ಕೆಲವು ತಿಂಗಳುಗಳ ಹಿಂದೆ ಮುಂಬೈನಲ್ಲಿ ಕೆಲವು ಜನರ ಒಂದು ತಂಡವನ್ನು ಬಂಧಿಸಲಾಯಿತು. ಅವರಿಂದ ಸುಮಾರು 12ಕ್ಕೂ ಹೆಚ್ಚು ಯುವತಿಯರನ್ನು ಮುಕ್ತಗೊಳಿಸಲಾಯಿತು. ಆ ಯುವತಿಯರನ್ನು ಬಾರ್‌ ಗರ್ಲ್ ಆಗಿಸಿ ದೇಹ ವ್ಯಾಪಾರದ ಅನೈತಿಕ ಕಾರ್ಯದಲ್ಲಿ ತೊಡಗಿಸಲಾಗಿತ್ತು. ಅವರೆಲ್ಲರಲ್ಲಿ ಒಂದು ಸಮಾನತೆ ಇತ್ತು. ಅವರೆಲ್ಲ ಸುಂದರಿಯರಾಗಿದ್ದರು. ಅವರು ಮಾಡೆಲ್‌ಆಗಬೇಕೆಂಬ, ಟಿ.ವಿ. ಅಥವಾ ಸಿನಿಮಾ ತಾರೆಯರಾಗಬೇಕೆಂಬ ಅಭಿಲಾಷೆ ಹೊತ್ತು ಬಂದಿದ್ದರು.
ಆದರೆ ಕೆಲವು ತಿಂಗಳುಗಳ ಬಳಿಕ ಸ್ಛೋಟಗೊಂಡ ಸುದ್ಧಿ ಭಯಾನಕವಾಗಿತ್ತು. ಆ `ಗುಂಪಿನ ಸದಸ್ಯರು' ಬೇರೆ ಬೇರೆ ನಗರಗಳಲ್ಲಿ ಜಾಹೀರಾತು ಕೊಟ್ಟು ಅವರನ್ನು ಸಂದರ್ಶನ ಮಾಡಿ ತಮ್ಮ ಬಳಿ ಕರೆಸಿಕೊಂಡಿದ್ದರು. ಅವರಲ್ಲಿ ಹುದುಗಿದ್ದ ಆಕಾಂಕ್ಷೆಯನ್ನು ಹುರಿದುಂಬಿಸಿ, ಅವರಿಗೆ ತೋರಿಸಿದ ದೃಶ್ಯ ಬಹಳ ರೋಮಾಂಚನಕಾರಿಯಾಗಿತ್ತು. ಅದರಲ್ಲಿ ಯಾವುದೇ ಹುಡುಗಿ ಬಲಿ ಬೀಳಬಹುದಾಗಿತ್ತು. ಕೆಲವು ದಿನಗಳ ತರಬೇತಿ ಬಳಿಕ ನಿಮಗೆ ಟಿ.ವಿ. ಹಾಗೂ ಸಿನಿಮಾಗಳಲ್ಲಿ ಅವಕಾಶ ದೊರಕಿಸಿ ಕೊಡಲಾಗುವುದೆಂದು ಹೇಳಿದ್ದರು.
ಆದರೆ ಆದದ್ದೇನು? ಇದೇ ಆಸೆ ಹೊತ್ತು ಅವರೆಲ್ಲ ಮುಂಬೈಗೆ ಬಂದರು. ಅಲ್ಲಿ ಅವರಿಗೆ ಅಸಭ್ಯ ದೇಹಪ್ರದರ್ಶನ ಮಾಡುವಂತಹ ನೃತ್ಯಗಳ ತರಬೇತಿ ನೀಡಲಾಯಿತು. ನೀವೆಲ್ಲ ಆಧುನಿಕತೆ ಬೆಳೆಸಿಕೊಳ್ಳಬೇಕು ಎಂದು ಅವರಿಗೆ ಹೇಳುತ್ತ ಅವರ ಲೈಂಗಿಕ ಶೋಷಣೆ ಮಾಡಲಾರಂಭಿಸಿದರು. ಚಿತ್ರೀಕರಣದ ನೆಪದಲ್ಲಿ ಅವರ ಪೋರ್ನ್‌ ಚಿತ್ರ ತಯಾರಿಸಲಾಯಿತು. ಕೊನೆಯಲ್ಲಿ ಅವರಿಗೆ ಹೋಟೆಲ್‌ಗಳಲ್ಲಿ ಡ್ಯಾನ್ಸರ್‌ ಮತ್ತು ಕಾಲ್ ಗರ್ಲ್ ಕೆಲಸ ಕೊಡಿಸಲಾಯಿತು. ಜೊತೆಗೆ ಅವರನ್ನು ಹೈಪ್ರೊಫೈಲ್ ಕಾಲ್ ಗರ್ಲ್ ಆಗಿಸಿ ಅವರ ಹಿಡಿತವನ್ನು ತಮ್ಮ ಕೈಯಲ್ಲಿ ಇಟ್ಟುಕೊಂಡರು. ಏಕೆಂದರೆ ದೇಹ ಮಾರಾಟದ ಈ ದಂಧೆಯಿಂದ ಬರುವ ಅಪಾರ ಪ್ರಮಾಣದ ಹಣವನ್ನು ತಾವೇ ಎಗರಿಸುವುದಾಗಿತ್ತು. ಅವರನ್ನು ಮುಕ್ತಗೊಳಿಸುವ ಹೊತ್ತಿಗೆ ಅವರು ತುಂಬಾ ಹೆದರಿದ್ದರು. ಯಾರ ವಿರುದ್ಧ ಅವರು ಒಂದು ಶಬ್ದ ಮಾತನಾಡಲು ಇಷ್ಟಪಡುತ್ತಿರಲಿಲ್ಲ. ಏಕೆಂದರೆ ಬ್ಲ್ಯಾಕ್‌ಮೇಲ್ ಭಯದಿಂದ ಅವರು ಲೈಂಗಿಕ ಒತ್ತೆಯಾಳಿನಂತಾಗಿದ್ದರು.
ಜಾಲಕ್ಕೆ ಸಿಲುಕಿಸುವ ಹುನ್ನಾರ ಲೈಂಗಿಕ ಒತ್ತೆಯಾಳಾಗಿಟ್ಟುಕೊಳ್ಳುವ ಉನ್ನತ ಮಟ್ಟದ ಪ್ರಕರಣಗಳ ಮೇಲೆ ಗಮನಹರಿಸಿ. ಅವು ದೇಶವನ್ನೇ ಬೆಚ್ಚಿಬೀಳಿಸಿವೆ.
ಹರಿಯಾಣದ ಹಿಸ್ಸಾರ್‌ನ ಘಟನೆಯೊಂದನ್ನು ನೋಡಿ. ಗೀತಿಕಾ ಎಂಬ ಯುವತಿ ಗೋಪಾಲ ಕಾಂಡಾ ಎಂಬ ರಾಜಕಾರಣಿಯ ಕಪಿಮುಷ್ಠಿಗೆ ಸಿಲುಕಿದ್ದಳು. ಇದು ಕೂಡ ಅಂಥದೇ ಪ್ರಕರಣವಾಗಿತ್ತು. ಗೀತಿಕಾ ಮೊದಲು ಗೋವಾದ ಒಂದು ಕ್ಯಾಸಿನೊದಲ್ಲಿ ಕೆಲಸ ಮಾಡುತ್ತಿದ್ದಳು. ಅಲ್ಲಿಯೇ ಅವಳು ಗೋಪಾಲ್ ಕಾಂಡಾ ಸಂಪರ್ಕಕ್ಕೆ ಬಂದಿದ್ದಳು. ಅವಳಿಗೆ ಏನೇನೋ ಆಸೆ ತೋರಿಸಿ ತನ್ನ ಜಾಲದಲ್ಲಿ ಸಿಲುಕಿಸಿದ. ಮೀನಿಗೆ ಕಾಳು ಹಾಕುವ ರೀತಿಯಲ್ಲಿ ಅವಳಿಗೆ ತನ್ನದೇ ಆದ ಏರ್‌ಲೈನ್ಸ್ ನಲ್ಲಿ ಕೆಲಸ ಕೊಡಿಸಿ ಲೈಂಗಿಕ ಒತ್ತೆಯಾಳಿನಂತೆ ಇರಿಸಿಕೊಂಡ. ಉನ್ನತ ಹುದ್ದೆಯಲ್ಲಿದ್ದುಕೊಂಡು ಅವನು ಅವಳ ಮೇಲೆ ತನ್ನ ಹಿಡಿತವನ್ನು ಮತ್ತಷ್ಟು ಬಿಗಿಗೊಳಿಸಿದ.
ತನ್ನ ಪರಿಸ್ಥಿತಿ ಅರಿವಾದಾಗ ಆಕೆ ಆ ಕಂಪನಿಯನ್ನು ಬಿಟ್ಟು ಬೇರೊಂದು ಏರ್‌ಲೈನ್ಸ್ ನಲ್ಲಿ ಕೆಲಸ ಹುಡುಕಿದಳು. ಇಷ್ಟಾಗಿಯೂ ಗೋಪಾಲ್ ಕಾಂಡಾ ಅವಳನ್ನು ಹಿಂಬಾಲಿಸುವುದನ್ನು ಬಿಟ್ಟಿರಲಿಲ್ಲ. ಅವಳ ಮೇಲೆ ಆರೋಪ ಹೊರಿಸಿ ಆ ಕಂಪನಿಯಿಂದ ಹೊರಬರುವಂತೆ ಮಾಡಿದನಲ್ಲದೆ, ತನ್ನದೇ ಏರ್‌ಲೈನ್ಸ್ ನಲ್ಲಿ ಸೇರಿಕೊಳ್ಳುವಂತೆ ಒತ್ತಡ ಹೇರಿದ. ಆ ಬಳಿಕ ಅವನು ಅವಳನ್ನು ಲೈಂಗಿಕವಾಗಿ ಅದೆಷ್ಟು ಹಿಂಸಿಸಿದನೆಂದರೆ ಕೊನೆಗೊಮ್ಮೆ ಅವಳು ಆತ್ಮಹತ್ಯೆ ಮಾಡಿಕೊಳ್ಳಬೇಕಾದ ಪ್ರಸಂಗ ಎದುರಾಯಿತು.
