ಆಹಾರ ಮೇಳದಲ್ಲಿ ನೃತ್ಯ ವೈಭವ :
ವಿಶ್ವ ವಿಖ್ಯಾತವಾದ ಮೈಸೂರು ದಸರಾ ಮಹೋತ್ಸದ ಅಂಗವಾಗಿ ಆಹಾರ ಮೇಳದಲ್ಲಿ ಬಗೆಬಗೆಯ ತಿಂಡಿತಿನಿಸುಗಳನ್ನು ಸವಿದು ತಮ್ಮ ಜಿಹ್ವಾ ಚಾಪಲ್ಯವನ್ನು ತೀರಿಸಿಕೊಳ್ಳಲು ಬರುವ ಪಾಕ ಆಸ್ವಾದಕರನ್ನು ರಂಜಿಸಲೆಂದು ಸ್ಕೌಟ್‌ ಅಂಡ್‌ ಗೈಡ್‌ ಮೈದಾನದಲ್ಲಿ ಆಯೋಜಿಸಲಾಗಿದ್ದ ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ಆಪ್ತಮಿತ್ರ ಖ್ಯಾತಿಯ ನೃತ್ಯಪಟು ಮತ್ತು ಗುರು ಶ್ರೀಧರ್‌ ಜೈನ್‌ ತಂಡದವರು ಸುಮಾರು ಎರಡು ಗಂಟೆಗಳ ಕಾಲ ನಡೆಸಿಕೊಟ್ಟ ಚಲನಚಿತ್ರ ಗೀತೆಗಳ ನೃತ್ಯ ವೈಭವವಂತೂ ಪ್ರೇಕ್ಷಕರನ್ನು ಮೋಡಿ ಮಾಡುವಲ್ಲಿ ಯಶಸ್ವಿಯಾಯಿತು.
ಗಾನಗಂಧರ್ವ ಗಾಯನದ ಮೋಡಿ :
ದೇಶ ಕಂಡಿರುವ ಅದೇ ದುರ್ಲಭ ಕಂಠಸಿರಿಯ ಗಾಯಕರಲ್ಲಿ ಒಬ್ಬರಾದ ಪಂಡಿತ್‌ಜಸರಾಜ್‌ ರವರ ಹಿಂದೂಸ್ಥಾನಿ ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮವನ್ನು ವಿಶ್ವ ವಿಖ್ಯಾತವಾದ ಮೈಸೂರು ದಸರಾ ಮಹೋತ್ಸವದ ಅಂಗವಾಗಿ ಅರಮನೆಯ ಆರಣದಲ್ಲಿ ಆಯೋಜಿಸಲಾಗಿತ್ತು.
ಪ್ರಶಸ್ತಿ ಪ್ರದಾನ ಸಮಾರಂಭ :
ಇತ್ತೀಚೆಗೆ ಪಿರಿಯಾಪಟ್ಟಣದ ಆದಿಚುಂಚನಗಿರಿ ಸಮುದಾಯ ಭವನದಲ್ಲಿ ನಡೆದ ದಾರಿದೀಪ ವಾರಪತ್ರಿಕೆಯ ವಾರ್ಷಿಕೋತ್ಸವ ಸಮಾರಂಭದಲ್ಲಿ ಹುಣಸೂರಿನ ರಂಗಭೂಮಿ ಕಲಾವಿದ ಹಾಗೂ ಚಿತ್ರನಟ ಕುಮಾರ್ ಅರಸೇಗೌಡರಿಗೆ `ಕಾಯಕರತ್ನ’ ಪ್ರಶಸ್ತಿಯನ್ನು ಖ್ಯಾತ ಚಿತ್ರನಟ ನಿರ್ಮಾಪಕ ದ್ವಾರಕೀಶ್‌ ಪ್ರದಾನ ಮಾಡಿದರು. ಸಂಪಾದಕ ಕಂಪ್ಲಾಪುರ ಮೋಹನ್‌, ನಿವೃತ್ತ ಪ್ರಾಂಶುಪಾಲರಾದ ಟಿ.ಸಿ. ವಸಂತರಾಜ್‌ ಅರಸ್‌, ಚಿತ್ರನಟಿ ಅಂಶಿಣಿ ಮುಂತಾದವರು ಉಪಸ್ಥಿತರಿದ್ದರು.
ರೋಮಾಂಚನಗೊಳಿಸಿದ ರಷ್ಯನ್‌ ನೃತ್ಯ :
ವಿಶ್ವ ವಿಖ್ಯಾತವಾದ ಮೈಸೂರು ದಸರಾ ಮಹೋತ್ಸವದ ಅಂಗವಾಗಿ ಅರಮನೆಯ ಆವರಣದಲ್ಲಿ ಒಂಬತ್ತು ದಿನಗಳ ಕಾಲ ಜರುಗಿದ ಸಾಂಸ್ಕೃತಿಕ ಕಾರ್ಯಕ್ರಮಗಳ ವೇದಿಕೆಯಲ್ಲಿ ರಷ್ಯಾದಿಂದ ಆಗಮಿಸಿದ್ದ ಸುಮಾರು 42 ಜನ ರಷ್ಯನ್‌ ಕಲಾವಿದರು ನಡೆಸಿಕೊಟ್ಟ ನೃತ್ಯ ವೈಭವ ಸಹಸ್ರಾರು ಸಂಖ್ಯೆಯಲ್ಲಿ ಆಗಮಿಸಿದ್ದ ಪ್ರೇಕ್ಷಕರ ಹಾಗೂ ಪ್ರವಾಸಿಗರ ಮನಸೂರೆಗೊಂಡಿತು.
ರಂಜನೀಯ ನೃತ್ಯ ಪ್ರದರ್ಶನ :
2013ನೇ ಮೈಸೂರು ದಸರಾ ಮಹೋತ್ಸವದ ಅಂಗವಾಗಿ ವಿವಿಧ ವೇದಿಕೆಗಳಲ್ಲಿ ಅನೇಕ ಕಲಾ ಪ್ರತಿಭೆಗಳಿಗೆ ತಮ್ಮ ಪ್ರತಿಭೆಯನ್ನು ಪ್ರದರ್ಶಿಸಲು ಅವಕಾಶವನ್ನು ಕಲ್ಪಿಸಲಾಗಿತ್ತು. ಅಂತಹ ಪ್ರತಿಭೆಗಳಲ್ಲಿ ಒಬ್ಬರಾದ ಮೇಘನಾ ಕಲಾಮಂದಿರದಲ್ಲಿ ನಡೆಸಿಕೊಟ್ಟ ಭರತನಾಟ್ಯ ಕಾರ್ಯಕ್ರಮ ವೀಕ್ಷಕರ ಮೆಚ್ಚುಗೆಗೆ ಪಾತ್ರವಾಯಿತು.
ಕನಸಿನಕನ್ಯೆಯ ಅಮೋಘ ನೃತ್ಯ :
ವಿಶ್ವ ವಿಖ್ಯಾತವಾದ ಮೈಸೂರು ದಸರಾ ಮಹೋತ್ಸವದ ಅಂಗವಾಗಿ ಅರಮನೆ ಆವರಣದ ಸಾಂಸ್ಕೃತಿಕ ಕಾರ್ಯಕ್ರಮಗಳ ವೇದಿಕೆಯಲ್ಲಿ ಖ್ಯಾತ ಹಿಂದಿ ನಟಿ ಹಾಗೂ ಎವರ್‌ ಗ್ರೀನ್‌ ಕನಸಿನಕನ್ಯೆ ಹೇಮಮಾಲಿನಿ ಮತ್ತು ಅವರ ತಂಡದವರು ನಡೆಸಿಕೊಟ್ಟ ಪೌರಾಣಿಕ ಹಿನ್ನೆಲೆಯ ನೃತ್ಯ ರೂಪಕಗಳು ಅಪಾರ ಸಂಖ್ಯೆಯಲ್ಲಿ ಆಗಮಿಸಿದ್ದ ಜನಸ್ತೋಮವನ್ನು ಮನತಣಿಯೆ ರಂಜಿಸಿ 2013ರ ದಸರಾ ಮಹೋತ್ಸವವನ್ನು ಅವಿಸ್ಮರಣೀಯಗೊಳಿಸಿದವು.
ಅಪೂರ್ವ ಛಾಯಾಚಿತ್ರಗಳ ಅನಾರವಣ :
ಮೈಸೂರಿನ ಛಾಯಾಗ್ರಾಹಕರಲ್ಲಿ ಒಬ್ಬರಾದ ಮನೀಶ್‌ ರವರು ತಮ್ಮ ಅದ್ಭುತ ಕೈಚಳಕದಿಂದ ಕ್ಯಾಮರಾದಲ್ಲಿ ಸೆರೆಹಿಡಿದಿರುವ ವನ್ಯಪ್ರಾಣಿ ಮತ್ತು ಪಕ್ಷಿಗಳ ಅಪೂರ್ವ ದೃಶ್ಯಾವಳಿಗಳ ವರ್ಣಚಿತ್ರಗಳು ಕಲಾಮಂದಿರದ ಸುಚಿತ್ರ ಆರ್ಟ್‌ ಗ್ಯಾಲರಿಯಲ್ಲಿ ಪ್ರದರ್ಶನಗೊಂಡು ಸಂದರ್ಶಕರೆಲ್ಲರ ಪ್ರಶಂಸೆಗೆ ಪಾತ್ರವಾಯಿತು. ಪೊಲೀಸ್‌ವಾದ್ಯಗಳ ಅಪೂರ್ವ ಜುಗಲ್ ಬಂದಿ ವಿಶ್ವ ವಿಖ್ಯಾತವಾದ ಮೈಸೂರು ದಸರಾ ಮಹೋತ್ಸವದ ವಿಶೇಷಗಳಲ್ಲಿ ಮೈಸೂರಿನ ಅಂಬಾ ವಿಲಾಸ್‌ ಅರಮನೆಯ ಆವರಣದಲ್ಲಿ ಜರುಗುವ ಪೊಲೀಸ್‌ ಬ್ಯಾಂಡ್‌ ಪ್ರದರ್ಶನ ಸಹ ಒಂದು. ರಾಜ್ಯದ ಎಲ್ಲಾ ಜಿಲ್ಲಾ ಕೇಂದ್ರಗಳಿಂದ ಆಗಮಿಸುವ ಪೊಲೀಸ್‌ ತಂಡಗಳು ಒಂದೆಡೆ ಕಲೆತು ವಿವಿಧ ವಾದ್ಯಗಳನ್ನು ನುಡಿಸುತ್ತಾ ಶಿಸ್ತುಬದ್ಧ ಕವಾಯಿತು ನಡೆಸುವುದರ ಜೊತೆಗೆ ತಮ್ಮ ಕವಾಯತಿಗೆ ಬಳಸಲಾಗುವ ವಾದ್ಯಗಳಿಂದ ಜುಗಲ್ ಬಂದಿ ಮಾದರಿಯಲ್ಲಿ ಪಾಶ್ಚಿಮಾತ್ಯ ಮತ್ತು ಶಾಸ್ತ್ರೀಯ ಸಂಗೀತ ಕಚೇರಿ ನಡೆಸಿಕೊಟ್ಟರು.
ಸಾಮೂಹಿಕ ನೃತ್ಯ ಪ್ರದರ್ಶನ :
ವಿಶ್ವ ವಿಖ್ಯಾತ ಮೈಸೂರು ದಸರಾ ಮಹೋತ್ಸವದ ಅಂಗವಾಗಿ ಆಹಾರ ಮೇಳವನ್ನು ಆಯೋಜಿಸುವುದರ ಜೊತೆ ಜೊತೆಗೆ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನೂ ಸಹ ಏರ್ಪಡಿಸಲಾಗಿತ್ತು. ತಮ್ಮ ನೃತ್ಯ ಪ್ರದರ್ಶನದ ಮೂಲಕ ಪ್ರೇಕ್ಷಕರ ಹೃನ್ಮನ ತಣಿಸಿದ ನೃತ್ಯ ತಂಡವೊಂದು ಕಾರ್ಯಕ್ರಮದ ನಂತರ ಪ್ರಶಸ್ತಿ ಪತ್ರ ಸ್ವೀಕರಿಸಿತು.
ಹೃದಯಸ್ಪರ್ಶಿ ಹಿಂದೂಸ್ಥಾನಿ ಗಾಯನ :
ದಸರಾ ಮಹೋತ್ಸವದ ಅಂಗವಾಗಿ ಅರಮನೆ ಆವರಣದಲ್ಲಿ ಜರುಗಿದ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ಮೇರು ಗಾಯಕರಲ್ಲಿ ಒಬ್ಬರಾದ ಪಂಡಿತ ಎಂ. ವೆಂಕಟೇಶ್‌ ಕುಮಾರ್ ರವರ ಹಿಂದೂಸ್ಥಾನಿ ಶಾಸ್ತ್ರೀಯ ಗಾಯನ ಮತ್ತು ವಚನ ಗಾಯನ ಶ್ರೋತೃಗಳ ಹೃದಯಕ್ಕೆ ಮುದ ನೀಡಿತು. ಹಾರ್ಮೋನಿಯಂನಲ್ಲಿ ವಿದ್ವಾನ್ ಪಂಚಾಕ್ಷರಿ ಹಿರೇಮಠ, ತಬಲದ ಮೂಲಕ ವಿದ್ವಾನ್ ವಿಶ್ವನಾಥ್‌ ನಾಕೋಡ್‌ ಸಾಥ್‌ ನೀಡಿದರು.
ಮುದ ನೀಡಿದ ಕ್ಲಾರಿಯೋನೆಟ್‌ ವಾದನ :
ವಿಶ್ವ ವಿಖ್ಯಾತವಾದ ಮೈಸೂರು ದಸರಾ ಮಹೋತ್ಸವದ ಅಂಗವಾಗಿ ಅರಮನೆ ಆವರಣದ ಸಾಂಸ್ಕೃತಿಕ ಕಾರ್ಯಕ್ರಮಗಳ ವೇದಿಕೆಯಲ್ಲಿ ನಾಡಿನ ಖ್ಯಾತ ಕಾವಿದರಲ್ಲೊಬ್ಬರಾದ ಮೈಸೂರಿನ ಪಂಡಿತ್‌ನರಸಿಂಹಲು ಡಾಟೆ ರಾಯಚೂರ್‌ ರವರ ಕ್ಲಾರಿಯೋನೆಟ್‌ ವಾದನಕ್ಕೆ ಸಹಸ್ರಾರು ಸಂಖ್ಯೆಯಲ್ಲಿ ನೆರೆದಿದ್ದ ಶ್ರೋತೃಗಳು ಮನಸೋತು ತಲೆದೂಗಿದರು.
ಹೃನ್ಮನವನ್ನು ತಣಿಸಿದ ಗಾಯನ :
ವಿಶ್ವ ವಿಖ್ಯಾತವಾದ ಮೈಸೂರು ದಸರಾ ಮಹೋತ್ಸವದ ಅಂಗವಾಗಿ ಅರಮನೆ ಆವರಣದ ಸಾಂಸ್ಕೃತಿಕ ಕಾರ್ಯಕ್ರಮಗಳ ವೇದಿಕೆಯಲ್ಲಿ ನಾಡಿನ ಖ್ಯಾತ ಗಾಯಕರಲ್ಲೊಬ್ಬರಾದ ವಿದ್ಯಾಭೂಷಣ ತೀರ್ಥರವರ ಕಂಠಸಿರಿಯಿಂದ ಹೊರಹೊಮ್ಮಿದ ಪ್ರಸಿದ್ಧ ದಾಸ ಗೀತೆಗಳು ಸಹಸ್ರಾರು ಸಂಖ್ಯೆಯಲ್ಲಿ ನೆರೆದಿದ್ದ ಶ್ರೋತೃಗಳ ಹೃನ್ಮನವನ್ನು ತಣಿಸಿ ಭಕ್ತಿ ಪರವಶರನ್ನಾಗಿಸಿತು.
ಗುರುವಂದನಾ ಮಹೋತ್ಸವ :
ಯಲಹಂಕ ದೊಡ್ಡಬಳ್ಳಾಪುರ ರಸ್ತೆಯ ರಾಜಾನುಕುಂಟೆ ಸಮೀಪದ ಕಾಕೋಳಿನ ಸರ್ಕಾರಿ ಪ್ರೌಢಶಾಲೆಯ ಆವರಣದಲ್ಲಿ ಇತ್ತೀಚೆಗೆ ಪಾಂಚಜನ್ಯ ಪ್ರತಿಷ್ಠಾನ ಹಾಗೂ ಕಾಕೋಳು ಸರ್ಕಾರಿ ಪ್ರೌಢಶಾಲೆಗಳ ಸಂಯುಕ್ತ ಆಶ್ರಯದಲ್ಲಿ `ಶಿಕ್ಷಕರ ದಿನಾಚರಣೆ’ ಸಲುವಾಗಿ ಗುರುವಂದನಾ ಮಹೋತ್ಸವ ಆಯೋಜಿಸಲಾಗಿತ್ತು. ಮುಖ್ಯ ಅತಿಥಿಗಳಾಗಿ ನಾಡೋಜ ಪ್ರೊ. ಜಿ. ವೆಂಕಟಸುಬ್ಬಯ್ಯ ಆಗಮಿಸಿ ನಿವೃತ್ತ ಅಧ್ಯಾಪಕರಾದ ವೈ.ಎಚ್‌. ವೆಂಕಟೇಶ್‌ ಪ್ರಸಾದ್‌ ಮತ್ತು ಶಿಕ್ಷಕಿ ಎ. ವಿನೋದಮ್ಮನವರಿಗೆ ಮೈಸೂರು ಪೇಟ, ಶಾಲು, ಸ್ಮರಣಿಕೆಗಳನ್ನು ನೀಡಿ ಗೌರವ ಸಲ್ಲಿಸಿದರು.
ಲಯನೆಸ್‌ ಮಾಸ್‌ ಇನ್‌ ಸ್ಟೇಷನ್‌ :
ಬೆಂಗಳೂರಿನ ಜೆ.ಎಸ್‌.ಎಸ್‌. ಸಭಾಂಗಣದಲ್ಲಿ ಇತ್ತೀಚೆಗೆ ಲಯನ್ಸ್ ಗ್ರೂಪ್‌ ಜಿಲ್ಲಾ ರಾಜ್ಯಪಾಲರಾದ ಟಿ.ಜೆ. ರಾಮಮೂರ್ತಿ ದೀಪ ಬೆಳಗಿ ಕಾರ್ಯಕ್ರಮ ಉದ್ಘಾಟಿಸಿದರು. ಲಯನ್‌ ಮಣಿ ಅರಸು ಎಂ. ಸೇಥಿ ಅಧ್ಯಕ್ಷತೆ ವಹಿಸಿದ್ದರೆ, ಕೌನ್ಸಿಲ್ ಅಧ್ಯಕ್ಷಿಣಿ ಲಯನೆಸ್‌ ನಾಗರತ್ನಾ ಮಂಜುನಾಥ್‌ ಮುಂದಾಳತ್ವ ವಹಿಸಿ ಅಚ್ಚುಕಟ್ಟಾಗಿ ಕಾರ್ಯಕ್ರಮ ನಡೆಸಿಕೊಟ್ಟರು.
ಯಶಸ್ವಿ ಸಂವಾದ ಕಾರ್ಯಕ್ರಮ :
ಡೆಲ್ಲಿ ಪ್ರೆಸ್‌ ಪ್ರಕಟಣಾ ಬಳಗದ ಹೆಮ್ಮೆಯ ಆಂಗ್ಲ ಪತ್ರಿಕೆ `ದಿ ಕ್ಯಾರವಾನ್‌,’ ನಯಾನ ಹಾಗೂ ಸಪ್ನಾ ಬುಕ್‌ ಹೌಸ್‌ ಆಶ್ರಯದಲ್ಲಿ, ಇತ್ತೀಚೆಗೆ ಸಪ್ನಾ ಬುಕ್‌ ಹೌಸ್‌ ನಲ್ಲಿ ಸಂವಾದ ಕಾರ್ಯಕ್ರಮ ಏರ್ಪಡಿಸಲಾಗಿತ್ತು. ಇದೇ ಸಂದರ್ಭದಲ್ಲಿ ಸಿದ್ದಲಿಂಗಯ್ಯನವರ `ಊರು ಕೇರಿ’ ಆತ್ಮಕಥೆಯ ಇಂಗ್ಲಿಷ್‌ ಅನುವಾದ `ಎ ವರ್ಡ್‌ ವಿತ್‌ ಯು, ವರ್ಲ್ಡ್’ ಕೃತಿ ಬಿಡುಗಡೆಗೊಂಡಿತು. ದಲಿತ ಕವಿ ಸಿದ್ದಲಿಂಗಯ್ಯನವರ ಜೊತೆ, ಕೃತಿಯ ಅನುವಾದಕ ಎಸ್‌.ಆರ್‌. ರಾಮಕೃಷ್ಣ ಹಾಗೂ ಕಥೆಗಾರ ವಿವೇಕ್‌ ಶಾನ್‌ ಭಾಗ್‌ ಉಪಸ್ಥಿತರಿದ್ದು, ಸಂವಾದದಲ್ಲಿ ಪಾಲ್ಗೊಂಡರು.
ದಿ ಕ್ಯಾರವಾನ್‌ ಸಂವಾದ :
ಡೆಲ್ಲಿ ಪ್ರೆಸ್‌ ಪ್ರಕಟಣಾ ಸಮೂಹದ ಹೆಮ್ಮೆಯ ಆಂಗ್ಲ ಪತ್ರಿಕೆ `ದಿ ಕ್ಯಾರವಾನ್‌’ ಇತ್ತೀಚೆಗೆ ಇಂದಿರಾನಗರದ ಆ್ಯಂಟ್ಸ್ ಕೆಫೆಯಲ್ಲಿ ಅಮಿತ ಕುಮಾರ್ ವಿರಚಿತ `ಎ ಮ್ಯಾಟರ್‌ ಆಫ್‌ ರಾಟ್ಸ್’ ಆಂಗ್ಲ ಕೃತಿಯ ಬಿಡುಗಡೆಯ ಕಾರ್ಯಕ್ರಮ ಹಮ್ಮಿಕೊಂಡಿತ್ತು. ಇವರೊಂದಿಗೆ `ದಿ ಕ್ಯಾರವಾನ್‌’ ಪತ್ರಿಕೆಯ ಬುಕ್ಸ್ ಎಡಿಟರ್‌ ಅಂಜುಂ ಹಸನ್‌ ಸಂವಾದದಲ್ಲಿ ಪಾಲ್ಗೊಂಡರು. ಆಂಗ್ಲ ಸಾಹಿತ್ಯದ ಪ್ರಮುಖ ಮಗ್ಗಲಾದ ಕಾಲ್ಪನಿಕವಲ್ಲದ (ನಾನ್‌ ಫಿಕ್ಷನ್‌) ರಚನೆಗಳ ಕುರಿತು ಸುದೀರ್ಘ ಸಂವಾದ ನಡೆಯಿತು.
ಚಂಪಕ ಕ್ರಿಯೇಟಿವ್ ಚೈಲ್ಡ್ ಕಾಂಟೆಸ್ಟ್ :
ಪುಟಾಣಿಗಳ ಮುದ್ದಿನ ಮಾಸಪತ್ರಿಕೆ `ಚಂಪಕ’ ತಂಡ ಇತ್ತೀಚೆಗೆ ಬೆಂಗಳೂರಿನ ಕಮಲಾಬಾಯಿ ಪ್ರಾಥಮಿಕ ಶಾಲೆಯಲ್ಲಿ, `ಚಂಪಕ ಕ್ರಿಯೇಟಿವ್ ಚೈಲ್ಡ್ ಕಾಂಟೆಸ್ಟ್’ ಕಾರ್ಯಕ್ರಮವನ್ನು ಏರ್ಪಡಿಸಿತ್ತು. ಅಸಂಖ್ಯಾತ ಸಂಖ್ಯೆಯಲ್ಲಿ ಈ ಕಾರ್ಯಕ್ರಮದಲ್ಲಿ ಪಾಲ್ಗೊಂಡ ಪುಟಾಣಿಗಳು, ಸ್ಥಳದಲ್ಲೇ ಚಿತ್ರ ಬಿಡಿಸುವ ಸ್ಪರ್ಧೆ ಹಾಗೂ ಪ್ರಬಂಧ ರಚನೆಯ ಸ್ಪರ್ಧೆಯಲ್ಲಿ ಅತಿ ಉತ್ಸಾಹದಿಂದ ಪಾಲ್ಗೊಂಡರು. ಇದರಲ್ಲಿ ಪ್ರಥಮ ಅತ್ಯುತ್ತಮ 10 ರಚನೆಗಳಿಗೆ `ಚಂಪಕ’ ವತಿಯಿಂದ ಪ್ರಶಸ್ತಿಪತ್ರ ವಿತರಿಸಲಾಯಿತು. ಶಾಲೆಯ ಹೆಡ್‌ ಮೇಡಂ ಹೆಲೆನ್‌ ಹಾಗೂ ಕಲಾ ವಿಭಾಗದ ಶಿಕ್ಷಕಿಯರ ಮಾರ್ಗದರ್ಶನದಲ್ಲಿ ಈ ಕಾರ್ಯಕ್ರಮ ಸಂಪನ್ನಗೊಂಡಿತು.
