ಡ್ರೈ ಫ್ರೂಟ್ಸ್ ಬರ್ಫಿ
ಸಾಮಗ್ರಿ : 30 ಹೈಡ್‌ ಅಂಡ್ ಸೀಕ್‌ ಬಿಸ್ಕತ್ತು, ಒಂದಿಷ್ಟು ಗೋಡಂಬಿ, ದ್ರಾಕ್ಷಿ, ಪಿಸ್ತಾ, ಬಾದಾಮಿ ಚೂರು (ಒಟ್ಟಾಗಿ 1 ಕಪ್‌), ಅರ್ಧ ಕಪ್‌ ಜರಡಿಯಾಡದ ಗೋಧಿಹಿಟ್ಟು, 4 ಚಮಚ ಕೋಕೋ ಪುಡಿ, 200 ಗ್ರಾಂ ಕಂಡೆನ್ಸ್ಡ್ ಮಿಲ್ಕ್, ಅರ್ಧ ಕಪ್‌ ತುಪ್ಪ.
ವಿಧಾನ : ಮೊದಲು ಬಾಣಲೆಯಲ್ಲಿ ತುಸು ತುಪ್ಪ ಬಿಸಿ ಮಾಡಿ ದ್ರಾಕ್ಷಿ-ಗೋಡಂಬಿಗಳನ್ನು ಹುರಿದು ತೆಗೆಯಿರಿ. ಇದರಲ್ಲಿಯೇ ಗೋಧಿಹಿಟ್ಟನ್ನೂ ಲಘುವಾಗಿ ಹುರಿಯಿರಿ. ಒಂದು ಬೇಸನ್ನಿಗೆ ಬಿಸ್ಕತ್ತನ್ನು ಪುಡಿ ಮಾಡಿ ಹಾಕಿ, ಅದಕ್ಕೆ ಉಳಿದೆಲ್ಲ ಸಾಮಗ್ರಿ ಬೆರೆಸಿ, ಉದ್ದನೆಯ ಸುರುಳಿ ಮಾಡಿ. ಇದನ್ನು ಸಿಲ್ವರ್‌ ಫಾಯಿಲ್‌ನಲ್ಲಿ ಸುತ್ತಿ ಫ್ರಿಜ್‌ನಲ್ಲಿ 2-3 ಗಂಟೆ ಕಾಲ ಇರಿಸಬೇಕು. ನಂತರ ಫಾಯಿಲ್‌ ತೆಗೆದು, ಚಿತ್ರದಲ್ಲಿರುವಂತೆ ಬರ್ಫಿಗಳಾಗಿ ಕತ್ತರಿಸಿ ಸವಿಯಲು ಕೊಡಿ.
ಅಂಜೂರದ ಡ್ರೈಫ್ರೂಟ್‌ ಬರ್ಫಿ
ಸಾಮಗ್ರಿ : 100 ಗ್ರಾಂ ಒಣ ಅಂಜೂರ, 50 ಗ್ರಾಂ ಸಕ್ಕರೆ, 2-3 ಚಿಟಕಿ ಏಲಕ್ಕಿ ಪುಡಿ, ಪಚ್ಚ ಕರ್ಪೂರ, ದ್ರಾಕ್ಷಿ, ಗೋಡಂಬಿ, ಬಾದಾಮಿ, ಪಿಸ್ತಾ ಚೂರು (ಒಟ್ಟಾಗಿ ಅರ್ಧ ಕಪ್‌), ಅರ್ಧ ಸೌಟು ತುಪ್ಪ.
ವಿಧಾನ : ಅಂಜೂರವನ್ನು 3-4 ತಾಸು ಬೆಚ್ಚಗಿನ ಹಾಲಿನಲ್ಲಿ ನೆನೆಹಾಕಿಡಿ. ನಡುನಡುವೆ ಅದನ್ನು ತಿರುಗಿಸುತ್ತಾ ಎಲ್ಲಾ ಬದಿಯಿಂದಲೂ ಹಿಗ್ಗುವಂತೆ ಮಾಡಿ. ನಂತರ ಮಿಕ್ಸಿಯಲ್ಲಿ ತಿರುವಿಕೊಳ್ಳಿ. ಒಂದು ನಾನ್‌ಸ್ಟಿಕ್‌ ಪ್ಯಾನಿನಲ್ಲಿ ತುಪ್ಪ ಬಿಸಿ ಮಾಡಿ ಇದನ್ನು ಅದಕ್ಕೆ ಹಾಕಿ ಬಾಡಿಸಿ. ಆಮೇಲೆ ಸಕ್ಕರೆ ಹಾಕಿ ಕೆದಕಿರಿ. ನಂತರ ತುಪ್ಪದಲ್ಲಿ ಹುರಿದ ದ್ರಾಕ್ಷಿ-ಗೋಡಂಬಿ, ಏಲಕ್ಕಿ, ಪ.ಕರ್ಪೂರ ಇತ್ಯಾದಿ ಬೆರೆಸಿ. ನಡುನಡುವೆ ತುಪ್ಪ ಹಾಕುತ್ತಾ ಮಂದ ಉರಿಯಲ್ಲಿ ಕೆದಕಬೇಕು. ಆಮೇಲೆ ಒಂದು ಅಗಲವಾದ ಟ್ರೇಗೆ ತುಪ್ಪ ಸವರಿ ಇದನ್ನು ಅದಕ್ಕೆ ಹರಡಿ ಆರಲು ಬಿಡಿ. ಚೆನ್ನಾಗಿ ಆರಿದ ಮೇಲೆ ಬರ್ಫಿ ಆಕಾರದಲ್ಲಿ ಕತ್ತರಿಸಿ ಸವಿಯಲು ಕೊಡಿ.
ವಾಲ್‌‌ನಟ್‌ ಬಾಲ್ಸ್
ಸಾಮಗ್ರಿ : 150 ಗ್ರಾಂ ಅಖರೋಟ್‌, 100 ಗ್ರಾಂ ಖೋವಾ, ಅಲಂಕರಿಸಲು 8-10 ಅಖರೋಟ್‌, ಗೋಡಂಬಿ, ದ್ರಾಕ್ಷಿ, ಪಿಸ್ತಾ, ಬಾದಾಮಿ ಚೂರು (ಒಟ್ಟಾರೆ ಅರ್ಧ ಕಪ್‌), 2-3 ಚಿಟಕಿ ಏಲಕ್ಕಿ ಪುಡಿ, ಅರ್ಧ ಸೌಟು ತುಪ್ಪ, 100 ಗ್ರಾಂ ಬೂರಾ ಸಕ್ಕರೆ, ಅರ್ಧ ಸಣ್ಣ ಚಮಚ ಒಣಶುಂಠಿ ಪುಡಿ, ಸೋಂಪು.
ವಿಧಾನ : ಅಖರೋಟ್‌ನ್ನು ತುಪ್ಪದಲ್ಲಿ ಲಘುವಾಗಿ ಹುರಿದು ತರಿತರಿಯಾಗಿ ಪುಡಿ ಮಾಡಿಡಿ. ಅದೇ ಬಾಣಲೆಯಲ್ಲಿ ತುಪ್ಪದೊಂದಿಗೆ ದ್ರಾಕ್ಷಿ-ಗೋಡಂಬಿ ಹುರಿದು ಬೇರೆ ಇಡಿ. ನಂತರ ಅದರಲ್ಲಿ ಮಸೆದ ಖೋವಾ ಹಾಕಿ ಬಾಡಿಸಬೇಕು. ಇದಕ್ಕೆ ಸೋಂಪು, ಒಣಶುಂಠಿ ಪುಡಿ ಹಾಕಿ ಕೆದಕಿರಿ. ಇದನ್ನು ಕೆಳಗಿಳಿಸಿ ತುಸು ಆರಲು ಬಿಡಿ. ನಂತರ ಅಖರೋಟ್‌ ತರಿ, ಏಲಕ್ಕಿ, ಬೂರಾ ಸಕ್ಕರೆ, ಗೋಡಂಬಿ-ದ್ರಾಕ್ಷಿ ಇತ್ಯಾದಿ ಎಲ್ಲಾ ಸೇರಿಸಿ. ತುಪ್ಪದ ಕೈ ಮಾಡಿಕೊಂಡು ಚಿತ್ರದಲ್ಲಿರುವಂತೆ ಉಂಡೆ ಕಟ್ಟಿ. ಮೇಲೆ 1-1 ಅಖರೋಟ್‌ ಸಿಗಿಸಿ ಸವಿಯಲು ಕೊಡಿ.
