- ರಾಘವೇಂದ್ರ ಅಡಿಗ ಎಚ್ಚೆನ್.
2025ರ ಕೊನೆಯ ತಿಂಗಳಲ್ಲಿ ನಾವಿದ್ದೇವೆ. ಇನ್ನು ಕೆಲವೇ ದಿನಗಳಲ್ಲಿ 2026 ಅನ್ನು ನಾವು ಸ್ವಾಗತಿಸಲಿದ್ದೇವೆ. ಈಗ ಈ ವರ್ಷದ ಅತ್ಯಂತ ಜನಪ್ರಿಯ ಸಿನಿಮಾ ಹಾಗೂ ವೆಬ್ ಸೀರಿಸ್ಗಳ ಪಟ್ಟಿಯನ್ನು ಐಎಂಡಿಬಿ ಬಿಡುಗಡೆ ಮಾಡಿದೆ. ಐಎಂಡಿಬಿ ವಲಯದಲ್ಲಿ ಅತ್ಯಂತ ಜನಪ್ರಿಯವಾಗಿರೋ 10 ಭಾರತೀಯ ಸಿನಿಮಾಗಳು ಮತ್ತು 10 ವೆಬ್ ಸೀರಿಸ್ಗಳು ಪಟ್ಟಿಯಲ್ಲಿದೆ. ಇದರಲ್ಲಿ ಕನ್ನಡದ ‘ಕಾಂತಾರ: ಚಾಪ್ಟರ್ 1’ ಸಿನಿಮಾ ಕೂಡ ಇದೆ.
ಒಂದನೇ ಸ್ಥಾನದಲ್ಲಿ ಹಿಂದಿಯ ‘ಸೈಯಾರ’ ಸಿನಿಮಾ ಇದೆ. ಯಶ್ ರಾಜ್ ಫಿಲ್ಮ್ಸ್ ನಿರ್ಮಾಣದ, ಹೊಸ ಪ್ರತಿಭೆಗಳಾದ ಅನೀತ್ ಪಡ್ಡ ಹಾಗೂ ಅಹಾನ್ ಪಾಂಡೆ ನಟನೆಯ ಈ ಸಿನಿಮಾ ಈ ಬಾರಿ ಸಾಕಷ್ಟು ಸಂಚಲನ ಸೃಷ್ಟಿಸಿತ್ತು. ಬಾಲಿವುಡ್ನಲ್ಲೂ ಸಿನಿಮಾ ಗಮನ ಸೆಳೆದಿತ್ತು. ಚಿತ್ರದ ಗಳಿಕೆ ಹಿಂದಿಯಲ್ಲೇ 550 ಕೋಟಿ ರೂಪಾಯಿ ದಾಟಿದೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ʻಸೈಯಾರಾʼ ನಿರ್ಮಾಪಕ ಮತ್ತು ಯಶ್ ರಾಜ್ ಫಿಲ್ಮ್ಸ್ನ ಸಿಇಒ ಆದ ಅಕ್ಷಯ್ ವಿಧನಿ, "IMDb 2025 ರ ಪಟ್ಟಿಯಲ್ಲಿ ಸೈಯಾರಾ ಅತ್ಯಂತ ಜನಪ್ರಿಯ ಭಾರತೀಯ ಚಲನಚಿತ್ರವೆಂದು ಹೆಸರಿಸಲ್ಪಟ್ಟಿರುವುದು ನಮಗೆಲ್ಲರಿಗೂ ಹೆಮ್ಮೆಯ ಕ್ಷಣವಾಗಿದೆ. ಈ ಚಲನಚಿತ್ರವು ಹೊಸ ಮಾನದಂಡಗಳನ್ನು ಮಾತ್ರ ಹೊಂದಿಸಿಲ್ಲ, ಆದರೆ ಭೌಗೋಳಿಕತೆ, ವಯಸ್ಸು ಮತ್ತು ಸಂಸ್ಕೃತಿಯನ್ನು ಮೀರಿ ಭಾರತ ಮತ್ತು ಪ್ರಪಂಚದಾದ್ಯಂತದ ಪ್ರೇಕ್ಷಕರೊಂದಿಗೆ ಸಂಪರ್ಕ ಸಾಧಿಸಿದೆ. ಇದು YRF ಮತ್ತು ಉದ್ಯಮಕ್ಕೆ ಅತ್ಯಂತ ಪ್ರತಿಷ್ಠಿತ ಚಲನಚಿತ್ರಗಳಲ್ಲಿ ಒಂದಾಗಿದೆ ಎಂದು ನಾವು ಕೃತಜ್ಞರಾಗಿದ್ದೇವೆ. ನಿರ್ದೇಶಕ ಮೋಹಿತ್ ಸೂರಿ ಅವರ ಸ್ಪಷ್ಟ ದೃಷ್ಟಿ ಮತ್ತು ಆಳವಾದ ಭಾವನೆಯನ್ನು ಚಿತ್ರಕ್ಕೆ ತಂದರು, ಅಹಾನ್ ಪಾಂಡೆ ಮತ್ತು ಅನೀತ್ ಪಡ್ಡಾ ಅವರು ವಿಶ್ವಾಸಾರ್ಹ, ಪ್ರಾಮಾಣಿಕ ಚೊಚ್ಚಲ ಪ್ರದರ್ಶನಗಳನ್ನು ನೀಡಿದರು, ಅದು ವಿಶ್ವಾದ್ಯಂತದ ಪ್ರೇಕ್ಷಕರೊಂದಿಗೆ ತಕ್ಷಣವೇ ಸಂಪರ್ಕ ಸಾಧಿಸಿತು" ಎಂದು ಹೇಳಿದ್ದಾರೆ.
"2025ರ ಅತ್ಯಂತ ಜನಪ್ರಿಯ ಭಾರತೀಯ ಚಲನಚಿತ್ರಗಳು ಮತ್ತು ಸರಣಿಗಳ ಪಟ್ಟಿಗಳು ಭಾರತೀಯ ನಿರ್ಮಾಪಕರ ಧೈರ್ಯ ಮತ್ತು ಹೊಸತನವನ್ನು ಪ್ರದರ್ಶಿಸುತ್ತವೆ. ಪ್ರಣಯದಿಂದ ಹಿಡಿದು ಅನಿಮೇಷನ್, ಸೂಪರ್ಹೀರೋ ಸಿನಿಮಾಗಳಿಂದ ಹಿಡಿದು ವಿಡಂಬನೆಯವರೆಗೆ ವೈವಿಧ್ಯಮಯ ಕಥೆ ಹೇಳುವ ಶೈಲಿಯು ಉದ್ಯಮದ ಉತ್ಸಾಹವನ್ನು ಇದು ಪ್ರತಿಬಿಂಬಿಸುತ್ತದೆ. ವಿಶಿಷ್ಟವಾದ ಭಾರತೀಯ ಕಥೆಗಳು ಮತ್ತು ಸಾಂಸ್ಕೃತಿಕ ನಿರೂಪಣೆಗಳು ವಿಶ್ವದ ಪ್ರೇಕ್ಷಕರಿಗೆ ಇಷ್ಟವಾಗುತ್ತಿರುವುದು ವಿಶೇಷವಾಗಿ ರೋಮಾಂಚನಕಾರಿಯಾಗಿದೆ" ಎಂದು IMDb ಇಂಡಿಯಾದ ಮುಖ್ಯಸ್ಥೆ ಯಾಮಿನಿ ಪಟೋಡಿಯಾ ಹೇಳಿದ್ದಾರೆ.
ಹೊಂಬಾಳೆ ಫಿಲ್ಮ್ಸ್ ಅರ್ಪಿತ ಅನಿಮೇಟೆಡ್ ಸಿನಿಮಾ ‘ಮಹಾವತಾರ ನರಸಿಂಹ’ ಚಿತ್ರಕ್ಕೆ ಪಟ್ಟಿಯಲ್ಲಿ ಎರಡನೇ ಸ್ಥಾನ ಸಿಕ್ಕಿದೆ. ವಿಕ್ಕಿ ಕೌಶಲ್ ಹಾಗೂ ಕನ್ನಡದ ನಟಿ ರಶ್ಮಿಕಾ ಮಂದಣ್ಣ ಅಭಿನಯದ ‘ಛಾವಾ’ ಚಿತ್ರಕ್ಕೆ ಮೂರನೇ ಸ್ಥಾನ ಸಿಕ್ಕಿದೆ. ನಾಲ್ಕನೇ ಸ್ಥಾನದಲ್ಲಿ ‘ಕಾಂತಾರ:ಚಾಪ್ಟರ್ 1’ ಸಿನಿಮಾ ಇದೆ. ರಿಷಬ್, ರುಕ್ಮಿಣಿ ವಸಂತ್ ನಟನೆಯ ಈ ಚಿತ್ರಕ್ಕೆ ಹೊಂಬಾಳೆ ನಿರ್ಮಾಣ ಮಾಡಿದೆ.
ರಜನಿಕಾಂತ್ ನಟನೆಯ ‘ಕೂಲಿ’ (ಐದನೇ ಸ್ಥಾನ), ತಮಿಳಿನ ‘ಡ್ರ್ಯಾಗನ್’(ಆರನೇ ಸ್ಥಾನ), ಆಮಿರ್ ಖಾನ್ ಅವರ ‘ಸಿತಾರೆ ಜಮೀನ್ ಪರ್’(ಏಳನೇ ಸ್ಥಾನ) ಪಡೆದಿದೆ. ‘ದೇವ’, ‘ರೈಡ್ 2’ ಹಾಗೂ ಮಲಯಾಳಂನ ‘ಲೋಕಃ’ ಅನುಕ್ರಮವಾಗಿ ಎಂಟು, ಒಂಭತ್ತು ಹಾಗೂ 10ನೇ ಸ್ಥಾನ ಪಡೆದಿವೆ.
