ಮಾಯಾ 2 ವರ್ಷಗಳ ನಂತರ ಊರಿಗೆ ಬಂದಾಗ ತನ್ನ ಅಕ್ಕ ಮಾಲಾ ಬಹಳ ಸಪ್ಪಗಿರುವಂತೆ ಅವಳಿಗೆ ಕಂಡಿತು, “ಅಕ್ಕಾ, ನಿನ್ನ ಮುಖದಲ್ಲಿ ಕಳೆಯೇ ಇಲ್ಲವಲ್ಲ. ಏಕೆ, ಏನಾದರೂ ತೊಂದರೆ ಇದೆಯ?” ಮಾಯಾ ಕೇಳಿದಳು.
“ತೊಂದರೆ ಏನೂ ಇಲ್ಲ ಮಾಯಾ. ವಯಸ್ಸಾಗುತ್ತಾ ಬಂದಿತಲ್ಲ. ಕಾಲು ನೋವು ಸ್ವಲ್ಪ ಇದೆ. ಕೂದಲು ಉದುರುತ್ತಾ ಇದೆ. ಮುಖದಲ್ಲಿ ಸುಕ್ಕು ಕಾಣುತ್ತಿದೆ. ಇದೆಲ್ಲ ವಯಸ್ಸಿನ ಪ್ರಭಾವ. ಅದಕ್ಕೇ ಮುಖ ಸಪ್ಪೆಯಾಗಿ ಕಾಣಿಸುತ್ತದೆ,” ಮಾಲಾ ನಿರುತ್ಸಾಹದಿಂದ ಹೇಳಿದಳು.
“ನೀನು ಹೀಗೆ ಏಕೆ ಯೋಚನೆ ಮಾಡುತ್ತೀ ಅಕ್ಕಾ, ವಯಸ್ಸಾದರೆ ಏನಾಯಿತು? ಚೆನ್ನಾಗಿ ಡ್ರೆಸ್‌ ಮಾಡಿಕೊಂಡು ಸ್ಮಾರ್ಟ್‌ ಆಗಿರು.”
“ಯಾರಿಗಾಗಿ ಮಾಯಾ? ಈ ವಯಸ್ಸಿನಲ್ಲಿ ನೋಡುವವರು ಯಾರಿದ್ದಾರೆ? ಮಕ್ಕಳು ಹಾಸ್ಟೆಲ್‌ನಲ್ಲಿದ್ದಾರೆ. ಅಲ್ಲದೆ ನಾನು ವಿಧವೆ, ಅಲಂಕರಿಸಿಕೊಂಡು ಕುಳಿತರೆ ಜನರು ಏನೆನ್ನುವರು? ನನ್ನನ್ನು ಸಂಶಯದ ದೃಷ್ಟಿಯಿಂದ ನೋಡುವರು,” ಮಾಲಾ ಹೇಳಿದಳು.
“ಅಯ್ಯೋ, ಇದರಲ್ಲೇನು ತಪ್ಪಿದೆ? ಜನರೇಕೆ ಸಂಶಯಿಸಬೇಕು? ವಿಧವೆಯಾಗಿರುವುದು ನಿನ್ನ ತಪ್ಪಲ್ಲ. ನಿನ್ನ ಜೀವನ ಮತ್ತು ಶರೀರದ ಬಗ್ಗೆ ನಿರ್ಲಕ್ಷ್ಯದಿಂದಿರುವುದು ಸರಿಯಲ್ಲ. ಮಕ್ಕಳು ಅವರವರ ಸಂಸಾರದಲ್ಲಿ ತೊಡಗಿಕೊಂಡ ಮೇಲೆ ನಿನ್ನನ್ನು ನೋಡಿಕೊಳ್ಳುವವರು ಯಾರು? ಭಾವ ಇದ್ದಿದ್ದರೆ ನಿನ್ನನ್ನು ನೋಡಿಕೊಳ್ಳುತ್ತಿದ್ದರು. ಈಗ ಅವರು ಇಲ್ಲದಿರುವುದರಿಂದ ನೀನೇ ನಿನ್ನ ಬಗ್ಗೆ ಗಮನವಿರಿಸಬೇಕು. ಇಲ್ಲದಿದ್ದರೆ ವಯಸ್ಸಾಗುತ್ತಿದ್ದಂತೆ ಶರೀರದಲ್ಲಿ ಕಾಯಿಲೆಗಳು ಮನೆ ಮಾಡಿಕೊಳ್ಳತೊಡಗುತ್ತವೆ ಅಷ್ಟೇ.”
“ನೀನು ಹೇಳುವುದೇನೋ ಸರಿ ಮಾಯಾ. ಆದರೆ ಒಂಟಿತನ ಬಹಳ ಹಿಂಸೆಯದು. ಹಿಂದೆಲ್ಲ ಮಕ್ಕಳನ್ನು ನೋಡಿಕೊಳ್ಳುತ್ತಾ ಸಮಯ ಕಳೆಯುತ್ತಿತ್ತು. ಈಗ ದಿನವಿಡೀ ಒಬ್ಬಳೇ ಕಾಲ ಕಳೆಯುವುದೇ ಕಷ್ಟವಾಗಿದೆ…”
ಈ ರೀತಿಯಾಗಿ ನಮ್ಮ ಸುತ್ತಮುತ್ತ ಅದೆಷ್ಟೋ ಉದಾಹರಣೆಗಳು ದೊರೆಯುತ್ತವೆ. ಕೆಲವಾರು ಕಾರಣಗಳಿಂದ ಮಹಿಳೆಯರು ಒಂಟಿಯಾಗುತ್ತಾರೆ ಮತ್ತು 40 ವರ್ಷ ವಯಸ್ಸಿನ ನಂತರ ತಮ್ಮ ಜೀವನದ ಬಗ್ಗೆ ನಿರ್ಲಕ್ಷರಾಗಿಬಿಡುತ್ತಾರೆ. ನಮ್ಮ ಬೀದಿಯಲ್ಲಿ ವಾಸಿಸುವ ಸ್ಮಿತಾ ಒಂದು ಫಾರ್ಮಾಸಿಟಿಕಲ್ ಕಂಪನಿಯಲ್ಲಿ ಕೆಲಸ ಮಾಡುತ್ತಾಳೆ. ಅವಳ ತಂದೆಯ ಆಕಸ್ಮಿಕ ನಿಧನದ ನಂತರ ಇಬ್ಬರು ತಂಗಿಯರ ಜವಾಬ್ದಾರಿ ಅವಳ ಮೇಲೆ ಬಿದ್ದಿತು. ತಾಯಿ ಗೃಹಿಣಿ. ಸ್ಮಿತಾ ಮೊದಲು ತನಗೊಂದು ಕೆಲಸ ದೊರಕಿಸಿಕೊಂಡು ತಂಗಿಯರ ವಿದ್ಯಾಭ್ಯಾಸಕ್ಕೆ ನೆರವಾದಳು. ಅವರು ತಮ್ಮ ಕಾಲ ಮೇಲೆ ನಿಲ್ಲುವಂತೆ ಮಾಡಿದಳು. ನಂತರ ತಂಗಿಯರಿಗೆ ಯೋಗ್ಯ ವರನನ್ನು ಹುಡುಕಿ ಮದುವೆಯನ್ನೂ ಮಾಡಿದಳು. ಇಷ್ಟೆಲ್ಲ ಆದನಂತರ ತಾನು ಜೀವನವಿಡೀ ಒಂಟಿಯಾಗಿ ಉಳಿಯಬೇಕಾಯಿತು.
ಮೊದಲೇನೋ ತಾಯಿ ಜೊತೆಯಲ್ಲಿದ್ದರು. 2 ವರ್ಷಗಳ ಹಿಂದೆ ಅವರು ವಿಧಿವಶರಾದರು. 45 ವರ್ಷ ವಯಸ್ಸಿನವರಾದ ಸ್ಮಿತಾ ನೌಕರಿ ಮಾಡುತ್ತಿದ್ದಾಳೆ. ಈಗ ಅವಳಿಗೆ ಜೀವನದಲ್ಲಿನ ಏಕಾಂಗಿತನ ಮತ್ತು ಶರೀರದಲ್ಲಿನ ನೋವುಗಳು ಬಾಧೆಯನ್ನುಂಟು ಮಾಡುತ್ತವೆ. ಇಡೀ ಕುಟುಂಬದ ಜವಾಬ್ದಾರಿಯನ್ನು ಉತ್ಸಾಹದಿಂದ ಹೆಗಲ ಮೇಲೆ ಹೊತ್ತು ನಿಂತಿದ್ದ ಸ್ಮಿತಾಳ ಮುಖದಲ್ಲಿ ಇಂದು ನಿರುತ್ಸಾಹ ತೋರಿಬರುತ್ತಿದೆ.
ಒಂದು ದಿನ ನಾನು ಅವಳನ್ನು ನಮ್ಮ ಕಾಲೋನಿಯ ಸಮಾಜದ ಗೆಟ್‌ ಟು ಗೆದರ್‌ ಪಾರ್ಟಿಗೆ ಆಹ್ವಾನಿಸಿದೆ, “ಖಂಡಿತ ಬನ್ನಿ, ಚೆನ್ನಾಗಿ ಎಂಜಾಯ್‌ ಮಾಡಬಹುದು.”
“ಅಯ್ಯೋ, ನೀವೆಲ್ಲ ಜೊತೆ ಜೊತೆಯಾಗಿ ಬರುತ್ತೀರಿ. ನಾನು ಒಬ್ಬಳೇ ಬಂದು ಏನು ಮಾಡಲಿ?” ಸ್ಮಿತಾ ನಿರುತ್ಸಾಹ ಭಾವದಿಂದ ಹೇಳಿದಳು.
“ನೀವು ಬಂದು ನೋಡಿ. ನಿಮಗೆ ಒಂದು ಚೇಂಜ್‌ ಸಿಕ್ಕಿದ ಹಾಗಾಗುತ್ತದೆ.” ನನ್ನ ಒತ್ತಾಯದಿಂದಾಗಿ ಸ್ಮಿತಾ ಪಾರ್ಟಿಗೆ ಬಂದಳು. ಅದಾದ ನಂತರ ಅವಳು ಸಮಾಜದ ಸದಸ್ಯೆಯಾಗಿ ಎಲ್ಲ ಕಾರ್ಯಕ್ರಮಗಳಿಗೂ ಬರುತ್ತಾಳಲ್ಲದೆ, ಅಲ್ಲಿನ ಕೆಲವು ಕೆಲಸ ಕಾರ್ಯ ಗಳಲ್ಲಿ ಸಕ್ರಿಯವಾಗಿ ತೊಡಗಿಕೊಂಡಿದ್ದಾಳೆ.
ಇದರಿಂದ ಸ್ಮಿತಾಳ ಮುಖದಲ್ಲಿ ಹೊಸ ಕಾಂತಿ ಮೂಡಿದೆ ಮತ್ತು ಅವಳ ಆತ್ಮವಿಶ್ವಾಸ ಹೆಚ್ಚಿದೆ. ಸಮಾಜದ ಮಕ್ಕಳಿಗಾಗಿ ಅವಳು ಒಂದಲ್ಲ ಒಂದು ಕಾರ್ಯಕ್ರಮ ಏರ್ಪಡಿಸುವುದರಿಂದ ಅವರೆಲ್ಲ ಅವಳನ್ನು ಬಹಳ ಇಷ್ಟಪಡುತ್ತಾರೆ.
ಒಂಟಿ ಹೆಣ್ಣು ಅಬಲೆಯಲ್ಲ
ಚೆನ್ನಾಗಿ ಬದುಕಿ ತನ್ನ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಅವಳಿಗೆ ಸಂಪೂರ್ಣ ಹಕ್ಕಿದೆ. ಏಕೆಂದರೆ 40 ವಯಸ್ಸಿನ ನಂತರ ಮಹಿಳೆಗೆ ಮೆನೊಪಾಸ್‌ನ ಕಾಲ ಬರುತ್ತದೆ. ಅವಳ ಮಾಸಿಕ ಚಕ್ರ ಅಂತ್ಯವಾಗುವ ಈ ಸಮಯದಲ್ಲಿ ಶರೀರ ಸಂಬಂಧಿ ಸಮಸ್ಯೆಗಳು ಉಂಟಾಗಬಹುದು. ಕೆಲವೊಮ್ಮೆ ಈ ಸಮಸ್ಯೆಗಳು ಗಂಭೀರವಾಗಿದ್ದು, ಶಾರೀರಿಕ ಮತ್ತು ಮಾನಸಿಕ ಬದಲಾವಣೆಗಳು ಉಂಟಾಗತೊಡಗುತ್ತವೆ.
ಬಳಲಿಕೆ, ನಿದ್ರಾಹೀನತೆ, ಶಾರೀರಿಕ ಶಿಥಿಲತೆ, ಸ್ಥೂಲತೆ, ಮೈಕೈ ನೋವು ಮುಂತಾದ ತೊಂದರೆಗಳು 40 ವರ್ಷ ವಯಸ್ಸಿನ ನಂತರ ಕಾಣಿಸಿಕೊಳ್ಳುತ್ತವೆ. ಹೀಗಾಗಿ ಕೆಲವು ವಿಷಯಗಳ ಬಗ್ಗೆ ಕಾಳಜಿ ವಹಿಸುವುದು ಅವಶ್ಯಕ.
ಆಹಾರದ ಬಗ್ಗೆ ಕಾಳಜಿ
ಶರೀರಕ್ಕೆ ಅಗತ್ಯವಾದ ನ್ಯೂಟ್ರಿಯೆಂಟ್ಸ್ ವುಳ್ಳ ಆಹಾರವನ್ನೇ ಸೇವಿಸಿ. 40ರ ನಂತರ ಜೀರ್ಣಶಕ್ತಿ ಕುಂದುತ್ತದೆ. ಶಾರೀರಿಕ ಚಟುವಟಿಕೆಯು ಕಡಿಮೆಯಾಗುವುದರಿಂದ ಸ್ಥೂಲತೆ ಹೆಚ್ಚತೊಡಗುತ್ತದೆ.
ಸೋ ಮೆಟಬಾಲಿಸಂನಿಂದಾಗಿ ಕ್ಯಾಲೋರಿಯ ಅವಶ್ಯಕತೆ ಹಿಂದಿಗಿಂತ ಕಡಿಮೆ ಇರುತ್ತದೆ. ಆದ್ದರಿಂದ ಆಹಾರ ಸೇವನೆಯಲ್ಲಿ ಕ್ಯಾಲೋರಿಯತ್ತ ಹೆಚ್ಚು ಗಮನ ನೀಡಿ.
ನಿತ್ಯ ವ್ಯಾಯಾಮ
ವ್ಯಾಯಾಮದಿಂದ ನೀವು ಶಕ್ತಿಶಾಲಿ, ಆರೋಗ್ಯವಂತರೂ ಆಗುವಿರಿ. ಶರೀರ ಹಗುರವಾಗಿದ್ದು, ಒಳ್ಳೆಯ ನಿದ್ರೆ ಬರುವುದು. ತಾರುಣ್ಯದ ಅನುಭವ ಹೊಂದಿ, ನಿಮ್ಮ ಆತ್ಮವಿಶ್ವಾಸ ಹೆಚ್ಚುವುದು.
ಕೆಲವು ಸಲ 40ರ ನಂತರ ಕಾಲು ನೋವಿನ ತೊಂದರೆ ಉಂಟಾಗುತ್ತದೆ. ಇದರಿಂದಾಗಿ ವ್ಯಾಯಾಮ ಮಾಡಲು ಕಷ್ಟವಾಗುತ್ತದೆ. ನಡೆಯಲೂ ತೊಂದರೆಯಾಗಬಹುದು. ಹಾಗಾದಾಗ ವಾಟರ್‌ ಎಕ್ಸರ್‌ಸೈಜ್‌ ಉಪಯೋಗಕಾರಿ ಆಗಿರುತ್ತದೆ. ವ್ಯಾಯಾಮ ಯಾವುದೇ ಬಗೆಯದಾಗಿರಬಹುದು. ಉದಾ: ಮಾರ್ನಿಂಗ್‌ ವಾಕ್‌, ಏರೋಬಿಕ್ಸ್, ಡ್ಯಾನ್ಸ್, ಸ್ವಿಮ್ಮಿಂಗ್‌… ಇತ್ಯಾದಿ. ಗ್ರೂಪ್‌ ಡ್ಯಾನ್ಸ್ ಆದ ಜುಂಬಾವನ್ನು ಇಂದು ವ್ಯಾಯಾಮದಂತೆ ಮಾಡಬಹುದು. ಇದರಿಂದ ಶಾರೀರಿಕ ಲವಲವಿಕೆ ಇರುವುದಲ್ಲದೆ, ಮ್ಯೂಸಿಕ್‌ನೊಂದಿಗೆ ಗೆಳತಿಯರ ಜೊತೆ ನರ್ತಿಸುವ ಆನಂದ ದೊರೆಯುವುದು.
ಹಾರ್ಮೋನ್‌ ಬದಲಾವಣೆ
40ರ ನಂತರ ಮೆನೊಪಾಸ್‌ ಸ್ಟೇಜ್‌ ಪ್ರಾರಂಭವಾಗುವುದರಿಂದ ಹಾರ್ಮೋನ್‌ಗಳಲ್ಲಿ ಬದಲಾವಣೆ ಉಂಟಾಗುತ್ತದೆ. ಇದರಿಂದ ತೂಕ ಹೆಚ್ಚುತ್ತದೆ. ನಿಮ್ಮ ಫಿಟ್‌ನೆಸ್‌ ಬಗ್ಗೆ ಗಮನವಿರಿಸಿಕೊಂಡು ದಿನಚರ್ಯೆಯನ್ನು ಪಾಲಿಸುತ್ತಿದ್ದರೆ, ಹಾರ್ಮೋನ್‌ ಬದಲಾವಣೆಯನ್ನು ಸಮತೋಲನದಲ್ಲಿರಿಸಬಹುದು.
ಪ್ರೋಟೀನ್‌ಯುಕ್ತ ಆಹಾರ
ವಯಸ್ಸು ಹೆಚ್ಚುತ್ತಿದ್ದಂತೆ ಚರ್ಮದಲ್ಲಿ ಸುಕ್ಕು ಕಾಣಿಸುತ್ತದೆ, ಕೂದಲು ಉದುರುತ್ತದೆ. ಉಗುರು ಹಾಳಾಗುತ್ತದೆ. ಪ್ರೋಟೀನ್‌ಯುಕ್ತ ಆಹಾರ ಸೇವನೆಯಿಂದ ಶರೀರದ ಮಾಂಸಖಂಡಗಳು, ಚರ್ಮ, ಕೂದಲು ಮತ್ತು ಕನೆಕ್ಟಿವ್‌ ಟಿಶ್ಶೂಗಳು ಚೆನ್ನಾಗಿರುತ್ತವೆ. ಹಾಲು, ಮೊಸರು, ಬೇಳೆ, ಕಾಳು, ಪಾಲಕ್‌, ಸೋಯಾಬೀನ್‌, ಕಡ್ಲೆಕಾಯಿ, ಬಾದಾಮಿ ಇವುಗಳಲ್ಲಿ ಪ್ರೋಟೀನ್‌ ಅಂಶ ಅಧಿಕವಾಗಿರುತ್ತದೆ.
ಸೋಶಿಯಲೈಸಿಂಗ್‌
ಕುಟುಂಬದ ಇತರೆ ಸದಸ್ಯರೊಡನೆ ವಾಸಿಸುವ ಮಹಿಳೆಯರಿಗೆ ಒಂದಲ್ಲ ಒಂದು ಕಾರ್ಯಕ್ರಮಕ್ಕೆ ಆಹ್ವಾನ ದೊರೆಯುತ್ತಿರುತ್ತದೆ. ಆದರೆ ಸಿಂಗಲ್ ವುಮನ್‌ಗೆ ಇಂತಹ ಅವಕಾಶಗಳು ಕಡಿಮೆ.
ಆದ್ದರಿಂದ ನೀವು ಸಾಮಾಜಿಕ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿ. ಅವುಗಳ ಆ ಯೋಜನೆಯಲ್ಲಿ ಪಾಲುಗಾರರಾಗಿ. ಇದರಿಂದ ನಿಮ್ಮ ಸಮಯದ ಸದುಪಯೋಗವಾಗುತ್ತದೆ ಮತ್ತು ಸಮಾಜದಲ್ಲಿ ನಿಮ್ಮ ಗುರುತು ಮೂಡುತ್ತದೆ. ನಿಮ್ಮ ಚಟುವಟಿಕೆಯನ್ನು ಕಂಡು ಜನ ಸ್ವತಃ ನಿಮ್ಮನ್ನು ಆಮಂತ್ರಿಸುತ್ತಾರೆ. ಹೀಗಾಗಿ ಜನರೊಂದಿಗೆ ಬೆರೆಯುವುದು ಹೆಚ್ಚುತ್ತಾ ನಿಮ್ಮ ಒಂಟಿತನ ದೂರವಾಗುತ್ತದೆ.
ಇದಲ್ಲದೆ ನೀವು ಇತರ ಮಹಿಳೆಯರೊಂದಿಗೆ ಸೇರಿ ಒಂದು ಮಾಸಿಕ ಕಿಟಿ ಪಾರ್ಟಿ ಪ್ರಾರಂಭಿಸಬಹುದು. ಅದರಲ್ಲಿ ವಿಭಿನ್ನ ಥೀಮ್ ಇರಿಸಿ ಹೊಸ ಗೇಮ್ಸ್ ಆಯೋಜಿಸಿ. ಇದರಿಂದ ನಿಮಗೆ ಆನಂದ ದೊರೆಯುತ್ತದೆ ಮತ್ತು ಪಾರ್ಟಿಗಾಗಿ ನಿಮ್ಮ ಮೆಚ್ಚಿನ ಡ್ರೆಸ್‌ ಧರಿಸುವ ಅವಕಾಶ ಸಿಗುತ್ತದೆ.
ನೀವು ಉದ್ಯೋಗಸ್ಥ ಮಹಿಳೆಯಾದರೆ ಆಫೀಸ್‌ನಲ್ಲಿ ಪಿಕ್ನಿಕ್‌ ಟೂರ್‌ಗಳನ್ನು ಆರ್ಗನೈಸ್‌ ಮಾಡಬಹುದು. ಹೀಗೆ ನಿಮ್ಮ ಟ್ಯಾಲೆಂಟ್‌ನ ಪ್ರದರ್ಶನವಾಗುತ್ತದೆ. ನೀವು ಎಲ್ಲರ ಮೆಚ್ಚಿನ ಮಹಿಳೆಯಾಗುವಿರಿ.
ಕುಟುಂಬದೊಂದಿಗೆ ವಾಸಿಸುವ ಮಹಿಳೆಯರ ಕಾಳಜಿ ವಹಿಸಲು ಯಾರಾದರೊಬ್ಬರು ಇರುತ್ತಾರೆ. ಆದರೆ ಸಿಂಗಲ್ ವುಮನ್‌ಗೆ ಈ ಭಾಗ್ಯವಿರುವುದಿಲ್ಲ. ಆದ್ದರಿಂದ ನಿಮ್ಮ ಸಹೋದ್ಯೋಗಿಗಳ ಅಥವಾ ನೆರೆಹೊರೆಯವರ ಸ್ನೇಹ ನಿಮ್ಮ ಕಷ್ಟಕಾಲದಲ್ಲಿ ಉಪಯೋಗವಾಗುತ್ತದೆ.
ನಿಮ್ಮ ಬಗ್ಗೆ ನೀವೇ ಎಲ್ಲ ಬಗೆಯ ಕಾಳಜಿ ವಹಿಸಬೇಕು. ನೀವು ಜೀವನದ ಬಗೆಗೆ ಉದಾಸೀನವಾಗಿಲ್ಲವೇ ಎಂದು ಪ್ರಶ್ನಿಸಿಕೊಳ್ಳಿ. ನಿಮ್ಮ ಆರೋಗ್ಯ ಫಿಟ್‌ನೆಸ್‌ ಮತ್ತು ಬ್ಯೂಟಿ ಬಗ್ಗೆ ನಿಮ್ಮ ಸೋಶಿಯಲ್ ಸರ್ಕಲ್ನಲ್ಲಿ ಚರ್ಚಿಸಿ. ನೀವು ಚೆನ್ನಾಗಿರಬೇಕೆಂದು ನಿಮ್ಮ ಆಪ್ತರು ಖಂಡಿತ ಬಯಸುತ್ತಾರೆ. ಹೊಸ ವರ್ಷಕ್ಕೆ ಹೊಸ ಉಲ್ಲಾಸ ಪಡೆಯಿರಿ, ಹ್ಯಾಪಿ ನ್ಯೂ ಇಯರ್‌!
– ಸುರೇಖಾ ಶರ್ಮ
