ನಾವು ಚೀನಾ ಪ್ರವಾಸಕ್ಕೆ ಹೋದಾಗ ಕೆಲವು ಟ್ರಾವೆಲ್ಸ್ ನವರು ಚೀನಾದಲ್ಲಿ ಮಧ್ಯಾಹ್ನದ ಊಟ ನೀಡಲಾಗುವುದಿಲ್ಲ, ಅದನ್ನು ನೀವೇ ಅರೇಂಜ್‌ ಮಾಡಿಕೊಳ್ಳಬೇಕೆಂದರು. ಬೇರೆ ದೇಶಗಳಲ್ಲಿ ಅಂದರೆ ಯು.ಎಸ್‌.ಎ., ದುಬೈ ಇಂತೆಡೆಗಳೆಲ್ಲಾ ನಮ್ಮ ಊಟಕ್ಕೆ ಕೊರತೆ ಇಲ್ಲ ಬೇಕಾದಷ್ಟು ಭಾರತೀಯ ರೆಸ್ಟೋರೆಂಟ್‌ ಗಳಿವೆ. ಆದರೆ ಚೀನಾದಲ್ಲಿ ಊಟ ಕಷ್ಟ ಎಂದು ಎಲ್ಲರೂ ಹೇಳುತ್ತಿದ್ದರು. ಜೊತೆಗೆ ಅಲ್ಲಿ ಯಾವುದಕ್ಕೆ ಏನು ಹಾಕಿರುತ್ತಾರೋ ಗೊತ್ತಾಗುವುದಿಲ್ಲ, ಅವರು ಜಿರಲೇನೂ ತಿಂತಾರೆ ಎನ್ನುವ ಭಾವನೆ ನಮ್ಮವರದು, ಹೀಗಾಗಿ ಅಲ್ಲಿ ನಾವು ಊಟ ಹುಡುಕಿಕೊಂಡು ಹೇಗೆ ಹೋಗುವುದೆನ್ನುವ ಸಮಸ್ಯೆ ಇತ್ತು.
ಆದ್ದರಿಂದ ನಾವು ಮಧ್ಯಾಹ್ನದ ಊಟ ಕೊಡುವ ಕಂಪನಿಯನ್ನೇ ಆರಿಸಿಕೊಂಡೆವು. ಅಲ್ಲೂ ಸಹ ಅವರ ಪ್ರಕಾರ ಮಧ್ಯಾಹ್ನ ಚೈನೀಸ್‌ ರೆಸ್ಟೋರೆಂಟ್‌ ನಲ್ಲೇ ವೆಜ್‌ ಊಟ, ಒಂದು ರೀತಿಯಲ್ಲಿ ಸಮಾಧಾನವಾಯಿತು. ಸಸ್ಯಾಹಾರ ಏನು ಕೊಟ್ಟರೂ ಪರವಾಗಿಲ್ಲ ಎಂದುಕೊಂಡೆ. ಹಾಗೆಯೇ ಅವರ ಆಹಾರ ಹೇಗಿರುತ್ತದೆ ನೋಡಬಹುದೆನ್ನುವ ಕುತೂಹಲ. ನಾವು ಹೋಗುತ್ತಿದ್ದ ಭಾರತೀಯ ರೆಸ್ಟೋರೆಂಟ್‌ ಗಳು ಚಿಕ್ಕವು. ಊಟವೇನೋ ಚೆನ್ನಾಗಿರುತ್ತಿತ್ತು ಆದರೆ ಕೂರಲು, ಬಡಿಸಿಕೊಂಡು ಬರಲು ಸ್ವಲ್ಪ ಇಕ್ಕಟ್ಟಿರುತ್ತಿತ್ತು. ಅದರಲ್ಲೂ ಹಾಂಗ್‌ ಕಾಂಗ್‌ ನಲ್ಲಂತೂ ವಿಪರೀತ ಇಕ್ಕಟ್ಟು. ಚೈನಾದಲ್ಲಿ ಪರವಾಗಿಲ್ಲವೆನ್ನಬಹುದು, ಆದರೆ ಚೀನೀ ರೆಸ್ಟೋರೆಂಟ್‌ ಗಳಂತೂ ಬಹಳ ಚೆನ್ನಾಗಿದ್ದು, ಆಕರ್ಷಕವಾಗಿ ರೂಪಿಸಲಾಗಿತ್ತು. ಒಂದಕ್ಕಿಂತ ಒಂದು ವೈಭವೋಪೇತವಾಗಿದ್ದವೆನ್ನಬಹುದು, ವಿಶಾಲವಾಗಿ ಅಲಂಕೃತವಾಗಿದ್ದವು.
ಮಧ್ಯಾಹ್ನ ಚೀನೀಯರ ವೆಜ್‌ ಊಟದ ಬಗ್ಗೆ ನಾವು ಹೊರಡುವ ಮುಂಚೆ ಹೋಗಿ ಬಂದವರೊಬ್ಬರು ಹೇಳಿದ್ದು. ಅವರು ಬಹಳಷ್ಟು ತರಹದ ಭಕ್ಷ್ಯ ಬಡಿಸುತ್ತಾರೆ, ಆದರೆ ನಮಗೆ ಏನೂ ತಿನ್ನಲು ಆಗುವುದಿಲ್ಲ. ನೀವು ಸ್ವಲ್ಪ ಗೊಜ್ಜು ಅಥವಾ ಚಟ್ನಿಪುಡಿ ತೆಗೆದುಕೊಂಡು ಹೋಗಿ, ಅವರು ನೀಡುವ ಅನ್ನದ ಜೊತೆ ಕಲಸಿಕೊಂಡು ತಿನ್ನಬಹುದೆಂದರು. ಪ್ರವಾಸ ಎಂದ ಮೇಲೆ ಸ್ವಲ್ಪ ಕುರುಕಲು ತೆಗೆದುಕೊಳ್ಳುವುದು ಸರ್ವೇ ಸಾಮಾನ್ಯ, ಜೊತೆಗೆ ಉಪ್ಪಿನಕಾಯಿ, ಚಟ್ನಿಪುಡಿ ಸಹಾ ಇಟ್ಟುಕೊಂಡೆವು.
ಅವರ ಊಟದ ರೀತಿ ನನಗಂತೂ ಬಹಳ ಇಷ್ಟವಾಯಿತು. ದುಂಡನೆಯ ಟೇಬಲ್, ಮಧ್ಯದಲ್ಲೊಂದು ಗಾಜಿನ ಟೇಬಲ್ ಟಾಪ್‌ ಅದು ತಿರುಗುವಂತಹುದು. ಸುತ್ತಲೂ ಹತ್ತು ಜನ ಕೂರಬಹುದು. ಒಬ್ಬೊಬ್ಬರಿಗೆ ಒಂದು ಪುಟ್ಟ ತಟ್ಟೆ, ಒಂದು ಸೂಪ್‌ ಬೌಲ್‌, ಒಂದು ಟೀ ಕಪ್‌ ಮತ್ತು ಒಂದು ಲೋಟ ನೀರು ಅಥವಾ ಜ್ಯೂಸ್‌ ಯಾವುದಾದರೂ ಒಂದನ್ನು ಕೊಡುತ್ತಾರೆ. ಗಾಜಿನ ಟೇಬಲ್ ಟಾಪ್‌ ನ ಸುತ್ತಲೂ ತಟ್ಟೆಗಳಲ್ಲಿ ಒಂದಾದ ಮೇಲೆ ಒಂದು ಭಕ್ಷ್ಯಗಳನ್ನು ತಂದಿಡುತ್ತಿರುತ್ತಾರೆ.
ಹಸಿರು ತರಕಾರಿ, ಉದ್ದವಾಗಿ ತುರಿದ ಕ್ಯಾರೆಟ್‌, ಕೋಸು, ಬೇಯಿಸಿದ ಎಳಸಾದ ಬೀನ್ಸ್, ಎಳಸಾದ ಸಿಪ್ಪೆಸಹಿತ ಬಟಾಣಿ, ಸೋಯಾ ಬೀನ್ಸ್ ನಿಂದ ತಯಾರಿಸಿದ ಟೋಫು, (ನೋಡಲು ನಮ್ಮ ನುಚ್ಚಿನುಂಡೆಯಂತಿರುತ್ತದೆ) ಹುರಿದು ಸ್ವಲ್ಪ ಮಸಾಲೆ ಹಾಕಿದ ಬದನೆಕಾಯಿ, ಹೂಕೋಸು ಮತ್ತು ಕ್ಯಾರೆಟ್‌, ಬೇಯಿಸಿದ ಜೋಳ, ಬೇಯಿಸಿದ ಬಟಾಣಿ, ಹುರಿದ ಗೋಡಂಬಿ, ಬೇಯಿಸಿದ ಹಸಿರು ಬ್ರೋಕ್ಲಿ, ನಂತರ ಫ್ರೈಡ್‌ ರೈಸ್‌, ಒಂದು ಕೆಟಲ್ ನಲ್ಲಿ ಸಕ್ಕರೆ ಮತ್ತು ಹಾಲಿಲ್ಲದ ತಿಳಿಯಾದ ಟೀ, ಎಷ್ಟು ಬೇಕಾದರೂ ಬಗ್ಗಿಸಿಕೊಂಡು ಕುಡಿಯಬಹುದು! ತಿನ್ನಲು ಮಾತ್ರ ಬಹಳ ಪುಟ್ಟ ತಟ್ಟೆ.
