ಹದಿಹರೆಯಕ್ಕೆ ಕಾಲಿಡುತ್ತಿರುವ ಪ್ರತಿಯೊಬ್ಬ ಹುಡುಗಿಗೂ ತನ್ನ ಅತಿ ನಿಕಟವರ್ತಿಯಿಂದ, ಅವಳು 100% ನಂಬಿಕೆ ಇರಿಸಬಹುದಾದ ವಿಶ್ವಾಸಾರ್ಹ ಮಾಹಿತಿ ಅತ್ಯಗತ್ಯ ಬೇಕು. ಇಂಥ ವಿಷಯವನ್ನು ಹಿರಿಯಕ್ಕ, ತಾಯಿ ಮುಂತಾದವರು ಮಾತ್ರವೇ ಗೈಡ್‌ ಮಾಡಲು ಸಾಧ್ಯ. ಅದರಲ್ಲೂ ತಾಯಿಯ ಜವಾಬ್ದಾರಿ ಮಹತ್ವಪೂರ್ಣವಾದುದು.
ಎಷ್ಟೋ ಸಲ ಮನೆಯ ಹಿರಿಯ ಹೆಂಗಸರಾದ ಇಂಥವರಿಗೇ ಈ ಕುರಿತು ಸಲಹೆ ನೀಡುವಷ್ಟು ತಿಳಿವಳಿಕೆ ಇರುವುದಿಲ್ಲ. ಅವರು ಹೊರಗಿನ ಮೂಲದಿಂದ ಈ ಕುರಿತು ಮಾಹಿತಿ ಪಡೆಯಲಿಕ್ಕೂ ಯತ್ನಿಸುವುದಿಲ್ಲ. ಕೆಲವರಿಗೆ ಬೇರೆ ಭಾಷೆಯಾದ ಕಾರಣ, ಇನ್ನಾವುದೋ ಕಾರಣದಿಂದ, ಸಾಮಾನ್ಯವಾಗಿ ಸೂಕ್ತ ಮಾಧ್ಯಮದ ಕೊರತೆಯಿಂದ ದೊಡ್ಡ ಸಮಸ್ಯೆಯಾಗಿ ಕಾಡುತ್ತದೆ.
ಹೀಗಾಗಿಯೇ ಕಿಶೋರಾವಸ್ಥೆಗೆ ಕಾಲಿಡುತ್ತಿರುವ ಹದಿಹರೆಯದ ಹೆಣ್ಣುಕ್ಕಳಿಗೆಂದೇ ಅವರ ಸಮಸ್ಯೆಗಳನ್ನು ಪರಿಹರಿಸಲು ಮುಂದಾಗಿದ್ದಾರೆ ಅದಿತಿ ಗುಪ್ತಾ. ಆಕೆ ಮೆನ್ಸ್ಟ್ರುಪೀಡಿಯಾ ಎಂಬ ವೆಬ್‌ಸೈಟ್‌ ಲಾಂಚ್‌ ಮಾಡಿದ್ದಾರೆ. ಇದರಲ್ಲಿ ಮುಟ್ಟಿನ ಕುರಿತಾದ ಸಮಸ್ತ ಮಾಹಿತಿಗಳು, ಆರೋಗ್ಯ ಸ್ವಚ್ಛತೆಯ ಕುರಿತಾಗಿ ಸಮಾಜಕ್ಕೆ ಶಿಕ್ಷಣ ನೀಡುವ ಪ್ರಯಾಸದಲ್ಲಿದ್ದಾರೆ. ನಮ್ಮ ಸಮಾಜದಲ್ಲಿ ಇದರ ಕುರಿತಾಗಿ ಇರುವ ಮೂಢನಂಬಿಕೆ, ಕಂದಾಚಾರದ ಪದ್ಧತಿಗಳು ತಪ್ಪಬೇಕೆಂಬುದೇ ಅವರ ಗುರಿ.
ಜಾರ್ಖಂಡ್‌ ರಾಜ್ಯದ ಸಣ್ಣ ಊರಾದ ಗಢ್ವಾದ ಮೂಲದವರಾದ ಅದಿತಿ, ಪ್ರಾಥಮಿಕ ಶಿಕ್ಷಣವನ್ನು ಗಢ್ವಾ, ರಾಂಚಿಗಳಲ್ಲಿ ಪಡೆದರು. ನಂತರ ಆಕೆ ಆಗ್ರಾದಲ್ಲಿ ಎಲೆಕ್ಟ್ರಾನಿಕ್ಸ್ ನಲ್ಲಿ ಎಂಜಿನಿಯರಿಂಗ್‌ ಮಾಡಿದರು. ನಂತರ ಅಹಮದಾಬಾದ್‌ನಲ್ಲಿ `ದಿ ನ್ಯಾಷನಲ್ ಇನ್‌ಸ್ಟಿಟ್ಯೂಟ್‌ ಆಫ್‌ ಡಿಸೈನ್‌’ ವಿಷಯದಲ್ಲಿ ಪಿ.ಜಿ. ಮುಗಿಸಿದರು.
ಈ ಸಂಸ್ಥೆಯನ್ನು ಸ್ಥಾಪಿಸಲು ಈಕೆಗಿದ್ದ ಮುಖ್ಯ ಉದ್ದೇಶವೆಂದರೆ, ಎಲ್ಲಾ ಹುಡುಗಿಯರು ಹಾಗೂ ಅವರ ಮನೆಯ ಹಿರಿಹೆಂಗಸರಿಗೆ ಮುಟ್ಟಿನ ಕುರಿತಾಗಿ ಸಂಪೂರ್ಣ ಮಾಹಿತಿ ಒದಗಿಸುವುದು ಹಾಗೂ ಎಲ್ಲಾ ಹೆಂಗಸರೂ ಆ 3 ದಿನಗಳನ್ನು ಯಮಯಾತನೆಯಾಗಿ ಭಾವಿಸದೆ, ಸಹಜವಾಗಿ ಎದುರಿಸಬೇಕು ಎಂಬುದು. ಆಕೆ ಹೇಳುವುದೆಂದರೆ, ಈ ವೆಬ್‌ಸೈಟ್‌ ಮೂಲಕ ನಾವು ಇಡೀ ಭಾರತೀಯ ಸಮಾಜದಲ್ಲಿ ಜಾಗೃತಿ ಮೂಡಿಸುತ್ತಿದ್ದೇವೆ. ಹೀಗಾಗಿ ಈ ವಿಷಯದ ಕುರಿತು ಅತ್ಯಧಿಕ ಮಾಹಿತಿಯನ್ನು ಎಲ್ಲರಿಗೂ ತಲುಪಿಸುತ್ತೇವೆ.
ಅದರಿಂದ ಜನ ಇದರ ಕುರಿತು ಕೂಲಂಕಷವಾಗಿ ತಿಳಿದುಕೊಂಡು ತಮ್ಮ ಸಂಸ್ಥೆಯವರೊಂದಿಗೆ ಮಾತನಾಡಿ ಸಂದೇಹ ನಿವಾರಿಸಿಕೊಂಡು ಅದನ್ನು ಬೇರೆಯವರಿಗೂ ತಿಳಿಸಿಕೊಡಬೇಕೆಂಬುದು.ಅದಿತಿ ಹೇಳುತ್ತಾರೆ, “ಪ್ರತಿ ತಿಂಗಳೂ ನಮ್ಮ ವೆಬ್‌ಸೈಟ್‌ನ್ನು ಕನಿಷ್ಠ 2 ಲಕ್ಷ ಮಂದಿ ಗಮನಿಸುತ್ತಾರೆ. ಈ ವೆಬ್‌ಸೈಟ್‌ನಲ್ಲಿ 3 ಮುಖ್ಯ ಅನುಕೂಲಗಳಿವೆ. ಕ್ವಿಕ್‌ ಗೈಡ್‌, ಪ್ರಶ್ನೆ ಉತ್ತರ ಮತ್ತು ಬ್ಲಾಗ್‌. ಇದರ ಮೂಲಕ ಜನ ಮುಟ್ಟಿಗೆ ಸಂಬಂಧಿಸಿದ ಎಲ್ಲಾ ವಿಷಯಗಳನ್ನೂ ತಿಳಿಯಬಹುದಾಗಿದೆ. ಪ್ರಶ್ನೆ ಕೇಳಿ ಸಂದೇಹ ನಿವಾರಿಸಿಕೊಳ್ಳಬಹುದು. ವ್ಯಾವಹಾರಿಕ ಲೇಖನಗಳನ್ನೂ ಬರೆಯಬಹುದು. ನಾವು 90 ಪುಟಗಳ ಒಂದು ಕಾಮಿಕ್ಸ್ ಸಹ ಮಾಡಿದ್ದೇವೆ, ಇದು ಹಿಂದಿ, ಆಂಗ್ಲ ಭಾಷೆಗಳಲ್ಲಿ ಲಭ್ಯ. ಇಷ್ಟರಲ್ಲಿ ಇತರ ಎಲ್ಲಾ ಭಾರತೀಯ ಭಾಷೆಗಳಿಗೂ ಅನುವಾದ ಆಗಲಿದೆ.”
ಮೂಲ ಪ್ರೇರಣೆ
ಈ ಕುರಿತಾಗಿ ಅದಿತಿ, “ನಾನು ನನ್ನ ಜೀವನದಲ್ಲಿ ಮುಟ್ಟಿನ ಕುರಿತಾಗಿ ಅನೇಕ ಹಿಂಸೆಗಳನ್ನು ಅನುಭವಿಸಿದ್ದೇನೆ, ಒಂದೊಂದಾಗಿ ಪರಿಹಾರ ಕಂಡುಕೊಂಡಿದ್ದೇನೆ. ಆದರೆ ಈ ಕುರಿತಾಗಿ ನನಗೆ ಹೆಚ್ಚಿನ ಮಾಹಿತಿ ಸಿಗುವುದಕ್ಕಿಂತ, ಬರೀ ಕಾಲ್ಪನಿಕ ಕಥೆಗಳೇ ಸಿಕ್ಕವು. ಅನೇಕ ಅಡ್ಡಿ ಅಡಚಣೆಯ ಸೀಮಾರೇಖೆಗಳಿದ್ದವು. ಇದೆಲ್ಲವನ್ನೂ ತಿಳಿದು ನನ್ನ ಆತ್ಮವಿಶ್ವಾಸ ಹಾಗೂ ಸ್ವಾಭಿಮಾನಕ್ಕೆ ಆಳವಾದ ಪರಿಣಾಮ ಉಂಟಾಯಿತು.
“ಈ ಎಲ್ಲಾ ಜಂಜಾಟಗಳಿಂದ ಮುಕ್ತವಾಗಿ ಹೊರಬರಲು ನನಗೆ ಹಲವು ವರ್ಷಗಳೇ ಬೇಕಾಯ್ತು. ಹಾಗಿರುವಾಗ ವಿಶ್ವದಲ್ಲಿ ಎಷ್ಟು ಕೋಟ್ಯಂತರ ಮಹಿಳೆಯರಿಗೆ ಇಂಥ ಸವಾಲುಗಳನ್ನು ಎದುರಿಸಬೇಕಾಗಿದೆಯೋ ಎನಿಸಿತು. ಹೀಗಾಗಿ ನಾನು ಅಸಿಸ್ಟೆಂಟ್‌ ರಿಸರ್ಚ್‌ ಹೆಸರಿನಲ್ಲಿ ಪೇರ್ಡ್‌ ಫೌಂಡೇಶನ್‌ ಎಂಬ ಸಂಸ್ಥೆ ಜೊತೆ ಕೆಲಸ ಮಾಡಿದೆ.
“ನಾನು ಗುಜರಾತ್‌ನ ಗಾಂಧಿನಗರ, ಅಹಮದಾಬಾದ್‌ ಮಾತ್ರವಲ್ಲದೆ, ಜಾರ್ಖಂಡ್‌ನ ರಾಂಚಿ, ಮೆಹಸಾನಾ ಮುಂತಾದ ನಗರಗಳಲ್ಲೂ ಸಂಶೋಧನಾ ಕಾರ್ಯ ಮುಂದುವರಿಸಿದೆ. ಆ ನೆಪದಲ್ಲಿ ಹಲವಾರು ಪ್ರೌಢಶಾಲಾ ವಿದ್ಯಾರ್ಥಿನಿಯರು, ಸರ್ಕಾರೇತರ ಸಂಘ ಸಂಸ್ಥೆಗಳೊಡನೆ ಸೇರಿ ಹಲವು ಸಾವಿರ ಹೆಂಗಸರೊಡನೆ ಚರ್ಚಿಸಿದಾಗ, ಅವರುಗಳೆಲ್ಲ ಸಾಮಾಜಿಕ ಕಟ್ಟುಪಾಡುಗಳಿಂದಾಗಿ ಆತ್ಮವಿಶ್ವಾಸ ಕಳೆದುಕೊಂಡಿದ್ದಾರೆ ಎಂದು ತಿಳಿಯಿತು. ಹುಡುಗಿ ಮೊದಲ ಸಲ ಪುಷ್ಪವತಿಯಾದಾಗಲೇ ಅವಳಿಗೆ ಈ ಕುರಿತು ಸಂಪೂರ್ಣ ಮಾಹಿತಿ ಒದಗಿಸಬೇಕಾದುದು ಅತ್ಯಗತ್ಯ,” ಎನ್ನುತ್ತಾರೆ.
ಯಶಸ್ಸಿಗೆ ಅಡ್ಡಿಯಾದುದು ಧರ್ಮ
ಈ ನಿಟ್ಟಿನಲ್ಲಿ ಹೆಂಗಸರನ್ನು ಮೂಲೆಗುಂಪಾಗಿಸಿರುವ ಧರ್ಮದ ಬಗ್ಗೆ ಅದಿತಿ ಹೇಳುತ್ತಾರೆ, “ಧರ್ಮದ ಹೆಸರಿನಲ್ಲಿ ಏನೇನೋ ನಂಬಿಕೆ, ಆಚರಣೆಗಳು ರೂಢಿಗೆ ಬಂದಿದ್ದು ಅವಕ್ಕೆ ಆಧಾರಗಳೇ ಇಲ್ಲವಾಗಿವೆ. ಅವನ್ನು ಬಿಟ್ಟು ಇರಲಾಗದು. ಮುಟ್ಟಾದ ಮಗಳಿಗೆ ತಾಯಿ ಹಲವು ಹನ್ನೊಂದು ಕಟ್ಟುಪಾಡುಗಳನ್ನು ಹೇರುತ್ತಾಳೆ. ಅಂಥ ಹುಡುಗಿ ಏನನ್ನೂ ಮುಟ್ಟುವ ಹಾಗಿಲ್ಲ. ಇದು ತಲೆಮಾರಿನಿಂದ ತಲೆಮಾರಿಗೆ ಸಾಗಿಬಂದಿದೆ. ಯಾವಾಗ ಹೆಣ್ಣು ಗಟ್ಟಿಯಾಗಿ ನಿಂತು ಇವನ್ನು ಎದುರಿಸುತ್ತಾಳೋ, ಆಗ ಮಾತ್ರ ಮುಟ್ಟಿನ ಕುರಿತಾದ ಈ ಸಮಸ್ಯೆಗಳಿಂದ ಹೊರಬರಲು ಸಾಧ್ಯ.”
ಕರಕುಶಲಕಲೆಯ ಹವ್ಯಾಸ
ಬಿಡುವಿದ್ದಾಗ ಅದಿತಿ ಕರಕುಶಲ ಕಲೆಗಳಲ್ಲಿ ಪಳಗಿಕೊಳ್ಳುತ್ತಾರೆ, “ನನಗೆ ಇದರಲ್ಲಿ ಆಸಕ್ತಿ ಹೆಚ್ಚು. ನಾನು ಪೇಪರ್‌ ಕಪ್ಸ್ ನಿಂದ ರಾಂಪ್‌ ಮತ್ತು ಲಾಟೀನುಗಳ ಡಿಸೈನ್ಸ್ ಮಾಡ್ತೀನಿ. ಅವನ್ನು ಮಾಡುವ ವಿಧಾನವನ್ನು ನಾನು ಇಂಟರ್‌ನೆಟ್‌ನಲ್ಲಿ ವಿವರಿಸಿದಾಗ, ನನಗೊಬ್ಬಳು ಲಾಹೋರ್‌ನ ಹೊಸ ಗೆಳತಿ ಸಿಕ್ಕಿದಳು. ಅವಳು ಆ ಲಾಟೀನುಗಳನ್ನು ಅಲ್ಲಿ ಚೆನ್ನಾಗಿ ಮಾರಾಟ ಕೂಡ ಮಾಡಿದಳು. ಇತ್ತೀಚೆಗೆ ಆಕೆ ಈ ಕುರಿತು ಫೆಸ್ಟಿವಲ್ ಸಹ ಏರ್ಪಡಿಸಿದ್ದಳು. ಅಲ್ಲಿ 100ಕ್ಕೂ ಅಧಿಕ ಲಾಟೀನುಗಳ ಡಿಸೈನ್‌ಗಳು ಜನಪ್ರಿಯಗೊಂಡವು. ನಾನು ಸಚಿತ್ರ ಪೋಸ್ಟ್ ಕಾರ್ಡ್‌ಗಳನ್ನೂ ಮಾಡ್ತೀನಿ.”
ಫಿಟ್‌ನೆಸ್‌ ರಹಸ್ಯ
ಫಿಟ್‌ನೆಸ್‌ಗಾಗಿ ಬಳಸಿಕೊಂಡ ಸಮಯವನ್ನು ಅದಿತಿ ತಮ್ಮ ಪತಿ ಜೊತೆ ಕಳೆದ ಕ್ವಾಲಿಟಿ ಟೈಂ ಎಂದು ಭಾವಿಸುತ್ತಾರೆ. “ನಾನು ಮತ್ತು ನನ್ನ ಪತಿ ಆರೋಗ್ಯದ ವಿಷಯದಲ್ಲಿ ಬಹಳ ಜಾಗೃತರಾಗಿದ್ದೇವೆ. ನಾವು ಯೋಗ, ಈಜು, ಇತರ ವ್ಯಾಯಾಮಗಳನ್ನೂ ಮಾಡುತ್ತೇವೆ. ಇದನ್ನು ಮಾಡಲಾಗದ ದಿನಗಳಲ್ಲಿ 56 ಕಿ.ಮೀ. ವಾಕಿಂಗ್‌ ಹೋಗುತ್ತೇವೆ. ಈ ಸಮಯ ನಮ್ಮ ಇಡೀ ದಿನದ ಅತ್ಯುತ್ತಮ ವೇಳೆ ಎಂದು ಭಾವಿಸುತ್ತೇನೆ. ಏಕೆಂದರೆ ಆ ಹೊತ್ತು ನಾವು ಕೆಲಸ, ಕಂಪ್ಯೂಟರ್‌ಗಳಿಂದ ದೂರ ಇರುತ್ತೇವೆ. ಆ ಹೊತ್ತಿನಲ್ಲಿ ಹೊಳೆದ ಐಡಿಯಾಗಳನ್ನು ನನ್ನ ಕೆಲಸಕ್ಕಾಗಿ ಬಳಸುತ್ತೇನೆ.”
ಮಹಿಳೆಯರಿಗೆ ಸಂದೇಶ
ಪ್ರಗತಿಪರ ಮಹಿಳೆಯರಿಗೆ ಸಂದೇಶ ನೀಡುತ್ತಾ ಅದಿತಿ ಹೇಳುತ್ತಾರೆ, ನಿಮ್ಮನ್ನು ಯಾವ ವ್ಯಕ್ತಿಯೇ ಆಗಲಿ ಅದು ಇದು ಮಾಡಬೇಡಿರೆಂದು ತಡೆಯೊಡ್ಡಿದರೆ, ಅದು ಬೇರಾರೋ ಆಗಿರದೆ ನೀವೇ ಆಗಿರುತ್ತೀರಿ. ನಿಮ್ಮಲ್ಲಿನ ಹಿಂಜರಿಕೆಯೇ ನೀವು ಏನನ್ನೂ ಮಾಡದಂತೆ ತಡೆಯುತ್ತಿರುತ್ತದೆ. ಹಾಗಿರುವಾಗ ನೀವು ನಿಮ್ಮ ಮೇಲೆ ಹೆಚ್ಚಿನ ವಿಶ್ವಾಸವಿಟ್ಟು, ನಿರ್ಭೀತಿಯಿಂದ ನಿಮ್ಮ ಕನಸುಗಳನ್ನು ನನಸಾಗಿಸಿಕೊಳ್ಳಬೇಕು.
– ಪ್ರಭಾವ ಮಾಧವ
