ಹೊಸ ವರ್ಷದಲ್ಲಿ ನೀವು ಸಹ ನಿಮ್ಮ ಮನೆಗೆ ಈ ರೀತಿಯ ಗೃಹಾಲಂಕಾರದ ಟಚ್‌ ಕೊಡಬಾರದೇಕೆ……?
ಹೊಸ ವರ್ಷ ಬಂತು ಅಂದ್ರೆ ಎಲ್ಲರೂ ಏನಾದರೊಂದು ಹೊಸತನ್ನು ಮಾಡಬಯಸುತ್ತಾರೆ. ಗೃಹಿಣಿಯರಿಗಂತೂ ತಮ್ಮ ಗೃಹಾಲಂಕಾರದ್ದೇ ಚಿಂತೆ. ಯಾವ ರೀತಿ ಹಳೆಯ ಗೃಹಾಲಂಕಾರ ಬದಲಾಯಿಸಿ ಹೊಸತನದ ಟಚ್‌ ನೀಡುವುದೆಂದು ಯೋಚಿಸುತ್ತಾರೆ. ಎಲ್ಲಕ್ಕೂ ಮುಖ್ಯವಾದುದು ಮನೆಯ ಡ್ರಾಯಿಂಗ್‌ ರೂಂ. ಇಲ್ಲಿ ಅತಿಥಿಗಳು ಬಂದು ಕೂರುತ್ತಾರೆ, ಹೀಗಾಗಿ ಇದನ್ನು ಸ್ಪೆಷಲ್ ಆಗಿಸಲೇಬೇಕು.
ಡ್ರಾಯಿಂಗ್‌ ರೂಮಿನ ಗೆಟಪ್‌ ನಿಂದ ಗೃಹಿಣಿಯ ಕ್ರಿಯೇಟಿವಿಟಿ, ಅಭರುಚಿ ಎದ್ದು ತೋರುತ್ತದೆ. ಎಷ್ಟೋ ಹೆಂಗಸರು ಹೊಸ ವರ್ಷ ಬಂತೆಂದು ಹೊಸ ಸೋಫಾ, ಹೊಸ ಪರದೆ, ಹೊಸ ರತ್ನಗಂಬಳಿ ಖರೀದಿಸ ಡ್ರಾಯಿಂಗ್‌ ರೂಂ ಲುಕ್‌ ಬದಲಿಸುವ ಪ್ರಯತ್ನ ಮಾಡುತ್ತಾರೆ. ಇಂಟೀರಿಯರ್‌ ಡೆಕೋರೇಟರ್‌ ಬಳಿ ಹೆಚ್ಚಿನ ಸಲಹೆ ಪಡೆಯುತ್ತಾರೆ. ಇದಕ್ಕೆಲ್ಲ ಧಾರಾಳ ಹಣ ಖರ್ಚಾಗುತ್ತದೆ.
ಆದರೆ ಹೆಚ್ಚಿನ ಖರ್ಚೂ ಆಗದೆ, ಹೊಸ ಬದಲಾವಣೆಗಳೊಂದಿಗೆ ಮನೆಗೆ ಹೊಸ ಲುಕ್‌ ಕೊಡಲಾಗದೇ? ಎಂದು ನೀವು ಕೇಳಿದರೆ, ಖಂಡಿತಾ ಸಾಧ್ಯವಿದೆ. ನಿಮ್ಮ ಯೋಚನಾಧಾಟಿ, ಕಲಾತ್ಮಕತೆ ಜೊತೆ ಕ್ರಿಯೇಟಿವಿಟಿ ಬೆರೆತಿರಬೇಕಷ್ಟೆ.
ಕೋಣೆಯ ಶೋಭೆ ಹೆಚ್ಚಿಸಿ
ಸಾಮಾನ್ಯವಾಗಿ ಮಧ್ಯಮ ವರ್ಗದವರ ಮನೆಗಳಲ್ಲಿ ಮುಂದಿನ ವರಾಂಡಾ, ಹಾಲ್ ಗಳಲ್ಲಿ ಸುಂದರ ಫರ್ನೀಚರ್‌, ಪರದೆ, ಶೋಪೀಸ್‌ ಇತ್ಯಾದಿ ಸುಸಜ್ಜಿತ ಆಗಿರುತ್ತವೆ. ಇಲ್ಲಿ ಉತ್ತಮ ಸೋಫಾಸೆಟ್‌ ಜೊತೆ ಸೆಂಟ್ರಲ್ ಟೇಬಲ್ ಸಹ ಇರುತ್ತದೆ. ಕಿಟಕಿ, ಬಾಗಿಲುಗಳಿಗೆ ಬ್ಯೂಟಿಫುಲ್ ಪರದೆ, ಸೈಡ್‌ ಟೇಬಲ್ ನಲ್ಲಿ ಶೋಪೀಸ್‌, ಫ್ಲವರ್‌ ವಾಸ್‌, ಇನ್‌ ಡೋರ್‌ ಪ್ಲಾಂಟ್ಸ್ ಇತ್ಯಾದಿಗಳಿಂದ ಆ ಕೋಣೆಯ ಶೋಭೆ ಹೆಚ್ಚುತ್ತದೆ.
ಇತ್ತೀಚೆಗೆ ಮನೆ ಚಿಕ್ಕದು ಅಥವಾ ತುಸು ದೊಡ್ಡದಿರಲಿ, ಅದರ ಮೇನ್‌ ಹಾಲ್ ನಲ್ಲಿ ಪಾರ್ಟಿಶನ್‌ ಮಾಡಿ, ಮುಂಭಾಗದಲ್ಲಿ ಡ್ರಾಯಿಂಗ್‌ ರೂಂ ಹಾಗೂ ಹಿಂಭಾಗದಲ್ಲಿ ಡೈನಿಂಗ್ ರೂಂ ಮಾಡಲಾಗಿರುತ್ತದೆ. ಕೆಲವು ಕಡೆ ಎರಡೂ ಭಾಗಗಳ ನಡುವೆ ತೆಳು ಪರದೆ ಇಳಿಬಿಟ್ಟು ಬೇರ್ಪಡಿಸಲಾಗುತ್ತದೆ. ಕೆಲವೊಮ್ಮೆ ಡ್ರಾಯಿಂಗ್‌ಡೈನಿಂಗ್‌ ಒಂದೇ ಕೋಣೆಯಲ್ಲಿ ಆ ಬದಿ ಈ ಬದಿ ಅರೇಂಜ್ ಮಾಡಿರಲಾಗುತ್ತದೆ.
ಡೈನಿಂಗ್ ರೂಮಿನಲ್ಲಿ ಡೈನಿಂಗ್ ಟೇಬಲ್ ಜೊತೆ ಕುರ್ಚಿ, ವುಡನ್‌ ಶೋಕೇಸ್‌ ನಲ್ಲಿ ಅಲಂಕರಿಸಲಾದ ಕ್ರಾಕರಿ, ಗೋಡೆಯಲ್ಲಿನ ಅಲ್ಮೇರಾ ಇತ್ಯಾದಿಗಳಿಂದ ಹೆಚ್ಚಿನ ಮನೆಗಳ ರೂಪುರೇಷೆ ಕೂಡಿರುತ್ತವೆ. ಬೆಡ್‌ ರೂಮಿನಲ್ಲಿ ದುಬಾರಿ ಮಂಚ, ಬೆಡ್‌, ಡ್ರೆಸ್ಸಿಂಗ್ ಟೇಬಲ್, ಸೈಡ್‌ ಟೇಬಲ್ಸ್, ಅಲ್ಮೇರಾ ಇತ್ಯಾದಿಗಳಿಂದ ಕೂಡಿರುತ್ತವೆ. ನಂತರ ಮಕ್ಕಳ ಸ್ಟಡಿರೂಂ, ಕಂಪ್ಯೂಟರ್‌ ಟೇಬಲ್, ಚೇರ್, ಬುಕ್ಸ್ ಶೆಲ್ಫ್, ಬೆಡ್‌, ಸ್ಟೂಲ್, ಬೀನ್ ಬ್ಯಾಗ್‌ ಇತ್ಯಾದಿ ಅನೇಕ ವಸ್ತುಗಳಿರುತ್ತವೆ.
ಒಂದು ಹೊಸ ಮನೆ ಕೊಂಡಾಗ, ಅದರ ಹೊಸ ಫರ್ನೀಚರ್‌ ಗಾಗಿ ಲಕ್ಷಾಂತರ ರೂ. ಹಣ ಖರ್ಚಾಗುತ್ತದೆ. ಆದರೆ ಪ್ರಭಾ ಈ ನಿಟ್ಟಿನಲ್ಲಿ ಮುಂದಾಲೋಚನೆ ವಹಿಸಿ, ಫರ್ನೀಚರ್‌ ಗೆ ಹೆಚ್ಚಿನ ಮಹತ್ವ ನೀಡಲಿಲ್ಲ. ಆಕೆ ಮನೆಯಲ್ಲಿ ಹೆಸರಿಗಷ್ಟೇ ಫರ್ನೀಚರ್‌ ಅಲ್ಲಿ ಇಲ್ಲಿ ಕಂಡುಬರುತ್ತದೆ. ಪ್ರಭಾಳ ಇಡೀ ಮನೆ ಡ್ರಾಯಿಂಗ್‌ ರೂಮಿನಿಂದ ಬೆಡ್‌ ರೂಂವರೆಗೂ, ನೆಲದ ಮೇಲೆಯೇ ಅಲಂಕರಿಸಲಾಗಿದೆ, ಕ್ಲಾಸಿಕ್‌ರಿಚ್‌ ಲುಕ್ಸ್ ಗಾಗಿ ಪ್ರಭಾಳ ಮನೆಯ ಅಂಗಳ ಪ್ರವೇಶಿಸುತ್ತಿದ್ದಂತೆಯೇ, ಹಸಿರು ತುಂಬಿದ ಲಾನ್ ನಿಮ್ಮನ್ನು ಸ್ವಾಗತಿಸುತ್ತದೆ. ಪಿಬಲ್ಸ್ ತುಂಬಿದ ಅಂದದ ಮಾರ್ಗ ಪೋರ್ಟಿಕೋಗೆ ಕರೆದೊಯ್ಯುತ್ತದೆ. 3 ಸಣ್ಣ ಮೆಟ್ಟಿಲುಗಳ ಎರಡೂ ತುದಿಗಳಲ್ಲಿ ಒಂದರ ಮೇಲೆ ಒಂದರಂತೆ ಇರಿಸಿದ 3-3 ಕ್ಲಾಸಿಕ್‌ ಕಲಶದಲ್ಲಿನ ಹೂಗಳು, ಬಂದವರಿಗೆ ಸ್ವಾಗತ ಕೋರುತ್ತವೆ. ಮೆಟ್ಟಿಲು ಹತ್ತುತ್ತಲೇ ಎಡಬದಿಗೆ, ಚಪ್ಪಲಿ ಬಿಡುವ ವ್ಯವಸ್ಥೆ ಇದೆ, ಏಕೆಂದರೆ ಬಾಗಿಲ ಬಳಿಯಿಂದಲೇ ಡ್ರಾಯಿಂಗ್‌ ರೂಂ ಇಡೀ ಬ್ಯೂಟಿಫುಲ್ ಮಖಮಲ್ ಕಾರ್ಪೆಟ್‌ ಹಾಸಲ್ಪಟ್ಟಿದೆ. ಎದುರಿನ ಗೋಡೆಯಿಂದ ಹಿಡಿದು, ಅರ್ಧ ಕೋಣೆವರೆಗೆ ಎತ್ತರದ ಗಾದಿಗಳಲ್ಲಿ ಬಣ್ಣ ಬಣ್ಣದ ಚಾದರಗಳಿದ್ದು, ರಾಜಮನೆತನದ ವಿಭಿನ್ನ ವಿನ್ಯಾಸ ಎದ್ದು ಕಾಣುತ್ತದೆ. ನಡುನಡುವೆ ನೀರು ಕಾಫಿ ಗ್ಲಾಸ್‌ ಇರಿಸಲು, ಸಾಧಾರಣ ವುಡನ್‌ ಸ್ಟೂಲುಗಳಿದ್ದು, ಅದರ ಟಾಪ್‌ ಮೇಲೆ ಪ್ರಭಾ ಸ್ವಯಂ ಆಯಿಲ್ ಪೇಂಟ್‌ ನಿಂದ ಚಿತ್ತಾರ ಬಿಡಿಸಿರುತ್ತಾಳೆ.
ಡ್ರಾಯಿಂಗ್‌ ರೂಮಿನ ಮತ್ತೊಂದು ಬದಿಯಲ್ಲಿ, ಸಂಗೀತ ಕೇಳಲೆಂದೇ ವಿವಿಧ ವಿನ್ಯಾಸಗಳ ಆಸನ ಒದಗಿಸಲಾಗಿದೆ. ಅಲ್ಲಿ ಪ್ರಭಾ ತಾನೇ ನುಡಿಸುವ ವೀಣೆ, ಜೊತೆಗೊಂದು ಹಾರ್ಮೋನಿಯಂ ಅತಿ ಕ್ಲಾಸಿಕ್‌ ಟಚ್‌ ನೀಡುತ್ತವೆ. ಪುರಸತ್ತಿದ್ದಾಗ ಪ್ರಭಾ ಇಲ್ಲಿ ಸಂಗೀತ ನುಡಿಸುವುದುಂಟು. ಇಲ್ಲಿಗೆ ಆಗಾಗ ಬರುವ ಈಕೆಯ ಫ್ರೆಂಡ್ಸ್ ಇಂಥದ್ದರಲ್ಲಿ ಹೆಚ್ಚಿನ ಅಭಿರುಚಿ ಉಳ್ಳವರು.
ವೀಕೆಂಡ್‌ ಪಾರ್ಟಿ, ಯಾರದ್ದಾದರೂ ಬರ್ತ್‌ ಡೇ ಆಚರಣೆ ಇದ್ದರೆ, ಬಂದಿದ್ದ ಅತಿಥಿಗಳಿಗೆ ಮುಖ್ಯ ಆಕರ್ಷಣೆ ಈ ಸಂಗೀತ ಕಚೇರಿಯೇ ಆಗಿರುತ್ತದೆ. ಅಲ್ಲಿನ ವಾದ್ಯಯಂತ್ರ ಗಮನಿಸಿ, ಎಲ್ಲರೂ ಹಾಡಲು ಉತ್ಸುಕರಾಗುತ್ತಾರೆ.
ಈ ತರಹ ಗಾದಿಗಳಲ್ಲಿ ಒರಗಿ ಸಂಗೀತದ ಮಜಾ ಪಡೆಯುವುದು, ದುಬಾರಿ ಸೋಫಾಗಳಲ್ಲಿ ಒರಗುವ ಸುಖಕ್ಕಿಂತಲೂ ಹಿರಿದಾದುದು! ನೆಲದ ಮೇಲೆ ಎಲ್ಲಾ ಅತಿಥಿಗಳ ಜೊತೆ ಕುಳಿತು ಆನಂದಿಸುವ ಈ ಕ್ಷಣಗಳು, ಎಲ್ಲರೂ ಒಂದೇ ಮನೆಯವರಂತೆಯೇ ಎಂಬ ಆತ್ಮೀಯತೆ ಮೂಡಿಸುತ್ತದೆ.
ಪ್ರತಿ ಮೂಲೆಯೂ ಅತಿ ಸುಂದರ!
ಡ್ರಾಯಿಂಗ್‌ ರೂಮಿನ ಒಂದು ಗೋಡೆಯ ಶೆಲ್ಫ್ ನಲ್ಲಿ ಪ್ರಸಿದ್ಧ ಲೇಖಕರ ಪುಸ್ತಕಗಳು ಜೋಡಿಸಲ್ಪಟ್ಟಿವೆ. ಶೆಲ್ಫ್ ಮಧ್ಯೆ 2 ಬೀನ್ ಬ್ಯಾಗ್ಸ್ ಇವೆ, ಇಲ್ಲಿ ಆರಾಮವಾಗಿ ಕುಳತು ಪುಸ್ತಕಗಳನ್ನು ಓದಬಹುದಾಗಿದೆ. ಪ್ರತಿ ಮೂಲೆಯಲ್ಲೂ ಸ್ಟೂಲುಗಳ ಮೇಲೆ ಇರಿಸಿದ ಹೂದಾನಿಯಲ್ಲಿ ತಾಜಾ ಹೂಗಳು, ಇಡೀ ಕೋಣೆಗೆ ಮಧುರ ಸುವಾಸನೆ ಒದಗಿಸುತ್ತವೆ. ಒಟ್ಟಾರೆ ಪ್ರಭಾಳ ಮನೆಯ ಹಾಲ್, ಮರೆಯಲಾಗದ ಅನುಭವ ನೀಡುತ್ತದೆ.
ಅದರೊಳಗೆ ಹೋದಾಗ, ಚಿಕ್ಕ ವರಾಂಡ ದಾಟಿ ಮುಂದೆ ಓಪನ್‌ ಕಿಚನ್‌ ಹಾಗೂ ಡೈನಿಂಗ್ ರೂಂ ಒಟ್ಟಿಗಿವೆ. ಡೈನಿಂಗ್ ಹಾಲ್ ನಲ್ಲೂ ಕಾರ್ಪೆಟ್‌ ಹಾಸಲಾಗಿದೆ. ಹಳೆ ಕಾಲದ ಶೈಲಿಯಂತೆ, ನೆಲದಿಂದ 1 ಅಡಿ ಎತ್ತರದಲ್ಲಿ ಕೋಣೆಯ ನಡುಮಧ್ಯೆ ಡೈನಿಂಗ್ ಟೇಬಲ್ ಬರುವಂತೆ ಇರಿಸಿದ್ದಾರೆ. ಇದರ ಮೇಲೆ ಬಿಳಿ ಚಾದರ ಹಾಕಿ, ನಡುವೆ ತಾಜಾ ಹೂಗಳ ಹೂದಾನಿ ಇರಿಸಿದ್ದಾರೆ. ಇದರ ನಾಲ್ಕೂ ಕಡೆ ಕಾರ್ಪೆಟ್‌ ಮೇಲೆ, ಚೌಕಾಕಾರದ ಗಾದಿ ಹರಡಿ ಹಾಯಾಗಿ ಕೂರಲು ಅನುಕೂಲ ಮಾಡಲಾಗಿದೆ.
ಪ್ರಭಾ ಪ್ರಕಾರ, ಸಾಂಪ್ರದಾಯಿಕ ಶೈಲಿಯಲ್ಲಿ ಎಲ್ಲರೂ ಕೆಳಗೆ ಕುಳಿತು ಭೋಜನ ಮಾಡುವುದೇ ಉತ್ತಮ ಸಂಸ್ಕೃತಿ. ಯಾರಿಗೆ ಆರೋಗ್ಯ ಸಹಕರಿಸುವುದಿಲ್ಲವೇ, ಆಧುನಿಕವಾಗಿ ಡೈನಿಂಗ್ ಟೇಬಲ್ ಇದ್ದೇ ಇದೆ. ಈ ರೀತಿ ಆಕೆ ಪ್ರಾಚೀನ, ಆಧುನಿಕ ವಿಧಾನಗಳೆರಡನ್ನೂ ಅತ್ಯುತ್ತಮವಾಗಿ ನಿಭಾಯಿಸುತ್ತಿದ್ದಾಳೆ.
ಹಳೆಯ ಸಾಂಪ್ರದಾಯಿಕ ಶೈಲಿ
ಹಿಂದಿನ ಸಾಂಪ್ರದಾಯಿಕ ಶೈಲಿಗಳಲ್ಲಿ ಅಡುಗೆಮನೆಯ ಹೊರಗಿನ ವಿಶಾಲ ಹಜಾರದಲ್ಲಿ, ಸಾಲಾಗಿ ಊಟದ ಚಾಪೆ ಹಾಕಿ, ಮಣೆ ಇಟ್ಟು, ಬಾಳೆಲೆ ಹರಡಿ ಗೃಹಿಣಿ ಬಡಿಸುವುದು ವಾಡಿಕೆ. ಹಬ್ಬ ಹರಿದಿನಗಳಲ್ಲಿ ಇಂದಿಗೂ ಇದನ್ನು ಅಚ್ಚುಕಟ್ಟಾಗಿ ಪರಿಪಾಲಿಸುವ ಪ್ರಭಾ, ಮುಂದಿನ ಪೀಳಿಗೆಗೆ ಆದರ್ಶಪ್ರಾಯವಾಗಿದ್ದಾಳೆ.
ಪ್ರಭಾ ಇಂದಿಗೂ ಅಡುಗೆಮನೆಯಲ್ಲಿ ತನ್ನ ಹೆಚ್ಚಿನ ಪಾಲಿನ ಕೆಲಸವನ್ನು ಕುಳಿತುಕೊಂಡೇ ಮಾಡಿ ಮುಗಿಸುತ್ತಾಳೆ. ಇದರಿಂದ ಆಕೆಯ ಕಾಲು, ಮಂಡಿ, ಪಾದಗಳಿಗೆ ಉತ್ತಮ ವ್ಯಾಯಾಮ ದೊರಕುತ್ತದೆ. ಈಕೆಯ ಮನೆಯ ಸದಸ್ಯರಿಗೆ ಸ್ಥೂಲತೆ, ಮಂಡಿನೋವಿನ ಕಾಟವಿಲ್ಲ. ಹೆಚ್ಚಿನ ಮಂದಿ ಇಂದಿನ ದಿನಗಳಲ್ಲೂ ನೆಲದಲ್ಲೇ ಹಾಸಿಗೆ ಹಾಸಿಕೊಂಡು ಮಲಗುತ್ತಾರೆ.
ಇವರ ಮನೆಯ 1-2 ಬೆಡ್‌ ರೂಮುಗಳಲ್ಲಿ ಮಂಚ ಇರುವುದು ಬಿಟ್ಟರೆ, ಉಳಿದಂತೆ ದೀವಾನ್‌ ತರಹ, ದುಬಾರಿ ಪಲ್ಲಂಗಗಳ ಹಂಗಿಲ್ಲ. ಹೆಚ್ಚಿನ ಕೋಣೆಗಳಲ್ಲಿ ಕಾರ್ಪೆಟ್‌ ಮೂಲೆಗಳಿಗೆ ಗೋಡೆಗಾನಿಸಿದ ಗಾದಿ, ಚಾದರಗಳಿದ್ದು, ಸಣ್ಣ ಸ್ಟೂಲ್ ಮೇಲೆ ಟೇಬಲ್ ಲ್ಯಾಂಪ್‌ ಇರಿಸಲಾಗಿದೆ.
ಮಾರುಕಟ್ಟೆಯ ಚಮಕ್‌ ಧಮಕ್‌
ಪಾರಂಪರಿಕ ರೂಪದಲ್ಲೂ ಭಾರತೀಯ ಮನೆಗಳಲ್ಲಿ ಜನ ನೆಲದ ಮೇಲೆ ಕುಳಿತು ಹೆಚ್ಚಿನ ಕೆಲಸಗಳನ್ನು ಮಾಡಿಕೊಳ್ಳುತ್ತಾ, ಸಹಭೋಜನಕ್ಕೆ ಒತ್ತು ಕೊಡುತ್ತಿದ್ದರು. ಕ್ರಮೇಣ ಪಾಶ್ಚಿಮಾತ್ಯ ಸಂಸ್ಕೃತಿಯ ಪ್ರಭಾವದಿಂದ ಫರ್ನೀಚರ್‌, ಸೋಫಾ, ಡೈನಿಂಗ್ ಟೇಬಲ್ ಗಳು ಬಂದವು. ಗಿಜಿಗುಟ್ಟುವ ಫರ್ನೀಚರ್‌ ಗಿಂತ, ಕನಿಷ್ಠ ವಸ್ತುಗಳಿಂದ ಮನೆ ಸಿಂಗರಿಸುವುದೇ ಸೂಕ್ತ.
ಇದರಿಂದ ಭಾರಿ ಫರ್ನೀಚರ್‌ ಗೆ ದುಬಾರಿ ಬೆಲೆ ತೆರುವುದೂ ತಪ್ಪುತ್ತದೆ. ಮತ್ತೊಮ್ಮೆ 60-70ರ ದಶಕದ ಮಂದಲಿಗೆ ಹಾಸು, ಚಾಪೆ, ಜಮಖಾನ ಹಾಸು ಎಂಬ ಕ್ರಮ ಎಷ್ಟೋ ಉತ್ತಮ! ಇದರಿಂದ ಸಣ್ಣ ಮಗು ಮೇಲಿನಿಂದ ಕೆಳಕ್ಕೆ ಬಿತ್ತು ಎನ್ನುವ ಟೆನ್ಶನ್ ಸಹ ಇರುವುದಿಲ್ಲ.
ಮಾರುಕಟ್ಟೆಯಲ್ಲಿನ ಚಮಕ್‌ ಧಮಕ್‌ ನಮ್ಮನ್ನು ಬೇಗ ಆಕರ್ಷಣೆಗೆ ಒಳಗಾಗುವಂತೆ ಮಾಡುತ್ತದೆ. ಇದು ಮನೆಯನ್ನು ಅನಾವಶ್ಯಕ, ದುಬಾರಿ ಫರ್ನೀಚರ್‌ ನಿಂದ ತುಂಬಿ ತುಳುಕುವಂತೆ ಮಾಡುತ್ತದೆ. ಮಾರುಕಟ್ಟೆಯಲ್ಲಿ ಪ್ರತಿದಿನ ಒಂದಲ್ಲ ಒಂದು ಹೊಸ ಹೊಸ ಫರ್ನೀಚರ್‌ ಗಳು ತಮ್ಮತ್ತ ನಮ್ಮನ್ನು ಸೆಳೆಯುತ್ತಲೇ ಇರುತ್ತವೆ. ಇಂಥ ಸುಖಾಸೀನ ಸೋಫಾಗಳಿಗೆ ಒರಗಿ ನಾವು ಎಷ್ಟು ಸಂಕುಚಿತರಾಗುತ್ತಿದ್ದೇವೆ ಎಂದು ಎಂದಾದರೂ ಚಿಂತಿಸುತ್ತೇವೆಯೇ? ಕೇವಲ ಔಪಚಾರಿಕತೆ ನಿಭಾಯಿಸುವುದಷ್ಟೇ ಮನೆ ಆಗುತ್ತದೆಯೇ? ಇದರ ಬದಲು ಹಾಯಾಗಿ ನೆಲದಲ್ಲಿ ಗಾದಿ ಮೇಲೆ ಕಾಲು ಚಾಚಿ ಕುಳಿತರೆ ಅದೆಷ್ಟು ನೆಮ್ಮದಿ ಅಲ್ಲವೇ?
ಹಿಂದೆಲ್ಲ ಮನೆಯ ಗೃಹಿಣಿ ಚಾಪೆ ಹಾಕಿ, ಮಕ್ಕಳಿಗೆ ಕೈ ತುತ್ತು ನೀಡಲು ಕುಳಿತರೆ, ಮನೆಯ ಪ್ರತಿಯೊಬ್ಬರೂ ಇದಕ್ಕಾಗಿ ಓಡಿಬರುತ್ತಿದ್ದರು. ಬೆಳದಿಂಗಳೂಟ, ತೋಟದಲ್ಲಿ ಊಟ, ಇಂಥ ರಸಮಯ ಸನ್ನಿವೇಶಗಳು ಮತ್ತೆ ಬರುವಂತೆ ಆಗಬಾರದೇ? ಎಲ್ಲರೂ ದೀರ್ಘವಾಗಿ ಆಲೋಚಿಸಬೇಕು.
– ಪ್ರತಿನಿಧಿ
