ಅತಿ ಎತ್ತರಕ್ಕೆ ಮುಗಿಲು ಚುಂಬಿಸುವ ಕಟ್ಟಡಗಳನ್ನು ಎಬ್ಬಿಸಬೇಕು ಎಂಬ ಗೀಳು ಮನುಷ್ಯನಲ್ಲಿ ಕುಡಿಯೊಡೆದದ್ದು 20ನೇ ಶತಮಾನದ ಆರಂಭದಲ್ಲಿ ಎನ್ನಬೇಕು. ಈ ಗೀಳಿನ ಮೊದಲ ಪ್ರಯತ್ನಗಳ ಫಲಶೃತಿಗಳು ಅಮೆರಿಕಾದಲ್ಲಿ ಕಾಣಬಂತು. 1931ರಲ್ಲಿ ನಿರ್ಮಾಣಗೊಂಡ ನ್ಯೂಯಾರ್ಕಿನ `ಎಂಪೈರ್‌ ಸ್ಟೇಟ್‌ ಕಟ್ಟಡ’ 1971ರವರೆಗೂ ಜಗತ್ತಿನ ಅತಿ ಎತ್ತರದ ಕಟ್ಟಡವಾಗಿತ್ತು. ಆಮೇಲೆ ಅದೇ ನೂಯಾರ್ಕಿನ `ವರ್ಲ್ಡ್ ಟ್ರೇಡ್‌ ಸೆಂಟರ್‌’ ಎರಡು ವರ್ಷಗಳ ಕಾಲ ಎತ್ತರದ ದಾಖಲೆ ಹೊಂದಿತ್ತು. ಆನಂತರ ಶಿಕಾಗೋದ `ಸಿಯರ್ಸ್‌ ಟವರ್‌,’ ಕೌಲಾಲಂಪುರದ `ಪೆಟ್ರೊನಾಸ್‌ ಟವರ್‌,’ ತೈಪೆಯ `ತೈಪೆ 101′ ಕಟ್ಟಡಗಳು 2010ರವರೆಗೆ ಅತಿ ಎತ್ತರದ ದಾಖಲೆಯನ್ನು ಕ್ರಮವಾಗಿ ಎತ್ತರಿಸುತ್ತ ಬಂದವು.
ಅದೇ ವರ್ಷ ಈ ಎಲ್ಲವುಗಳ ದಾಖಲೆಯನ್ನು ಮುರಿದದ್ದು ದುಬೈನ `ಬುರ್ಜ್‌ ಖಲೀಫಾ.’ ಸದ್ಯಕ್ಕೆ ಅದೇ ಜಗತ್ತಿನ ಅತಿ ಎತ್ತರದ ಕಟ್ಟಡ (828 ಮೀಟರ್‌ಗಳು). ಈಗ ಸೌದಿ ಅರೇಬಿಯಾದಲ್ಲಿ ನಿರ್ಮಾಣಗೊಳ್ಳುತ್ತಿರುವ `ಜೆಡ್ಡಾ ಟವರ್‌’ (1,000 ಮೀಟರ್‌ಗಳು). 2021ರಲ್ಲಿ ಬುರ್ಜ್‌ ಖಲೀಫಾದಿಂದ ಆ ದಾಖಲೆಯನ್ನು ಕಸಿದುಕೊಳ್ಳಲಿದೆಯಂತೆ. ಇದನ್ನೂ ಮೀರಿಸುವ ಕಟ್ಟಡವೊಂದಕ್ಕೆ ದುಬೈನಲ್ಲೇ ಈಗಾಗಲೇ ಅಡಿಪಾಯ ಹಾಕಲಾಗುತ್ತಿದೆ! ಈ ಪೈಪೋಟಿ ಎಲ್ಲಿಗೆ ಹೋಗಿ ಮುಟ್ಟುತ್ತದೋ ಗೊತ್ತಿಲ್ಲ. ಪೈಪೋಟಿ ಆರಂಭಿಸಿದ ಅಮೆರಿಕಾ ಈಗ ಮಧ್ಯಮ ಗಾತ್ರದ ಕಟ್ಟಡಗಳನ್ನು ಕಟ್ಟಿಕೊಂಡು ಸುಮ್ಮನಾಗಿಬಿಟ್ಟಿದೆ.
ಸಂಯುಕ್ತ ಅರಬ್‌ ಎಮಿರೇಟ್ಸ್ ನಲ್ಲಿ ಒಂದು ನಗರವಿದೆ. ಅದುವೇ ಅಬುಧಾಬಿ. ದೇಶದ ರಾಜಧಾನಿ ನಗರ. ಸಿರಿವಂತ ನಗರ, ಸ್ವಚ್ಛ, ಪ್ರಶಾಂತ, ಅಚ್ಚುಕಟ್ಟುತನವೇ ಎದ್ದುಕಾಣುವ ನಗರ. ಈ ನಗರದ ಕಟ್ಟಡಗಳು ಮಾತ್ರ ಮುಗಿಲು ಮುಟ್ಟಲು ಹೆಚ್ಚು ಹಾತೊರೆಯದೆ ವಿಭಿನ್ನ ವಿನ್ಯಾಸ ಮತ್ತು ಆಕಾರಗಳಿಂದ ಜಗತ್ತಿನೆಲ್ಲೆಡೆಯಿಂದ ಬರುವ ಪ್ರವಾಸಿಗರ ಗಮನ ಸೆಳೆಯುತ್ತವೆ.
`ವಾವ್‌! ವಾಸ್ತುಶಿಲ್ಪವೆಂದರೆ ಹೀಗಿರಬೇಕು,’ ಎನ್ನಿಸುವಂತಿರುವ ಇಲ್ಲಿನ ಕೆಲವು ಕಟ್ಟಡಗಳು `ಫೋಟೋಸ್ಟಾಪ್‌’ಗಾಗಿಯೇ ಕೈಬೀಸಿ ಕರೆಯುತ್ತವೆ. ಪಕ್ಕದ ದುಬೈನಲ್ಲಿರುವ ಕಟ್ಟಡಗಳ ಜೊತೆ ಎತ್ತರದಲ್ಲಿ ಇವು ಸ್ಪರ್ಧೆಗೆ ನಿಲ್ಲಲಾರವು. ಆದರೆ ತಮ್ಮದೇ ಬಗೆಯಲ್ಲಿ ಆಕರ್ಷಕವೆನಿಸುತ್ತವೆ. ಇದರ ಅರಿವು ಇರುವುದರಿಂದಲೋ ಏನೋ ಅಬುಧಾಬಿಯ ಆಡಳಿತ ಈ ಬಗೆಯ ಕಟ್ಟಡಗಳನ್ನೇ ಪ್ರೋತ್ಸಾಹಿಸುತ್ತಿದೆ.
ಕಟ್ಟಡಗಳ ಬೆನ್ನು ಹತ್ತಿ ನಾವು ಸಂಯುಕ್ತ ಅರಬ್‌ ಎಮಿರೇಟ್ಸ್ ಗೆ ಭೇಟಿ ಕೊಡುವುದು ಖಚಿತವಾದಾಗ, ನಮ್ಮ ಭೇಟಿಯ ಪಟ್ಟಿಯಲ್ಲಿ ಅಬುಧಾಬಿಯ ಕಟ್ಟಡಗಳನ್ನು ಪ್ರಜ್ಞಾಪೂರ್ಕವಾಗಿ ಸೇರಿಸಿಕೊಂಡೆವು. ಅವುಗಳ ಒಳಗಣ ವೈಭವ ಮತ್ತು ಸೌಂದರ್ಯವನ್ನು ಸವಿಯಲು ಸಮಯ ಸಾಕಷ್ಟು ಇರಲಿಲ್ಲವಾದರೂ ಹೊರಗಿನಿಂದಲೇ ವಾಸ್ತುಶಿಲ್ಪವನ್ನು ಕಂಡುಬಂದೆವು. ಅಂತಹ ಕೆಲವನ್ನು ಇಲ್ಲಿ ಪರಿಚಯಿಸುವೆ. ಅಬುಧಾಬಿಯ ಎತ್ತರದ ಮುಗಿಲಚುಂಬಿಯೆಂದರೆ `ಬುರ್ಜ್‌ ಮೊಹಮ್ಮದ್‌ ಬಿನ್‌ ರಷೀದ್‌’ ಕಟ್ಟಡ. ಇದು ವಿಖ್ಯಾತ ಕಾರ್ನಿಷೆ ರಸ್ತೆಯಲ್ಲಿದೆ. ತಲೆಯನ್ನು ಓರೆಯಾಗಿ ತಟ್ಟನೆ ಕತ್ತರಿಸಿದಂತೆ ಇದರ ಎತ್ತರ ಕೊನೆಗೊಳ್ಳುತ್ತದೆ. ಇದರ ಒಂದು ಬದಿಯಲ್ಲಿರುವ `ಲ್ಯಾಂಡ್‌ಮಾರ್ಕ್‌’ ಕಟ್ಟಡ ಅಬುಧಾಬಿಯ ಎರಡನೇ ಎತ್ತರದ ಕಟ್ಟಡ. ಬುಡದಲ್ಲಿ ಇಸ್ಲಾಮಿಕ್‌ ಶೈಲಿಯ ಜ್ಯಾಮಿತಿಯನ್ನು ಹೋಲುವ ರಚನೆ ಇದರ ವಿಶೇಷ.ಇದರ ಎದುರಿಗಿರುವ `ಅಬುಧಾಬಿ ಇನ್‌ವೆಸ್ಟ್ ಮೆಂಟ್‌ ಅಥಾರಿಟಿ’ ಕಟ್ಟಡದ ಮೇಲ್ಭಾಗ ಸೀರೆಯ ನೆರಿಗೆಗಳು ಹೊರಳಿಕೊಂಡಂತೆ ಇರುವುದು ವಿಲಕ್ಷಣವೆನಿಸುತ್ತದೆ. ಕಾರ್ನಿಷೆ ರಸ್ತೆಯ ಇನ್ನೊಂದು ತುದಿಯಲ್ಲಿ `ಸೆಬಾ ಟವರ್‌’ ಇದೆ. ಇವು ಅವಳಿ ಕಟ್ಟಡಗಳು. ಇದನ್ನು ದಾಟಿ ದಕ್ಷಿಣಕ್ಕೆ ಮುಂದುವರಿದರೆ ಸರ್ಕಾರಿ ಒಡೆತನದಲ್ಲಿರುವ `ಅಬುಧಾಬಿ ನ್ಯಾಷನಲ್ ಆಯಿಲ್ ಕಂಪನಿ’ಯ ಮುಖ್ಯ ಕಛೇರಿಯ (ಲಂಬವಾಗಿ ಚಾಚಿಕೊಂಡ) ಆಯಾತಾಕಾರದ ಕಟ್ಟಡವಿದೆ. ಹೊರಭಾಗದ ಎರಡು ಪಾರ್ಶ್ವಗಳಲ್ಲಿ ಪೂರ್ತಿ ಗ್ರಾನೈಟ್‌ನ ಸ್ಲ್ಯಾಬ್‌ಗಳನ್ನು ಹೊದಿಸಿದ ಜಗತ್ತಿನ ಅತಿ ಎತ್ತರದ ಕಟ್ಟಡ ಎಂದು ಇಂದು ಖ್ಯಾತವಾಗಿದೆ. ಇದರ ಸನಿಹದಲ್ಲೇ `ಎತಿಹಾಡ್‌’ ಹೆಸರಿನ ಐದು ಅಸಮ ಎತ್ತರದ ಕಟ್ಟಡಗಳ ಸಂಕೀರ್ಣವಿದೆ. ನಡುಭಾಗದಲ್ಲಿ ಉಬ್ಬಿದಂತಿರುವ ಈ ಕಟ್ಟಡಗಳು ಮುಖಕ್ಕೆ ಮುಖ ಹತ್ತಿರ ತಂದು ಪರಸ್ಪರ ಪಿಸುಗುಟ್ಟಿಕೊಳ್ಳುತ್ತಿವೆಯೇನೋ ಎಂದು ಭಾಸವಾಗುತ್ತದೆ.
ಈ ಕಟ್ಟಡಗಳನ್ನು ಹಾಲಿವುಡ್‌ನ `ಫಾಸ್ಟ್ ಅಂಡ್‌ ಫ್ಯೂರಿಯಸ್‌’ ಸರಣಿಯ ಸಿನಿಮಾ ಚಿತ್ರೀಕರಣಗಳಲ್ಲಿ ಸಾಹಸಮಯ ದೃಶ್ಯಗಳಿಗಾಗಿ ಬಳಸಿಕೊಳ್ಳಲಾಗಿದೆ. ನಾವು ಎದುರುಬದಿಯ ಕಡಲತೀರದಲ್ಲಿ ನಿಂತು ನೇಷನ್‌ ಟವರ್ಸ್, ಎತಿಹಾಡ್‌ ಕಟ್ಟಡಗಳನ್ನು ಒಂದೇ ಫ್ರೇಮ್ ನಲ್ಲಿ ಸುಂದರವಾದ ಫೋಟೋ ತೆಗೆಯಬಹುದು. ಈ ಎಲ್ಲವುಗಳನ್ನು ನೋಡಿದ ಮೇಲೆ ಶೇಕ್‌ ರಶೀದ್‌ ಬಿನ್‌ ಸಯೀದ್‌ ರಸ್ತೆಗೆ ಸನಿಹವಿರುವ ದೂರಸಂರ್ಪಕ ಇಲಾಖೆಯ `ಎಟಿಸಾಟ್‌’ ಕಟ್ಟಡವನ್ನು ಕಾಣಬೇಕು. ಇದರ ನೆತ್ತಿಯಲ್ಲಿ ಒಂದು ಭೂಗೋಳದ ರಚನೆ ವಿಶಿಷ್ಟಿನಿಸುತ್ತದೆ.
ಅಬುಧಾಬಿಯ ಇನ್ನು ಮೂರು ಕಟ್ಟಡಗಳನ್ನು ಕಾಣದೆ ನಮ್ಮ ಪ್ರವಾಸ ಪೂರ್ಣವಾಗುವುದಿಲ್ಲ. ಅವೇ `ಕ್ಯಾಪಿಟಲ್ ಗೇಟ್‌,’ `ಅಲ್ ದಾರ್‌’ ಮತ್ತು `ಅಲ್ ಬಹ್‌್ರ’ ಅವಳಿ ಕಟ್ಟಡಗಳು. ಅಲ್ ಮ್ತುಲಾಖಾ ರಸ್ತೆಯಲ್ಲಿರುವ ಕ್ಯಾಪಿಟಲ್ ಗೇಟ್‌ನ್ನು `ಅಬುಧಾಬಿಯ ಬಾಗಿದ ಗೋಪುರ’ ಎಂದು ಕರೆಯಲಾಗುತ್ತದೆ. ಈ ಕಟ್ಟಡ ಲಂಬರೇಖೆಗೆ 18 ಡಿಗ್ರಿ ಪಶ್ಚಿಮಕ್ಕೆ ವಾಲಿಕೊಂಡಿದೆ. ಜಗತ್ತಿನಲ್ಲೇ ಅತಿ ಹೆಚ್ಚು ವಾಲಿಕೊಂಡ ಕಟ್ಟಡ ಎಂಬ ಖ್ಯಾತಿ ಇದರದ್ದು. ಇಟಲಿಯ ಚಾರಿತ್ರಿಕ ಪೀಸಾ ಗೋಪುರ ಕೇವಲ ನಾಲ್ಕು ಡಿಗ್ರಿಯಷ್ಟು ವಾಲಿದೆ. ಪೂರಾ ಗಾಜಿನ ಹಾಳೆಗಳಿಂದ ಆವೃತವಾದ ಕ್ಯಾಪಿಟಲ್ ಗೇಟ್‌ ಬಿಸಿಲಿಗೆ ಹೊಳೆಯುತ್ತದೆ. `ರಾಷ್ಟ್ರೀಯ ಅಳಿವೆ ಉದ್ಯಾನವನ’ದ ಸನಿಹ ಇರುವ ತೊಂಡೆಕಾಯಿ ಆಕೃತಿಯಲ್ಲಿರುವ ಅವಳಿ ಕಟ್ಟಡಗಳನ್ನು ಸಾವಿರಾರು ಗಾಜಿನ ಛತ್ರಿಗಳ ಜಾಲರಿಯಿಂದ ಮುಚ್ಚಲಾಗಿದೆ. ಸೂರ್ಯನ ಚಲನೆಯ ದಿಕ್ಕಿಗೆ ಅನುಗುಣವಾಗಿ ಈ ಛತ್ರಿಗಳು ಮುಚ್ಚುವುದು ತೆರೆಯುವುದು ನಡೆಯುತ್ತಿರುತ್ತದೆ. ಇವನ್ನು ದುಬೈ ಹೈವೇನಲ್ಲಿರುವ ಅಲ್ ದಾರ್‌ ಕಟ್ಟಡ ಉಬ್ಬು ಮಸೂರದಂತಿದ್ದು ವರ್ತುಲಾಕಾರವನ್ನು ಹೊಂದಿದೆ. ಗುರುತ್ವಕ್ಕೆ ಈ ಆಕಾರ ಒಂದು ಸವಾಲೇ ಸರಿ. ಹೀಗೇ ಅಬುಧಾಬಿಯ ಕಟ್ಟಡಗಳ ಕಥೆ ಒಂದೊಂದು ಬಗೆಯಿದೆ. ಆರ್ಕಿಟೆಕ್ಚರ್‌ ವಿದ್ಯಾರ್ಥಿಗಳ ಮಟ್ಟಿಗೆ ಒಂದೊಂದು ಕಟ್ಟಡ ಅಧ್ಯಯನಯೋಗ್ಯ ಎಂದು ನನ್ನ ಭಾವನೆ.
ಅಬುಧಾಬಿಗೆ ತೆರಳುವ ಅವಕಾಶ ಸಿಕ್ಕರೆ ಹಿಂದಕ್ಕೆ ಶುಭ್ರ ನೀಲಿ ಆಗಸ ಮತ್ತು ಮುಂದಕ್ಕೆ ಸ್ವಚ್ಛ ನೀಲಿ ಕಡಲನ್ನಿಟ್ಟುಕೊಂಡು ಥಳಥಳಿಸುವ ಅಲ್ಲಿನ ಕಟ್ಟಡಗಳ ಸೌಂದರ್ಯವನ್ನು ಹೊರಗಿನಿಂದಾದರೂ ಸವಿದು ಬನ್ನಿ. ಏಕೆಂದರೆ ಹಲವು ಕಟ್ಟಡಗಳು ಕಛೇರಿಗಳೋ, ಫೈವ್‌ ಸ್ಟಾರ್‌ ದುಬಾರಿ ಹೋಟೆಲ್‌ಗಳೋ ಅಥವಾ ಅಪಾರ್ಟ್‌ಮೆಂಟ್‌ಗಳೋ ಆಗಿರುವುದರಿಂದ ಸಾಮಾನ್ಯ ಪ್ರವಾಸಿಗರಿಗೆ ಒಳಗೆ ಪ್ರವೇಶಾವಕಾಶ ಇರುವುದಿಲ್ಲ.
– ಕೆ.ಎಸ್‌. ರವಿಕುಮಾರ್‌
