ಅಂದು ವಂದನಾ ಜಿಮ್ ಗೆ ಹೋಗಿ ಟ್ರೆಡ್‌ ಮಿಲ್‌ನಲ್ಲಿ ವರ್ಕ್‌ಔಟ್‌ ಮಾಡುವಾಗ ಎಂದಿನಂತೆ ಸ್ಪೀಡ್‌ ಹೆಚ್ಚಿಸಿಕೊಳ್ಳಲು ಆಗಲಿಲ್ಲ. ಯಾಕೋ ಸುಸ್ತು ಹೆಚ್ಚಾಗಿ ಏದುಸಿರು ಬರುತ್ತಿತ್ತು. ಪ್ರತಿ ದಿನದ ಜೋಶ್‌ ಅಂದು ಸಂಪೂರ್ಣ ಮರೆಯಾಗಿತ್ತು. ಸರಿಯಾಗಿ ವಾರ್ಮ್ ಅಪ್‌ ಸಹ ಮಾಡಲಾಗಲಿಲ್ಲ. ರಾತ್ರಿಯಿಡೀ ನಿದ್ದೆ ಇಲ್ಲದ ಕಾರಣ ಬೆಳಗ್ಗೆಯಿಂದಲೇ ತಲೆ ಸಿಡಿತ, ಬೇಸರ ಮಡುಗಟ್ಟಿತ್ತು. ಯಾವ ವ್ಯಾಯಾಮ ಅಂದು ಸರಿಹೋಗಲಿಲ್ಲ, ಹೀಗೆ ಎಂದೂ ಅವಳಿಗೆ ಆದದ್ದೇ ಇಲ್ಲ.
ಅವಳ ಫಿಟ್ನೆಸ್‌ ಇಡೀ ಅಪಾರ್ಟ್‌ಮೆಂಟ್‌ನ ಎಲ್ಲಾ ಹೆಂಗಸರಿಗೂ ಆದರ್ಶಪ್ರಾಯ. ಬಲು ಸ್ಮಾರ್ಟ್‌, ಸುಂದರ, ಸ್ಲಿಮ್ ಆಗಿದ್ದ ವಂದನಾ ತನ್ನ ಸದಾ ಹಸನ್ಮುಖಿ, ಬೋಲ್ಡ್ ಸ್ವಭಾವದ ಕಾರಣ ಆ ಏರಿಯಾ ಪೂರ್ತಿ ಫೇಮಸ್‌ ಆಗಿದ್ದಳು. ಅಂದು ಜಿಮ್ ನಲ್ಲಿ ಅವಳ ಗೆಳತಿಯರ ನೋಟವೆಲ್ಲ ಅವಳಲ್ಲೇ ನೆಟ್ಟಿತ್ತು. ಎಲ್ಲರಿಗೂ ಅವಳ ಮನಸ್ಥಿತಿಯ ಅರಿವಿತ್ತು. ಅವಳು ಬೇಸರಗೊಂಡಿರುವುದನ್ನು ನೋಡಿ ಗೆಳತಿಯರಿಗೂ ಬೇಜಾರಾಯಿತು.
ವಂದನಾ ಒಂದು ಬ್ರೇಕ್‌ ಪಡೆದು ತನ್ನ ಬಾಟಲಿಯಿಂದ ನೀರು ತೆಗೆದು ಕುಡಿದಳು. ನಂತರ ಅವಳು ಟ್ರೇನರ್‌ ಅನು ಕಡೆ ತಿರುಗಿ, ``ಯಾಕೋ ಇವತ್ತು ಕಾನ್‌ಸಂಟ್ರೇಟ್‌ ಮಾಡಕ್ಕೆ ಆಗ್ತಾ ಇಲ್ಲ...... ನಾನು ಮನೆಗೆ ಹೋಗ್ತೀನಿ,'' ಎಂದು ಹೊರಟಳು.
ಪಕ್ಕದಲ್ಲೇ ಸೈಕ್ಲಿಂಗ್‌ ಹೊಡೆಯುತ್ತಿದ್ದ ಶೀಲಾ ಹೇಳಿದಳು, ``ಸದ್ಯ, ಇವತ್ತು ನೀನು ಬಂದೆಯಲ್ಲ..... ಅದೇ ನನಗೆ ಖುಷಿ! ನಾವೆಲ್ಲ ನಿನ್ನ ಪರವಾಗಿ ಇದ್ದೇವೆ, ಡೋಂಟ್‌ವರಿ....''
ಅದಾದ ಮೇಲೆ ಅನು, ಶೀಲಾ, ಸೀಮಾ ಸಹ ಬೋರ್‌ ಎಂದು ಅಲ್ಲಿಂದ ಹೊರಟುಬಿಟ್ಟರು. ಮೂವರೂ ಜಿಮ್ ನಿಂದ ಹೊರಟು ಪಕ್ಕದಲ್ಲಿದ್ದ ಸ್ವಿಮಿಂಗ್‌ ಪೂಲ್‌ನ ಬಳಿಯ ಚೇರ್‌ನಲ್ಲಿ ಕುಳಿತರು. ಆಗ ಬೆಳಗಿನ 11 ಗಂಟೆ. ಆ ತೆಳುವಾದ ಹೂಬಿಸಿಲು ಹಿತಕರವಾಗಿತ್ತು. ಅಲ್ಲಿಗೇ ಅವಳ ಕಂಗಳು ತುಂಬಿ ಬಂದಿದ್ದವು. ಶೀಲಾ ಮಾತು ಶುರು ಮಾಡಿದಳು, ``ವಂದನಾ, ನಿನ್ನೆ ರಾತ್ರಿಯೆ ನಿನ್ನ ಮೆಸೇಜ್‌ ನೋಡಿದ್ದೆ. ಮತ್ತೆ ಈಗ ಹೇಳು...... ನಿನ್ನೆ ರಾತ್ರಿ ಕಿರಣ್‌ ಆ ಮೋನಿಕಾ ಜೊತೆ ನ್ಯೂ ಇಯರ್‌ ಪ್ಲಾನ್‌ ಡಿಸ್ಕಸ್ ಮಾಡುತ್ತಿದ್ದರೆ, ಆಗಲೇ ಅವರನ್ನು ತರಾಟೆಗೆ ತಗೋಬಾರದಿತ್ತೆ?''
ವಂದನಾ ಗಂಭೀರವಾಗಿ ಉತ್ತರಿಸಿದಳು, ``ನಾನು ಅವನನ್ನು ಕೇಳಿದೆ, ಯಾರ ಜೊತೆ ನ್ಯೂ ಇಯರ್‌ ಸೆಲೆಬ್ರೇಟ್‌ ಮಾಡಲು ಪಾರ್ಟಿಗೆ ಹೊರಡುತ್ತಿರುವುದು..... ಯಾವ ಹೋಟೆಲ್‌.... ಅಂತ? ಆಗ ಅನು ನಾಚಿಕೆಯಿಲ್ಲದೆ, `ಖಂಡಿತಾ ನಿನ್ನ ಜೊತೆ ಅಂತೂ ಅಲ್ಲ! ಅಷ್ಟು ಮಾತ್ರ ತಿಳಿದುಕೋ ಸಾಕು...' ಅಂದ.
`ಯಾರ ಜೊತೆ ಹೋಗ್ತಾ ಇದ್ದಿ?' ಅಂತ ಹಠದಿಂದ ಕೇಳಿದೆ.
`ಯಾಕೆ ನನ್ನ ಬೆನ್ನ ಹಿಂದೆ ಬಿದ್ದಿರುವೆ? ಈಗಲೇ ಹೇಳಿಬಿಡೀ ಅಥವಾ ನೀನೆ ಅರ್ಥ ಮಾಡಿಕೊಳ್ತೀಯಾ?'
``ಇಂಥ ನಿರ್ಲಜ್ಜ, ನೀಚ ವ್ಯಕ್ತಿಯ ಬಳಿ ವಯಸ್ಕ ಮಕ್ಕಳೆದುರು ಅದಕ್ಕಿಂತ ಹೆಚ್ಚಿಗೆ ಏನು ಹೇಳುವುದು? ಮಕ್ಕಳು ಬೇರೆ ಕೋಣೆಯಲ್ಲಿದ್ದ ಮಾತ್ರಕ್ಕೆ ಅವರಿಗೆ ಇದೆಲ್ಲ ಅರ್ಥ ಆಗುವುದಿಲ್ಲವೇನು? ಅವನಂತೂ ಮೆಲ್ಲಗೆ ಮಾತನಾಡುವ ಮನುಷ್ಯನಲ್ಲ. ಎಲ್ಲಿಂದ ಗಂಟುಬಿದ್ದಳೋ ಆ ಪಾತರಗಿತ್ತಿ.... ಕಿರಣ್‌ಗಂತೂ ಈಗ ನಾವು ಯಾರೂ ಬೇಕಾಗಿಲ್ಲ.....''
