ಅರೇಂಜ್ಡ್ ಮ್ಯಾರೇಜ್‌ ಹೀಗೆ ಶೈನಿಂಗ್‌ ಸ್ಟಾರ್‌ ಆಗಿ

ಯಾವುದೋ ಕಾರಣದಿಂದಾಗಿ ಯುವ ಜನತೆ ತಮ್ಮ ಭಾವಿ ಸಂಗಾತಿಯನ್ನು ಸ್ವತಃ ಆರಿಸಿಕೊಳ್ಳಲಾಗದಿದ್ದರೆ ಅಥವಾ ಹುಡುಕಲು ಯತ್ನಿಸದಿದ್ದರೆ ಆಗ ಪಾಲಕರೇ ಮುಂದೆ ನಿಂತು ಆ ಕೆಲಸ ಮಾಡಬೇಕಾಗುತ್ತದೆ. ಇಂದಿನ ಕಾಲದಲ್ಲಿ ಪೇರೆಂಟ್ಸ್ ತಮ್ಮ ಮಕ್ಕಳಿಗಾಗಿ ವಧೂವರರನ್ನು ಹುಡುಕುವುದು ಪೇಚಾಟದ ಸಂಗತಿಯೇ ಸರಿ.

ಪೇರೆಂಟ್ಸ್ ಹಾಗೂ ಮಕ್ಕಳು ಹೀಗೆ ಹೊಸ ಸಂಬಂಧ ಹುಡುಕಿದಾಗ, ಒಂದು ವಿಷಯಕ್ಕೆ ಇಬ್ಬರೂ ಹೊಂದಾಣಿಕೆ ಮಾಡಿಕೊಂಡು ಒಮ್ಮತಕ್ಕೆ ಬರುವುದು ಸುಲಭದ ಮಾತಲ್ಲ. ಇಲ್ಲಿ ಜನರೇಶನ್‌ ಗ್ಯಾಪ್‌ ಸ್ಪಷ್ಟ ಕಾಣಿಸುತ್ತದೆ. ಈಗಂತೂ ಬಹುತೇಕ ಯುವಜನತೆ ಪ್ರೇಮ ವಿವಾಹದತ್ತಲೇ ಮನಸ್ಸು ಮಾಡುತ್ತಿರುವಾಗ, ಅರೇಂಜ್ಡ್ ಮ್ಯಾರೇಜ್‌ಗಾಗಿ ವಧೂವರರ ಅನ್ವೇಷಣೆ ಬಲು ಕಷ್ಟದ ಕೆಲಸವಾಗುತ್ತಿದೆ. ಅದರಲ್ಲೂ ಮಕ್ಕಳು ಪೇರೆಂಟ್ಸ್ ಜೊತೆಗಿಲ್ಲದೆ ದೂರದ ಊರು, ದೇಶದಲ್ಲಿ ದುಡಿಯುತ್ತಿದ್ದರೆ, ವೈವಾಹಿಕ ಸಂಬಂಧಗಳ ಕುರಿತಾಗಿ ಚರ್ಚಿಸಿ ಒಮ್ಮತಕ್ಕೆ ಬರುವುದು ಕಷ್ಟಕರ ಮಾತ್ರವಲ್ಲ ಅಸಂಭವ ಎಂದರೂ ಅತಿಶಯೋಕ್ತಿಯಲ್ಲ.

ಒಂದು ಉಚ್ಚ ಕುಟುಂಬದ ಸುಶಿಕ್ಷಿತ ಗೃಹಿಣಿ ಸುಧಾ ರಾವ್‌ ಹೇಳುತ್ತಾರೆ, ಮಗಳ ಮದುವೆಗಾಗಿ ವರಗಳೇನೋ ಬರುತ್ತಿವೆ. ಆದರೆ ಆ ಬಗ್ಗೆ ನಿಧಾನವಾಗಿ ಅವಳೊಂದಿಗೆ ಚರ್ಚಿಸೋಣವೆಂದರೆ ದುಡಿಯುವ ಹೆಣ್ಣಾದ ಅವಳು ಬೆಳಗ್ಗೆ ಹೊತ್ತು ಆಫೀಸಿಗೆ ದೌಡಾಯಿಸುವ ಧಾವಂತದಲ್ಲಿರುತ್ತಾಳೆ, ರಾತ್ರಿ ಬರುವುದೇ ಸುಸ್ತಾಗಿ 9 ಗಂಟೆ ನಂತರ, ಇನ್ನು ಭಾನುವಾರ ಮಾತನಾಡೋಣ ಎಂದರೆ ಅಂದು ರಜೆಯ ಮೂಡ್‌ನಲ್ಲಿ ತನ್ನದೇ ಲೋಕದಲ್ಲಿರುತ್ತಾಳೆ. ಮದುವೆ ಕುರಿತಾಗಿ ಅವಳೊಂದಿಗೆ ಚರ್ಚಿಸುವುದು ಯಾವಾಗ?

ಮತ್ತೊಬ್ಬ ಗೃಹಿಣಿ ಸವಿತಾ ಶರ್ಮ ಬೇರೆ ರೀತಿಯಲ್ಲಿ ಹೇಳುತ್ತಾರೆ, ನಾನು ಮಗನ ಅರೇಂಜ್ಡ್ ಮ್ಯಾರೇಜ್‌ ಮಾಡಿಸಿದೆ. ಆದರೆ ಅದರಲ್ಲಿ ಇಷ್ಟೊಂದು ಕಾಂಪ್ಲಿಕೇಶನ್ಸ್ ಬರಲಿಲ್ಲ. ಏಕೆಂದರೆ ಮಗ ಹೆಣ್ಣು ಹುಡುಕುವ ಪೂರ್ತಿ ಜವಾಬ್ದಾರಿ ನನಗೇ ಬಿಟ್ಟಿದ್ದ. ಸದಾ ಐಟಿ ಬಿಟಿ ಆಫೀಸ್‌ಗಳಲ್ಲಿ ಅವನು ಬಿಝಿ. ಬೆಳಗ್ಗೆ 7ಕ್ಕೆ ಹೊರಟರೆ ಬರುವುದು ರಾತ್ರಿ 10ಕ್ಕೇ! ಯಾವ ಸಂಬಂಧಗಳು ನನಗೆ ಸಂಪೂರ್ಣ ಒಪ್ಪಿಗೆ ಎನಿಸಿತೋ ಅದರಲ್ಲಿ 3ನ್ನು ಅವನಿಗೆ ತೋರಿಸಲಾಗಿ, ಮೊದಲನೆಯದೇ ಫೈನಲ್ ಆಯಿತು, ಎನ್ನುತ್ತಾರೆ.

ಪೇರೆಂಟ್ಸ್ ಕಷ್ವವನ್ನು ಯುವಜನತೆ ಅರಿಯಬೇಕು : ಅರೇಂಜ್ಡ್ ಮ್ಯಾರೇಜ್‌ಗಳಲ್ಲಿ ಪೇರೆಂಟ್ಸ್ ನ ಅತಿ ದೊಡ್ಡ ಕಷ್ಟವೆಂದರೆ, ಮದುವೆ ಕುರಿತಾಗಿ ಗಾಳಿ ಗೋಪುರ ಕಟ್ಟಿಕೊಂಡು ಆಕಾಶದಲ್ಲೇ ವಿಹರಿಸುವ ಯುವಜನತೆಯನ್ನು ಭೂಮಿಗಿಳಿಸುವುದು. ಎಷ್ಟೋ ಮಕ್ಕಳು ತಮ್ಮ ಸಮಾನರಿಲ್ಲ ಎಂದೇ ಭಾವಿಸುತ್ತಾರೆ, ಅವರಿಗೆ ವಾಸ್ತವ ಅರ್ಥ ಮಾಡಿಸುವುದೇ ಕಷ್ಟ. ಜೊತೆಗೆ ಕೌಟುಂಬಿಕ, ಸಾಮಾಜಿಕ, ಧಾರ್ಮಿಕ ಹಿನ್ನೆಲೆಗಳನ್ನು ಗಮನಿಸಿಕೊಂಡು ಒಂದು ಹುಡುಗನಿಗೆ ಒಂದು ಹುಡುಗಿ ಎಂದು ಹುಡುಕುವಷ್ಟರಲ್ಲಿ ಅವರಿಬ್ಬರಿಗೂ ಇನ್ನೊಂದು ವರ್ಷ ವಯಸ್ಸು ಹೆಚ್ಚಾಗಿರುತ್ತದೆ.

ಹೆಚ್ಚಾಗಿ ನಮ್ಮ ಯುವಜನತೆ ತಲೆಯಲ್ಲಿ ತಮ್ಮದೇ ಆದ 108 ವಿಚಾರಗಳನ್ನು ತುಂಬಿಕೊಂಡಿರುತ್ತಾರೆ, ಎಷ್ಟೋ ಸಲ ಹೆತ್ತವರ ಬಳಿ ಅದನ್ನು ಸ್ಪಷ್ಟವಾಗಿ ಹೇಳಿಕೊಳ್ಳಲಾರರು. ಎಷ್ಟೋ ಸಲ ಪೇರೆಂಟ್ಸ್ ಕೂಡ ತಮ್ಮ ಮಕ್ಕಳು ಹಾಗೆ ಹೀಗೆ ಎಂದು ದಂತಗೋಪುರದಲ್ಲೇ ನಿಂತು ಯೋಚಿಸುತ್ತಾರೆ, ವಾಸ್ತವಕ್ಕೆ ಬಂದಾಗ ಮಾತ್ರ ಮದುವೆ ಮಾರುಕಟ್ಟೆಯ ಆಳದ ಅರಿವಾಗುವುದು. ಈ ನಿಟ್ಟಿನಲ್ಲಿ ಅವರು ತಮ್ಮ ಮಕ್ಕಳನ್ನು ಮೊದಲೇ ಸೂಕ್ತವಾಗಿ ಎಚ್ಚರಿಸುವುದೇ ಸರಿ. ಯುವಜನತೆ ಕೂಡ ತಾವು ಬಯಸುವ 108 ಅಪೇಕ್ಷೆಗಳಲ್ಲಿ ಇಂದಿನ ಕಾಲದಲ್ಲಿ 100 ಈಡೇರದು, ಉಳಿದ 8ರಲ್ಲೇ ತೃಪ್ತಿಪಟ್ಟುಕೊಳ್ಳಬೇಕು ಎಂಬ ಅರಿವಿರಬೇಕು.

ಸಹಜ ಮಾತುಕಥೆ, ತಿಳಿದವರು ಹೇಳಿದ ಸಂಬಂಧಗಳು ಎದುರಾದಾಗ, ಅದರಲ್ಲಿನ ಪ್ಲಸ್‌, ಮೈನಸ್‌ ಪಾಯಿಂಟ್ಸ್ ಪರಿಶೀಲಿಸುವುದೇ ಸರಿ. ಲವ್ ಮ್ಯಾರೇಜ್‌ಗಳಲ್ಲಿ  ಹಿಂದೆಮುಂದೆ ವಿಚಾರಿಸದೆ ಏನು ಎತ್ತ ನೋಡದೆ ಪ್ರೇಮ ಆಗಿಹೋಯ್ತು, ಮದುವೆ ಆಗಲೇಬೇಕು ಎಂದು ಕಾಲಿಗೆ ಬಿಸಿನೀರು ಹೊಯ್ದುಕೊಂಡು ತಕತಕ ಕುಣಿಯುವ ಹಾಗಲ್ಲ ಈ ಅರೇಂಜ್ಡ್ ಮ್ಯಾರೇಜ್‌. ಅಲ್ಲಿ ಪ್ರೀತಿ ಒಂದೇ ಮೂಲಾಧಾರ, ಮಿಕ್ಕಿದ್ದೆಲ್ಲ ಗೌಣ. ಹೆಚ್ಚು ಕಡಿಮೆ ಏನೇ ಇದ್ದರೂ ನಡೆಯುತ್ತದೆ. ಇಲ್ಲಿ ಹಾಗಲ್ಲ…. ನಿಮ್ಮ ರೂಪ ಲಾವಣ್ಯ, ಗುಣ, ಓದು, ವಿದ್ಯೆ, ಉದ್ಯೋಗ, ಆದಾಯ, ಸಾಮಾಜಿಕ ಪ್ರತಿಷ್ಠೆ ಎಲ್ಲವನ್ನೂ ಪರಿಗಣಿಸಲಾಗುತ್ತದೆ. ಹೀಗಾಗಿ ಯುವಜನತೆ ತಮಗೆ ಬೇಕಾದ ಸಂಗಾತಿ ಆರಿಸಿಕೊಳ್ಳಲು ಆಗದಿದ್ದಾಗ, ಭಾವಿ ಸಂಗಾತಿಯ ಆಯ್ಕೆಯಲ್ಲಿ ಪಾಲಕರನ್ನೇ ಅವಲಂಬಿಸಿರುವಾಗ, ಅವರಿಗೆ ತಮ್ಮ ಸಂಪೂರ್ಣ ಬೆಂಬಲ ನೀಡಬೇಕು. ಆಗ ಮಾತ್ರ ಯೋಗ್ಯ ಸಂಗಾತಿ ಸಿಗಲು ಸಾಧ್ಯ.

ಮಕ್ಕಳ ಕಷ್ಟವನ್ನು ಪಾಲಕರೂ ಅರಿಯಬೇಕು : ಇನ್ನೊಂದೆಡೆ ಪಾಲಕರೂ ಸಹ, ಈ ಶಾಸ್ತ್ರೋಕ್ತ ವಿವಾಹದಲ್ಲಿ ಪ್ರೇಮ ವಿವಾಹದ ತುಸು ಟಚ್‌ ಉಳಿಸಿಕೊಳ್ಳಬೇಕು. `ಅಪ್ಪ ಹಾಕಿದ ಆಲದ ಮರ’ ಎಂಬಂತೆ ಹಳೆ ಕಂದಾಚಾರದ ಚೌಕಟ್ಟು ಬಿಟ್ಟು ತುಸು ಆಧುನಿಕತೆ ರೂಢಿಸಿಕೊಳ್ಳಬೇಕು. ಜಾತಿ, ಜಾತಕ, ಗೋತ್ರ, ಧರ್ಮ, ಸಂಪ್ರದಾಯಗಳ ಜಂಜಾಟ ಬಿಟ್ಟು ಮಕ್ಕಳ ಆಸೆಗೆ ಪ್ರಾಶಸ್ತ್ಯ ಕೊಟ್ಟು ಅವರ ಆಯ್ಕೆಯನ್ನು ಒಪ್ಪತಕ್ಕದ್ದು. ನಂತರ ರೀತಿರಿವಾಜಿನಂತೆ ಮದುವೆಯ ಕಲಾಪ ನಡೆಯಲಿ. ಕೇವಲ ಧಾರ್ಮಿಕ ದೃಷ್ಟಿಯಿಂದ ಮಾತ್ರ ಅಳೆಯದೆ ಆ ವಧೂವರರು ತಮ್ಮ ಮಕ್ಕಳಿಗೆ ವಿದ್ಯೆ, ಬೌದ್ಧಿಕ, ಕೆರಿಯರ್‌ ದೃಷ್ಟಿಯಿಂದ ಎಷ್ಟು ಹೊಂದಿಕೊಳ್ಳಬಲ್ಲರು ಎಂಬುದನ್ನೂ ನೋಡಬೇಕು.

ಹೀಗಾಗಿ ಅರೇಂಜ್ಡ್ ಮ್ಯಾರೇಜ್‌ಗಳಲ್ಲೂ ಈ 4 ಗೋಡೆಗಳ ಉಸಿರುಗಟ್ಟಿಸುವ ವಾತಾವರಣದಿಂದ ಹೊರಬಂದು ತುಸು ಉದಾರವಾಗಿ ಆಲೋಚಿಸಬೇಕಾದ ಅಗತ್ಯವಿದೆ. ತಮ್ಮದೇ ಸರಿ/ತಪ್ಪು ನಿರ್ಣಯಗಳನ್ನು ತುಸು ಬದಿಗಿರಿಸಿ, ಮಕ್ಕಳ ಭವಿಷ್ಯ ಬೆಳಗುವ ಸಂಗಾತಿ ಹೀಗೂ ಇರಲಿ ಎಂಬ ಉದಾರತೆ ತೋರಬೇಕು. ಈ ಕಾಲದಲ್ಲಿ ಹೆಣ್ಣುಮಕ್ಕಳೇ ಎಲ್ಲಾ ವಿಷಯಗಳಿಗೂ ಬಿಟ್ಟುಕೊಡಬೇಕು ಎನ್ನುವುದೂ ಸುಲಭವಾಗಿ ಒಪ್ಪತಕ್ಕ ಮಾತಲ್ಲ. ಹೀಗಾಗಿ ಹೆಣ್ಣುಮಕ್ಕಳು ಎಂಬ ಒಂದೇ ಕಾರಣಕ್ಕೆ ಅವರ ಮೇಲೆ 1000 ಒತ್ತಡ ಹೇರಿ `ಹಿರಿಯರು ಮಾಡಿದ ಮದುವೆ’ಗೆ ಅವರನ್ನು ಬಲಿಪಶುಗಳಾಗಿಸದಿರಿ.

ಅರೇಂಜ್ಡ್ ಮ್ಯಾರೇಜ್‌ನ ಅಷ್ಟ ಸಂಕಷ್ಟಗಳು : ಈ ವಿಧಾನದ ಮದುವೆಗೆ ಮನೆಯ ಹಿರಿಯರು, ನೆಂಟರಿಷ್ಟರು, ದಲ್ಲಾಳಿಗಳು ಭಾವನಾತ್ಮಕ ಒತ್ತಡ ಹೇರುವ ಸಂಭವವೇ ಹೆಚ್ಚು. ಇದು ಖಂಡಿತಾ ಸರಿಯಲ್ಲ. ಇದರ ಮಧ್ಯೆ ಹುಡುಗ-ಹುಡುಗಿ ಪರಸ್ಪರ ಅರಿತುಕೊಳ್ಳಲು ಸಮಾಯಾಭಾವದ ಕಾಟ ಇರುತ್ತದೆ. ಇವರಿಬ್ಬರೂ ಬೇರೆ ಬೇರೆ ಊರು ಅಥವಾ ದೇಶಗಳಲ್ಲಿ ವಾಸಿಸುತ್ತಿದ್ದರೆ, ಈ ಕಷ್ಟಕೋಟಲೆ ಮತ್ತಷ್ಟು ಹೆಚ್ಚುವುದು.

ಲವ್ ಮ್ಯಾರೇಜ್‌ನಲ್ಲಿ ಹುಡುಗ-ಹುಡುಗಿ ಪರಸ್ಪರ ಬಹಳ ವರ್ಷಗಳಿಂದ ಅರಿತು, ಒಡನಾಟ ಹೊಂದಿದ್ದು, ನಂತರ ಮದುವೆಯ ಅಭಿಪ್ರಾಯಕ್ಕೆ ಬಂದಿರುತ್ತಾರೆ. ಹೀಗಾಗಿ ಅವರಿಗೆ ತಮ್ಮ ಆಯ್ಕೆಯ ಬಗ್ಗೆ ಹೆಚ್ಚಿನ ಭರವಸೆ ಇರುತ್ತದೆ. ಅದೇ ಅರೇಂಜ್ಡ್ ಮ್ಯಾರೇಜ್‌ನಲ್ಲಿ ಕೆಲವು ದಿನ ಅಥವಾ ಒಂದೇ ವಾರದಲ್ಲಿ ಒಪ್ಪಿಗೆ ಸೂಚಿಸು ಎಂದು ಗಡುವು ನೀಡುವುದರಿಂದ ನಿರ್ಧಾರ ತಳೆಯಲು ಕಷ್ಟವಾಗುತ್ತದೆ. ಇತ್ತೀಚಿನ ಯುವಜನತೆ ವಯಸ್ಸು, ಮಾನಸಿಕತೆಯಿಂದಾಗಿ ಹೆಚ್ಚು ಪರಿಪಕ್ವರಾಗಿರುತ್ತಾರೆ. ಹೀಗಾಗಿ ನೋಡಿದಾಕ್ಷಣ ಒಬ್ಬ ವ್ಯಕ್ತಿಯೊಂದಿಗೆ ಜೀವಿತಾಂತ್ಯ ಬಾಳುವ ನಿರ್ಧಾರ ಹೇಳಲು ತುಸು ಕಷ್ಟವೇ ಆಗುತ್ತದೆ.

ಪ್ರೇಮ ವಿವಾಹದಲ್ಲಿ ಪ್ರೇಮವೆಂಬುದೇ ಮೂಲ. ಹೀಗಾಗಿ ಅದು ಇತರ ಎಲ್ಲಾ ಗುಣದೋಷಗಳನ್ನೂ ಮುಚ್ಚಿ ಹಾಕಿಬಿಡುತ್ತದೆ. ಅದೇ ಶಾಸ್ತ್ರೋಕ್ತ ವಿವಾಹದಲ್ಲಿ ಎಲ್ಲವನ್ನೂ ಮದುವೆಯ ನಂತರವೇ ಆರಂಭಿಸಬೇಕು ಹಾಗೂ ಇಲ್ಲಿ ಚಾಯ್ಸ್ ಪ್ರಶ್ನೆಯೇ ಇಲ್ಲ. ಲವ್ ಮ್ಯಾರೇಜ್‌ನಲ್ಲಿ ಯುವಜನತೆ ಪರಸ್ಪರ ಚರ್ಚಿಸಿ ಒಮ್ಮತದಿಂದ ತಮ್ಮ ಭವಿಷ್ಯದ ಕುರಿತಾದ ನಿರ್ಧಾರ ಕೈಗೊಳ್ಳುತ್ತಾರೆ. ಅದೇ ಅರೇಂಜ್ಡ್ ಮ್ಯಾರೇಜ್‌ನಲ್ಲಿ ಇವರ ಯಾವುದೇ ವೈಯಕ್ತಿಕ ನಿರ್ಧಾರಗಳಿಗೂ ಕೌಟುಂಬಿಕ ಅನುಮತಿ ಬೇಕಾಗುತ್ತದೆ, ಅಂಥ ಒತ್ತಡ ಹೆಚ್ಚಾಗುತ್ತದೆ. ಹೀಗಾಗಿ ದಂಪತಿ ಪರಸ್ಪರ ಸರಿಯಾಗಿ ಅರಿತುಕೊಳ್ಳಲು ಆಗುವುದೇ ಇಲ್ಲ.

ಭಾವಿ ಸಂಗಾತಿಯೊಂದಿಗೆ ಭಾವನೆ ಹಂಚಿಕೊಳ್ಳಿ

ಪಾಲಕರೇ ತಮ್ಮ ಭಾವೀ ಸಂಗಾತಿಯನ್ನು ಆರಿಸುತ್ತಾರೆ ಎಂಬುದು ನಿಶ್ಚಯವಾದಾಗ ಅವರ ಮಾತುಗಳಲ್ಲಿ ವಿಶ್ವಾಸವಿರಿಸಿ. ಅವರ ನಿರ್ಧಾರಕ್ಕೆ ನಿಮ್ಮ ಇಷ್ಟಾನಿಷ್ಟಗಳನ್ನೂ ಬೆರೆಸಿರಿ, ಭಾವಿ ಸಂಗಾತಿಯೊದಿಗೆ ನಿಮ್ಮ ಭಾವನೆಗಳನ್ನು ಹೀಗೆ ಹಂಚಿಕೊಳ್ಳಿ :

ಮನೆಯಿಂದ ಹೊರಗಿನ ಮುಕ್ತ ವಾತಾವರಣಕ್ಕೆ ಹೋಗಿ. ಏಕಾಂತವಿರುವ ರೆಸ್ಟೋರೆಂಟ್‌, ಪಾರ್ಕ್‌ ಆರಿಸಿಕೊಂಡು ಇಬ್ಬರೂ ಮುಕ್ತವಾಗಿ ಮಾತನಾಡಿ. ಇಬ್ಬರಲ್ಲಿ ಒಬ್ಬರು ಮಾತುಕಥೆ ಶುರು ಮಾಡಿ ಒಡನಾಡಿಯನ್ನು ಕಂಫರ್ಟೆಬಲ್ ಆಗಿಸಿ. ಆ ಮಾತುಕಥೆಯಿಂದ ಅವರ ಬಗ್ಗೆ ನಿಮಗನಿಸಿದ್ದನ್ನು ಧೈರ್ಯವಾಗಿ ಮನೆಯವರ ಜೊತೆ ಚರ್ಚಿಸಿ. ಆ ನಂತರ ಸಂಬಂಧ ಬೇಕೇ/ಬೇಡವೇ ನಿರ್ಧರಿಸಿ.

ಪರಸ್ಪರ ತೀರಾ ಇತಿಹಾಸ ಕೆದಕುತ್ತಾ ಕೂರಬೇಡಿ. ಒಪ್ಪಿಗೆ ಅಂತ ಆದಮೇಲೆ, ಇಂದಿನ ಈ ಸಂಬಂಧವನ್ನು ಹೇಗೆ ಉಳಿಸಿಕೊಳ್ಳುವುದು ಎಂಬುದರತ್ತ ಭವಿಷ್ಯದ ಯೋಜನೆ ರೂಪಿಸಿ. ಪರಸ್ಪರರ ಮುಂದಾಲೋಚನೆ, ಅಭಿರುಚಿ, ಗುಣಸ್ವಭಾವ, ಲೋಪದೋಷಗಳು, ಇಷ್ಟಾನಿಷ್ಟಗಳು ಇತ್ಯಾದಿ ಎಲ್ಲವನ್ನೂ ಪ್ರಾಮಾಣಿಕವಾಗಿ ಚರ್ಚಿಸಿ. ಪರಸ್ಪರರ ನೌಕರಿ, ಕೆಲಸದ ಗಂಟೆಗಳು, ಟೂರಿಂಗ್‌, ವಿದೇಶ ಪ್ರವಾಸ, ಸಂಬಳ, ಭತ್ಯೆ, ಹವ್ಯಾಸ, ಮನರಂಜನೆಯ ಆಯ್ಕೆ…… ಹೀಗೆ ಹಲವು 11 ವಿಷಯಗಳನ್ನು ಚರ್ಚಿಸಿ. ದೈನಂದಿನ ಅಭ್ಯಾಸ, ಧಾರ್ಮಿಕ ಶ್ರದ್ಧೆ, ಫ್ಯಾಷನ್‌, ಖರ್ಚು-ವೆಚ್ಚ, ಉಳಿತಾಯ ಇತ್ಯಾದಿ ಎಲ್ಲವನ್ನೂ ಮತ್ತೆ ಮತ್ತೆ  ಚರ್ಚಿಸಿ. ಜೊತೆಗೆ ನಿಮ್ಮ ಫ್ರೆಂಡ್ಸ್ ಸರ್ಕಲ್, ಮಾಡರ್ನ್‌ ಅಭ್ಯಾಸಗಳು, ಪಾರ್ಟಿ ಕಲ್ಚರ್‌ ಇತ್ಯಾದಿಗಳದೂ ಚರ್ಚೆಯಾಗಲಿ.

ಇಂದಿನ ಉದ್ಯೋಗಸ್ಥ ಹುಡುಗಿಯರು ತಮ್ಮ ತವರಿಗೆ ಆರ್ಥಿಕ ಬೆಂಬಲ ನೀಡಬೇಕೆಂದಿರುತ್ತಾರೆ. ತನ್ನ ಸಂಬಳ ಕೇವಲ ತನ್ನದೇ, ಗಂಡನ ಮನೆಯವರು ಕೇಳುವಂತೆ ಇಲ್ಲ ಇತ್ಯಾದಿ ಅಭಿಪ್ರಾಯ ಇರುತ್ತದೆ. ಇಬ್ಬರಿಗೂ ಇದು ಒಪ್ಪಿಗೆಯೇ ಎಂದು ವಿಚಾರ ವಿಮರ್ಶೆ ನಡೆಸಿ ಮುಂದುವರಿಯಿರಿ.

ಅರೇಂಜ್ಡ್ ಮ್ಯಾರೇಜ್‌ನಲ್ಲೂ ಲವ್ ಮ್ಯಾರೇಜ್‌ನ ಉತ್ಸಾಹ ಉಲ್ಲಾಸ ಬಿಂಬಿಸಿ : ಇದೆಲ್ಲ ಹಂತ ದಾಟಿ ಮದುವೆ ನಿಶ್ಚಯವಾಗಿದೆ, ನೀವು ಅರೇಂಜ್ಡ್ ಮ್ಯಾರೇಜ್‌ಗೆ ಸಂಪೂರ್ಣ ಸಿದ್ಧ ಎಂದಾದ ಮೇಲೆ, ಪರಸ್ಪರರ ಜೊತೆ ಕ್ವಾಲಿಟಿ ಟೈಂ ಕಳೆಯಿರಿ. ನೀವು ಒಂದೇ ಊರು ಅಥವಾ ಬೇರೆ ಬೇರೆ ನಗರ ಅಥವಾ ದೇಶವಾಗಿದ್ದರೂ ಇದಂತೂ ಸಂಪರ್ಕ ಸಾಧನಗಳಿಂದ ಅಸಾಧ್ಯವೇನಲ್ಲ.

ಕೆಲಸ-ಕಾರ್ಯಗಳ ಒತ್ತಡ, ಏನೋ ಸಂಶಯ, ಹೇಗೋ ಏನೋ ಎಂಬ ಆತಂಕ ಇತ್ಯಾದಿಗಳಿಂದ ಭಾವಿ ಸಂಗಾತಿ ಕುರಿತಾಗಿ ರೋಮಾಂಚನ ಉಂಟಾಗದಿದ್ದರೂ ಅವರ ಸಂತೃಪ್ತಿಗಾಗಿ ಇದನ್ನು ಜೀವಂತವಾಗಿಡಿ. ಇದು ಇಬ್ಬರಿಗೂ ಅನ್ವಯಿಸುತ್ತದೆ. ನೀವಿಬ್ಬರೂ ಸಂಧಿಸಿದ್ದೇ ಪರಸ್ಪರ ಮದುವೆ ಆಗಲು ಎಂಬಂತೆ ಪರಸ್ಪರರಿಗಾಗಿ ತುಡಿತ ತಂದುಕೊಳ್ಳಿ. ಫ್ಲರ್ಟಿಂಗ್‌, ತಮಾಷೆ ಮಾತು, ಸಣ್ಣಪುಟ್ಟ ಗಿಫ್ಟ್, ಸರ್‌ಪ್ರೈಸಸ್‌, ಮೀಟಿಂಗ್‌, ಸಿನಿಮಾ, ಸುತ್ತಾಟ ಹೆಚ್ಚಿದಷ್ಟೂ ನಿಮಗೆ ನಿಕಟತೆ ಹೆಚ್ಚಿನ ಆತ್ಮೀಯತೆ ಕೊಡಲಿದೆ. ಒಪ್ಪಿಗೆ ಆದ ಮೇಲೆ ನೀವು ಯುವ ಪ್ರೇಮಿಗಳಾಗಿ ಆ ಭಾಗ್ಯವನ್ನು ಈಗ ಎಂಜಾಯ್‌ ಮಾಡಿ. ಇಷ್ಟೆಲ್ಲ ಆದಮೇಲೆ ಹಿರಿಯರ ಒಪ್ಪಿಗೆಯಂತೆ ಇಬ್ಬರೂ ಮದುವೆಗೆ ಕಾಲಿಡುವ ನಿರ್ಧಾರವಾಯಿತು. ಹೀಗಾಗಿ ಪರಸ್ಪರರತ್ತ ಸಕಾರಾತ್ಮಕ ಭಾವ ಬೆಳೆಸಿಕೊಳ್ಳಿ. ಪ್ರಪಂಚದಲ್ಲಿ ಯಾರೂ ಪರಿಪೂರ್ಣರಲ್ಲ. ಹೀಗಾಗಿ ಸಂಗಾತಿಗೆ ಏನೇ ಸಣ್ಣಪುಟ್ಟ ಲೋಪದೋಷ ಇದ್ದರೂ ಇಬ್ಬರೂ ಅದನ್ನು ಹಾರ್ದಿಕವಾಗಿ ಸರಿಪಡಿಸಿಕೊಂಡು, ಅರೇಂಜ್ಡ್ ಮ್ಯಾರೇಜ್‌ ಯಶಸ್ವಿ ಆಗಿದೆ ಎಂಬುದನ್ನು ಗೆದ್ದು ತೋರಿಸಿ!

– ಸುಧಾ ಪ್ರವೀಣ್‌