ಕಾರ್ನ್‌ ವಡೆ
ಸಾಮಗ್ರಿ : 1-1 ಕಪ್‌ ಜೋಳದ ಹಿಟ್ಟು, ಕಡಲೆಹಿಟ್ಟು, ಸಣ್ಣಗೆ ಹೆಚ್ಚಿದ ಪಾಲಕ್‌ ಸೊಪ್ಪು, ರುಚಿಗೆ ತಕ್ಕಷ್ಟು ಶುಂಠಿ, ಬೆಳ್ಳುಳ್ಳಿ ಪೇಸ್ಟ್, ಹಸಿ ಮೆಣಸಿನ ಪೇಸ್ಟ್, ಹೆಚ್ಚಿದ ಈರುಳ್ಳಿ, ಮೊಸರು, ಉಪ್ಪು, ಖಾರ, ಕರಿಯಲು ಎಣ್ಣೆ.
ವಿಧಾನ : ಮೇಲಿನ ಎಲ್ಲಾ ಸಾಮಗ್ರಿ ಬೆರೆಸಿಕೊಂಡು ವಡೆ ತರಹದ ಮಿಶ್ರಣ ಕಲಸಿಕೊಳ್ಳಿ. 15 ನಿಮಿಷ ನೆನೆಯಲು ಬಿಡಿ. ಬಾಣಲೆಯಲ್ಲಿ ಎಣ್ಣೆ ಕಾದ ಮೇಲೆ ಇದರಿಂದ ಸಣ್ಣ ಗಾತ್ರದ ಉಂಡೆ ಹಿಡಿದು, ಜಿಡ್ಡು ಸವರಿದ ಅಂಗೈ ಮೇಲೆ ವಡೆ ತಟ್ಟಿ, ಕಾದ ಎಣ್ಣೆಯಲ್ಲಿ ಕರಿಯಿರಿ. ಬಿಸಿ ಬಿಸಿಯಾಗಿ ಸಾಸ್‌ ಜೊತೆ, ಸಂಜೆ ಕಾಫಿ/ಟೀ ಸಮೇತ ಸವಿಯಲು ಕೊಡಿ.
ಆಲೂ ಪಿಜ್ಜಾ
ಮೂಲ ಸಾಮಗ್ರಿ : ಸಿಪ್ಪೆ ಹೆರೆದು ತುರಿದ ಆಲೂ 1 ಕಪ್‌, 4 ಚಮಚ ಕಾರ್ನ್‌ ಫ್ಲೋರ್‌, ತುಸು ಉಪ್ಪುನಿಂಬೆ ರಸ, ಎಣ್ಣೆ.
ಟಾಪಿಂಗ್‌ ಸಾಮಗ್ರಿ : ಅರ್ಧ ಕಪ್‌ 3 ಬಗೆಯ ಹೆಚ್ಚಿದ ಕ್ಯಾಪ್ಸಿಕಂ, 1 ಕಪ್‌ ಹೆಚ್ಚಿದ ಈರುಳ್ಳಿ, ಅರ್ಧ ಕಪ್‌ ತುರಿದ ಚೀಸ್‌, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಓರಿಗ್ಯಾನೋ.
ವಿಧಾನ : ಮೂಲ ಸಾಮಗ್ರಿ ಎಲ್ಲಾ ಸೇರಿಸಿ ಬೆರೆಸಿಕೊಳ್ಳಿ. ಆಲೂ ತುಸು ನೀರು ಬಿಟ್ಟುಕೊಂಡಂತೆ ಬ್ಯಾಟರ್‌ ರೆಡಿ ಎಂದರ್ಥ. ಇದನ್ನು ಉಂಡೆ ಹಿಡಿದು ಸಣ್ಣ ನಿಪ್ಪಟ್ಟುಗಳಾಗಿ ತಟ್ಟಿ, ಎರಡೂ ಬದಿ ತಿರುವಿ ಹಾಕುತ್ತಾ ಶ್ಯಾಲೋ ಫ್ರೈ ಮಾಡಿ. ಇದನ್ನು ಹೊರತೆಗೆದು ಬೇಕಿಂಗ್‌ ಟ್ರೇನಲ್ಲಿ ಜೋಡಿಸಿ, ಇದರ ಮೇಲೆ ಟಾಪಿಂಗ್‌ ಸಾಮಗ್ರಿ ಸಮನಾಗಿ ಉದುರಿಸಿ 180 ಡಿಗ್ರಿ ಶಾಖದಲ್ಲಿ 20 ನಿಮಿಷ ಬೇಕ್‌ ಮಾಡಿ. ಹೊರ ತೆಗೆದು ಓರಿಗ್ಯಾನೋ, ಉಪ್ಪು, ಖಾರ ಉದುರಿಸಿ ಬಿಸಿಬಿಸಿಯಾಗಿ ಸವಿಯಲು ಕೊಡಿ.
ಸೋರೆ ಉಂಡೆ
ಸಾಮಗ್ರಿ : 1 ಸಣ್ಣ ಸೋರೆಕಾಯಿ, 1 ಕಪ್‌ ಕಡಲೆಹಿಟ್ಟು, ಅರ್ಧರ್ಧ ಕಪ್‌ ರವೆ, ಹುರಿದು ತರಿ ಮಾಡಿದ ಕಡಲೆಬೀಜ, ಗೋಡಂಬಿ (ಒಟ್ಟಾಗಿ), ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಚಾಟ್‌ ಮಸಾಲ, ಧನಿಯಾ ಪುಡಿ, ಶುಂಠಿ, ಬೆಳ್ಳುಳ್ಳಿ, ಹಸಿ ಮೆಣಸಿನ ಪೇಸ್ಟ್, ಕಪ್ಪು ದ್ರಾಕ್ಷಿ, ಅರಿಶಿನ, ಕರಿಯಲು ಎಣ್ಣೆ.
ವಿಧಾನ : ಸೋರೆಯ ಸಿಪ್ಪೆ ಹೆರೆದು ನೀಟಾಗಿ ತುರಿದಿಡಿ. ಇದಕ್ಕೆ ಎಲ್ಲಾ (ದ್ರಾಕ್ಷಿ, ಎಣ್ಣೆ ಬಿಟ್ಟು) ಸಾಮಗ್ರಿ ಸೇರಿಸಿ ಬೆರೆಸಿಕೊಳ್ಳಿ. ಮಿಶ್ರಣಕ್ಕೆ ನೀರು ಬೇಡ, ಸೋರೆಯ ತೇವಾಂಶವೇ ಸಾಕು. ಬಾಣಲೆಯಲ್ಲಿ ಅರ್ಧ ಸೌಟು ಎಣ್ಣೆ ಬಿಸಿ ಮಾಡಿ ಈ ಮಿಶ್ರಣ ಹಾಕಿ, ಲಘು ಬಾಡಿಸಿ ಕೆಳಗಿಳಿಸಿ. ಚೆನ್ನಾಗಿ ಆರಿದ ನಂತರ ಸಣ್ಣ ನಿಂಬೆ ಗಾತ್ರದ ಉಂಡೆ ಹಿಡಿದು 2 ಗಂಟೆ ಕಾಲ ಫ್ರಿಜ್‌ ನಲ್ಲಿರಿಸಿ ಕೂಲ್ ಮಾಡಿ. ನಂತರ 1 ಗಂಟೆ ಹೊರಗಿಟ್ಟು, ಕಾದ ಎಣ್ಣೆಯಲ್ಲಿ ಕರಿಯಿರಿ. ಚಿತ್ರದಲ್ಲಿರುವಂತೆ ಟೂತ್‌ ಪಿಕ್‌ ನೆರವಿನಿಂದ ಪ್ರತಿ ಉಂಡೆಗೂ ದ್ರಾಕ್ಷಿ ಸಿಗಿಸಿಡಿ, ನಂತರ ಅಲಂಕರಿಸಿ, ಸಾಸ್‌ ಅಥವಾ ಚಟ್ನಿ ಜೊತೆ ಸವಿಯಲು ಕೊಡಿ.
ಬೇಸನ್‌ ಬುರ್ಜಿ
ಸಾಮಗ್ರಿ : 1 ಕಪ್‌ ಕಡಲೆಹಿಟ್ಟು, ಹೆಚ್ಚಿದ 2 ಈರುಳ್ಳಿ, ಟೊಮೇಟೊ, ಹಸಿ ಮೆಣಸು, ಶುಂಠಿ, ಬೆಳ್ಳುಳ್ಳಿ, ಕೊ. ಸೊಪ್ಪು, 3 ಬಗೆ ಕ್ಯಾಪ್ಸಿಕಂ (2-2 ಚಮಚ), ತುಸು ಹಸಿ ಬಟಾಣಿ, 2 ಚಿಟಕಿ ಅರಿಶಿನ, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಧನಿಯಾಪುಡಿ, ಗರಂ ಮಸಾಲ, ಛೋಲೆ ಮಸಾಲ, ತುಸು ಎಣ್ಣೆ.
ವಿಧಾನ : ಮೊದಲು ಬಾಣಲೆಯಲ್ಲಿ ತುಸು ಎಣ್ಣೆ ಬಿಸಿ ಮಾಡಿ ಹೆಚ್ಚಿದ ಶುಂಠಿ, ಹಸಿ ಮೆಣಸು, ಬೆಳ್ಳುಳ್ಳಿ, ಈರುಳ್ಳಿ, ಕ್ಯಾಪ್ಸಿಕಂ ಹಾಕಿ ಬಾಡಿಸಿ. ನಂತರ ಬಟಾಣಿ ಆಮೇಲೆ ಟೊಮೇಟೊ ಹಾಕಿ ಬಾಡಿಸಿ. ನಂತರ ಎಲ್ಲಾ ಮಸಾಲೆ ಹಾಕಿ ಕೆದಕಿರಿ. ಕಡಲೆಹಿಟ್ಟಿಗೆ ಉಪ್ಪು, ಹುಳಿ ಮಜ್ಜಿಗೆ ಬೆರೆಸಿ ಗಟ್ಟಿ ಇಡ್ಲಿ ಮಿಶ್ರಣದ ತರಹ ಮಾಡಿ, ಬಾಣಲೆಗೆ ಹಾಕಿ ಮಂದ ಉರಿಯಲ್ಲಿ ಕೈಯಾಡಿಸಿ. ಚೆನ್ನಾಗಿ ಬೆಂದಿದೆ ಎಂದು ಖಾತ್ರಿಪಡಿಸಿಕೊಂಡು ಕೆಳಗಿಳಿಸಿ, ಕೊ.ಸೊಪ್ಪು ಉದುರಿಸಿ ಬಿಸಿಯಾಗಿ ದೋಸೆ, ಚಪಾತಿ ಹೊತೆ ಸವಿಯಲು ಕೊಡಿ.
ರವೆ ಪರೋಟ
ಸಾಮಗ್ರಿ : 1 ಕಪ್‌ ರವೆ, ಅರ್ಧರ್ಧ ಕಪ್‌ ಕಾರ್ನ್‌ ಫ್ಲೋರ್‌, ಸಣ್ಣಗೆ ಹೆಚ್ಚಿದ ಮೆಂತ್ಯ ಸೊಪ್ಪು, ಹುಳಿ ಮೊಸರು ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಶುಂಠಿ, ಬೆಳ್ಳುಳ್ಳಿ ಪೇಸ್ಟ್, ಅರ್ಧ ಸೌಟು ಎಣ್ಣೆ.
ವಿಧಾನ : ಮೇಲಿನ ಎಲ್ಲಾ ಸಾಮಗ್ರಿ ಬೆರೆಸಿಕೊಂಡು ಮೃದುವಾದ ಚಪಾತಿ ಹಿಟ್ಟು ಕಲಸಿಡಿ. ಇದನ್ನು 1-2 ತಾಸು ನೆನೆಯಲು ಬಿಟ್ಟು, ತುಪ್ಪ ಬೆರೆಸಿ ಮತ್ತೆ ನಾದಿಕೊಳ್ಳಿ. ನಂತರ ಇದರಿಂದ ಉಂಡೆ ಹಿಡಿದು, ಲಟ್ಟಿಸಿ, ಕಾದ ಹೆಂಚಿಗೆ ಹಾಕಿ, ಎಣ್ಣೆ ಬಿಡುತ್ತಾ ಎರಡೂ ಬದಿ ಹದನಾಗಿ ಬೇಯಿಸಿ. ಬಿಸಿ ಬಿಸಿಯಾಗಿ ಆಲೂ ಸಾಗು ಜೊತೆ ಸವಿಯಲು ಕೊಡಿ.
ಚೀಝೀ ಕಟ್ಲೆಟ್
ಮೂಲ ಸಾಮಗ್ರಿ : 3-4 ಬೆಂದ ಆಲೂ, 2-3 ಹಸಿ ಮೆಣಸು, ಹೆಚ್ಚಿದ ಅರ್ಧ ಕಂತೆ ಕೊ.ಸೊಪ್ಪು, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಧನಿಯಾಪುಡಿ, ಅಮ್ಚೂರ್‌ ಪುಡಿ.
ಹೂರಣಕ್ಕಾಗಿ ಸಾಮಗ್ರಿ : ಅರ್ಧರ್ಧ ಕಪ್‌ ಚೀಸ್‌, ತುರಿದ ಪನೀರ್‌, ಮೈದಾ, ಬ್ರೆಡ್‌ ಕ್ರಂಬ್ಸ್, ಕರಿಯಲು ಎಣ್ಣೆ.
ವಿಧಾನ : ಬೆಂದ ಆಲೂ ಮಸೆದು, ಅದಕ್ಕೆ ಹೂರಣದ ಸಾಮಗ್ರಿ ಬಿಟ್ಟು ಉಳಿದೆಲ್ಲ ಬೆರೆಸಿ ಮಿಶ್ರಣ ಸಿದ್ಧಪಡಿಸಿ. ಇದರಿಂದ ಸಣ್ಣ ನಿಂಬೆ ಗಾತ್ರದ ಉಂಡೆ ಮಾಡಿಡಿ. ತುರಿದ ಚೀಸ್‌, ಪನೀರ್‌, ತುಸು ಉಪ್ಪು, ಮೆಣಸು ಸೇರಿಸಿ ಮಿಶ್ರ ಮಾಡಿ, ಸಣ್ಣ ಗೋಲಿ ಗಾತ್ರ ಉಂಡೆ ಮಾಡಿ. ಆಲೂ ಉಂಡೆ ಮಧ್ಯೆ ಇದನ್ನು ಹುದುಗಿಸಿ, ಎಲ್ಲವನ್ನೂ ಸಿದ್ಧಪಡಿಸಿ. ಮೈದಾ ಹಿಟ್ಟಿಗೆ ಉಪ್ಪು, ಖಾರ, ಅರಿಶಿನ, ತುಸು ನೀರು ಬೆರೆಸಿ ಬೋಂಡ ಹಿಟ್ಟಿನ ಹದಕ್ಕೆ ಕಲಸಿಡಿ. ಅದರಲ್ಲಿ ಈ ಉಂಡೆ ಅದ್ದಿಕೊಂಡು, ಬ್ರೆಡ್‌ ಕ್ರಂಬ್ಸ್ ನಲ್ಲಿ ಹೊರಳಿಸಿ ಕಾದ ಎಣ್ಣೆಯಲ್ಲಿ ಕರಿಯಿರಿ. ಇದೀಗ ಚೀಝೀ ಬಾಲ್ಸ್ ರೆಡಿ! ಸಾಸ್‌, ಚಟ್ನಿ ಜೊತೆ ಸವಿಯಿರಿ.
ಬಟರ್‌ ಬೈಟ್ಸ್
ಸಾಮಗ್ರಿ : 2 ಕಪ್‌ ರೋಲ್ಡ್ ಓಟ್ಸ್, ಅರ್ಧರ್ಧ ಕಪ್‌ ಪೀನಟ್‌ ಬಟರ್‌, ಮೇಪಲ್ ಸಿರಪ್‌, ಚಾಕ್ಲೇಟ್‌ ಚಿಪ್ಸ್, ಡ್ರೈ ಫ್ರೂಟ್ಸ್.
ವಿಧಾನ : ಒಂದು ಬಟ್ಟಲಿಗೆ ಮೇಲಿನ ಎಲ್ಲಾ ಸಾಮಗ್ರಿ ಹಾಕಿ ಬೆರೆಸಿಕೊಳ್ಳಿ. ಇದನ್ನು ಮುಚ್ಚಿರಿಸಿ, ಫ್ರಿಜ್‌ ನಲ್ಲಿ 1 ಗಂಟೆ ಕಾಲ ನೆನೆಯಲು ಬಿಡಿ. ನಂತರ ತುಪ್ಪದಲ್ಲಿ ಹುರಿದ ಡ್ರೈ ಫ್ರೂಟ್ಸ್ ಬೆರೆಸಿ, ಉಂಡೆ ಕಟ್ಟಿ ಏರ್‌ ಟೈಟ್‌ ಜಾರ್‌ ನಲ್ಲಿರಿಸಿ. ಮಕ್ಕಳು ಕೇಳಿದಾಗ ಕೊಡಿ.
ಕ್ರಿಸ್ಪಿ ಕುಕೀಸ್‌
ಸಾಮಗ್ರಿ : ಅರ್ಧರ್ಧ ಕಪ್‌ ಮೈದಾ, ಗೋಧಿಹಿಟ್ಟು, ಬೆಣ್ಣೆ, ಪುಡಿಸಕ್ಕರೆ, ತುಸು ಹಾಲು, ವೆನಿಲಾ ಎಸೆನ್ಸ್, ತೇದ ಜಾಯಿಕಾಯಿ ರಸ, ದಾಲ್ಚಿನ್ನಿ ಪುಡಿ.
ವಿಧಾನ : ಮೇಲಿನ ಎಲ್ಲಾ ಸಾಮಗ್ರಿ ಬೆರೆಸಿಕೊಂಡು ಗಂಟಿಲ್ಲದ ಮೃದು ಮಿಶ್ರಣ ಕಲಸಿಡಿ. ಇದನ್ನು ದಪ್ಪ ಚಪಾತಿಗಳಾಗಿ ಲಟ್ಟಿಸಿ, ಚಿತ್ರದಲ್ಲಿರುವಂತೆ ಕಟರ್‌ ನಿಂದ ಕತ್ತರಿಸಿ. ಜಿಡ್ಡು ಸವರಿದ ಓವನ್‌ ಟ್ರೇಗೆ ಇವನ್ನು ಜೋಡಿಸಿಕೊಂಡು, ಮೊದಲೇ ಬಿಸಿ ಮಾಡಿದ ಓವನ್ನಿನಲ್ಲಿ, 160 ಡಿಗ್ರಿ ಶಾಖದಲ್ಲಿ 15-20 ನಿಮಿಷ ಬೇಕ್‌ ಮಾಡಿ.
