ಜಿಮ್ ನಲ್ಲಿ ಸಂಧ್ಯಾ ಜೊತೆ ಟ್ರೆಡ್‌ಮಿಲ್ ಮೇಲೆ ವಾಕ್‌ ಮಾಡುತ್ತಾ ಶಾಪಿಂಗ್‌ಗೆ ಹೋಗುವ ಪ್ಲಾನ್‌ ಮಾಡಿದೆ. ನಾನು ಮನೆಗೆ ಹೋಗಿ ಸ್ನಾನ ಮಾಡಿ, ಫ್ರೆಶ್‌ ಆಗಿ, ಒಂದಿಷ್ಟು ಆಹಾರ ಸೇವನೆ ಮಾಡಿದೆ. ಅಷ್ಟರಲ್ಲಿ ಸಂಧ್ಯಾಳ ಫೋನ್‌ ಬಂತು. ಅವಳು ಹೇಳಿದ್ದು, “ಇವತ್ತು ನಾನು ಬರೋಕೆ 1 ಗಂಟೆ ತಡವಾಗುತ್ತೆ. ಅಡುಗೆ ಕೆಲಸ ಮತ್ತು ಮನೆ ಸ್ವಚ್ಛತೆ ಮಾಡಿ ಮುಗಿಸಬೇಕು. ನಮ್ಮ ಮನೆ ಕೆಲಸದವಳು ಇಂದು ಬಂದಿಲ್ಲ. ಬರಲು ಆಗುವುದಿಲ್ಲ ಎಂದು ಮೊದಲೇ ಹೇಳಿರಲಿಲ್ಲ,” ಎಂದಳು. ನಾನಾದರೂ ಏನು ಮಾಡಲು ಸಾಧ್ಯವಿತ್ತು? 1 ಗಂಟೆ ತಡವಾದರೂ ಸರಿ, ಹೋಗಲು ತಯಾರಾದೆ. ಏಕೆಂದರೆ ಮರುದಿನ ಸಂಜೆ ನನಗೆ ಡಾಕ್ಟರ್‌ಅಪಾಯಿಂಟ್‌ಮೆಂಟ್‌ ಇತ್ತು. ನಮಗೀಗ ಶಾಪಿಂಗ್‌ಗೆ ಕಡಿಮೆ ಸಮಯವಿತ್ತು. ಮಕ್ಕಳು ಶಾಲೆಯಿಂದ ವಾಪಸ್‌ ಬರುವ ಮೊದಲೇ ನಾವು ಮನೆಗೆ ವಾಪಸ್‌ ಬರಬೇಕಿತ್ತು.
ಅನೇಕ ಸಮಸ್ಯೆಗಳು
ಮರುದಿನ ನಮ್ಮ ಮನೆ ಕೆಲಸದಾಕೆ ತಡವಾಗಿ ಬಂದಳು. ನಾನು ಬೆಡ್‌ರೂಮ್ ಲಾಕ್‌ ಮಾಡಿ ಮನೆಯ ಬೀಗದ ಕೈಗಳನ್ನು ಪಕ್ಕದ ಮನೆಯವರ ಕೈಗೆ ಕೊಟ್ಟು ಬಂದೆ. ಏಕೆಂದರೆ ಅವಳು ಬಂದು ಮನೆಯ ಅಡುಗೆ ಹಾಗೂ ಸ್ವಚ್ಛತೆಯ ಕೆಲಸ ಮುಗಿಸಲಿ ಎನ್ನುವುದು ನನ್ನ ಅಪೇಕ್ಷೆಯಾಗಿತ್ತು. ನಾನು ಅವಳೊಬ್ಬಳನ್ನೇ ಮನೆಯಲ್ಲಿ ಬಿಟ್ಟು ಹೋಗುವುದು ಸರಿ ಎನಿಸುತ್ತಿರಲಿಲ್ಲ. ಆದರೆ ಹೋಗಲೇಬೇಕಾದ ಅನಿವಾರ್ಯತೆ ಇತ್ತು. ಏಕೆಂದರೆ ನನ್ನದು ಸಣ್ಣ ಕುಟುಂಬ. ಈ ಸಮಸ್ಯೆ ಸಾಮಾನ್ಯವಾಗಿ ಎಲ್ಲರದ್ದೂ ಆಗಿರುತ್ತದೆ. ನೌಕರಿ ಮತ್ತು ವರ್ಗಾವಣೆಗಳಿಂದಾಗಿ ಒಟ್ಟು ಕುಟುಂಬಗಳು ಒಡೆದು ಹೋಗುತ್ತಿವೆ. ಇನ್ನೊಂದು ಕಡೆ ಉದ್ಯೋಗಸ್ಥ ಮಹಿಳೆಯರ ಸಂಖ್ಯೆ ಹೆಚ್ಚುತ್ತಿದೆ. ಮಕ್ಕಳು, ವೃದ್ಧರು ಮನೆಯಲ್ಲಿ ಹೆಚ್ಚು ಕಡಿಮೆ ಮನೆಗೆಲಸದವರನ್ನೇ ಅಲಂಬಿಸಿದ್ದಾರೆ.
ಮನೆಯ ಸ್ವಚ್ಛತೆಯ ಕೆಲಸದಿಂದ ಹಿಡಿದು ಅಡುಗೆ ಕೆಲಸದ ತನಕ, ಪುಟ್ಟ ಮಕ್ಕಳನ್ನು ನೋಡಿಕೊಳ್ಳುವುದರಿಂದ ಹಿಡಿದು, ಹಿರಿಯ ನಾಗರಿಕರನ್ನು ಗಮನಿಸಿಕೊಳ್ಳುವುದರ ತನಕ ಹಲವು ಕೆಲಸಗಳನ್ನು ಈ ಮನೆಗೆಲಸದವರು ಮಾಡುತ್ತಾರೆ. ಅವರಿಂದಾಗಿ ಹಲವು ಅನುಕೂಲಗಳು ಆಗುತ್ತಿವೆ. ಅದರ ಜೊತೆಗೆ ಅವರಿಂದ ಕೆಲಸ ಮಾಡಿಸಿಕೊಳ್ಳಲು ಹಲವು ಸಮಸ್ಯೆಗಳೂ ಆಗುತ್ತಿವೆ.
ಮೇಡ್‌ ಮೇಡಮ್ ಪರಸ್ಪರ ಪೂರಕ
ಬೆಂಗಳೂರಿನಲ್ಲಿ ವಾಸಿಸುವ ಕೃತಿಕಾ ಹೀಗೇ ಹೇಳುತ್ತಾರೆ, “ನಾನು ಗರ್ಭಿಣಿಯಾಗಿದ್ದಾಗ ನನ್ನ ಮನೆಯಲ್ಲಿ ಕೆಲಸ ಮಾಡುತ್ತಿದ್ದ ಯುವತಿ ನನ್ನ ಬಗ್ಗೆ ಹೆಚ್ಚಿನ ಕಾಳಜಿ ವಹಿಸಿದಳು. ಕೆಲವೊಂದು ಕೆಲಸಗಳನ್ನು ನಾನು ಹೇಳದಿದ್ದರೂ ಅವಳೇ ಮಾಡುತ್ತಿದ್ದಳು. ಮಗಳಿಗೆ ಜನ್ಮ ನೀಡಿದ ಬಳಿಕ ಕೂಡ ಅವಳು ಮಗುವಿನ ಪಾಲನೆಗೆ ಸಾಕಷ್ಟು ನೆರವು ನೀಡಿದಳು. ನಾನು ಯಾವುದಾದರೂ ಕೆಲಸದಲ್ಲಿ ಮಗ್ನಳಾದರೆ ಅವಳು ಮಗುವನ್ನು ನೋಡಿಕೊಳ್ಳುತ್ತಿದ್ದಳು. ಹೊರಗಡೆ ಹೋದಾಗ ನನ್ನೊಂದಿಗೆ ಬಂದು ಮಗುವನ್ನು ನೋಡಿಕೊಂಡು ನನ್ನ ಕೆಲಸ ಕಾರ್ಯಗಳನ್ನು ಮಾಡಿಕೊಳ್ಳಲು ಸಹಾಯ ಮಾಡುತ್ತಿದ್ದಳು.
“ಅವಳ ನಡವಳಿಕೆ ಗಮನಿಸಿ ನಾವೆಲ್ಲ ಅವಳಿಗೆ ಮನೆಯ ಸದಸ್ಯೆ ಎಂಬಂತೆ ಭಾವಿಸಿದೆವು. ಮನೆಗೆ ಯಾರಾದರೂ ಸಂಬಂಧಿಕರು ಬಂದರೆ ನಮ್ಮ ಮನೆಯ ಸದಸ್ಯೆ ಎಂಬಂತೆಯೇ ಪರಿಗಣಿಸುತ್ತಿದ್ದರು. ನಾನು ಸ್ವತಃ ಅವಳ ಕೌಟುಂಬಿಕ ಅಗತ್ಯಗಳ ಬಗ್ಗೆ ಗಮನಹರಿಸುತ್ತಿದ್ದೆ. ನಾವಿಬ್ಬರೂ ಪರಸ್ಪರ ಪೂರಕ ಎಂಬಂತಿದ್ದೆವು. ಕೆಲವು ವರ್ಷಗಳ ಬಳಿಕ ಅವಳು ಮದುವೆಯಾಗಿ ಹೋದಾಗ ನಾವು ಅವಳಿಗೆ ಮಗಳ ಹಾಗೆಯೇ ವಿದಾಯ ಹೇಳಿದೆವು. ಅವಳ ಕೌಟುಂಬಿಕ ಅಗತ್ಯಗಳನ್ನು ಪೂರೈಸಿದೆವು!”
ಪರಿಸ್ಥಿತಿಯ ಕೈಗೊಂಬೆ
ಮೈಸೂರಿನ ಕೋಮಲಾ ಹೇಳುತ್ತಾರೆ, “ನಾನು ನಮ್ಮನೆಯ ಕೆಲಸದವಳಿಗೆ ಮನೆಯ ಸದಸ್ಯೆಯ ಹಾಗೆಯೇ ಗೌರವ ಕೊಡುತ್ತಿದೆ. ನನಗೆ ಎರಡನೇ ಮಗುವಿನ ಜನನದ ಬಳಿಕ ಅವಳಿಗೆ ಇಲ್ಲಿಯೇ ಉಳಿದುಕೊಳ್ಳಲು ಅವಕಾಶ ಕೊಟ್ಟಿದ್ದೆ. ಆದರೆ ಅವಳು ಮನೆಯಲ್ಲಿ ಕಳ್ಳತನ ಮಾಡಲು ಶುರು ಮಾಡಿದಳು. “ಅಡುಗೆಮನೆಯಲ್ಲಿ ಆಹಾರ ವಸ್ತುಗಳ ಕಳ್ಳತನದಿಂದ ಶುರು ಮಾಡಿಕೊಂಡು ಕ್ರಮೇಣ ಬೀರುವಿನಲ್ಲಿ ಇಟ್ಟಿದ್ದ ಚಿನ್ನದ ಬಳೆಗಳಿಗೆ ಕೈ ಹಾಕಿದಳು. ನಾನು ಈ ಕುರಿತಂತೆ ಪೊಲೀಸ್‌ ಠಾಣೆಗೆ ದೂರು ಸಲ್ಲಿಸಿದೆವು. ಆ ಬಳಿಕ ನನ್ನ ಮನೆಯಲ್ಲಿ ಯಾರೊಬ್ಬರೂ ಕೆಲಸ ಮಾಡಲು ಬರಲಿಲ್ಲ!”
ವರ್ಗಾವಣೆಗೊಂಡು ಚೆನ್ನೈಗೆ ಹೋದ ಮೀನಾಕ್ಷಿ ಹೇಳುತ್ತಾರೆ, “ಭಾಷೆ ಎಲ್ಲಕ್ಕೂ ದೊಡ್ಡ ಸಮಸ್ಯೆ. ಅಲ್ಲಿ ಕನ್ನಡ ಕೆಲಸಗಾರರು ಸಿಗೋದು ಕಷ್ಟ. ಹೀಗಾಗಿ ತಮಿಳು ಕೆಲಸಗಾರರನ್ನೇ ಮನೆಗೆ ಕರೆತಂದೆ. ಅದಕ್ಕಾಗಿ ನಾನು ಅಷ್ಟಿಷ್ಟು ತಮಿಳು ಕಲಿತೆ.
“ವಾಣಿಜ್ಯ ಕ್ಷೇತ್ರದಲ್ಲಿ ಇರುವ ಕಾರಣದಿಂದ. ಅಪಾರ್ಟ್‌ಮೆಂಟ್‌ನಲ್ಲಿ ಹೆಚ್ಚಿನವರು ಉದ್ಯೋಗಿಗಳೇ. ಹೀಗಾಗಿ ಕೆಲಸದವರಿಗೆ ತುಂಬಾ ಬೇಡಿಕೆ. ಹೆಚ್ಚಿನ ಸಂಬಳದ ಅಪೇಕ್ಷೆಯಿಂದ ಕೆಲಸದವರು ಆಗಾಗ ಕೆಲಸ ಬಿಟ್ಟು ಹೊರಟುಬಿಡುತ್ತಾರೆ. ಒಬ್ಬರು ಹೊರಟುಹೋದರೆ 4 ಮನೆಯಲ್ಲಿ ಕೆಲಸಕ್ಕೆ ಬೇಡಿಕೆ ಸೃಷ್ಟಿಯಾಗುತ್ತದೆ.”
ವಿದೇಶದಲ್ಲಿ ಕೆಲಸ ಮಾಡಿ ಬಂದವರಿಗೆ ಕೆಲಸದವರು ಬಾಯಿಗೆ ಬಂದಂತೆ ಸಂಬಳ ಹೇಳುತ್ತಾರೆ. ಎಷ್ಟು ಕೊಟ್ಟರೂ ಸಾಲದು. ಅವರು ಹೇಳಿದಂತೆ ನಾವೇ ಕೇಳಬೇಕಾದ ಸ್ಥಿತಿ ಉದ್ಭವಿಸುತ್ತದೆ. ದಿನದಿನಕ್ಕೆ ಅವರ ಬೇಡಿಕೆಗಳು ಹೆಚ್ಚುತ್ತಲೇ ಇವೆ. ಅದರ ದುರ್ಲಾಭವನ್ನು ಅವರು ಪಡೆದುಕೊಳ್ಳುತ್ತಿದ್ದಾರೆ. ಸರಿಯಾದ ಸಮಯಕ್ಕೆ ಕೆಲಸಕ್ಕೆ ಬರದೇ ಇರೋದು ಅವರಿಗೆ ಅಭ್ಯಾಸವೇ ಆಗಿಬಿಟ್ಟಿದೆ.
ಓದುಬರಹ ಬಲ್ಲವಳು ಬೇಕು
ಇದು ಪ್ರತಿಯೊಬ್ಬ ಸಾಮಾನ್ಯ ಮಹಿಳೆಯ ಸಮಸ್ಯೆ. ಎಲ್ಲರಿಗೂ ಒಳಿತು, ಪ್ರಾಮಾಣಿಕ, ಸಮಯಕ್ಕೆ ಸರಿಯಾಗಿ ಬರುವ ಕೆಲಸದವಳ ಅವಶ್ಯಕತೆ ಇದೆ. ಆದರೆ ಮೇಲ್ಕಂಡ ಎಲ್ಲ ಗುಣಗಳೂ ಒಬ್ಬಳಲ್ಲೇ ಇರುವುದು ಕಷ್ಟಕರ.
ಇಂದಿನ ದಿನಗಳಲ್ಲಿ ಮನೆಗೆಲಸದವಳು ಪ್ರತಿಯೊಂದು ಮನೆಯ ಜೀವನರೇಖೆಯೇ ಆಗಿಬಿಟ್ಟಿದ್ದಾಳೆ. ಕೆಲಸದಾಕೆಗೆ ಸ್ವಲ್ಪ ಸಂಬಳ ಜಾಸ್ತಿ ಕೊಟ್ಟರೂ ಪರವಾಗಿಲ್ಲ. ವಿದ್ಯಾವಂತೆ ಆದವಳನ್ನೇ ಆಯ್ಕೆ ಮಾಡಿ.
– ರುಚಿತಾ ರಾವ್
ಸಮಸ್ಯೆ ಜೊತೆ ಪರಿಹಾರ ಇದೆ
ಸಮಸ್ಯೆ ಇದ್ದರೆ ಅದಕ್ಕೆ ಪರಿಹಾರವನ್ನು ನಾವೇ ಹುಡುಕಿಕೊಳ್ಳಬೇಕು. ಒಳ್ಳೆಯ ಮನೆಗೆಲಸದವಳು ಸಿಗಲು ನಾವು ಏನು ಮಾಡಬೇಕು? ಅದಕ್ಕೆ ಈ ಕೆಳಕಂಡ ಸಂಗತಿಗಳ ಮೇಲೊಮ್ಮೆ ಕಣ್ಣು ಹರಿಸಿ :
ಕೆಲಸಗಾರರು ಕೂಡ ತಮ್ಮ ಮಕ್ಕಳನ್ನು ಶಾಲೆಗೆ ಕಳಿಸಿಯೇ ಕೆಲಸಕ್ಕೆ ಹೊರಡುತ್ತಾರೆ. ಎಷ್ಟೋ ಸಲ ಅವರು ಕೆಲಸಕ್ಕೆ ಬರುವ ಗಡಿಬಿಡಿಯಲ್ಲಿ ಹಸಿದ ಹೊಟ್ಟೆಯಲ್ಲಿ ಹಾಗೆಯೇ ಹೊರಡುತ್ತಾರೆ. ಅಂಥ ಸ್ಥಿತಿಯಲ್ಲಿ ನಿಮ್ಮ ಒಂದು ಕಪ್‌ ಟೀ/ಕಾಫಿ ಅವಳ ಹೊಟ್ಟೆಯ ಹಸಿವನ್ನು ಸ್ವಲ್ಪ ಹೊತ್ತು ಮುಂದೂಡಬಹುದು.
ಕೆಲಸಗಾರರು ಕೂಡ ತಮ್ಮ ಕುಟುಂಬದವರೊಂದಿಗೆ ಕಾಲ ಕಳೆಯಲು ಇಚ್ಛಿಸುತ್ತಾರೆ. ಅವರ ಮಕ್ಕಳು ಎಂದಾದರೊಮ್ಮೆ ಅನಾರೋಗ್ಯ ಪೀಡಿತರಾಗುತ್ತಾರೆ. ಸ್ವತಃ ಅವಳು ಕೂಡ. ಹೀಗಾಗಿ ಅವಳಿಗೆ ರಜೆ ನೀಡಲು ಜಿಪುಣತನ ಬೇಡ.
ಮೇಡಂ ಹೇಗೆ ಹೊರಗೆ ಹೋಗಲು ಸಮಯ ಹೊಂದಿಸಿಕೊಳ್ಳುತ್ತಾರೋ, ಅದೇ ರೀತಿ ಇವರಿಗಾಗಿಯೂ ಸ್ವಲ್ಪ ಸಮಯ ಹೊಂದಿಸಿಕೊಳ್ಳಿ. ಅವರು ಆಫೀಸಿನಲ್ಲಲ್ಲ, ಮನೆಯಲ್ಲಿ ಕೆಲಸ ಮಾಡುತ್ತಾರೆ. ಅವರಿಗೆ ಒಮ್ಮೊಮ್ಮೆ ವೈಯಕ್ತಿಕ ಕೆಲಸಗಳು ಬಂದೇ ಬರುತ್ತವೆ. ಅವರು ರಜೆಯನ್ನೇನೂ ಕಳೆದುಕೊಳ್ಳಲು ಇಷ್ಟಪಡುವುದಿಲ್ಲ.
ಅವರ ಜೊತೆ ಅಮಾನವೀಯ ರೀತಿಯಲ್ಲಿ ವರ್ತಿಸಬೇಡಿ. ಅವರೊಂದಿಗೆ ಮಾತನಾಡುವ ನಿಮ್ಮ ಭಾಷಾಶೈಲಿ ಗೌರವಯುತವಾಗಿರಲಿ.
ಎಷ್ಟೋ ಸಲ ಮೇಡಂ ಪ್ರವಾಸಕ್ಕೆಂದು ಹಲವು ದಿನ ಮನೆಯಲ್ಲಿ ಇರುವುದಿಲ್ಲ. ಆ ಅವಧಿಯಲ್ಲಿ ಕೆಲಸದವಳ ಸಂಬಳ ಕಡಿಮೆ ಮಾಡಿ ಕೊಡುವುದು ಸರಿಯಲ್ಲ. ಅವರ ಮನೆ ನಡೆಯುವುದು ನೀವು ಕೊಡುವ ಸಂಬಳದಿಂದಲೇ ಅಲ್ವಾ?
ಅವರಿಗೆ ಕೊಡುವ ಸಂಬಳದ ಮೊತ್ತ ಕಡಿಮೆ. ಹೀಗಾಗಿ ಅದನ್ನು ಸಕಾಲಕ್ಕೆ ಕೊಡಿ.
ನಿಮ್ಮ ಕೆಲಸದವಳು ಪ್ರಾಮಾಣಿಕಳಾಗಿದ್ದರೆ, ಅವಳ ವರ್ತನೆ ನಿಮಗೆ ಹಿಡಿಸಿದ್ದರೆ ಅದಕ್ಕೆ ಪ್ರತಿಯಾಗಿ ಅವಳಿಗೆ ಏನಾದರೂ ಸಿಗಬೇಕು. ಇಲ್ಲದಿದ್ದರೆ ಒಳ್ಳೆಯದು ಕೆಟ್ಟದ್ದರಲ್ಲಿ ವ್ಯತ್ಯಾಸವಾದರೂ ಏನಿದೆ?
ತಿಂಗಳು ಮುಗಿಯುವ ಮುನ್ನವೇ ಅವರ ಪರ್ಸ್‌ ಖಾಲಿಯಾಗಬಹುದು. ಹೀಗಾಗಿ ಯಾವಾಗಲಾದರೊಮ್ಮೆ, ಹಬ್ಬದ ಸಂದರ್ಭದಲ್ಲಿ ಅಡ್ವಾನ್ಸ್ ಕೊಡಿ.
ನೈಸರ್ಗಿಕ ವಿಕೋಪ ಬೆಂಕಿ ಅನಾಹುತ, ಪ್ರವಾಹ, ಭೂಕಂಪದ ಸಂದರ್ಭದಲ್ಲಿ ನಿಮ್ಮ ಕೆಲಸದವಳ ಮನೆಯನ್ನು ಪುನಃ ಕಟ್ಟಿಸಬೇಕಾದ ಸಂದರ್ಭದಲ್ಲಿ ನೀವು ಸ್ವಲ್ಪ ನೆರವಾಗಿ.
ವರ್ಷದಲ್ಲಿ ಒಂದು ಸಲ ಅವಶ್ಯವಾಗಿ ಬೋನಸ್‌ ಕೊಡಿ. ಅವರು ಎಂದಿನ ದಿನಸಿ ವಸ್ತುಗಳ ಜೊತೆ ಒಂದಿಷ್ಟು ಬಟ್ಟೆಗಳನ್ನು ಖರೀದಿಸಲು ಸಾಧ್ಯವಾಗಬೇಕು.
ಮನೆಗೆಲಸದವರಿಗೆ ಪಿಎಫ್‌ ಅಥವಾ ಬೇರಾವುದೇ ಸೌಲಭ್ಯಗಳಿರುವುದಿಲ್ಲ. ಸಂಘಟಿತ ಉದ್ಯಮದಲ್ಲಿ ಎಲ್ಲ ಸೌಲಭ್ಯಗಳೂ ಇರುವುದಿಲ್ಲ. ಅವರಿಗೆ ಅನಾರೋಗ್ಯದ ಸಂದರ್ಭದಲ್ಲಿ ಔಷಧಿಯ ಖರ್ಚು ನೀವೇ ನೋಡಿಕೊಳ್ಳಿ.
ಎಷ್ಟೋ ಸಲ ಮೇಡಂ ಅವಳ ಕೆಲಸದ ಬಗ್ಗೆ ತೃಪ್ತಿ ಇರದ್ದಿದರೆ, ಕೆಲವೊಮ್ಮೆ ಅಗತ್ಯ ಇಲ್ಲದಿದ್ದರೂ ಅವಳನ್ನು ತೆಗೆದುಹಾಕಿ ಬೇರೊಬ್ಬಳನ್ನು ತೆಗೆದುಕೊಳ್ಳುತ್ತಾರೆ. ಇದು ಅವಳ ಖರ್ಚಿನ ಮೇಲೆ ಹೊಡೆತ ಕೊಡುತ್ತದೆ.
