ಫ್ರೈಡ್‌ ಕಾರ್ನ್‌
ಸಾಮಗ್ರಿ : 250 ಗ್ರಾಂ ಮುಸುಕಿನ ಜೋಳದ ತಾಜಾ ಕಾಳು, ಅರ್ಧ ಕಪ್‌ ಕಾರ್ನ್‌ ಪೆ್ಲೕರ್‌, ರುಚಿಗೆ ತಕ್ಕಷ್ಟು ಅಕ್ಕಿಹಿಟ್ಟು, ಉಪ್ಪು, ಖಾರ, ಕಾಳುಮೆಣಸಿನಪುಡಿ, ಕರಿಯಲು ಎಣ್ಣೆ.
ವಿಧಾನ : ಮೊದಲು ಕಾಳನ್ನು ಬಿಸಿ ನೀರಿಗೆ ಹಾಕಿ 2-3 ನಿಮಿಷ ಬೇಯಿಸಿ. (ಬ್ಲಾಂಚ್‌ ಗೊಳಿಸಿ) ಒಂದು ಬಟ್ಟಲಿಗೆ ಉಳಿದೆಲ್ಲ ಸಾಮಗ್ರಿ ಬೆರೆಸಿ ಬೋಂಡ ಹಿಟ್ಟಿನ ಮಿಶ್ರಣದಂತೆ ಕಲಸಿಡಿ. ಇದರಲ್ಲಿ ಕಾಳು ಬೆರೆಸಿ, ಕಾದ ಎಣ್ಣೆಯಲ್ಲಿ ಹೊಂಬಣ್ಣ ಬರುವಂತೆ ಕರಿದು ತೆಗೆಯಿರಿ.
ಫ್ರೂಟಿ ಐಸ್‌ ಕ್ರೀಂ
ಸಾಮಗ್ರಿ : 1 ಮಾಗಿದ ಮಾವಿನಹಣ್ಣು, 2 ಕಿವೀ ಫ್ರೂಟ್ಸ್, ಅರ್ಧ ಕಪ್‌ ಸೀಡ್ಲೆಸ್‌ ದಾಳಿಂಬೆ ಹರಳು, 1 ಸೇಬು, 2 ಮಾಗಿದ ಬಾಳೆಹಣ್ಣು, 2 ಸಪೋಟ, 1 ಕಪ್‌ ಪರಂಗಿ ಹಣ್ಣಿನ ಹೋಳು, 250 ಗ್ರಾಂ ವೆನಿಲಾ ಐಸ್‌ ಕ್ರೀಂ, ತುಪ್ಪದಲ್ಲಿ ಹುರಿದ ಒಂದಿಷ್ಟು ಗೋಡಂಬಿ, ದ್ರಾಕ್ಷಿ, ಬಾದಾಮಿ ಚೂರು.
ವಿಧಾನ : ಎಲ್ಲಾ ಹಣ್ಣುಗಳನ್ನೂ ಹೋಳು ಮಾಡಿ ಒಂದು ಬಟ್ಟಲಿಗೆ ಹಾಕಿಡಿ. ಇದಕ್ಕೆ ನೀಟಾಗಿ ಬೀಟ್‌ ಮಾಡಿದ ಐಸ್‌ ಕ್ರಿಂ, ಚಿಟಕಿ ಉಪ್ಪು, ಮೆಣಸು, ಗೋಡಂಬಿ, ದ್ರಾಕ್ಷಿ ಚೂರು ಇತ್ಯಾದಿ ಬೆರೆಸಿ ಫ್ರೂಟ್‌ ಸಲಾಡ್‌ ಆಗಿ ಸರ್ವ ಮಾಡಿ.
ಎಳ್ಳು ಪನೀರ್ ಕ್ಯೂಬ್ಸ್
ಸಾಮಗ್ರಿ : 300 ಗ್ರಾಂ ಪನೀರ್ ತುಂಡು, ಅರ್ಧ ಕಪ್‌ ನೈಲಾನ್‌ ಎಳ್ಳು, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ಟೊಮೇಟೊ ಸಾಸ್‌, ರೆಡ್‌ ಚಿಲೀ ಸಾಸ್‌, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಅರ್ಧ ಸೌಟು ಎಣ್ಣೆ, ಅಲಂಕರಿಸಲು ಟೊಮೇಟೊ, ಚಟ್ನಿ.
ವಿಧಾನ : ಮೊದಲು ಒಂದು ಬಟ್ಟಲಿಗೆ ಟೊಮೇಟೊ, ಚಿಲೀ ಸಾಸ್‌, ಉಪ್ಪು, ಮೆಣಸು ಬೆರೆಸಿಕೊಂಡು ಅದನ್ನು ಪನೀರ್ ತುಂಡುಗಳಿಗೆ ಸವರಿಕೊಳ್ಳಿ. ನಂತರ ಅದನ್ನು ಎಳ್ಳಿನಲ್ಲಿ ಚೆನ್ನಾಗಿ ಹೊರಳಿಸಿ. ಆಮೇಲೆ ಒಂದು ಸಣ್ಣ ಬಾಣಲೆಯಲ್ಲಿ ತುಸು ಎಣ್ಣೆ ಬಿಸಿ ಮಾಡಿ. ಇದಕ್ಕೆ ಬೆಳ್ಳುಳ್ಳಿ, ಶುಂಠಿ ಪೇಸ್ಟ್ ಹಾಕಿ ಮಂದ ಉರಿಯಲ್ಲಿ ಬಾಡಿಸಿ. ಇದಕ್ಕೆ ಪನೀರ್ ತುಂಡುಗಳನ್ನು ಹಾಕಿ ಚೆನ್ನಾಗಿ ಶ್ಯಾಲೋ ಫ್ರೈ ಮಾಡಿ ಕೆಳಗಿಳಿಸಿ. ಚಿತ್ರದಲ್ಲಿರುವಂತೆ ಅಲಂಕರಿಸಿ, ಚಟ್ನಿ ಜೊತೆ ಸವಿಯಲು ಕೊಡಿ.
ಬಿಸ್ಕತ್ತಿನ ಲಡ್ಡು
ಸಾಮಗ್ರಿ : 12-15 ಡೈಜೆಸ್ಟಿವ್ ಬಿಸ್ಕೆಟ್ಸ್, 150 ಗ್ರಾಂ ಮಿಲ್ಕ್ ಮೆಯ್ಡ್, 1 ಗಿಟುಕು ಕೊಬ್ಬರಿ ತುರಿ, ತುಪ್ಪದಲ್ಲಿ ಹುರಿದ ಒಂದಿಷ್ಟು ಗೋಡಂಬಿ, ದ್ರಾಕ್ಷಿ, ಬಾದಾಮಿ ಚೂರು 4 ಚಮಚ ಟೂಟಿ ಫ್ರೂಟಿ, ತುಸು ಏಲಕ್ಕಿ ಪುಡಿ.
ವಿಧಾನ : ಡ್ರೈ ಮಿಕ್ಸಿಗೆ ಬಿಸ್ಕತ್ತು ಮುರಿದು ಹಾಕಿ ತರಿ ತರಿ ಆಗಿಸಿ. ಒಂದು ಬಟ್ಟಲಿಗೆ ಮಿಲ್ಕ್ ಮೆಯ್ಡ್ ಮತ್ತು ಇತರ ಎಲ್ಲಾ ಸಾಮಗ್ರಿ ಬೆರೆಸಿ, ತುಪ್ಪದ ಕೈ ಮಾಡಿಕೊಳ್ಳುತ್ತಾ, ಬೇಗ ಬೇಗ ಉಂಡೆ ಕಟ್ಟಿ. ಇದೀಗ ಬಿಸ್ಕತ್ತಿನ ಲಡ್ಡು ರೆಡಿ!
ಬ್ರೋಕನ್‌ ವೀಟ್‌ ಹುಗ್ಗಿ
ಸಾಮಗ್ರಿ : ಅರ್ಧರ್ಧ ಕಪ್‌ ಬ್ರೋಕನ್‌ ವೀಟ್‌ (ಗೋಧಿ ತರಿ), ತುರಿದ ಬೆಲ್ಲ, 1 ಗಿಟುಕು ಕೊಬ್ಬರಿ ತುರಿ, ಹಾಲಲ್ಲಿ ನೆನೆದ ತುಸು ಕೇಸರಿ, ತುಪ್ಪದಲ್ಲಿ ಹುರಿದ ಒಂದಿಷ್ಟು ಗೋಡಂಬಿ, ದ್ರಾಕ್ಷಿ, ಪಿಸ್ತಾ, ಬಾದಾಮಿ ಚೂರು, ಅರ್ಧ ಕಪ್‌ತುಪ್ಪ, ಚಿಟಕಿ ಪಚ್ಚ ಕರ್ಪೂರ, 2 ಕಪ್‌ ಕಾದಾರಿದ ಗಟ್ಟಿ ಹಾಲು.
ವಿಧಾನ : ಮೊದಲು ಒಂದು ಪಾತ್ರೆಗೆ ಬೆಲ್ಲ ಹಾಕಿ, ತುಸು ನೀರು ಬೆರೆಸಿ, ಮಂದ ಉರಿಯಲ್ಲಿ ಒಂದೆಳೆ ಪಾಕ ತಯಾರಿಸಿ. ಅದೇ ಸಮಯದಲ್ಲಿ ಪಕ್ಕದ ಒಲೆಯಲ್ಲಿ ಚಿಕ್ಕ ಕುಕ್ಕರ್‌ ನಲ್ಲಿ ತುಸು ತುಪ್ಪ ಬಿಸಿ ಮಾಡಿ, ಅದರಲ್ಲಿ ಬ್ರೋಕನ್‌ ವೀಟ್‌ ಹಾಕಿ ಹುರಿದು ತೆಗೆಯಿರಿ. ಅದೇ ಕುಕ್ಕರ್‌ ಗೆ ಬೆಲ್ಲದ ಪಾಕ, ಉಳಿದೆಲ್ಲ ಸಾಮಗ್ರಿ ಬೆರೆಸಿ ಕೆದಕಬೇಕು. ಅಗತ್ಯವೆನಿಸಿದರೆ ಇನ್ನಷ್ಟು ಹಾಲು ಬೆರೆಸಿ, 3 ಸೀಟಿ ಬರುವಂತೆ ಕೂಗಿಸಿ. ತಣಿದಾಗ, ಇದಕ್ಕೆ ತುಪ್ಪ ಬೆರೆಸಿ ಚೆನ್ನಾಗಿ ಕೆದಕಿ, ಕೆಳಗಿಳಿಸಿ. ಬಿಸಿ ಬಿಸಿಯಾಗಿ ತುಪ್ಪ ಹಾಕಿ, ಸವಿಯಲು ಕೊಡಿ.
ಸ್ಪೆಷಲ್ ಸ್ಯಾಂಡ್‌ ವಿಚ್‌
ಸಾಮಗ್ರಿ : 1 ಕಪ್‌ ತಾಜಾ ಕ್ರೀಂ (ರೆಡಿಮೇಡ್‌ ಲಭ್ಯ), ಅರ್ಧ ಕಪ್‌ ಸಣ್ಣ ರವೆ, 4-5 ಬ್ರೆಡ್‌ ಸ್ಲೈಸ್‌, ಸಣ್ಣಗೆ ಹೆಚ್ಚಿದ 2 ಈರುಳ್ಳಿ, ಬೆಳ್ಳುಳ್ಳಿ, ಹಸಿರು, ಹಳದಿ, ಕೆಂಪು ಬಣ್ಣಗಳ ಹೆಚ್ಚಿದ ಅರ್ಧ ಕಪ್‌ ಕ್ಯಾಪ್ಸಿಕಂ, 3 ಹಸಿ ಮೆಣಸು, ಅರ್ಧ ಸೌಟು ತುಪ್ಪ, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ಟೊಮೇಟೊ ಸಾಸ್‌. ತುಸು ಬೆಣ್ಣೆ.
ವಿಧಾನ : ಮೊದಲು ಕ್ರೀಂ ಬೀಟ್‌ ಮಾಡಿಕೊಂಡು ಇದಕ್ಕೆ ಹೆಚ್ಚಿದ ಪದಾರ್ಥ, ಉಪ್ಪು, ಮೆಣಸು, ಹುರಿದ ಸಣ್ಣ ರವೆ, ಎಲ್ಲಾ ಸೇರಿಸಿ ಪೇಸ್ಟ್ ತರಹ ಮಾಡಿಕೊಳ್ಳಿ. ಬ್ರೆಡ್‌ ಸ್ಲೈಸ್‌ ನ್ನು ಆಯತಾಕಾರವಾಗಿ 2 ಭಾಗ ಮಾಡಿ, ಎರಡೂ ಬದಿಗೂ ಬೆಣ್ಣೆ ಸವರಿಡಿ. ಈ ಮಿಶ್ರಣವನ್ನು ಎಲ್ಲದರ ಮೇಲೂ ಒಂದು ಬದಿಗೆ ಬರುವಂತೆ ಸವರಿಡಿ. ತವಾ ಮೇಲೆ ತುಸು ತುಪ್ಪ ಹಾಕಿ, ಇವನ್ನು ಒಂದೊಂದಾಗಿ ಬಿಸಿ ಮಾಡಿ. ಮೇಲೆ ಇನ್ನಷ್ಟು ತುಪ್ಪ ಹಾಕುತ್ತಾ ನೀಟಾಗಿ ಫ್ರೈ ಮಾಡಿ. ಹೀಗೆ ಎಲ್ಲವನ್ನೂ ಸಿದ್ಧಪಡಿಸಿ, ಕೆಳಗಿಳಿಸಿ, ಟೊಮೇಟೊ ಸಾಸ್‌ ಹಾಕಿ ಬಿಸಿಯಾಗಿ ಸವಿಯಲು ಕೊಡಿ.
ಈರುಳ್ಳಿ ಪಕೋಡಾ
ಸಾಮಗ್ರಿ : 2-3 ಕಪ್‌ ಉದ್ದಕ್ಕೆ ಹೆಚ್ಚಿದ ಈರುಳ್ಳಿ, 4-5 ಸಣ್ಣಗೆ ಹೆಚ್ಚಿದ ಹಸಿಮೆಣಸು, ಕೊ.ಸೊಪ್ಪು, ಪುದೀನಾ, ಕರಿಬೇವು, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಚಿಟಕಿ ಸೋಡ, 2 ಚಮಚ ಅಕ್ಕಿಹಿಟ್ಟು, ಕರಿಯಲು ಎಣ್ಣೆ.
ವಿಧಾನ : ಹೆಚ್ಚಿದ ಪದಾರ್ಥಗಳಿಗೆ ಉಳಿದೆಲ್ಲ ಸಾಮಗ್ರಿ ಬೆರೆಸಿ, ತುಸು ಕಾದ ಎಣ್ಣೆ, ಸ್ವಲ್ಪ ನೀರು ಬೆರೆಸಿ ಗಟ್ಟಿ ಮಿಶ್ರಣ ಕಲಸಿಡಿ. ಇದರಿಂದ ಚಿತ್ರದಲ್ಲಿರುವಂತೆ ತುಸುವೇ ಮಿಶ್ರಣವನ್ನು ಕಾದ ಎಣ್ಣೆಗೆ ಹಾಕುತ್ತಾ, ಗರಿಗರಿ ಪಕೋಡಾ ತಯಾರಿಸಿ.
ಮ್ಯಾಂಗೋ ಪನೀರ್ ರೋಲ್ಸ್
ಸಾಮಗ್ರಿ : ಮಾಗಿದ 1 ರಸಪುರಿ ಮಾವು, 100 ಗ್ರಾಂ ಪನೀರ್, ಅರ್ಧ ಕಪ್‌ ಪುಡಿ ಸಕ್ಕರೆ, ಒಂದಿಷ್ಟು ಬಾದಾಮಿ ಚೂರು, ಏಲಕ್ಕಿ ಪುಡಿ, ಹೆಚ್ಚಿದ ಸ್ಟ್ರಾಬೆರಿ, ಪಿಸ್ತಾ ಚೂರು.
ವಿಧಾನ : ಸಿಪ್ಪೆ ಹೆರೆದ ಮಾವಿನ ಹಣ್ಣನ್ನು ಉದ್ದಕ್ಕೆ ತುಂಡರಿಸಿ. ಪನೀರ್ ಮಸೆದು ಉಳಿದೆಲ್ಲ ಸಾಮಗ್ರಿ ಹಾಕಿ ಮಿಶ್ರಣ ಕಲಸಿಕೊಳ್ಳಿ. ಒಂದೊಂದೇ ಉದ್ದದ ಸ್ಲೈಸ್‌ ಮೇಲೆ ಈ ಮಿಶ್ರಣ ಹರಡಿ, ಸುರುಳಿ ಸುತ್ತಿಕೊಳ್ಳಿ. ಇದನ್ನು ಪಿಸ್ತಾ, ಸ್ಟ್ರಾಬೆರಿಯಿಂದ ಅಲಂಕರಿಸಿ, ಫ್ರಿಜ್‌ ನಲ್ಲಿಟ್ಟು ಚಿಲ್ ಮಾಡಿ ಸವಿಯಿರಿ.
