ಲೈನ್‌ ಎಳೆಯುತ್ತಾ ಐ ಲೈನರ್‌ನ ಸಿಂಗಲ್ ಕೋಟ್‌ ಹಚ್ಚಿ. ಕಣ್ಣಿನ ಮುಂಭಾಗದ ಕೊನೆಯಿಂದ ಐ ಲೈನರ್‌ ಪ್ರಾರಂಭಿಸಿ ಐ ಕಾರ್ನರ್‌ವರೆಗೆ ಹಚ್ಚಿರಿ. ಇದನ್ನು ಮೇಲೆ ಅಥವಾ ಕೆಳಗಡೆಗೆ ತಿರುಗಿಸುವುದು ಅಥವಾ ಫಿಶ್‌ ಕಟ್‌ ಸ್ಟೈಲ್ ಮಾಡುವುದು ಬೇಡ.
ಬ್ರೌನ್‌ ಮಸ್ಕರಾ
ಐ ಲ್ಯಾಶಸ್ ಲೈನ್‌ನ್ನು ಡಿಫೈನ್‌ ಮಾಡಲು ಬ್ರೌನ್‌ ಶೇಡ್‌ನ ಐ ಪೆನ್ಸಿಲ್ ಬಳಸಿ ಅಥವಾ ಐ ಲ್ಯಾಶೆಸ್‌ನ್ನು ಹೈಲೈಟ್‌ ಮಾಡಲು ಬ್ರೌನ್‌ ಮಸ್ಕರಾದ ಸಿಂಗಲ್ ಕೋಟ್‌ ಹಚ್ಚಿ. ಡಬಲ್ ಕೋಟ್‌ ಅಥವಾ ಕಲರ್‌ ಫುಲ್ ಮಸ್ಕರಾ ಹಚ್ಚುವ ತಪ್ಪನ್ನು ಮಾಡಬೇಡಿ.
ಡಿಫೈನ್‌ ಐ ಬ್ರೋಸ್‌
ನ್ಯೂಡ್‌ ಮೇಕಪ್‌ ಮಾಡುವಾಗ ಐ ಬ್ರೋಸ್‌ನ್ನು ನಿರ್ಲಕ್ಷಿಸಬೇಡಿ. ಇವುಗಳನ್ನು ಡಿಫೈನ್‌ ಮಾಡಲು ಬ್ರೋ ಬ್ರಶ್‌ನ ಸಹಾಯದಿಂದ ಐ ಶ್ಯಾಡೋವನ್ನು ಐ ಬ್ರೋಸ್‌ಗೆ ಹಚ್ಚಿ. ಈಗ ಐ ಬ್ರೋಸ್‌ ಟೋನ್‌ನ್ನು ಹೈಲೈಟ್‌ ಮಾಡಲು ಕ್ರೀಮ್ ಕಲರ್‌ ಐ ಶ್ಯಾಡೊ ಹಚ್ಚಿ. ಇದರಿಂದ ನಿಮ್ಮ ಐ ಬ್ರೋಸ್‌ ಎದ್ದು ಕಾಣುತ್ತದೆ.
ಲಿಪ್‌ಸ್ಟಿಕ್‌ ಶೇಡ್‌
ಸಾಧಾರಣವಾಗಿ ಮೇಕಪ್‌ ಮಾಡುವಾಗ ಲಿಪ್‌ ಲೈನರ್‌ ನಂತರ ಲಿಪ್‌ಸ್ಟಿಕ್‌ ಹಚ್ಚಲಾಗುತ್ತದೆ. ಆದರೆ ನ್ಯೂಡ್‌ ಮೇಕಪ್‌ನಲ್ಲಿ ಮೊದಲು ಲಿಪ್‌ಸ್ಟಿಕ್‌ ಹಚ್ಚಿ. ನಂತರ ಲಿಪ್‌ ಲೈನರ್‌ನಿಂದ ತುಟಿಗಳನ್ನು ಪರ್ಫೆಕ್ಟ್ ಡಿಫೈನ್‌ ಮಾಡಿ. ಕಡೆಯಲ್ಲಿ ಲೈಟ್‌ ಶೇಡ್‌ನ ಲಿಪ್‌ ಗ್ಲಾಸ್‌ ಹಚ್ಚಿ ಲಿಪ್‌ ಮೇಕಪ್‌ನ್ನು ಪೂರ್ಣಗೊಳಿಸಿ. ನೀವು ಗೌರವರ್ಣದವರಾಗಿದ್ದರೆ ಪಿಂಕ್ ಅಥವಾ ಬೇಜ್‌, ಶ್ಯಾಮಲ ವರ್ಣದವರಾದರೆ ಬ್ರಾಂಝ್ ಹಾಗೂ ಗೋಧಿ ಬಣ್ಣದವರಾದರೆ ಮೋವ್ ಲಿಪ್‌ ಕಲರ್ಸ್ ಆರಿಸಿಕೊಳ್ಳಿ. ಡಾರ್ಕ್‌, ಡ್ರೈ ಅಥವಾ ಗ್ಲಾಸೀ ಲಿಪ್‌ಸ್ಟಿಕ್‌ ಆರಿಸಿಕೊಳ್ಳಬೇಡಿ. ನ್ಯೂಡ್‌ ಲುಕ್‌ಗೆ ಕ್ರೀಮೀ ಲಿಪ್‌ಸ್ಟಿಕ್‌ ಸೂಕ್ತವಾಗಿರುತ್ತದೆ.
ಬ್ಲಶ್‌ ಆನ್‌
ಕಣ್ಣು ಮತ್ತು ತುಟಿಗಳ ಮೇಕಪ್‌ ಚೆನ್ನಾಗಿ ಸೆಟ್‌ ಆದ ನಂತರ ಬ್ಲಶ್‌ ಆನ್‌ನಿಂದ ಚೀಕ್‌ ಬೋನ್‌ನ್ನು ಹೈಲೈಟ್‌ ಮಾಡಿ. ಇದಕ್ಕಾಗಿ ನ್ಯೂಟ್ರಲ್ ಶೇಡ್‌ನ ಜೆಲ್ ಬೇಸ್ಡ್ ಚೀಕ್‌ ಟಿಂಟ್‌ ಅಥವಾ ಪೌಡರ್‌ ಬ್ಲಶರ್‌ ಆರಿಸಿಕೊಳ್ಳಿ. ಇದರಿಂದ ಮೇಕಪ್‌ ನ್ಯಾಚುರಲ್ ಆಗಿ ಕಾಣುತ್ತದೆ. ಪೇಸ್ಟಲ್ ಶೇಡ್‌ನ ಬ್ಲಶರ್‌ನ್ನೂ ಆರಿಸಿಕೊಳ್ಳಬಹುದು. ಬ್ಲಶ್‌ ಆನ್‌ನ್ನು ಬ್ರಶ್‌ನ ಸಹಾಯದಿಂದ ಕೆನ್ನೆಯ ಮುಂಭಾಗದಿಂದ ಪ್ರಾರಂಭಿಸಿ ಹೇರ್‌ ಲೈನ್‌ವರೆಗೆ ಹಚ್ಚುತ್ತಾ ಹೋಗಿ. ಇದರಿಂದ ಪರ್ಫೆಕ್ಟ್ ಲುಕ್‌ ದೊರೆಯುತ್ತದೆ.
– ಪಿ. ಪೂರ್ಣಿಮಾ
