ಭಾರತದ ಆಗ್ರಾದಲ್ಲಿ ನಿರ್ಮಾಣಗೊಂಡ ಅದ್ವಿತೀಯ ಪ್ರೇಮದ ಪ್ರತೀಕ ತಾಜ್‌ಮಹಲ್ ತನ್ನದೇ ಆದ ಸೌಂದರ್ಯ, ಭವ್ಯತೆ ಮತ್ತು ಆಕರ್ಷಣೆಯ ಕಾರಣದಿಂದ ವಿಶ್ವದ 7 ಅದ್ಭುತಗಳಲ್ಲಿ ಒಂದಾಗಿದೆ. ಇದು ಜಗತ್ತಿನ ಏಕೈಕ ಪ್ರೇಮ ಸ್ಮಾರಕವಾಗಿದೆ.
ಆಗ್ರಾದ ತಾಜ್‌ಮಹಲ್‌ನ್ನು ನೋಡಿದ ಬಳಿಕ ನನಗೆ ಅಂಥದೇ ಪ್ರೇಮ ಸ್ಮಾರಕವೊಂದನ್ನು ನೋಡುವ ಅವಕಾಶ ಈಚೆಗಷ್ಟೇ ದೊರಕಿತು. ಕಳೆದ ಡಿಸೆಂಬರ್‌ನಲ್ಲಿ ನಮಗೆ ಕೆನಡಾದ ಟೋರಾಂಟೊ ಹಾಗೂ ಅಕ್ಕಪಕ್ಕದ ಸ್ಥಳಗಳನ್ನು ನೋಡುವ ಅವಕಾಶ ದೊರಕಿತು. ಕೆನಡಾದ 1000 ಐಲ್ಯಾಡ್ಸ್ ನಲ್ಲಿರುವ ಈ ಹಾರ್ಟ್‌ ಲ್ಯಾಂಡಿನಲ್ಲಿರುವ ಬೋಲ್ಟ್ ಕ್ಯಾಸ್‌ರ ಕಥೆ ಹಾಗೂ ಅದರ ಭವ್ಯತೆಯ ಬಗ್ಗೆ ನಾನು ಬಹಳಷ್ಟು ಕೇಳಿದ್ದೆವು.
ಒಂದು ವೈಭವದ ಮಹಲು
1000 ಐಲ್ಯಾಂಡಿನ ರಾಕ್‌ ಪೋರ್ಟಿನಿಂದ ನಾವು ಅಮೆರಿಕದ ಗಡಿರೇಖೆಯ ಬಳಿ ಇರುವ ಹಾರ್ಟ್‌ ಲ್ಯಾಂಡಿಗೆ ಹೋಗುವ ಕ್ರೂಸ್‌ನ ಟಿಕೆಟ್‌ ಖರೀದಿಸಿ ಲಾರೆನ್ಸ್ ನದಿಯಲ್ಲಿ ಹಾರ್ಟ್‌ ಲ್ಯಾಂಡಿನತ್ತ ಪ್ರಯಾಣ ಬೆಳೆಸಿದೆವು.
ಸುಮಾರು 45 ನಿಮಿಷಗಳ ಪ್ರಯಾಣದ ಬಳಿಕ ನದಿಯ ನಾಲ್ಕೂ ಬದಿಯ ವಿಭಿನ್ನ ದೃಶ್ಯಗಳನ್ನು ಕಣ್ಣಲ್ಲಿ ತುಂಬಿಸಿಕೊಳ್ಳುತ್ತ ನಮ್ಮ ಕ್ರೂಸ್‌ ಹಾರ್ಟ್‌ ಲ್ಯಾಂಡಿನ ದಡ ತಲುಪಿತು. ಎದುರಿನಲ್ಲಿಯೇ ಕಾಣುತ್ತಿದ್ದ ಒಂದು ಭವ್ಯ ಕಟ್ಟಡದತ್ತ ಕೈ ಮಾಡಿ ತೋರಿಸುತ್ತಾ ಇದೇ ಬೋಲ್ಟ್ ಕ್ಯಾಸೆಲ್ ಎಂದ. ಬೋಲ್ಟ್ ಕ್ಯಾಸೆಲ್ ಒಂದು ಹೆಸರು. ಆದರೆ ಅದೊಂದು ವಿಶಾಲಕಾಯ ಸ್ಮಾರಕದ ರೀತಿಯಲ್ಲಿ ಭವ್ಯವಾಗಿತ್ತು.
ನಾವು ಕ್ರೂಸ್‌ನಿಂದ ಇಳಿದು ಹೋಟೆಲ್‌ನ ಕಡೆ ಹೊರಟೆವು. ಬಳಿಕ ಆ ಗೈಡ್‌ ಹೇಳಿದ ವಿಷಯ ಬಹಳ ರೋಚಕವಾಗಿತ್ತು. 1851ರಲ್ಲಿ ಜನಿಸಿದ ಜಾರ್ಜ್‌ ಚಾರ್ಲ್ಸ್ ಬೋಲ್ಟ್ ಅಮೆರಿಕದ ಒಬ್ಬ ಕೋಟ್ಯಧೀಶನಾಗಿದ್ದ. ಅವನು ಅಮೆರಿಕದಲ್ಲಿ ದೊಡ್ಡ ದೊಡ್ಡ ಹೋಟೆಲ್ ನಿರ್ಮಿಸುವುದರಲ್ಲಿ ನಿಷ್ಣಾತನಾಗಿದ್ದ.
ಯುವಕನಿದ್ದಾಗಲೇ ಅವನದು ಆಕರ್ಷಕ ವ್ಯಕ್ತಿತ್ವ, ಬೇರೆಯವರನ್ನು ಪ್ರಭಾವಿತಗೊಳಿಸುವ ಸಾಮರ್ಥ್ಯ ಹೊಂದಿದ್ದರಿಂದ ಅವನಿಗೆ ಫಿಲಡೆಲ್ಛಿಯಾದ ಒಂದು ಕ್ಲಬ್‌ನಲ್ಲಿ ಅಸಿಸ್ಟೆಂಟ್‌ ಮ್ಯಾನೇಜರ್‌ ಹುದ್ದೆಗೆ ನೇಮಕವಾಯಿತು. ಕ್ಲಬ್ಬಿನ ಮ್ಯಾನೇಜರ್‌ ಮಗಳು ಲೂಯಿಸ್‌ ತನ್ನ ತಂದೆಗೆ ನೆರವಾಗಲು ಆಗಾಗ ಹೋಟೆಲ್‌ಗೆ ಬರುತ್ತಿದ್ದಳು. ಲೂಯಿಸ್‌ ಅಪ್ರತಿಮ ಸುಂದರಿ. ಅವಳ ಬಂಗಾರ ವರ್ಣದ ಕೂದಲು, ಹಾಲಿನಲ್ಲಿ ಅದ್ದಿ ತೆಗೆದಂತಹ ಬೆಳ್ಳಗಿನ ದೇಹ, ಮುಖದಲ್ಲಿ ಸದಾ ಮಿನುಗುತ್ತಿದ್ದ ಮುಗುಳ್ನಗೆ ಬೋಲ್ಟ್ ಗೆ ತುಂಬಾ ಹಿಡಿಸಿಬಿಟ್ಟಿತು. ಅವನು ಅವಳ ಅಭಿಮಾನಿಯಾಗಿಬಿಟ್ಟಿದ್ದ.
ಅಕ್ಕಪಕ್ಕದ ಹುಡುಗರಂತೂ ಅವಳ ಒಂದು ಮುಗುಳ್ನಗೆಯ ಚಮಕ್‌ ನೋಡಲು ಹೋಟೆಲ್‌ಗೆ ಬರುತ್ತಿದ್ದರು. ಬೋಲ್ಟ್ ಕೂಡ ಅವಳನ್ನು ಆರಾಧಿಸಲಾರಂಭಿಸಿದ್ದ. ಕ್ರಮೇಣ ಅವರಿಬ್ಬರ ಮಧ್ಯೆ ಪ್ರೀತಿ ಅಂಕುರಿಸಿತು. 1877ರಲ್ಲಿ ಅವರ ಪ್ರೀತಿ ಮದುವೆಯಲ್ಲಿ ಪರಿವರ್ತನೆಗೊಂಡಿತು. ಮದುವೆಯ ಬಳಿಕ ಅವರು ಫಿಲಡೆಲ್ಛಿಯಾದಲ್ಲಿ `ಹೋಟೆಲ್ ಬೋಲ್ಟ್ ವ್ಯಾಲಿ' ನಿರ್ಮಿಸಿದರು. ಹೋಟೆಲ್‌ನ ಪ್ರತಿಯೊಂದು ಕೋಣೆಯಲ್ಲಿ ಲೂಯಿಸ್‌ ಮಾಡಿದ ಡಿಸೈನ್ಸ್ ನಿಂದಾಗಿ ಆ ಹೋಟೆಲ್ ಬಹಳ ಪ್ರಸಿದ್ಧಿ ಪಡೆಯಿತು.
ಈ ಹೋಟೆಲಿನ ಅತ್ಯಂತ ರುಚಿ ರುಚಿಯಾದ ಆಹಾರ ರಾಜಮನೆತನದವರ ತನಕ ತಲುಪಿತು. ಹೀಗಾಗಿ ಇವರಿಬ್ಬರ ಪರಿಚಯ ವಿಶೇಷ ವ್ಯಕ್ತಿಗಳಲ್ಲಿ ಒಬ್ಬರೆಂಬಂತೆ ಆಗತೊಡಗಿತು. ಈ ಒಂದು ಆಪ್ತ ಸಂಬಂಧದಿಂದಾಗಿ ನ್ಯೂಯಾರ್ಕ್‌ನಲ್ಲಿ ನಿರ್ಮಾಣವಾಗುತ್ತಿದ್ದ ಅತ್ಯಂತ ದೊಡ್ಡ ಹೋಟೆಲ್`ವಾರ್ಡಿಫ್‌'ಗೆ ಜಾರ್ಜ್‌ ಬೋಲ್ಟ್ ನನ್ನು ಪ್ರೊಪ್ರೈಟರ್‌ ಎಂದು ನೇಮಕ ಮಾಡಲಾಯಿತು.
