ಕಡಲೆ ಕ್ಯೂಬ್ಸ್ ಗ್ರೇವಿ
ಮೂಲ ಸಾಮಗ್ರಿ : 1 ಕಪ್‌ ಕಡಲೆಹಿಟ್ಟು, ಕರಿಯಲು ಎಣ್ಣೆ, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಧನಿಯಾಪುಡಿ, ಗರಂಮಸಾಲ, ಇಂಗು, ಅರಿಶಿನ, ಅಮ್ಚೂರ್‌ ಪುಡಿ, ಹಸಿ ಮೆಣಸಿನ ಪೇಸ್ಟ್,
ಗ್ರೇವಿಯ ಸಾಮಗ್ರಿ : ಕೊತ್ತಂಬರಿ/ಪುದೀನಾ ಪೇಸ್ಟ್, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಧನಿಯಾಪುಡಿ, ಹುಳಿ ಮೊಸರು, ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಈರುಳ್ಳಿ ಪೇಸ್ಟ್, ಟೊಮೇಟೊ ಪೇಸ್ಟ್, ತುಸು ಹೆಚ್ಚಿದ ಹಸಿ ಮೆಣಸು, ಅರಿಶಿನ, ಜೀರಿಗೆ, ಗರಂಮಸಾಲ, ಇಡಿಯಾದ ಒಣಮೆಣಸಿನಕಾಯಿ, ಒಂದಿಷ್ಟು ಹೆಚ್ಚಿದ ಕೊ.ಸೊಪ್ಪು.
ವಿಧಾನ : ಮೂಲ ಸಾಮಗ್ರಿಯಲ್ಲಿ ಎಣ್ಣೆ ಬಿಟ್ಟು ಉಳಿದೆಲ್ಲವನ್ನೂ ನೀರಿನೊಂದಿಗೆ ಗಟ್ಟಿ ಪಕೋಡ ಮಿಶ್ರಣದ ಹದಕ್ಕೆ ಬೆರೆಸಿಕೊಳ್ಳಿ. ಇದರಿಂದ ಕಾದ ಎಣ್ಣೆಯಲ್ಲಿ ಪಕೋಡ ಕರಿಯಿರಿ. ಅದೇ ಬಾಣಲೆಯಲ್ಲಿ 1 ಸೌಟು ಎಣ್ಣೆ ಉಳಿಸಿಕೊಂಡು ಜೀರಿಗೆ, ಒಣ ಮೆಣಸಿನ ಒಗ್ಗರಣೆ ಕೊಡಿ. ನಂತರ ಮಂದ ಉರಿಯಲ್ಲಿ ಬೆಳ್ಳುಳ್ಳಿ ಶುಂಠಿ ಪೇಸ್ಟ್ ಹಾಕಿ ಕೆದಕಿರಿ. ನಂತರ ಈರುಳ್ಳಿ ಪೇಸ್ಟ್, ಆಮೇಲೆ ಟೊಮೇಟೊ ಪೇಸ್ಟ್, ಹಸಿ ಮೆಣಸಿನ ಪೇಸ್ಟ್ ಹಾಕಿ ಬಾಡಿಸಿ. ಆಮೇಲೆ ಉಪ್ಪು, ಖಾರ, ಉಳಿದೆಲ್ಲ ಮಸಾಲೆ ಬೆರೆಸಿ ಕೈಯಾಡಿಸಿ. ನಂತರ ಮೊಸರು ಬೆರೆಸಿ ಎಲ್ಲ ಬೆರೆತುಕೊಳ್ಳುವಂತೆ ಮಾಡಿ. ಅಗತ್ಯ ಎನಿಸಿದರೆ ತುಸು ನೀರು ಬೆರೆಸಿ ಕುದಿಸಿರಿ. ಮಂದ ಉರಿ ಮಾಡಿ ಕರಿದ ಪಕೋಡ ಇದಕ್ಕೆ ಹಾಕಿ, ಮತ್ತಷ್ಟು ಕುದಿಸಿ ಕೆಳಗಿಳಿಸಿ. ಇದರ ಮೇಲೆ ಕೊ.ಸೊಪ್ಪು ಉದುರಿಸಿ ಬಿಸಿಯಾಗಿ ಅನ್ನ, ಚಪಾತಿ ಜೊತೆ ಸವಿಯಿರಿ.
ಕಾರ್ನ್‌ ಪನೀರ್‌ ಕರೀ
ಸಾಮಗ್ರಿ : 200 ಗ್ರಾಂ ಪನೀರ್‌, 1 ಕಪ್‌ ಫ್ರೋಝನ್‌ ಸ್ವೀಟ್‌ ಕಾರ್ನ್‌, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಟೊಮೇಟೊ ಪೇಸ್ಟ್, ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಹೆಚ್ಚಿದ ಹಸಿ ಮೆಣಸು, ಜೀರಿಗೆ, ಕಾಳುಮೆಣಸು, ಅರಿಶಿನ, ಗರಂ ಮಸಾಲ, ಸಕ್ಕರೆ, ತುಸು ಎಣ್ಣೆ, ಮೈದಾ, ಹೆಚ್ಚಿದ ಕೊ.ಸೊಪ್ಪು.
ವಿಧಾನ : ಮೊದಲು ಪನೀರ್‌ ನ್ನು ಉದ್ದುದ್ದ ತುಂಡರಿಸಿ. ಕುಕ್ಕರ್‌ ನಲ್ಲಿ ಜೀರಿಗೆ, ಕಾಳುಮೆಣಸು ಹಾಕಿ ಚಟಪಟಾಯಿಸಿ. ನಂತರ ಹೆಚ್ಚಿದ ಹಸಿ ಮೆಣಸು, ಕರಿಬೇವು ಹಾಕಿ ಬಾಡಿಸಿ. ನಂತರ ಇದಕ್ಕೆ ಉಪ್ಪು, ಖಾರ, ಉಳಿದ ಮಸಾಲೆ ಹಾಕಿ ಕೆದಕಿರಿ. ನಂತರ ಟೊಮೇಟೊ ಪೇಸ್ಟ್ ಹಾಕಿ ಬಾಡಿಸಿ. ನಂತರ ಮೈದಾ ಸೇರಿಸಿ ಕೈಯಾಡಿಸಿ. ಆಮೇಲೆ ಪನೀರ್‌ ಹಾಕಿ ಫ್ರೈ ಮಾಡಿ. ಸ್ವೀಟ್‌ ಕಾರ್ನ್‌ ಸೇರಿಸಿ ಕೆದಕಿರಿ. ಅರ್ಧ ಕಪ್‌ ನೀರು ಬೆರೆಸಿ, ಕುಕ್ಕರ್‌ ಬಂದ್‌ ಮಾಡಿ, 1 ಸೀಟ ಕೂಗಿಸಿ. ಕೆಳಗಿಳಿಸಿ ತಣಿದ ನಂತರ ಮುಚ್ಚಳ ತೆರೆದು, ಕೊ.ಸೊಪ್ಪು ಉದುರಿಸಿ, ಚಪಾತಿ-ಪೂರಿ ಜೊತೆ ಸವಿಯಲು ಕೊಡಿ.
ರಸಭರಿತ ಅಪ್ಪಂ
ಮೂಲ ಸಾಮಗ್ರಿ : 1 ದೊಡ್ಡ ಕಂತೆ ಸಣ್ಣಗೆ ಹೆಚ್ಚಿದ ಪಾಲಕ್‌ ಸೊಪ್ಪು, ಹುಳಿ ಮೊಸರು, ಅಕ್ಕಿಹಿಟ್ಟು, ಅರ್ಧ ಕಪ್‌ ರವೆ, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಹೆಚ್ಚಿದ ಶುಂಠಿ, ಹಸಿ ಮೆಣಸು, ಕರಿಬೇವು, ಕೊ.ಸೊಪ್ಪು, ಅಮ್ಚೂರ್‌ ಪುಡಿ, ಚಿಟಕಿ ಸೋಡ, ದೋಸೆಗೆ ಎಣ್ಣೆ.
