– ಮಂಜುಳಾ ರಾಜ್‌
ಅಕ್ಕನ ಮಗಳಿಗೆ ಮದುವೆಯಾಯಿತು. ಮದುವೆಯ ನಂತರ ಹೇಗಿದ್ದೀಯಾ? ಎಂದು ಕೇಳಿದ್ದಕ್ಕೆ, ಎಲ್ಲ ಚೆನ್ನಾಗಿದೆ ಆದರೆ ಅಡುಗೆ ಮಾಡಲು ಬೇಜಾರು ಚಿಕ್ಕಮ್ಮ ಎಂದಳು.
ಇತ್ತೀಚೆಗೆ ಪರಿಚಯದವರ ಮನೆಗೆ ಹೋಗಿದ್ದೆ. ಅವರ ಮನೆಯ ಸೊಸೆ ಎಂ.ಬಿ.ಎ. ಮಾಡಿದ್ದಾಳೆ. ಒಂದೇ ಮಗು, ಕೆಲಸಕ್ಕೇನೂ ಹೋಗುತ್ತಿಲ್ಲ. ಬಹಳ ಶ್ರೀಮಂತರು. ನನ್ನ ಸೊಸೆಯ ಹತ್ತಿರ ತುಂಬಾ ಮಾತನಾಡುತ್ತಿದ್ದಳು. ಅವಳ ಮಾತಿನ ಸಾರಾಂಶ, ನನಗೆ ಅಡುಗೆ ಮಾಡಲು ಬೇಸರ, ನಾನು ಅಡುಗೆ ಮಾಡುವ ಟೈಪಿನವಳಲ್ಲ. ಅಡುಗೆ ಮಾಡಲು ಯಾರಾದರೂ ಸಿಕ್ಕುತ್ತಾರೋ, ನೋಡಿ ಹೇಳು ಎಂದಳಂತೆ.
ಅಡುಗೆ ಎಂದರೆ ಇವರಿಗೆ ಏಕೆ ಬೇಸರ? ಅಡುಗೆ ಮಾಡುವುದೆಂದರೆ ಹೀನಾಯವೆನ್ನುವ ಭಾವನೆಯೇ? ಅಥವಾ ಉದ್ಯೋಗಕ್ಕೆ ಹೋಗುವವರು ಮಜವಾಗಿ ಇರುತ್ತಾರೆ ನಾವು ಮಾತ್ರ ಅಡುಗೆ ಮನೆಯಲ್ಲಿ ಬೇಯಬೇಕು ಎನ್ನುವ ಭಾವವಿರಬಹುದು. ಆದರೆ `ಮನೆ ಮಂದಿಯ ಆರೋಗ್ಯ ಕಾಪಾಡಬೇಕೆಂದರೆ, ಮನೆಯವರೆಲ್ಲರೂ ಉತ್ತಮ ಸತ್ವಯುತ ಆಹಾರ ತಿನ್ನಬೇಕೆಂದರೆ ಖಂಡಿತ ಅಡುಗೆ ಮಾಡುವುದು ಉತ್ತಮ,’ ಎನ್ನುತ್ತಾರೆ, ಬರ್ಕ್ಲಿ ವಿಶ್ವವಿದ್ಯಾಲಯದ ಪ್ರೊಫೆಸರ್‌ ಆದ ಮೈಕೆಲ್‌ ಪೊಲನ್‌. `ವಾರದ ಐದು ದಿನವಾದರೂ ಮನೆಯಲ್ಲಿ ಅಡುಗೆ ಮಾಡಬೇಕು. ಈಗಿನ ಕಾಲದಲ್ಲಿ ಮಹಿಳೆಯೂ ಉದ್ಯೋಗಸ್ಥಳಾಗಿರುವುದರಿಂದ ಅಡುಗೆಯ ಹೊಣೆಯನ್ನು ಅವಳೊಬ್ಬಳ ಮೇಲೆಯೇ ಹಾಕುವಂತಿಲ್ಲ. ಮನೆ ಮಂದಿಯೆಲ್ಲಾ ಕೆಲಸಗಳನ್ನು ಹಂಚಿಕೊಂಡು ಮಾಡಿದಾಗ ಮಕ್ಕಳಿಗೂ ತಾವು ತಯಾರಿಸಿದ ಅಡುಗೆಯ ಮೇಲೆ ಮಮತೆ ಮತ್ತು ಒಂದು ರೀತಿಯ ಅಭಿಮಾನ ಬೆಳೆಯುತ್ತದೆ,’ ಎನ್ನುತ್ತಾರೆ.
ಹಿಂದೆಯಾದರೆ ಅಡುಗೆ ಮಾಡುವುದು ದಿನವಿಡೀ ಮಾಡುವ ಕೆಲಸವಾಗುತ್ತಿತ್ತು. ಆದರೆ ಈಗಿನ ಕಾಲದ ಅತ್ಯಾಧುನಿಕ ಅಡುಗೆ ಮನೆಯಲ್ಲಿ ಎಲ್ಲ ನಿಮಿಷ ಮಾತ್ರದಲ್ಲಿ ಸಾಧ್ಯ. ರುಬ್ಬುವಂತಿಲ್ಲ, ಸೌದೆ ಒಲೆ ಹಚ್ಚುವಂತಿಲ್ಲ, ಗ್ಯಾಸ್‌ನಲ್ಲಿ ಒಂದೇ ನಿಮಿಷಕ್ಕೆ ಬೆಂದುಹೋಗುತ್ತದೆ. ಸರಿಯಾಗಿ ಒಂದೆರಡು ಘಂಟೆ ಸವೆಸಿದರೆ ಸಾಕು, ದಿನದ ಅಡುಗೆ ಸಿದ್ಧ ಮಾಡಬಹುದು ಎನ್ನುತ್ತಾರೆ ಅರವತ್ತು ವರ್ಷದ ಭಾಮಾ ಅವರು.
ಈಗಲೂ ಅವರಿಗೆ ಹೊಸ ಹೊಸ ರುಚಿಗಳನ್ನು ತಮ್ಮ ಅಡುಗೆ ಮನೆಯಲ್ಲಿ ಮಾಡುವ ಆಸೆ. `ನಮ್ಮ ಕೈಯಾರೆ ನಾವೇ ಅಡುಗೆ ಮಾಡಿ ಬಡಿಸಿದಾಗ, ತಿಂದವರು ಅದು ರುಚಿಯಾಗಿದೆ ಎಂದು ಲೊಟ್ಟೆ ಹೊಡೆದು ಚಪ್ಪರಿಸಿದಾಗ ಆಗುವ ಸಂತೋಷಕ್ಕೆ ಎಣೆಯೇ ಇಲ್ಲ,’ ಎನ್ನುವುದು ಅವರ ಅಭಿಪ್ರಾಯ.
ಅಡುಗೆ ಮಾಡಲು ಬೇಸರವೇಕೆ ಎನ್ನುವುದನ್ನು ಅವಲೋಕಿಸಿದಾಗ ಅಡುಗೆ ಮಾಡುವವರನ್ನು ಒಂದೆಡೆ ಬಿಟ್ಟು ಎಲ್ಲರೂ ಕುಳಿತು ಹರಟೆ ಹೊಡೆಯುತ್ತಾ ಅಥವಾ ಟಿ.ವಿ. ನೋಡುತ್ತಾ, ಮಾಡಿದ್ದನ್ನು ಕಾಮೆಂಟ್‌ ಮಾಡುತ್ತಾ ತಿನ್ನುವ ಅಭ್ಯಾಸವಿತ್ತು. ಆಗ ನಿಜಕ್ಕೂ ಅಡುಗೆ ಮಾಡುವವರಿಗೆ ಬೇಸರವೇ. ಅವರಿಗೆ ತಾನೊಬ್ಬಳೇ ಒಂಟಿ, ಕೂಳು ಬೇಯಿಸುವುದಷ್ಟೇ ನನ್ನ ಕಾರ್ಯ ಎನ್ನುವ ಭಾವ ಕಾರಣವಿರಬಹುದು. ಇವೆಲ್ಲಕ್ಕೂ ಉತ್ತರವೆನ್ನುವಂತೆ ಈಗ ಮನೆಯ ವಿನ್ಯಾಸಕಾರರು ತೆರೆದ ಅಡುಗೆಮನೆ ಅಥವಾ ಐ ಲ್ಯಾಂಡ್‌ ಕಿಚನ್‌ನ್ನು ರೂಪಿಸುತ್ತಿದ್ದಾರೆ. ಮನೆಯ ಒಂದು ಮೂಲೆಯಲ್ಲಿದ್ದ ಅಡುಗೆಮನೆಯನ್ನು ಈಗ ಮನೆಯ ಮುಖ್ಯ ಭಾಗವೆನ್ನುವಂತೆ ರೂಪಿಸಲಾಗುತ್ತಿದೆ. ಸಮಾಜದಲ್ಲಿ ಮಹಿಳೆಗೂ ಪ್ರಾತಿನಿಧ್ಯ ದೊರಕುತ್ತಿರುವಂತೆ ಅಡುಗೆ ಮನೆಗೂ ಪ್ರಾಮುಖ್ಯತೆ ದೊರೆಯುತ್ತಿದೆ.
ವಿದೇಶಗಳಲ್ಲಿ ಎರಡನೆಯ ವಿಶ್ವ ಯುದ್ಧದ ನಂತರ ಮಹಿಳೆಯರೂ ಉದ್ಯೋಗ ಮಾಡಲು ಪ್ರಾರಂಭಿಸಿದಾಗ, ಸಂಸ್ಕರಿಸಿದ ಮತ್ತು ಸಿದ್ಧಪಡಿಸಿದ ಆಹಾರದ ಬಳಕೆ ಹೆಚ್ಚಾಯಿತು. ನಮ್ಮ ದೇಶದಲ್ಲಿ ಜಾಗತೀಕರಣದ ನಂತರ ಹೆಣ್ಣುಮಕ್ಕಳು ಹೆಚ್ಚು ಹೆಚ್ಚು ವಿದ್ಯಾವಂತರಾಗಿ ಉದ್ಯೋಗಸ್ಥರಾದ ಮೇಲೆ ವಿದೇಶದಲ್ಲಾದಂತೆ ಅಡುಗೆಮನೆಯಲ್ಲಿ ಕೆಲಸ ಕಡಿಮೆಯಾಗಿ ಸಿದ್ಧಪಡಿಸಿದ ಆಹಾರದ ಬಳಕೆ ಹೆಚ್ಚಾಯಿತು. ಜೊತೆಯಲ್ಲಿ ಜೀವನಶೈಲಿಯ ಅವಲಂಬಿತ ಅನಾರೋಗ್ಯಗಳು ಹೆಚ್ಚಾದವು. ಮಾರುಕಟ್ಟೆಯಲ್ಲಿ ದೊರಕುವ ಸಿದ್ಧಪಡಿಸಿದ ಆಹಾರಗಳು ತಿನ್ನಲು ರುಚಿ ಎನಿಸಿದರೂ ಅದರಲ್ಲಿ ಹೆಚ್ಚಿನ ಕೊಬ್ಬಿನ ಅಂಶವಿರುತ್ತದೆ.
ದೀಪಾ ಅನಿವಾರ್ಯವಾಗಿ ಮಗಳ ಮನೆಗೆ ಹೋಗಬೇಕಾಯಿತು. ಮೊದಲಿನಿಂದಲೂ ಹೋಟೆಲ್ ಮತ್ತು ಬೇಕರಿಯ ರುಚಿ ರುಚಿ ತಿನಿಸುಗಳ ದಾಸನಾದ ಗಂಡನಿಗೆ, ಒಂದು ತಿಂಗಳ ನಂತರ ದೀಪಾ ಮನೆಗೆ ಹಿಂದಿರುಗುವ ಹೊತ್ತಿಗೆ ಕೊಲೆಸ್ಟ್ರಾಲ್ ಹೆಚ್ಚಾಗಿ ಅದಕ್ಕಾಗಿ ಚಿಕಿತ್ಸೆ ತೆಗೆದುಕೊಳ್ಳಬೇಕಾಯಿತು. ರುಚಿಗೆ ಮನಸೋತಾಗ, ನಾಲಿಗೆಯ ಚಪಲಕ್ಕೆ ದಾಸರಾದಾಗ ಅನಾರೋಗ್ಯ ಪೀಡಿತರಾಗಬೇಕಾಗುತ್ತದೆ. ಆದ್ದರಿಂದ ಎಲ್ಲೊ ಒಮ್ಮೊಮ್ಮೆ ಬದಲಾವಣೆಗೆಂದು ಹೊರಗಿನ ತಿಂಡಿ ತಿನಿಸು ತಿಂದರೂ ಮನೆಯಲ್ಲಿನ ಊಟ ತಿಂಡಿಗಳೇ ಆರೋಗ್ಯಕರ. ಇದು ಎಲ್ಲ ವೈದ್ಯರೂ, ಆಹಾರ ತಜ್ಞರೂ ಹೇಳುವ ಮಾತು.
ಅಲ್ಲದೆ, ಹಿಂದೆ ಅಡುಗೆಮನೆಯ ಕೆಲಸವೆಂದರೆ ಬರಿಯ ಹೆಣ್ಣಿನ ಕೆಲಸವೆಂದು ಭಾವಿಸುತ್ತಿದ್ದ ಕಾಲ ಬದಲಾಗಿದೆ. ಈಗ ಗಂಡು ಮಕ್ಕಳೂ ಅಡುಗೆ ಕಲಿಯುವ ಕಾಲ. ವಿದೇಶಕ್ಕೆ ಹೋಗುವ ಗಂಡುಮಕ್ಕಳು ಸಹ ಅಡುಗೆ ಕಲಿಯುತ್ತಾರೆನ್ನುವಾಗ ಈಗ ಅಡುಗೆ ಎನ್ನುವುದು ಹೆಣ್ಣು ಮಕ್ಕಳಿಗೇ ಸೀಮಿತವಾಗಿ ಉಳಿದಿಲ್ಲ.
ಅಜ್ಜಿಯ, ಅಮ್ಮನ ಕಾಲದ ಪುಳಿಯೋಗರೆ ಗೊಜ್ಜು, ಚಟ್ನಿ ಪುಡಿ, ಖಾರದ ಪುಡಿ ಮಾಡಿ ಮಾರುವುದು ಅತಿ ಹೆಚ್ಚು ಲಾಭ ಮಾಡುವ ಉದ್ಯಮವಾಗಿದೆ. ವಿದೇಶಕ್ಕೆ ಹೋಗುವ ಮಕ್ಕಳಿಗೆ ರೆಡಿಮಿಕ್ಸ್ ಮಾಡುವ ಪ್ರತಿಷ್ಠಿತ ಹೆಸರಿನ ಬ್ರ್ಯಾಂಡುಗಳೊಂದಿಗೆ ಮನೆಯಲ್ಲಿ ಈ ರೀತಿ ಮಾಡಿ ಮಾರುವ ಹೆಣ್ಣುಮಕ್ಕಳು ಸಾಕಷ್ಟು ಸಂಪಾದನೆ ಮಾಡುತ್ತಿದ್ದಾರೆ. ಪ್ರತಿಯೊಂದು ವಾಹಿನಿಯಲ್ಲೂ ಅಡುಗೆಯ ಕಾರ್ಯಕ್ರಮವಿಂದು ಗ್ಯಾರೆಂಟಿ ಮತ್ತು ಸಾಕಷ್ಟು ಜನಪ್ರಿಯ ಹೌದು. ಕುಕರಿ ಶೋಗಳಿಗೆಂದೇ ಪ್ರತ್ಯೇಕ ವಾಹಿನಿಗಳಿರುವುದು ಈಗ ಮಾಮೂಲು ಸಂಗತಿ. ಮಾಸ್ಟರ್‌ ಶೆಫ್‌ ಕಾರ್ಯಕ್ರಮ ದೇಶ ವಿದೇಶಗಳಲ್ಲೂ ಜನಪ್ರಿಯ ಮತ್ತು ಅಲ್ಲಿ ಗೆದ್ದವರು ಬಹಳಷ್ಟು ಹಣ ಮತ್ತು ಕೀರ್ತಿಯನ್ನು ಸಂಪಾದಿಸಿದ್ದಾರೆ.
ಹಿಂದೆ ಮನೆಯಲ್ಲಿ ರುಚಿರುಚಿಯಾಗಿ ಅಡುಗೆ ಮಾಡಿ ಎಲ್ಲರ ಹೊಟ್ಟೆ ತುಂಬಿಸುವುದು ಗೃಹಿಣಿಯ ಕೆಲಸವಾಗಿತ್ತು. ಆದರೆ ಈಗ ಬರಿಯ ರುಚಿಯಷ್ಟೇ ಅಲ್ಲ, ಸತ್ವಯುತ ಅಡುಗೆ ಮಾಡಿ ಪೌಷ್ಟಿಕಾಂಶಗಳ ಕಡೆ ಗಮನವೀಯುವುದು, ಮನೆ ಮಂದಿಯ ಆರೋಗ್ಯವನ್ನು ಕಾಪಾಡುವುದು ಗೃಹಿಣಿಯ ಕರ್ತವ್ಯವಾಗಿದೆ. ಭಾರತೀಯ ಹೆಣ್ಣು ಸಮರ್ಥವಾಗಿ ತನ್ನ ಅಡುಗೆಮನೆಯನ್ನು ನಿಭಾಯಿಸಬಲ್ಲಳು. ಆದರೆ ಮೊದಲಿನಂತೆ ಎಲ್ಲವನ್ನೂ ತಾನೊಬ್ಬಳೇ ಮಾಡಬೇಕಾಗಿಲ್ಲ. ಎಲ್ಲರೂ ಕೆಲಸವನ್ನು ಹಂಚಿಕೊಂಡು ಮಾಡಿದಾಗ ಅವಳ ಹೊರೆ ಕಡಿಮೆಯಾಗುವುದಲ್ಲದೆ, ಮಾಡುವ ಕೆಲಸದಲ್ಲಿ ಹುಮ್ಮಸ್ಸು ಮೂಡುತ್ತದೆ. ದಿನವಿಡೀ ಗಂಡ ಹೆಂಡತಿಯರಿಬ್ಬರೂ ಹೊರಗೆ ದುಡಿಯುವಾಗ ಪರಸ್ಪರ ಮಾತುಕಥೆಗೂ ಸಮಯವಿರುವುದಿಲ್ಲ. ಹೀಗಿರುವಾಗ ಒಟ್ಟಿಗೆ ಕೆಲಸ ಮಾಡುವಾಗ ಒಬ್ಬರಿಗೊಬ್ಬರು ಮತ್ತೂ ಹತ್ತಿರಾಗುವ ಸಾಧ್ಯತೆಗಳಿರುತ್ತವೆ. ತಾವೇ ಕೆಲಸ ಮಾಡಿದಾಗ ಆ ಕೆಲಸದ ಬೆಲೆಯೂ ಅರ್ಥವಾಗುತ್ತದೆ. ಆದ್ದರಿಂದ ಎಷ್ಟೇ ದುಡಿದರೂ ಅಥವಾ ಎಷ್ಟೇ ವಿದ್ಯಾವಂತರಾದರೂ ಅಡುಗೆಮನೆಯಿಂದ ದೂರ ಸರಿಯುವ ಸಮಯ ಇದಲ್ಲ. ಎಲ್ಲರೂ ಕೂಡಿ ಕೆಲಸ ಮಾಡಿದಾಗ ಸ್ವರ್ಗ ಸುಖಕ್ಕೆ ಸಮಾನವಾದ ಆರೋಗ್ಯ ನಿಮ್ಮದಾಗುತ್ತದೆ.
