ಚಳಿಗಾಲ ಬರುತ್ತಲೇ ಎಲ್ಲರಿಗೂ ಬೆಚ್ಚನೆಯ ಉಡುಪುಗಳು ನೆನಪಾಗುತ್ತವೆ. ಉಣ್ಣೆಯ ಬಟ್ಟೆಗಳು ನಾಜೂಕಾಗಿರುತ್ತವೆ. ಹೀಗಾಗಿ ಇವಕ್ಕೆ ಕೊಂಚ ವಿಶೇಷ ಗಮನ ಕೊಡುವುದು ಅಗತ್ಯ. ಅವುಗಳ ಸ್ಪೆಷಲ್ ಕೇರ್‌ ಅವುಗಳ ಬೆಚ್ಚನೆಯ ಗುಣವನ್ನು ಖಾಯಮ್ಮಾಗಿಡುತ್ತದೆ.
ಧರಿಸುವ ಮೊದಲು ಗಮನದಲ್ಲಿಡಿ
ಒಂದು ವೇಳೆ ಕಳೆದ ವರ್ಷ ಉಣ್ಣೆಯ ಬಟ್ಟೆಗಳನ್ನು ಎತ್ತಿಡುವಾಗ ಒಗೆದಿಲ್ಲವೆಂದಾದರೆ, ಈಗಲೇ ಒಗೆಯಬೇಕು. ಏಕೆಂದರೆ ಉಣ್ಣೆಯ ಬಟ್ಟೆಗಳಿಗೆ ಮುಗ್ಗಲು ವಾಸನೆ ಹಿಡಿಯುತ್ತದೆ. ಉಣ್ಣೆಯ ಬಟ್ಟೆಗಳಲ್ಲಿ ದುರ್ವಾಸನೆ ಬೀರುತ್ತಿದ್ದರೆ ಅವನ್ನು ಒಗೆಯುವ ಬದಲು ಕಾಗದದ ಮೇಲೆ ಹರಡಿ ಬಿಸಿಲಿನಲ್ಲಿಡಿ. ನಂತರ ತಣ್ಣೀರಿನಲ್ಲಿ ವುಲನ್‌ಲಿಕ್ವಿಡ್‌ ಡಿಟರ್ಜೆಂಟ್ ಹಾಕಿ ಉಣ್ಣೆಯ ಬಟ್ಟೆಗಳನ್ನು 10 ನಿಮಿಷ ಅದರಲ್ಲಿಟ್ಟು ನೆನೆಸಿ ನಂತರ ಅವನ್ನು ಕುರ್ಚಿಯ ಮೇಲೆ ಹರಡಿ ಬಿಸಿಲಿನಲ್ಲೇ ಒಣಗಿಸಿ. ಉಣ್ಣೆಯ ಬಟ್ಟೆಗಳನ್ನು ಎಂದೂ ಬಿಸಿ ನೀರಿನಲ್ಲಿ ಒಗೆಯಬೇಡಿ.
ಕಲೆಯನ್ನು ಹೀಗೆ ಮಾಯ ಮಾಡಿ
ಚಾಕಲೇಟ್‌ನ ಗುರುತುಗಳನ್ನು ಹೋಗಲಾಡಿಸಲು ಸ್ಪಾಂಜನ್ನು ತಣ್ಣೀರಿನಿಂದ ಒದ್ದೆ ಮಾಡಿ ಚಾಕಲೇಟ್‌ನ ಗುರುತಿನ ಮೇಲೆ ಹಗುರವಾಗಿ ಉಜ್ಜಿ ತೆಗೆಯಿರಿ.
ಒಂದು ವೇಳೆ ಉಣ್ಣೆಯ ಬಟ್ಟೆಯ ಮೇಲೆ ಟೀ ಚೆಲ್ಲಿದ್ದರೆ ಕೂಡಲೇ ಅದರ ಮೇಲೆ ಸಕ್ಕರೆ ಸಿಂಪಡಿಸಿ. ಆಗ ಕಲೆ ಗಾಢವಾಗುವುದಿಲ್ಲ. ಸ್ವಲ್ಪ ಹೊತ್ತಿನ ನಂತರ ಆ ಬಟ್ಟೆಯನ್ನು ಉಗುರು ಬೆಚ್ಚಗಿನ ನೀರಿನಲ್ಲಿ ಒಗೆಯಿರಿ. ಕಲೆ ಮಾಯವಾಗುವುದು.
ಒಂದು ವೇಳೆ ಉಣ್ಣೆಯ ಬಟ್ಟೆ ಅಥವಾ ಕಂಬಳಿಯ ಮೇಲೆ ಎಣ್ಣೆಯ ಕಲೆ ಇದ್ದರೆ ಮೊದಲು ಆ ಭಾಗಕ್ಕೆ ಮೊಸರನ್ನು ಹಗುರವಾಗಿ ಹಚ್ಚಿ. ನಂತರ ನೀರಿನಿಂದ ತೊಳೆಯಿರಿ. ಕಲೆಯ ಮೇಲೆ ಪೌಡರ್‌ ಉದುರಿಸಿದರೆ ಕಲೆ ತೆಳುವಾಗುತ್ತದೆ.
ಹಣ್ಣಿನ ಕಲೆಗಳನ್ನು ದೂರ ಮಾಡಲು ಕಲೆಗಳ ಮೇಲೆ ಗ್ಲಿಸರಿನ್‌ ಹಚ್ಚಿ ಒಗೆಯಿರಿ. ಕಲೆ ಮಾಯವಾಗುವುದು.
ಉಣ್ಣೆಯ ಬಟ್ಟೆ ಒಗೆಯುವ ವಿಧಾನ
ಉಣ್ಣೆಯ ಕೊಳೆ ಬಟ್ಟೆಗಳನ್ನು ಸ್ವಲ್ಪ ಹೊತ್ತು ತಣ್ಣೀರಿನಲ್ಲಿ ನೆನೆಸಿಡಿ. ಬಟ್ಟೆ ನೆನೆಸಲು ಒಳ್ಳೆಯ ಲಿಕ್ವಿಡ್‌ ಡಿಟರ್ಜೆಂಟ್ ಬಳಸಿ. ಒಂದು ವೇಳೆ ಬಟ್ಟೆ ಹೆಚ್ಚು ಕೊಳೆಯಾಗಿದ್ದರೆ 5 ನಿಮಿಷಗಳವರೆಗೆ ತಣ್ಣೀರಿನಲ್ಲಿ ನೆನೆಸಿಡಿ. ಅದರಿಂದ ಕೊಳೆ ಬಟ್ಟೆ ಸಡಿಲವಾಗುತ್ತದೆ. ನಂತರ ಡಿಟರ್ಜೆಂಟ್ ಬೆರೆತ ನೀರಿನಲ್ಲಿ ಒಗೆಯಿರಿ.
ವುಲನ್‌ ಬ್ಲೇಝರ್‌ನ್ನು ಡ್ರೈಕ್ಲೀನ್‌ ಮಾಡಿಸುವ ಬದಲು ಮನೆಯಲ್ಲಿಯೇ ಸ್ವಚ್ಛ ಟವೆಲ್ನ್ನು ಬೇಬಿ ಶ್ಯಾಂಪೂನಲ್ಲಿ ನೆನೆಸಿ ಅದರಿಂದ ಒರೆಸಿ. ಒಣಗಿದ ನಂತರ ಕಾಗದದಿಂದ ಹಗುರವಾಗಿ ಒತ್ತಿ. ಬ್ಲೇಝರ್‌ ಹೊಸದರಂತೆ ಕಾಣುತ್ತದೆ.
ಉಣ್ಣೆಯ ಬಟ್ಟೆಗಳನ್ನು ಒಗೆಯಲು ನೀರಿನಲ್ಲಿ ವುಲನ್‌ ಡಿಟರ್ಜೆಂಟ್ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ. ಅದರಲ್ಲಿ ಬಟ್ಟೆಗಳನ್ನು ನೆನೆಸಿ. ಕೈಗಳಿಂದ ಉಜ್ಜಿ ಕೊಳೆ ತೆಗೆಯಿರಿ. ನಂತರ ಸ್ವಚ್ಛ ನೀರಿನಲ್ಲಿ ಒಗೆಯಿರಿ. ಒಗೆದ ನಂತರ ಅದನ್ನು ಹಿಂಡದೆ ದಪ್ಪ ಟವೆಲ್ ಮೇಲೆ ಹರಡಿ ಎಳೆಬಿಸಿಲಿನಲ್ಲಿ ಒಣಗಿಸಿ.ಮಾಹಿತಿ.
ಒಂದು ವೇಳೆ ಉಣ್ಣೆಯ ಬಟ್ಟೆಗಳಲ್ಲಿ ಗುಂಜು ಎಳೆ ಬಂದಿದ್ದರೆ ರೇಜರ್‌ನಲ್ಲಿ ಹೊಸ ಬ್ಲೇಡ್‌ ಹಾಕಿ ಅದನ್ನು ಸ್ವೆಟರ್‌ ಮೇಎ ಒಂದೇ ದಿಕ್ಕಿನಲ್ಲಿ ಚಾಯಿಸಿ. ಎಲ್ಲಾ ಗುಂಜು ಎಳೆಗಳೂ ದೂರಾಗಿ ಸ್ವೆಟರ್‌ ಹೊಸದಾಗಿ ಕಂಡುಬರುತ್ತದೆ.
ಒಂದು ವೇಳೆ ಉಣ್ಣೆಯ ಬಟ್ಟೆ ಮುದುರಿದ್ದರೆ ಅದಕ್ಕೆ ಸ್ವಲ್ಪ ಹೊತ್ತು ಹಬೆ ಹಾಯಿಸಿ ಕಂಬಳಿಯ ಮೇಲೆ ಹರಡಿ ಒಣಗಿಸಿ. ಅವು ಮೊದಲಿನಂತೆ ಆಗುತ್ತವೆ.
ಉಣ್ಣೆ ಉಡುಗೆ ಪ್ರೆಸ್‌ ಮಾಡುವುದು ಹೇಗೆ?
ಜೆಂಟ್ಸ್ ಸೂಟ್‌, ಪ್ಯಾಂಟ್‌ ಇತ್ಯಾದಿ ಪ್ರೆಸ್‌ ಮಾಡುವಾಗ ಒದ್ದೆ ಮಾಡಿದ ಕರ್ಚೀಫ್‌ ಅಥವಾ ಮೃದು ಬಟ್ಟೆಯನ್ನು ಹಿಂಡಿ ಬೆಚ್ಚಗಿನ ಉಡುಪಿನ ಮೇಲಿಟ್ಟು ಪ್ರೆಸ್‌ ಮಾಡಿ. ಅದರಿಂದ ಆ ಬಟ್ಟೆಗಳಲ್ಲಿ ಹೊಳಪು ಬರುತ್ತದೆ. ಸ್ವೆಟರ್‌ನ್ನೂ ಹೀಗೆಯೇ ಪ್ರೆಸ್‌ ಮಾಡಿ. ಪ್ಯೂರ್‌ ವುಲನ್‌ ಸ್ವೆಟರನ್ನು ಉಲ್ಟಾ ಮಾಡಿ ಪ್ರೆಸ್‌ ಮಾಡಿ. ಪ್ಯಾಂಟ್‌ನ್ನು ನೇರವಾಗಿಯೇ ಪ್ರೆಸ್‌ ಮಾಡಿ. ಇಲ್ಲದಿದ್ದರೆ ಅದರ ಮಡಿಕೆ ಹಾಳಾಗುತ್ತದೆ. ಪಶ್ಮೀನಾ ಶಾಲು, ಸ್ವೆಟರ್‌ ಇತ್ಯಾದಿಗಳನ್ನೂ ಇದೇ ರೀತಿ ಪ್ರೆಸ್‌ ಮಾಡಿ. ಹೀಗೆ ಕೊಂಚ ಎಚ್ಚರಿಕೆ ವಹಿಸಿದರೆ ಬೆಚ್ಚಗಿನ ಉಡುಪುಗಳ ಲೈಫ್‌ ಹೆಚ್ಚಾಗುತ್ತದೆ.
– ಪ್ರಮೀಳಾ ದೇವಿ
