ಇಂದಿನ ಆಧುನಿಕ ಯುಗದಲ್ಲಿ ಹೆಣ್ಣುಮಕ್ಕಳು ಅವಿವಾಹಿತರಾಗೇ ಉಳಿದುಬಿಡುವುದು ಮಾಮೂಲಿ ವಿಷಯ ಆಗಿಹೋಗಿದೆ. ಹಾಗೆಯೇ ವಿಚ್ಛೇದನಗಳೂ ಸಹ. ಹೀಗಾಗಿ ಆಧುನಿಕ ದಿನಗಳಲ್ಲಿ ಹೆಣ್ಣು ಒಬ್ಬಂಟಿಯಾಗಿ ಜೀವನ ನಡೆಸುವುದು, ನಗರ ಪ್ರದೇಶಗಳಲ್ಲಂತೂ ಹೆಚ್ಚುತ್ತಲೇ ಇದೆ.
ಪ್ರೌಢ ವಯಸ್ಸು ಸಮೀಪಿಸಿದಂತೆ ಅವಿವಾಹಿತೆ ಒಂದು ಮಗುವನ್ನು ದತ್ತು ಪಡೆಯಬಹುದು ಅಥವಾ ವಿಧವೆ/ವಿಚ್ಛೇದಿತೆ ಬಳಿ ಮಗುವಿದ್ದರೆ, ಸಿಂಗಲ್ ಪೇರೆಂಟ್‌ ಆಗಿ ಮಗುವಿನ ಸರ್ವತೋಮುಖ ಅಭಿವೃದ್ಧಿಯತ್ತ ಗಮನಹರಿಸ ಬೇಕಾಗುತ್ತದೆ. ಮಗುವಿನ ಎಷ್ಟೋ ಮುಗ್ಧ ಪ್ರಶ್ನೆಗಳಿಗೆ ಉತ್ತರಿಸಲು ತಬ್ಬಿಬ್ಬಾಗುತ್ತದೆ. ಮಗುವಿಗೆ ತಿಳಿಯದ ಇಂತಹ ಎಷ್ಟೋ ಪ್ರಶ್ನೆಗಳಿಗೆ, ಇತರರು ವ್ಯಂಗ್ಯವಾಗಿ ಉತ್ತರಿಸುವ ಮುನ್ನ ನೀವೇ ಅದಕ್ಕೆ ಸೂಕ್ತವಾಗಿ ತಿಳಿಹೇಳುವುದು ಉತ್ತಮ. ಇದರಿಂದ ನಿಮ್ಮ ಬಗ್ಗೆ ಮಗುವಿಗೆ ಹೆಚ್ಚಿನ ಗೌರವಾದರ ಬೆಳೆಯುತ್ತದೆ.
ಹೀಗಾಗಿ ಮಗುವಿನತ್ತ ನಿಮ್ಮ ಸಂಬಂಧ ಹೆಚ್ಚು ಮುಕ್ತ, ಪ್ರಾಮಾಣಿಕ ಹಾಗೂ ದೃಢವಾಗಿರಬೇಕು. ಇಬ್ಬರಲ್ಲೂ ಪರಸ್ಪರ ಉತ್ತಮ ಸಂಭಾಷಣೆ ನಡೆಯುತ್ತಾ, ಮಗುವಿಗೆ ಮನೆಯ ವಾತಾವರಣ ನೆಮ್ಮದಿದಾಯಕ ಆಗಿರಬೇಕೇ ಹೊರತು, ಟೆನ್ಶನ್‌ ನಿಂದ ಕೂಡಿರಬಾರದು. ಮಗು ಮುಕ್ತವಾಗಿ ನಿಮ್ಮಿಂದ ಉತ್ತರ ಪಡೆಯುವಂತಿರಬೇಕು.
ಮಗುವಿನ ಪ್ರಶ್ನೆಗಳಿಗೆ ಮೊದಲೇ ಮಾನಸಿಕವಾಗಿ ಸಿದ್ಧರಾಗಿರಿ : ನೀವು ಸಿಂಗಲ್ ಮದರ್‌ ಆಗಿದ್ದರೆ, ಕೆಲವೊಂದು ಸಾಮಾನ್ಯ ಪ್ರಶ್ನೆಗಳನ್ನು, ಮಗು ನಿಮ್ಮನ್ನು ಯಾವಾಗ ಬೇಕಾದರೂ ಕೇಳಬಹುದು. ಇದಕ್ಕಾಗಿ ನೀವು ಮೊದಲೇ ಮಾನಸಿಕವಾಗಿ ಸಿದ್ಧರಿರಬೇಕಾಗುತ್ತದೆ. `ನನ್ನ ಅಪ್ಪ ನಮ್ಮ ಜೊತೆ ಏಕಿಲ್ಲ? ಎಲ್ಲರಿಗೂ ಇರುವಂತೆ ಅಪ್ಪ ಏಕೆ ನನ್ನನ್ನು ಶಾಲೆಗೆ ಕರೆದೊಯ್ಯುವುದಿಲ್ಲ? ಪೇರೆಂಟ್‌ ಟೀಚರ್‌ ಮೀಟಿಂಗ್‌ ಗೆ ಏಕೆ ಎಂದೂ ಬರುವುದಿಲ್ಲ? ಫ್ರೆಂಡ್ಸ್ ಅಪ್ಪನ ಬಗ್ಗೆ ಕೇಳಿದಾಗ ನಾನು ಏನು ಹೇಳಲಿ….?’
ಇಂಥ ನೂರಾರು ಮುಗ್ಧ ಪ್ರಶ್ನೆಗಳನ್ನು ಮಗು ನಿಮ್ಮನ್ನು ಕೇಳಬಹುದು. ಸದಾ ಅದನ್ನು ಸುಮ್ಮನಾಗಿಸುವ ಬದಲು ಒಂದಲ್ಲ ಒಂದು ಸಲ ಉತ್ತರಿಸಲೇ ಬೇಕಾಗುತ್ತದೆ. ಹೀಗಾಗಿ ಇಂಥ ಎಲ್ಲಾ ಪ್ರಶ್ನೆಗಳಿಗೂ ಮೊದಲೇ ಉತ್ತರಗಳನ್ನು ರೆಡಿ ಮಾಡಿಕೊಂಡಿರಿ.
ಸಿಡುಕದೆ ಪ್ರೀತಿ ವಾತ್ಸಲ್ಯದಿಂದ ಸಂಭಾಳಿಸಿ : ಮಗುವಿನ ಮನಸ್ಸು ಬಲು ಕೋಮಲ. ಅವರ ಬಾಲ್ಯದ ಮುಗ್ಧ ಪ್ರಶ್ನೆಗಳಿಗೆ ಸಿಡುಕುವ ಬದಲು, ಪ್ರೀತಿ ವಾತ್ಸಲ್ಯಗಳಿಂದ ನಿಧಾನವಾಗಿ, ಅದಕ್ಕೆ ಅರ್ಥವಾಗುವಂತೆ ಸರಳ ಮಾತುಗಳಲ್ಲಿ ತಿಳಿಸಿಕೊಡಿ. ಎಂದೂ ಮಗುವನ್ನು ಕಠೋರ ಮಾತುಗಳಿಂದ ಗದರಬೇಡಿ. ನಿಮ್ಮ ಇರಿಟೇಶನ್‌, ಅಸಹಾಯಕತೆಯನ್ನು ಅದರ ಮೇಲೆ ಪ್ರದರ್ಶಿಸಬೇಡಿ. ಮನೆಯಲ್ಲಿ ಸದಾ ಉಲ್ಲಾಸದ ವಾತಾವರಣ ಇರಲಿ. ಅದಕ್ಕೆ ಇಷ್ಟವಾಗುವಂಥ ಜೋಕ್ಸ್, ಕಥೆ ಹೇಳುತ್ತಾ ಇರಿ. ಆಗ ಮಗು ಮನಸ್ಸಿನಲ್ಲೇ ಹಿಂಜರಿಯದೆ, ಮುಕ್ತವಾಗಿ ತನ್ನ ಸಂದೇಹಗಳನ್ನು ನಿವಾರಿಸಿಕೊಳ್ಳಬಲ್ಲದು. ಮಗುವಿಗೆ ಫ್ರಸ್ಟ್ರೇಶನ್ ಹೆಚ್ಚಾದಾಗ, ತನ್ನ ಪ್ರಶ್ನೆಗಳಿಗೆ ಸೂಕ್ತ ಉತ್ತರ ಸಿಗದಿದ್ದಾಗ, ಅದನ್ನೇ ಯೋಚಿಸುತ್ತಾ ಮಗು ಹಠಮಾರಿತನ, ಬೆರಳು ಚೀಪುವಿಕೆ, ಬೆಡ್‌ ವೆಟ್ಟಿಂಗ್‌ ಇತ್ಯಾದಿಗಳಿಗೆ ಮೊರೆ ಹೋಗುವಂತೆ ಆಗಬಾರದು.
ಇಂದಿನ ಕಾಲದ ಮಕ್ಕಳು ಬಲು ಸೂಕ್ಷ್ಮ, ಜಾಣರು, ಸ್ಮಾರ್ಟ್‌ ಸಹ! ಈ ತರಹ ಸಮಾಧಾನದ ಉತ್ತರ ಸಿಕ್ಕಿದ ಬಳಿಕ ತಮ್ಮನ್ನು ತಾವು, ಮನೆಯ ವಾತಾವರಣಕ್ಕೆ ಹೊಂದಿಸಿಕೊಳ್ಳಬಲ್ಲರು.
ಮಕ್ಕಳ ಪ್ರಶ್ನೆಗಳಿಗೆ ಹಾರಿಕೆ ಉತ್ತರ ಬೇಡ : ನಿಮ್ಮ ಉತ್ತರಗಳಿಂದ ಮಗುವಿಗೆ ಸಮಾಧಾನ, ಸಂತೃಪ್ತಿ ಸಿಗುವಂತಿರಲಿ. ಇಲ್ಲದಿದ್ದರೆ ತನಗೆ ತೋಚಿದಂತೆ ಯಾವುದೋ ಸಂದರ್ಭದಲ್ಲಿ ಅದನ್ನು ಧುತ್ತೆಂದು ನಿಮ್ಮ ಮುಂದೆ ಪ್ರಸ್ತುತಪಡಿಸುತ್ತಾ, ರಿಪೀಟ್ ಮಾಡಬಹುದು. ಆಗ ನಿಮ್ಮ ಮುಜುಗರ ಹೆಚ್ಚುತ್ತದೆ. ಬೇರೆ ಇತರರ ಮುಂದೆ, ಮಗು ನಿಮ್ಮನ್ನು ಇಂಥ ಉಲ್ಟಾ ಸೀದಾ ಪ್ರಶ್ನೆ ಕೇಳತೊಡಗಿದರೆ ಇನ್ನೂ ಕಷ್ಟ. ಹೀಗಾಗಿ ಮಗುವಿನೊಂದಿಗೆ ಭಾವನಾತ್ಮಕ ರೂಪದಲ್ಲಿ ನಿಕಟತೆ ಇರಲಿ. ಯಾವ ಪರಿಸ್ಥಿತಿ ಕಾರಣ, ನೀವು ಸಿಂಗಲ್ ಆಗಬೇಕಾಯಿತು ಎಂದು ಅದಕ್ಕೆ ಅರ್ಥವಾಗುವ ಬಾಲ ಭಾಷೆಯಲ್ಲಿ ಅಗತ್ಯವಿದ್ದಷ್ಟೇ ತಿಳಿಸಿರಿ. ಇದರಿಂದ ಮಗು ನಿಧಾನವಾಗಿ ಮನೆಯ ವಾತಾವರಣಕ್ಕೆ ಹೊಂದಿಕೊಳ್ಳುತ್ತದೆ.
ಮಗುವಿಗೆ ಸದಾ ಸತ್ಯ ತಿಳಿಸಿರಿ : ಮಗುವಿನ ಬಳಿ ಎಂದೂ ಸತ್ಯ ಮುಚ್ಚಿಡಬೇಡಿ, ಸುಳ್ಳು ಬೇಡ, ಉತ್ಪ್ರೇಕ್ಷೆಯ ಮಾತು ಬೇಡ! ಮುಂದೆ ಒಂದು ದಿನ ಅದಕ್ಕೆ ಸತ್ಯ ಏನೆಂಬುದು ಖಂಡಿತಾ ಗೊತ್ತಾಗುತ್ತದೆ, ಆಗ ನಿಮ್ಮ ಪರಿಸ್ಥಿತಿ ಅಯೋಮಯ ಆಗಿಬಿಡಬಾರದು.
ನನ್ನ ಗೆಳತಿ ರೋಜಾ ತನ್ನ ಗಂಡನ ಕೀಳು ವ್ಯವಹಾರಗಳಿಂದ ಬೇಸತ್ತು, ಮಗುವಿನ ಜೊತೆ ಬೇರೆ ಆಗಿದ್ದಳು. ಕೆಲಸ ಇದ್ದುದರಿಂದ ಆರ್ಥಿಕವಾಗಿ ಕಷ್ಟ ಪಡಬೇಕಾಗಿ ಬರಲಿಲ್ಲ. ಬೇಕಾದ ಅನುಕೂಲ ಇದ್ದರೂ, ಮಗುವಿನ ಮುಗ್ಧ ಪ್ರಶ್ನೆಗಳಿಂದಾಗಿ ಸದಾ ಟೆನ್ಶನ್‌ ಗೆ ಒಳಗಾಗುತ್ತಿದ್ದಳು. ವಿಶೇಷವಾಗಿ ತಂದೆ ತಮ್ಮೊಂದಿಗಿಲ್ಲವೇಕೆ ಎಂದು ಮಗು ಪದೇ ಪದೇ ಕೇಳತೊಡಗಿದಾಗ ಅವಳು ಹೆಚ್ಚು ಇರಿಟೇಟ್‌ ಆಗುತ್ತಿದ್ದಳು. ನೀನು ಬೆಳೆದು ದೊಡ್ಡವನಾದ ಮೇಲೆ ನಿನಗೇ ಗೊತ್ತಾಗುತ್ತದೆ ಎಂದು ಮಗುವಿನ ಬಾಯಿ ಮುಚ್ಚಿಸುತ್ತಿದ್ದಳು. ಈಗ ಮೊದಲು ಓದಿನ ಕಡೆ ಗಮನ ಕೊಡು, ಒಳ್ಳೆ ಫ್ರೆಂಡ್ಸ್ ಸಹವಾಸ ಇರಲಿ ಎಂದು ಮಾತು ಮರೆಸುತ್ತಿದ್ದಳು. ನಿನಗೆ ಇಲ್ಲೇನು ಕೊರತೆ ಇಲ್ಲ ತಾನೇ….? ಎಂದು ಸಿಡುಕಿಬಿಡುವಳು. ಆದರೆ ಹೀಗೆ ಮಗುವಿನ ಪ್ರಶ್ನೆಗಳನ್ನು ಬಲವಂತವಾಗಿ ಹತ್ತಿಕ್ಕುವುದು ಸರಿಯಲ್ಲ. ಇದರಿಂದ ಮಗು ಮನದಲ್ಲೇ ನೊಂದುಕೊಳ್ಳುತ್ತದೆ, ತನ್ನ ಬಗ್ಗೆ ಕೀಳರಿಮೆ ಬೆಳೆಸಿಕೊಳ್ಳಬಹುದು. ಕೆಲವು ಮಕ್ಕಳು ಆಕಸ್ಮಿಕವಾಗಿ ಬರುವ ನಿಮ್ಮ ನೆಂಟರನ್ನೇ ಈ ಬಗ್ಗೆ ಕೇಳಬಹುದು. ಅವರ ಕಡೆಯಿಂದ ಮಗುವನ್ನು ದಾರಿ ತಪ್ಪಿಸುವ ಉತ್ತರಗಳೇ ಬರಬಹುದು. ಇದರಿಂದ ಮಗುವಿಗೂ, ನಿಮಗೂ ಹಿಂಸೆ ತಪ್ಪಿದ್ದಲ್ಲ. ಹೀಗಾಗಿ ನೀವೇ ಮಗುವಿಗೆ ಸರಿ ದಾರಿ ತೋರಿಸಿ.
ಹಿರಿಯರ ಕುರಿತು ಮಗುವಿನ ಎದುರು ಆಡಿಕೊಳ್ಳಬೇಡಿ : ನೀವು ಸಿಂಗಲ್ ಮದರ್‌ ಆಗಿರುವುದರಿಂದ, ಇತರ ತಾಯಂದಿರಿಗಿಂತ ನಿಮ್ಮ ಜವಾಬ್ದಾರಿ 2 ಪಟ್ಟು ಹೆಚ್ಚು. ಮಗು ನಿಮ್ಮ ಬಳಿ ಇರುವುದರಿಂದ, ಅದು ಕಲಿಯುವ ಸಂಸ್ಕಾರ ನಿಮ್ಮನ್ನೇ ಅವಲಂಬಿಸಿದೆ. ಮಗುವಿನ ಸಂಪೂರ್ಣ ಬೆಳವಣಿಗೆಯ ಹೊಣೆ ನಿಮ್ಮದು. ಮಗು ಮಾಡುವ ತಪ್ಪನ್ನು ತಕ್ಷಣ ಸರಿಪಡಿಸಿ, ಉತ್ತಮ ಸಂಸ್ಕಾರಕ್ಕಾಗಿ ಅದನ್ನು ಹದ್ದುಬಸ್ತಿನಲ್ಲಿಟ್ಟು ಬೆಳೆಸಿರಿ. ಈ ಶಿಸ್ತು ಮೊದ ಮೊದಲು ಮಗುವಿಗೆ ಕಷ್ಟಕರ ಎನಿಸಿದರೂ, ನಂತರ ಸಹಜವಾಗುತ್ತದೆ. ಇದರಿಂದ ಬೇಕಾದಷ್ಟು ಕಲಿಯುವಂತಾಗುತ್ತದೆ. ನಿಮ್ಮನ್ನು ಹೊಗಳುವವರು, ಅಸೂಯೆಪಡುವವರಿಗೆ ಕಡಿಮೆ ಏನಿಲ್ಲ.
ಎಷ್ಟೋ ಸಲ ಮಗು ಹೊರಗಿನವರಿಂದ ಅದರ ತಂದೆ ಬಹಳ ಒಳ್ಳೆಯವನಾಗಿದ್ದ, ಅದರ ಅಮ್ಮನಿಂದಲೇ ಹೀಗೆ ಅಪ್ಪ ಇಲ್ಲದಂತೆ ಆಗಿದೆ, ಎಂದೆಲ್ಲ ಮಾತು ಕೇಳಿಸಿಕೊಂಡು ಬರುತ್ತದೆ. ಆಗ ನೀವು ಇಂಥ ಮಾತು ಹೇಳಿದರು ಹಾಗೇ ಹೀಗೆ ಎಂದೆಲ್ಲ ಮಗುವಿನ ಮುಂದೆ ಅವರನ್ನು ಅಂದು ಆಡಬೇಡಿ. ಆದಷ್ಟೂ ಸಮಾಧಾನ ತಂದುಕೊಂಡು ಮಗುವಿನ ಒಂದೊಂದೇ ಸಂದೇಹಕ್ಕೆ ಪರಿಹಾರ ಸೂಚಿಸಿ. ಪತಿ, ನೆಂಟರು, ಸಮಾಜ ನಿಮ್ಮನ್ನು ಕೀಳಾಗಿ ನಡೆಸಿಕೊಂಡ ವಿಚಾರಗಳನ್ನೆಲ್ಲ ಮಗುವಿನ ಬಳಿ ಹೇಳಬೇಡಿ. ಅದರ ಮನಸ್ಸು ತಿಳಿಯಾಗುವಂತೆ ಅಗತ್ಯವಿದ್ದಷ್ಟು ಮಾಹಿತಿ ಕೊಡಿ, ಸಾಕು. ಮಗುವಿನ ಮನಸ್ಸಿನಲ್ಲಿ ನಕಾರಾತ್ಮಕತೆ ತುಂಬದಿರಿ, ಸಕಾರಾತ್ಮಕತೆ ತುಂಬಿರಿ. ಮಗುವಿಗೆ ಮೊದಲು ಸತ್ಯಾಂಶ ಏನೆಂದು ಮನದಟ್ಟು ಮಾಡಿಸಿ, ಅನಗತ್ಯ ಜನರ ಸಹವಾಸಕ್ಕೆ ಹೋಗಬಾರದು ಎಂಬುದನ್ನು ಸೂಕ್ಷ್ಮವಾಗಿ ತಿಳಿಸಿಕೊಡಿ.
ಮಗುವಿನ ಯಾವುದೇ ಒಂದು ಸಣ್ಣ ಪ್ರಶ್ನೆಯನ್ನೂ ಅದೇ ಕೊನೆ ಪ್ರಶ್ನೆ ಎಂದು ಖಂಡಿತಾ ಪರಿಗಣಿಸಬೇಡಿ! ಅದು ತನ್ನ ವಯಸ್ಸಿಗೆ, ಬುದ್ಧಿಗೆ ತೋಚಿದಂತೆ ಪ್ರಶ್ನೆ ಕೇಳುತ್ತಾ ಇರುತ್ತದೆ. ನೀವು ಅದರ ಕುತೂಹಲಕ್ಕೆ ತಕ್ಕಂತೆ, ತರ್ಕಬದ್ಧವಾಗಿ ಉತ್ತರಿಸಿ. ಹೀಗಾದಾಗ ಮಾತ್ರ ಮಗು ಉದ್ನಿಗ್ನತೆಯಿಂದ ದೂರವಾಗಿ, ನಿಮ್ಮ ಆಶ್ರಯದಲ್ಲಿ ಒಬ್ಬ ಉತ್ತಮ ನಾಗರಿಕನಾಗಿ ರೂಪುಗೊಳ್ಳಲು ಸಾಧ್ಯ.
– ಪ್ರಮೀಳಾ ರಾವ್
