ಆಧುನಿಕ ತಾಯಂದಿರ ದೊಡ್ಡ ಕಷ್ಟವೆಂದರೆ ಮಕ್ಕಳಿಗಾಗಿ ಶಾಲೆಯ ಟಿಫನ್‌. ದಿನಕ್ಕೊಂದು ಬಗೆಯಲ್ಲಿ ಏನು ತುಂಬಿಸಿ ಕೊಡುವುದು ಅಂತ. ಬಾಯಿ ಚಪಲಕ್ಕಾಗಿ 1-2 ದಿನ ಏನೋ ಹಾಕಿಕೊಡಬಹುದು, ಆದರೆ ದಿನದಿನ ಅದೇ ಮಾಡಿದರೆ ಸರಿಹೋಗದು. ಮಕ್ಕಳಿಗಾಗಿ ಇಂಥ ಬೆಳಗಿನ ಉಪಾಹಾರ ಸ್ವಾದಿಷ್ಟ ಮತ್ತು ಪೌಷ್ಟಿಕ ಎರಡೂ ಆಗಿರಬೇಕಾದುದು ಅನಿವಾರ್ಯ.
ದಿನ ತೋಚಿದ್ದನ್ನು ಏನೋ ಒಂದು ಮಾಡಿಕೊಟ್ಟು ಕಳಿಸಿದ ಮೇಲೆ ಶಾಲೆಯಿಂದ ಮಕ್ಕಳು ಮನೆಗೆ ಮರಳಿದಾಗ ಅವರ ಸ್ಕೂಲ್‌ಬ್ಯಾಗ್‌ ತೆರೆದು ಅದನ್ನು ಪೂರ್ತಿ ತಿಂದರಾ ಇಲ್ಲವಾ ಎಂದು ನೋಡುವುದೇ ದೊಡ್ಡ ಕೆಲಸ ಆಗಿಬಿಡುತ್ತದೆ. ಎಷ್ಟೋ ಸಲ ಕೊಟ್ಟು ಕಳುಹಿಸಿದ ಟಿಫನ್‌ನಲ್ಲಿ ಅರ್ಧ ಭಾಗ ಹಾಗೇ ವಾಪಸ್ಸು ಬಂದಿರುತ್ತದೆ. ನಮ್ಮ ಪರಿಶ್ರಮ ಹಾಗೂ ಅರೆಬರೆ ತಿಂಡಿ ಪರಿಣಾಮವಾಗಿ ಹಾಳಾಗುತ್ತಿರುವ ಮಕ್ಕಳ ಆರೋಗ್ಯದ ಚಿಂತೆ, ತಾಯಂದಿರನ್ನು ಹೆಚ್ಚಿನ ಟೆನ್ಶನ್‌ಗೆ ಗುರಿ ಮಾಡುತ್ತದೆ.
ನೀವು ನಿಮ್ಮ ಮುದ್ದು ಮಕ್ಕಳ ಟಿಫನ್‌ ಬಾಕ್ಸಿಗೆ ಆರೋಗ್ಯಕರ, ಅಷ್ಟೇ ರುಚಿಕರವಾದ ಡಿಶೆಸ್‌ ಬೇಕೆಂದು ಬಯಸುತ್ತೀರಲ್ಲವೇ? ನಿಮ್ಮ ಮಕ್ಕಳ ಅಭಿರುಚಿ ಯಾವ ಕಡೆಗಿದೆ ಎಂಬುದನ್ನು ಮೊದಲು ಗಮನಿಸಿಕೊಳ್ಳಿ. ನೆನಪಿಡಿ, ಪ್ರತಿದಿನ ಒಂದೇ ಬಗೆಯ ಡಿಶ್‌ ಮಾಡಿ ಕಳುಹಿಸುವುದರಿಂದ ಮಕ್ಕಳಿಗೆ ಬೋರ್‌ ಎನಿಸಿ ಅವರು ಅದನ್ನು ತಿನ್ನದೆ, ಅರ್ಧ ಪಾಲು ಹಾಗೇ ಉಳಿಸಿಕೊಂಡು ಬರುತ್ತಾರೆ. ಹೈಸ್ಕೂಲ್‌ ಮಟ್ಟದ ವಿದ್ಯಾರ್ಥಿಗಳಾದರೆ, ನಿರ್ದಾಕ್ಷಿಣ್ಯವಾಗಿ ಇದನ್ನು ಒತ್ತರಿಸಿ, ಶಾಲೆಯ ಕ್ಯಾಂಟೀನಿನ ಪಿಜ್ಜಾ ಬರ್ಗರ್‌ ಮೆದ್ದು ಬರುತ್ತಾರೆ. ಆದ್ದರಿಂದ ಟಿಫನ್‌ ಬಾಕ್ಸಿನಲ್ಲಿ ದಿನೇ ದಿನೇ ಅದೇ ಉಪ್ಪಿಟ್ಟು, ಅವಲಕ್ಕಿ, ಇಡ್ಲಿ ಇತ್ಯಾದಿ ನೋಡಿ ಮಕ್ಕಳು ಮುಖ ಸಿಂಡರಿಸುವುದರಲ್ಲಿ ಆಶ್ಚರ್ಯವಿಲ್ಲ. ಚಪಾತಿ ಆಲೂ ಪಲ್ಯ ಇಷ್ಟ ನಿಜ, ಹಾಗೇಂತ ದಿನ ಅದನ್ನೇ ಕೊಡಲಾದೀತೇ? ಹೀಗೆ ವಾಪಸ್ಸು ಬರುವ ತಿಂಡಿಗಳನ್ನು ಗಮನಿಸಿ ನಿಮ್ಮ ಪರಿಶ್ರಮವೆಲ್ಲ ವ್ಯರ್ಥವಾಯಿತಲ್ಲ ಎಂದು ಒಂದೆಡೆ ಚಿಂತೆಯಾದರೆ, ಮಕ್ಕಳ ಆರೋಗ್ಯ ಹದಗೆಡುತ್ತದಲ್ಲ ಎಂಬುದು ಮತ್ತೊಂದು ದೊಡ್ಡ ಚಿಂತೆಯಾಗುತ್ತದೆ.
ಹಾಗೇಂತ ಮಕ್ಕಳು ಅಲ್ಲಿ ಇಲ್ಲಿ ಎಲ್ಲೋ ಒಂದಿಷ್ಟು ತಿಂದಿದ್ದು ನೋಡಿಕೊಂಡು ಬಂದದ್ದನ್ನೆಲ್ಲ ಮನೆಯಲ್ಲಿ ಮಾಡಿಕೊಡಲು ಸಾಧ್ಯ ಆಗುವುದಿಲ್ಲ. ಹಾಗಾಗಿಯೇ ಇಲ್ಲಿನ ಕೆಲವು ಸಲಹೆ ಅನುಸರಿಸಿ, ಮಕ್ಕಳಿಗೆ ಪೌಷ್ಟಿಕ ಸ್ವಾದಿಷ್ಟ ಡಿಶೆಸ್‌ ತಯಾರಿಸಿ ಕೊಡಿ.
ಪೌಷ್ಟಿಕ ದೋಸೆ : ಇನ್‌ಸ್ಟೆಂಟ್‌ ದೋಸೆ ತಯಾರಿಸಬೇಕು ಅಂತ ಕಡಲೆಹಿಟ್ಟಿಗೆ ಮೊಸರು ಬೆರೆಸಿ ನೆನೆಸುತ್ತೀರಿ ಅಲ್ಲವೇ? ಈ ಬಾರಿ ಅದರ ಬದಲು ಮಲ್ಟಿಗ್ರೇನ್‌ ಅಂದ್ರೆ ಮಿಶ್ರ ಹಿಟ್ಟುಗಳ ದೋಸೆ ತಯಾರಿಸಿ. ಇದಕ್ಕಾಗಿ ತಲಾ ಅರ್ಧರ್ಧ ಕಪ್‌ ಅಕ್ಕಿಹಿಟ್ಟು, ರಾಗಿಹಿಟ್ಟು, ಗೋಧಿಹಿಟ್ಟು, ಮೈದಾ, ಕಡಲೆಹಿಟ್ಟು, ಹುರಿದ ರವೆ, ಓಟ್ಸ್, ನೆನೆಸಿ ರುಬ್ಬಿದ ಹೆಸರುಕಾಳು, ಹಸಿ ಬಟಾಣಿ ಇತ್ಯಾದಿ ಎಲ್ಲಾ ಬೆರೆಸಿಕೊಳ್ಳಿ. ಇದಕ್ಕೆ 1 ಕಪ್‌ ಮೊಸರು, 1 ಚಮಚ ಉಪ್ಪು, ತುಸು ಇಂಗು, ಜೀರಿಗೆ ಎಲ್ಲಾ ಸೇರಿಸಿ. ಜೊತೆಗೆ ಸಣ್ಣಗೆ ಹೆಚ್ಚಿದ 1 ಅಥವಾ 2 ಹಸಿಮೆಣಸು, ಕೊ.ಸೊಪ್ಪು, ಕರಿಬೇವು ಇತ್ಯಾದಿ ಹಾಕಿಡಿ. ಇದು 1 ತಾಸು ನೆನೆಯಲು ಬಿಡಿ. ನಂತರ ಮಕ್ಕಳಿಗೆ ತುಪ್ಪ ಹಾಕಿ, ಹಿರಿಯರಿಗೆ ಎಣ್ಣೆ ಹಾಕಿ ದೋಸೆ ತಯಾರಿಸಿ. ಗರಿಗರಿಯಾಗಿ, ಪೌಷ್ಟಿಕವಾದ ಈ ದೋಸೆ ಮಕ್ಕಳಿಗೂ ಇಷ್ಟವಾಗುತ್ತದೆ. ಅವರು ಬಯಸುವಂಥ ಸ್ವೀಟ್‌ ಸಾರ್‌ ಸಾಸ್‌ ಜೊತೆಗಿರಲಿ.
ಸ್ವೀಟ್‌ ವೈಟ್‌ ಅಂಜೂರ : ಮಕ್ಕಳು ಅಂದ ಮೇಲೆ ಸಿಹಿ ಇಷ್ಟಪಡದೆ ಇರುತ್ತಾರಾ? ಆದರೆ ಸಿಹಿ ಕೆಟ್ಟದ್ದು, ಸದಾ ಕೊಡಬಾರದು ಎಂದು ಎಲ್ಲರಿಗೂ ಗೊತ್ತಿದೆ. ಮಕ್ಕಳು ಹಠ ಹಿಡಿಯುತ್ತಾರಲ್ಲ ಎಂದು ಆಗಾಗ ಸಿಹಿ ಮಾಡಲಾಗದು. ಧಾವಂತಕ್ಕೆ ಬಿದ್ದು ಆರ್ಟಿಫಿಶಿಯಲ್ ಸ್ವೀಟ್‌ನರ್‌ ಬಳಸಬೇಡಿ. ಈ ಕೃತಕ ಸಿಹಿ ಮೂಲಗಳು ನಿಮ್ಮ ತಿನಿಸಿಗೆ ಸಿಹಿ ಏನೋ ಒದಗಿಸುತ್ತವೆ. ಆದರೆ ಮಕ್ಕಳ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತವೆ.
ಬದಲಿಗೆ ನೈಸರ್ಗಿಕವಾದ ಸ್ವೀಟ್‌ ವೈಟ್‌ ಅಂಜೂರ ತಯಾರಿಸಿಕೊಡಿ. ಇದಕ್ಕಾಗಿ ರಾತ್ರಿ ಹಾಲಲ್ಲಿ ನೆನೆಹಾಕಿ ಮಸೆದ ಅಂಜೂರ, ಗಟ್ಟಿ ಹಾಲು, ತೆಂಗಿನ ತುರಿ ಬೆರೆಸಿ ಹಾಲು ಸಂಪೂರ್ಣ ಹಿಂಗುವವರೆಗೂ ಮಂದ ಉರಿಯಲ್ಲಿ ತುಪ್ಪ ಬೆರೆಸುತ್ತಾ ಕೆದಕುತ್ತಿರಿ. ನಂತರ ಕೆಳಗಿಳಿಸಿ ಆರಲು ಬಿಡಿ. ಅಂಜೂರವನ್ನು ಪೇಸ್ಟ್ ಮಾಡಿಕೊಳ್ಳಿ. ಅದೇ ಬಾಣಲೆಗೆ ಇನ್ನಷ್ಟು ತುಪ್ಪ ಹಾಕಿ, ಇದನ್ನು ಸೇರಿಸಿ ಮತ್ತೆ ಕೆದಕಬೇಕು. ಇದಕ್ಕೆ ಹುರಿದ ನೈಲಾನ್‌ ಎಳ್ಳು, ಜೇನುತುಪ್ಪ, ಏಲಕ್ಕಿಪುಡಿ, ತುಪ್ಪದಲ್ಲಿ ಹುರಿದ ದ್ರಾಕ್ಷಿ, ಗೋಡಂಬಿ, ಪಿಸ್ತಾ, ಬಾದಾಮಿ ಚೂರು ಹಾಕಿ ಮತ್ತಷ್ಟು ಕೈಯಾಡಿಸಿ ಕೆಳಗಿಳಿಸಿ. ಚೆನ್ನಾಗಿ ಆರಿದ ನಂತರ ಚಿತ್ರದಲ್ಲಿರುವಂತೆ ಉಂಡೆ ಕಟ್ಟಿ. ಮಾಮೂಲಿ ತಿಂಡಿ ತಯಾರಿಸಿ, ಮಕ್ಕಳು ಅದನ್ನು ಒಲ್ಲೆ ಎಂದಾಗ, ಅವರ ಮನವೊಲಿಸಲು ಜೊತೆಗೆ ಇಂಥ 2 ಉಂಡೆ ಹಾಕಿ ಕಳುಹಿಸಿ.
ಚೀಸೀ ದಲಿಯಾ : ಯಾವ ಮಕ್ಕಳು ತಾನೇ ದಲಿಯಾ (ಬ್ರೋಕನ್‌ವೀಟ್‌)ದಲ್ಲಿ ಮಾಡಿಕೊಟ್ಟ ವ್ಯಂಜನವನ್ನು ಇಷ್ಟಪಟ್ಟು ತಿನ್ನುತ್ತಾರೆ? ಆದ್ದರಿಂದ ಮುಂದಿನ ಸಲ ಖಿಚಡಿ ತಯಾರಿಸುವಾಗ, ಅಕ್ಕಿ ಹಾಕುವ ಬದಲು ದಲಿಯಾ ಬಳಸಿ. ಮಕ್ಕಳು ಇಷ್ಟಪಡುವ ಆಲೂ, ಕ್ಯಾಪ್ಸಿಕಂ, ಟೊಮೇಟೊ ಜೊತೆಗೆ ಪನೀರ್‌ ಕ್ಯೂಬ್ಸ್ ನ್ನು ತುಪ್ಪದಲ್ಲಿ ಹುರಿದು ನಿಮ್ಮ ರೆಗ್ಯುಲರ್‌ ದಲಿಯಾ ಖಿಚಡಿಗೆ ಸೇರಿಸಿ. ಬದಲಾವಣೆಗಾಗಿ ಒಮ್ಮೊಮ್ಮೆ ನ್ಯೂಟ್ರೀಲಾ, ಸೋಯಾ ಕ್ಯೂಬ್ಸ್, ಬ್ರೋಕ್ಲಿ, ಮೊಳಕೆ ಕಟ್ಟಿದ ಕಾಳು ಇತ್ಯಾದಿಗಳನ್ನೂ ಬಳಸಿಕೊಳ್ಳಿ.
ಕಲರ್‌ಫುಲ್ ಪರೋಟ : ಎಂದಿನಂತೆ ಪರೋಟ ಮಾಡುವಾಗ ಗೋಧಿಹಿಟ್ಟಿಗೆ ನೀರು ಬೆರೆಸುವ ಬದಲು ಹಾಲು, ವೆಜಿಟೆಬಲ್ ಸ್ಟಾಕ್‌, ತರಕಾರಿ ಜೂಸ್‌, ತರಕಾರಿ ಪೇಸ್ಟ್, ಪಾಲಕ್‌ ಪೇಸ್ಟ್, ಹೆಚ್ಚಿದ ಮೆಂತೆಸೊಪ್ಪು ಹಾಕಿ ಬಗೆಬಗೆಯ ಬಣ್ಣಗಳಲ್ಲಿ ಮಕ್ಕಳಿಗೆ ಪರೋಟ ತಯಾರಿಸಿ, ಅವರ ನೆಚ್ಚಿನ ಜ್ಯಾಂ ಅಥವಾ ಕೆಚಪ್‌, ಸಾಸ್‌ ಹಾಕಿಕೊಡಿ.
ಪನೀರ್‌ ಪೆಸರೆಟ್ಟು : ಆಂಧ್ರದ ಕಡೆ ನಮ್ಮ ಮಾಮೂಲಿ ದೋಸೆ ಹಿಟ್ಟಿಗೆ ನೆನೆಸಿದ ಹೆಸರುಕಾಳನ್ನು ರುಬ್ಬಿ ದೋಸೆ ತಯಾರಿಸುತ್ತಾರೆ. ಇದುವೇ ಪೆಸರೆಟ್ಟು. ಇದು ಬಣ್ಣ ಹಾಗೂ ಪೌಷ್ಟಿಕತೆಯಿಂದಲೂ ಮಾಮೂಲಿ ದೋಸೆಗಿಂತಲೂ ಮಿಗಿಲು. ಅದೇ ತರಹ ತಮಿಳುನಾಡು ಮೂಲದ ಅಡೆದೋಸೆಗೆ ಅರ್ಧರ್ಧ ಕಪ್‌ ತೊಗರಿ, ಹೆಸರು, ಉದ್ದು, ಕಡಲೆಬೇಳೆಗಳನ್ನು 2 ಕಪ್‌ ಅಕ್ಕಿಯೊಂದಿಗೆ ನೆನೆಸಿ ಒಣ ಮೆಣಸಿನಕಾಯಿ ಹಾಕಿ ರುಬ್ಬಿಕೊಂಡು, ಹೆಚ್ಚು ಹೊತ್ತು ನೆನೆಸದೆ, ರುಬ್ಬಿದ ಅರ್ಧ ಗಂಟೆಗೇ ದೋಸೆ ತಯಾರಿಸಬಹುದು. ಇದುವೇ ಅಡೆದೋಸೆ. ಹೀಗೆ ಮಾಮೂಲಿ ದೋಸೆ ಬದಲು ವಿವಿಧ ರೀತಿ ಟ್ರೈ ಮಾಡಿ. ಎಂದಿನ ದೋಸೆ ಹಿಟ್ಟಿಗೆ ತುರಿದ ಕ್ಯಾರೆಟ್‌, ಹೆಚ್ಚಿದ ಈರುಳ್ಳಿ, ಟೊಮೇಟೊ, ಕ್ಯಾಪ್ಸಿಕಂ, ತುರಿದ ಪನೀರ್‌ ಹೀಗೆ ಬೇರೆ ಬೇರೆ ಬಗೆಯನ್ನು ಬಳಸಿ ಮಕ್ಕಳಿಗೆ ಅತ್ಯಾಕರ್ಷಕ ಬಣ್ಣಗಳಲ್ಲಿ ಪೌಷ್ಟಿಕ ದೋಸೆ ಒದಗಿಸಿ.
ಕಾರ್ನ್‌ ಕಬಾಬ್‌ : ಮೆಕ್ಕೆ ಜೋಳ ಅಥವಾ ಕಾರ್ನ್‌ ಪೌಷ್ಟಿಕ ಗುಣಗಳ ಭಂಡಾರ. ಮಕ್ಕಳಿಗೆ ಇದರ ಲಾಭ ಸಿಗಬೇಕೆಂದರೆ, ಇದನ್ನು ನೀವು ಬೇರೆ ಬೇರೆ ಡಿಶ್‌ಗಳಲ್ಲಿ ಬಳಸಿಕೊಳ್ಳಬೇಕು. ಸಲಾಡ್‌ ಮಾಡುವಾಗ ಸ್ವೀಟ್‌ ಕಾರ್ನ್‌, ಎಂದಿನ ಫ್ರೈಡ್‌ ರೈಸ್‌, ಉಪ್ಪಿಟ್ಟು, ಶ್ಯಾವಿಗೆ ಮಾಡುವಾಗ ಇದನ್ನು ಬೇಯಿಸಿ ಸೇರಿಸಿಕೊಳ್ಳಿ. ಕಬಾಬ್‌ಗಾಗಿ ಇದನ್ನು ಬೇಯಿಸಿ ಮಿಕ್ಸಿಯಲ್ಲಿ ತರಿತರಿಯಾಗಿ ಮಾಡಿಡಿ. ಇದಕ್ಕೆ ಬೇಯಿಸಿ ಮಸೆದ ಆಲೂ, ತುರಿದ ಪನೀರ್‌, ಸಣ್ಣಗೆ ಹೆಚ್ಚಿ ಬಾಡಿಸಿದ ಹೂಕೋಸು, ಎಲೆಕೋಸು, ಕ್ಯಾಪ್ಸಿಕಂ, ತುರಿದ ಕ್ಯಾರೆಟ್‌ ಜೊತೆ ಉಪ್ಪು, ಖಾರ, ನಿಂಬೆರಸ ಸೇರಿಸಿ. ಬೈಂಡಿಂಗ್‌ಗಾಗಿ ಮೈದಾ ಬೆರೆಸಿ. ಇದನ್ನು ಚಿತ್ರದಲ್ಲಿರುವಂತೆ ಕಟ್‌ಲೆಟ್‌ ಆಕಾರದಲ್ಲಿ ತಟ್ಟಿಕೊಂಡು ಎಣ್ಣೆಯಲ್ಲಿ ಕರಿಯಿರಿ ಅಥವಾ ಮೈಕ್ರೋವೇವ್‌ನಲ್ಲಿ ಬೇಕ್‌ ಮಾಡಿ. ಇದನ್ನು ಮಕ್ಕಳಿಗೆ ಪುದೀನಾ ಅಥವಾ ಹುಳಿಸಿಹಿ ಚಟ್ನಿ ಜೊತೆ ಟಿಫನ್‌ ಬಾಕ್ಸಿಗೆ ಹಾಕಿಕೊಡಿ.
ವೆಜ್ಜಿ ಉಪ್ಪಿಟ್ಟು : ಎಂದಿನಂತೆ ಮಾಮೂಲಿ ಈರುಳ್ಳಿ ಅಥವಾ ತರಕಾರಿ ಹಾಕದ ಉಪ್ಪಿಟ್ಟು ಮಾಡಿಕೊಟ್ಟರೆ ಮಕ್ಕಳು ಅದನ್ನು ಕಾಂಕ್ರೀಟ್‌ ಎಂದು ಮುಖ ತಿರುಗಿಸುತ್ತಾರೆ. ಬದಲಿಗೆ ಹಸಿ ಬಟಾಣಿ, ಅವರೆಕಾಳು, ಕ್ಯಾಪ್ಸಿಕಂ, ಆಲೂ, ಕ್ಯಾರೆಟ್‌, ಧಾರಾಳ ಟೊಮೇಟೊ, ಕೊ.ಸೊಪ್ಪು, ಕರಿಬೇವು, ನಿಂಬೆರಸ, ತೆಂಗಿನತುರಿ ಎಲ್ಲಾ ಸೇರಿಸಿ. ಜೊತೆಗೆ ಸ್ವಲ್ಪ ವಾಂಗಿಭಾತ್‌ ಪುಡಿ ಸಹ ಬೆರೆಸಿಕೊಳ್ಳಿ. ಬದಲಾವಣೆಗಾಗಿ ಒಮ್ಮೊಮ್ಮೆ ಗೋಡಂಬಿ ಅಥವಾ ಕಡಲೇಬೀಜ ಸಹ ಸೇರಿಸಿ. ಆಗ ನೋಡಿ, ಉಪ್ಪಿಟ್ಟು ಬೇಡ ಎನ್ನುತ್ತಿದ್ದ ಮಕ್ಕಳು ಇಷ್ಟಪಟ್ಟು ಬಾಕ್ಸಿಗೆ ಇದನ್ನು ಕೊಂಡೊಯ್ಯುತ್ತಾರೆ. ಪುಟ್ಟ ಡಬ್ಬಿಯಲ್ಲಿ ಗಟ್ಟಿ ಕೆನೆಮೊಸರು ಹಾಕಿ ಕೊಡಿ, ಮಧ್ಯಾಹ್ನದ ಹೊತ್ತಿಗೆ ಉಪ್ಪಿಟ್ಟು ತುಸು ಗಟ್ಟಿಯಾದರೆ ಮೊಸರಿನೊಂದಿಗೆ ತಿನ್ನಲು ಹಿತವಾಗಿರುತ್ತದೆ.
– ದೀಪ್ತಿ ಗಿರೀಶ್‌
