ಜೀವನದಲ್ಲಿ ಶಾಂತಿ ನೆಮ್ಮದಿ ಅತ್ಯವಶ್ಯ. ಅಕ್ಕಪಕ್ಕದವರೊಂದಿಗೆ ಉತ್ತಮ ಸಂಬಂಧ ಹೊಂದವುದರ ಮೂಲಕ ನೀವು ನೆಮ್ಮದಿಯ ಜೀವನ ಕಾಣಬಹುದು. ಒಳ್ಳೆಯ ನೆರೆಮನೆಯವರಾಗುವ ಕಿವಿಮಾತುಗಳನ್ನು ಗಮನದಲ್ಲಿಟ್ಟುಕೊಂಡು ಸಮಾಜದಲ್ಲಿ ನಿಮ್ಮ ಒಳ್ಳೆಯ ಇಮೇಜ್‌ನ್ನು ಕಾಯ್ದುಕೊಂಡು ಹೋಗಬಹುದು.
- ನೀವು ಬಡಾವಣೆಯಲ್ಲಿ ಹೊಸದಾಗಿ ಬಂದು ವಾಸಿಸುತ್ತಿದ್ದೀರಿ. ಅಲ್ಲಿ ಅಕ್ಕಪಕ್ಕದವರೊಂದಿಗೆ ನಿಮ್ಮ ಒರಟುತನ, ಉದ್ಧಟತನದ ಪ್ರದರ್ಶನ ಮಾಡಲು ಹೋಗಬೇಡಿ. ಹೊಸ ಜಾಗದಲ್ಲಿ ನಿಮ್ಮದೇ ಆದ ಪಡಿಯಚ್ಚು ಮೂಡಿಸಿ. ಅದಕ್ಕಾಗಿ ನೀವೇ ಹೆಜ್ಜೆ ಹಾಕುವುದು ಒಳ್ಳೆಯದು. ನೀವು ಮುಗುಳ್ನಗುತ್ತಾ ಅಕ್ಕಪಕ್ಕದವರನ್ನು ಎದುರುಗೊಂಡರೆ, ಅವರೂ ಕೂಡ ನಿಮ್ಮನ್ನು ಅದೇ ರೀತಿಯಲ್ಲಿ ಸ್ವಾಗತಿಸಬಹುದು.
- ಅಕ್ಕಪಕ್ಕದವರ ಲೈಫ್‌ಸ್ಟೈಲ್ ಅರಿಯಿರಿ. ಹೀಗೆ ಮಾಡುವುದರಿಂದ ಅವರೊಂದಿಗೆ ಜಗಳದ ಸಂದರ್ಭ ತಪ್ಪುತ್ತೆ. ಅಂದಹಾಗೆ, ನಿಮ್ಮ ನೆರೆಮನೆಯವರು ನೈಟ್‌ಶಿಫ್ಟ್ ನಲ್ಲಿ ಕೆಲಸ ಮಾಡುವವರಾಗಿದ್ದಲ್ಲಿ, ಅವರಿಗೆ ಹಗಲು ಹೊತ್ತು ವಿಶ್ರಾಂತಿಯ ಅಗತ್ಯವಿರುತ್ತದೆ. ನಿಮ್ಮ ಮಗು ಶಾಲೆಯಿಂದ ವಾಪಸ್ಸಾದ ಬಳಿಕ ಡ್ಯಾನ್ಸ್, ಮ್ಯೂಸಿಕ್‌ನ ಪ್ರ್ಯಾಕ್ಟೀಸ್‌ ಮಾಡುತ್ತಿದ್ದರೆ, ಆ ಬಗ್ಗೆ ನೆರೆಮನೆಯವರಿಗೆ ಮುಂಚಿತವಾಗಿಯೇ ತಿಳಿಸುವುದು ಒಳ್ಳೆಯದು. ಏಕೆಂದರೆ ಮುಂದೆ ಯಾವುದಾದರೂ ದಿನ ಆಗುವ ಜಗಳವನ್ನು ಮುಂಚೆಯೇ ತಪ್ಪಿಸಿದಂತೆ. ಇಂತಹ ಸ್ಥಿತಿಯಲ್ಲಿ ನೀವಿಬ್ಬರೂ ಸೇರಿ ಒಂದು ಉಪಾಯ ಕಂಡುಕೊಳ್ಳಬಹುದು.
- ನೀವು ಎರಡನೇ ಮಹಡಿಯಲ್ಲಿ ವಾಸಿಸುವವರಾಗಿದ್ದರೆ, ಭಾರಿ ಗಾತ್ರದ ಉಪಕರಣಗಳನ್ನು ಅತ್ತಿತ್ತ ಜರುಗಿಸುವುದರಿಂದ ಉಂಟಾಗುವ ಸದ್ದಿನಿಂದ ಮೊದಲನೇ ಮಹಡಿಯಲ್ಲಿ ವಾಸಿಸುವವರಿಗೆ ಕಿರಿಕಿರಿ ಅನಿಸಬಹುದು. ಆ ಸದ್ದು ಜಗಳಕ್ಕೆ ದಾರಿ ಮಾಡಿಕೊಡಬಹುದು. ಇಂತಹ ಸ್ಥಿತಿಯಲ್ಲಿ ನೀವು ಬೃಹತ್‌ ಗಾತ್ರದ ಗೃಹಬಳಕೆ ಉಪಕರಣಗಳು ಹಾಗೂ ಪೀಠೋಪಕರಣಗಳ ತಳಭಾಗದಲ್ಲಿ ರಬ್ಬರ್‌ ಮ್ಯಾಟ್‌ ಅಳವಡಿಸಿ. ಏಕೆಂದರೆ ನಿಮ್ಮ ಮನೆಯಿಂದ ಬರುವ ಸದ್ದು ಯಾರಿಗೂ ತೊಂದರೆ ಎನಿಸದಂತಿರಲಿ.
- ನೀವು ಆಗಾಗ ಮೆಟ್ಟಿಲು ಹತ್ತುವುದು ಇಳಿಯುವುದು ನಿಮ್ಮ ಕೆಳಮಹಡಿಯವರಿಗೆ ತೊಂದರೆ ಕಿರಿಕಿರಿ ಎನಿಸಬಾರದು. ನೀವು ಹಾಕಿಕೊಳ್ಳುವ ಚಪ್ಪಲಿ, ಶೂಗಳು ಹೆಚ್ಚು ಸದ್ದಾಗದಂತೆ ಓಡಾಡಿ.
- ನೀವು ಮನೆಯಲ್ಲಿ ನಾಯಿ ಸಾಕಿದ್ದರೆ, ಅದನ್ನು ಕಟ್ಟಿಹಾಕಿ. ಹೊರಗೆ ಹೋದಾಗಲೂ ಸಹ ಚೇನ್‌ ಹಿಡಿದುಕೊಂಡು ಹೋಗಿ. ಅದರಿಂದ ನಿಮಗೆ ಹೆದರಿಕೆ ಅನಿಸದಿರಬಹುದು. ಆದರೆ ಬೇರೆಯವರಿಗೆ ಹೆದರಿಕೆ ಆಗಬಹುದು. ಅದು ಬೇರೆಯವರನ್ನು ಕಚ್ಚಲು ಬರಬಹುದು, ಜಗಳಕ್ಕೆ ಕಾರಣ ಆಗಬಹುದು.
- ಪಾರ್ಕಿಂಗ್‌ ಶಿಷ್ಟಾಚಾರದ ಬಗೆಗೂ ಚೆನ್ನಾಗಿ ತಿಳಿದುಕೊಂಡಿರಿ. ನಿಮ್ಮ ದ್ವಿಚಕ್ರ ವಾಹನ ಅಥವಾ ಕಾರನ್ನು ಹೇಗೆ ಪಾರ್ಕ್‌ ಮಾಡಬೇಕೆಂದರೆ, ಅದು ಬೇರೆ ಯಾರ ವಾಹನಗಳಿಗೂ ಅಡಚಣೆ ಎನಿಸದಿರಲಿ. ಬೇರೆಯವರ ಮನೆ ಎದುರು ಪಾರ್ಕ್‌ ಮಾಡಬೇಡಿ. ಪಾರ್ಕಿಂಗ್‌ ಶಿಷ್ಟಾಚಾರಗಳನ್ನು ತಿಳಿದುಕೊಳ್ಳುವುದರಿಂದ ಅಕ್ಕಪಕ್ಕದವರ ಜೊತೆ ಜಗಳದ ಪ್ರಸಂಗಗಳು ತಪ್ಪುತ್ತವೆ.
- ಅಕ್ಕಪಕ್ಕದವರೊಂದಿಗೆ ಹೊಂದಾಣಿಕೆ ಮನೋಭಾವ ಇಟ್ಟುಕೊಳ್ಳಿ. ನೀವೇ ಆಸಕ್ತಿ ವಹಿಸಿ ಪಕ್ಕದ ಮನೆಯವರನ್ನು ಟೀ/ಕಾಫಿಗೆ ಕರೆಯಬಹುದು. ಒಳ್ಳೆಯ ವಾತಾವರಣ ನಿಮಗೆ ಮಾನಸಿಕ ನೆಮ್ಮದಿ ತಂದುಕೊಡುತ್ತದೆ. ಸಂದರ್ಭ ಬಂದಾಗ ಪಕ್ಕದ ಮನೆಯವರು ನಿಮ್ಮ ನೆರವಿಗೆ ಬರುತ್ತಾರೆ.
