ನ್ಯೂಯಾರ್ಕ್‌ನ ಎಂಪೈರ್‌ ಸ್ಟೇಟ್‌ ಬಿಲ್ಡಿಂಗ್‌ ಅಥವಾ ಪ್ಯಾರಿಸ್‌ನ ಐಫಿಲ್‌ ಟವರ್‌ ಅಥವಾ ಲಂಡನ್‌ ಅರಮನೆ ಇರಬಹುದು. ಈ ಎಲ್ಲ ನಮ್ಮನ್ನು ಎತ್ತರಕ್ಕೆ ಏರಿಸಿ ನಗರದ ಸುಂದರ ದೃಶ್ಯಗಳನ್ನು ನೋಡಲು ಅನುವು ಮಾಡಿಕೊಡುತ್ತದೆ. ಅಂತಹುದೇ ಒಂದು, ಜೊತೆಗೆ ಮತ್ತಷ್ಟು ಪುರಾತನ ಎನ್ನಬಹುದು. ಅಂತಹ ಎತ್ತರದ ಗೋಪುರ ಕಾಯ್ಟ್ ಟವರ್‌.ಅಲ್ಲಿಗೆ ಹೋಗುವ ದಾರಿಯೇ ವಿಶಿಷ್ಟ. ಅಷ್ಟು ಎತ್ತರಕ್ಕೆ ಸಾಗುವಾಗ ರಸ್ತೆಗಳ ಮೇಲಾದರೂ ಒಂದು ರೀತಿಯಲ್ಲಿ ರೋಲರ್‌ ಕೋಸ್ಟರ್‌ನಲ್ಲಿ ಸಾಗುವಂತೆ ಭಾಸವಾಗುತ್ತದೆ. ಸ್ವಲ್ಪ ಎದೆ ಝಲ್ ಎನಿಸುತ್ತದೆ. ಹಾದು ಹೋಗುವಾಗ ವಿಶ್ವವಿಖ್ಯಾತ ಲೋಂಬಾರ್ಡ್‌ ಸ್ಟ್ರೀಟ್‌ ಅಥವಾ ಕ್ರುಕೆಡ್‌ ಸ್ಟ್ರೀಟ್‌ ಕಂಡುಬರುತ್ತದೆ. ಅಕ್ಕಪಕ್ಕದಲ್ಲಿ ಹೂವಿನ ರಾಶಿಯ ತೋಟವನ್ನೇ ತುಂಬಿಸಿಕೊಂಡ ರಸ್ತೆಗಳು ಹಾವಿನಂತೆ ಡೊಂಕು ಡೊಂಕಾಗಿ ಸಾಗುತ್ತದೆ.
ಈ ರಸ್ತೆಯಲ್ಲಿ ಸಾಗುವುದೇ ಒಂದು ರೋಚಕ ಅನುಭವ. ಅಕ್ಕಪಕ್ಕದಲ್ಲಿ ಮನೆಗಳು... ಅಲ್ಲಿ ಸದಾ ಪ್ರವಾಸಿಗರ ವಾಹನಗಳು ಚಲಿಸುತ್ತಲೇ ಇರುತ್ತವೆ. ಪಾಪ, ಆ ರಸ್ತೆಯ ಅಕ್ಕಪಕ್ಕದಲ್ಲಿ ವಾಸಿಸುವ ಮನೆಗಳವರಿಗೆ ಎಷ್ಟು ತೊಂದರೆ ಆಗುತ್ತದೋ ಎನಿಸುತ್ತದೆ. ಆದರೆ ಮನೆಯ ವಿಳಾಸ ತಿಳಿಸುವಾಗ ಕ್ರುಕೆಡ್‌ ರಸ್ತೆಯ ಪಕ್ಕದಲ್ಲೇ ನಮ್ಮ ಮನೆ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳಬಹುದು ಅಲ್ಲವೇ?
ಈ ಅನುಭವವನ್ನು ಮೆಲುಕುಹಾಕುತ್ತಾ ಮುಂದೆ ಸಾಗಿದರೆ ಕಾಯ್ಟ್ ಟವರ್‌ ಸ್ವಾಗತ ಗೀತೆ ಹಾಡುತ್ತದೆ. 400 ಮೆಟ್ಟಿಲುಗಳನ್ನು ಹತ್ತಿ ಹೋಗಬಹುದು. ಇಲ್ಲವಾದಲ್ಲಿ ಎಲಿವೇಟರ್‌ನ ಮೂಲಕ ಸಾಗಬಹುದು. ಅದಕ್ಕಾಗಿ ಟಿಕೆಟ್‌ಗಳು ಅಲ್ಲೇ ಸಿಗುತ್ತದೆ. ದೊಡ್ಡವರಿಗೆ 8 ಡಾಲರ್‌. ಮಕ್ಕಳಿಗೆ ಮತ್ತು ಹಿರಿಯ ನಾಗರಿಕರಿಗೆ ಸ್ವಲ್ಪ ರಿಯಾಯಿತಿ ಸಿಗುತ್ತದೆ. ಎಲಿವೇಟರ್‌ಗೆ ಸಾಕಷ್ಟು ಕ್ಯೂ ಇರುತ್ತದೆ. ಒಂದು ಬಾರಿಗೆ ಆರು ಜನರನ್ನು ಕರೆದೊಯ್ಯುತ್ತದೆ. ಒಂದು ಗುಂಪು ಕೆಳಗಿಳಿದ ಮೇಲೆ ಮತ್ತೊಂದು ಗುಂಪನ್ನು ಕರೆದೊಯ್ಯುತ್ತದೆ. ಅಲ್ಲಿ ನೋಡುವವರಿಗೆ ನಿರಾಳ, ಗುಂಪು ಗದ್ದಲವಿರುವುದಿಲ್ಲ.
ಗೋಪುರದ ಸುತ್ತಲೂ ಇರುವ ಕಿಟಕಿಗಳ ಮೂಲಕ ಪೂರ್ಣವಾಗಿ ನಗರದ ವಿಹಂಗಮ ನೋಟ ಕಾಣ ಸಿಗುತ್ತದೆ. ಕೆಳಗೆ ಸುಡು ಬಿಸಿಲಿದ್ದರೂ ಮೇಲೆ ಸಾಗಿದಾಗ ತಣ್ಣನೆಯ ಗಾಳಿ ಮುದವನ್ನೀಯುತ್ತದೆ. ಒಂದು ಕಿಟಕಿಯಿಂದ ಟ್ರೆಶರ್‌ ಐ ಲ್ಯಾಂಡ್‌ ದ್ವೀಪದ ಸುತ್ತಲಿನ ಸಮುದ್ರ, ಅದರ ಸುತ್ತ ಕಂಗೊಳಿಸುವ ದ್ವೀಪದ ಚಂದದ ನೋಟ ಕಾಣುತ್ತದೆ.
ಅಲ್ಲಿಂದ ಪಕ್ಕದ ಕಿಟಕಿಗೆ ಬಂದರೆ ಅಲಕಾರ್ಟ್ಜಾ ಜೈಲಿನ ಕಟ್ಟಡ ಕೈ ಬೀಸಿ ಕರೆಯುತ್ತದೆ. ಜೈಲು ಅಲ್ವಾ...? ಎಂದು ಬೆದರಿ ಮುಂದೆ ಸಾಗಿದರೆ ನಗರದ ಎತ್ತರದ ಕಟ್ಟಡಗಳು, ನಾನೆಷ್ಟು ಎತ್ತರವಿದ್ದೇನೆ ನನ್ನನ್ನು ನೋಡಲು ನೀನು ಅಷ್ಟು ಎತ್ತರಕ್ಕೆ ಏರಬೇಕು ನೋಡು ಎಂದು ಅಣಕಿಸುವಂತೆ ಭಾಸವಾಗುತ್ತದೆ. ಹೀಗೆ ಒಂದಾದ ಮೇಲೆ ಮತ್ತೊಂದು ಕಿಟಕಿಯತ್ತ ಸಾಗುತ್ತಲೇ ಇರುತ್ತೇವೆ. ಒಂದು ಭಾಗಕ್ಕೆ ಇರುವ ಮೂರು ಕಿಟಕಿಗಳಲ್ಲಿ ಒಂದರ ಗಾಜನ್ನು ತೆರೆದಿರುತ್ತಾರೆ.
ಮಿಕ್ಕದರ ಗಾಜನ್ನು ಅಲ್ಲೊಬ್ಬ ನಿರಂತರವಾಗಿ ಒರೆಸುತ್ತಲೇ ಇರುತ್ತಾನೆ. ನಮ್ಮವರು ಅವನನ್ನೂ ಮಾತನಾಡಿಸಿದರು. ಆಗ ಅವನು ಭಾರತದ ಗೋವಾದವನು ಎಂದು ಗೊತ್ತಾಯಿತು. ಭಾರತೀಯರು ಇಲ್ಲದ ಸ್ಥಳವಿಲ್ಲ ಅಲ್ಲವೇ? ಅಲ್ಲಿ ಗಮನಿಸಿದರೆ ಎಲ್ಲರೂ ಅಲ್ಲಿನ ನೋಟವನ್ನು ನೋಡಿ ಆನಂದಿಸುವುದಕ್ಕಿಂತ ಚಿತ್ರಗಳನ್ನು ಕ್ಲಿಕ್ಕಿಸುವುದರಲ್ಲೇ ನಿರತರಾಗಿರುತ್ತಾರೆ. ನಿಜಕ್ಕೂ ನೋಡುವ ಸುಂದರ ನೋಟಕ್ಕೆ ಇದೊಂದು ಬ್ರೇಕ್‌ ಎನಿಸಿತು.
