ಅನುಪಮ ದೇಶೀ ಸ್ವಾದ

ಬಾಂಬೆ ಸಾಗು

ಸಾಮಗ್ರಿ : 2-3 ಆಲೂಗಡ್ಡೆ, 2 ಈರುಳ್ಳಿ, 2-2 ಚಮಚ ಶುಂಠಿ, ಬೆಳ್ಳುಳ್ಳಿ ಪೇಸ್ಟ್, ಕಡಲೆಹಿಟ್ಟು ಕಿವುಚಿದ ಹುಣಿಸೆ-ಬೆಲ್ಲದ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಧನಿಯಾಪುಡಿ, 2-2 ಚಿಟಕಿ ಅರಿಶಿನ, ಮೆಂತ್ಯದ ಪುಡಿ, ಒಗ್ಗರಣೆಗೆ ಅರ್ಧ ಸೌಟು ಎಣ್ಣೆ, ಸಾಸುವೆ, ಜೀರಿಗೆ, ಮೆಂತ್ಯ, ತುಂಡರಿಸಿದ ಒಣ ಮೆಣಸಿನಕಾಯಿ, ಒಂದಿಷ್ಟು ಹೆಚ್ಚಿದ ಕರಿಬೇವು, ಪುದೀನಾ.

ವಿಧಾನ : ಸಿಪ್ಪೆ ಸಹಿತ ಆಲೂಗಡ್ಡೆಯನ್ನು ಸಣ್ಣದಾಗಿ ಹೆಚ್ಚಿಕೊಂಡು, ಚಿಟಕಿ ಉಪ್ಪು ಹಾಕಿ ಬೇಯಿಸಿಕೊಳ್ಳಿ. ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿಕೊಂಡು ಒಗ್ಗರಣೆ ಕೊಡಿ. ಅದು ಚಟಪಟಾಯಿಸಿದ ನಂತರ ಹೆಚ್ಚಿದ ಈರುಳ್ಳಿ ಹಾಕಿ ಬಾಡಿಸಿ. ಆಮೇಲೆ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಉಪ್ಪು, ಖಾರ, ಬೆಲ್ಲ ಉಳಿದ ಮಸಾಲೆ ಸೇರಿಸಿ ಕೆದಕಬೇಕು. ಆಮೇಲೆ ಬೆಂದ ಆಲೂ (ನೀರಿನ ಸಮೇತ) ಬೆರೆಸಿ ಮಂದ ಉರಿಯಲ್ಲಿ ಕೈಯಾಡಿಸುತ್ತಾ ಕುದಿಸಬೇಕು. ಕೊನೆಯಲ್ಲಿ ಕಡಲೆಹಿಟ್ಟನ್ನು ತುಸು ಬೆಚ್ಚಗಿನ ನೀರಿನಲ್ಲಿ ಕದಡಿಕೊಂಡು ಇದಕ್ಕೆ ಬೆರೆಸಿ, ಗ್ರೇವಿ ಗಟ್ಟಿಯಾಗುವವರೆಗೂ ಕುದಿಸಿ ಕೆಳಗಿಳಿಸಿ. ಕೊನೆಯಲ್ಲಿ ಹೆಚ್ಚಿದ ಪುದೀನಾ, ಕೊ.ಸೊಪ್ಪು ಸೇರಿಸಿ, ಚಪಾತಿ/ ಪೂರಿಗಳ ಜೊತೆ ಸವಿಯಲು ಕೊಡಿ.

ಗೋಲಾ ಸ್ಪ್ರಿಂಗ್‌ ರೋಲ್ಸ್

ಮೂಲ ಸಾಮಗ್ರಿ : 2 ಕಪ್‌ ಮೈದಾ, 1 ಮೊಟ್ಟೆ, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ತುಸು ಕಾದಾರಿದ ಹಾಲು.

ಹೂರಣದ ಸಾಮಗ್ರಿ : ಬೆಂದ 1 ಆಲೂ, 1-2 ಕ್ಯಾರೆಟ್‌, 1 ಕ್ಯಾಪ್ಸಿಕಂ, ಅರ್ಧ ಕಪ್‌ ಹೆಚ್ಚಿದ ಹೂಕೋಸು, 100 ಗ್ರಾಂ ಹೆಚ್ಚಿದ ಅಣಬೆ, 2-3 ಹಸಿ ಮೆಣಸು, 2 ಈರುಳ್ಳಿ, 5-6 ಎಸಳು ಬೆಳ್ಳುಳ್ಳಿ, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ಗರಂಮಸಾಲ, ಚಾಟ್‌ ಮಸಾಲ, ಸೋಯಾ ಸಾಸ್‌, ಟೊಮೇಟೊ ಸಾಸ್‌, ಒಗ್ಗರಣೆಗೆ ಎಣ್ಣೆ, ಸಾಸುವೆ, ಜೀರಿಗೆ, ಸೋಂಪು, ಕರಿಬೇವು.

ವಿಧಾನ : ಮೈದಾಗೆ ಮೊಟ್ಟೆ ಒಡೆದು ಹಾಕಿ, ಉಪ್ಪು, ಮೆಣಸು, ಹಾಲು ಬೆರೆಸಿಕೊಂಡು ಚೆನ್ನಾಗಿ ಗೊಟಾಯಿಸಿ, ದೋಸೆ ಹಿಟ್ಟಿನ ಹದಕ್ಕೆ ಮಾಡಿಡಿ. ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ ಒಗ್ಗರಣೆ ಕೊಡಿ. ಇದಕ್ಕೆ ಹೆಚ್ಚಿದ ಬೆಳ್ಳುಳ್ಳಿ, ಹಸಿ ಮೆಣಸು ಆಮೇಲೆ ಈರುಳ್ಳಿ ಹಾಕಿ ಬಾಡಿಸಿ. ನಂತರ ಅಣಬೆ, ಕ್ಯಾಪ್ಸಿಕಂ, ಹೂಕೋಸು ಸೇರಿಸಿ ಬಾಡಿಸಬೇಕು. ಆಮೇಲೆ ಬೆಂದ ಆಲೂ, ಕ್ಯಾರೆಟ್‌ ಹೋಳು ಸೇರಿಸಿ ಕೆದಕಬೇಕು. ಇದಕ್ಕೆ ಉಪ್ಪು, ಖಾರ ಉಳಿದ ಮಸಾಲೆ ಬೆರೆಸಿ, ಕೈಯಾಡಿಸಿ ಕೆಳಗಿಳಿಸಿ. ಇದನ್ನು ತುಸು ಆರಲು ಬಿಡಿ. ಮೈದಾ ಮಿಶ್ರಣದಿಂದ ಒಂದೊಂದೇ ದೋಸೆ ತಯಾರಿಸಿ. ದೋಸೆ ಕೆಳಗಿಳಿಸಿ, ಅದರ ಮಧ್ಯೆ 2-3 ಚಮಚ ತರಕಾರಿ ಮಿಶ್ರಣ ತುಂಬಿಸಿ, ಚಿತ್ರದಲ್ಲಿರುವಂತೆ ನೀಟಾಗಿ ಪ್ಯಾಕೆಟ್‌ ತರಹ ಮಡಿಚಿ, ಅಂಚು ಬಿಟ್ಟುಕೊಳ್ಳದಂತೆ ಮೈದಾ ಪೇಸ್ಟ್ ಅಂಟಿಸಿ. ಇವನ್ನು ತಲಾ ಮೇಲೆ ಶ್ಯಾಲೋ ಫ್ರೈ ಮಾಡಿ, ಬಿಸಿಯಾಗಿ ಸವಿಯಲು ಕೊಡಿ.

ಎಗ್‌ ಪರೋಟ

ಸಾಮಗ್ರಿ : 2 ಕಪ್‌ ಮೈದಾ, 2 ಮೊಟ್ಟೆ, 1 ಸಣ್ಣ ಚಮಚ ಬೇಕಿಂಗ್‌ ಪೌಡರ್‌, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ಅಗತ್ಯವಿದ್ದಷ್ಟು ರೀಫೈಂಡ್‌ ಎಣ್ಣೆ, ತುಪ್ಪ.

ವಿಧಾನ : ಮೊಟ್ಟೆ ಒಡೆದು ಬೀಟ್‌ ಮಾಡಿಕೊಂಡು ಅದಕ್ಕೆ ಉಪ್ಪು, ಮೆಣಸು ಹಾಕಿ ಚೆನ್ನಾಗಿ ಗೊಟಾಯಿಸಿ. ಮೈದಾಗೆ ಬೇಕಿಂಗ್ ಪೌಡರ್‌, ಅಗತ್ಯವಿದ್ದಷ್ಟು ಬೆಚ್ಚಗಿನ ನೀರು ಮೊಟ್ಟೆ ಮಿಶ್ರಣ ಬೆರೆಸಿ ಪೂರಿ ಹಿಟ್ಟಿನ ಹದಕ್ಕೆ ಕಲಸಿಡಿ. ಇದಕ್ಕೆ ಅರ್ಧ ಸೌಟು ತುಪ್ಪ ಬೆರೆಸಿ ಚೆನ್ನಾಗಿ ನಾದಿಕೊಳ್ಳಿ. ಇದನ್ನು 1 ತಾಸು ನೆನೆಯಲು ಬಿಡಿ. ಆಮೇಲೆ ಇದಕ್ಕೆ ಮತ್ತೆ ತುಪ್ಪ ಬೆರೆಸಿ ಚೆನ್ನಾಗಿ ನಾದಬೇಕು. ಅದರಿಂದ ಸಣ್ಣ ಉಂಡೆಗಳನ್ನು ಮಾಡಿ ಲಟ್ಟಿಸಿ. ಅದನ್ನು ಮಡಿಚಿ ತುಪ್ಪ ಸವರಿ ಮತ್ತೆ ತ್ರಿಕೋನಾಕಾರವಾಗಿ ಲಟ್ಟಿಸಿ. ಹೀಗೆ ಮಾಡುವುದರಿಂದ ಪರೋಟ ಪದರ ಪದರವಾಗಿ ಬರುತ್ತದೆ. ಈ ರೀತಿ ಎಲ್ಲವನ್ನೂ ಸಿದ್ಧಪಡಿಸಿಕೊಂಡು ಕಾದ ಹೆಂಚಿಗೆ ಹಾಕಿ, ರೀಫೈಂಡ್‌ ಎಣ್ಣೆ ಬಿಡುತ್ತಾ, ಎರಡೂ ಬದಿ ಬೇಯಿಸಿ. ಈ ಬಿಸಿ ಬಿಸಿ ಪರೋಟಾಗಳ ಮೇಲೆ ಇನ್ನಷ್ಟು ತುಪ್ಪ ಹಾಕಿ, ಖಾರದ ಪುದೀನಾ ಚಟ್ನಿ ಜೊತೆ ಸವಿಯಲು ಕೊಡಿ.

ಪನೀರ್‌ ಮಸಾಲ ಬೋಂಡ

ಸಾಮಗ್ರಿ : 2 ಕಪ್‌ ಗೋದಿಹಿಟ್ಟು, ಅರ್ಧರ್ಧ ಕಪ್‌ ಕಡಲೆಬೇಳೆ, ಪನೀರ್‌, 2-2 ಈರುಳ್ಳಿ, ಟೊಮೇಟೊ, ಹಸಿಮೆಣಸು, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಗರಂಮಸಾಲ, ಚಾಟ್‌ ಮಸಾಲ, 2 ಚಿಟಕಿ ಅರಿಶಿನ, ಕರಿಯಲು ಎಣ್ಣೆ.

ವಿಧಾನ : ಗೋದಿಹಿಟ್ಟಿಗೆ ಉಪ್ಪು, ತುಸು ತುರಿದ ಪನೀರ್‌, ಅಗತ್ಯವಿದ್ದಷ್ಟು ನೀರು ಬೆರೆಸಿ ಪೂರಿ ಹಿಟ್ಟಿನ ಹದಕ್ಕೆ ಕಲಸಿಡಿ. ಇದಕ್ಕೆ ತುಪ್ಪ ಬೆರೆಸಿ ನಾದಿಕೊಂಡು 1 ತಾಸು ನೆನೆಯಲು ಬಿಡಿ. ನಂತರ ಇದರಿಂದ ಉದ್ದದ ರೋಲ್ ತರಹ ಮಾಡಿಕೊಂಡು, ಬಿಸಿ ನೀರಿಗೆ ಹಾಕಿ 10 ನಿಮಿಷ ಕುದಿಸಿರಿ. ಹೊರತೆಗೆದು ಆರಿದ ನಂತರ ಇದನ್ನು ಚೆನ್ನಾಗಿ ಮಸೆಯಬೇಕು. ಹಿಂದಿನ ರಾತ್ರಿ ಕಡಲೆಬೇಳೆ ನೆನೆಹಾಕಿಟ್ಟು ಮಾರನೇ ದಿನ ಅದಕ್ಕೆ ತುಸು ಉಪ್ಪು ಹಾಕಿ ಬೇಯಿಸಿಕೊಳ್ಳಿ. ಚೆನ್ನಾಗಿ ಆರಿದ ನಂತರ ಇದನ್ನು ತರಿತರಿಯಾಗಿ ರುಬ್ಬಿಕೊಳ್ಳಿ. ಬಾಣಲೆಯಲ್ಲಿ ತುಸು ಎಣ್ಣೆ ಬಿಸಿ ಮಾಡಿ ಹೆಚ್ಚಿದ ಈರುಳ್ಳಿ, ಬೆಳ್ಳುಳ್ಳಿ, ಹಸಿಮೆಣಸು ಆಮೇಲೆ ಟೊಮೇಟೊ ಹಾಕಿ ಬಾಡಿಸಿ. ನಂತರ ಮಸೆದ ಪನೀರ್‌ ಹಾಕಿ ಬಾಡಿಸಬೇಕು. ಆಮೇಲೆ ಇದಕ್ಕೆ ಉಪ್ಪು, ಖಾರ, ಮಸಾಲೆಗಳನ್ನು ಸೇರಿಸಿ ಕೆದಬೇಕು. ನಂತರ ರುಬ್ಬಿದ ಕಡಲೆಬೇಳೆ ಸೇರಿಸಿ ಕೈಯಾಡಿಸಿ ಕೆಳಗಿಳಿಸಿ. ಮಸೆದ ಹಿಟ್ಟಿನಿಂದ ನಿಂಬೆ ಗಾತ್ರದ ಉಂಡೆಗಳನ್ನು ಮಾಡಿಕೊಂಡು, ಅದನ್ನು ಚಪ್ಪಟೆಯಾಗಿಸಿ. ಅದರ ಮಧ್ಯೆ 2-3 ಚಮಚ ಪನೀರ್‌ ಕಡಲೆ ಮಿಶ್ರಣ ತುಂಬಿಸಿ, ಬಿಟ್ಟುಕೊಳ್ಳದಂತೆ ಅದುಮಿಬಿಡಿ. ಹೀಗೆ ಎಲ್ಲವನ್ನೂ ಸಿದ್ಧಪಡಿಸಿಕೊಂಡು ಕಾದ ಎಣ್ಣೆಯಲ್ಲಿ ಹೊಂಬಣ್ಣ ಬರುವಂತೆ ಕರಿಯಿರಿ. ಇವನ್ನು ಬಿಸಿ ಬಿಸಿಯಾಗಿ ಟೊಮೇಟೊ ಸಾಸ್‌ ಜೊತೆ ಸವಿಯಲು ಕೊಡಿ.

ಸ್ಪೆಷಲ್ ಬದನೆ ಮಸಾಲೆ

ಸಾಮಗ್ರಿ : 2-3 ಹಸಿರು ಗುಂಡು ಬದನೆ, 3-4 ಹಸಿಮೆಣಸು, ಒಗ್ಗರಣೆಗೆ ಅರ್ಧ ಸೌಟು ಎಣ್ಣೆ, ಸಾಸುವೆ, ಜೀರಿಗೆ, ತುಂಡರಿಸಿದ ಒಣ ಮೆಣಸಿನಕಾಯಿ, ಅರ್ಧರ್ಧ ಕಪ್‌ ಮೊಸರು, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಸಕ್ಕರೆ, 4-5 ಗೋಡಂಬಿ, 2 ಚಿಟಕಿ ಅರಿಶಿನ, ಒಂದಿಷ್ಟು ಹೆಚ್ಚಿದ ಕೊ.ಸೊಪ್ಪು, ಕರಿಯಲು ಎಣ್ಣೆ.

ವಿಧಾನ : ಮೊದಲು ಬದನೆಯನ್ನು ಬಿಲ್ಲೆಗಳಾಗಿ ಹೆಚ್ಚಿಕೊಂಡು ಕಾದ ಎಣ್ಣೆಯಲ್ಲಿ ಕರಿಯಿರಿ. ಸಾಸುವೆಯನ್ನು ತುಸು ನೆನೆಸಿ ಹಸಿ ಮೆಣಸು, ಗೋಡಂಬಿ ಬೆರೆಸಿ ನುಣ್ಣಗೆ ಅರೆದುಕೊಳ್ಳಿ. ಬಾಣಲೆಯಲ್ಲಿ ತುಸು ಎಣ್ಣೆ ಉಳಿಸಿಕಂಡು ಜೀರಿಗೆ, ಒಣ ಮೆಣಸಿನಕಾಯಿ ಹಾಕಿ ಚಟಪಟಾಯಿಸಿ. ನಂತರ ಮಂದ ಉರಿ ಮಾಡಿ, ಇದಕ್ಕೆ ಪನೀರ್‌ ತುರಿ, ರುಬ್ಬಿದ ಮಿಶ್ರಣ, ಉಪ್ಪು, ಖಾರ, ಅರಿಶಿನ, ಸಕ್ಕರೆ, ಮೊಸರು ಎಲ್ಲಾ ಬೆರೆಸಿ ಚೆನ್ನಾಗಿ ಕೆದಕಬೇಕು. ಆಮೇಲೆ ಕರಿದ ಬದನೆ ಸೇರಿಸಿ, ಎಲ್ಲವೂ ಚೆನ್ನಾಗಿ ಬೆರೆತುಕೊಳ್ಳುವಂತೆ ಕೈಯಾಡಿಸಿ ಕೆಳಗಿಳಿಸಿ. ಆಮೇಲೆ ಕೊ.ಸೊಪ್ಪು ಸೇರಿಸಿ. ಬಿಸಿಯಾಗಿ ರೊಟ್ಟಿ, ಪರೋಟ ಜತೆ ಸವಿಯಲು ಕೊಡಿ.

ಸೋಯಾಬೀನ್ಸ್ ಕಬಾಬ್

‌

ಸಾಮಗ್ರಿ : 2 ಕಪ್‌ ಸೋಯಾಬೀನ್ಸ್, ಅರ್ಧ ಕಪ್‌ ಕಡಲೆಬೇಳೆ ಒಂದಿಷ್ಟು, ಹೆಚ್ಚಿದ ಈರುಳ್ಳಿ, ಬೆಳ್ಳುಳ್ಳಿ, ಶುಂಠಿ, ಕರಿಬೇವು. ಕೊ.ಸೊಪ್ಪು, ಪುದೀನಾ, ಹಸಿಮೆಣಸು, ರುಚಿಗೆ ತಕ್ಕಷ್ಟು ಉಪ್ಛು, ಖಾರ, ಚಾಟ್‌ ಮಸಾಲ, ಗರಂ ಮಸಾಲ, 2 ಚಿಟಕಿ ಅರಿಶಿನ, ಕರಿಯಲು ಎಣ್ಣೆ, ಬೇಯಿಸಿ ಮಸೆದ 2 ಆಲೂಗಡ್ಡೆ, 1 ಕಪ್‌ ರವೆ.

ವಿಧಾನ : ಕಡಲೆಬೇಳೆ ಸೋಯಾಗಳನ್ನು ಬೇರೆ ಬೇರೆ ನೆನೆಹಾಕಿ, ಬೇರೆಯಾಗಿಯೇ ತರಿತರಿಯಾಗಿ ರುಬ್ಬಿಕೊಳ್ಳಿ. ಆಮೇಲೆ ಮಿಕ್ಸಿಗೆ ಹೆಚ್ಚಿದ ಈರುಳ್ಳಿ, ಬೆಳ್ಳುಳ್ಳಿ ಇತ್ಯಾದಿ ಎಲ್ಲಾ ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಬೇಕು. ಎರಡಕ್ಕೂ ಕನಿಷ್ಠ ಪ್ರಮಾಣದ ನೀರು ಬಳಸಬೇಕು. ಇದನ್ನು ಒಂದು ಬೇಸನ್ನಿಗೆ ಹರಡಿಕೊಂಡು ಇದರ ಮೇಲೆ ಚೆನ್ನಾಗಿ ಮಸೆದ ಆಲೂ, ಉಪ್ಪು, ಖಾರ, ಮಸಾಲೆ ಸೇರಿಸಿ ಪಕೋಡ ಹಿಟ್ಟಿನ ಹದಕ್ಕೆ ಗಟ್ಟಿಯಾಗಿ ಕಲಸಿಡಿ. ಇದರಿಂದ ಸಣ್ಣ ಉಂಡೆಗಳನ್ನು ಹಿಡಿದು, ಜಿಡ್ಡು ಸವರಿದ ಅಂಗೈ ಮೇಲೆ ಚಪ್ಪಟೆಯಾಗಿ ತಟ್ಟಿಕೊಂಡು, ರವೆಯಲ್ಲಿ ಹೊರಳಿಸಿ ಕಾದ ಎಣ್ಣೆಯಲ್ಲಿ ಹೊಂಬಣ್ಣ ಬರುವಂತೆ ಕರಿಯಿರಿ. ಆಮೇಲೆ ಚಿತ್ರದಲ್ಲಿರುವಂತೆ ಅಲಂಕರಿಸಿ, ಪುದೀನಾ ಚಟ್ನಿಯಾಗಿ ಜತೆ ಸಂಜೆಯ ಬಿಸಿ ಕಾಫಿ/ ಚಹಾ ಜೊತೆ ಸವಿಯಿರಿ.

ಸ್ಪೆಷಲ್ ಪನೀರ್‌ ಮಸಾಲ

ಸಾಮಗ್ರಿ : 250 ಗ್ರಾಂ ಪನೀರ್‌, 2-2 ಈರುಳ್ಳಿ, ಟೊಮೇಟೊ. 2 ಚಮಚ ಶುಂಠಿ, ಬೆಳ್ಳುಳ್ಳಿ ಪೇಸ್ಟ್, ಅರ್ಧ ಗಿಟುಕು ತೆಂಗಿನ ತುರಿ, 10-12 ಗೋಡಂಬಿ, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಕಾಳುಮೆಣಸು, ಗರಂಮಸಾಲ, ಧನಿಯಾಪುಡಿ, ಅರ್ಧ ಸೌಟು ಫ್ರೆಶ್‌ ಕ್ರೀಂ, 2 ಚಿಟಕಿ ಅರಿಶಿನ, ಕರಿಯಲು ರೀಫೈಂಡ್‌ ಎಣ್ಣೆ. ಒಗ್ಗರಣೆಗೆ ಸಾಸುವೆ, ಜೀರಿಗೆ, ಕರಿಬೇವು.

ವಿಧಾನ : ಮೊದಲು ಪನೀರ್‌ ನ್ನು ಚೌಕಾಕಾರವಾಗಿ ಕತ್ತರಿಸಿ, ರೀಫೈಂಡ್‌ ಎಣ್ಣೆಯಲ್ಲಿ (ಮಂದ ಉರಿಯಲ್ಲಿ) ಕರಿದು ತೆಗೆಯಿರಿ. ಮಿಕ್ಸಿಗೆ ಒಂದಿಷ್ಟು ಹೆಚ್ಚಿದ ಈರುಳ್ಳಿ, ಟೊಮೇಟೊ, ಶುಂಠಿ/ಬೆಳ್ಳುಳ್ಳಿ ಪೇಸ್ಟ್, ತೆಂಗಿನ ತುರಿ, ಗೋಡಂಬಿ, ಕಾಳು ಮೆಣಸು, ಧನಿಯಾ ಪುಡಿ ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಿ. ಬಾಣಲೆಯಲ್ಲಿ ಅರ್ಧ ಸೌಟು ಎಣ್ಣೆ ಉಳಿಸಿಕೊಂಡು ಸಾಸುವೆ, ಜೀರಿಗೆಯ ಒಗ್ಗರಣೆ ಕೊಡಿ. ನಂತರ ಇದಕ್ಕೆ ಮೊದಲು ಹೆಚ್ಚಿದ ಈರುಳ್ಳಿ, ಆಮೇಲೆ ಟೊಮೇಟೊ ಹಾಕಿ ಬಾಡಿಸಿ. ಅನಂತರ ರುಬ್ಬಿದ ಮಸಾಲೆ, ಉಪ್ಪು, ಖಾರ, ಅರಿಶಿನ, ಇತ್ಯಾದಿ ಸೇರಿಸಿ ಕೆದಕಬೇಕು. ನಂತರ ಕರಿದ ಪನೀರ್‌ ಹಾಕಿ ಚೆನ್ನಾಗಿ ಬೆರೆತುಕೊಳ್ಳುವಂತೆ ಮಾಡಿ, ಗ್ರೇವಿ ಗಟ್ಟಿಯಾದಾಗ ಫ್ರೆಶ್‌ ಕ್ರೀಂ ಬೆರೆಸಿ ಕೈಯಾಡಿಸಿ ಕೆಳಗಿಳಿಸಿ. ಬಿಸಿ ಬಿಸಿಯಾಗಿ ಚಪಾತಿ, ಪೂರಿ, ದೋಸೆಗಳೊಂದಿಗೆ ಸವಿಯಲು ಕೊಡಿ.

ಮೆಂತೆ ಪರೋಟ

ಸಾಮಗ್ರಿ : 2 ಕಪ್‌ ಗೋದಿಹಿಟ್ಟು, ಅರ್ಧ ಕಪ್‌ ಕಡಲೆಹಿಟ್ಟು, 1 ಕಂತೆ ಶುಚಿಗೊಳಿಸಿ ಸಣ್ಣಗೆ ಹೆಚ್ಚಿದ ಮೆಂತೆಸೊಪ್ಪು, 2 ಚಮಚ ಎಳ್ಳು, 2-2 ಚಮಚ ಶುಂಠಿ, ಬೆಳ್ಳುಳ್ಳಿ, ಹಸಿಮೆಣಸಿನ ಪೇಸ್ಟ್, 1 ಕಪ್‌ ಹುಳಿ ಮೊಸರು, 2 ಚಿಟಕಿ ಅರಿಶಿನ, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಸಕ್ಕರೆ, ಧನಿಯಾಪುಡಿ, ಗರಂಮಸಾಲ, ಅರ್ಧ ಸೌಟು ತುಪ್ಪ.

ವಿಧಾನ : ಮೊದಲು ಮೆಂತೆಸೊಪ್ಪನ್ನು ಮೈಕ್ರೋವೇವ್ ‌ನಲ್ಲಿ 5 ನಿಮಿಷ (ನೀರು ಚಿಮುಕಿಸಿ) ಬೇಯಿಸಿಕೊಳ್ಳಿ. ನಂತರ ಅದನ್ನು ಹೊರತೆಗೆದು ಆರಿದ ಮೇಲೆ ಶುಂಠಿ, ಬೆಳ್ಳುಳ್ಳಿ, ಹಸಿ ಮೆಣಸಿನ ಪೇಸ್ಟ್, ಅರಿಶಿನ ಇತ್ಯಾದಿ ಸೇರಿಸಿಕೊಂಡು ನುಣ್ಣಗೆ ತಿರುವಿಕೊಳ್ಳಿ. ಇದನ್ನು ಒಂದು ಬೇಸನ್ನಿಗೆ ರವಾನಿಸಿ, ಇದರ ಮೇಲೆ ಗೋದಿಹಿಟ್ಟು, ಕಡಲೆಹಿಟ್ಟು, ಮೊಸರು, ಉಪ್ಪು, ಖಾರ ಇತ್ಯಾದಿಗಳನ್ನು ಬೆರೆಸಿಕೊಂಡು ಮೃದುವಾದ ಪೂರಿ ಹಿಟ್ಟಿನ ಹದಕ್ಕೆ ಕಲಸಿಡಿ. ಇದಕ್ಕೆ ತುಪ್ಪ ಬೆರೆಸಿ ಚೆನ್ನಾಗಿ ನಾದಿಕೊಂಡು 1 ತಾಸು ನೆನೆಯಲು ಬಿಡಿ. ನಂತರ ಸಣ್ಣ ಉಂಡೆಗಳಾಗಿಸಿ ಲಟ್ಟಿಸಿ, ತುಪ್ಪ ಸವರಿ ಮಡಿಚಿ ಮತ್ತೆ ಲಟ್ಟಿಸಿ, ಹೆಂಚಿಗೆ ಹಾಕಿ ತುಪ್ಪದಲ್ಲೇ ಪರೋಟ ತಯಾರಿಸಿ.