ಒಂದೂವರೆ ವರ್ಷದ ಹಿಂದೆ 1000 ರೂ. ಮತ್ತು 500 ರೂ. ನೋಟುಗಳನ್ನು ಸ್ಥಗಿತಗೊಳಿಸಿದಾಗ, ಹೊಸ ಕರೆನ್ಸಿಗಾಗಿ ಜನರು ಉದ್ದುದ್ದನೆಯ ಕ್ಯೂನಲ್ಲಿ ಎಟಿಎಂ ಹಾಗೂ ಬ್ಯಾಂಕ್‌ ಮುಂದೆ ನಿಲ್ಲಬೇಕಾಯಿತು. ನಗದು ಕೊರತೆಯಿಂದ ಅನೇಕ ಸಮಸ್ಯೆಗಳು ಎದುರಾದವು. ಈ ಮಧ್ಯೆ ಜನರಿಗೆ ಆನ್‌ಲೈನ್‌ ಬ್ಯಾಂಕಿಂಗ್‌ ಮತ್ತು ಕಾರ್ಡ್ ಮುಖಾಂತರ ನಡೆಸುವ ನಗದು ರಹಿತ ವ್ಯವಹಾರ ಜನರಿಗೆ ವರದಾನವಾಗಿ ಪರಿಣಮಿಸಿದವು.
ಪೆಟ್ರೋಲ್ ಪಂಪ್‌ನಿಂದ ಹಿಡಿದು ಆಹಾರ ಧಾನ್ಯಗಳ ಖರೀದಿತನಕ ಅಂಗಡಿಯವರು ಕಾರ್ಡ್ ಮೂಲಕ ಪೇಮೆಂಟ್‌ ಮಾಡಲು ಅವಕಾಶ ಕಲ್ಪಿಸಿದರು. ಬಿಲ್‌ಗಳ ಪಾವತಿಯಲ್ಲಿ ಆನ್‌ಲೈನ್‌ ಬ್ಯಾಂಕಿಂಗ್‌ ಬಹಳಷ್ಟು ಉಪಯುಕ್ತವಾಗಿ ಪರಿಣಮಿಸಿತು.
ಅಂದಹಾಗೆ ನಗದುರಹಿತ ವಹಿವಾಟಿನತ್ತ ಹೆಚ್ಚುತ್ತಿರುವ ಒಲವಿನ ಜೊತೆಗೆ, ಅಪಾಯಗಳು ಕೂಡ ಕಡಿಮೆ ಏನಿಲ್ಲ. ಕಾರ್ಡ್ ಮತ್ತು ಬ್ಯಾಂಕ್‌ ಅಕೌಂಟ್‌ ಹ್ಯಾಕಿಂಗ್‌ನ ಅಪಾಯ ಸದಾ ಕಾಡುತ್ತಿರುತ್ತದೆ. ಅದರ ಬಳಕೆಯಲ್ಲಿ ನೀವು ತೋರುವ ಒಂದಷ್ಟು ನಿರ್ಲಕ್ಷ್ಯತನ ನಿಮಗೆ ಬಹುದೊಡ್ಡ ಹಾನಿಗೆ ಕಾರಣವಾಗಬಹುದು.
ಏನಿದು ಹ್ಯಾಕಿಂಗ್‌?
ಆನ್‌ಲೈನ್‌ ಅಥವಾ ಕಾರ್ಡ್ ಮೂಲಕ ಮಾಡಲ್ಪಡುವ ಆನ್‌ಲೈನ್‌ ಪಾವತಿಯ ಸಂದರ್ಭದಲ್ಲಿ ಸಾಮಾನ್ಯವಾಗಿ ಹ್ಯಾಕರ್ಸ್‌ ಫೇಕ್‌ಪೇಜ್‌ ಅಥವಾ ಕಂಪ್ಯೂಟರ್‌ ವೈರಸ್‌ ಮುಖಾಂತರ ಜನರ ಡೆಬಿಟ್‌ ಕಾರ್ಡ್ ಅಥವಾ ಕ್ರೆಡಿಟ್‌ ಕಾರ್ಡ್ ಡೀಟೇಲ್ ಅಥವಾ ಆನ್‌ಲೈನ್‌ ಪಾಸ್‌ವರ್ಡ್‌ ಮುಂತಾದವುಗಳನ್ನು ಕದಿಯುತ್ತಾರೆ. ಇದನ್ನೇ `ಹ್ಯಾಕಿಂಗ್‌’ ಎಂದು ಹೇಳಲಾಗುತ್ತದೆ. ಅಕೌಂಟ್‌ ಮತ್ತು ಕಾರ್ಡ್ ಡೀಟೇಲ್‌ನ್ನು ಹ್ಯಾಕಿಂಗ್‌ ಮಾಡಿ ಹ್ಯಾಕರ್ಸ್‌ ಜನರ ಬ್ಯಾಂಕ್‌ ಖಾತೆಗಳನ್ನು ಆನ್‌ಲೈನ್‌ ಕಳ್ಳತನಕ್ಕೆ ಬಳಸಿಕೊಳ್ಳುತ್ತಾರೆ.
ಹ್ಯಾಕರ್ಸ್‌ ಭೀತಿ ತಪ್ಪಿದ್ದಲ್ಲ
2016ರಲ್ಲಿ ದೇಶದಲ್ಲಿ ಹಲವು ಬ್ಯಾಂಕುಗಳ 32 ಲಕ್ಷ ಎಟಿಎಂ ಕಾರ್ಡ್‌ಗಳ ರೀಟೇಲ್‌ನ್ನು ಹ್ಯಾಕ್‌ ಮಾಡಲಾಗುತ್ತದೆ. ಬ್ಯಾಂಕುಗಳು ತಕ್ಷಣವೇ ಕಾರ್ಯಪ್ರವೃತ್ತವಾಗಿ ಗ್ರಾಹಕರ ಎಟಿಎಂ ಕಾರ್ಡ್‌ಗಳನ್ನು ಬ್ಲಾಕ್‌ ಮಾಡಿಸಿತು. 2 ವಾರಗಳೊಳಗೆ ಹೊಸ ಡೆಬಿಟ್‌ ಕಾರ್ಡ್‌ಗಳನ್ನು ಜಾರಿಗೊಳಿಸಿದವು. ಬ್ಯಾಂಕುಗಳು ಪಿನ್‌ ನಂಬರ್‌ ಬದಲಿಸುವ ತನಕ ಗ್ರಾಹಕರಿಗೆ ಸಂಬಂಧಪಟ್ಟ ಖಾತೆಗಳಿಂದ ಪ್ರತಿದಿನದ ಹಣ ಪಡೆಯುವ ಮಿತಿಯನ್ನು 500ಕ್ಕೆ ಮಿತಿಗೊಳಿಸಿದ್ದವು. ದೇಶವಿದೇಶದಲ್ಲಿ ಹ್ಯಾಕರ್ಸ್‌ಗಳು ಗ್ರಾಹಕರಿಂದ ಯಾವುದಾದರೂ ತಪ್ಪು ಘಟಿಸುತ್ತಿಯೇ ಎಂಬುದನ್ನು ಕಾಯುತ್ತಿರುತ್ತಾರೆ. ಇದೇ ಕಾರಣದಿಂದ ನೆಟ್‌ ಬ್ಯಾಂಕಿಂಗ್‌ ಹಾಗೂ ಕಾರ್ಡ್
ಬಳಸುವಾಗ ಎಚ್ಚರದಿಂದ ಇರುವುದು ಅವಶ್ಯ.
ಅಕೌಂಟ್‌ ಹ್ಯಾಕ್‌ ಆದಾಗ….
ಸೈಬರ್‌ ಲಾ ಎಕ್ಸ್ಪರ್ಟ್‌ ಪವನ್‌ ಪ್ರಕಾರ, ನಗದು ರಹಿತ ವಹಿವಾಟು ಹೆಚ್ಚುತ್ತಾ ಹೋದಂತೆ ಹ್ಯಾಕಿಂಗ್‌ನ ಘಟನೆಗಳು ಸಾಮಾನ್ಯ ಎಂಬಂತಾಗಿ ಬಿಟ್ಟಿವೆ. ಇಂತಹ ಸ್ಥಿತಿಯಲ್ಲಿ ಖಾತೆ ಅಥವಾ ಕಾರ್ಡ್ ಹ್ಯಾಕ್‌ ಆಗಿಬಿಟ್ಟರೆ ವ್ಯಕ್ತಿ ತಕ್ಷಣವೇ ಜಾಗೃತನಾಗಬೇಕು. ಈ ಕಳಕಂಡ ಕ್ರಮಕ್ಕೆ ಮುಂದಾಗಬೇಕು.
ಹ್ಯಾಕಿಂಗ್‌ ಮಾಹಿತಿಯನ್ನು ತಕ್ಷಣವೇ ಬ್ಯಾಂಕ್‌ಗೆ ಕೊಡಿ ಹಾಗೂ ನಿಮ್ಮ ಕಾರ್ಡ್‌ನ್ನು ಬ್ಲಾಕ್‌ ಮಾಡಿ.
ನೀವು ಹೊರಗಡೆ ಇದ್ದರೆ ಬ್ಯಾಂಕಿನ ಕಸ್ಟಮರ್‌ ನಂಬರ್‌ಗೆ ಫೋನ್‌ ಮಾಡಿ ನಿಮ್ಮ ಕಾರ್ಡ್‌ನ್ನು ಬ್ಲಾಕ್‌ ಮಾಡಿಕೊಳ್ಳಿ.
ಬ್ಯಾಂಕಿಗೆ ಮಾಹಿತಿ ಕೊಟ್ಟು ನಿಮ್ಮ ಖಾತೆಯಿಂದ ಕಾರ್ಡ್ ಅಥವಾ ನೆಟ್‌ವರ್ಕಿಂಗ್‌ನ್ನು ನಿರ್ಬಂಧಗೊಳಿಸಿ.
ಪೊಲೀಸರಿಗೆ ಈ ಕುರಿತಂತೆ ಲಿಖಿತ ದೂರು ನೀಡಿ.
ಈ ಅವಧಿಯಲ್ಲಿ ನೀವು ಸ್ವತಃ ವಹಿವಾಟು ನಡೆಸಲು ಚೆಕ್‌ನ್ನು ಬಳಸಿ.
ನೀವು ನೆಟ್‌ವರ್ಕಿಂಗ್‌ ಹಾಗೂ ಕಾರ್ಡ್ ಮುಖಾಂತರ ಯಾವ ಖಾತೆಯಿಂದ ವಹಿವಾಟು ನಡೆಸುತ್ತೀರೋ ಆ ಖಾತೆಯಲ್ಲಿ ಹೆಚ್ಚು ಹಣ ಇಡಬೇಡಿ.
ನೀವು ಕ್ರೆಡಿಟ್‌ ಕಾರ್ಡ್ ಹೋಲ್ಡರ್‌ ಆಗಿದ್ದರೆ ಕ್ರೆಡಿಟ್‌ ಲಿಮಿಟ್‌ ಕಡಿಮೆ ಇಡಿ. ಏಕೆಂದರೆ ಹ್ಯಾಕಿಂಗ್‌ ಆದಾಗ ನಿಮಗೆ ಹೆಚ್ಚು ನಷ್ಟವಾಗದಿರಲಿ.
ಬ್ಯಾಂಕ್‌ನಿಂದ ನಷ್ಟ ಪರಿಹಾರ
ಹ್ಯಾಕಿಂಗ್‌ ಬಳಿಕ ಗ್ರಾಹಕನಿಗೆ ಆದ ನಷ್ಟವನ್ನು ಸಂಬಂಧಪಟ್ಟ ಬ್ಯಾಂಕು ತುಂಬಿಕೊಡಬೇಕಾಗುತ್ತದೆ. ಒಂದುವೇಳೆ ಹ್ಯಾಕಿಂಗ್‌ನಲ್ಲಿ 10,000 ರೂ. ಹಾನಿಯಾಗಿದ್ದಲ್ಲಿ ಅಷ್ಟು ಮೊತ್ತಕ್ಕಾಗಿ ನೀವು ಬ್ಯಾಂಕ್‌ನಿಂದ ಪರಿಹಾರ ಕೇಳಬಹುದು. ಬ್ಯಾಂಕ್‌ನ ನಿರ್ಲಕ್ಷ್ಯದಿಂದ ಹೀಗಾಯ್ತು ಎಂದು ನೀವು ಸಾಕಷ್ಟು ಪುರಾವೆಗಳನ್ನು ಕೊಡಬೇಕಾಗುತ್ತದೆ.
ಎಚ್ಚರಿಕೆ ಅಗತ್ಯ
ಕಾರ್ಡ್ ಅಥವಾ ನೆಟ್‌ ಬ್ಯಾಂಕಿಂಗ್‌ ಬಳಸುವ ಸಂದರ್ಭದಲ್ಲಿ ನೀವು ಸಾಕಷ್ಟು ಎಚ್ಚರಿಕೆಯಿಂದ ಇರುವುದು ಅತ್ಯವಶ್ಯ. ಒಂದುವೇಳೆ ನೀವು ನಿಮ್ಮ ನೆಟ್‌ ಬ್ಯಾಂಕಿಂಗ್‌ ಡೀಟೇಲ್, 16 ಅಂಕಿಗಳ ಕಾರ್ಡ್ ನಂಬರ್‌, ಕಾರ್ಡ್ ವ್ಯಾಲಿಡಿಟಿ ಅವಧಿ ಮತ್ತು ಕಾರ್ಡಿನ ಹಿಂಭಾಗದಲ್ಲಿರುವ 3 ಅಂಕಿಗಳ ಸಿವಿವಿ ನಂಬರ್‌ ಹೇಳಿಬಿಟ್ಟರೆ, ನೀವು ಕಷ್ಟಪಟ್ಟು ಸಂಪಾದಿಸಿದ ಹಣವನ್ನು ಅವರು ಲಪಟಾಯಿಸಬಹುದು.
ನಿಮ್ಮ ಎಟಿಎಂ ಪಿನ್‌ ನಂಬರ್‌ ಕಾಲಕಾಲಕ್ಕೆ ಬದಲಾಯಿಸುತ್ತ ಇರಬೇಕು. ಎಟಿಎಂಗೆ ಹೋಗಿ ನೀವು ಪಿನ್‌ ಕ್ರಮಾಂಕ ಬದಲಿಸಬಹುದು.
ಕಸ್ಟಮಸ್‌ ಕೇರ್‌ ಹೆಸರಿನಲ್ಲಿ ಯಾರಾದರೂ ಫೋನ್‌ ಮಾಡಿ ನಿಮ್ಮ ಕ್ರೆಡಿಟ್‌ ಕಾರ್ಡ್ ಅಥವಾ ಡೆಬಿಟ್‌ ಕಾರ್ಡ್ ನಂಬರ್‌ ಕೇಳಿದರೆ ಅವರಿಗೆ ನಿಮ್ಮ ಮಾಹಿತಿಯನ್ನು ವಿನಿಮಯ ಮಾಡಿಕೊಳ್ಳಬೇಡಿ.
ಯಾವುದೇ ಬ್ಯಾಂಕ್‌ ತನ್ನ ಗ್ರಾಹಕರಿಂದ ಕಾರ್ಡ್ ನಂಬರ್‌ ಅಥವಾ ಪಾಸ್‌ವರ್ಡ್‌ನ್ನು ಕೇಳುವುದಿಲ್ಲ.
ನಿಮ್ಮ ಖಾತೆಗೆ ಮೊಬೈಲ್ ನಂಬರ್‌ನ್ನು ಜೋಡಿಸಿ. ಇದರಿಂದ ಯಾವುದೇ ಸಂದರ್ಭದಲ್ಲಿ ಹಣ ತೆಗೆದಾಗ ನಿಮಗೆ ಎಸ್‌ಎಂಎಸ್‌ಬರುತ್ತದೆ.
ನಿಮ್ಮ ಆಫೀಸ್‌ ಅಥವಾ ವೈಯಕ್ತಿಕ ಕಂಪ್ಯೂಟರ್‌ನಿಂದ ಆನ್‌ಲೈನ್‌ ವಹಿವಾಟನ್ನು ನಡೆಸಿ. ಈ ಎರಡು ಕಡೆ ಆ್ಯಂಟಿವೈರಸ್‌ನ್ನು ಬಳಸಿ ಅದರಿಂದ ಸರ್ವರ್ ಸುರಕ್ಷಿತವಾಗಿರುತ್ತದೆ.
ಸೈಬರ್‌ ಕೆಫೆಗೆ ಹೋಗಿ ನೆಟ್‌ ಬ್ಯಾಕಿಂಗ್‌ ಅಥವಾ ಕಾರ್ಡ್ ಮುಖಾಂತರ ಹಣಕಾಸಿನ ವಹಿವಾಟು ನಡೆಸಬೇಡಿ. ಇಂತಹ ಕಡೆ ಹ್ಯಾಕಿಂಗ್‌ನ ಅಪಾಯ ಜಾಸ್ತಿ ಇರುತ್ತದೆ.
ನಿಮ್ಮ ನೆಟ್‌ ವರ್ಕಿಂಗ್‌ನ ಪಾಸ್‌ವರ್ಡ್‌ನ್ನು 2-3 ತಿಂಗಳಿಗೊಮ್ಮೆ ಬದಲಿಸುತ್ತಾ ಇರಿ.
ನೀವು ಮಾಡದೇ ಇರುವ ವಹಿವಾಟಿನ ಬಗ್ಗೆ ಸಂದೇಶ ಬಂದಿದ್ದರೆ, ಆ ಬಗ್ಗೆ ತಕ್ಷಣವೇ ಬ್ಯಾಂಕಿಗೆ ತಿಳಿಸಿ.
ಇಂತಹ ಸ್ಥಿತಿಯಲ್ಲಿ ಕಾರ್ಡ್ ಅಥವಾ ನೆಟ್‌ ಬ್ಯಾಂಕಿಂಗ್‌ ಮುಖಾಂತರ ಮಾಡುವ ವಹಿವಾಟನ್ನು ತಕ್ಷಣವೇ ನಿರ್ಬಂಧಿಸಿ.
ನೀವು ಲಾಟರಿಯಲ್ಲಿ ಇಷ್ಟು ಮೊತ್ತ ಗೆದ್ದಿರುವಿರಿ. ನೀವು ನಿಮ್ಮ ಖಾತೆಯ ನಂಬರ್‌ ಮುಂತಾದಗಳನ್ನು ಕೊಡಿ ಎಂದು ಎಸ್‌ಎಂಎಸ್‌, ಇಮೇಲ್‌ಗಳಲ್ಲಿ ಕೇಳಲಾಗುತ್ತದೆ. ಅಂತಹ ಸಂದೇಶಗಳನ್ನು ನೋಡುತ್ತಿದ್ದಂತೆಯೇ ರಿಮೂವ್ ಮಾಡಿ. ಅಪ್ಪಿತಪ್ಪಿಯೂ ಕೂಡ ಅಂತಹ ಮೇಲ್‌ಗೆ ಉತ್ತರ ಕೊಡಬೇಡಿ.
– ಎಸ್‌. ಮಾಧವಿ
