ಎಲ್ಲೆಲ್ಲೂ ಚುರಿ ಚುರಿ ಎನ್ನುವ ಬಿಸಿಲು, ಧೂಳು ಮಣ್ಣು, ಧಗೆ, ಸೆಕೆ ಎಲ್ಲಾ ಸೇರಿಕೊಂಡು ಬೇಸಿಗೆ ಸಾಕಪ್ಪಾ ಸಾಕು ಎನಿಸಿಬಿಡುತ್ತದೆ. ನಮ್ಮ ಚರ್ಮ, ಕೂದಲು ತನ್ನ ನೈಸರ್ಗಿಕ ಕಾಂತಿ ಕಳೆದುಕೊಳ್ಳುತ್ತದೆ. ಆದರೆ ಕೆಲವು ವಿಷಯಗಳ ಕುರಿತು ಎಚ್ಚರಿಕೆ ವಹಿಸಿದರೆ, ನಾವು ಈ ಬೇಸಿಗೆಯಲ್ಲೂ ಕೂಲ್ & ಫ್ರೆಶ್‌ ಆಗಿರಬಹುದು.
ಕ್ಷಾರಯುಕ್ತ ನೀರಿನ ಸ್ನಾನ
ಬೇಸಿಗೆಯಲ್ಲಿ ದಿನಾ ಸ್ನಾನ ಮಾಡುವುದರಿಂದ ದೇಹದ ದುರ್ವಾಸನೆ, ಸೋಂಕು, ರೋಗಾಣುಗಳಿಂದ ನಮಗೆ ಮುಕ್ತಿ ಸಿಗುತ್ತದೆ. ಸ್ನಾನ ನಮ್ಮ ರೋಗನಿರೋಧಕ ಶಕ್ತಿ ಗಳಿಸುವ ಮೊದಲ ಕ್ರಮವಾಗಿದೆ.
ಈ ಸೀಸನ್‌ನಲ್ಲಿ ನಮ್ಮ ದೇಹದಿಂದ ಧಾರಾಳ ಬೆವರು ಹರಿಯುತ್ತದೆ, ಇದರಿಂದ ದೇಹದಲ್ಲಿನ ಎಷ್ಟೋ ಕಶ್ಮಲಗಳು ದೂರವಾಗುತ್ತವೆ. ಸ್ನಾನದ ಕಾರಣ ಈ ಕಶ್ಮಲಗಳು ತೊಳೆದು ಹೋಗಿ ದೇಹ ಶುದ್ಧಗೊಳ್ಳುತ್ತದೆ. ಜೊತೆಗೆ ಕೀಟಾಣು, ವೈರಸ್‌, ಬ್ಯಾಕ್ಟೀರಿಯಾಗಳೂ ದೂರವಾಗುತ್ತವೆ. ಒಳ್ಳೆಯ ಸ್ನಾನ ಉತ್ತಮ ನಿದ್ದೆಗೆ ಮೂಲ. ನಿಮ್ಮ ಸ್ನಾನದ ಬಕೆಟ್‌ ನೀರಿಗೆ 4 ಹರಳು ಕಲ್ಲುಪ್ಪು ಹಾಕಿ ದೊಡ್ಡ ಕೋಲಿನಿಂದ ತಿರುಗಿಸಿ, ಚೆನ್ನಾಗಿ ವಿಲೀನಗೊಳ್ಳುವಂತೆ ಮಾಡಿ ಅದರಿಂದ ಸ್ನಾನ ಮಾಡಿ. ಇದರಿಂದ ನಿಮ್ಮ ವೃದ್ಧಾಪ್ಯ ದೂರವಾಗಿ ಚಿರಯೌವನ ಉಳಿಯುತ್ತದೆ. ಇದರಿಂದ ದೇಹದ ಚರ್ಮ ಮೃದು, ಕಾಂತಿಯುತವಾಗುತ್ತದೆ. ನಿಮಗೆ ಹೆಚ್ಚು ತಾಜಾತನದ ಅನುಭವವಾಗುತ್ತದೆ.
ಮಾಯಿಶ್ಚರೈಸರ್‌ ಸನ್‌ಸ್ಕ್ರೀನ್‌
ಬೇಸಿಗೆ ಕಾಲದಲ್ಲಿ ಚರ್ಮ ನಿರ್ಜೀವವಾಗಿ ಒಣಗಿ ಹೋದಂತೆ ಕಾಣಿಸುತ್ತದೆ. ಸೂರ್ಯನ ತೀಕ್ಷ್ಣ ಕಿರಣಗಳು ಚರ್ಮವನ್ನು ಹಾಳುಮಾಡುತ್ತವೆ. ಹೀಗಿರುವಾಗ ನೀವು ಉತ್ತಮ ಗುಣಮಟ್ಟದ ಮಾಯಿಶ್ಚರೈಸರ್‌ ಕ್ರೀಂ ಬಳಸಬೇಕು. ಇದರಿಂದ ಚರ್ಮದ ಆರ್ದ್ರತೆ ಮತ್ತು ಹೊಳಪು ಉಳಿದುಕೊಳ್ಳುತ್ತದೆ. ನೈಸರ್ಗಿಕ ವಿಧಾನಗಳಿಂದಲೂ ಚರ್ಮವನ್ನು ಮಾಯಿಶ್ಚರೈಸ್‌ಗೊಳಿಸಬಹುದು.
ಬೇಸಿಗೆಯಲ್ಲಿ ಸೂರ್ಯನ UV ಕಿರಣಗಳ ಸಂಪರ್ಕದಿಂದ ಚರ್ಮಕ್ಕೆ ಹಾನಿ ತಪ್ಪಿದ್ದಲ್ಲ. ಚರ್ಮ ತೀವ್ರವಾಗಿ ಉರಿಯಲೂಬಹುದು. ಹೀಗಾಗಿ ಅತ್ಯಧಿಕ SPF ಸನ್‌ಸ್ಕ್ರೀನ್‌ ಬಳಸಲೇಬೇಕು. ಇದು ಸೂರ್ಯನ UV ಕಿರಣಗಳಿಂದ ಚರ್ಮವನ್ನು ರಕ್ಷಿಸಲು ರಕ್ಷಾಕವಚವಾಗಿ ನಿಲ್ಲುತ್ತದೆ. ಏನಿಲ್ಲವೆಂದರೂ ಕನಿಷ್ಠ 30 SPFನ ಸನ್‌ಸ್ಕ್ರೀನ್‌ ಬಳಸಲೇಬೇಕು. ಮನೆಯಿಂದ ಹೊರಗೆ ಹೊರಡುವ 15-20 ನಿಮಿಷ ಮೊದಲೇ ಇದನ್ನು ಹಚ್ಚಿಕೊಳ್ಳಿ.
ಚರ್ಮದ ಸಂರಕ್ಷಣೆ
ಈ ಸೀಸನ್‌ನಲ್ಲಿ ಚರ್ಮದ ರಕ್ಷಣೆ ಮಾಡದಿದ್ದರೆ ಸನ್‌ಬರ್ನ್‌, ಅಂಟಂಟು ಚರ್ಮ, ಸ್ಕಿನ್‌ ಅಲರ್ಜಿ ಇತ್ಯಾದಿ ಸಮಸ್ಯೆಗಳು ಕಾಣಿಸಿ ಕೊಳ್ಳುತ್ತವೆ. ಆದ್ದರಿಂದ ಈ ಉರಿಬೇಸಿಗೆಯಲ್ಲಿ ನಿಮ್ಮ ಚರ್ಮವನ್ನು ಹೀಗೆ ಕಾಪಾಡಿಕೊಳ್ಳಿ :
ಸಾಧ್ಯವಾದಷ್ಟೂ ಉರಿಸಿಬಿಸಿಲಿಗೆ ಹೋಗಲೇಬೇಡಿ. ಸೂರ್ಯನ ನೇರ ಕಿರಣಗಳು ತ್ವಚೆಯ ಕೊಲೋಜನ್‌ ಎಲಾಸ್ಟಿಕ್ ಟಿಶ್ಯುಗಳನ್ನು ನಾಶ ಮಾಡುತ್ತದೆ. ಬೆಳಗ್ಗೆ ಅಥವಾ ಸಂಜೆ ನಿಮ್ಮ ಹೊರಗಿನ ಕೆಲಸ ಮುಗಿಸಿ. ಅನಿವಾರ್ಯವಾಗಿ ಹೋಗುವುದಿದ್ದರೆ 30-40 SPFನ ಸನ್‌ಸ್ಕ್ರೀನ್‌ ಹಚ್ಚಿ, ಛತ್ರಿ ಸಹಿತ ಹೊರಡಿ.
ಬಿಸಿಲಿಗೆ ಹೊರಡುವ ಮುಂಚೆ ತಂಪು ಕನ್ನಡಕ ಧರಿಸಿ. ಅದು ಕಪ್ಪು ಬಣ್ಣದ್ದಾದರೆ ಉತ್ತಮ, ಆಗ ಕಂಗಳ ಕೆಳಗಿನ ನಾಜೂಕು ತ್ವಚೆ ಸುರಕ್ಷಿತವಾಗುತ್ತದೆ.
ಬೇಸಿಗೆಯಲ್ಲಿ ಡೇಲಿ ಸ್ಕಿನ್‌ಗೆ ಕ್ಲೀನಿಂಗ್‌, ಟೋನಿಂಗ್‌, ಮಾಯಿಶ್ಚರೈಸಿಂಗ್‌ ಅಗತ್ಯ ಮಾಡಿಸಿ. ಇದಕ್ಕಾಗಿ ನಿಮ್ಮ ಚರ್ಮಕ್ಕೆ ಅನುರೂಪವಾದ ಪ್ರಾಡಕ್ಟ್ಸ್ ಖರೀದಿಸಿ ಅಥವಾ ನೈಸರ್ಗಿಕ ವಸ್ತುಗಳಾದ ಹಸಿ ಹಾಲು (ಕ್ಲೀನಿಂಗ್‌), ಗುಲಾಬಿ ಜಲ (ಟೋನಿಂಗ್‌), ಆ್ಯಲೋವೆರಾ ಜೆಲ್ (ಮಾಯಿಶ್ಚರೈಸಿಂಗ್‌) ಇತ್ಯಾದಿ.
