ಜೀವನದಲ್ಲೊಮ್ಮೆ ಸಿಮ್ಲಾಗೆ ಹೋಗಲೇ ಬೇಕೆನ್ನುವುದು ನನ್ನವರ ವಾದ. ಮಿಕ್ಕೆಲ್ಲಾ ಗಿರಿಧಾಮಗಳಿಗಿಂತಾ ಅವರ ದೃಷ್ಟಿಯಲ್ಲಿ ಸಿಮ್ಲಾ ವಿಭಿನ್ನವಾದುದು. ಆದ್ದರಿಂದ ಈ ಬಾರಿ ದೆಹಲಿಗೆ ಹೋದಾಗ ಸಿಮ್ಲಾಗೆ ಹೋಗುವುದೆನ್ನುವ ನಿರ್ಧಾರವಾಯಿತು. ದೆಹಲಿಯಿಂದ ರಸ್ತೆ, ರೈಲು ಮತ್ತು ವಿಮಾನದಿಂದ ಹೋಗಬಹುದು. ಆದರೆ ಸಾಮಾನ್ಯವಾಗಿ ಎಲ್ಲರೂ ಹೋಗುವುದು ರೈಲಿನಲ್ಲಿಯೇ. ಹಾಗಾಗಿ ನಾವು ಸಹ ಹಾಗೆಯೇ ಮಾಡಿದೆವು. ದೆಹಲಿಯಿಂದ ಕಾಲ್ಕಾಗೆ ಶತಾಬ್ದಿಯಲ್ಲಿ, ನಂತರ ಅಲ್ಲಿಂದ ಟಾಯ್‌ಟ್ರೈನ್‌ನಲ್ಲಿ ಸಿಮ್ಲಾಗೆ ಪಯಣ, ಟಾಯ್‌ ಟ್ರೈನ್‌ನಲ್ಲಿ ಹೋಗುವಾಗ ಅದು ಸುತ್ತಿ ಸುತ್ತಿ ಮೇಲೇರುತ್ತಿದ್ದಂತೆ ಉದ್ದಕ್ಕೂ ಸಾಲು ಸಾಲಾಗಿ ಬೆಳೆದ ದೇವದಾರು ವೃಕ್ಷಗಳು, ಹಸಿರು ಕಣಿವೆಗಳ ದರ್ಶನವಾಗುತ್ತಿತ್ತು. ದಟ್ಟವಾದ ಹಸಿರನ್ನು ನೋಡಲು ಕಣ್ಣಿಗೆ ತಂಪೆನಿಸಿತು, ಮಧ್ಯೆ ಮಧ್ಯೆ ಸುರಂಗಗಳ ಒಳಗೆ ನುಸುಳುವಾಗ ಅವರು ವಿದ್ಯುತ್‌ ದೀಪನ್ನು ಆರಿಸಿ ಜೋರಾಗಿ ಕೂಗುತ್ತಿದ್ದರು. ಉತ್ತರ ಭಾರತದವರು ಜೀವನವನ್ನು ಅನುಭವಿಸುವ ರೀತಿಯೇ ಚಂದ. ನೃತ್ಯ, ಹಾಡು ಮತ್ತು ನಗೆಚಾಟಿಕೆ ಅವರ ಸ್ವಭಾವಕ್ಕಂಟಿದ್ದು, ಕೆಲವಂತೂ ಬಹು ಉದ್ದದ ಸುರಂಗಗಳು, ಹಸಿರು ಸವಿಯುತ್ತಾ ಮಧ್ಯೆ ಮಧ್ಯೆ ಇಳಿಯುತ್ತಾ ಐದು ಗಂಟೆಗಳ ಪ್ರಯಾಣ ಮೊದಲಿಗೆ ಹಿತಿವೆನಿಸಿದರೂ ನಂತರ ಸ್ವಲ್ಪ ಬೇಸರವೇ ಆಯಿತು. ಚಿಕ್ಕ ಸೀಟುಗಳ ಟಾಯ್‌ ಟ್ರೈನ್‌ನಿಂದ ಹೊರ ನೋಟ ಚಂದವಾದರೂ ಆಯಾಸವಾದದ್ದಂತೂ ನಿಜವೇ ಸರಿ. ಅಲ್ಲೂ ಲಕ್ಷುರಿಯ ಕೆಲವು ಬೋಗಿಗಳಿದ್ದವು. ಅದಕ್ಕೆ ಸ್ವಲ್ಪ ಮೊದಲೇ ಬುಕ್‌ ಮಾಡಬೇಕಿತ್ತೆಂದು ನಂತರ ತಿಳಿಯಿತು. ದೆಹಲಿಯಿಂದ ಬೆಳಿಗ್ಗೆ ಏಳಕ್ಕೆ ಹೊರಟರು ಹನ್ನೆರಡಕ್ಕೆ ಕಾಲ್ಕಾ ತಲುಪಿ ನಂತರ ಪುಟ್ಟ ಟ್ರೈನ್‌ನಿಂದ ಸಿಮ್ಲಾ ತಲುಪುವ ಹೊತ್ತಿಗೆ ಐದು ಘಂಟೆಯಾಯಿತು.
ಬ್ರಿಟಿಷರ ಬೇಸಿಗೆಯ ರಾಜಧಾನಿ
ದೆಹಲಿಯಲ್ಲಿ ಬಿಸಿಲು ಸುಡುತ್ತಿದ್ದರೂ ಸಿಮ್ಲಾ ತಂಪಾಗಿತ್ತು. ಅಷ್ಟಲ್ಲದೆ ಬ್ರಿಟಿಷರು ಅದನ್ನು ಅವರ ಬೇಸಿಗೆಯ ರಾಜಧಾನಿ ಮಾಡಿಕೊಂಡಿದ್ದರೇ? ಭಾರತದ ಅತ್ಯಂತ ಸುಂದರ ಗಿರಿಧಾಮಗಳಲ್ಲಿ ಒಂದಾಗಿದೆ. ಬ್ರಿಟಿಷರ ಗಮನ ಅಲ್ಲಿ ಬೀಳುವ ಮುನ್ನ ಅದೊಂದು ಪುಟ್ಟ ಹಳ್ಳಿಯಾಗಿತ್ತು. 1814ರಲ್ಲಿ ಅದನ್ನು ತಮ್ಮ ಬೇಸಿಗೆಯ ರಾಜಧಾನಿಯನ್ನಾಗಿ ಮಾಡಿಕೊಂಡರು. ಕಾಳಿಯ ಅವತಾರವಾದ ಶ್ಯಾಮಾ ಎನ್ನುವ ದೇವತೆಯ ಹೆಸರಿನಿಂದ ಸಿಮ್ಲಾ ಆಯಿತು. ಭೂಲೋಕದ ಸ್ವರ್ಗವೆನಿಸಿಕೊಂಡಿರುವ ಸಿಮ್ಲಾ ಬಲು ಸುಂದರ, ಹಾವಿನಂತೆ ಸಾಗುವ ರಸ್ತೆಗಳ ಅಕ್ಕಪಕ್ಕ ದೇವದಾರು ಮತ್ತು ಪೈನ್‌ ವೃಕ್ಷಗಳ ಧಾರೆಯೇ ಅಲ್ಲಿದೆ.
ಬಲು ಎತ್ತರ ಈ ತಂಪುಧಾಮ
ಸಮುದ್ರದಿಂದ 2130 ಮೀ. ಎತ್ತರದಲ್ಲಿ ಹಿಮಾಲಯ ಪ್ರದೇಶದಲ್ಲಿದೆ. ಈ ಪುಟ್ಟ ನಗರ 25 ಚದರ ಕಿ.ಮೀ. ವಿಸ್ತೀರ್ಣದ ಪರ್ವತ ಶ್ರೇಣಿಯಲ್ಲಿದ್ದು, ಮುಖ್ಯವಾದ ಎರಡು ರಸ್ತೆಗಳನ್ನು ಹೊಂದಿದೆ. ಪಶ್ಚಿಮದಿಂದ ಪೂರ್ವಕ್ಕೆ ಇಳಿಯುವ ಮಾಲ್‌ ರಸ್ತೆಯಿಂದ ದಕ್ಷಿಣ ಭಾಗವನ್ನು ಸುತ್ತುವರೆದಿರುವ ಕಾರ್ಟ್‌ ರಸ್ತೆಯತ್ತ ಸಾಗುತ್ತಾ ಮಾಲ್‌ ರಸ್ತೆಯ ಮೇಲ್ಭಾಗದಲ್ಲಿನ ರಿಡ್ಜ್ ರಸ್ತೆಯಿಂದ ಜಕೊ ಬೆಟ್ಟದವರೆಗೂ ಸಾಗುತ್ತದೆ. ವರ್ಷದ ಯಾವ ಸಮಯದಲ್ಲಿ ಹೋದರೂ ಸಿಮ್ಲಾದಲ್ಲಿ ಚೆನ್ನಾಗಿರುತ್ತದೆ. ಮಳೆಗಾಲದಲ್ಲಿ ಹೊಳೆಯುವ ಹಸಿರು ಮನ ತಣಿಸಿದರೆ, ಚಳಿಗಾಲದಲ್ಲಿ ಮಂಜು ಮೈ ಮರೆಸುತ್ತದೆ. ಇಡೀ ಭಾರತದ ಅತ್ಯುನ್ನತ ಗಿರಿಧಾಮವಾದ ಸಿಮ್ಲಾದಲ್ಲಷ್ಟೆ ನೈಸರ್ಗಿಕ ಮಂಜಿನಲ್ಲಿ ಸ್ಕೀಯಿಂಗ್‌ ಮಾಡಲು ಸಾಧ್ಯವಿರುವುದು. ವಿಸ್ತೀರ್ಣ ಸಣ್ಣದಾದರೂ ನೋಡಲು ಬಹಳಷ್ಟು ಸುಂದರ ಸ್ಥಳಗಳಿವೆ.
