ದೀಪಗಳ ಹಬ್ಬ ದೀಪಾವಳಿ! ಈ ದಿನ ಮನೆ ಮುಂದಿನ ಅಂಗಳ, ಮನೆಯ ಒಳಗೆ, ಪೂಜಾ ಕೋಣೆಯಲ್ಲಿ ರಂಗು ರಂಗಿನ ರಂಗೋಲಿ ಬಿಡಿಸಿದರೆ ಎಂಥ ಚಂದ ಅಲ್ಲವೇ? ಇಡೀ ದ. ಭಾರತದಲ್ಲಿ ರಂಗೋಲಿಯ ಪರಂಪರೆ ಅದ್ಭುತವಾಗಿ ಎದ್ದು ಕಾಣುತ್ತದೆ. ಯಾವುದೇ ಹಬ್ಬವಿರಲಿ, ಮನೆಯ ಮುಂಬಾಗಿಲಿಗೆ ತಳಿರುತೋರಣ, ಹೂವಿನ ಅಲಂಕಾರ, ಬಾಗಿಲ ಮುಂದೆ ಬಣ್ಣದ ರಂಗೋಲಿ ಇದ್ದಾಗಲೇ ಅದು ಹಬ್ಬದ ಪರಿಪೂರ್ಣತೆಗೆ ಒಂದು ಸಂಕೇತ. ದೀಪಾವಳಿಯಂಥ ದೊಡ್ಡ ಹಬ್ಬದಲ್ಲಿ ಇಡೀ ದೇಶಾದ್ಯಂತ ರಂಗೋಲಿಯ ಘಮಲು ಹರಡಿಕೊಳ್ಳುತ್ತದೆ.
ಇಡೀ ಮನೆ ಸುಣ್ಣ ಬಣ್ಣ, ಸಾರಣೆ ಕಂಡು, ಗೃಹಾಲಂಕಾರ ಪೂರ್ತಿ ಆದ ಮೇಲೆ ರಂಗೋಲಿಯದೇ ಮೇಲುಗೈ! ಮನೆಯ ಮುಂಬಾಗಿಲಲ್ಲಿ ದೊಡ್ಡದಾದ ಬಣ್ಣದ ರಂಗೋಲಿ ಹಬ್ಬಕ್ಕೆ ಮನೆಗೆ ಬರುವ ಅತಿಥಿಗಳಿಗೆ ಸ್ವಾಗತ ಕೋರುತ್ತದೆ. ಹಬ್ಬದ ದಿನ ಮನೆಯ ಒಳಗೂ ಹೊರಗೂ ಹರಡಿದ ಬಣ್ಣದ ರಂಗೋಲಿ ಮನಸ್ಸಿಗೆ ಅಪೂರ್ವ ಕಾಂತಿ ತುಂಬುತ್ತದೆ. ಮನೆಯಲ್ಲಿ ಏನೋ ಶುಭ ಕಾರ್ಯ ನಡೆಯುತ್ತಿದೆ ಎನ್ನುವುದರ ದ್ಯೋತಕವಾಗಿದೆ. ಇಡೀ ದೇಶದ ವಿಭಿನ್ನ ಪ್ರಾಂತ್ಯಗಳ ರಂಗೋಲಿ ತನ್ನದೇ ಆದ ಪ್ರತ್ಯೇಕ ಮಹತ್ವ ಹೊಂದಿದೆ.
ಕರ್ನಾಟಕದಲ್ಲಂತೂ `ರಂಗ ನೀ ಒಲಿ' ಎಂಬುದೇ ರಂಗೋಲಿ, ರಂಗವಲ್ಲಿಯಾಗಿ ರಾರಾಜಿಸುತ್ತಿದೆ. ನಾನಾ ಬಗೆಯ ಚುಕ್ಕಿಯ ರಂಗೋಲಿಗಳು ಶಿವನ ಜಟೆಯಂತೆ ಹರಡಿಕೊಂಡು ಯಾವುದು ಆದಿ, ಯಾವುದು ಅಂತ್ಯ ತಿಳಿಯಾರದೆ ಇಂದಿನ ಆಧುನಿಕ ಹೆಣ್ಣುಮಕ್ಕಳು ಪ್ರಾಚೀನ ಕಾಲದ ಈ ಭವ್ಯ ಸಂಸ್ಕೃತಿಯನ್ನು ತಮ್ಮ ಪುಸ್ತಕಗಳಲ್ಲಿ ಅಚ್ಚಿಳಿಸುತ್ತಾರೆ. ಅಂದರೆ ಮೇಲ್ಭಾಗದ ಒಂದು ಚುಕ್ಕಿಯಿಂದ ಶುರುವಾಗುವ ಒಂದು ರೇಖೆ ನಾನಾ ಮೂಲೆಗಳನ್ನು ಹಾದು ಮತ್ತೆ ಬಂದಲ್ಲಿಗೆ ಸೇರಿಕೊಳ್ಳುತ್ತದೆ. ಈ ಭವ್ಯ ಪರಂಪರೆ ನಮ್ಮ ದ. ಭಾರತದ ಎಲ್ಲಾ ರಾಜ್ಯಗಳಲ್ಲೂ ಸಮಾನವಾಗಿ ಹರಡಿಕೊಂಡಿದೆ.
ನಮ್ಮ ರಂಗೋಲಿ ಅಥವಾ ರಂಗವಲ್ಲಿ ಇತರ ಕಡೆ ಕೋಲಂ, ಮುಗ್ಗುಲು, ಅಲ್ಪನಾ, ಚಿತ್ತಾರ್‌ ಇತ್ಯಾದಿ ನಾನಾ ಹೆಸರುಗಳನ್ನು ಪಡೆದುಕೊಂಡಿದೆ. ಇಂಥ ಚಂದದ ರಂಗೋಲಿ ಬಿಡಿಸಿ, ಅದಕ್ಕೆ ಅಂದದ ಬಣ್ಣ ತುಂಬಿಸಿದರೆ ನೋಡಲಿಕ್ಕೆ ಎರಡು ಕಣ್ಣು ಸಾಲದು! ನಿಮ್ಮ ಕಲ್ಪನೆ, ವಿನ್ಯಾಸ ಹೆಚ್ಚಿದ್ದಷ್ಟೂ ನಿಮ್ಮ ರಂಗೋಲಿ ಬಲು ಸುಂದರವಾಗುತ್ತದೆ.
ವಿವಿಧ ವಿನ್ಯಾಸಗಳು
ಚುಕ್ಕೆ ರಂಗೋಲಿಗಳ ಹೊರತಾಗಿ ದೇಶಾದ್ಯಂತ ಕೋಟ್ಯಂತರ ವಿನ್ಯಾಸಗಳಲ್ಲಿ ರಂಗೋಲಿಯ ಚಿತ್ತಾರವನ್ನು ಕಾಣಬಹುದು. ತಾರೆ, ಮೀನು, ಪಕ್ಷಿ, ಹಾವು...... ವೃತ್ತಾಕಾರದ ವಿವಿಧ ವಿನ್ಯಾಸಗಳ ರಂಗೋಲಿ, ಬಾರ್ಡರ್‌, ತೋರಣಗಳ ಡಿಸೈನಿನ ರಂಗೋಲಿ, ಷಟ್ಕೋನದಿಂದ ದಶುಭುಜಾಕೃತಿಯವರೆಗೂ ವಿವಿಧ ಜ್ಯಾಮಿತೀಯ ವಿನ್ಯಾಸಗಳ ರಂಗೋಲಿಯ ವೈಭವ ವರ್ಣನಾತೀತ! ಮಾನವರ ಕಲ್ಪನೆ ಹಿಗ್ಗಿದಷ್ಟೂ ವಿವಿಧ ಪ್ರಾಣಿ, ಪ್ರಕೃತಿಯ ಸೊಬಗು ಇದರಲ್ಲಿ ಕೂಡಿಕೊಳ್ಳುತ್ತದೆ.
ಬಗೆ ಬಗೆಯ ರಂಗೋಲಿಯ ವಿನ್ಯಾಸಗಳು ಎಷ್ಟು ಸುರಸುಂದರವಾಗಿ ಇರುತ್ತವೆಂದರೆ, ಅವನ್ನು ನೋಡುತ್ತಾ ನಿಂತುಬಿಟ್ಟರೆ, ಹೊತ್ತು ಹೋದದ್ದೇ ಗೊತ್ತಾಗುವುದಿಲ್ಲ. ದ. ಭಾರತದ ಬೀದಿ ಬೀದಿಗಳಲ್ಲೂ ಎಲ್ಲರ ಮನೆ ಮುಂದೆ ಬೆಳಗುವ ಈ ರಂಗೋಲಿ, ಇಡೀ ಊರಿಗೆ ಊರೇ ಸಂಭ್ರಮದಿಂದ ಆಚರಿಸುತ್ತಿದೆ ಹಬ್ಬ ಎಂದು ಸಾರುತ್ತದೆ. ಅದು ಯಾವ ಬಗೆಯ ಹಬ್ಬ ಎಂದೂ ಗೊತ್ತಾಗಿಹೋಗುತ್ತದೆ. ಇಂಥ ಅದ್ಭುತ ಕಲ್ಪನೆಯ ರಂಗೋಲಿಗಳ ಚಿತ್ತಾರವನ್ನು ಎಷ್ಟು ನೋಡಿದರೂ ಸಾಲದು ಎನಿಸುತ್ತದೆ.
