ಋತುಮಾನದ ಬದಲಾವಣೆ, ವಿಪರೀತ ಗಾಳಿ, ಧೂಳು, ಪರಿಸರ ಮಾಲಿನ್ಯ ಇತ್ಯಾದಿಗಳಿಂದ ಚರ್ಮ ಹೆಚ್ಚಿನ ಪ್ರಭಾವಕ್ಕೆ ಒಳಗಾಗುತ್ತದೆ. ಹೀಗಿರುವಾಗ ಅದರ ಸೂಕ್ತ ಪೋಷಣೆ ಮಾಡದಿದ್ದರೆ, ಸಮಯಕ್ಕೆ ಮೊದಲೇ ವಯಸ್ಸಾದವರಂತೆ ಮುಖದಲ್ಲಿನ ಚರ್ಮ ಸುಕ್ಕು, ನಿರಿಗೆಗಳಿಂದ ಕೂಡಿ ಜೋತುಬಿದ್ದಂತೆ ಕಾಣಿಸುತ್ತದೆ. ನಿಮ್ಮ ಚರ್ಮದ ಪ್ರಕೃತಿಗೆ ಅನುಸಾರವಾಗಿ (ಅಂದ್ರೆ ಅದು ನಾರ್ಮಲ್, ಡ್ರೈ ಅಥವಾ ಆಯ್ಲಿ ಆಗಿರಬಹುದು) ಮನೆಯಲ್ಲೇ ಒಂದಿಷ್ಟು ಲೇಪನ (ಫೇಸ್‌ ಪ್ಯಾಕ್ಸ್) ಗಳನ್ನು ಸಿದ್ಧಪಡಿಸಿಕೊಂಡು, ಮುಖಕ್ಕೆ ನೀಟಾಗಿ ಹಚ್ಚಿ, ಅದು ಸ್ವಸ್ಥ, ಸುಂದರ, ಹೊಳೆ ಹೊಳೆಯುವಂತೆ ಮಾಡಿ.
ಈ ಲೇಪನಗಳಿಂದ ಚರ್ಮ ಕಾಂತಿಯುತವಾಗುತ್ತದೆ. ಹೀಗಾಗಿಯೇ ಮದುವೆಗೆ 1 ತಿಂಗಳು ಮೊದಲೇ, ನವವಧುವಿಗೆ ಪ್ರತಿದಿನ ಇಂಥ ಲೇಪನ ಬಳಸುತ್ತಾರೆ. ಆದರೆ ಈ ಪರಿಯ ಲೇಪನಕ್ಕಾಗಿ ನೀವು ಬಳಸುತ್ತಿರುವ ವಸ್ತುಗಳ ಮಿಶ್ರಣ, ನಿಮ್ಮ ಚರ್ಮದ ಪ್ರಕೃತಿಗೆ ಅನುಕೂಲವಾಗಿರಬೇಕು. ಜೊತೆಗೆ ಇದನ್ನು ಸ್ಕ್ರಬ್‌ಮಾಡುವಾಗ ಸಿಕ್ಕಾಪಟ್ಟೆ ಉಜ್ಜದೆ, ಕೈಗಳಿಂದ ಲಘುವಾಗಿ ಮಸಾಜ್‌ಮಾಡಬೇಕು. ಒರಟು ವರ್ತನೆಯಿಂದ ಚರ್ಮ ಕುಂದಬಹುದು. ರಾಶೆಸ್‌ತಪ್ಪಿಸಲು ಲಘುವಾಗಿ ಕೈಗಳನ್ನು ವರ್ತುಲಾಕಾರವಾಗಿ ಮುಖದ ಮೇಲೆ ಆಡಿಸಿ.
ಅನೇಕ ಲಾಭಗಳು
ಇಂಥ ಫೇಸ್‌ ಪ್ಯಾಕ್‌ ಬಳಕೆಯಿಂದ ಚರ್ಮದಲ್ಲಿ ಆರ್ದ್ರತೆ ಮತ್ತು ಹೊಳಪು ಉಳಿಯುತ್ತದೆ. ಅದು ಡೆಡ್‌ ಸ್ಕಿನ್‌ ತೊಲಗಿಸಿ, ಚರ್ಮಕ್ಕೆ ಹೊಸ ತಾಜಾತನ ನೀಡುತ್ತದೆ. ಇಂಥ ಲೇಪನಗಳಿಂದಾಗಿ, ಚರ್ಮದಲ್ಲಿನ ರಕ್ತಸಂಚಾರ ಸುಸೂತ್ರ ಆಗುತ್ತದೆ. ಇದನ್ನು ರಿಮೂವ್‌ಮಾಡುವಾಗ ಚರ್ಮಕ್ಕೆ ಸಹಜವಾಗಿ ಮಸಾಜ್‌ ಸಿಗುತ್ತದೆ. ಸುಕ್ಕು, ನಿರಿಗೆ, ಮೊಡವೆಗಳಿಂದ ಮುಕ್ತಿ ಸಿಗುತ್ತದೆ.
ಹೆಚ್ಚಿನ ಲೇಪನಗಳಿಗೆ ಅರಿಶಿನವೇ ಮೂಲ. ಹೀಗಾಗಿ ನ್ಯಾಚುರಲ್ ಆ್ಯಂಟಿ ಸೆಪ್ಟಿಕ್‌ ಆದ ಇದರಿಂದ ಚರ್ಮ ಹಲವು ರೋಗಗಳಿಂದ ಮುಕ್ತಿ ಪಡೆಯುತ್ತದೆ. ಹೀಗೆಲ್ಲ ಅನೇಕ ಲಾಭಗಳಿದ್ದರೂ, ಲೇಪನದ ಮೂಲ ಪದಾರ್ಥಗಳು ನಿಮ್ಮ ಚರ್ಮಕ್ಕೆ ಅನುರೂಪವಾಗಿಯೇ ಇರಬೇಕು ಎಂಬುದನ್ನು ಗಮನಿಸಿ. ಉದಾ : ಡ್ರೈ ಸ್ಕಿನ್‌ ಇರುವವರು ಎಂದೂ ತಮ್ಮ ಲೇಪನಕ್ಕೆ ನಿಂಬೆ, ಕಿತ್ತಳೆ ರಸದಂಥ ಹುಳಿ ಪದಾರ್ಥ ಬಳಸಬಾರದು.
ಬಣ್ಣ ತೇಲಿಸುವ ಲೇಪನಗಳು
ಗೌರವರ್ಣ ಪಡೆಯವ ಬಯಸುವ ಹೆಣ್ಣುಮಕ್ಕಳು ಹೀಗೆ ಮಾಡಿ :
2 ಚಮಚ ಹಾಲಿನ ಕೆನೆ, 1 ಚಮಚ ಕಡಲೆ ಹಿಟ್ಟಿಗೆ ಅರ್ಧ ಸಣ್ಣ ಚಮಚ ಅರಿಶಿನ ಬೆರೆಸಿ ಪೇಸ್ಟ್ ಮಾಡಿ. ಇದನ್ನು ಮುಖಕ್ಕೆ ನೀಟಾಗಿ ಸವರಿ 10-15 ನಿಮಿಷ ಹಾಗೇ ಬಿಡಿ. ಹೀಗೆ ದಿನಕ್ಕೆ 2 ಸಲ, 3-4 ತಿಂಗಳು ಮಾಡಿದರೆ, ಮುಖದ ಬಣ್ಣ ಎಷ್ಟೋ ಸುಧಾರಿಸುತ್ತದೆ.
1 ಚಮಚ ಉದ್ದಿನಬೇಳೆಯನ್ನು ಹಸಿ ಹಾಲಿನಲ್ಲಿ ನೆನೆಸಿ, ನುಣ್ಣಗೆ ಪೇಸ್ಟ್ ಮಾಡಿ. ನಂತರ ಇದಕ್ಕೆ ಗುಲಾಬಿ ಜಲ ಬೆರೆಸಿ ನೀಟಾಗಿ ಮುಖಕ್ಕೆ ಹಚ್ಚಿರಿ. ಸ್ವಲ್ಪ ಹೊತ್ತು ಒಣಗಲು ಬಿಡಿ. ನಂತರ ಗುಂಡಗೆ ಕೈಯಾಡಿಸುತ್ತಾ ಪ್ಯಾಕ್‌ ತೆಗೆದುಬಿಡಿ. ಚರ್ಮದ ಕಾಂತಿ ಹೆಚ್ಚುತ್ತದೆ.
2 ಚಮಚ ಕಡಲೆಹಿಟ್ಟು, 1 ಚಮಚ ಕೊಬ್ಬರಿ ಎಣ್ಣೆ, ತುಸು ಹಸಿ ಹಾಲು ಬೆರೆಸಿ ಪೇಸ್ಟ್ ಮಾಡಿ. ಇಡೀ ದೇಹಕ್ಕೆ ಹಚ್ಚಿಕೊಂಡು, ಸ್ವಲ್ಪ ಹೊತ್ತು ಒಣಗಿಸಿ ನಂತರ ಕೈಗಳಿಂದ ಅವನ್ನು ಬಿಡಿಸಿ, ಬೆಚ್ಚಗಿನ ನೀರಿನಲ್ಲಿ ಸ್ನಾನ ಮಾಡಿ. ಚರ್ಮ ಬಲು ಮೃದುವಾಗುತ್ತದೆ.
