ಶಾಲಾ ಬಾಲಕಿಯರಷ್ಟೇ ಅಲ್ಲ. ಶಾಲಾ ಬಾಲಕರೊಂದಿಗೂ ಹೆಚ್ಚುತ್ತಿರುವ ರೇಪ್‌ ಪ್ರಸಂಗಗಳು ಭಯ ಮತ್ತು ಆತಂಕದ ಪರಿಸ್ಥಿತಿ ತರುತ್ತಿವೆ. ಶಾಲಾ ಮಕ್ಕಳೊಂದಿಗೆ ಲೈಂಗಿಕ ಚಟುವಟಿಕೆಗಳು ಶತಮಾನಗಳಿಂದ ನಡೆದು ಬರುತ್ತಿವೆ. ಆದರೆ ಜನ ಸುಶಿಕ್ಷಿತರಾದಂತೆ, ಸಮಾಜದಲ್ಲಿ ಕಾನೂನಿನ ಭಯ ಹೆಚ್ಚಿದಂತೆ, ಪುರುಷರು ತಮ್ಮ ಮಿತಿಗಳನ್ನು ಅರ್ಥ ಮಾಡಿಕೊಂಡಾಗ ಈ ದುಷ್ಕೃತ್ಯಗಳು ನಡೆಯುವುದಿಲ್ಲ ಎಂಬ ಭರವಸೆ ಇತ್ತು. ಆದರೆ ಹಾಗಾಗುತ್ತಿಲ್ಲ. ಈಗ ಸಣ್ಣ ವಿಷಯಗಳೂ ಪ್ರಮುಖ ಸುದ್ದಿಯಾಗುತ್ತವೆ ಮತ್ತು ಭಯಭೀತ ವಾತಾವರಣ ಉಂಟುಮಾಡುತ್ತವೆ.
ಈಗ ಇಡೀ ವಿಶ್ವದಲ್ಲಿ ಸೆಕ್ಸ್ ವ್ಯವಹಾರವಾಗಲೀ ಛೇಡಿಸುವಿಕೆಯಾಗಲೀ, ಕಡಿಮೆಯಾಗುತ್ತಿಲ್ಲ. ಕಠಿಣ ಕಾನೂನುಗಳಿರುವ ದೇಶಗಳಲ್ಲೂ ಸಹ ಭೀಕರವಾಗಿ ತುಳಿತಕ್ಕೊಳಗಾಗುವ ಪ್ರಸಂಗಗಳು ನಡೆಯುತ್ತಿವೆ. ಇನ್ನು ಕಾನೂನಿನ ಬಗ್ಗೆ ಜಾಗರೂಕತೆಯಿಲ್ಲದ ಭಾರತದಂತಹ ದೇಶದಲ್ಲಿ ಪರಿಸ್ಥಿತಿ ದಯನೀಯವಾಗಿದೆ. ಆದರೂ ತಂದೆ ತಾಯಿಯರು ತಮ್ಮ ಹೆಣ್ಣು ಮಕ್ಕಳ ಮದುವೆಯನ್ನು 14 ವರ್ಷಕ್ಕೆ ಮಾಡಿ ಮುಗಿಸಿ ಸಮಸ್ಯೆಯನ್ನು ಪರಿಹರಿಸಿಕೊಳ್ಳುವ ಅನಿವಾರ್ಯತೆ ಉಂಟಾಗುತ್ತಿಲ್ಲ ಎಂದು ಹೇಳಬಹುದು.
ಸೆಕ್ಸ್ ಅಪರಾಧಗಳಿಗೆ ಒಂದು ಮುಖ್ಯ ಕಾರಣವಂತೂ ಪ್ರಾಕೃತಿಕವಾಗಿದೆ. ಆದರೆ ಪ್ರಕೃತಿಯಂತೂ ಪರಸ್ಪರ ಹೊಡೆದಾಡಲು, ಪರಸ್ಪರ ಮೇಲೆರಗುವ ಮತ್ತು ಪರಸ್ಪರರ ಮೇಲೆ ದಾಳಿ ಮಾಡುವುದನ್ನು ಕಲಿಸಿತ್ತು. ಮಾನವ ತನ್ನ ನೂರಾರು ವರ್ಷಗಳ ಇತಿಹಾಸದಲ್ಲಿ ಈ ಪ್ರವೃತ್ತಿಯ ಮೇಲೆ ವಿಜಯ ಸಾಧಿಸಿದ್ದಾನೆ. ಇಂದು ರಸ್ತೆಯಲ್ಲಿ ತಿಂಗಳುಗಟ್ಟಲೇ ದುಬಾರಿ ವಸ್ತು ಬಿದ್ದಿದ್ದರೂ ಯಾರೂ ಎತ್ತಿಕೊಳ್ಳುವುದಿಲ್ಲ. ರಸ್ತೆಗಳಲ್ಲಿ ನಗರಸಭೆಗಳ ಕಬ್ಬಿಣದ ಬೆಂಚು, ನೀರಿನ ಹ್ಯಾಂಡ್‌ಪಂಪ್‌, ಸಿಗ್ನಲ್, ಬ್ಯಾರಿಯರ್‌ ಇತ್ಯಾದಿ ಸುಲಭವಾಗಿ ಕಳ್ಳತನವಾಗುವುದಿಲ್ಲ. ಏಕೆಂದರೆ ಸಮಾಜ ಶಿಕ್ಷಣ ಕೊಟ್ಟಿದೆ. ಮನೆಯಿಂದ ಹೊರಹೋಗುವ ಪ್ರತಿ ಮಹಿಳೆಯೂ ಸುರಕ್ಷಿತಳೆಂದು ತಿಳಿಯುತ್ತಾಳೆ. ಅವಳ ಚೀರಾಟ ಅವಳನ್ನು ರಕ್ಷಿಸುತ್ತದೆ. ಏನಾದರೂ ಆಪತ್ತು ಸಂಭವಿಸಿದರೆ ಬಹಳಷ್ಟು ಸಂದರ್ಭಗಳಲ್ಲಿ ಅಪರಾಧಿಗಳನ್ನು ಹಿಡಿಯಲಾಗುತ್ತದೆ. ಪರಿಸ್ಥಿತಿ ಕೆಟ್ಟದಾಗಿದ್ದರೂ ಅಷ್ಟೊಂದು ಹದಗೆಟ್ಟಿಲ್ಲ.
ಶಾಲಾ ಮಕ್ಕಳ ವಿಷಯದಲ್ಲಿ ತಂದೆ ತಾಯಿ ಹಾಗೂ ಜನ ಸಾಮಾನ್ಯರು ನಿಶ್ಚಿಂತರಾಗಿದ್ದುಬಿಡುತ್ತಾರೆ ಮತ್ತು ಅವರು ಸುರಕ್ಷತೆಗೆ ಸಾಧಾರಣ ಉಪಾಯಗಳನ್ನೂ ಕೈಗೊಳ್ಳುವುದಿಲ್ಲ. ಇದೇ ಅವರ ದೊಡ್ಡ ತಪ್ಪು. ಸಣ್ಣ ಮಕ್ಕಳು, ಹುಡುಗ ಹುಡುಗಿಯರಿಬ್ಬರಿಗೂ ಪರಿಚಿತ, ಅಪರಿಚಿತ ವ್ಯಕ್ತಿಗಳ ಹಿಡಿತದಲ್ಲಿ ಸಿಕ್ಕಿಕೊಳ್ಳಬಾರದೆಂದು ಎಚ್ಚರಿಸುವುದು ಅಗತ್ಯ. ಪ್ರೀತಿ ಮತ್ತು ಕಾಮದ ಭಾವನೆಗಳ ವ್ಯತ್ಯಾಸ ತಿಳಿಸಬೇಕು. ಮಕ್ಕಳನ್ನು ಭಯಭೀತರನ್ನಾಗಿಸದೆ ತಮ್ಮನ್ನು ರಕ್ಷಿಸಿಕೊಳ್ಳುವುದನ್ನು ಕಲಿಸುವುದು ಅಗತ್ಯ. ಅದಕ್ಕಾಗಿ ಮಕ್ಕಳಿಗೆ ಶಿಕ್ಷಣ ಕೊಡುವ ಅಗತ್ಯವಿದ್ದರೆ ತಂದೆತಾಯಿಯರಿಗೂ ಶಿಕ್ಷಣ ಕೊಡುವ ಅಗತ್ಯವಿದೆ. ಇಬ್ಬರಿಗೂ ಕ್ಲಾಸ್‌ ತೆಗೆದುಕೊಳ್ಳಬೇಕು.
ಉದ್ಯೋಗಸ್ಥ ತಾಯಿತಂದೆಯರು ದುಪ್ಪಟ್ಟು ಎಚ್ಚರಿಕೆಯಿಂದಿರಬೇಕು. ಅವರು ತಮ್ಮ ಮನೆಯನ್ನು, ಏನೂ ತಿಳಿಯದ ಮುಗ್ಧ ಮಕ್ಕಳ ಮೇಲೆ ಬಿಟ್ಟುಹೋಗಬಾರದು. ತಮ್ಮ ಮಕ್ಕಳನ್ನೂ ಸೇರಿಸಿ ಒಂದು ಗ್ರೂಪ್‌ ಮಾಡಬೇಕು. 3-4 ಮಕ್ಕಳು ಸರತಿಯ ಪ್ರಕಾರ ಒಬ್ಬೊಬ್ಬರ ಮನೆಯಲ್ಲಿದ್ದು ಅಪ್ಪ ಅಮ್ಮ ಕೆಲಸದಿಂದ ಹಿಂದಿರುಗುವವರೆಗೆ ತಮ್ಮ ಹೋಂವರ್ಕ್‌ ಇತ್ಯಾದಿ ಮಾಡಿಕೊಳ್ಳಬೇಕು. ಪೋಷಕರು ತಮ್ಮ ಮಕ್ಕಳನ್ನು ಪಾಲಿಸುವ ಸರಿಯಾದ ವಿಧಾನಗಳನ್ನು ತಿಳಿದುಕೊಳ್ಳಬೇಕು. ಮಕ್ಕಳೇ ಸ್ವತಃ ಕಲಿತುಕೊಳ್ಳುತ್ತಾರೆ ಎಂದುಕೊಳ್ಳಬಾರದು. ಸರ್ಕಾರಗಳು, ಕಾನೂನುಗಳು, ಪೊಲೀಸರು ಮತ್ತು ಸಂಸ್ಥೆಗಳನ್ನು ಹೆಚ್ಚು ಅಲಂಬಿಸುವುದೂ ತಪ್ಪು. ಮಕ್ಕಳ ವಿಷಯದಲ್ಲಿ ಸದಾ ಜಾಗರೂಕರಾಗಿರುವುದು ಅಗತ್ಯ.
ಸ್ವಾಗತಾರ್ಹ ನಿರ್ಧಾರ
ದೆಹಲಿಯ ಕನಾಟ್‌ಪ್ಲೇಸ್‌ ಪ್ರದೇಶದಲ್ಲಿ 3 ತಿಂಗಳಮಟ್ಟಿಗೆ ಎಲ್ಲ ಬಗೆಯ ವಾಹನಗಳ ಸಂಚಾರವನ್ನು ನಿಲ್ಲಿಸುವ ಪ್ರಯೋಗ ಮಾಡಲಾಗುತ್ತಿದೆ. ವಿದೇಶಗಳಲ್ಲಿನ ಕೆಲವು ನಗರಗಳ ಹಾಗೆ ಈ ಇಡೀ ಪ್ರದೇಶ ಪಾದಚಾರಿಗಳಿಗಷ್ಟೇ ಮೀಸಲಾಗಿರಲಿದೆ. ಇದೊಂದು ಒಳ್ಳೆಯ ಪ್ರಯೋಗ. ದೇಶದಲ್ಲಿ ಕೆಲವು ನಗರಗಳಲ್ಲಿ ಎಂತಹ ಕೆಲವು ಭಾಗಗಳಿವೆ ಎಂದರೆ, ಅಲ್ಲಿ ಕೆಲವು ರಸ್ತೆಗಳನ್ನು ಜನರು ಖರೀದಿಗಾಗಿಯೇ ಬಳಸುತ್ತಾರೆ. ಮತ್ತೆ ಕೆಲವು ರಸ್ತೆಗಳನ್ನು ಕೇವಲ ಸುತ್ತಾಟಕ್ಕಾಗಿಯೇ ಉಪಯೋಗಿಸುತ್ತಾರೆ. ಆದರೆ ಅಡ್ಡಾದಿಡ್ಡಿ ನಿಲ್ಲಿಸಿರುವ ವಾಹನಗಳಿಂದಾಗಿ ಅವರಿಗೆ ಸಂಚಾರಕ್ಕೆ ಕಿರಿಕಿರಿ ಎನಿಸುತ್ತದೆ.
ದೆಹಲಿಯಲ್ಲಿ ಕರೋಲ್ಬಾಗ್‌, ಸೌತ್‌ ಎಕ್ಸ್ ಟೆನ್ಷನ್‌, ಚಾಂದನಿ ಚೌಕ್‌, ರಾಜೋರಿ ಗಾರ್ಡನ್‌ ಮುಂತಾದ ಅನೇಕ ಪ್ರದೇಶಗಳಲ್ಲಿ ಸಾಕಷ್ಟು ಅಂಗಡಿಗಳಿವೆ. ಆದರೆ ನಡೆದಾಡಲು ಸ್ವಲ್ಪವೂ ಜಾಗ ಇಲ್ಲ. ವಾಹನಗಳು ಬಂದಾಗಿನಿಂದ ಜನರು ತಮಗೆ ಅವಶ್ಯಕತೆ ಉಂಟಾಗುತ್ತಿದ್ದಂತೆ ಗಾಡಿ ಹೊರಗೆ ತೆಗೆದು ತಮಗೆ ಬೇಕಾದ ಅಂಗಡಿಯ ಮುಂದೆ ಗಾಡಿ ನಿಲ್ಲಿಸಿ ರಾಜ-ರಾಣಿಯ ಹಾಗೆ ಶಾಪಿಂಗ್‌ ಮಾಡುತ್ತಾರೆ. ಇದು ನಿಜಕ್ಕೂ ಇತರೆ ಪ್ರಯಾಣಿಕರಿಗೆ ಮಾಡುವ ಅನ್ಯಾಯವೇ ಹೌದು. ಜೊತೆಗೆ ತಮ್ಮ ಆರೋಗ್ಯದ ಬಗ್ಗೆ ಮಾಡಿಕೊಳ್ಳುವ ಕುಚೇಷ್ಟೆಯೇ ಆಗಿದೆ.
ವಾಹನಗಳಿಂದ ಆವೃತ್ತವಾದ ಜಾಗ ಬೆಲೆ ಬಾಳುವಂಥದ್ದಾಗಿದೆ. ಅದನ್ನೀಗ ಕಡಿಮೆಗೊಳಿಸುವುದು ಅನಿವಾರ್ಯವಾಗುತ್ತಾ ಹೊರಟಿದೆ. ಸರ್ಕಾರದ ಸಡಿಲ ನೀತಿಯ ಪರಿಣಾಮವೆಂಬಂತೆ ಸೌಲಭ್ಯದಾಯಕ, ಭರವಸೆದಾಯಕ, ಸಾರಿಗೆ ಸೌಲಭ್ಯ ಇಲ್ಲವೇ ಇಲ್ಲ ಎಂಬಂತಾಗಿದೆ. ವಾಹನ ಚಲಾಯಿಸುವವರು ಈಗ ಭಾರಿ ಮೊತ್ತದ ಲಂಚ ಕೊಡಬೇಕಾಗಿ ಬರುತ್ತಿದೆ. ಖರೀದಿಗೆ ಬಡ್ಡಿ ತೆರಬೇಕಾಗುತ್ತದೆ. ಇವುಗಳ ನಿರ್ವಹಣೆಗಾಗಿ ಸಾಕಷ್ಟು ಹಣ ಖರ್ಚಾಗುತ್ತದೆ. ಹೀಗಾಗಿ ಅಂತಹ ಪ್ರದೇಶಗಳಲ್ಲಿ ಟ್ಯಾಕ್ಸಿಗಳಿರಬೇಕು. ಬ್ಯಾಟರಿ ಚಾಲಿತ ರಿಕ್ಷಾಗಳಿರಬೇಕು ಅಥವಾ ಸಾಮಾನ್ಯ ರಿಕ್ಷಾಗಳಿರಬೇಕು. ಆದರೆ ಅವೆಲ್ಲ ಕೊಳೆ ತುಂಬಿಕೊಂಡಿರುತ್ತವೆ.
ಬಸ್‌ಗಳು, ರೈಲುಗಳು, ಲೋಕಲ್ ಟ್ರೇನ್‌ಗಳು, ಮೆಟ್ರೊಗಳ ಸ್ಥಿತಿ ಅಯೋಮಯ. ಇಂತಹ ಸ್ಥಿತಿಯಲ್ಲಿ 10,000 ರೂ. ಸೀರೆ ಉಟ್ಟುಕೊಂಡು ಕೊಳೆ ಮೆತ್ತಿಕೊಂಡ ವಾಹನದಲ್ಲಿ ಸಂಚಾರ ಮಾಡಿ ಅಂಗಡಿಗಳಿಗೆ, ರೆಸ್ಟೋರೆಂಟ್‌ಗಳಿಗೆ ಯಾರು ತಾನೆ ಭೇಟಿ ಕೊಟ್ಟಾರು?
ಜನರಿಗೆ ತಮ್ಮ ಖಾಸಗಿ ವಾಹನಗಳ ಅಭ್ಯಾಸವನ್ನು ಬಿಡಿಸಲು, ಉತ್ತಮ ಸೌಕರ್ಯವಿರುವ ಸಾರ್ವಜನಿಕ ಸಾರಿಗೆ ಇರಬೇಕು. ಈ ವಾಹನಗಳು ಎಲ್ಲೆಂದರಲ್ಲಿ ಲಭ್ಯವಾಗಬೇಕು. ಅವರಿಗೆ ಆ್ಯಪ್ಸ್ ಆಧಾರಿತ ಓಲಾದಂತಹ ವಾಹನಗಳನ್ನು ಅವಲಂಬಿಸುವಂತಾಗಬಾರದು. ಸರ್ಕಾರವೇನಾದರೂ ಅದಕ್ಕೆ ಪರ್ಯಾಯ ಒದಗಿಸದೆ ಇದ್ದರೆ, ಸಾರ್ವಜನಿಕರು ತಮ್ಮ ಖಾಸಗಿ ವಾಹನಗಳ ಮೇಲಿನ ಮೋಹವನ್ನು ತೊರೆಯಲಾರರು. ವಾಹನ ಈಗ ಐಶಾರಾಮಿ ವಸ್ತುವಾಗಿ ಉಳಿದಿಲ್ಲ. ಅದೀಗ ಪೆನ್ನು, ಪುಸ್ತಕಗಳ ಹಾಗೆ ಉಪಯುಕ್ತ ವಸ್ತು ಎಂಬಂತಾಗಿದೆ. ಅವುಗಳ ಮೇಲೆ ಏನೋ ನೆಪವೊಡ್ಡಿ ಪ್ರತಿಬಂಧ ಹೇರಿದರೆ ಅದು ನಿರುಪಯುಕ್ತ ಎನಿಸುತ್ತದೆ.
ಶಾಪಿಂಗ್‌ ಪ್ರದೇಶ ಖುಷಿಯಿಂದ ಕೂಡಿರಬೇಕು ಎಂದು ಎಲ್ಲರೂ ಇಚ್ಛಿಸುತ್ತಾರೆ. ಆದರೆ ಅದಕ್ಕಾಗಿ ಯಾರೊಬ್ಬರೂ ಸರಿಯಾಗಿ ಯೋಚಿಸುವುದಿಲ್ಲ. ಈ ನಿರ್ಧಾರ ಅಧಿಕಾರಿಗಳು ಇಲ್ಲವೇ ರಾಜಕಾರಣಿಗಳ ಕೈಯಲ್ಲಿಲ್ಲ. ಈ ಬಗ್ಗೆ ಮಹಿಳೆಯರ ಅಭಿಪ್ರಾಯವನ್ನು ಕೇಳಬೇಕು. ಇಲ್ಲದಿದ್ದರೆ ಮಾಡಿದ್ದೆಲ್ಲ ವ್ಯರ್ಥ.
ವಿಚಿತ್ರ ರಾಜಕೀಯದ ಸೋಜಿಗದ ಲೀಲೆ
ತಮಿಳುನಾಡಿನಲ್ಲಿ ಜಯಲಲಿತಾ ನಿಧನದ ಬಳಿಕ ಎಐಎಡಿಎಂಕೆ ಪಕ್ಷದಲ್ಲಿ ರೋಚಕ ಸ್ಥಿತಿ ಉತ್ಪನ್ನವಾಗುತ್ತಿದೆ. ಎಂ.ಜಿ. ರಾಮಚಂದ್ರನ್‌ ನಿಧನದ ಬಳಿಕ ನಟಿ ಜಯಲಲಿತಾ ಹಾಗೂ ಅವರ ಧರ್ಮಪತ್ನಿ ಜಾನಕಿ ರಾಮಚಂದ್ರನ್‌ ನಡುವೆ ಉತ್ತರಾಧಿಕಾರಿಯ ಕಲಹ ನಡೆದಿತ್ತು. ಜಯಲಲಿತಾ ಸಾವಿನ ಬಳಿಕ ಅವರ ಬಹುಕಾಲದ ಗೆಳತಿ ಶಶಿಕಲಾ ಹಾಗೂ ಈವರೆಗೆ ಅಪರಿಚಿತರಾಗಿಯೇ ಇದ್ದ ಜಯಲಲಿತಾರ ಅಣ್ಣನ ಮಗಳು ದೀಪಾ ಜಯಕುಮಾರ್‌ ನಡುವೆ ಈಗ ಅದೇ ಸ್ಥಿತಿ ಉತ್ಪನ್ನವಾಗಿದೆ.
ಎಐಎಡಿಎಂಕೆಯ ಬಹಳಷ್ಟು ಕಾರ್ಯಕರ್ತರು ಶಶಿಕಲಾ ಬಗ್ಗೆ ಅಸಮಾಧಾನ ಹೊಂದಿದ್ದಾರೆ. ರಾಜಕೀಯ ರಂಗದಲ್ಲಿ ಹೊಸದಾಗಿ ಹೆಜ್ಜೆ ಹಾಕಿರುವ ದೀಪಾ ಅವರನ್ನು ತಮ್ಮ ನಿಯಂತ್ರಣದಲ್ಲಿ ಇಟ್ಟುಕೊಳ್ಳುವುದು ಸುಲಭ ಎಂದು ಭಾವಿಸಿದ್ದಾರೆ. ಯಾವ ರಾಜ್ಯದಲ್ಲಿ ಮುಖ್ಯಮಂತ್ರಿ ಮತ್ತು ಮುಖಂಡರು ದೇವಿಯ ಹಾಗೆ ಪೂಜಿಸಲ್ಪಡುತ್ತಾರೊ, ಅಲ್ಲಿ ಪ್ರಮುಖ ಹುದ್ದೆ ಜೊತೆಗಾರ್ತಿಗಿಂತ ರಕ್ತಸಂಬಂಧಿಗೆ ಸಿಗುತ್ತದೆ. ಒಂದು ವೇಳೆ ದೀಪಾ ಜಯಕುಮಾರ್‌ ರಾಜಕೀಯ ಪಟ್ಟುಗಳನ್ನು ಚೆನ್ನಾಗಿ ಕಲಿತುಕೊಂಡರೆ ಅದು ಶಶಿಕಲಾಗೆ ಸವಾಲಾಗಿ ಪರಿಣಮಿಸಬಹುದು.
ಜಯಲಲಿತಾ ಜೀವಿತರಾಗಿದ್ದಾಗ ಶಶಿಕಲಾರನ್ನು ಒಂದು ಅಂತರದಲ್ಲಿ ಇಟ್ಟಿದ್ದರು. ಕೆಲವು ತಿಂಗಳುಗಳ ಕಾಲ ಅವರಿಬ್ಬರ ನಡುವೆ ಮನಸ್ತಾಪ ಕೂಡ ಉಂಟಾಗಿತ್ತು. ಅಂತಿಮ ದಿನಗಳಲ್ಲಿ ಶಶಿಕಲಾರಿಂದಲೇ ಪೋಯಸ್‌ ಗಾರ್ಡನ್‌ ಮನೆ ನಡೆಯುತ್ತಿತ್ತು. ಪ್ರತಿಯೊಂದು ರಾಜಕೀಯ ನಿರ್ಧಾರಗಳಲ್ಲಿ ಅವರ ಸಲಹೆ ಪಡೆಯಲಾಗುತ್ತಿತ್ತು. ಆದರೆ ಜಯಲಲಿತಾ ಎಂದೂ ತನ್ನ ಪಾರ್ಟಿಯ ಮುಖಂಡರ ಜೊತೆ ಆಕೆಯನ್ನು ಭೇಟಿ ಮಾಡಿಸುತ್ತಿರಲಿಲ್ಲ. ಜಯಲಲಿತಾ, ಎಂ.ಜಿ.ಆರ್‌ ನಿಧನಾನಂತರ ರಾಜಕೀಯ ಚುಕ್ಕಾಣಿ ಹಿಡಿಯುವ ಹೊತ್ತಿಗೆ ಅವರು ರಾಜಕೀಯದಲ್ಲಿ ಸಾಕಷ್ಟು ಪಳಗಿದ್ದರು. ರಾಜ್ಯಸಭೆಯ ಸದಸ್ಯೆಯಾಗಿಯೂ ಚುನಾಯಿತರಾಗಿದ್ದರು.
ಶಶಿಕಲಾ ಮತ್ತು ದೀಪಾ ಇವರಿಬ್ಬರೂ ಜಯಲಲಿತಾರ ರಾಜಕೀಯ ಲಾಭ ಪಡೆದುಕೊಳ್ಳಲು ಹವಣಿಸುತ್ತಿದ್ದಾರೆ. ಆದರೆ ರಾಜಕೀಯದ ಅನುಭವವಿಲ್ಲದೆ ರಾಜಕಾರಣದ ದಾಳ ಉರುಳಿಸುವುದು ಅಷ್ಟೊಂದು ಸುಲಭವಲ್ಲ. ಅದರಲ್ಲೂ ವಿಶೇಷವಾಗಿ ಆಗಾಗ ಭಾಜಪಾ, ಡಿಎಂಕೆ ಮತ್ತು ಬೇರೆ ಹತ್ತೆಂಟು ಪಾರ್ಟಿಗಳು ಖಾಲಿ ಸ್ಥಾನವನ್ನು ಆರಿಸಿಕೊಳ್ಳಲು ಪ್ರಯತ್ನ ನಡೆಸುತ್ತಲೇ ಇರುತ್ತವೆ. ಆದಾಗ್ಯೂ ಇಬ್ಬರೂ ಹೊಸಬರ ನಡುವೆ ಆ ಕುರ್ಚಿ `ದಬಂಗ್‌’ ರೀತಿಯಲ್ಲಿ ಆಗಿದೆ. ಏಕೆಂದರೆ ದೇಶಕ್ಕೆ ಮಹಿಳಾ ಕುಸ್ತಿಯಲ್ಲಿ ವಿಶೇಷ ಆಸಕ್ತಿ. ಶಶಿಕಲಾ ವರ್ಸಸ್‌ ದೀಪಾ ಕುಸ್ತಿಯಲ್ಲಿ ಯಾರೇ ಗೆಲ್ಲಬಹುದು ಅಥವಾ ಗೆಲ್ಲದೆಯೂ ಇರಬಹುದು.
