ಅದೆಷ್ಟೋ ಸಂಗತಿಗಳನ್ನು ಅರಿತುಕೊಂಡಾಗ್ಯೂ ಗೃಹಿಣಿಯರು ಹಲವು ಸಮಸ್ಯೆಗಳನ್ನು ಎದುರಿಸಬೇಕಾಗಿ ಬರುತ್ತದೆ…… ಎಷ್ಟೋ ಸಲ ಅವುಗಳಿಗೆ ಪರಿಹಾರ ಕಂಡುಕೊಳ್ಳುದು ಕಷ್ಟದಾಯಕ ಎನಿಸುತ್ತದೆ. ಇಲ್ಲವೇ ಅಂಥದೇ ಕೆಲವೇ ಸಮಸ್ಯೆಗಳಿಗೆ ಪರಿಹಾರ ಸೂಚಿಸಲಾಗಿದೆ.
ಉಣ್ಣೆ ಬಟ್ಟೆಯಲ್ಲಿ ಎಳೆಗಳು ಮೇಲೆದ್ದಿದ್ದರೆ ಅದು ಒಂದು ರೀತಿಯಲ್ಲಿ ಅಸಹ್ಯವಾಗಿ ಕಾಣಿಸುತ್ತವೆ. ಅಂತಹ ಸ್ಥಿತಿಯಲ್ಲಿ ಸ್ಪಾಂಜ್ನ್ನು ಒದ್ದೆ ಮಾಡಿಕೊಂಡು, ಬಳಿಕ ಅದನ್ನು ಎಳೆ ಎದ್ದಿರುವ ಜಾಗದಲ್ಲಿ ನಿಧಾನವಾಗಿ ಉಜ್ಜಿ. ಎಲ್ಲ ಎಳೆಗಳು ನಿವಾರಣೆಯಾಗುತ್ತವೆ. ಮತ್ತೊಂದು ಉಪಾಯವೆಂದರೆ, ಅಗಲವಾದ ಸೆಲೋಟೇಪ್ವೊಂದನ್ನು ಬೆರಳಿಗೆ ಸುತ್ತಿಕೊಳ್ಳಿ. ಅಂಟು ಇರುವ ಭಾಗ ಮೇಲ್ಭಾಗದಲ್ಲಿ ಬರುವಂತೆ ಹಿಡಿದುಕೊಳ್ಳಿ. ನಂತರ ಅದನ್ನು ಎಳೆಗಳ ಮೇಲೆ ಸುತ್ತಾಡಿಸಿ. ಎಲ್ಲಾ ಎಳೆಗಳು ಟೇಪ್ಗೆ ಅಂಟಿಕೊಂಡು ಸುಲಭವಾಗಿ ನಿವಾರಣೆಯಾಗುತ್ತವೆ.
ಮನೆಯಲ್ಲಿ ಯಾವುದಾದರೂ ಗಾಜಿನ ಸಾಮಾನು ಒಡೆದರೆ, ಅದರ ತುಂಡುಗಳನ್ನು ನಿವಾರಿಸಲು ಏನು ಮಾಡಬೇಕು ಗೊತ್ತೆ? ಕೈಯಲ್ಲೊಂದು ಹಳೆಯ ಬಟ್ಟೆ ಹಿಡಿದುಕೊಂಡು ದೊಡ್ಡ ತುಂಡುಗಳನ್ನು ಮೊದಲು ನಿವಾರಿಸಿ. ಬಳಿಕ ಚಿಕ್ಕ ತುಂಡುಗಳನ್ನು ನಿಧಾನವಾಗಿ ವೃತ್ತಾಕಾರದಲ್ಲಿ ಬಟ್ಟೆಯಿಂದ ಎತ್ತಿಕೊಳ್ಳಿ. ಬಳಿಕ ಬಟ್ಟೆಯನ್ನು ಒಗೆದು ಸ್ವಚ್ಛಗೊಳಿಸದೆ, ಅದನ್ನು ಎಸೆದುಬಿಡುವುದೇ ಉತ್ತಮ. ಸಣ್ಣ ಗಾಜಿನ ತುಂಡುಗಳನ್ನು ಎತ್ತಿಕೊಳ್ಳಲು ಬ್ರೆಡ್ ಸ್ಲೈಸ್ ಕೂಡ ಉಪಯೋಗಿಸಬಹುದು.
ಒಂದು ವೇಳೆ ನಲ್ಲಿ ಸೋರುತ್ತಿದ್ದರೆ ಅದನ್ನು ಆದಷ್ಟು ಬೇಗ ದುರಸ್ತಿ ಮಾಡಲು ಪ್ರಯತ್ನಿಸಿ. ಒಂದು ವೇಳೆ ದುರಸ್ತಿ ಮಾಡುವುದು ತಡವಾದಲ್ಲಿ ನಲ್ಲಿಯಿಂದ ಬೀಳುವ ಹನಿಯ ಸದ್ದು ಕಿರಿಕಿರಿ ಉಂಟು ಮಾಡಬಹುದು. ಅದರಿಂದ ಬಚಾವ್ ಆಗಲು ನೀರು ಬೀಳುವ ಜಾಗದಲ್ಲಿ ಒಂದು ಟಿಶ್ಶು ಪೇಪರ್ನ್ನು ಮಡಚಿ ಇಡಿ. ಇಲ್ಲವೇ ನಲ್ಲಿಯಿಂದ ನೆಲದ ತನಕ ದಾರನ್ನು ಇಳಿಬಿಡಿ. ನೀರು ದಾರದ ಮೂಲಕ ನಿಧಾನವಾಗಿ ಹರಿಯುತ್ತಿರುತ್ತದೆ.
ಫೆವಿಕ್ವಿಕ್ನ್ನು ಯಾವುದೇ ವಸ್ತು ಜೋಡಿಸುವಾಗ ಬಳಸುತ್ತೇವೆ. ಒಂದು ವೇಳೆ ಅದು ಬೆರಳುಗಳಿಗೆ ಪರಸ್ಪರ ಅಂಟಿಕೊಂಡಿದ್ದರೆ ನೇಲ್ ಪಾಲಿಶ್ ರಿಮೂರ್ಲೇಪಿಸಿ. ಬೆರಳುಗಳು ಬಿಡಿಸಿಕೊಳ್ಳುತ್ತವೆ.
ಈಚೆಗೆ ಉದ್ದನೆಯ ಜುಮಕಿ ಹಾಗೂ ಲೋಲಾಕುಗಳನ್ನು ಧರಿಸುವ ಫ್ಯಾಶನ್ ಇದೆ. ಆದರೆ ಅವು ಪರಸ್ಪರ ಒಂದಕ್ಕೊಂದು ಸಿಲುಕಿಕೊಳ್ಳುವ ಸಮಸ್ಯೆ ಉಂಟಾಗುತ್ತದೆ. ಅದಕ್ಕಾಗಿ ಸ್ವೆಟರ್ ಹೆಣೆಯುವ ಕಡ್ಡಿ (10ನೇ ನಂಬರ್ ಅಥವಾ ಅದಕ್ಕೂ ತೆಳ್ಳಗಿನದು) ತೆಗೆದುಕೊಂಡು ಅದರ ಮೇಲೆ ನಿಮ್ಮ ಇಷ್ಟದ ರಬ್ಬರ್ ಅಥವಾ ಲೇಸ್ ಸುತ್ತಿ. ಅದರ ಎರಡೂ ತುದಿಯ ಮೇಲೆ ದುಂಡನೆಯ ಗುಂಡು ಮಾಡಿ ಒತ್ತಿ ಅದನ್ನು ಒಣಗಲು ಬಿಡಿ. ಈಗ ನಿಮ್ಮ ಡ್ರೆಸ್ಸಿಂಗ್ ಟೇಬಲ್ಲಿನ ಒಳಭಾಗದಲ್ಲಿ ಎರಡು ಮೊಳೆ ಹೊಡೆದು ಅವನ್ನು ಅಲ್ಲಿ ತೂಗು ಬಿಡಿ, ಅವು ಸುರಕ್ಷಿತವಾಗಿರುತ್ತವೆ.
ಮನೆಯಲ್ಲಿ ಹಳೆಯ ಡ್ರಾಯರ್ಗಳು ವ್ಯರ್ಥವಾಗಿ ಬಿದ್ದಿದ್ದರೆ ಅವುಗಳ ಕೆಳಗೆ ಗಾಲಿಗಳನ್ನು ಅಳವಡಿಸಿ. ಅದರಲ್ಲಿ ಮನೆಯ ಹಳೆಯ ಆಟಿಕೆ, ಪೇಂಟ್ ಸಲಕರಣೆಗಳು, ಹಳೆಯ ಪುಸ್ತಕಗಳನ್ನು ಹಾಕಿ ಟೇಬಲ್ ಕೆಳಗಡೆ ಅಥವಾ ಮಂಚದ ಸರಿಸಿಬಿಡಿ. ಡ್ರಾಯರ್ನ್ನು ಗಾಲಿಗಳ ರಹಿತವಾಗಿಯೂ ಬಳಸಬಹುದು. ನೀವು ಸಾಮಾನುಗಳನ್ನು ಬಚ್ಚಿಡಬೇಕೆಂದರೆ ಅದರ ಮೇಲೆ ಕಾರ್ಡ್ಬೋರ್ಡ್ನಿಂದ ಡ್ರಾಯರ್ ಆಕಾರದಲ್ಲಿ ರೆಡಿ ಮಾಡಿಕೊಂಡು ಅದರ ಮೇಲೆ ಬಚ್ಚಿಡಬಹುದು.
ಸೋಪ್ನ ಉಳಿದ ತುಂಡುಗಳನ್ನು ಸಂಗ್ರಹಿಸಿ ಹಳೆಯ ಸಾಕ್ಸ್ ನಲ್ಲಿ ಹಾಕಿಡಿ. ಬಳಿಕ ಅದನ್ನು ರಬ್ಬರ್ ಬ್ಯಾಂಡ್ನಿಂದ ಕಟ್ಟಿ. ಅದನ್ನು ಸ್ನಾನ ಮಾಡುವಾಗ ಸೋಪ್ ಹಾಗೂ ಸ್ಕ್ರಬರ್ನಂತೆ ಉಪಯೋಗಿಸಬಹುದು.
ಸಾಮಾನ್ಯವಾಗಿ ಕ್ಯಾಲೆಂಡರ್ಗಳಲ್ಲಿ, ಮಿನಿ ಟೇಬಲ್ ಕ್ಯಾಲೆಂಡರ್ಗಳಲ್ಲಿ ಸುಂದರ ನೈಸರ್ಗಿಕ ಚಿತ್ರ ಹಾಕಿರುತ್ತಾರೆ. ವರ್ಷ ಮುಗಿದ ಬಳಿಕ ಆ ಚಿತ್ರಗಳನ್ನು ಕತ್ತರಿಸಿಕೊಂಡು ಇಟ್ಟುಕೊಳ್ಳಿ. ಚಾರ್ಟ್ ಪೇಪರ್ನಲ್ಲಿ ಅವನ್ನು ಗಾತ್ರಕ್ಕನುಗುಣವಾಗಿ ಅಂಟಿಸಿ. ಸ್ಕೆಚ್ ಪೆನ್ನಿಂದ ಗೆರೆ ಹಾಕಿ. ಮಧ್ಯದಲ್ಲಿ ಒಂದು ಕಡೆ ಆಕರ್ಷಕ ಸಂದೇಶ ಬರೆದು ಅದನ್ನು ತುಂಬಾ ಬೇಕಾದವರಿಗೆ ಕಳಿಸಿಕೊಡಿ.
ಮದುವೆ ಅಥವಾ ಇತರೆ ಸಮಾರಂಭಗಳಲ್ಲಿ ಕಾರ್ಡಿನ ಜೊತೆಗೆ ಸಿಹಿತಿಂಡಿ, ಡ್ರೈಫ್ರೂಟ್ಸ್ ಮುಂತಾದವುಗಳ ಬಾಕ್ಸ್ ಮೇಲೆ ಸುಂದರ ಅಲಂಕಾರಿಕ ಸಾಮಾನು ಅಂಟಿಸಿರುತ್ತಾರೆ. ಅದನ್ನು ಬಿಡಿಸಿ ಇಟ್ಟುಕೊಳ್ಳಿ. ಯಾರಿಗಾದರೂ ನೀವು ಗಿಫ್ಟ್ ಕೊಡುವ ಸಂದರ್ಭದಲ್ಲಿ ಈ ಸಾಮಾನುಗಳನ್ನು ಅಂಟಿಸಿ.
ಎಣ್ಣೆಯನ್ನು ಸಣ್ಣ ಮುಚ್ಚಳದ ಬಾಟಲ್ ನಲ್ಲಿ ಹಾಕಲು ನಿಮ್ಮ ಬಳಿ ಆಲಿಕೆ (ಫನಲ್) ಇರದಿದ್ದರೆ ಅಲ್ಯುಮಿನಿಯಂ ಫಾಯಿಲ್ ತೆಗೆದುಕೊಂಡು ಅದನ್ನು ಆಲಿಕೆಯಂತೆ ಮಾಡಿ ಎಣ್ಣೆ ಸುರಿಯಿರಿ.
– ಜಿ. ಮಾಲತಿ
