ಸ್ಪೆಷಲ್ ಮೈದಾ ರೋಲ್ಸ್
ಸಾಮಗ್ರಿ : 2 ಕಪ್ ಮೈದಾ, ಅರ್ಧ ಸೌಟು ತುಪ್ಪ, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ಖಾರ, ಅರಿಶಿನ, ಕರಿಯಲು ಎಣ್ಣೆ.
ವಿಧಾನ : ಮೇಲಿನ ಎಲ್ಲಾ ಸಾಮಗ್ರಿ ಬೆರೆಸಿ, ನೀರು ಚಿಮುಕಿಸುತ್ತಾ ಮೃದು ಪೂರಿ ಹಿಟ್ಟಿನ ಹದಕ್ಕೆ ಕಲಸಿ, ತುಪ್ಪ ಹಾಕಿ ಚೆನ್ನಾಗಿ ನಾದಿಕೊಳ್ಳಿ. ಅರ್ಧ ಗಂಟೆ ನೆನೆದ ನಂತರ, ಸಣ್ಣ ಉಂಡೆ ಮಾಡಿ, ತೆಳುವಾದ ಪೂರಿ ಲಟ್ಟಿಸಿ. ಇದನ್ನು ಚಾಕುವಿನಿಂದ ಮಧ್ಯೆ ಮಧ್ಯೆ ಕತ್ತರಿಸಿ, ಒಂದೆಡೆ ಎಲ್ಲವನ್ನೂ ಹಿಡಿದಿಡುವಂತೆ ಮಾಡಿ, ಚಿತ್ರದಲ್ಲಿರುವಂತೆ ಸುರುಳಿ ಸುತ್ತಿಕೊಳ್ಳಿ. ಇವನ್ನು ಕಾದ ಎಣ್ಣೆಯಲ್ಲಿ ಹೊಂಬಣಕ್ಕೆ ಗರಿಗರಿಯಾಗಿ ಕರಿದು, ಗಾಳಿಯಾಡದ ಡಬ್ಬಕ್ಕೆ ತುಂಬಿಸಿಡಿ. ಬೇಕೆನಿಸಿದಾಗ, ಚಿತ್ರದಲ್ಲಿರುವಂತೆ ಅಲಂಕರಿಸಿ ಸವಿಯಲು ಕೊಡಿ.
ಚೀಝೀ ಪಾಲಕ್ ಬಾಲ್ಸ್
ಸಾಮಗ್ರಿ : 1-1 ಕಪ್ ತುರಿದ ಚೀಝ್, ಹೆಚ್ಚಿದ ಪಾಲಕ್ ಸೊಪ್ಪು, ಬೇಯಿಸಿ ಮಸೆದ ಆಲೂ, ಹೆಚ್ಚಿದ ಪನೀರ್, ಹೆಚ್ಚಿದ 2 ಈರುಳ್ಳಿ, ತುಸು ಶುಂಠಿ, ಹಸಿ ಮೆಣಸು, ಕೊ.ಸೊಪ್ಪು, ಪುದೀನಾ, ಕರಿಬೇವು, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಗರಂಮಸಾಲ, ಚಾಟ್ಮಸಾಲ, ಟೊಮೇಟೊ ಸಾಸ್, ಕರಿಯಲು ಎಣ್ಣೆ.
ವಿಧಾನ : ಪನೀರ್ ಬಿಟ್ಟು ಉಳಿದೆಲ್ಲ ಸಾಮಗ್ರಿಗಳನ್ನು ಒಂದು ಬೇಸನ್ನಿಗೆ ಬೆರೆಸಿಕೊಳ್ಳಿ. ಇದನ್ನು ಪೂರಿ ಹಿಟ್ಟಿನ ಮಿಶ್ರಣದಂತೆ ಗಟ್ಟಿಯಾಗಿ ಕಲಸಿಕೊಳ್ಳಿ. ಇದರಿಂದ ಸಣ್ಣ ನಿಂಬೆಗಾತ್ರದ ಉಂಡೆ ಹಿಡಿದು, ಅರ್ಧ ಗಂಟೆ ಫ್ರಿಜ್ ನಲ್ಲಿ ಇರಿಸಿಬಿಡಿ. ಹೊರ ತೆಗೆದು ಸ್ವಲ್ಪ ಹೊತ್ತು ಆದಮೇಲೆ, ಕಾದ ಎಣ್ಣೆಯಲ್ಲಿ ಕರಿದು ತೆಗೆಯಿರಿ. ಅದೇ ರೀತಿ ಪನೀರ್ ಕ್ಯೂಬ್ಸ್ ಸಹ ಲಘು ಕರಿಯಿರಿ. ಚಿತ್ರದಲ್ಲಿರುವಂತೆ ಒಂದು ಪ್ಲೇಟಿನಲ್ಲಿ ಎಲ್ಲವನ್ನೂ ಬೆರೆಸಿಕೊಂಡು, ಮೇಲೆ ಟೊಮೇಟೊ ಸಾಸ್ ಹಾಕಿ ಸವಿಯಲು ಕೊಡಿ.
ಪೊಟೇಟೋ ಸ್ನ್ಯಾಕ್ಸ್
ಸಾಮಗ್ರಿ : 15-20 ಬೇಬಿ ಆಲೂ, 4 ಚಮಚ ಕಾರ್ನ್ ಫ್ಲೋರ್, 2-3 ಹೆಚ್ಚಿದ ಈರುಳ್ಳಿ, 7-8 ಜಜ್ಜಿದ ಬೆಳ್ಳುಳ್ಳಿ, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಟೊಮೇಟೊ ಸಾಸ್, ಸೋಯಾ ಸಾಸ್, ಪೆಪ್ಪರ್, ವಿನಿಗರ್, ರೆಡ್ ಚಿಲೀ ಪೇಸ್ಟ್, ಕರಿಯಲು ಎಣ್ಣೆ.
ವಿಧಾನ : ಸಿಪ್ಪೆ ಹೆರೆಯದೆ ಆಲೂಗಳನ್ನು ಸುಮಾರಾಗಿ ಬೇಯಿಸಿ. ಇದನ್ನು ನೀರಿನಿಂದ ಬೇರ್ಪಡಿಸಿ, ಪೋರ್ಕ್ ನಿಂದ ಅಲ್ಲಲ್ಲಿ ಚುಚ್ಚಿ ರಂಧ್ರ ಮಾಡಿ. ಕಾರ್ನ್ ಫ್ಲೋರ್ ಗೆ ತುಸು ಉಪ್ಪು, ಖಾರ, ನೀರು ಬೆರೆಸಿ ಗಟ್ಟಿಯಾದ ಬೋಂಡಾ ಮಿಶ್ರಣ ಕಲಸಿ, ಅದರಲ್ಲಿ ಈ ಆಲೂ ಅದ್ದಿ ಕರಿದು ತೆಗೆಯಿರಿ. ಅದೇ ಬಾಣಲೆಯಲ್ಲಿ ಅರ್ಧ ಸೌಟು ಎಣ್ಣೆ ಉಳಿಸಿಕೊಂಡು ಈರುಳ್ಳಿ, ಬೆಳ್ಳುಳ್ಳಿ ಹಾಕಿ ಬಾಡಿಸಿ. ನಂತರ ಒಂದೊಂದಾಗಿ ಎಲ್ಲಾ ಮಸಾವೆ ಹಾಕುತ್ತಾ ಕೆದುಕುತ್ತಿರಬೇಕು. 2 ಚಮಚ ಕಾರ್ನ್ ಫ್ಲೋರ್ ಗೆ ತುಸು ಬೆಚ್ಚಗಿನ ಹಾಲು ಬೆರೆಸಿ, ಇದಕ್ಕೆ ಸೇರಿಸಿ ಕೈಯಾಡಿಸಿ. 1-2 ಕುದಿ ಬಂದಾಗ, ಮಂದ ಉರಿ ಮಾಡಿ ಕರಿದ ಆಲೂ ಸೇರಿಸಿ, ಎಲ್ಲ ಚೆನ್ನಾಗಿ ಬೆರೆತುಕೊಳ್ಳುವಂತೆ ಮಾಡಿ. ಅಗತ್ಯ ಎನಿಸಿದರೆ ಯಾವುದಾದರೂ ರೆಡಿಮೇಡ್ಮಿಕ್ಸ್ ಮಸಾಲ ಸಹ ಬೆರೆಸಿಕೊಳ್ಳಬಹುದು. ಚಿತ್ರದಲ್ಲಿರುವಂತೆ ಫ್ರೆಶ್ ಕ್ರೀಂ, ಹೆಚ್ಚಿದ ಕೊ.ಸೊಪ್ಪು ಬೆರೆಸಿ ಸವಿಯಲು ಕೊಡಿ.
