*ಪದಗಳೇ, ಸ್ವಲ್ಪ ನಿಲ್ಲಿ.*
ಭಾವ ತುಂಬಿ ದೈವದಲಿ ಮೊರೆಯಿಡುತಾ,
ಹಣತೆ ಹಚ್ಚುವ ಲೋಗರಿಗೆ ದೈವ ಕೃಪೆಯೆಡೆ
ಕರೆದೊಯ್ವ ನಿಮ್ಮನು ಕವಿತೆ ಮಾಡುವೆ.
ನೀವಲ್ಲವೇ ಭಕ್ತರ, ದೈವದೊಡನೆ ಬೆಸೆವ ಸೇತುವೆ?
ಬನ್ನಿ ಪದಗಳೇ ಬನ್ನಿರಿ.
*ಪದಗಳೇ, ಕರೆದಾಗ ಬನ್ನಿ.*
ಮಸಣದ ದಿಕ್ಕು ಮರೆತು "ನಾನು ನನ್ನಿಂದಲೇ"*
ಎಂದು ಮೆರೆದು ಸೊಟ್ಟಗಾದುದ, ಬಾಯಿ ಮುಚ್ಚಿಸಿ
ನಿಮ್ಮ ಮೂಲಕವೇ ಅಟ್ಟದಿಂದಿಳಿಸುವೆ.
ನನ್ನ ಅಕ್ಕಪಕ್ಕದಲ್ಲೇ ನಿಂತಿರಿ.
ಬನ್ನಿ ಪದಗಳೇ ಬನ್ನಿರಿ.
*ಪದಗಳೇ, ನನ್ನ ನಂಬಿ ಬನ್ನಿ.*
ವಜ್ರದಂತೆ ಕಠಿಣವಾದ ನಿಮ್ಮನು ಉಜ್ಜಿ ಉಜ್ಜಿ ಹೊಳೆವಂತಾಗಿಸಿ,
ಬಾಗಿ ಬಳಕುವ ಪುಟಕ್ಕಿಟ್ಟ ಬಂಗಾರದ ಹಾರವಾಗಿಸುವೆ.
ನಿಮ್ಮ ಕಾಠಿಣ್ಯವ ಮೆದುವಾಗಿಸಿ ಬಳಸುವೆ.
ಬನ್ನಿ ಪದಗಳೇ ಬನ್ನಿರಿ.
*ಪದಗಳೇ, ಒಂಚೂರು ಅತ್ತಿತ್ತ ಜರುಗಿ ನಿಲ್ಲಿ.*
ದುಃಖ ಹೆಪ್ಪುಗಟ್ಟಿದ್ದರೂ ನಿಮ್ಮನರ್ಥೈಸಿಕೊಳ್ವ ಮನವ ಕರಗಿಸಿ,
ಅಳಿಸಿ, ಹಗುರಾಗಿಸುವಲ್ಲಿ ನಿಮ್ಮನೇ ಮುಂದಾಳಾಗಿ ಸ್ಥಾಪಿಸುವೆ.
ಮನಸ್ಸಿಗೆ ಎಟುಕುವಷ್ಟು ದೂರ ದೂರ ನಿಲ್ಲಿ.
ಬನ್ನಿ ಪದಗಳೇ ಬನ್ನಿರಿ.
*ಪದಗಳೇ, ನಿಮಗೆ ಅಪಮಾನಗೊಳಿಸಲಾರೆ.*
ಮನಸಿನ ಮಾತುಗಳನು ಮಿದುಳಿಗೆ ತಾಕಿಸಿ,
ಕೆಟ್ಟುದನ್ನಲ್ಲೇ ಸೋಸಿ ನಂತರವೇ ನಾಲಿಗೆಗೆ ನೀಡುವೆ.
ನಿಮಗೆ ಗೌರವ ನೀಡುವೆ.
ದಯವಿಟ್ಟು ಬನ್ನಿ.
ಬನ್ನಿ ಪದಗಳೇ ಬನ್ನಿರಿ.
*ಪದಗಳೇ, ನಿಮ್ಮನು ಕಿಲಕಿಲನೆ ನಗಿಸುವೆ.*
ನಾಳೆಗಳ ನಂಬದಷ್ಟು ವಿಷಾದ, ದುಗುಡ
ತುಂಬಿದ ಮನಕೆ ನಿಮ್ಮ ನಗುವೇ ಔಷಧವು.
ಮೊದಲು, ನೀವು ನಗುನಗುತ್ತಾ ಇರುವಂದದಿ
ನಗೆಯ ಪಟ್ಟಕ್ಕೇ ನಿಮ್ಮನ್ನೇರಿಸುವೆ.
ಬನ್ನಿ ಪದಗಳೇ ಬನ್ನಿರಿ.
*ಪದಗಳೇ, ನೀವಿಲ್ಲದೆ ಕವನವೇ ಇಲ್ಲ.*
ಹೆಪ್ಪುಗಟ್ಟಿದ ಮೌನದಲಿ, ಮಂಜು ಮುಸುಕಿದ ಬೈಗಿಗೆ
ಮಲ್ಲಿಗೆಯ ಘಮಲು ಮುತ್ತನಿಕ್ಕಲು, ನಾಲಿಗೆ ತಡವರಿಸಿದೆ.
ಪದಗಳು ಬೇಕೇ ಬೇಕಿವೆ. ಈಗಲ್ಲದೆ ಮತ್ತೆಂದು ಬರುವಿರಿ?
ಬನ್ನಿ ಪದಗಳೇ ಬೇಗ ಬನ್ನಿರಿ.
*ಪದಗಳೇ, ನೀವೇಕೆ ಬರುತ್ತಿಲ್ಲ?ನಾನೇನು ತಪ್ಪು ಮಾಡಿದೆ?*
ಹೇಳಿ ಹೇಳಿ. ನಾನು ನಿಮ್ಮನೇನು ಸಾಲ ಕೇಳಿದೆನೇ?
ಮಹಾಮಹಿಮರ ಸಹವಾಸ ಬಿಟ್ಟು ಬರಲು ಕೋರಿದೆನೇ?
ನಿಮ್ಮನ್ನಾರಾಧಿಸುವ ನನಗೂ, ಅಲ್ಪ ಕರುಣೆ ತೋರಿರಿ.
ಬನ್ನಿ ಪದಗಳೇ ಬನ್ನಿರಿ.
*ಪದಗಳೇ ಬಳಿಗೆ ಬನ್ನಿ.*
ಸುಮ್ಮನೆ ಕುಳಿತು ನಿಂತು ಹೊತ್ತು ಕಳೆವ ನಿಮ್ಮನ್ನಾಯ್ದು
ಅಂದವಾಗಿ ಕಟ್ಟಿ, ಚಂದದ ಗುಚ್ಛವಾಗಿಸುವೆ.
ಗುರುವನ್ನು ಭಜಿಸುವ ಮಹಾಮಹಿಮರಲ್ಲಿಗೇ
ನಿಮ್ಮನ್ನು ಸೇರಿಸುವೆ.
ಬನ್ನಿ ಪದಗಳೇ ಬನ್ನಿರಿ.
*ಶಾಂತಿವಾಸು*
