ಎಸ್ ಎ ಪಿ ಲ್ಯಾಬ್ಸ್ ಇಂಡಿಯಾ ಬೆಂಗಳೂರಿನ ಎಸ್ ಎ ಪಿ ಲ್ಯಾಬ್ಸ್ ಇಂಡಿಯಾ ಇನೊವೇಷನ್ ಪಾರ್ಕ್ನಲ್ಲಿ ಹೊಸ ಕ್ರೀಡಾ ಸೌಲಭ್ಯವನ್ನು ಭಾರತೀಯ ಮಾಜಿ ಕ್ರಿಕೆಟಿಗ ಹಾಗೂ ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆ (ಕೆಎಸ್ಸಿಎ) ಅಧ್ಯಕ್ಷ ವೆಂಕಟೇಶ್ ಪ್ರಸಾದ್ ಮತ್ತು ಎಸ್ ಎ ಪಿ ಲ್ಯಾಬ್ಸ್ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕಿ ಸಿಂಧು ಗಂಗಾಧರನ್ ಉದ್ಘಾಟಿಸಿದರು.
2,189 ಚದರ ಮೀಟರ್ಗಳ (23,563 ಚದರ ಅಡಿ) ನಿವ್ವಳ ನಿರ್ಮಿತ ಪ್ರದೇಶವನ್ನು ಹೊಂದಿರುವ ಈ ಹೊಸ ಕ್ರೀಡಾ ಬ್ಲಾಕ್, ಆರೋಗ್ಯಕರ, ಹೆಚ್ಚು ಚಟುವಟಿಕೆಭರಿತ ಮತ್ತು ಹೆಚ್ಚು ಸಂಪರ್ಕಿತ ಉದ್ಯೋಗ ಸ್ಥಳಗಳನ್ನು ನಿರ್ಮಿಸುವಲ್ಲಿ ಎಸ್ ಎ ಪಿಯ ಮುಂದುವರಿದ ಆದ್ಯತೆಯನ್ನು ಸದೃಢಗೊಳಿಸುತ್ತದೆ. ಬಹು-ವಲಯಗಳ ಪರಿಸರವಾಗಿ ವಿನ್ಯಾಸಗೊಳಿಸಲಾದ ಈ ಸೌಲಭ್ಯವು ವಿವಿಧ ಫಿಟ್ನೆಸ್ ಮಟ್ಟಗಳು ಮತ್ತು ಆಸಕ್ತಿಗಳಿಗೆ ತಕ್ಕಂತೆ ಒಳಾಂಗಣ ಮತ್ತು ಹೊರಾಂಗಣ ಚಟುವಟಿಕೆಗಳ ವಿಶಾಲ ಶ್ರೇಣಿಯನ್ನು ಒದಗಿಸುತ್ತದೆ.
ಈ ಒಳಾಂಗಣ ಸಂಕೀರ್ಣದಲ್ಲಿ ಎರಡು ವಿಶೇಷ ಬ್ಯಾಡ್ಮಿಂಟನ್ ಕೋರ್ಟ್ಗಳು ಮತ್ತು ಬ್ಯಾಡ್ಮಿಂಟನ್ ಹಾಗೂ ಪಿಕಲ್ಬಾಲ್ ಎರಡಕ್ಕೂ ಅನುಕೂಲವಾಗುವ ಬಹುಉದ್ದೇಶ ಕೋರ್ಟ್ ಇದೆ. ಜೊತೆಗೆ ಸ್ಕ್ವಾಷ್ ಕೋರ್ಟ್, ಗಾಲ್ಫ್ ಸಿಮ್ಯುಲೇಟರ್ ಮತ್ತು ಟೇಬಲ್ ಟೆನ್ನಿಸ್, ಫೂಸ್ಬಾಲ್, ಚೆಸ್ ಹಾಗೂ ಬಿಲಿಯರ್ಡ್ಸ್ ಸೇರಿದಂತೆ ಹಲವು ಒಳಾಂಗಣ ಆಟಗಳ ವ್ಯವಸ್ಥೆಯೂ ಇದೆ. ಹೈಡ್ರೇಷನ್ ಸ್ಟೇಷನ್ಗಳು, ಶವರ್ ಸೌಲಭ್ಯವಿರುವ ಶೌಚಾಲಯಗಳು ಮತ್ತು ಸುರಕ್ಷಿತ ಲಾಕರ್ಗಳು ಉದ್ಯೋಗಿಗಳಿಗೆ ವ್ಯಾಯಾಮಕ್ಕೂ ಮುನ್ನ ಮತ್ತು ನಂತರ ಸುಗಮ ಅನುಭವ ಒದಗಿಸುತ್ತವೆ.
ಈ ಸಂದರ್ಭ ಮಾತನಾಡಿದ ಎಸ್ ಎ ಪಿ ಲ್ಯಾಬ್ಸ್ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕಿ, ಎಸ್ ಎ ಪಿಯ ಕಸ್ಟಮರ್ ಇನೊವೇಷನ್ ಸರ್ವೀಸಸ್ ವಿಭಾಗದ ಮುಖ್ಯಸ್ಥೆ ಹಾಗೂ ನಾಸ್ಕಾಂ ಅಧ್ಯಕ್ಷೆ ಸಿಂಧು ಗಂಗಾಧರನ್, “ಎಸ್ ಎ ಪಿ ಲ್ಯಾಬ್ಸ್ ಇಂಡಿಯಾದಲ್ಲಿ ನಾವು ನಮ್ಮ ಕ್ಯಾಂಪಸ್ಗಳನ್ನು ಜನರನ್ನು ಗಮನದಲ್ಲಿಟ್ಟುಕೊಂಡು ವಿನ್ಯಾಸಗೊಳಿಸುತ್ತೇವೆ. ಆರೋಗ್ಯ, ಚಲನೆ ಮತ್ತು ಒಟ್ಟಾರೆ ಕಲ್ಯಾಣವು ನಾವು ಕೆಲಸ ಮತ್ತು ಸಮುದಾಯದ ಬಗ್ಗೆ ಯೋಚಿಸುವ ರೀತಿಯನ್ನು ರೂಪಿಸುತ್ತದೆ. ಈ ಹೊಸ ಸೌಲಭ್ಯವು ದೈಹಿಕ ಕ್ಷಮತೆ ಮತ್ತು ಸಮುದಾಯ ಭಾಗವಹಿಸುವಿಕೆಯನ್ನು ಉತ್ತೇಜಿಸುವ ಸ್ಥಳಗಳನ್ನು ಒದಗಿಸುವ ನಮ್ಮ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ. ಜನರು ಬೆಂಬಲಿತ ಮತ್ತು ಉತ್ಸಾಹಭರಿತರಾಗಿರುವಾಗ, ಅವರು ಅತ್ಯುತ್ತಮವಾಗಿ ನವೀನತೆ ತಂದು ಕಾರ್ಯನಿರ್ವಹಿಸಲು ಸಾಧ್ಯವಾಗುತ್ತದೆ,” ಎಂದು ಹೇಳಿದರು.
ಹೊರಾಂಗಣ ವಲಯಗಳು ಈ ಅನುಭವಕ್ಕೆ ಇನ್ನಷ್ಟು ವೈಶಾಲ್ಯವನ್ನು ಸೇರಿಸುತ್ತವೆ. ಇಲ್ಲಿ ಫುಟ್ಸಲ್ ಕೋರ್ಟ್ ಮತ್ತು ಗೋಡೆ ಹತ್ತುವಿಕೆಗಾಗಿ ಬೌಲ್ಡರಿಂಗ್ ಜಿಮ್ ವ್ಯವಸ್ಥೆ ಇದೆ. ವಾಲಿಬಾಲ್ ಮತ್ತು ಬಾಸ್ಕೆಟ್ಬಾಲ್ಗಾಗಿ ಹೊಸ ಬಹುಉದ್ದೇಶ ಕೋರ್ಟ್ ಅನ್ನು ಶೀಘ್ರದಲ್ಲೇ ಪರಿಚಯಿಸಲಾಗುವುದು. ಇದರಿಂದ ತಂಡ ಕ್ರೀಡೆಗಳು ಮತ್ತು ಹೊರಾಂಗಣ ಚಟುವಟಿಕೆಗಳಿಗೆ ಇನ್ನಷ್ಟು ಅವಕಾಶಗಳು ದೊರೆಯಲಿವೆ. ಬಹುತೇಕ ವಲಯಗಳು ಈಗಾಗಲೇ ಕಾರ್ಯಾರಂಭ ಮಾಡಿದ್ದು, ಉಳಿದ ಭಾಗಗಳನ್ನು ಕ್ಯಾಂಪಸ್ ಅಭಿವೃದ್ಧಿಯ ಭಾಗವಾಗಿ ಹಂತ ಹಂತವಾಗಿ ಸಕ್ರಿಯಗೊಳಿಸಲಾಗುವುದು ಎಂದಿದ್ದಾರೆ.
