ಸ್ಡೀಮ್ಡ್ ರೈಸ್‌ಫ್ಲೇಕ್ಸ್
ಸಾಮಗ್ರಿ : 2-2 ಕಪ್‌ ಅವಲಕ್ಕಿ-ಮೊಸರು, ಉದ್ದಿನಬೇಳೆ, ಕಡಲೆಬೇಳೆ, ಹೆಸರುಬೇಳೆ (ಅರ್ಧರ್ಧ ಕಪ್‌), 3-4 ಹಸಿಮೆಣಸು, 2-3 ಎಸಳು ಬೆಳ್ಳುಳ್ಳಿ, 1 ಸಣ್ಣ ತುಂಡು ಹಸಿಶುಂಠಿ, ಅರ್ಧ ಚಮಚ ಬೇಕಿಂಗ್‌ ಸೋಡ, ಅರ್ಧ ಕಪ್‌ ರವೆ, ರುಚಿಗೆ ಉಪ್ಪು. ಒಗ್ಗರಣೆಗೆ ಎಣ್ಣೆ, ಸಾಸುವೆ, ಉದ್ದಕ್ಕೆ ಹೆಚ್ಚಿದ ಹಸಿಮೆಣಸು, ಒಂದಿಷ್ಟು ತೆಂಗಿನ ತುರಿ.
ವಿಧಾನ : ಎಲ್ಲಾ ಬೇಳೆಗಳನ್ನೂ 2-3 ಗಂಟೆ ಕಾಲ ನೆನೆಹಾಕಿಡಿ. ಅವಲಕ್ಕಿ ಬೇರೆ ನೆನೆಹಾಕಿ. ಇವೆಲ್ಲವನ್ನೂ ಒಟ್ಟಾಗಿ ರುಬ್ಬಿಕೊಳ್ಳಿ. ಹಸಿಮೆಣಸು, ಬೆಳ್ಳುಳ್ಳಿ, ಶುಂಠಿ ಸೇರಿಸಿ ಬೇರೆ ರುಬ್ಬಿಡಿ. ರವೆಯನ್ನು ಲಘುವಾಗಿ ಹುರಿದು ಸೋಡ, ಉಪ್ಪು, ಮೊಸರು ಮತ್ತಿತರ ಎಲ್ಲವನ್ನೂ ಬೆರೆಸಿಡಿ. ಈ ಮಿಶ್ರಣವನ್ನು 2 ಗಂಟೆ ಕಾಲ ನೆನೆಯಲು ಬಿಡಿ. ನಂತರ ಇಡ್ಲಿ ತಟ್ಟೆಗೆ ಜಿಡ್ಡು ಸವರಿ ಇದರಿಂದ ಅರ್ಧರ್ಧ ಸೌಟು ಮಿಶ್ರಣ ತುಂಬಿಸಿ. 15-20 ನಿಮಿಷ ಬಿಸಿ ಬಿಸಿಯಾಗಿ ಹಬೆಯಲ್ಲಿ ಬೇಯಿಸಿ. ನಂತರ ಇವನ್ನು ಒಂದು ತಟ್ಟೆಯಲ್ಲಿ ಹರಡಿ, ಮೇಲೆ ತೆಂಗಿನ ತುರಿ ಉದುರಿಸಿ, ಸಾಸುವೆ ಮತ್ತಿತರ ಸಾಮಗ್ರಿ ಹಾಕಿ ಒಗ್ಗರಣೆ ಕೊಡಿ. ಇದನ್ನು ಪುದೀನಾ ಚಟ್ನಿ, ಟೊಮೇಟೊ ಸಾಸ್‌ ಜೊತೆ ಸವಿಯಲು ಕೊಡಿ.
ಸ್ಟಫ್ಡ್ ಬ್ರೆಡ್‌ ಲಾಗ್‌
ಸಾಮಗ್ರಿ : 2 ಡಿನ್ನರ್‌ ರೋಲ್ ಬ್ರೆಡ್‌, ಅರ್ಧ ಕಪ್‌ ಬೆಂದ ಕಡಲೆಕಾಳು, 1 ಬೆಂದ ಆಲೂಗಡ್ಡೆ, 2 ಚಮಚ ಹುರಿದ ರವೆ, 1-2 ಹಸಿ ಮೆಣಸಿನಕಾಯಿ, 1-2 ಈರುಳ್ಳಿ, 2 ಚಮಚ ಬೆಣ್ಣೆ, ಕರಿಯಲು ಎಣ್ಣೆ, ರುಚಿಗೆ ಉಪ್ಪು.
ವಿಧಾನ : ಒಂದು ಬಟ್ಟಲಿಗೆ ಬೆಂದ ಕಾಳು, ಆಲೂ, ಹೆಚ್ಚಿದ ಹಸಿಮೆಣಸು, ಈರುಳ್ಳಿ, ರವೆ, ಉಪ್ಪು ಸೇರಿಸಿ ಚೆನ್ನಾಗಿ ಮ್ಯಾಶ್‌ ಮಾಡಿ. ಇದನ್ನು ರೋಲ್ ಮಾಡಿ ಕಾದ ಎಣ್ಣೆಯಲ್ಲಿ ಕರಿಯಿರಿ. ಡಿನ್ನರ್‌ ರೋಲ್ ಬ್ರೆಡ್‌ನ್ನು ಉದ್ದಕ್ಕೆ ಹೆಚ್ಚಿ ಅದನ್ನು ಟೊಳ್ಳು ಮಾಡಿ, ಮಧ್ಯೆ ರೋಲ್ಸ್ ಇರಿಸಿ. ಬಿಸಿ ತವಾ ಮೇಲೆ ಬೆಣ್ಣೆ ಸವರಿ ಈ ರೋಲ್ಸ್ ನ್ನು ತಿರುವಿ ಹಾಕುತ್ತಾ ಬಿಸಿ ಮಾಡಿ. ಟೊಮೇಟೊ ಸಾಸ್‌ ಜೊತೆ ಸವಿಯಲು ಕೊಡಿ.
ಎಗ್‌ಪ್ಲಾಂಟ್‌ ಪಾಸ್ತಾ
ಸಾಮಗ್ರಿ: ಅರ್ಧ ಸೌಟು ಆಲಿವ್ ಎಣ್ಣೆ, 1 ಕಪ್‌ ಪಾಸ್ತಾ, 650 ಗ್ರಾಂ ಗುಂಡು ಬದನೆ, 1-2 ಈರುಳ್ಳಿ, 2-3 ಹುಳಿ ಟೊಮೇಟೊ, 2-3 ಹಸಿಮೆಣಸು, 4-5 ಎಸಳು ಬೆಳ್ಳುಳ್ಳಿ, 2 ಚಮಚ ವಿನಿಗರ್‌, ರುಚಿಗೆ ತಕ್ಕಷ್ಟು ಉಪ್ಪು, ಟೊಮೇಟೊ ಪ್ಯೂರಿ.
ವಿಧಾನ : ಗುಂಡು ಬದನೆ ಶುಚಿಗೊಳಿಸಿ, ಒರೆಸಿಕೊಂಡು ಗ್ಯಾಸ್‌ ಒಲೆ ಅಥವಾ ಕೆಂಡದಲ್ಲಿ ಲಘು ಸುಡಬೇಕು. ಇದರ ಸಿಪ್ಪೆ ಸುಲಿದು ಒಳಭಾಗ ಮಸೆದಿಡಿ. 2 ಕಪ್‌ ನೀರು ಕುದಿಸಿ. ಅದಕ್ಕೆ ಪಾಸ್ತಾ, ತುಸು ಉಪ್ಪು ಸೇರಿಸಿ ಬೇಯಿಸಿ. ಒಂದು ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿಕೊಂಡು, ಹೆಚ್ಚಿದ ಈರುಳ್ಳಿ, ಬೆಳ್ಳುಳ್ಳಿ, ಹಸಿಮೆಣಸು ನಂತರ ಟೊಮೇಟೊ ಹಾಕಿ ಬಾಡಿಸಿ. ನಂತರ ಟೊಮೇಟೊ ಪ್ಯೂರಿ, ಉಪ್ಪು ಹಾಕಿ ಕೆದಕಬೇಕು. 2 ನಿಮಿಷ ಬಿಟ್ಟು ವಿನಿಗರ್‌ ಹಾಕಿ, ಪಾಸ್ತಾ ಮತ್ತು ಮಸೆದ ಬದನೆ ಸೇರಿಸಿ ಚೆನ್ನಾಗಿ ಕೆದಕಿ ಕೆಳಗಿಳಿಸಿ, ಬಿಸಿಬಿಸಿಯಾಗಿ ಸವಿಯಲು ಕೊಡಿ.
ಖಿಚಡಿ ಕಬಾಬ್‌
ಸಾಮಗ್ರಿ : 1 ಕಪ್‌ ಉಳಿದ ಖಿಚಡಿ (ಪೊಂಗಲ್ ತರಹವೇ ಜೊತೆಗೆ ಈರುಳ್ಳಿ-ಬೆಳ್ಳುಳ್ಳಿ ಬೆರೆಸಿ ಮಾಡಿದ್ದು), 2-3 ಈರುಳ್ಳಿ (ಅರ್ಧರ್ಧ ಕಪ್‌) ಹೆಚ್ಚಿದ ಹೂಕೋಸು, ಎಲೆಕೋಸು, ನೆನೆದ ಅವಲಕ್ಕಿ, ಬ್ರೆಡ್‌ ಕ್ರಂಬ್ಸ್, 2 ಬೆಂದ ಆಲೂ, 4-5 ಹಸಿಮೆಣಸು, ಕರಿಯಲು ಎಣ್ಣೆ, ರುಚಿಗೆ ತಕ್ಕಷ್ಟು ಉಪ್ಪು, ಪುಡಿಮೆಣಸು, ಅಮ್ಚೂರ್‌ಪುಡಿ.
ವಿಧಾನ : ಒಂದು ಬೇಸನ್ನಿಗೆ ಖಿಚಡಿ ಹರಡಿ. ಇದರ ಮೇಲೆ ಮ್ಯಾಶ್‌ ಮಾಡಿದ ಆಲೂ, ನೀರು ಹೋದ ಅವಲಕ್ಕಿ, ಹೆಚ್ಚಿದ ಸಾಮಗ್ರಿ, ಮಸಾಲೆ, ಉಪ್ಪು ಸೇರಿಸಿ ಪಕೋಡ ಹದಕ್ಕೆ ಕಲಸಿಡಿ. ಇದನ್ನು ವಿವಿಧ ಆಕಾರದಲ್ಲಿ ವಡೆ ತರಹ ತಟ್ಟಿಕೊಂಡು ಕಾದ ಎಣ್ಣೆಯಲ್ಲಿ ಹೊಂಬಣ್ಣಕ್ಕೆ ಕರಿದು ತೆಗೆಯಿರಿ. ಚಿತ್ರದಲ್ಲಿರುವಂತೆ ಸಲಾಡ್‌ನಿಂದ ಅಲಂಕರಿಸಿ, ಟೊಮೇಟೊ ಸಾಸ್‌ ಜೊತೆ ಸವಿಯಲು ಕೊಡಿ.
ಬೇಕ್ಡ್ ಸ್ಪೈಸಿ ಬಾಲ್ಸ್
ಸಾಮಗ್ರಿ : 1 ಕಪ್‌ ಮೈದಾ, ಅರ್ಧ ಸೌಟು ಬೆಣ್ಣೆ, ಅರ್ಧರ್ಧ ಕಪ್‌ ತುರಿದ ಚೀಸ್‌, ಪನೀರ್‌, ಹಳದಿ, ಹಸಿರು, ಕೆಂಪು ಕ್ಯಾಪ್ಸಿಕಂ, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ಪಿಜ್ಜಾ ಸಾಸ್‌, ಬೇಕಿಂಗ್‌ ಪೌಡರ್‌/ಸೋಡ.
ವಿಧಾನ : ಬೇಕಿಂಗ್‌ ಸೋಡ, ಪೌಡರ್‌, ಉಪ್ಪು, ಮೈದಾ ಸೇರಿಸಿ ಜರಡಿಯಾಡಿ. ಇದಕ್ಕೆ ತುರಿದ ಚೀಸ್‌, ಪನೀರ್‌, ಬೆಣ್ಣೆ ಬೆರೆಸಿ ಮೃದು ಮಿಶ್ರಣ ಕಲಸಿಡಿ. ಪಿಜ್ಜಾ ಸಾಸ್‌ಗೆ 3 ಬಗೆಯ ಕ್ಯಾಪ್ಸಿಕಂ, ಉಪ್ಪು, ಮೆಣಸು ಸೇರಿಸಿ. ಕಲಸಿದ ಮಿಶ್ರಣದಿಂದ ಸಣ್ಣ ಉಂಡೆ ಮಾಡಿ ಪುಟ್ಟ ಪೂರಿ ಲಟ್ಟಿಸಿ. ಇದರ ಮಧ್ಯೆ 2-2 ಚಮಚ ಕ್ಯಾಪ್ಸಿಕಂ ಮಿಶ್ರಣವಿರಿಸಿ, ನೀಟಾಗಿ ಚಿತ್ರದಲ್ಲಿರುವಂತೆ ಉಂಡೆ ಕಟ್ಟಿ. ಒಂದು ಬೇಕಿಂಗ್‌ ಡಿಶ್‌ಗೆ ಜಿಡ್ಡು ಸವರಿ, ತುಸು ಮೈದಾ ಉದುರಿಸಿ ಅದರಲ್ಲಿ ಇವನ್ನು ಜೋಡಿಸಿ, 180 ಡಿಗ್ರಿ ಶಾಖದಲ್ಲಿ 10-12 ನಿಮಿಷ ಹದನಾಗಿ ಬೇಕ್‌ ಮಾಡಿ. ಇದನ್ನು ಸಾಸ್‌ ಜೊತೆ ಬಿಸಿಬಿಸಿಯಾಗಿ ಸವಿಯಲು ಕೊಡಿ.
ಬನಾನಾ ಪೇಸ್ಟ್ರಿ
ಸಾಮಗ್ರಿ : 2-3 ಮಾಗಿದ ಬಾಳೆಹಣ್ಣು, 1 ಗಿಟುಕು ತೆಂಗಿನ ತುರಿ, ಅರ್ಧರ್ಧ ಕಪ್‌ ಪುಡಿಸಕ್ಕರೆ, ಬೆಣ್ಣೆ, 10-12 ದ್ರಾಕ್ಷಿ, ಗೋಡಂಬಿ, 1 ಕಪ್‌ ಮೈದಾ, ತುಸು ಬೇಕಿಂಗ್‌ ಪೌಡರ್‌.
ವಿಧಾನ : ಮೈದಾಗೆ ಬೇಕಿಂಗ್‌ ಪೌಡರ್‌, ಬೆಣ್ಣೆ ಬೆರೆಸಿ ಕಲಸಿಡಿ. ಒಂದು ಪ್ಯಾನಿನಲ್ಲಿ ಸಕ್ಕರೆ ಕರಗಿಸಿಕೊಂಡು ಕಿವುಚಿದ ಬಾಳೆಹಣ್ಣು, ತುಪ್ಪದಲ್ಲಿ ಹುರಿದ ಗೋಡಂಬಿ-ದ್ರಾಕ್ಷಿ, ತೆಂಗಿನ ತುರಿ ಬೆರೆಸಿ ಚೆನ್ನಾಗಿ ಬಾಡಿಸಿ. ಮೈದಾ ಮಿಶ್ರಣದಿಂದ ಸಣ್ಣ ಉಂಡೆ ಮಾಡಿ ಲಟ್ಟಿಸಿ, ಅದರ ಮಧ್ಯೆ 2-2 ಚಮಚ ಬಾಳೆ ಮಿಶ್ರಣ ಇರಿಸಿ, ಇನ್ನೊಂದು ಪೂರಿಯಿಂದ ಅದನ್ನು ಕ್ಲೋಸ್‌ ಮಾಡಿ, ಚಿತ್ರದಲ್ಲಿರುವಂತೆ ಮಡಿಚಿ ಆಕಾರ ಕೊಡಿ. ಈ ರೀತಿ ಎಲ್ಲವನ್ನೂ ಸಿದ್ಧಪಡಿಸಿಕೊಂಡು, 180 ಡಿಗ್ರಿ ಶಾಖದಲ್ಲಿ ಇದನ್ನು 8-10 ನಿಮಿಷ ಹದನಾಗಿ ಬೇಕ್‌ ಮಾಡಿ, ಬಿಸಿಯಾಗಿ ಸವಿಯಲು ಕೊಡಿ.
ಚೆಸ್ಟ್ ನಟ್‌ ಸಲಾಡ್‌
ಸಾಮಗ್ರಿ : ಸಿಪ್ಪೆ ಸುಲಿದ 6-7 ಸಕ್ಕರೆಬಾದಾಮಿ, ಅರ್ಧರ್ಧ ಕಪ್‌ ಹೆಚ್ಚಿದ ಹಸಿರು, ಕೆಂಪು, ಹಳದಿ ಕ್ಯಾಪ್ಸಿಕಂ, ಕಡಲೆಬೀಜ, ಒಂದಿಷ್ಟು ಹೆಚ್ಚಿದ ಈರುಳ್ಳಿ ತೆನೆ, 2 ಚಮಚ ಆಲಿವ್ ಎಣ್ಣೆ, ರುಚಿಗೆ ತಕ್ಕಷ್ಟು ಉಪ್ಪು, ಚಿಲಿಸಾಸ್‌, ವಿನಿಗರ್‌.
ವಿಧಾನ : ಹಸಿ ಕಡಲೆಕಾಯಿ ಇದ್ದರೆ ನೇರವಾಗಿ ಬೇಯಿಸಿ ಅಥವಾ ಒಣ ಕಡಲೆ ಬೀಜವಿದ್ದರೆ 7-8 ಗಂಟೆ ನೆನೆಸಿ ಬೇಯಿಸಿಕೊಳ್ಳಿ. ಒಂದು ಬೇಸನ್ನಿಗೆ ಆಲಿವ್ ಎಣ್ಣೆ, ಉಪ್ಪು, ಸಾಸ್‌, ವಿನಿಗರ್‌, ಹೆಚ್ಚಿದ ಈರುಳ್ಳಿ ತೆನೆ, ಕ್ಯಾಪ್ಸಿಕಂ ಇತ್ಯಾದಿ ಬೆರೆಸಿಡಿ. ಇದಕ್ಕೆ ತುಸು ಹೆಚ್ಚಿದ ಸಕ್ಕರೆಬಾದಾಮಿ, ಬೆಂದ ಕಡಲೆಬೀಜ ಸೇರಿಸಿ. ಚಿತ್ರದಲ್ಲಿರುಂತೆ ಅಲಂಕರಿಸಿ ಸವಿಯಲು ಕೊಡಿ.
ಓಟ್ಸ್ ಸ್ಪೈಸ್‌
ಸಾಮಗ್ರಿ : 1 ಕಪ್‌ ಓಟ್ಸ್ ಪೌಡರ್‌, 1 ಗಿಟುಕು ತೆಂಗಿನ ತುರಿ, 1 ಸಣ್ಣ ಚಮಚ ಬೇಕಿಂಗ್‌ ಪೌಡರ್‌, ಅರ್ಧರ್ಧ ಕಪ್‌ ಬೆಣ್ಣೆ, ಪುಡಿಸಕ್ಕರೆ, ಹಾಲು, ತುಸು ವೆನಿಲಾ ಎಸೆನ್ಸ್.
ವಿಧಾನ : ಬೆಣ್ಣೆಗೆ ಸಕ್ಕರೆ ಸೇರಿಸಿ ಬೀಟ್‌ ಮಾಡಿ. ಇದಕ್ಕೆ ತೆಂಗಿನ ತುರಿ, ಎಸೆನ್ಸ್ ಹಾಲು ಬೆರೆಸಿ. ಆಮೇಲೆ ಓಟ್ಸ್ ಪೌಡರ್‌, ಬೇಕಿಂಗ್‌ ಪೌಡರ್‌ ಸೇರಿಸಿ ಚೆನ್ನಾಗಿ ಬೆರೆತುಕೊಳ್ಳುವಂತೆ ಮಾಡಿ. ಒಂದು ಓವನ್‌ಪ್ರೂಫ್‌ ಡಿಶ್ಶಿಗೆ ಜಿಡ್ಡು ಸವರಿ ಈ ಮಿಶ್ರಣವನ್ನು ಸಮನವಾಗಿ ಹರಡಿ, 180 ಡಿಗ್ರಿ ಶಾಖದಲ್ಲಿ 20-25 ನಿಮಿಷ ಹದನಾಗಿ ಬೇಕ್‌ ಮಾಡಿ, ಸವಿಯಲು ಕೊಡಿ.
ಚೀಸೀ ರೈಸ್‌ ಟಾರ್ಟಿಲಾ
ಸಾಮಗ್ರಿ : ಅರ್ಧರ್ಧ ಕಪ್‌ ಅಕ್ಕಿ, ತುರಿದ ಚೀಸ್‌, ಬೆಣ್ಣೆ, ಹೆಚ್ಚಿದ ಈರುಳ್ಳಿ, 2-3 ಟಾರ್ಟಿಲಾ (ರೆಡಿಮೇಡ್‌ ಲಭ್ಯ), 2-3 ಹಸಿಮೆಣಸು, ರುಚಿಗೆ ತಕ್ಕಷ್ಟು ಉಪ್ಪು, ಟೊಮೇಟೊ ಸಾಸ್‌, ಮೆಣಸು.
ವಿಧಾನ : ಒಂದು ಪ್ರೆಷರ್‌ ಪ್ಯಾನಿನಲ್ಲಿ ಬೆಣ್ಣೆ ಬಿಸಿ ಮಾಡಿ, ಹೆಚ್ಚಿದ ಹಸಿಮೆಣಸು, ಈರುಳ್ಳಿ ಹಾಕಿ ಬಾಡಿಸಿ. ನಂತರ ಟೊಮೇಟೊ, ಉಪ್ಪು ಹಾಕಿ ಕೆದಕಬೇಕು. ಆಮೇಲೆ ತೊಳೆದ ಅಕ್ಕಿ ಹಾಕಿ ನೀರಿನ ಸಮೇತ ಇದನ್ನು ಬೇಯಿಸಿ. ಪ್ರೆಷರ್‌ ಇಳಿದ ಮೇಲೆ ಇದನ್ನು ಮಂದ ಉರಿಯಲ್ಲಿ ಮತ್ತೆ ಒಲೆ ಮೇಲಿರಿಸಿ, ತುರಿದ ಚೀಸ್‌ ಹಾಕಿ ಎಲ್ಲ ಬೆರೆತುಕೊಳ್ಳುವಂತೆ ಕೆದಕಬೇಕು. ಕೆಳಗಿಳಿಸಿದ ಮೇಲೆ ತುಸು ಆರಿದ ನಂತರ, ಪ್ರತಿ ಟಾರ್ಟಿಲಾ ಮೇಲೆ ಇದನ್ನು ಹರಡಿರಿ.
ಸ್ಪಿನಾಚ್‌ ಸ್ಪೆಷಲ್
ಸಾಮಗ್ರಿ : 2 ಬೆಂದ ಆಲೂ, 1 ಕಪ್‌ ಹೆಚ್ಚಿದ ಪಾಲಕ್‌ಸೊಪ್ಪು, ಅರ್ಧರ್ಧ ಕಪ್‌ ತುರಿದ ಚೀಸ್‌, ಹೆಚ್ಚಿದ ಹಸಿರು, ಕೆಂಪು, ಹಳದಿ ಕ್ಯಾಪ್ಸಿಕಂ, ರವೆ, ಬೆಣ್ಣೆ, ತುಸು ಹೆಚ್ಚಿದ ಹಸಿಮೆಣಸು ರುಚಿಗೆ ತಕ್ಕಷ್ಟು ಉಪ್ಪು, ಪುಡಿ ಮೆಣಸು, ನಿಂಬೆರಸ.
ವಿಧಾನ : ಮೊದಲು ರವೆಯನ್ನು ಲಘುವಾಗಿ ಹುರಿದು ಬೇಸನ್ನಿಗೆ ಹಾಕಿಡಿ. ಆಲೂ ಮ್ಯಾಶ್‌ ಮಾಡಿ ಹಾಕಿ. ಇದಕ್ಕೆ ಉಪ್ಪು, ಪಾಲಕ್‌, ಚೀಸ್‌, ಹಸಿಮೆಣಸು ಎಲ್ಲಾ ಸೇರಿಸಿ ಮಿಶ್ರಣ ಕಲಸಿಡಿ. ಇದರಿಂದ ಉದ್ದಕ್ಕೆ ಉಂಡೆ ಕಟ್ಟಿ ಇಡ್ಲಿ ತರಹ ಹಬೆಯಲ್ಲಿ ಬೇಯಿಸಿ. ಒಂದು ಬಾಣಲೆಯಲ್ಲಿ ಬೆಣ್ಣೆ ಬಿಸಿ ಮಾಡಿ ಇದಕ್ಕೆ 3 ಬಗೆ ಕ್ಯಾಪ್ಸಿಕಂ ಹಾಕಿ ಬಾಡಿಸಿ. ಕೊನೆಯಲ್ಲಿ ಹಬೆಯಾಡುವ ಆಲೂ ಉಂಡೆಗಳನ್ನೂ ಸೇರಿಸಿ ಲಘುವಾಗಿ ಕೈಯಾಡಿಸಿ. ಇದರ ಮೇಲೆ ಉಪ್ಪು, ಮೆಣಸು ಉದುರಿಸಿ ಕೆದಕಿ ಕೆಳಗಿಳಿಸಿ. ಚಿತ್ರದಲ್ಲಿರುವಂತೆ ಅಲಂಕರಿಸಿ, ಮೇಲೆ ನಿಂಬೆಹಣ್ಣು ಹಿಂಡಿಕೊಂಡು ಬಿಸಿಯಾಗಿ ಸವಿಯಲು ಕೊಡಿ.
